ພະບັນຍັດ
12 “ຕໍ່ໄປນີ້ແມ່ນຂໍ້ກຳນົດກົດໝາຍທີ່ພວກເຈົ້າຕ້ອງເຮັດຕາມຕະຫຼອດໄປຢ່າງເຄັ່ງຄັດ ຕອນທີ່ພວກເຈົ້າເຂົ້າໄປໃນແຜ່ນດິນທີ່ພະເຢໂຫວາພະເຈົ້າຂອງປູ່ຍ່າຕານາຍຂອງພວກເຈົ້າຊິເອົາໃຫ້. 2 ຕອນທີ່ຂັບໄລ່ຊາດຕ່າງໆ ພວກເຈົ້າຕ້ອງທຳລາຍບ່ອນນະມັດສະການພະເຈົ້າຂອງພວກເຂົາໃຫ້ໝົດໄປ+ ບໍ່ວ່າຈະຢູ່ພູສູງໆ ຢູ່ໂນນພູ ຫຼືຢູ່ກ້ອງຕົ້ນໄມ້ໃຫຍ່. 3 ພວກເຈົ້າຕ້ອງມ້າງແທ່ນບູຊາ ທຸບເສົາຫີນສັກສິດຈົນມຸ່ນ+ ຈູດເສົາໄມ້ສັກສິດຖິ້ມ ແລະທຳລາຍຮູບພະຂອງພວກເຂົາໃຫ້ໝົດ.+ ພວກເຈົ້າຕ້ອງເຮັດໃຫ້ຄົນບໍ່ເວົ້າເຖິງຊື່ພະເຈົ້າເຫຼົ່ານັ້ນອີກຕໍ່ໄປ.+
4 ຢ່ານະມັດສະການພະເຢໂຫວາພະເຈົ້າຂອງເຈົ້າຄືກັບທີ່ຊາດອື່ນໆນະມັດສະການພະເຈົ້າຂອງພວກເຂົາ.+ 5 ຖ້າພະເຢໂຫວາພະເຈົ້າຂອງເຈົ້າເລືອກບ່ອນໃດສຳລັບຊື່ຂອງເພິ່ນແລະເພື່ອເປັນບ່ອນຢູ່ຂອງເພິ່ນ ບໍ່ວ່າຈະຢູ່ບ່ອນໃດໃນເຂດແດນຂອງຕະກູນຕ່າງໆຂອງອິດສະຣາເອນ ເຈົ້າຕ້ອງໄປນະມັດສະການເພິ່ນຢູ່ບ່ອນນັ້ນ.+ 6 ເຈົ້າຕ້ອງເອົາເຄື່ອງບູຊາເຜົາ+ກັບ 1 ສ່ວນ 10+ ຂອງທຸກສິ່ງທີ່ເຈົ້າມີ+ ເຄື່ອງບູຊາທີ່ໃຫ້ຕາມທີ່ໄດ້ສາບານໄວ້ ເຄື່ອງບູຊາທີ່ໃຫ້ດ້ວຍຄວາມສະໝັກໃຈ+ ເຄື່ອງບູຊາອື່ນໆກັບສິ່ງຂອງອື່ນໆທັງໝົດທີ່ຢາກໃຫ້ ແລະລູກໂຕຜູ້ໂຕທຳອິດຈາກຝູງສັດຂອງເຈົ້າໄປໃຫ້ເພິ່ນຢູ່ຫັ້ນ.+ 7 ເຈົ້າກັບຄົນໃນຄອບຄົວຂອງເຈົ້າຈະກິນສ່ວນຈາກເຄື່ອງບູຊາຢູ່ຫັ້ນຕໍ່ໜ້າພະເຢໂຫວາພະເຈົ້າຂອງເຈົ້າ.+ ເຈົ້າຈະມີຄວາມສຸກກັບທຸກສິ່ງທຸກຢ່າງທີ່ເຈົ້າໄດ້ເຮັດ+ ຍ້ອນພະເຢໂຫວາໄດ້ອວຍພອນເຈົ້າ.
8 ຢ່າເຮັດຕາມທີ່ໂຕເອງຄິດວ່າດີ ຄືກັບທີ່ພວກເຮົາເຮັດຢູ່ທຸກມື້ນີ້ 9 ເພາະຕອນນີ້ເຈົ້າຍັງບໍ່ໄດ້ເຂົ້າໄປໃນບ່ອນພັກ+ ແລະຍັງບໍ່ໄດ້ເຂົ້າໄປຢູ່ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຈະເອົາໃຫ້ເຈົ້າເປັນມໍລະດົກ. 10 ເມື່ອເຈົ້າຂ້າມແມ່ນ້ຳຈໍແດນ+ ແລະເຂົ້າໄປຢູ່ໃນແຜ່ນດິນທີ່ພະເຢໂຫວາພະເຈົ້າຈະເອົາໃຫ້ເຈົ້າແລ້ວ ເພິ່ນຈະບໍ່ໃຫ້ສັດຕູມາໂຈມຕີເຈົ້າເດັດຂາດ ແລະເຈົ້າຈະຢູ່ໃນແຜ່ນດິນນັ້ນຢ່າງປອດໄພ.+ 11 ເຈົ້າຕ້ອງເອົາເຄື່ອງບູຊາເຜົາກັບ 1 ສ່ວນ 10+ ຂອງທຸກສິ່ງທີ່ເຈົ້າມີ ເຄື່ອງບູຊາທີ່ໃຫ້ຕາມທີ່ໄດ້ສາບານໄວ້ກັບພະເຢໂຫວາ ເຄື່ອງບູຊາອື່ນໆກັບສິ່ງຂອງອື່ນໆທັງໝົດທີ່ຢາກໃຫ້ ໄປໃຫ້ພະເຢໂຫວາພະເຈົ້າຂອງເຈົ້າໃນບ່ອນທີ່ເພິ່ນໄດ້ເລືອກໄວ້ສຳລັບຊື່ຂອງເພິ່ນ+ຕາມທີ່ຂ້ອຍສັ່ງ. 12 ພວກເຈົ້າທຸກຄົນ ລວມທັງລູກຊາຍລູກສາວແລະທາດຂອງເຈົ້າຈະມີຄວາມສຸກຕໍ່ໜ້າພະເຢໂຫວາພະເຈົ້າ+ ແລະພວກເລວີທີ່ຢູ່ໃນເມືອງຂອງເຈົ້າກໍຈະມີຄວາມສຸກຄືກັນຍ້ອນເຂົາເຈົ້າບໍ່ໄດ້ຮັບສ່ວນແບ່ງຫຼືດິນມູນເປັນມໍລະດົກ.+ 13 ໃຫ້ລະວັງຢ່າເອົາເຄື່ອງບູຊາເຜົາໄປເຜົາຢູ່ບ່ອນອື່ນຕາມໃຈ.+ 14 ເຈົ້າຕ້ອງເຜົາເຄື່ອງບູຊາເຜົາໃນບ່ອນໜຶ່ງທີ່ພະເຢໂຫວາໄດ້ເລືອກໄວ້ໃນເຂດແດນຂອງຕະກູນຕ່າງໆຂອງອິດສະຣາເອນ. ເຈົ້າຕ້ອງເຮັດທຸກຢ່າງຢູ່ຫັ້ນຕາມທີ່ຂ້ອຍສັ່ງເຈົ້າ.+
15 ຖ້າເຈົ້າຢາກກິນຊີ້ນຈາກຝູງສັດທີ່ພະເຢໂຫວາໄດ້ອວຍພອນພວກເຈົ້າ ເຈົ້າຂ້າສັດແລະກິນຊີ້ນຢູ່ເມືອງໃດກໍໄດ້.+ ຄົນທີ່ຖືວ່າສະອາດແລະຄົນທີ່ຖືວ່າບໍ່ສະອາດກິນຊີ້ນສັດນັ້ນໄດ້ຄືກັບກິນຊີ້ນກວາງ.* 16 ແຕ່ຫ້າມເຈົ້າກິນເລືອດຂອງມັນ.+ ເຈົ້າຕ້ອງເທເລືອດລົງດິນຄືກັບເທນ້ຳ.+ 17 ເມື່ອຢູ່ໃນເມືອງຂອງເຈົ້າ ຫ້າມກິນ 1 ສ່ວນ 10 ທີ່ແຍກໄວ້ຕ່າງຫາກຈາກຜົນລະປູກ ເຫຼົ້າແວງໃໝ່ ແລະນ້ຳມັນໝາກກອກຂອງເຈົ້າ ແລະກໍຫ້າມກິນລູກສັດໂຕທຳອິດຈາກຝູງສັດຂອງເຈົ້າ+ ເຄື່ອງບູຊາທີ່ໃຫ້ຕາມທີ່ໄດ້ສາບານໄວ້ ເຄື່ອງບູຊາທີ່ໃຫ້ດ້ວຍຄວາມສະໝັກໃຈ ແລະເຄື່ອງບູຊາອື່ນໆກັບສິ່ງຂອງອື່ນໆທັງໝົດທີ່ເຈົ້າຢາກເອົາມາໃຫ້ພະເຈົ້າ. 18 ແຕ່ໃຫ້ກິນສິ່ງເຫຼົ່ານີ້ຕໍ່ໜ້າພະເຢໂຫວາໃນບ່ອນທີ່ພະເຢໂຫວາພະເຈົ້າຂອງເຈົ້າໄດ້ເລືອກໄວ້.+ ໃຫ້ເຈົ້າກິນນຳກັນກັບພວກລູກ ທາດຂອງເຈົ້າ ແລະພວກເລວີທີ່ຢູ່ໃນເມືອງຂອງເຈົ້າ ແລ້ວເຈົ້າຈະມີຄວາມສຸກຕໍ່ໜ້າພະເຢໂຫວາພະເຈົ້າຂອງເຈົ້າຍ້ອນທຸກສິ່ງທີ່ເຈົ້າໄດ້ເຮັດ. 19 ຢ່າລືມເບິ່ງແຍງພວກເລວີ+ຕະຫຼອດເວລາທີ່ເຈົ້າຢູ່ໃນແຜ່ນດິນນັ້ນ.
20 ເມື່ອພະເຢໂຫວາພະເຈົ້າຂອງເຈົ້າເຮັດໃຫ້ເຂດແດນຂອງເຈົ້າກວ້າງອອກ+ຕາມທີ່ເພິ່ນໄດ້ສັນຍາໄວ້ແລ້ວ+ ຖ້າເຈົ້າຢາກກິນຊີ້ນ ເຈົ້າຈະກິນຕອນໃດກໍໄດ້.+ 21 ຖ້າບ່ອນທີ່ພະເຢໂຫວາພະເຈົ້າຂອງເຈົ້າເລືອກສຳລັບຊື່ຂອງເພິ່ນ+ຢູ່ໄກຈາກບ່ອນທີ່ເຈົ້າຢູ່ ກໍໃຫ້ຂ້າສັດຈາກຝູງສັດຂອງເຈົ້າທີ່ພະເຢໂຫວາເອົາໃຫ້ຕາມທີ່ຂ້ອຍໄດ້ສັ່ງໄວ້ ແລະໃຫ້ເຈົ້າກິນຊີ້ນຢູ່ໃນເມືອງຂອງເຈົ້າຕອນໃດກໍໄດ້. 22 ເຈົ້າຈະກິນຊີ້ນສັດນັ້ນໄດ້ຄືກັບກິນຊີ້ນກວາງ.+ ຄົນທີ່ຖືວ່າສະອາດກັບຄົນທີ່ຖືວ່າບໍ່ສະອາດກໍກິນຊີ້ນນັ້ນໄດ້ຄືກັນ. 23 ແຕ່ຫ້າມເຈົ້າກິນເລືອດເດັດຂາດ+ ເພາະເລືອດໝາຍເຖິງຊີວິດ+ຂອງສັດນັ້ນ. ຫ້າມກິນຊີ້ນທີ່ຍັງມີເລືອດຢູ່. 24 ຫ້າມເຈົ້າກິນເລືອດ. ເຈົ້າຕ້ອງເທເລືອດລົງດິນຄືກັບເທນ້ຳ.+ 25 ຫ້າມເຈົ້າກິນເລືອດ ເພື່ອເຈົ້າກັບລູກຫຼານຂອງເຈົ້າຈະຢູ່ດີມີແຮງ ເພາະໄດ້ເຮັດສິ່ງທີ່ພະເຢໂຫວາເຫັນວ່າຖືກຕ້ອງ. 26 ໃຫ້ເຈົ້າເອົາສິ່ງທີ່ບໍລິສຸດຂອງເຈົ້າ ແລະເຄື່ອງບູຊາທີ່ໃຫ້ຕາມທີ່ໄດ້ສາບານໄວ້ໄປບ່ອນທີ່ພະເຢໂຫວາໄດ້ເລືອກໄວ້. 27 ຢູ່ບ່ອນນັ້ນໃຫ້ເອົາຊີ້ນກັບເລືອດຂອງສັດ+ທີ່ເປັນເຄື່ອງບູຊາເຜົາໄປເຜົາເທິງແທ່ນບູຊາຂອງພະເຢໂຫວາພະເຈົ້າຂອງເຈົ້າ ແລະໃຫ້ເອົາເລືອດຈາກເຄື່ອງບູຊາອື່ນໆໄປເທໃສ່ທາງຂ້າງແທ່ນບູຊາ+ຂອງພະເຢໂຫວາພະເຈົ້າ. ສ່ວນຊີ້ນຈາກເຄື່ອງບູຊາເຫຼົ່ານັ້ນພວກເຈົ້າກິນໄດ້.
28 ໃຫ້ເຊື່ອຟັງຄຳສັ່ງທັງໝົດທີ່ຂ້ອຍບອກພວກເຈົ້າມື້ນີ້ ແລະໃຫ້ເຮັດຕາມຢ່າງເຄັ່ງຄັດ ເພາະການເຮັດແນວນີ້ເປັນສິ່ງທີ່ພະເຢໂຫວາພະເຈົ້າຂອງເຈົ້າເຫັນວ່າດີແລະຖືກຕ້ອງ ແລ້ວເຈົ້າກັບລູກຫຼານຂອງເຈົ້າກໍຈະມີຊີວິດທີ່ດີສະເໝີ.
29 ເມື່ອພະເຢໂຫວາພະເຈົ້າຂອງເຈົ້າຂັບໄລ່ຊາດຕ່າງໆອອກໄປຈາກແຜ່ນດິນທີ່ພວກເຈົ້າເຂົ້າໄປຍຶດເອົາ+ ແລະເຈົ້າໄດ້ຢູ່ຫັ້ນແລ້ວ. 30 ໃຫ້ເຈົ້າລະວັງ ຢ່າຕິດກັບດັກຫຼັງຈາກທີ່ພວກເຂົາອອກໄປແລ້ວ. ຢ່າຖາມກ່ຽວກັບພະເຈົ້າຂອງພວກເຂົາວ່າ ‘ແຕ່ກີ້ຊາດທີ່ເຄີຍຢູ່ນີ້ນະມັດສະການພະເຈົ້າຂອງພວກເຂົາແນວໃດ? ຂ້ອຍກະຊິເຮັດຄືກັນ.’+ 31 ຫ້າມເອົາວິທີນະມັດສະການພະເຈົ້າຂອງພວກເຂົາມາໃຊ້ນະມັດສະການພະເຢໂຫວາພະເຈົ້າຂອງເຈົ້າ. ພະເຢໂຫວາກຽດຊັງທຸກສິ່ງທີ່ພວກເຂົາເຮັດໃຫ້ພະເຈົ້າຂອງພວກເຂົາ. ພວກເຂົາເຖິງຂັ້ນວ່າເອົາລູກຊາຍລູກສາວຂອງໂຕເອງໄປເຜົາໃຫ້ພະເຈົ້າເຫຼົ່ານັ້ນ.+ 32 ໃຫ້ເຈົ້າເຮັດຕາມທຸກສິ່ງທີ່ຂ້ອຍໄດ້ສັ່ງເຈົ້າຢ່າງເຄັ່ງຄັດ.+ ຫ້າມຕັດຫຼືຕື່ມຄຳສັ່ງເຫຼົ່ານີ້.”+