Yekolá na Liloba ya Nzambe
Okoki kozala na bomoi libela na libela?
Lisolo oyo ezali na mituna oyo mbala mosusu omitunaka mpe emonisi esika oyo okoki kozwa biyano na Biblia na yo. Batatoli ya Yehova bakosepela kotalela biyano yango elongo na yo.
1. Mpo na nini bomoi na biso ezalaka mokuse?
Bankoba mosusu eumelaka mbula 150, mpe banzete mosusu eumelaka mbula 3 000. Nzokande, bomoi na biso bato ezali mokuse mpenza. Atako bongo, bomoi na biso ekoki kozala na ntina mingi koleka oyo ya nkoba to ya nzete. Yehova Nzambe akelaki moto na likoki ya kosepela na miziki, masano, kolya, koyekola, kosala mibembo mpe kokutana na bato mosusu. Nzambe atyaki na kati ya mitema na biso mposa ya bomoi ya seko.—Tángá Mosakoli 3:11.
2. Tokoki mpenza kozala na bomoi libela na libela?
Yehova azali na bomoi libela na libela. Akufaka te. Bomoi eutá nde epai na ye, yango wana akoki kopesa basusu bomoi ya seko. (Nzembo 36:9; Habakuku 1:12) Lisusu, alaki kopesa baoyo batosaka ye bomoi ya seko. Akolongola eloko oyo esalaka ete bato bánuna.—Tángá Yobo 33:24, 25; Yisaya 25:8; 33:24.
Na misala ya nguya oyo Yesu asalaki, amonisaki ete tokoki kotya motema na elaka ya Nzambe ya kopesa bato bomoi ya seko na nzoto ya kokoka. Yesu abikisaki maladi ndenge na ndenge mpe asekwisaki kutu bato oyo bakufaki.—Tángá Luka 7:11-15, 18, 19, 22.
3. Ntango nini bomoi ya seko ekokóma likambo ya solo?
Nzambe alingi ete tózala na bomoi ya seko, na mokili oyo etondi na minyoko mpe mobulu te, kasi nde na paradiso awa na mabele. Alingi tómiyoka ete tobatelami. (Nzembo 37:9, 29; Yisaya 65:21, 22) Ntango mabele ekobanda kozonga paradiso, bamilio ya bato oyo bakufaki bakozongisama na bomoi. Basekwi oyo bakondima kosambela Nzambe mpe kotosa ye bakotikala na bomoi libela na libela.—Tángá Luka 23:42, 43; Yoane 5:28, 29.
4. Ndenge nini tokoki kozwa bomoi ya seko?
Milende mpo na kokóma moninga ya Nzambe ezali na ntina mingi
Tokoki kozwa bomoi ezangi nsuka kaka epai ya Nzambe. Boye, ekozala malamu tóluka koyeba ye mpo tópusana penepene na ye. Biblia emonisi ete kozwa boyebi ya Nzambe ekokani na kolya bilei. (Matai 4:4) Kolya bilei ezalaka esengo, kasi kozwa mpe kolamba yango esɛngaka milende. Ndenge moko mpe, kolya bilei ya elimo esɛngaka milende. Kasi, eloko moko te ezali na litomba mingi koleka kopusana penepene na Nzambe mpe kozwa bomoi ya seko!—Tángá Luka 13:23, 24; Yoane 6:27; 17:3.