Matata na libota ebimaka ndenge nini?

SARAH,a oyo afandaka na Ghana mpe akokisi mbula 17 na libala ná Jacob, alobi boye: “Mbala mingi toswanaka mpo na mbongo. Nayokaka nkanda mpo ngai nde nasalaka mingi mpo na kokokisa bamposa ya libota na biso mpe Jacob ayebisaka ngai ata eloko te mpo na mbongo oyo tozali na yango. Tolekisaka bapɔsɔ kozanga ete tólobisana.”

Mobali na ye Jacob, alobi boye: “Ɛɛ, na bantango mosusu tokatelanaka mangala. Ezalaka mingimingi mpo na kozanga koyokana mpe kozanga kosolola malamu. Matata ebimaka mpe mpo toyeisaka makambo minene.”

Na Inde, Nathan, oyo abalaki sika, alobeli makambo oyo elekaki ntango tata-bokilo na ye agangelaki mama-bokilo na ye; alobi boye: “Mama-bokilo na ngai asilikaki mpe alongwaki na ndako. Ntango natunaki tata-bokilo mpo na nini agangelaki ye bongo, amonaki lokola nafingi ye. Na nsima, akómaki kogangela biso nyonso.”

Ntango mosusu omoná ndenge matata mingi ebimá na ndako mpo na maloba mabe. Mbala mosusu, lisolo oyo ebandi na kimya ekoki kobongwana nokinoki koswana. Lokola moto moko te azalaka na likoki ya koloba ntango nyonso makambo ya malamu, yango wana ekoki kozala mpasi te azwa na ndenge ya mabe makambo oyo basusu balobi to akanisela bango mabe. Ata bongo, ekoki kosalema ete bato báyokana mpe bázala na kimya.

Okoki kosala nini soki koswana ebimi? Makambo nini okoki kosala mpo kimya mpe boyokani ezonga na libota? Ndenge nini bato ya libota bakoki kobatela kimya na ndako? Tosɛngi yo otánga yango.