ໝວດ 25
ຄຳແນະນຳເລື່ອງຄວາມເຊື່ອ ການປະພຶດ ແລະຄວາມຮັກ
ຢາໂກໂບ ເປໂຕ ໂຢຮັນ ແລະຢູເດຂຽນຈົດໝາຍຫນູນໃຈຄລິດສະຕຽນຄົນອື່ນໆ
ຢາໂກໂບແລະຢູເດເປັນນ້ອງຊາຍຄົນລະພໍ່ຂອງພະເຍຊູ. ເປໂຕແລະໂຢຮັນເປັນອັກຄະສາວົກໃນຈຳນວນອັກຄະສາວົກ 12 ຄົນຂອງພະເຍຊູ. ຜູ້ຊາຍສີ່ຄົນນີ້ຂຽນຈົດໝາຍທັງໝົດເຈັດສະບັບເຊິ່ງພົບໃນພະຄຳພີຄລິດສະຕຽນພາກພາສາເກັຣກ. ຈົດໝາຍແຕ່ລະສະບັບມີຊື່ຂອງຜູ້ຂຽນ. ການຕັກເຕືອນທີ່ຂຽນໂດຍການດົນບັນດານໃຈເຊິ່ງພົບໃນຈົດໝາຍເຫຼົ່ານີ້ມີຈຸດປະສົງເພື່ອຊ່ວຍຄລິດສະຕຽນໃຫ້ຮັກສາຄວາມຊື່ສັດໝັ້ນຄົງຕໍ່ກັບພະເຢໂຫວາແລະລາຊະອານາຈັກຂອງພະອົງ.
ສຳແດງຄວາມເຊື່ອ. ພຽງແຕ່ບອກວ່າມີຄວາມເຊື່ອເທົ່ານັ້ນຍັງບໍ່ພໍ. ຄວາມເຊື່ອແທ້ສະແດງອອກໂດຍການກະທຳ. ຢາໂກໂບຂຽນວ່າ “ເຫດວ່າ . . . ຄວາມເຊື່ອທີ່ບໍ່ມີກິດຈະການກໍຕາຍ.” (ຢາໂກໂບ 2:26) ຄວາມເຊື່ອທີ່ປະກອບດ້ວຍການກະທຳເມື່ອປະເຊີນການທົດລອງຕ່າງໆຈຶ່ງເຮັດໃຫ້ມີຄວາມອົດທົນ. ເພື່ອຈະປະສົບຜົນສຳເລັດ ຄລິດສະຕຽນຈຳເປັນຕ້ອງຂໍສະຕິປັນຍາຈາກພະເຈົ້າ ແລະໝັ້ນໃຈວ່າພະເຈົ້າຈະປະທານສະຕິປັນຍາໃຫ້ກັບຕົນ. ຄວາມອົດທົນເຮັດໃຫ້ພະເຈົ້າພໍໃຈ. (ຢາໂກໂບ 1:2-6, 12) ຖ້າຜູ້ນະມັດສະການຮັກສາຄວາມຊື່ສັດໝັ້ນຄົງໃນຄວາມເຊື່ອ ພະເຢໂຫວາພະເຈົ້າຈະຕອບຄຳຂໍນັ້ນ. ຢາໂກໂບຂຽນວ່າ “ຈົ່ງຫຍັບເຂົ້າມາໃກ້ພະເຈົ້າແລະພະອົງຈະຫຍັບເຂົ້າມາໃກ້ທ່ານທັງຫຼາຍ.”—ຢາໂກໂບ 4:8.
ຄວາມເຊື່ອຂອງຄລິດສະຕຽນຕ້ອງເຂັ້ມແຂງພຽງພໍເພື່ອຈະຊ່ວຍລາວໃຫ້ຕ້ານທານການລໍ້ໃຈແລະແຮງຊັກຈູງໃຫ້ເຮັດຜິດສິນລະທຳ. ສະພາບແວດລ້ອມທີ່ຊົ່ວຮ້າຍທາງສິນລະທຳເຊິ່ງມີຢູ່ທົ່ວໄປເຮັດໃຫ້ຢູເດຮູ້ສຶກວ່າຈຳເປັນຕ້ອງກະຕຸ້ນເຕືອນເພື່ອນຮ່ວມຄວາມເຊື່ອ “ໃຫ້ເລວເສິກ [ຢ່າງໜັກ] ຝ່າຍຄວາມເຊື່ອ.”—ຢູເດ 3.
ຮັກສາການປະພຶດທີ່ສະອາດ ພະເຢໂຫວາຄາດໝາຍໃຫ້ຜູ້ຮັບໃຊ້ຂອງພະອົງເປັນຄົນບໍລິສຸດ ຄືສະອາດໃນທຸກແງ່ມຸມ. ເປໂຕຂຽນວ່າ “ພວກທ່ານຈົ່ງເປັນຄົນບໍລິສຸດໃນກິດຈະການຂອງທ່ານທຸກຢ່າງ . . . ເພາະວ່າມີຄຳຂຽນໄວ້ແລ້ວວ່າ ‘ຈົ່ງເປັນຄົນບໍລິສຸດ ເພາະວ່າຝ່າຍເຮົາ [ພະເຢໂຫວາ] ເຮົາເປັນບໍລິສຸດ.’” (1 ເປໂຕ 1:15, 16) ຄລິດສະຕຽນມີຕົວຢ່າງໜຶ່ງເຊິ່ງສົມຄວນເອົາເປັນແບບຢ່າງ. ເປໂຕກ່າວວ່າ “ພະຄລິດ . . . ທົນທຸກລຳບາກແທນທ່ານທັງຫຼາຍໃຫ້ເປັນແບບຢ່າງແກ່ພວກທ່ານ ເພື່ອພວກທ່ານຈະໄດ້ຕິດຕາມຮອຍຕີນຂອງພະອົງໄປ [ຢ່າງໃກ້ຊິດ].” (1 ເປໂຕ 2:21) ເຖິງແມ່ນວ່າຄລິດສະຕຽນອາດຈະທົນທຸກຍ້ອນດຳເນີນຊີວິດຕາມມາດຕະຖານຂອງພະເຈົ້າ ເຂົາເຈົ້າຮັກສາ “ໃຈຮູ້ຜິດແລະຊອບເປັນອັນດີ.” (1 ເປໂຕ 3:16, 17) ເປໂຕກະຕຸ້ນຄລິດສະຕຽນໃຫ້ເຕັມໄປດ້ວຍການປະພຶດແລະການກະທຳທີ່ບໍລິສຸດ ເຊິ່ງສະທ້ອນເຖິງການສະແດງຄວາມເຫຼື້ອມໃສໃນພະເຈົ້າໃນຂະນະທີ່ຄອຍຖ້າວັນແຫ່ງການຕັດສິນຂອງພະເຈົ້າແລະໂລກໃໝ່ທີ່ພະອົງສັນຍາໄວ້ເຊິ່ງ “ທີ່ນັ້ນຄວາມຊອບທຳຕັ້ງຢູ່.”—2 ເປໂຕ 3:11-13.
“ຈົ່ງຫຍັບເຂົ້າມາໃກ້ພະເຈົ້າແລະພະອົງຈະຫຍັບເຂົ້າມາໃກ້ທ່ານທັງຫຼາຍ.”—ຢາໂກໂບ 4:8.
ສຳແດງຄວາມຮັກ. ໂຢຮັນຂຽນວ່າ “ພະເຈົ້າເປັນຄວາມຮັກ.” ທ່ານອັກຄະສາວົກຊີ້ໃຫ້ເຫັນວ່າພະເຈົ້າໄດ້ສະແດງຄວາມຮັກອັນຍິ່ງໃຫຍ່ຂອງພະອົງໂດຍການສົ່ງພະເຍຊູໃຫ້ມາ “ເປັນຄວາມໄຖ່ໂທດບາບຂອງເຮົາທັງຫຼາຍ.” ຄລິດສະຕຽນຄວນຕອບສະໜອງແນວໃດ? ໂຢຮັນອະທິບາຍວ່າ “ພວກພີ່ນ້ອງທີ່ເຮົາຮັກເອີຍ ຖ້າພະເຈົ້າໄດ້ຮັກເຮົາທັງຫຼາຍ ດັ່ງນັ້ນເຮົາທັງຫຼາຍຕ້ອງຮັກກັນແລະກັນດ້ວຍ.” (1 ໂຢຮັນ 4:8-11) ວິທີໜຶ່ງທີ່ຈະສະແດງຄວາມຮັກດັ່ງກ່າວນັ້ນ ແມ່ນການມີນ້ຳໃຈຕ້ອນຮັບເພື່ອນຮ່ວມຄວາມເຊື່ອ.—3 ໂຢຮັນ 5-8.
ແຕ່ຜູ້ທີ່ນະມັດສະການພະເຢໂຫວາຈະສະແດງຄວາມຮັກທີ່ເຂົາເຈົ້າມີຕໍ່ພະອົງໄດ້ແນວໃດ? ໂຢຮັນໄດ້ຕອບວ່າ “ເພາະວ່າອັນນີ້ເປັນຄວາມຮັກແກ່ພະເຈົ້າ ຄືວ່າໃຫ້ເຮົາທັງຫຼາຍຖືຮັກສາຄຳສັ່ງທັງຫຼາຍແຫ່ງພະອົງ ແລະຄຳສັ່ງທັງຫຼາຍແຫ່ງພະອົງກໍບໍ່ຍາກ.” (1 ໂຢຮັນ 5:3; 2 ໂຢຮັນ 6) ສະນັ້ນຜູ້ທີ່ເຊື່ອຟັງພະເຈົ້າສາມາດໝັ້ນໃຈໄດ້ວ່າເຂົາເຈົ້າຈະເປັນທີ່ຮັກຂອງພະເຈົ້າຕໍ່ໆໄປ ໂດຍຫວັງຈະໄດ້ “ຊີວິດອັນຕະຫຼອດ.”—ຢູເດ 21, ລ.ມ.
—ຂໍ້ມູນມາຈາກຢາໂກໂບ; 1 ແລະ 2 ເປໂຕ; 1, 2 ແລະ 3 ໂຢຮັນ; ຢູເດ.