ເອເຊກຽນ
23 ພະເຢໂຫວາເວົ້າກັບຂ້ອຍອີກວ່າ: 2 “ລູກມະນຸດເອີ້ຍ ມີຜູ້ຍິງ 2 ຄົນເປັນລູກແມ່ດຽວກັນ.+ 3 ເຂົາເຈົ້າຂາຍໂຕຢູ່ເອຢິບ+ຕັ້ງແຕ່ຕອນເປັນສາວ. ໜ້າເອິກຂອງເຂົາເຈົ້າຖືກບີບຖືກຄັ້ນຕັ້ງແຕ່ຕອນເປັນສາວບໍລິສຸດ. 4 ຜູ້ເອື້ອຍຊື່ໂອໂຮລາ* ແລະຜູ້ນ້ອງຊື່ໂອໂຮລີບາ.* ເຂົາເຈົ້າໄດ້ມາເປັນເມຍຂອງເຮົາແລະເກີດລູກຊາຍລູກສາວໃຫ້ເຮົາ. ໂອໂຮລາແມ່ນຊາມາເຣຍ+ ແລະໂອໂຮລີບາແມ່ນເຢຣູຊາເລັມ.
5 ໂອໂຮລາເລີ່ມເປັນແມ່ຈ້າງ+ຕອນທີ່ລາວຍັງເປັນຂອງເຮົາຢູ່. ລາວຫຼົງໄຫຼຊູ້ຂອງລາວ+ ເຊິ່ງແມ່ນພວກພວກອັດຊີເຣຍທີ່ເປັນເພື່ອນບ້ານຂອງລາວ.+ 6 ພວກນີ້ເປັນເຈົ້າແຂວງທີ່ໃສ່ຊຸດສີຟ້າແລະເປັນຜູ້ປົກຄອງ. ທຸກຄົນເປັນຊາຍໜຸ່ມທີ່ຫຼໍ່ແລະຂີ່ມ້າເກັ່ງ. 7 ລາວບໍ່ເຊົາຂາຍໂຕໃຫ້ພວກຄົນສຳຄັນຂອງອັດຊີເຣຍ ແລະເຮັດໃຫ້ໂຕເອງບໍ່ສະອາດ+ດ້ວຍຮູບບູຊາທີ່ເປັນຕາຂີ້ດຽດ*ຂອງຄົນທີ່ລາວຫຼົງໄຫຼ. 8 ລາວຍັງຂາຍໂຕຄືກັບທີ່ເຄີຍເຮັດຢູ່ເອຢິບ. ຢູ່ຫັ້ນ ເຂົາເຈົ້ານອນນຳລາວຕັ້ງແຕ່ຕອນລາວເປັນສາວ. ເຂົາເຈົ້າຈັບບາຍໜ້າເອິກຂອງລາວຕັ້ງແຕ່ລາວເປັນສາວບໍລິສຸດແລະລະບາຍຕັນຫາກັບລາວ.+ 9 ເຮົາຈຶ່ງປ່ອຍໃຫ້ລາວຕົກຢູ່ໃນມືຊູ້ທີ່ລາວຫຼົງໄຫຼ ເຊິ່ງແມ່ນພວກອັດຊີເຣຍ.+ 10 ເຂົາເຈົ້າເຮັດໃຫ້ລາວປະໂປ້+ ຈັບລູກຊາຍກັບລູກສາວຂອງລາວໄປ+ ແລະເອົາດາບຂ້າລາວ. ລາວກາຍເປັນຜູ້ຍິງທີ່ມີຊື່ສຽງໃນທາງທີ່ບໍ່ດີ ແລະເຂົາເຈົ້າກໍຕັດສິນລົງໂທດລາວ.
11 ເມື່ອໂອໂຮລີບາເຫັນສິ່ງທີ່ເກີດຂຶ້ນກັບເອື້ອຍຂອງລາວ ລາວແຮ່ງບ້າຕັນຫາຫຼາຍກວ່າເອື້ອຍແລະຂາຍໂຕຫຼາຍກວ່າເອື້ອຍອີກ.+ 12 ລາວຫຼົງໄຫຼພວກອັດຊີເຣຍທີ່ເປັນເພື່ອນບ້ານຂອງລາວ.+ ພວກນີ້ເປັນເຈົ້າແຂວງແລະຜູ້ປົກຄອງທີ່ນຸ່ງເຄື່ອງງາມໆແລະຂີ່ມ້າເກັ່ງ. ທຸກຄົນເປັນຊາຍໜຸ່ມທີ່ຫຼໍ່. 13 ເມື່ອລາວເຮັດໃຫ້ໂຕເອງບໍ່ສະອາດ ເຮົາກໍເຫັນວ່າສອງເອື້ອຍນ້ອງນີ້ເຮັດແບບດຽວກັນເລີຍ.+ 14 ແຕ່ໂອໂຮລີບາຂາຍໂຕຫຼາຍກວ່າເກົ່າ. ລາວແກະສະຫຼັກຮູບຜູ້ຊາຍຢູ່ຝາ ເຊິ່ງເປັນຮູບພວກການເດອາທີ່ທາດ້ວຍສີແດງສົດ.* 15 ເຂົາເຈົ້າໃສ່ສາຍແອວ ໃສ່ຜ້າຄຽນຫົວງາມໆທີ່ປ່ອຍສົ້ນລົງມາທາງຫຼັງ ແລະທ່າທາງຂອງເຂົາເຈົ້າຄືກັບທະຫານທີ່ເກັ່ງໆ. ຮູບແກະສະຫຼັກເຫຼົ່ານັ້ນເປັນຮູບຄົນບາບີໂລນທີ່ເກີດຢູ່ແຜ່ນດິນຂອງພວກການເດອາ. 16 ເມື່ອເຫັນຮູບເຂົາເຈົ້າ ລາວກໍຫຼົງໄຫຼແຮງ ແລະໃຫ້ຄົນໄປເອີ້ນເຂົາເຈົ້າຢູ່ການເດອາໃຫ້ມາຫາ.+ 17 ພວກບາບີໂລນຈຶ່ງມາຫາລາວຮອດຕຽງບໍ່ຂາດແລະເຮັດໃຫ້ລາວບໍ່ສະອາດດ້ວຍຕັນຫາຂອງເຂົາເຈົ້າ.* ຫຼັງຈາກທີ່ເຂົາເຈົ້າເຮັດໃຫ້ລາວບໍ່ສະອາດແລ້ວ ລາວກໍຖິ້ມເຂົາເຈົ້າຍ້ອນຂີ້ດຽດເຂົາເຈົ້າ.
18 ລາວຍັງຂາຍໂຕຕໍ່ໄປແບບບໍ່ຮູ້ຈັກອາຍແລະຍັງປະໂປ້ຢູ່+ ເຮົາຈຶ່ງຖິ້ມລາວຍ້ອນເຮົາຂີ້ດຽດລາວຫຼາຍ. ເຮົາໄດ້ຖິ້ມເອື້ອຍຂອງລາວແບບນີ້ຄືກັນຍ້ອນວ່າເຮົາຂີ້ດຽດຫຼາຍ.+ 19 ລາວຂາຍໂຕໜັກຂຶ້ນເລື້ອຍໆ+ ແລະລາວຄິດຮອດສະໄໝເປັນສາວຕອນຂາຍໂຕຢູ່ເອຢິບ.+ 20 ລາວຫຼົງໄຫຼຊູ້ຂອງໂຕເອງ. ລາວເຮັດຄືກັບເມຍນ້ອຍຂອງຜູ້ຊາຍທີ່ບ້າຕັນຫາຄືກັບມ້າແລະລາທີ່ຕິດເຊີງ. 21 ໂອໂຮລີບາເອີ້ຍ ເຈົ້າຄິດຮອດສະໄໝເປັນສາວຕອນທີ່ເຈົ້າເຮັດສິ່ງທີ່ເປັນຕາໜ້າລັງກຽດຢູ່ເອຢິບ+ ເມື່ອພວກເອຢິບຈັບບາຍໜ້າເອິກຂອງເຈົ້າຕອນທີ່ເຈົ້າຍັງເປັນສາວ.+
22 ໂອໂຮລີບາເອີ້ຍ ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາຈະກະຕຸ້ນພວກຊູ້ຂອງເຈົ້າ+ທີ່ເຈົ້າເຄີຍຖິ້ມເຂົາເຈົ້າຍ້ອນວ່າຂີ້ດຽດ. ເຮົາຈະໃຫ້ເຂົາເຈົ້າມາຕໍ່ສູ້ເຈົ້າຈາກທຸກທິດທຸກທາງ.+ 23 ພວກນີ້ແມ່ນຄົນບາບີໂລນ+ ຄົນການເດອາທັງໝົດ+ ຄົນເປໂກດ+ ຄົນໂຊອາ ຄົນໂກອາ ແລະຄົນອັດຊີເຣຍທັງໝົດ. ພວກນີ້ເປັນຊາຍໜຸ່ມທີ່ຫຼໍ່ ເປັນເຈົ້າແຂວງ ເປັນຜູ້ປົກຄອງ ເປັນທະຫານທີ່ເກັ່ງໆ ແລະເປັນທີ່ປຶກສາທີ່ສຳຄັນ. ທຸກຄົນຂີ່ມ້າເກັ່ງ. 24 ເຂົາເຈົ້າຈະໂຈມຕີເຈົ້າດ້ວຍລົດຮົບແລະລົດມ້າທີ່ມີສຽງດັງໆ ພ້ອມກັບກອງທັບໃຫຍ່ທີ່ມີໂລ້ໃຫຍ່ ໂລ້ນ້ອຍ* ແລະໝວກເກາະ. ເຂົາເຈົ້າຈະລ້ອມເຈົ້າໄວ້ ແລະເຮົາຈະເອົາອຳນາດໃຫ້ເຂົາເຈົ້າເພື່ອຕັດສິນ ແລ້ວເຂົາເຈົ້າຈະຕັດສິນເຈົ້າຕາມທີ່ເຫັນວ່າເໝາະສົມ.+ 25 ເຮົາຈະໃຫ້ເຈົ້າເຫັນວ່າເຮົາໃຈຮ້າຍຫຼາຍແທ້ໆ ແລະເຂົາເຈົ້າຈະຈັດການເຈົ້າດ້ວຍຄວາມໃຈຮ້າຍ. ເຂົາເຈົ້າຈະຕັດຫູ ຕັດດັງຂອງເຈົ້າ ສ່ວນຄົນທີ່ເຫຼືອເຂົາເຈົ້າຈະເອົາດາບຂ້າ. ເຂົາເຈົ້າຈະເອົາລູກຊາຍກັບລູກສາວຂອງເຈົ້າໄປ ສ່ວນຄົນທີ່ເຫຼືອເຂົາເຈົ້າຈະເອົາໄຟຈູດ.+ 26 ເຂົາເຈົ້າຈະແກ້ເຄື່ອງນຸ່ງຂອງເຈົ້າອອກ+ ແລະເອົາເຄື່ອງປະດັບທີ່ງາມໆຂອງເຈົ້າໄປ.+ 27 ເຮົາຈະຈັດການບໍ່ໃຫ້ເຈົ້າໄດ້ຂາຍໂຕ+ ແລະຈະບໍ່ໃຫ້ເຈົ້າເຮັດສິ່ງທີ່ເປັນຕາໜ້າລັງກຽດອີກຕໍ່ໄປເຊິ່ງເຈົ້າເລີ່ມເຮັດຕອນທີ່ຢູ່ເອຢິບ.+ ເຈົ້າຈະເຊົາແນມເບິ່ງເຂົາເຈົ້າ* ແລະເຈົ້າຈະບໍ່ຄິດຮອດເອຢິບອີກຕໍ່ໄປ.’
28 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ເຮົາກຳລັງຈະມອບເຈົ້າໄວ້ໃນມືຂອງຄົນທີ່ເຈົ້າຊັງ ເຊິ່ງແມ່ນຄົນທີ່ເຈົ້າຖິ້ມຍ້ອນຂີ້ດຽດ.+ 29 ເຂົາເຈົ້າຈະຈັດການເຈົ້າດ້ວຍຄວາມກຽດຊັງ ແລະຈະຍຶດເອົາທຸກສິ່ງທີ່ເຈົ້າຫາມາດ້ວຍຄວາມຍາກລຳບາກ+ ແລ້ວຈະປ່ອຍໃຫ້ເຈົ້າປະໂປ້. ທຸກຄົນຈະເຫັນວ່າເຈົ້າເຮັດຜິດສິນລະທຳແບບບໍ່ອາຍ ເຮັດສິ່ງທີ່ເປັນຕາໜ້າລັງກຽດ ແລະເປັນໂສເພນີ.+ 30 ເຂົາເຈົ້າຈະເຮັດແບບນີ້ກັບເຈົ້າ ຍ້ອນເຈົ້າແລ່ນນຳຊາດຕ່າງໆຄືກັບໂສເພນີເຮັດ+ ແລະຍ້ອນເຈົ້າເຮັດໃຫ້ໂຕເອງບໍ່ສະອາດດ້ວຍຮູບບູຊາທີ່ເປັນຕາຂີ້ດຽດຂອງເຂົາເຈົ້າ.+ 31 ເຈົ້າເຮັດຄືກັບເອື້ອຍຂອງເຈົ້າ+ ແລະເຮົາຈະເອົາຈອກຂອງລາວໃສ່ໃນມືເຈົ້າ.’+
32 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ
‘ເຈົ້າຈະກິນຈາກຈອກທີ່ໃຫຍ່ໆຂອງເອື້ອຍເຈົ້າ.+
ເຈົ້າຈະຖືກຄົນເຍາະເຍີ້ຍແລະຫົວຂວັນໃສ່. ຈອກນັ້ນເຕັມແຕ່ການເຍາະເຍີ້ຍ.+
33 ເຈົ້າຈະກິນຈາກຈອກຂອງຊາມາເຣຍທີ່ເປັນເອື້ອຍຂອງເຈົ້າ
ແລະເຈົ້າຈະກິນຈົນເມົາແລະໂສກເສົ້າ.
ເຈົ້າຈະຮ້າງເປົ່າແລະຈະເປັນບ່ອນທີ່ເປັນຕາຢ້ານຫຼາຍ.
34 ເຈົ້າຈະກິນຈາກຈອກນັ້ນຈົນໝົດ+ແລະຍັງຈະແຫ້ນຈອກນັ້ນຕໍ່
ແລ້ວເຈົ້າຈະຈີກເອິກຂອງໂຕເອງດ້ວຍຄວາມໂສກເສົ້າ
“ຍ້ອນເຮົາໄດ້ເວົ້າໄວ້ແລ້ວ.” ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າແບບນີ້.’
35 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຍ້ອນເຈົ້າລືມເຮົາແລະບໍ່ນັບຖືເຮົາແລ້ວ+ ເຈົ້າຈະໄດ້ຮັບຜົນຈາກການກະທຳທີ່ເປັນຕາໜ້າລັງກຽດຂອງເຈົ້າແລະຈາກການທີ່ເຈົ້າເຮັດໂຕເປັນໂສເພນີ.’”
36 ຈາກນັ້ນ ພະເຢໂຫວາເວົ້າກັບຂ້ອຍວ່າ: “ລູກມະນຸດເອີ້ຍ ເຈົ້າຈະປະກາດຄຳຕັດສິນຕໍ່ໂອໂຮລາກັບໂອໂຮລີບາ+ ແລະບອກເຂົາເຈົ້າບໍກ່ຽວກັບສິ່ງທີ່ເປັນຕາຂີ້ດຽດຕ່າງໆທີ່ເຂົາເຈົ້າໄດ້ເຮັດ? 37 ເຂົາເຈົ້າຫຼິ້ນຊູ້*+ແລະຂ້າຄົນ. ເຂົາເຈົ້າບໍ່ພຽງແຕ່ຫຼິ້ນຊູ້ກັບຮູບບູຊາທີ່ເປັນຕາຂີ້ດຽດຂອງເຂົາເຈົ້າເທົ່ານັ້ນ ແຕ່ເຂົາເຈົ້າຍັງເອົາລູກຊາຍທີ່ໄດ້ກັບເຮົາໄປເຜົາບູຊາ*ເພື່ອເປັນຂອງກິນໃຫ້ຮູບບູຊານຳອີກ.+ 38 ນອກຈາກນັ້ນ ເຂົາເຈົ້າຍັງໄດ້ເຮັດສິ່ງເຫຼົ່ານີ້ກັບເຮົາ. ໃນມື້ນັ້ນ ເຂົາເຈົ້າເຮັດໃຫ້ວິຫານຂອງເຮົາບໍ່ສະອາດແລະໝິ່ນປະໝາດວັນຊະບາໂຕຂອງເຮົາ. 39 ຫຼັງຈາກທີ່ເຂົາເຈົ້າຂ້າພວກລູກຊາຍຂອງໂຕເອງເພື່ອເປັນເຄື່ອງບູຊາໃຫ້ຮູບບູຊາທີ່ເປັນຕາຂີ້ດຽດແລ້ວ+ ໃນມື້ນັ້ນ ເຂົາເຈົ້າໄດ້ເຂົ້າໄປໃນວິຫານຂອງເຮົາແລະເຮັດໃຫ້ບ່ອນນັ້ນບໍ່ສະອາດ.+ ເຂົາເຈົ້າໄດ້ເຮັດແນວນີ້ຢູ່ໃນວິຫານຂອງເຮົາ. 40 ເຂົາເຈົ້າເຖິງຂັ້ນສົ່ງຄົນໄປເອີ້ນພວກຜູ້ຊາຍທີ່ຢູ່ໄກໆໃຫ້ມາຫາ.+ ຕອນທີ່ພວກນັ້ນກຳລັງມາ ເຈົ້າ*ກໍອາບນ້ຳ ທາຕາ ແລະເອົາເຄື່ອງປະດັບທີ່ງາມໆມາໃສ່.+ 41 ແລ້ວເຈົ້າກໍນັ່ງຢູ່ຕັ່ງທີ່ຫຼູຫຼາ+ທີ່ມີໂຕະໜ່ວຍໜຶ່ງຕັ້ງຢູ່ທາງໜ້າ.+ ເຈົ້າເອົາເຄື່ອງຫອມ+ກັບນ້ຳມັນຂອງເຮົາໄປວາງໄວ້ຢູ່ເທິງໂຕະໜ່ວຍນັ້ນ.+ 42 ມີສຽງມ່ວນຊື່ນຂອງພວກຜູ້ຊາຍດັງມາຈາກຫັ້ນ. ໃນກຸ່ມນັ້ນ ມີພວກຂີ້ເຫຼົ້າທີ່ຖືກພາມາຈາກບ່ອນກັນດານນຳ. ເຂົາເຈົ້າເອົາປະຫຼັກແຂນມາໃສ່ໃຫ້ສອງເອື້ອຍນ້ອງນີ້ແລະເອົາມົງກຸດທີ່ງາມໆມາໃສ່ໃຫ້ຄືກັນ.
43 ແລ້ວເຮົາກໍເວົ້າເຖິງຜູ້ຍິງທີ່ໝົດແຮງຍ້ອນຫຼິ້ນຊູ້ບໍ່ຢຸດບໍ່ເຊົາວ່າ ‘ລາວຈະເປັນໂສເພນີຕໍ່ໄປ.’ 44 ເຂົາເຈົ້າຈຶ່ງໄປນອນນຳລາວຕະຫຼອດຄືກັບໄປນອນນຳໂສເພນີ. ເຂົາເຈົ້ານອນນຳໂອໂຮລາກັບໂອໂຮລີບາແບບນີ້ແຫຼະ. ທັງສອງເປັນຜູ້ຍິງທີ່ເຮັດສິ່ງທີ່ເປັນຕາໜ້າລັງກຽດ. 45 ແຕ່ພວກຜູ້ຊາຍທີ່ເປັນຄົນດີຈະຕັດສິນລາວໃຫ້ສົມກັບທີ່ລາວຫຼິ້ນຊູ້+ແລະຂ້າຄົນ.+ ສອງເອື້ອຍນ້ອງນີ້ຫຼິ້ນຊູ້ແລະມືເຂົາເຈົ້າກໍເປື້ອນເລືອດ.+
46 ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ ‘ຈະມີກອງທັບໜຶ່ງມາຕໍ່ສູ້ສອງເອື້ອຍນ້ອງນີ້ ເພື່ອເຂົາເຈົ້າຈະເປັນສິ່ງທີ່ຄົນຢ້ານຫຼາຍແລະເຂົາເຈົ້າຈະຖືກປຸ້ນ.+ 47 ກອງທັບນັ້ນຈະດຶກກ້ອນຫີນໃສ່ເຂົາເຈົ້າ+ແລະເອົາດາບຂ້າເຂົາເຈົ້າ. ພວກນັ້ນຈະຂ້າລູກຊາຍກັບລູກສາວຂອງສອງເອື້ອຍນ້ອງນີ້+ ແລະເອົາໄຟຈູດເຮືອນເຂົາເຈົ້າ.+ 48 ເຮົາຈະກຳຈັດການກະທຳທີ່ເປັນຕາໜ້າລັງກຽດໃຫ້ໝົດໄປຈາກແຜ່ນດິນ ແລ້ວພວກຜູ້ຍິງຈະໄດ້ບົດຮຽນແລະຈະບໍ່ເຮັດຕາມການກະທຳທີ່ເປັນຕາໜ້າລັງກຽດຂອງເຂົາເຈົ້າ.+ 49 ກອງທັບນັ້ນຈະລົງໂທດເຂົາເຈົ້າຍ້ອນການກະທຳທີ່ເປັນຕາໜ້າລັງກຽດຂອງເຂົາເຈົ້າ ແລະຍ້ອນຄວາມຜິດທີ່ເຂົາເຈົ້າເຮັດກັບຮູບບູຊາທີ່ເປັນຕາຂີ້ດຽດຂອງເຂົາເຈົ້າ ແລ້ວເຂົາເຈົ້າຈະຮູ້ວ່າເຮົາແມ່ນເຢໂຫວາພະເຈົ້າຜູ້ຍິ່ງໃຫຍ່ສູງສຸດ.’”+