ເນເຮມີຢາ
9 ໃນວັນທີ 24 ຂອງເດືອນທີ 7 ພວກອິດສະຣາເອນໄດ້ມາລວມກັນ. ເຂົາເຈົ້າພາກັນອົດເຂົ້າ ນຸ່ງຜ້າເນື້ອຫຍາບ ແລະເອົາຂີ້ດິນໂຮຍໃສ່ຫົວ.+ 2 ລູກຫຼານຂອງພວກອິດສະຣາເອນໄດ້ເຊົາພົວພັນກັບຄົນຕ່າງຊາດແລ້ວ.+ ເຂົາເຈົ້າໄດ້ຢືນຂຶ້ນແລະສາລະພາບຄວາມຜິດທີ່ພໍ່ແມ່ຂອງເຂົາເຈົ້າໄດ້ເຮັດ.+ 3 ຈາກນັ້ນ ເຂົາເຈົ້າໄດ້ຢືນຕໍ່ແລະອ່ານປຶ້ມກົດໝາຍ+ຂອງພະເຢໂຫວາພະເຈົ້າຂອງເຂົາເຈົ້າດ້ວຍສຽງດັງ 3 ຊົ່ວໂມງ ແລ້ວເຂົາເຈົ້າກໍສາລະພາບຄວາມຜິດຂອງໂຕເອງແລະໝູບລົງນະມັດສະການພະເຢໂຫວາພະເຈົ້າຂອງເຂົາເຈົ້າອີກ 3 ຊົ່ວໂມງ.
4 ເຢຊູອາ ບານີ ກັດມີເອນ ເຊບານີຢາ ບຸນນີ ເຊເຣບີຢາ+ ບານີ ແລະເກນານີກໍຢືນຢູ່ເທິງເວທີ+ຂອງພວກເລວີແລະອະທິດຖານສຽງດັງຫາພະເຢໂຫວາພະເຈົ້າຂອງເຂົາເຈົ້າ. 5 ຈາກນັ້ນ ພວກເລວີທີ່ຊື່ເຢຊູອາ ກັດມີເອນ ບານີ ຮາຊັບເນຢາ ເຊເຣບີຢາ ໂຮດີຢາ ເຊບານີຢາ ແລະເປທາຮີຢາກໍເວົ້າວ່າ: “ໃຫ້ລຸກຂຶ້ນແລະສັນລະເສີນພະເຢໂຫວາພະເຈົ້າຂອງພວກເຈົ້າຕະຫຼອດໄປ.+ ໃຫ້ພວກເຈົ້າສັນລະເສີນຊື່ທີ່ຍິ່ງໃຫຍ່ຂອງເພິ່ນເຊິ່ງສົມຄວນໄດ້ຮັບການອວຍພອນແລະການສັນລະເສີນທຸກຢ່າງ.
6 ພະເຢໂຫວາ ພະອົງຜູ້ດຽວເທົ່ານັ້ນທີ່ເປັນພະເຈົ້າທ່ຽງແທ້.+ ພະອົງເປັນຜູ້ສ້າງສະຫວັນທີ່ກວ້າງໃຫຍ່ແລະທຸກສິ່ງທີ່ຢູ່ໃນສະຫວັນ ພະອົງສ້າງໂລກແລະທຸກສິ່ງທີ່ຢູ່ໃນໂລກ ພະອົງສ້າງທະເລແລະທຸກສິ່ງທີ່ຢູ່ໃນທະເລ. ພະອົງເຮັດໃຫ້ທຸກສິ່ງມີຊີວິດຢູ່ຕໍ່ໄປໄດ້ ແລະທຸກສິ່ງໃນສະຫວັນໝູບໜ້າລົງນະມັດສະການພະອົງ. 7 ພະອົງແມ່ນພະເຢໂຫວາພະເຈົ້າທ່ຽງແທ້. ພະອົງໄດ້ພາອັບຣາມ+ອອກມາຈາກເມືອງອູເຣ+ທີ່ເປັນຂອງພວກການເດອາ ແລ້ວປ່ຽນຊື່ລາວເປັນອັບຣາຮາມ.+ 8 ພະອົງເຫັນວ່າລາວເປັນຄົນທີ່ມີຫົວໃຈສັດຊື່ ພະອົງ+ຈຶ່ງເຮັດສັນຍາກັບລາວວ່າຈະເອົາແຜ່ນດິນຂອງພວກການາອານ ພວກເຮດ ພວກອາໂມ ພວກເປຣິຊີ ພວກເຢບຸດ ແລະພວກກີກາຊີໃຫ້ລາວກັບລູກຫຼານ+ຂອງລາວ ແລະພະອົງກໍໄດ້ເຮັດຕາມທີ່ສັນຍາໄວ້ ຍ້ອນວ່າພະອົງເຮັດສິ່ງທີ່ຖືກຕ້ອງສະເໝີ.
9 ຕອນທີ່ປູ່ຍ່າຕານາຍຂອງພວກເຮົາເຈິຄວາມລຳບາກຫຼາຍໃນເອຢິບ+ ພະອົງກໍເຫັນ ແລະເມື່ອເຂົາເຈົ້າຮ້ອງຂໍໃຫ້ພະອົງຊ່ວຍຢູ່ທະເລແດງ ພະອົງກໍຟັງ. 10 ແລ້ວພະອົງກໍໄດ້ເຮັດການອັດສະຈັນຫຼາຍຢ່າງເພື່ອລົງໂທດຟາໂຣ*ກັບຄົນຂອງລາວແລະປະຊາຊົນທີ່ຢູ່ໃນປະເທດນັ້ນ+ ຍ້ອນພະອົງຮູ້ວ່າເຂົາເຈົ້າກົດຂີ່ຂົ່ມເຫງ+ຄົນຂອງພະອົງ. ພະອົງໄດ້ເຮັດໃຫ້ໂຕເອງມີຊື່ສຽງຈົນຮອດທຸກມື້ນີ້.+ 11 ພະອົງໄດ້ແຍກທະເລແດງຕໍ່ໜ້າເຂົາເຈົ້າແລະໃຫ້ເຂົາເຈົ້າຍ່າງຂ້າມທະເລຢູ່ເທິງດິນແຫ້ງ.+ ພະອົງໂຍນພວກສັດຕູຂອງເຂົາເຈົ້າລົງໄປໃນທະເລເລິກຄືກັບໂຍນຫີນລົງໄປໃນທະເລທີ່ປັ່ນປ່ວນ.+ 12 ໃນຕອນກາງເວັນ ພະອົງນຳທາງເຂົາເຈົ້າດ້ວຍເສົາຂີ້ເຝື້ອ ແລະໃນຕອນກາງຄືນ ພະອົງນຳທາງເຂົາເຈົ້າດ້ວຍເສົາໄຟເພື່ອໃຫ້ເຂົາເຈົ້າຮູ້ວ່າຄວນໄປທາງໃດ.+ 13 ພະອົງມາພູຊີນາຍ+ແລະເວົ້າກັບເຂົາເຈົ້າຈາກສະຫວັນ.+ ພະອົງໃຫ້ກົດໝາຍເພື່ອເຂົາເຈົ້າຈະຕັດສິນຄະດີໄດ້ຢ່າງຍຸຕິທຳ ໃຫ້ກົດໝາຍທີ່ເຊື່ອຖືໄດ້* ໃຫ້ຂໍ້ກຳນົດ ແລະໃຫ້ຄຳສັ່ງທີ່ດີຕ່າງໆກັບເຂົາເຈົ້າ.+ 14 ພະອົງສອນເຂົາເຈົ້າໃຫ້ຖືວັນຊະບາໂຕແລະໃຫ້ຕັ້ງໄວ້ເປັນມື້ບໍລິສຸດ.+ ພະອົງໃຫ້ຄຳສັ່ງ ຂໍ້ກຳນົດ ແລະກົດໝາຍກັບເຂົາເຈົ້າຜ່ານທາງໂມເຊຜູ້ຮັບໃຊ້ຂອງພະອົງ. 15 ຕອນທີ່ເຂົາເຈົ້າຫິວເຂົ້າ ພະອົງກໍໃຫ້ມີຂອງກິນຕົກລົງມາຈາກຟ້າ+ ແລະຕອນທີ່ເຂົາເຈົ້າຫິວນ້ຳ ພະອົງກໍໃຫ້ມີນ້ຳໄຫຼອອກມາຈາກຫີນ.+ ພະອົງຍັງໄດ້ບອກເຂົາເຈົ້າໃຫ້ເຂົ້າໄປຍຶດເອົາແຜ່ນດິນທີ່ພະອົງສັນຍາວ່າຈະໃຫ້ເຂົາເຈົ້າ.
16 ແຕ່ປູ່ຍ່າຕານາຍຂອງພວກເຮົາເປັນຄົນບໍ່ເຊື່ອຟັງ+ແລະຫົວແຂງ.+ ເຂົາເຈົ້າບໍ່ເຮັດຕາມກົດໝາຍຂອງພະອົງ. 17 ເຂົາເຈົ້າບໍ່ເຊື່ອຟັງ+ພະອົງແລະລືມການອັດສະຈັນຕ່າງໆທີ່ພະອົງໄດ້ເຮັດເພື່ອເຂົາເຈົ້າ. ເຂົາເຈົ້າເປັນຄົນຫົວແຂງແລະແຕ່ງຕັ້ງຫົວໜ້າຜູ້ໜຶ່ງໃຫ້ພາເຂົາເຈົ້າກັບໄປເປັນທາດຢູ່ເອຢິບ.+ ແຕ່ພະອົງເປັນພະເຈົ້າທີ່ພ້ອມຈະໃຫ້ອະໄພ ໃຈດີ ມີຄວາມເມດຕາ ບໍ່ໃຈຮ້າຍງ່າຍ ມີຄວາມຮັກທີ່ໝັ້ນຄົງຫຼາຍທີ່ສຸດ+ ແລະພະອົງບໍ່ປະຖິ້ມເຂົາເຈົ້າ.+ 18 ເຂົາເຈົ້າໄດ້ຫຼໍ່ຮູບງົວນ້ອຍຂຶ້ນມາແລະເວົ້າວ່າ ‘ນີ້ແມ່ນພະເຈົ້າຂອງພວກເຮົາທີ່ພາພວກເຮົາອອກມາຈາກເອຢິບ.’+ ເຂົາເຈົ້າດູຖູກພະອົງຫຼາຍເທື່ອ 19 ແຕ່ພະອົງກໍອີ່ຕົນເຂົາເຈົ້າແລະບໍ່ໄດ້ປະຖິ້ມເຂົາເຈົ້າຢູ່ບ່ອນກັນດານ.+ ໃນຕອນກາງເວັນ ພະອົງກໍຍັງນຳທາງເຂົາເຈົ້າດ້ວຍເສົາຂີ້ເຝື້ອ ແລະໃນຕອນກາງຄືນ ພະອົງກໍນຳທາງເຂົາເຈົ້າດ້ວຍເສົາໄຟເພື່ອໃຫ້ເຂົາເຈົ້າຮູ້ວ່າຄວນໄປທາງໃດ.+ 20 ພະອົງໃຫ້ພະລັງບໍລິສຸດຂອງພະອົງກັບເຂົາເຈົ້າເພື່ອເຂົາເຈົ້າຈະມີສະຕິປັນຍາ.+ ພະອົງຍັງໃຫ້ເຂົາເຈົ້າມີມານາກິນ+ ແລະຕອນທີ່ເຂົາເຈົ້າຫິວນ້ຳ ພະອົງກໍຍັງໃຫ້ເຂົາເຈົ້າມີນ້ຳກິນ.+ 21 ຕະຫຼອດ 40 ປີທີ່ເຂົາເຈົ້າຢູ່ໃນບ່ອນກັນດານ ພະອົງໃຫ້ເຂົາເຈົ້າມີຂອງກິນ.+ ເຂົາເຈົ້າບໍ່ໄດ້ຂາດຫຍັງເລີຍ. ເຄື່ອງນຸ່ງຂອງເຂົາເຈົ້າກໍບໍ່ເກົ່າ+ແລະຕີນຂອງເຂົາເຈົ້າກໍບໍ່ບວມ.
22 ພະອົງໄດ້ເອົາປະເທດຕ່າງໆແລະຄົນໃນປະເທດເຫຼົ່ານັ້ນໃຫ້ເຂົາເຈົ້າ ແລ້ວກໍແບ່ງດິນໃຫ້ເຂົາເຈົ້າ.+ ເຂົາເຈົ້າຈຶ່ງໄດ້ເປັນເຈົ້າຂອງແຜ່ນດິນຂອງສີໂຮນ+ກະສັດຂອງເມືອງເຮັດຊະໂບນ+ແລະເປັນເຈົ້າຂອງແຜ່ນດິນຂອງໂອກ+ກະສັດຂອງບາຊານ. 23 ພະອົງໃຫ້ເຂົາເຈົ້າມີລູກຫຼານຫຼາຍຄືກັບດາວຢູ່ເທິງຟ້າ.+ ພະອົງພາເຂົາເຈົ້າເຂົ້າໄປໃນແຜ່ນດິນທີ່ພະອົງສັນຍາກັບປູ່ຍ່າຕານາຍຂອງເຂົາເຈົ້າວ່າຈະເອົາໃຫ້ເຂົາເຈົ້າ.+ 24 ລູກຫຼານຂອງເຂົາເຈົ້າຈຶ່ງເຂົ້າໄປຍຶດເອົາແຜ່ນດິນນັ້ນ.+ ພະອົງໄດ້ຊ່ວຍເຂົາເຈົ້າໃຫ້ເອົາຊະນະພວກການາອານ+ທີ່ຢູ່ຫັ້ນ. ພະອົງໄດ້ມອບພວກກະສັດແລະພວກປະຊາຊົນທັງໝົດໃຫ້ພວກອິດສະຣາເອນແລະໃຫ້ເຂົາເຈົ້າຈັດການໄດ້ຕາມໃຈ. 25 ເຂົາເຈົ້າໄດ້ຍຶດເອົາເມືອງຕ່າງໆທີ່ມີກຳແພງອ້ອມ+ ແຜ່ນດິນທີ່ອຸດົມສົມບູນ+ ເຮືອນທີ່ມີແຕ່ເຄື່ອງແພງໆ ນ້ຳສ້າງ ສວນໝາກລະແຊັງ ສວນໝາກກອກ+ ແລະຕົ້ນໄມ້ທີ່ມີໝາກດົກ. ເຂົາເຈົ້າຈຶ່ງໄດ້ກິນຈົນໜຳໃຈແລະຈົນຕຸ້ຍຈົນພີ. ເຂົາເຈົ້າມີຄວາມສຸກແບບນີ້ກໍຍ້ອນສິ່ງດີໆທີ່ພະອົງເຮັດໃຫ້ເຂົາເຈົ້າ.
26 ແຕ່ຫຼັງຈາກນັ້ນ ເຂົາເຈົ້າພັດບໍ່ເຊື່ອຟັງພະອົງ ບໍ່ເຮັດຕາມກົດໝາຍຂອງພະອົງ ແລະກະບົດຕໍ່ພະອົງ.+ ພະອົງໄດ້ສົ່ງພວກຜູ້ພະຍາກອນໄປເຕືອນເຂົາເຈົ້າໃຫ້ກັບມາຫາພະອົງ ແຕ່ເຂົາເຈົ້າພັດຂ້າຜູ້ພະຍາກອນເຫຼົ່ານັ້ນແລະຍັງໄດ້ດູຖູກພະອົງຫຼາຍ.+ 27 ຍ້ອນແນວນີ້ ພະອົງຈຶ່ງມອບເຂົາເຈົ້າໃຫ້ພວກສັດຕູ+ທີ່ເຮັດໃຫ້ເຂົາເຈົ້າມີຄວາມທຸກລຳບາກຫຼາຍ.+ ແຕ່ເມື່ອເຂົາເຈົ້າຕົກຢູ່ໃນສະພາບແບບນັ້ນແລະຮ້ອງຂໍໃຫ້ພະອົງຊ່ວຍ ພະອົງກໍຍັງຟັງເຂົາເຈົ້າຈາກສະຫວັນ. ຍ້ອນພະອົງມີຄວາມເມດຕາຫຼາຍ ພະອົງຈຶ່ງໃຫ້ມີຄົນມາຊ່ວຍເຂົາເຈົ້າຈາກພວກສັດຕູ.+
28 ເມື່ອພະອົງຊ່ວຍເຂົາເຈົ້າໃຫ້ລອດຈາກພວກສັດຕູແລ້ວ ເຂົາເຈົ້າກໍເຮັດຊົ່ວຕໍ່ພະອົງອີກ+ ພະອົງຈຶ່ງປ່ອຍໃຫ້ພວກສັດຕູມາປົກຄອງເຂົາເຈົ້າ.+ ແຕ່ເມື່ອເຂົາເຈົ້າກັບມາຫາພະອົງແລະຂໍໃຫ້ພະອົງຊ່ວຍ+ ພະອົງກໍຟັງເຂົາເຈົ້າຈາກສະຫວັນແລະຊ່ວຍເຂົາເຈົ້າ. ພະອົງຊ່ວຍເຂົາເຈົ້າແບບນີ້ຫຼາຍເທື່ອຍ້ອນພະອົງມີຄວາມເມດຕາຫຼາຍ.+ 29 ເຖິງວ່າພະອົງເຕືອນເຂົາເຈົ້າເພື່ອໃຫ້ກັບມາເຊື່ອຟັງກົດໝາຍຂອງພະອົງ ແຕ່ເຂົາເຈົ້າກໍຍິ່ງຈອງຫອງແລະບໍ່ເຊື່ອຟັງກົດໝາຍນັ້ນ.+ ພະອົງບອກວ່າຄົນທີ່ເຮັດຕາມຂໍ້ກຳນົດຂອງພະອົງຈະມີຊີວິດຕໍ່ໄປ+ ແຕ່ເຂົາເຈົ້າກໍບໍ່ເຮັດຕາມ. ເຂົາເຈົ້າເປັນຄົນຫົວແຂງ ດື້ດ້ານ ແລະບໍ່ເຊື່ອຟັງ. 30 ພະອົງໄດ້ອົດທົນກັບເຂົາເຈົ້າ+ຫຼາຍປີແລະເຕືອນເຂົາເຈົ້າໂດຍທາງພວກຜູ້ພະຍາກອນທີ່ໄດ້ຮັບພະລັງບໍລິສຸດຂອງພະອົງ ແຕ່ເຂົາເຈົ້າກໍບໍ່ຟັງ. ໃນທີ່ສຸດ ພະອົງກໍມອບເຂົາເຈົ້າໄວ້ໃນມືຂອງຊາດຕ່າງໆທີ່ຢູ່ອ້ອມຂ້າງ.+ 31 ແຕ່ຍ້ອນພະອົງເປັນພະເຈົ້າທີ່ໃຈດີແລະມີຄວາມເມດຕາຫຼາຍ+ ພະອົງຈຶ່ງບໍ່ປະຖິ້ມແລະບໍ່ທຳລາຍ+ເຂົາເຈົ້າ.
32 ພະເຈົ້າຂອງພວກເຮົາ ພະອົງເປັນພະເຈົ້າທີ່ຍິ່ງໃຫຍ່ແລະມີລິດເດດຫຼາຍທີ່ຄົນຕ້ອງຢ້ານແລະນັບຖື. ພະອົງເຮັດຕາມສັນຍາສະເໝີແລະມີຄວາມຮັກທີ່ໝັ້ນຄົງ.+ ພວກເຮົາ ພວກກະສັດ ພວກເຈົ້ານາຍ+ ພວກປະໂລຫິດ+ ພວກຜູ້ພະຍາກອນ+ ພວກປູ່ຍ່າຕານາຍ ແລະພວກປະຊາຊົນຂອງພະອົງນັບຕັ້ງແຕ່ສະໄໝພວກກະສັດຂອງອັດຊີເຣຍ+ຈົນຮອດທຸກມື້ນີ້ໄດ້ເຈິຄວາມທຸກຍາກລຳບາກຫຼາຍ. ຂໍພະອົງຢ່າຖືວ່າຄວາມທຸກຍາກລຳບາກທີ່ພວກເຮົາເຈິເປັນເລື່ອງນ້ອຍໆ. 33 ບໍ່ວ່າພວກເຮົາຈະເຈິເລື່ອງດີຫຼືເລື່ອງຮ້າຍ ພະອົງກໍຍຸຕິທຳກັບພວກເຮົາສະເໝີ. ພະອົງເຮັດທຸກສິ່ງດ້ວຍຄວາມສັດຊື່ ແຕ່ພວກເຮົານີ້ແຫຼະທີ່ເຮັດຊົ່ວເອງ.+ 34 ພວກກະສັດ ພວກເຈົ້ານາຍ ພວກປະໂລຫິດ ແລະປູ່ຍ່າຕານາຍຂອງພວກເຮົາບໍ່ໄດ້ເຮັດຕາມກົດໝາຍແລະບໍ່ສົນໃຈຟັງຄຳສັ່ງແລະຄຳເຕືອນຂອງພະອົງ. 35 ເຖິງວ່າເຂົາເຈົ້າຈະມີກະສັດປົກຄອງຕາມທີ່ເຂົາເຈົ້າຢາກໄດ້ ໄດ້ຮັບສິ່ງດີໆຫຼາຍຢ່າງຈາກພະອົງ ແລະໄດ້ຢູ່ໃນແຜ່ນດິນທີ່ກວ້າງໃຫຍ່ແລະອຸດົມສົມບູນທີ່ພະອົງເອົາໃຫ້ເຂົາເຈົ້າ ແຕ່ເຂົາເຈົ້າກໍບໍ່ຮັບໃຊ້ພະອົງ+ແລະບໍ່ເຊົາເຮັດຊົ່ວ. 36 ຍ້ອນແນວນີ້ ພວກເຮົາຈຶ່ງເປັນທາດ+ຢູ່ແຜ່ນດິນນີ້ ທັງໆທີ່ພະອົງເອົາແຜ່ນດິນນີ້ໃຫ້ປູ່ຍ່າຕານາຍຂອງພວກເຮົາເພື່ອໃຫ້ເຂົາເຈົ້າໄດ້ກິນຜົນລະປູກທີ່ດີໆແລະມີຄວາມສຸກກັບສິ່ງທີ່ດີໆ. 37 ຍ້ອນພວກເຮົາເຮັດຜິດ ຜົນລະປູກທີ່ດີໆຈຶ່ງຕົກເປັນຂອງພວກກະສັດຕ່າງຊາດທີ່ພະອົງໃຫ້ປົກຄອງພວກເຮົາ.+ ເຂົາເຈົ້າປົກຄອງພວກເຮົາແລະຝູງສັດຂອງພວກເຮົາຕາມໃຈມັກ ເຊິ່ງເຮັດໃຫ້ພວກເຮົາລຳບາກຫຼາຍ.
38 ຍ້ອນສິ່ງທັງໝົດນີ້ ພວກເຮົາຈຶ່ງຕັດສິນໃຈຂຽນຄຳສັນຍາໄວ້+ ແລ້ວໃຫ້ພວກເຈົ້ານາຍ ພວກເລວີ ແລະພວກປະໂລຫິດຈ້ຳກາໃສ່.”+