Zolo ya nzoku

● Bato ya mayele bazali kobimisa lobɔkɔ moko ya robo oyo ekosala makambo ebele. Mokambi ya departema oyo ebimisaka barobo ya sika na kompanyi moko alobi ete lobɔkɔ yango ya sika “eleki masini nyonso mosusu oyo bato bazali kosalela na baizine.” Ndenge nini bazwaki likanisi ya kosala yango? Alobi boye: “Na kolanda ndenge oyo zolo ya nzoku esalaka.”

Talá naino: Zolo ya nzoku ezalaka na kilo soki 140. Bato balobaka ete ezali “enama moko ya nzoto oyo esalaka makambo ebele mpe ya ntina koleka binama mosusu nyonso.” Nzoku esalelaka yango mpo na kopema, komɛla mai, lokola lobɔkɔ mpo na kotombola biloko ya kilo, lokola misapi mpo na kolɔkɔta biloko ya mike. Na zolo yango nzoku ekoki kobenda mpema, koyoka nsolo, kokanga eloko, to koganga na mongongo makasi koleka!

Kasi esuki wana te. Zolo ya nzoku ezali na misisa soki 40 000 oyo esalisaka yango ekende ngambo nyonso oyo elingi. Na nsɔngɛ ya zolo yango, nzoku ekoki kolɔkɔta ata mwa mbongo ya ebende ya moke. Ekoki mpe kosalela yango mpo na kotombola biloko ya kilo 270!

Bato ya mayele bazali kolikya ete soki basali barobo oyo esalaka misala ndenge na ndenge lokola zolo ya nzoku, ekosalisa bango mingi na misala ya ndako mpe na baizine. Mokambi ya kompanyi oyo tolobeli na ebandeli alobi ete: “Tobimisi barobo ya sika mpenza mpo na kosalisa bato; mpe mpo na mbala ya liboso, barobo yango ekosala esika moko na bato kozanga likama.”

Okanisi nini? Zolo ya nzoku ebimá kaka yango moko? To basalaki yango kosala?