Nzambe anyokolaka bato na lifelo?

Nzambe akopesa bato mabe etumbu?

Maurice: Nasepeli kokutana na yo lisusu, Alezandre.

Alezandre: Ngai mpe nasepeli.

Maurice: Nakanisaki na likambo moko oyo olobaki mbala eleki ntango nayaki awa.

Alezandre: Ezalaki nini?

Maurice: Olobaki ete ekamwisaki yo ntango oyokaki ete Batatoli ya Yehova bandimaka te ete lifelo ezalaka.

Alezandre: Ɛɛ, yango ekamwisaki ngai mpenza. Mpo na koloba solo, ezali mpasi nandima ete bino bondimaka te ete lifelo ezali.

Maurice: Mersi ndenge oyebisi ngai yango. Nasepelaka mpenza koyoka makanisi ya basusu. Lokola bato bazalaka na makanisi ndenge na ndenge mpo na lifelo, okoki kolimbolela ngai makambo oyo yo ondimaka mpo na liteya yango?

Alezandre: Ɛɛ, nandimaka banda kala ete soki bato mabe bakufi bakendaka na lifelo epai banyokwamaka na mɔtɔ libela na libela.

Maurice: Bato mingi mpe bakanisaka bongo. Alezandre, natuna yo naino boye: Osilá kokutana na makambo mosusu ya mabe na bomoi na yo?

Alezandre: Ɛɛ. Yaya na ngai ya mwasi babomaki ye eleki sikoyo mbula mitano.

Maurice: Nayoki mawa mingi mpo na yango. Na ntembe te, okanisaka ye.

Alezandre: Ɛɛ, nakanisaka ye mikolo nyonso.

Maurice: Namoni ete bato mosusu bandimaka mpenza ete lifelo ezalaka mpo bayokaka mpasi na makambo oyo bato mabe basalaka. Kutu, bato oyo basali eloko te balingaka ete bato mabe báfuta mabe na bango.

Alezandre: Ezali mpenza bongo! Nalingi ete moto oyo abomaki yaya na ngai afuta mpo na oyo asali libota na biso.

Maurice: Kokanisa bongo ezali mabe te. Biblia eteyaka ete Nzambe mpe ayokaka mpasi ntango banyokolaka bato oyo basali eloko te; mpe alaki ete akopesa bato mabe etumbu. Talá oyo Yisaya 3:11 elobi: “Mawa na moto mabe!​—mpasi; mpo oyo ye asalaki na mabɔkɔ na ye bakozongisela ye yango!” Boye, tokoki mpenza kotya motema ete Nzambe akopesa bato mabe etumbu.

Alezandre: Kasi, ndenge nini yango ekoki kosalema soki lifelo ezalaka te, ndenge olobi yango?

Maurice: Ezali motuna moko malamu mpenza. Na mokuse, etumbu oyo Nzambe akopesa bato mabe ezali nde liwa ya seko. Tótala oyo Biblia elobi na 2 Batesaloniki 1:9. Okoki kotánga vɛrsɛ yango?

Alezandre: Ɛɛ. Elobi boye: “Bato yango mpenza bakozwa etumbu ya lisambisi ya libebi ya seko uta na liboso ya Nkolo.”

Maurice: Alezandre, omoni, bato mabe bazali na elikya moko te, mpo Nzambe apesi bango etumbu ya liwa ya seko. Bazali na elikya moko te ya kozala na bomoi na mikolo ezali koya.

Alezandre: Namoni oyo vɛrsɛ yango elobi, kasi ezali komonana lokola ezali sembo te. Moto nyonso akufaka. Bato mabe basengeli kozwa etumbu oyo eleki liwa na makasi.

Bosembo esɛngaka nini?

Maurice: Namoni ete olingaka bosembo mingi.

Alezandre: Ɛɛ, nalingaka bosembo mingi mpenza.

Maurice: Longonya. Mpo na koloba solo, soki bato bayebaka kokesenisa mabe ná malamu, ezali mpo Nzambe akelá bango na likoki yango. Ye mpe alingaka bosembo mingi. Kasi, ntango bakonzi ya mangomba bateyaka ete Nzambe anyokolaka bato na lifelo, bamonisaka Nzambe lokola nde azali sembo ata moke te.

Alezandre: Olingi koloba nini?

Maurice: Tiká napesa yo ndakisa moko. Oyebi lisolo ya Adama ná Eva oyo Biblia elobeli?

Alezandre: Ɛɛ. Nzambe apekisaki bango kolya mbuma ya nzete moko boye, kasi batosaki te.

Maurice: Ezali bongo. Tiká tótalela lisolo yango na Biblia. Ezali na Ebandeli 2:16, 17. Elobi boye: “Lisusu Yehova Nzambe apesaki moto etinda oyo: ‘Nzete nyonso ya elanga, okoki kolya yango ndenge olingi. Kasi nzete ya koyeba malamu ná mabe osengeli kolya yango te, mpo mokolo okolya yango okokufa solo.’” Nzambe alobaki eloko nini ekokómela Adama soki alye mbuma oyo apekisaki?

Alezandre: Alobaki ete Adama akokufa.

Maurice: Ezali solo. Kanisá naino: Mpo na lisumu oyo Adama asalaki, bato nyonso babotamaka basumuki.a Atako bongo, Nzambe alobaki nde likambo moko oyo etali etumbu ya lifelo?

Alezandre: Te.

Maurice: Kasi, soki Nzambe akanaki kopesa Adama ná Eva etumbu ya minyoko ya libela na libela, alingaki koyebisa bango te? Soki Nzambe ayebisaka bango, alingaki komonisa ete azali sembo mpe bolingo.

Alezandre: Nakanisi, ezali bongo.

Maurice: Yoká mpe maloba oyo Nzambe alobaki na Adama ná Eva ntango basalaki lisumu. Okoki kotánga Ebandeli 3:19?

Alezandre: Ɛɛ. Elobi boye: “Na motoki ya elongi na yo okolya limpa kino okozonga na mabele, mpo outaki na yango. Mpamba te ozali putulu mpe okozonga na putulu.”

Maurice: Matɔndi. Na kotalela maloba oyo ya Nzambe, Adama alingaki kokende wapi soki akufi?

Alezandre: Alobaki ete Adama akozonga na mputulu ya mabele.

Maurice: Ezali mpenza bongo. Mpo báloba ete moto azongi na esika moko boye, omoni te ete esengeli moto yango auta naino na esika yango liboso?

Alezandre: Ezali bongo.

Maurice: Adama azalaki wapi liboso ete Nzambe akela ye?

Alezandre: Azalaki epai moko te.

Maurice: Olobi solo. Mpe okomona ete Nzambe atángi te likambo ya lifelo na etumbu oyo akateli bango. Elingaki nde kozala sembo ete Nzambe ayebisa Adama ete akozonga na mabele epai autaki, soki ezalaki ete Adama akokende konyokwama na mɔtɔ na lifelo?

Alezandre: Te, elingaki kozala sembo te.

Zabolo akokisaka nde mokano ya Nzambe?

Maurice: Ezali na likambo mosusu oyo tosengeli kotalela na oyo etali liteya ya lifelo.

Alezandre: Likambo yango nini?

Maurice: Bato balobaka ete nani nde “akɛngɛlaka” lifelo? Balobaka ete nani nde apesaka bato oyo bazali na lifelo etumbu?

Alezandre: Zabolo.

Maurice: Nzokande, Zabolo azali monguna monene ya Nzambe. Soki Nzambe atindaka bato na lifelo mpo Zabolo anyokolaka bango kuna, omoni te ete ekozala lokola nde Nzambe ná Zabolo bayokanaka?

Alezandre: Hmm. Nakanisá naino bongo liboso te.

Maurice: Tózwa ndakisa moko: ozali moboti, bongo te?

Alezandre: Ɛɛ, nazali na mwana moko ya mobali. Auti kutu kokokisa mbula 15.

Maurice: Kanisá ete mwana na yo akómi motɔmbɔki. Azali kosala makambo mingi ya mabe, oyo ezali kopesa yo mpasi na motema. Okosala nini?

Alezandre: Nakosala nyonso mpo nazongisa ye na nzela.

Maurice: Na ntembe te, okomeka mbala na mbala kosalisa ye azonga na nzela ya malamu.

Alezandre: Ezali mpenza bongo.

Maurice: Kanisá naino ete atako osali milende nyonso, aboyi kaka koyoka yo. Nsukansuka, okomona ete osengeli kaka kopesa ye etumbu.

Alezandre: Ezali bongo.

Maurice: Kasi, okosala nini soki oyei koyeba ete ezali nde na moto moko oyo azali kotinda ye na nzela wana ya mabe?

Alezandre: Nakosilikela moto yango makasi.

Maurice: Awa nde nakosepela mpenza na eyano na yo. Lokola oyebi ete moto moko ya mabe nde asali ete mwana na yo atombokela yo, okokende nde epai ya moto yango kosɛnga ye ete asalisa yo, apesa mwana na yo etumbu?

Alezandre: Soki moke te. Kosala bongo ekozala bozoba.

Maurice: Sikoyo, ekozala likambo ya mayele ete Nzambe asɛnga Satana Zabolo​—ye oyo atindaka bato na mabe—​apesa bato yango etumbu?

Alezandre: Te, ekoki kosalema te.

Maurice: Na likambo yango, soki Nzambe alingaki kopesa bato mabe etumbu, mpo na nini Zabolo​—monguna monene ya Nzambe—​akondima kokokisa mokano ya Nzambe mpe konyokola bango?

Alezandre: Nakanisá naino boye liboso te!

Yehova akosilisa mabe nyonso

Maurice: Atako bongo, kitisá motema. Nzambe akosukisa bato mabe oyo bazali koboya kobongola motema. Mbala mosusu, nakoki kolakisa yo vɛrsɛ ya nsuka oyo elobeli likambo yango polele. Vɛrsɛ yango ezali Nzembo 37:9. Okosepela kotánga yango?

Alezandre: Malamu. Elobi boye: “Mpo basali-mabe bakobomama, kasi bato oyo balikyaka na Yehova nde bakozwa mabele.”

Maurice: Matondi mingi. Omoni likambo oyo Yehova akosala bato mabe?

Alezandre: Vɛrsɛ yango elobi ete Nzambe akoboma bango.

Maurice: Ezali bongo. Na maloba mosusu, akoboma bango mpo na libela. Kasi, bato malamu​—“bato oyo balikyaka na Yehova”—​bakosepela na bomoi awa na mabele libela na libela. Na ntembe te, yango ekoki kotinda yo omituna mituna mosusu. Na ndakisa, na ebandeli mpo na nini Nzambe apekisaki te ete bato básala mabe? Mpe soki azali mpenza na likanisi ya kopesa bato mabe etumbu, mpo na nini asali yango te tii sikoyo?

Alezandre: Mituna wana ezali mpenza na ntina mingi.

Maurice: Mbala mosusu, nakoki kolakisa yo biyano ya Biblia mbala ya nsima oyo nakoya mpo tósolola.b

Alezandre: Nakosepela mingi.