Bato nyonso bazali na libaku ndenge moko ya koyeba Nzambe?

Ntango batunaki ye mobeko nini eleki monene, Yesu alobaki boye: “Osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso.” (Matai 22:37) Kasi, liboso bato bákoka kolinga Nzambe, basengeli kozwa boyebi ya solosolo ya Nzambe. (Yoane 17:3) Bato nyonso bakozwa libaku ndenge moko ya kozwa boyebi yango?

Eloko ya libosoliboso oyo ekoki kopesa biso boyebi ya Nzambe ezali Biblia. (2 Timote 3:16) Bato mingi bafandaka na bisika oyo ezalaka mpasi te mpo na kozwa Biblia. Bato yango bakoki kozwa mbala na mbala libaku ya kozwa boyebi ya solosolo ya Nzambe na nzela ya boyekoli ya Biblia. (Matai 28:19) Bato mosusu babɔkwamaki na baboti oyo bazali bakristo, oyo bazalaki kopesa bana na bango mokolo na mokolo libaku ya koyekola makambo ya Nzambe.​—Kolimbola Mibeko 6:6, 7; Baefese 6:4.

Nzokande, bato mosusu bazwá mpenza mabaku yango te. Bamosusu babɔkwamá na mabota ya mabe, oyo baboti bazalaki komonisa bolingo te epai ya bana na bango. (2 Timote 3:1-5) Baoyo bakolá na mabota ya ndenge wana bakoki kozala na mokakatano ya kotalela Nzambe lokola Tata ya bolingo. Mingi bazwá libaku te ya kokɔta kelasi ya malonga, yango wana bazalaka na likoki te ya kotánga Biblia. Nzokande, bamosusu mateya ya mangomba ya lokuta ezipá makanisi na bango, to bazali na mabota, to bafandaka na bisika to na bikólo oyo bapekisá mateya ya Biblia. (2 Bakorinti 4:4) Makambo ya ndenge wana epekisi bato báyekola makambo ya Nzambe mpe bákóma kolinga ye?

Yesu ayebaki ete mikakatano oyo bato mosusu bakokutana na yango ekopekisa bango kolinga mpe kotosa Nzambe. (Matai 19:23, 24) Kasi, Yesu akundwelaki bayekoli na ye ete soki ezali na makambo mosusu oyo ekoki komonana na miso ya bato ete ekoki kosalema te, “mpo na Nzambe makambo nyonso ekoki kosalema.”​—Matai 19:25, 26.

Tózwa bandakisa oyo: Yehova Nzambe asali ete Liloba na ye Biblia, ezala ntango nyonso buku oyo ekabolami mingi koleka na mokili mobimba. Biblia esakolaki ete nsango malamu ya Nzambe mpe ya mokano na ye mpo na mabele ekosakolama na “mabele mobimba esika bato bafandi.” (Matai 24:14) Lelo oyo, Batatoli ya Yehova bazali kosakola nsango malamu na mikili koleka 230 mpe bazali kobimisa mikanda oyo elimbolaka Biblia na minɔkɔ soki 500. Ata bato oyo bakoki kozwa Biblia te, bakoki koyekola makambo mingi oyo etali Nzambe ya solo soki batali biloko oyo akelá.​—Baroma 1:20.

Lisusu, Liloba ya Nzambe elobi ete: “Yehova azali kotalatala mitema nyonso, mpe asosolaka mposa nyonso ya makanisi. Soki oluki ye, akosala ete omona ye.” (1 Ntango 28:9) Na yango, atako Yehova alaki te ete bato nyonso bakozwa libaku ndenge moko, kasi asali ete libaku epesama epai ya moto nyonso ya motema sembo. Kutu, akosala nyonso mpo baoyo batikalá te kozwa libaku ya koyekola makambo na ntina na ye, bázwa libaku yango na nzela ya lisekwa na mokili ya sika ya sembo.​—Misala 24:15.