Mbuma ya wolo na Arménie

● Nzete ya abricot elonamaka banda bambula mingi mpenza na Azia mpe na Mpoto. Bato ya Mpoto bandimaka ete abricot eutá na ekólo Arménie mpe mpo na yango ebengamaka pɔme ya Arménie.

Lelo oyo mitindo koleka 50 ya mbuma yango ekolaka na Arménie. Mbuma yango ebimaka kobanda katikati ya sanza ya Motoba tii na nsuka ya sanza ya Mwambe. Lokola mabele ya Arménie ezalaka na vitamini mingi mpo na bitika ya bavolka mpe moi ebɛtaka makasi kuna, yango esalaka ete mbuma yango ezala elɛngi koleka ya bipai mosusu. Mpe mpo na bato mingi, abricot ya Arménie ezali moko ya ba-abricot ya elɛngi koleka na mokili.

Mbala mingi, mbuma yango ezalaka na bonene lokola lilala mpe langi na yango ezalaka mosaka ya kongɛnga mpe ekómaka na langi ya mosaka ya makasi (orange) soki eteli. Mposo na yango ezalaka pɛtɛpɛtɛ mpe mosuni na yango makasi; ezalaka na mai mingi te mpe ntango ozali kolya yango na ebandeli ezalaka elɛngi mpe na nsuka mwa ngayi. Bato mosusu balobaka ete elɛngi na yango ezalaka lokola mbuma babengi pêche mpe prune.

Bato oyo balonaka yango babimisá abricot ya “moindo,” kasi ezali abricot ya solo te, mpo euti na kosangisa abricot ná prune. Loposo na yango ezali motane-bulé, mpe moindo soki eteli, mpe mosuni na yango ezalaka na langi ya mosaka.

Liboso nzete ya Abricot ebimisa nkasa ebimisaka naino fololo ya langi ya mpɛmbɛ mpe ya nsolo kitoko, oyo emibotisaka yango moko. Fololo na yango ezalaka lokola oyo ya pêche, ya prune, mpe banzete mosusu ya ndenge wana. Mbala mingi banzete yango ebotaka malamu na eleko ya mpiɔ makasi mpe ya molunge makasi mpamba te mpo ebota malamu, esɛngaka ná malili ná molunge. Makambo wana nyonso eyokani na ndenge Arménie ezalaka!

Mbuma ya abricot oyo ekauki te ezalaka malamu mpo na kolɔngɔnɔ ya nzoto. Na ndakisa, ezalaka na eloko babengi bêta-carotène mingi mpe vitamini C. Bato mingi bameseni na yango ya kokauka mpo oyo ekauki te ezalaka pɛtɛɛ mingi mpe epɔlaka noki. Yango wana na bisika mingi, abricot ya kokauka nde eyebani mingi. Lisusu, oyo ekauká esungaka mpenza mpo nzoto ezala kolɔngɔnɔ mpe ezali na biloko babengi fer. Basalelaka yango mpo na kosala masanga ya makasi, ya sukali mpe confiture.

Mayemi oyo esalemi na nzete ya abricot ezalaka kitoko mpenza; na ndakisa doudouk, piololo moko oyo eyebani mingi na Arménie, ebengamaka mpe piololo ya abricot. Na Erevan, mboka-mokonzi ya Arménie, batɛkelaka bapaya mayemi oyo esalemi na nzete ya abricot.

Soki epai na bino mbuma ya abricot ezalaka, lyáká yango. Na ntembe te, okosepela mpenza na mbuma yango ya wolo.