Mituna ya batángi

Etumba ya Armagedona ekozala wapi?

Ekozala te na esika moko boye, kasi nde na mabelé mobimba. Mpo na nini? Lokola babundi ya ngámbo nyonso mibale bazali ebele, bakoki kokoka te na esika moko.

Armagedona, to Hala-magedona, ebengami mpe “etumba ya mokolo monene ya Nzambe Mozwi-na-Nguya Nyonso.” Yehova Nzambe akotinda Mwana na ye, Klisto Yesu, ayanganisa ebele ya baanzelu mpo na kobunda na mampinga nyonso ya bayangeli mabe ya mokili oyo.​—Emoniseli 16:14; 19:11-16.

Satana azali kozimbisa bikólo ya mokili mpo na kokɔtisa bango na etumba yango. Biblia elobi ete “maloba mapemami na bademo” ezali kokende epai ya “bakonzi ya mabelé mobimba oyo efandami, mpo na koyanganisa bango . . . na esika oyo ebengami na Liebele ete Hala-Magedona.”​—Emoniseli 16:14-16.

Koleka mikanda mosusu nyonso ya Biblia, mokanda ya Emoniseli etindaka batángi ya Biblia bábimisa makanisi ndenge na ndenge. Bato mingi oyo bakanisaka ete makambo oyo ekomamá na mokanda ya Emoniseli ekosalema kaka ndenge ekomamá wana balobaka ete ezali mpenza na esika moko epai etumba yango ekobanda, mpe balandelaka mpenza makambo oyo esalemaka na esika yango. Likanisi ete Armagedona ekosalema na esika moko boye ezali na buku ya Oecumenius oyo akomaki na ekeke ya motoba ya ntango na biso (T.B.). Yango ezali moko ya babuku ya liboso ya monɔkɔ ya Grɛki oyo elimbolaki mokanda ya Emoniseli.

Na kolanda likanisi oyo bato mingi bazalaka na yango, John Walvoord, prezida ya kala ya Eteyelo ya teoloji ya Dallas, alobi ete Armagedona ezali “etumba ya nsuka mpe ya nsɔmɔ oyo ekobundama na Moyen-Orient.” Walvoord alobi ete etumba yango ekozala na “‘Ngomba ya Megido,’ mwa ngomba oyo ezali na nɔrdi ya Palestine, na nsuka ya lobwaku moko ya monene.”

Nzokande, mokanda ya Emoniseli eyebisi te esika moko oyo Armagedona ekosalema. Maloba na yango ya ebandeli elobi ete mokanda yango ekomamaki “na bilembo.” (Emoniseli 1:1) Banda kala, Batatoli ya Yehova balobaki na buku na bango (Études des Écritures, volimi 4) boye: “Tókanisa te ete bato bakoyangana mpenza na Ngomba Megido.”

Makambo oyo ezalaki kosalema na Megido esalelami awa mpo na komonisa ete banguna ya Nzambe bakozala na likoki ya kokima te. Yango emonisi ete na Armagedona, Nzambe akosilisa mpenza mabe nyonso na mokili mpe akotika ata esika moko te.​—Emoniseli 21:8.

Bato oyo balingaka Yehova Nzambe mpe Mwana na ye, Yesu Klisto, basengeli kobanga Armagedona te. Etumba ya Nzambe ekoboma kaka bato mabe oyo Nzambe amoni ete bakobongwana lisusu te. Na etumba na ye, akoboma bato bibomelá te. Biblia elobi boye: “Yehova ayebi kosikola . . . bato ya ezaleli ya kokangama na Nzambe.” (2 Petelo 2:9) Na Nzembo 37:34, tozali kokuta elaka moko kitoko oyo elobi boye: “Zelá mpo na [Yehova] mpe batelá nzela na ye, akokembisa yo ete osangola mokili; okomona kobeba ya bato mabe.”