ກິດຈະການຂອງອັກຄະສາວົກ
5 ອີກຜູ້ໜຶ່ງຊື່ອານາເນຍກັບເມຍຊື່ຊະຟີຣາກໍໄດ້ຂາຍດິນຕອນໜຶ່ງ. 2 ແຕ່ອານາເນຍເອົາເງິນບາງສ່ວນມ້ຽນໄວ້ ເມຍຂອງລາວກໍຮູ້ເຫັນນຳ ແລ້ວອານາເນຍເອົາເງິນແຕ່ສ່ວນໜຶ່ງໄປໃຫ້ພວກອັກຄະສາວົກ.*+ 3 ເປໂຕເວົ້າວ່າ: “ອານາເນຍ ເປັນຫຍັງເຈົ້າຍອມໃຫ້ຊາຕານຊັກຈູງເຈົ້າໃຫ້ກ້າຕົວະ+ພະລັງບໍລິສຸດ ແລະເອົາເງິນຄ່າດິນສ່ວນໜຶ່ງມ້ຽນໄວ້?+ 4 ຕອນທີ່ເຈົ້າຍັງບໍ່ຂາຍດິນຕອນນັ້ນ ດິນເປັນຂອງເຈົ້າແມ່ນບໍ? ແລະເມື່ອຂາຍແລ້ວ ເງິນຄ່າດິນກໍຍັງເປັນຂອງເຈົ້າບໍ່ແມ່ນບໍ? ເປັນຫຍັງເຈົ້າຈຶ່ງຄິດເຮັດເລື່ອງແບບນີ້? ເຈົ້າບໍ່ໄດ້ຕົວະມະນຸດ ແຕ່ຕົວະພະເຈົ້າ.” 5 ເມື່ອອານາເນຍໄດ້ຍິນແບບນັ້ນລາວກໍລົ້ມລົງແລະຕາຍ. ທຸກຄົນທີ່ໄດ້ຍິນເລື່ອງນີ້ກໍຕົກໃຈຢ້ານຫຼາຍ. 6 ແລ້ວພວກຊາຍໜຸ່ມກໍເອົາຜ້າຫໍ່ສົບລາວແລະຫາມອອກໄປຝັງ.
7 ຫຼັງຈາກນັ້ນປະມານ 3 ຊົ່ວໂມງ ເມຍຂອງອານາເນຍກໍເຂົ້າມາໂດຍທີ່ບໍ່ຮູ້ວ່າເກີດຫຍັງຂຶ້ນ. 8 ເປໂຕເວົ້າກັບລາວວ່າ: “ບອກຂ້ອຍດຸວ່າ ພວກເຈົ້າ 2 ຄົນຂາຍດິນໄດ້ເງິນເທົ່ານີ້ແມ່ນບໍ?” ລາວບອກວ່າ: “ແມ່ນແລ້ວ ໄດ້ເທົ່ານັ້ນແຫຼະ.” 9 ເປໂຕກໍເວົ້າວ່າ: “ເປັນຫຍັງພວກເຈົ້າ 2 ຄົນຈຶ່ງຮ່ວມຫົວກັນຕົວະພະລັງຂອງພະເຢໂຫວາ?* ເບິ່ງແມ້! ຄົນທີ່ຝັງສົບຜົວຂອງເຈົ້າກໍຢູ່ປະຕູແລ້ວ ເຂົາເຈົ້າຈະຫາມສົບເຈົ້າອອກໄປນຳ.” 10 ທັນໃດນັ້ນ ຊະຟີຣາກໍລົ້ມລົງຕໍ່ໜ້າເປໂຕແລະຕາຍ. ເມື່ອພວກຊາຍໜຸ່ມເຂົ້າມາກໍເຫັນວ່າລາວຕາຍແລ້ວ ເຂົາເຈົ້າຈຶ່ງຫາມສົບລາວອອກໄປແລະຝັງໄວ້ຢູ່ຂ້າງສົບຜົວຂອງລາວ. 11 ທຸກຄົນໃນປະຊາຄົມແລະຄົນອື່ນໆທີ່ໄດ້ຍິນເລື່ອງນີ້ກໍພາກັນຢ້ານຫຼາຍ.
12 ພວກອັກຄະສາວົກໄດ້ເຮັດການອັດສະຈັນແລະສະແດງປາຕິຫານອີກຫຼາຍຢ່າງໃຫ້ປະຊາຊົນເຫັນ+ ແລະເຂົາເຈົ້າໄດ້ມາເຈິກັນເປັນປະຈຳຢູ່ທາງຍ່າງທີ່ມີເສົາລຽນກັນທີ່ໂຊໂລໂມນໄດ້ສ້າງໄວ້.+ 13 ຄົນອື່ນໆບໍ່ມີໃຜກ້າມາຮ່ວມກຸ່ມນຳເຂົາເຈົ້າ ແຕ່ກໍເວົ້າຍົກຍ້ອງເຂົາເຈົ້າ. 14 ຄົນບັກຫຼາຍໆທັງຜູ້ຊາຍແລະຜູ້ຍິງໄດ້ເຂົ້າມາເຊື່ອຜູ້ເປັນນາຍຫຼາຍຂຶ້ນເລື້ອຍໆ.+ 15 ເຂົາເຈົ້າພາຄົນເຈັບປ່ວຍອອກໄປທາງໃຫຍ່ແລະວາງໄວ້ຢູ່ບ່ອນນອນຫຼືສາດ ເພື່ອຢ່າງໜ້ອຍໃຫ້ເງົາຂອງເປໂຕຖືກເຂົາເຈົ້າຕອນທີ່ລາວຍ່າງກາຍ.+ 16 ມີຄົນຫຼາຍແທ້ຫຼາຍວ່າຈາກເມືອງທີ່ຢູ່ໃກ້ໆເມືອງເຢຣູຊາເລັມພາຄົນເຈັບປ່ວຍແລະຄົນທີ່ທົນທຸກຍ້ອນຖືກພວກປີສາດສິງມານຳ ແລະພວກອັກຄະສາວົກໄດ້ປົວທຸກຄົນໃຫ້ເຊົາ.
17 ແຕ່ປະໂລຫິດໃຫຍ່ກັບພັກພວກຂອງລາວທີ່ນັບຖືນິກາຍຊາດູກາຍໄດ້ພາກັນລຸກຂຶ້ນດ້ວຍຄວາມໃຈຮ້າຍ ແລະເຂົາເຈົ້າກໍຮູ້ສຶກອິດສາ. 18 ເຂົາເຈົ້າຈຶ່ງສັ່ງໃຫ້ຈັບພວກອັກຄະສາວົກຂັງຄຸກໄວ້.+ 19 ແຕ່ໃນຕອນກາງຄືນ ທູດສະຫວັນຂອງພະເຢໂຫວາ*ໄດ້ມາເປີດປະຕູຄຸກ+ແລະພາພວກອັກຄະສາວົກອອກໄປ ແລ້ວບອກວ່າ: 20 “ໄປຢືນຢູ່ວິຫານແລ້ວປະກາດຂ່າວດີເລື່ອງຊີວິດຕະຫຼອດໄປໃຫ້ປະຊາຊົນຟັງ.” 21 ເມື່ອໄດ້ຍິນແບບນັ້ນ ພວກອັກຄະສາວົກກໍເຂົ້າໄປໃນວິຫານຕັ້ງແຕ່ເຊົ້າໆແລະສອນຢູ່ຫັ້ນ.
ປະໂລຫິດໃຫຍ່ກັບພັກພວກຂອງລາວໄດ້ເອີ້ນປະຊຸມສານຊັນເຮດຣິນພ້ອມກັບພວກຜູ້ນຳຄົນອິດສະຣາເອນໝົດຄະນະ ແລະໃຊ້ຄົນໃຫ້ໄປເອົາພວກອັກຄະສາວົກອອກມາຈາກຄຸກ. 22 ແຕ່ເມື່ອພວກເຈົ້າໜ້າທີ່ໄປຮອດຄຸກກໍບໍ່ເຫັນພວກອັກຄະສາວົກ ເຂົາເຈົ້າຈຶ່ງກັບມາລາຍງານວ່າ: 23 “ພວກເຮົາເຫັນຄຸກຖືກລ໋ອກໄວ້ບັກດີໆແລະພວກຄົນຍາມກໍຢືນເຝົ້າຢູ່ຕາມປະຕູ ແຕ່ເມື່ອພວກເຮົາເປີດປະຕູກໍບໍ່ເຫັນຜູ້ໃດຢູ່ທາງໃນ.” 24 ເມື່ອຫົວໜ້າເຈົ້າໜ້າທີ່ເບິ່ງແຍງວິຫານກັບພວກຫົວໜ້າປະໂລຫິດໄດ້ຍິນແບບນັ້ນກໍພາກັນງົງ ແລະສົງໄສວ່າຈະເກີດຫຍັງຂຶ້ນຕໍ່ໄປ. 25 ແລ້ວມີຜູ້ໜຶ່ງເຂົ້າມາບອກເຂົາເຈົ້າວ່າ: “ຄົນທີ່ພວກເຈົ້າຂັງໄວ້ໃນຄຸກກຳລັງຢືນສອນຄົນຢູ່ວິຫານພຸ້ນເດ້.” 26 ຫົວໜ້າເຈົ້າໜ້າທີ່ເບິ່ງແຍງວິຫານກັບພວກເຈົ້າໜ້າທີ່ຂອງລາວຈຶ່ງອອກໄປເອົາພວກອັກຄະສາວົກມາ ແຕ່ບໍ່ໄດ້ໃຊ້ກຳລັງບັງຄັບ ຍ້ອນເຂົາເຈົ້າຢ້ານປະຊາຊົນຈະດຶກກ້ອນຫີນໃສ່.+
27 ເຂົາເຈົ້າເອົາພວກອັກຄະສາວົກມາຢືນຢູ່ຕໍ່ໜ້າສານຊັນເຮດຣິນ. ຈາກນັ້ນ ປະໂລຫິດໃຫຍ່ກໍສອບສວນພວກອັກຄະສາວົກ 28 ແລະເວົ້າວ່າ: “ພວກເຮົາສັ່ງພວກເຈົ້າແລ້ວວ່າບໍ່ໃຫ້ສອນໃນນາມຂອງຜູ້ນັ້ນອີກ+ ແຕ່ພວກເຈົ້າພັດແຮ່ງແພ່ຄຳສອນຂອງພວກເຈົ້າໄປທົ່ວເມືອງເຢຣູຊາເລັມ ແລະຕັ້ງໃຈຈະກ່າວຫາພວກເຮົາວ່າມີຄວາມຜິດທີ່ເຮັດໃຫ້ຜູ້ນັ້ນຕ້ອງຕາຍ.”+ 29 ເປໂຕກັບອັກຄະສາວົກຄົນອື່ນໆຕອບວ່າ: “ພວກເຮົາຕ້ອງເຊື່ອຟັງພະເຈົ້າ*ຫຼາຍກວ່າມະນຸດ.+ 30 ພະເຈົ້າຂອງປູ່ຍ່າຕານາຍຂອງພວກເຮົາໄດ້ປຸກພະເຢຊູໃຫ້ຄືນມາຈາກຕາຍແລ້ວ ເພິ່ນແມ່ນຄົນທີ່ພວກເຈົ້າຂ້າໂດຍຄຶງໄວ້ເທິງເສົາ.*+ 31 ແຕ່ພະເຈົ້າໄດ້ແຕ່ງຕັ້ງຜູ້ນີ້ໃຫ້ຢູ່ເບື້ອງຂວາມືຂອງເພິ່ນ+ ໃຫ້ເປັນຜູ້ນຳຄົນສຳຄັນ+ແລະເປັນຜູ້ຊ່ວຍໃຫ້ລອດ+ເພື່ອໃຫ້ຄົນອິດສະຣາເອນໄດ້ກັບໃຈແລະໄດ້ຮັບການຍົກໂທດຄວາມຜິດ.+ 32 ພວກເຮົາເປັນພະຍານຮູ້ເຫັນແລະຢືນຢັນເລື່ອງທັງໝົດນີ້+ ແລະພະລັງບໍລິສຸດກໍຢືນຢັນເລື່ອງນີ້ຄືກັນ.+ ພະເຈົ້າໄດ້ເອົາພະລັງນີ້ໃຫ້ຄົນທີ່ເຊື່ອຟັງເພິ່ນໃນຖານະເປັນຜູ້ປົກຄອງ.”
33 ເມື່ອເຂົາເຈົ້າໄດ້ຍິນແບບນັ້ນກໍໃຈຮ້າຍຫຼາຍແລະຢາກຂ້າພວກອັກຄະສາວົກ. 34 ແຕ່ມີຟາຣີຊາຍຄົນໜຶ່ງຊື່ຄາມາລີເອັນ+ ລາວເປັນອາຈານສອນກົດໝາຍຂອງໂມເຊທີ່ທຸກຄົນນັບຖືຫຼາຍ. ລາວຢືນຂຶ້ນໃນສານຊັນເຮດຣິນແລະສັ່ງໃຫ້ເອົາພວກອັກຄະສາວົກອອກໄປທາງນອກກ່ອນ. 35 ແລ້ວລາວກໍເວົ້າວ່າ: “ຄົນອິດສະຣາເອນ ຂໍໃຫ້ຄິດຄັກໆກ່ອນທີ່ພວກເຈົ້າຈະເຮັດຫຍັງກັບຄົນເຫຼົ່ານີ້. 36 ຈື່ໄດ້ບໍວ່າມີຜູ້ໜຶ່ງຊື່ທູດາທີ່ເຄີຍຕັ້ງໂຕເອງເປັນໃຫຍ່ໂດຍເວົ້າວ່າໂຕເອງເປັນຄົນສຳຄັນ ແລະມີຜູ້ຊາຍປະມານ 400 ຄົນຕິດຕາມລາວ? ແຕ່ໃນທີ່ສຸດ ລາວກໍຖືກຂ້າແລະຄົນທີ່ຕິດຕາມລາວກໍກະຈັດກະຈາຍກັນໄປແລະບໍ່ເຫຼືອຈັກຄົນ. 37 ຫຼັງຈາກນັ້ນກໍມີຢູດາຄົນຄາລີເລທີ່ໄດ້ຕັ້ງໂຕເອງເປັນຜູ້ນຳຕອນທີ່ມີການຈົດທະບຽນສຳມະໂນຄົວ. ລາວຊັກຈູງຄົນໃຫ້ຕິດຕາມລາວໄປ ແຕ່ສຸດທ້າຍລາວກໍຕາຍ ແລະທຸກຄົນທີ່ຕິດຕາມລາວກໍກະຈັດກະຈາຍກັນໄປ. 38 ດັ່ງນັ້ນ ຕາມທີ່ເຫັນໃນຕອນນີ້ ຂ້ອຍຂໍບອກພວກເຈົ້າວ່າຢ່າໄປຫຍຸ້ງກັບຄົນເຫຼົ່ານີ້. ປ່ອຍເຂົາເຈົ້າໄປ. ຖ້າແຜນການຫຼືວຽກນີ້ມາຈາກມະນຸດ ມັນກໍຈະຢຸດໄປເອງ. 39 ແຕ່ຖ້າມາຈາກພະເຈົ້າ ພວກເຈົ້າກໍບໍ່ມີທາງກວາດລ້າງເຂົາເຈົ້າໄດ້ດອກ.+ ໃຫ້ລະວັງ ຢ້ານວ່າພວກເຈົ້າຈະຕໍ່ສູ້ພະເຈົ້າ.”+ 40 ເຂົາເຈົ້າກໍຟັງຄາມາລີເອັນ. ເຂົາເຈົ້າເອີ້ນພວກອັກຄະສາວົກມາແລະເອົາແສ້ຟາດ+ແລະສັ່ງໃຫ້ເຊົາສອນໃນນາມພະເຢຊູ ແລ້ວກໍປ່ອຍໄປ.
41 ພວກອັກຄະສາວົກອອກຈາກສານຊັນເຮດຣິນດ້ວຍຄວາມດີໃຈ+ ເພາະເຂົາເຈົ້າຖືວ່າການຖືກດູຖູກຍ້ອນຊື່ຂອງພະເຢຊູນັ້ນເປັນກຽດຫຼາຍ. 42 ເຂົາເຈົ້າໄດ້ສອນແລະປະກາດຂ່າວດີເລື່ອງພະເຢຊູຜູ້ເປັນພະຄລິດທຸກໆມື້+ທັງຢູ່ວິຫານແລະຕາມບ້ານເຮືອນ.+