ເພງສັນລະເສີນ
ເຖິງຜູ້ຄວບຄຸມດົນຕີ ເພງນີ້ຮ້ອງແບບກິດທິດ.* ເພງຂອງລູກຫຼານໂກຣາ.+ ເພງສັນລະເສີນ.
84 ພະເຢໂຫວາຜູ້ບັນຊາການກອງທັບເອີ້ຍ
ລູກຮັກບ່ອນຢູ່ທີ່ຍິ່ງໃຫຍ່ຂອງພະອົງຫຼາຍແທ້ໆ.+
2 ລູກຢາກຢູ່ເດີ່ນວິຫານຂອງພະເຢໂຫວາອີ່ຫຼີ.+
ລູກຢາກໄປຢູ່ຫັ້ນຫຼາຍຈົນໝົດເຫື່ອໝົດແຮງ.
ລູກຮ້ອງເພງດ້ວຍຄວາມຍິນດີຕໍ່ໜ້າພະເຈົ້າຜູ້ມີຊີວິດຢູ່
ດ້ວຍສຸດຫົວໃຈແລະສຸດກຳລັງ.
3 ແມ່ນແຕ່ນົກກໍຍັງມີບ່ອນຢູ່ໃນວິຫານຂອງພະອົງ.
ນົກແອ່ນກໍຍັງເຮັດຮັງແລະເບິ່ງແຍງລູກຂອງມັນຢູ່ໃກ້ໆແທ່ນບູຊາຂອງພະອົງ.
ພະເຢໂຫວາຜູ້ບັນຊາການກອງທັບເອີ້ຍ ພະອົງເປັນກະສັດແລະເປັນພະເຈົ້າຂອງລູກ.
4 ຄົນທີ່ໄດ້ຢູ່ວິຫານຂອງພະອົງກໍມີຄວາມສຸກຫຼາຍ.+
ເຂົາເຈົ້າສັນລະເສີນພະອົງບໍ່ຢຸດບໍ່ເຊົາ.+ (ເຊລາ)*
5 ຄົນທີ່ໄດ້ຮັບກຳລັງຈາກພະອົງ
ເຊິ່ງແມ່ນຄົນທີ່ຢາກໄປວິຫານຂອງພະອົງກໍມີຄວາມສຸກຫຼາຍ.+
6 ເມື່ອເຂົາເຈົ້າຜ່ານທາງຮ່ອມພູບາຄາ*
ເຂົາເຈົ້າເຮັດໃຫ້ບ່ອນນັ້ນມີນ້ຳອອກບໍ່
ແລະຝົນກ່ອນລະດູກໍເຮັດໃຫ້ບ່ອນນັ້ນມີແຕ່ສິ່ງດີໆເກີດຂຶ້ນ.*
7 ເຂົາເຈົ້າຈະຍ່າງຕໍ່ໆໄປແລະບໍ່ຮູ້ສຶກເມື່ອຍ.+
ແຕ່ລະຄົນຈະໄປຢູ່ຕໍ່ໜ້າພະເຈົ້າຢູ່ຊີໂອນ.
8 ພະເຢໂຫວາພະເຈົ້າຜູ້ບັນຊາການກອງທັບເອີ້ຍ ຂໍພະອົງຟັງຄຳອະທິດຖານຂອງລູກ.
ພະເຈົ້າຂອງຢາໂຄບເອີ້ຍ ຂໍພະອົງຟັງລູກແດ່ເດີ້. (ເຊລາ)
9 ພະອົງຜູ້ເປັນໂລ້+ແລະເປັນພະເຈົ້າຂອງພວກເຮົາ ຂໍພະອົງເບິ່ງ.*
ຂໍພະອົງເມດຕາຄົນທີ່ພະອົງເລືອກໄວ້.+
10 ໃຫ້ລູກຢູ່ພັກປະຕູວິຫານຂອງພະເຈົ້າກໍຍັງດີກວ່າຢູ່ໃນເຕັ້ນຂອງຄົນຊົ່ວ
ຍ້ອນຢູ່ເດີ່ນວິຫານຂອງພະອົງມື້ດຽວກໍດີກວ່າຢູ່ບ່ອນອື່ນໜຶ່ງພັນມື້.+
11 ພະເຢໂຫວາພະເຈົ້າເປັນຕາເວັນ+ແລະເປັນໂລ້ຂອງພວກເຮົາ.+
ເພິ່ນສະແດງຄວາມເມດຕາແລະເຮັດໃຫ້ຄົນໄດ້ຮັບກຽດ.
ພະເຢໂຫວາຈະບໍ່ຫວງແນວດີໆໄວ້ຈາກຄົນທີ່ໃຊ້ຊີວິດຢ່າງສັດຊື່.+
12 ພະເຢໂຫວາຜູ້ບັນຊາການກອງທັບເອີ້ຍ
ຄົນທີ່ໄວ້ໃຈພະອົງກໍມີຄວາມສຸກຫຼາຍ.+