2 | “Libɔndisi oyo euti na Makomami”

BIBLIA ELOBI: “Makambo nyonso oyo ekomamaki kala ekomamaki mpo eteya biso, mpo, na ezaleli na biso ya koyika mpiko mpe na libɔndisi oyo euti na Makomami, tózala na elikya.” —BAROMA 15:4.

Yango elimboli nini

Biblia ezali na maloba ya kobɔndisa oyo ekoki kopesa biso makasi mpe mpiko oyo tosengeli na yango mpo na kolonga makanisi mabe oyo tokoki kozala na yango. Nsango ya Biblia epesaka biso elikya ete mosika te tokobɛla lisusu te na makanisi.

Ndenge nini yango ekoki kosalisa

Na bantango mosusu biso nyonso tokoki kosila esengo; kasi bato oyo bazali konyokwama na makanisi bakoki mbala na mbala koyoka mpasi na makanisi. Ndenge nini Biblia ekoki kosalisa bango?

Biblia epesi batoli mingi ya malamu oyo ekoki kosalisa biso tólongola makanisi mabe mpe tókóma na makanisi malamu. (Bafilipi 4:8) Esalisaka biso tókɔtisa na makanisi na biso makanisi ya kolendisa mpe ya kimya oyo ekosalisa biso tóbatela makanisi na biso.—Nzembo 94:18, 19.
Biblia ekoki kosalisa biso tótika kokanisa ete tozangi valɛrɛ.—Luka 12:6, 7.
Bavɛrsɛ mingi ya Biblia ezali kolendisa biso ete tozali biso moko te mpe ete Mozalisi na biso, Nzambe, ayebi malamumalamu makanisi mpe mayoki na biso.—Nzembo 34:18; 1 Yoane 3:19, 20.
Biblia elaki ete Nzambe akotya nsuka na makambo nyonso oyo esalaka ete moto abɛla na makanisi. (Yisaya 65:17; Emoniseli 21:4) Ntango tokómi na makanisi mpe mayoki oyo etungisaka, bilaka ya Biblia esalisaka biso tozwa makasi ya koyikela yango mpiko.

Ndenge oyo Biblia esalisaka bato oyo bazali kobɛla na makanisi Jessica

Makambo oyo kotungisama na makanisi esalaki ngai

“Ntango nazalaki na mbula 25, nakómaki kotungisama na makanisi mpe yango esalaki ete nakóma konyokwama makasi na makanisi. Nakómaki na mbalakaka konyokwama na makanisi mpo na makambo ya mpasi oyo nasalá kala. Minganga basalisaki ngai nayeba ete konyokwama na makanisi eyaka ntango moto akómi na makanisi ya mabe mpo na makambo oyo esalemá. Longola kozwa bankisi oyo ebongi, nazalaki mpe na mposa ya kosolola na monganga mpo na kosalisa ngai nayeba makambo oyo ezalaki kosala ete natungisama makasi na makanisi mpe nasembola makanisi na ngai.”

Ndenge oyo Biblia esalisaki ngai

“Ntango nakómaki konyokwama makasi na makanisi, nakómaki kobangabanga, komitungisa koleka ndelo, mpe kozanga mpɔngi. Mbala mingi na butu nakómaka na makanisi oyo etungisaka ngai makasi oyo ezalaka mpasi ete nalonga yango. Ndenge Nzembo 94:19 emonisi yango, Nzambe akoki kobɔndisa mpe kokitisa mitema na biso ntango oyo kotungisama na makanisi elɛmbisi biso nzoto. Ntango nyonso natyaka Biblia mpe kayɛ na ngai oyo nakomá bavɛrsɛ ya kobɔndisa pene ya mbeto na ngai. Ntango oyo ekómaka mpasi ete nazwa mpɔngi, natángaka bavɛrsɛ ya Biblia, yango esalaka ete natika makanisi ya Nzambe ebɔndisa ngai.

“Biblia elendisaka biso ya kolongola makanisi oyo ekeseni na makambo oyo toyebi mpo na Nzambe. Na kala, nazalaki komiyoka ete nazangá ntina, mpe nakoki kolingama te. Kasi, nayekolaki ete kozala na makanisi ya lolenge wana ekeseni na oyo Biblia elobi, mpamba te Biblia emonisi ete Nzambe azali Tata ya bolingo mpe ya motema mawa oyo atyelaka mokomoko na biso likebi. Na esika ete natika makanisi na ngai etambwisa ngai motó, mokemoke nakómaki kotambwisa makanisi na ngai. Nakómaki komitalela ndenge oyo Nzambe atalelaka ngai. Yango ezalaki likambo moko ya ntina mingi oyo esalisaki ngai nalongola makanisi ya mabe oyo nazalaki na yango mpo na ngai moko.

“Nazali kozela na motema ya kokita ntango oyo konyokwama na makanisi mpe makanisi nyonso oyo epesaka mpasi ekolimwa. Nayebi ete kobɛla na makanisi ekozala te na mikolo ezali koya. Likambo yango esalisaka ngai ya koyika mpiko sikoyo mpo na mpasi na ngai mpe kozela na motema ya kokita, ntango oyo nakobɛla lisusu te na makanisi.”