Etuluku ya bambisi

Mbula na mbula, bato koleka milio moko bakufaka na makama ya mituka mpe bato mosusu pene na milio 50 bazokaka. Nzokande, bamilio ya mbisi ekoki konana na etuluku moko kozanga ete etutana. Ndenge nini esalaka yango, mpe liteya nini tokoki kozwa mpo makama ya mituka ebimaka mingi te?

Talá naino: Bambisi oyo ezali konana na etuluku esalelaka miso na yango mpe likoki moko oyo ezalaka na yango ya koyeba makambo oyo ezali zingazinga na yango. Makoki yango esalisaka bambisi eyeba esika bambisi mosusu ezali, mpe eyeba oyo ekoki kosala na ntango wana:

1. Koboya kotuta bambisi mosusu. Bambisi ezwaka nzela mosusu mpo etuta mbisi mosusu te.

2. Kotambola elongo. Mbisi nyonso na kati ya etuluku etambolaka na vitɛsi moko mpe esalaka nyonso mpo ekabwana te na baninga.

3. Kotikala nsima te. Epusanaka pene na mbisi oyo ezali mosika na yango.

Na kolanda mimeseno wana misato ya mbisi, izini moko oyo esalaka mituka na Japon esalaki barobo ya mituka ebele ya mikemike oyo ekoki kotambola na etuluku kozanga ete etutana. Barobo yango ezali na miso te, kasi batyá yango biloko mosusu oyo esalisaka yango eyeba soki motuka mosusu ezali pene na yango; barobo yango ezali mpe na likoki ya koyeba makambo oyo ezali zingazinga te kasi batyá yango nde eloko oyo babengi rayon laser. Ba-ingénieur ya izini yango bandimi ete mayele yango ekosalisa bango básala mituka oyo “ekobanda kotutana te” mpe “ekosalisa basofɛlɛ bázala na boboto mpe mituka ekangamakangama te na nzela.”

Toshiyuki Andou, ingénieur oyo azali kokamba mosala ya kosala mituka yango ya barobo alobi boye: “Tomekolaki ndenge oyo etuluku ya bambisi esalaka mpo na kosala mituka yango ya barobo. Biso baoyo tosalaka mituka, tokoki koyekola makambo mingi epai ya etuluku ya mbisi.”

Okanisi nini? Ndenge oyo bambisi etambolaka na etuluku ebimá kaka yango moko? To basalaki yango kosala?