ຊາມູເອນສະບັບທີໜຶ່ງ
5 ເມື່ອພວກຟີລິດສະຕີນໄດ້ຍຶດເອົາຫີບສັນຍາ+ຂອງພະເຈົ້າທ່ຽງແທ້ໄປແລ້ວ ເຂົາເຈົ້າກໍຍ້າຍຫີບນັ້ນອອກຈາກເມືອງເອເບັນເອເຊໄປເມືອງອາຊະໂດດ. 2 ພວກຟີລິດສະຕີນໄດ້ເອົາຫີບສັນຍາຂອງພະເຈົ້າທ່ຽງແທ້ເຂົ້າໄປໄວ້ໃນວິຫານຂອງພະດາໂກນ ແລະວາງໄວ້ທາງຂ້າງຮູບປັ້ນພະດາໂກນ.+ 3 ມື້ຕໍ່ມາ ເມື່ອພວກອາຊະໂດດຕື່ນຂຶ້ນມາຕອນເຊົ້າ ເຂົາເຈົ້າກໍເຫັນຮູບປັ້ນພະດາໂກນລົ້ມຂວ້ຳໜ້າຢູ່ພື້ນຕໍ່ໜ້າຫີບສັນຍາຂອງພະເຢໂຫວາ.+ ເຂົາເຈົ້າຈຶ່ງຍົກຮູບປັ້ນພະດາໂກນຂຶ້ນ ແລ້ວເອົາໄປວາງໄວ້ບ່ອນເກົ່າ.+ 4 ຕອນເຊົ້າມື້ຕໍ່ມາ ເມື່ອເຂົາເຈົ້າຕື່ນຂຶ້ນມາກໍເຫັນຮູບປັ້ນພະດາໂກນລົ້ມຂວ້ຳໜ້າຢູ່ພື້ນຕໍ່ໜ້າຫີບສັນຍາຂອງພະເຢໂຫວາອີກ. ແຕ່ຫົວກັບມືທັງສອງເບື້ອງຂອງຮູບປັ້ນຂາດແລະຟົ້ງໄປຢູ່ຕີນປະຕູ ແລະເຫຼືອແຕ່ໂຕທີ່ເປັນຄືປາເທົ່ານັ້ນ. 5 ຍ້ອນແນວນີ້ ພວກປະໂລຫິດຂອງພະດາໂກນແລະທຸກຄົນທີ່ເຂົ້າໄປໃນວິຫານນັ້ນຈຶ່ງບໍ່ຢຽບຕີນປະຕູວິຫານຂອງພະດາໂກນໃນເມືອງອາຊະໂດດຈົນຮອດທຸກມື້ນີ້.
6 ພະເຢໂຫວາໄດ້ລົງໂທດພວກອາຊະໂດດຢ່າງໜັກ ແລະເພິ່ນເຮັດໃຫ້ຄົນທີ່ຢູ່ອ້ອມແອ້ມເມືອງນັ້ນເປັນລິດສີດວງ.+ 7 ເມື່ອຄົນໃນເມືອງອາຊະໂດດເຫັນສິ່ງທີ່ເກີດຂຶ້ນ ເຂົາເຈົ້າກໍເວົ້າວ່າ: “ຢ່າເອົາຫີບສັນຍາຂອງພະເຈົ້າຂອງອິດສະຣາເອນມາໄວ້ກັບພວກເຮົາ ຍ້ອນເພິ່ນລົງໂທດພວກເຮົາແລະພະດາໂກນຂອງເຮົາຢ່າງຮ້າຍແຮງ.” 8 ດັ່ງນັ້ນ ເຂົາເຈົ້າຈຶ່ງສົ່ງຄົນໄປເອີ້ນພວກເຈົ້າເມືອງຂອງພວກຟີລິດສະຕີນມາປະຊຸມກັນແລະຖາມວ່າ: “ເຮົາຈະເຮັດແນວໃດກັບຫີບສັນຍາຂອງພະເຈົ້າຂອງອິດສະຣາເອນ?” ພວກເຈົ້າເມືອງຕອບວ່າ: “ຍ້າຍຫີບສັນຍາຂອງພະເຈົ້າຂອງອິດສະຣາເອນໄປໄວ້ເມືອງກັດ.”+ ເຂົາເຈົ້າຈຶ່ງຍ້າຍຫີບນັ້ນໄປໄວ້ຢູ່ຫັ້ນ.
9 ຫຼັງຈາກທີ່ຍ້າຍຫີບໄປເມືອງກັດ ພະເຢໂຫວາກໍລົງໂທດຄົນໃນເມືອງນັ້ນແລະເຮັດໃຫ້ເກີດຄວາມສັບສົນວຸ່ນວາຍຫຼາຍ. ເພິ່ນເຮັດໃຫ້ທຸກຄົນໃນເມືອງນັ້ນຕັ້ງແຕ່ເດັກນ້ອຍຈົນຮອດຜູ້ໃຫຍ່ເປັນລິດສີດວງ.+ 10 ດັ່ງນັ້ນ ເຂົາເຈົ້າຈຶ່ງຍ້າຍຫີບສັນຍາຂອງພະເຈົ້າທ່ຽງແທ້ໄປເມືອງເອັກໂຣນ.+ ແຕ່ທັນທີທີ່ຫີບໄປຮອດເມືອງນັ້ນ ພວກເອັກໂຣນກໍຮ້ອງໂວຍວາຍຂຶ້ນວ່າ: “ພວກນັ້ນເອົາຫີບສັນຍາຂອງພະເຈົ້າຂອງອິດສະຣາເອນມາໄວ້ນີ້ເພື່ອໃຫ້ພວກເຮົາແລະປະຊາຊົນຂອງພວກເຮົາຕາຍ.”+ 11 ເຂົາເຈົ້າຈຶ່ງສົ່ງຄົນໄປເອີ້ນພວກເຈົ້າເມືອງຂອງພວກຟີລິດສະຕີນມາປະຊຸມກັນແລະບອກວ່າ: “ເອົາຫີບສັນຍາຂອງພະເຈົ້າຂອງອິດສະຣາເອນກັບໄປໄວ້ບ່ອນເກົ່າເພື່ອພວກເຮົາກັບປະຊາຊົນຂອງພວກເຮົາຈະບໍ່ຕາຍ.” ຕອນນັ້ນ ຄົນໝົດເມືອງກໍພາກັນຢ້ານວ່າໂຕເອງຈະຕາຍ ຍ້ອນພະເຈົ້າທ່ຽງແທ້ໄດ້ລົງໂທດເຂົາເຈົ້າຢູ່ຫັ້ນໜັກຫຼາຍ.+ 12 ສ່ວນຄົນທີ່ບໍ່ຕາຍກໍເປັນລິດສີດວງ ແລະສຽງຮ້ອງຂໍຄວາມຊ່ວຍເຫຼືອຂອງຄົນໃນເມືອງນັ້ນກໍດັງຂຶ້ນໄປຮອດສະຫວັນ.