ຂ່າວຄາວສະບັບທີໜຶ່ງ
19 ຕໍ່ມາ ນາຮາດກະສັດຂອງອຳໂມນກໍຕາຍ ແລະລູກຊາຍຂອງລາວໄດ້ເປັນກະສັດແທນ.+ 2 ເມື່ອດາວິດຮູ້ເລື່ອງນີ້ ລາວເວົ້າວ່າ: “ຂ້ອຍຢາກເຮັດດີ*+ຕໍ່ຮານຸນ ຍ້ອນນາຮາດພໍ່ຂອງລາວໄດ້ເຮັດດີຕໍ່ຂ້ອຍ.” ດາວິດຈຶ່ງສົ່ງຄົນໄປຫາຮານຸນເພື່ອສະແດງຄວາມເສຍໃຈທີ່ພໍ່ຂອງລາວຕາຍ. ແຕ່ເມື່ອຄົນຂອງດາວິດໄປຮອດແຜ່ນດິນຂອງພວກອຳໂມນ+ເພື່ອສະແດງຄວາມເສຍໃຈຕໍ່ຮານຸນ 3 ພວກເຈົ້ານາຍຂອງຄົນອຳໂມນເວົ້າກັບຮານຸນວ່າ: “ທ່ານຄິດວ່າດາວິດໃຫ້ກຽດພໍ່ທ່ານໂດຍສົ່ງຄົນມາສະແດງຄວາມເສຍໃຈນຳທ່ານບໍ? ລາວສົ່ງຄົນມາສອດແນມເພື່ອຈະຫາທາງເອົາຊະນະທ່ານແລະເພື່ອຈະໂຈມຕີແຜ່ນດິນນີ້ຫັ້ນຕິ!” 4 ຮານຸນຈຶ່ງຈັບຄົນຂອງດາວິດໄປແຖໜວດແຖເຄົາ+ແລະຕັດເຄື່ອງນຸ່ງຂອງເຂົາເຈົ້າຈົນຮອດແອວໃຫ້ເຫັນກົ້ນ ແລ້ວໃຫ້ເຂົາເຈົ້າກັບເມືອ. 5 ເມື່ອດາວິດຮູ້ເລື່ອງທີ່ເກີດຂຶ້ນ ລາວຈຶ່ງສົ່ງຄົນອີກກຸ່ມໜຶ່ງໄປຫາເຂົາເຈົ້າທັນທີ ຍ້ອນເຂົາເຈົ້າອາຍຫຼາຍ. ກະສັດດາວິດບອກວ່າ: “ໃຫ້ພວກເຈົ້າຢູ່ເມືອງເຢຣິໂກ+ຈົນໜວດຈົນເຄົາປົ່ງແລ້ວຈຶ່ງກັບມາ.”
6 ເມື່ອພວກອຳໂມນຮູ້ວ່າດາວິດຊັງເຂົາເຈົ້າແລ້ວ ຮານຸນກັບພວກອຳໂມນຈຶ່ງເອົາເງິນໜັກ 1.000 ຕະລັນ*ໄປຈ້າງລົດຮົບກັບພວກທະຫານມ້າຈາກເມໂຊໂປຕາເມຍ* ອາຣາມມາອາກາ ແລະໂຊບາ.+ 7 ເຂົາເຈົ້າຈ້າງລົດຮົບມາທັງໝົດ 32.000 ຄັນ. ເຂົາເຈົ້າຍັງໄດ້ຈ້າງກະສັດຂອງມາອາກາກັບຄົນຂອງລາວມານຳ. ພວກນີ້ພາກັນມາຕັ້ງຄ້າຍຢູ່ຕໍ່ໜ້າເມືອງເມເດບາ+ ແລ້ວພວກອຳໂມນກໍລວບລວມກອງທັບຂອງເຂົາເຈົ້າຈາກເມືອງຕ່າງໆເພື່ອອອກໄປຕໍ່ສູ້.
8 ເມື່ອດາວິດຮູ້ເລື່ອງນີ້ ລາວກໍສົ່ງໂຢອາບ+ແລະກອງທັບທັງໝົດພ້ອມທັງທະຫານທີ່ເກັ່ງທີ່ສຸດໄປ.+ 9 ພວກອຳໂມນຕັ້ງກອງທັບຢູ່ທາງເຂົ້າເມືອງຂອງເຂົາເຈົ້າ ສ່ວນພວກກະສັດກໍໄປຢູ່ອີກບ່ອນໜຶ່ງທີ່ເປັນທົ່ງຫຍ້າ.
10 ເມື່ອໂຢອາບເຫັນວ່າກອງທັບຂອງພວກສັດຕູກຳລັງຫຍັບໃກ້ເຂົ້າມາທັງທາງໜ້າແລະທາງຫຼັງ ລາວຈຶ່ງເລືອກເອົາກອງທະຫານອິດສະຣາເອນທີ່ເກັ່ງທີ່ສຸດຈຳນວນໜຶ່ງອອກໄປຕໍ່ສູ້ກັບພວກຊີເຣຍ.+ 11 ສ່ວນພວກທະຫານທີ່ເຫຼືອ ໂຢອາບໃຫ້ອາບີຊາຍ+ອ້າຍຂອງລາວເປັນຜູ້ພາອອກໄປຕໍ່ສູ້ກັບພວກອຳໂມນ. 12 ໂຢອາບບອກວ່າ: “ຖ້າຂ້ອຍສູ້ພວກຊີເຣຍ+ບໍ່ໄຫວໃຫ້ເຈົ້າມາຊ່ວຍຂ້ອຍ ແຕ່ຖ້າເຈົ້າສູ້ພວກອຳໂມນບໍ່ໄຫວຂ້ອຍຈະໄປຊ່ວຍເຈົ້າ. 13 ພວກເຮົາຕ້ອງເຂັ້ມແຂງແລະກ້າຫານ+ເພື່ອປະຊາຊົນຂອງພວກເຮົາແລະເພື່ອເມືອງຕ່າງໆຂອງພະເຈົ້າຂອງພວກເຮົາ ແລ້ວພະເຢໂຫວາຈະເຮັດສ່ວນຂອງເພິ່ນ.”
14 ຈາກນັ້ນ ໂຢອາບກັບຄົນຂອງລາວຈຶ່ງໄປຕໍ່ສູ້ກັບພວກຊີເຣຍ. ພວກຊີເຣຍສູ້ບໍ່ໄດ້ຈຶ່ງພາກັນແຕກໜີ.+ 15 ເມື່ອພວກອຳໂມນເຫັນວ່າພວກຊີເຣຍແລ່ນໜີ ເຂົາເຈົ້າກໍແລ່ນໜີຈາກອາບີຊາຍແລະເຂົ້າໄປໃນເມືອງຂອງໂຕເອງ ແລ້ວໂຢອາບກໍກັບເມືອເມືອງເຢຣູຊາເລັມ.
16 ເມື່ອພວກຊີເຣຍເຫັນວ່າພວກອິດສະຣາເອນຊະນະ ເຂົາເຈົ້າຈຶ່ງສົ່ງຄົນໄປເອີ້ນພວກທະຫານຊີເຣຍທີ່ຢູ່ແຖວແມ່ນ້ຳ*ມາ.+ ໂຊຟາກ*ຫົວໜ້າກອງທັບຂອງຮາດາເດເຊເປັນຜູ້ພາກອງທັບນັ້ນມາ.+
17 ເມື່ອມີຄົນໄປບອກດາວິດ ລາວກໍຟ້າວລວບລວມທະຫານອິດສະຣາເອນທັງໝົດ ແລ້ວຂ້າມແມ່ນ້ຳຈໍແດນເພື່ອຍົກກອງທັບໄປຕໍ່ສູ້ກັບພວກຊີເຣຍ. ຈາກນັ້ນ ກອງທັບຂອງດາວິດກັບກອງທັບຂອງພວກຊີເຣຍກໍຕໍ່ສູ້ກັນ.+ 18 ແຕ່ພວກຊີເຣຍບໍ່ຊະນະພວກອິດສະຣາເອນ ເຂົາເຈົ້າຈຶ່ງໜີໄປ. ດາວິດຂ້າຄົນຂັບລົດຮົບ 7.000 ຄົນກັບທະຫານຂອງພວກຊີເຣຍ 40.000 ຄົນ ແລະລາວຍັງໄດ້ຂ້າໂຊຟາກຫົວໜ້າກອງທັບຂອງເຂົາເຈົ້າ. 19 ເມື່ອຄົນຂອງຮາດາເດເຊເຫັນວ່າພວກອິດສະຣາເອນຊະນະ+ ເຂົາເຈົ້າຈຶ່ງຟ້າວເຮັດສັນຍາຂໍສະຫງົບເສິກກັບດາວິດແລະຍອມເປັນຫົວເມືອງຂຶ້ນຂອງລາວ.+ ຫຼັງຈາກນັ້ນ ພວກຊີເຣຍກໍບໍ່ກ້າມາຊ່ວຍພວກອຳໂມນອີກເລີຍ.