Ekokoló ya lingangalá ya Namibie oyo ebombaka mai

● Na mokili mobimba, bato soki milio 900 bazangi mai ya pɛto ya komɛla. Na bisika mingi, basi mpe bana nde batambolaka na makolo bakilomɛtrɛ ebele mpo na koluka mai. Shreerang Chhatre, oyo azali ingénieur na eteyelo ya makambo etali bamasini na engumba Massachusetts, alobi boye: “Ezali mpenza mpasi komona mobola azali kotambola bangonga mingi na mokolo kaka mpo na koluka mai.” Mpo na kosalisa bato bázwa mai, Chhatre ná baninga na ye bazali koyekola ndenge ya kozwa mai ya londende to mamwɛ; mpo na yango bazali koyekola ndenge lingangalá ya Namibie esalaka.

Talá naino: Ntɔngɔ nyonso, londende ebimaka na esobe ya ekólo Namibie, na Afrika. Lingangalá ya Namibie mpe ebimaka kaka na ntango wana mpe epumbwaka na ngambo mopɛpɛ ezali koya, na ndenge moko ebongi.a Matutu oyo ezali na ekokoló na yango ezali na nguya ya kobenda mwa mai ya londende. Mwa mai yango ya londende ekómaka matangá minene. Na nsima, nguya babengi pesanteur ememaka mai yango na nse ya mapapu na mwa banzela oyo ezali na ekokoló, mpe ekɔtaka na monɔkɔ ya lingangalá.

Chhatre mpe baninga na ye bazali na mposa ya kolanda mayele wana mpo na kozwa mai ya komɛla mpo na bato. Ya solo, mpo na kozala na bomoi, bato basengeli na mai mingi koleka lingangalá ya Namibie. Kasi kosala likambo monene bongo ezali mpenza mpasi mpe ekosɛnga mbongo mingi. Chhatre alobi ete mpo na sikoyo, “bazali naino kotalela” mayele wana ya kozwa mai na nzela ya londende.

Okanisi nini? Ekokoló ya lingangalá ya Namibie oyo ebombaka mai, ebimá yango moko? To basalaki yango kosala?

[Maloba na nse ya lokasa]

[Elilingi na lokasa 26]

Mai ya londende esali matangá mpe ekiti na monɔkɔ ya lingangalá

[Eutelo ya bafɔtɔ na lokasa 26]

Fɔtɔ: Chris Mattison Photography/​photographersdirect.com