ທັນວາ
ວັນຈັນທີ 1 ທັນວາ
ຄົນຕາຍຈະຟື້ນຄືນມາ.—ລກ. 20:37
ພະເຢໂຫວາມີຄວາມສາມາດແລະອຳນາດທີ່ຈະປຸກຄົນຕາຍໃຫ້ຟື້ນຄືນມາບໍ? ມີແທ້! ເພິ່ນເປັນພະເຈົ້າ “ຜູ້ມີລິດເດດສູງສຸດ.” (ພນມ. 1:8) ເພິ່ນຈຶ່ງມີອຳນາດທີ່ຈະກຳຈັດທຸກຢ່າງທີ່ເປັນສັດຕູຂອງເພິ່ນເຊິ່ງລວມເຖິງຄວາມຕາຍ. (1ກຣ. 15:26) ອີກເຫດຜົນໜຶ່ງທີ່ເຮົາຈະຮູ້ວ່າພະເຢໂຫວາສາມາດປຸກຄົນຕາຍໃຫ້ຟື້ນຄືນມາໄດ້ອີກກໍຄື ເພິ່ນມີຄວາມຈຳທີ່ບໍ່ຈຳກັດ. ເພິ່ນສາມາດເອີ້ນຊື່ດາວທຸກດວງໄດ້. (ອຊຢ. 40:26) ເພິ່ນຈື່ທຸກຄົນທີ່ຕາຍໄປແລ້ວໄດ້. (ໂຢບ 14:13; ລກ. 20:38) ເພິ່ນເຖິງຂັ້ນຈື່ລາຍລະອຽດທັງໝົດກ່ຽວກັບຄົນທີ່ເພິ່ນຈະປຸກໃຫ້ຄືນມາ ເຊັ່ນ: ເພິ່ນຈື່ລະຫັດພັນທຸກຳຂອງເຂົາເຈົ້າໄດ້ ຈື່ໄດ້ວ່າເຂົາເຈົ້າມີຮູບຮ່າງໜ້າຕາແນວໃດແລະມີນິດໄສແບບໃດ ຈື່ໄດ້ວ່າເຂົາເຈົ້າເຈິຫຍັງມາແດ່ໃນຊີວິດ ແລະເພິ່ນຈື່ໄດ້ໝົດວ່າເຂົາເຈົ້າມີຄວາມຊົງຈຳແນວໃດແດ່. ເຮົາເຫັນໄດ້ເລີຍວ່າເຮົາເຊື່ອຄຳສັນຍາຂອງພະເຢໂຫວາເລື່ອງການຄືນມາຈາກຕາຍໄດ້ ເພາະເຮົາຮູ້ວ່າເພິ່ນຢາກປຸກຄົນຕາຍໃຫ້ຟື້ນຄືນມາ ແລະເພິ່ນມີຄວາມສາມາດແລະອຳນາດທີ່ຈະເຮັດແບບນັ້ນໄດ້. ໃຫ້ເຮົາມາເບິ່ງອີກເຫດຜົນໜຶ່ງທີ່ເຮັດໃຫ້ເຮົາເຊື່ອຄຳສັນຍານີ້ຂອງພະເຢໂຫວາ ນັ້ນກໍຄື ເພິ່ນເຄີຍປຸກຄົນໃຫ້ຄືນມາຈາກຕາຍແລ້ວ. ໃນສະໄໝທີ່ຂຽນຄຳພີໄບເບິນ ພະເຢໂຫວາໄດ້ໃຫ້ອຳນາດນີ້ກັບຜູ້ຮັບໃຊ້ຂອງເພິ່ນບາງຄົນເພື່ອປຸກຄົນຕາຍໃຫ້ຟື້ນຄືນມາໄດ້ ແລະພະເຢຊູກໍໄດ້ອຳນາດນີ້ຄືກັນ. ຫ23.04 ໜ້າ 9-10 ຂໍ້ 7-9
ວັນອັງຄານທີ 2 ທັນວາ
ໃຫ້ຄຳເວົ້າຂອງພວກເຈົ້າເປັນຄຳເວົ້າທີ່ກະລຸນາສະເໝີຄືກັບອາຫານທີ່ປຸງດ້ວຍເກືອ.—ກລຊ. 4:6
ຖ້າເຮົາອະທິບາຍຄວາມເຊື່ອແບບທີ່ເປັນຕາຟັງແລະອ່ອນໂຍນ ຄົນທີ່ລົມກັບເຮົາກໍອາດຈະຟັງເຮົາຫຼາຍຂຶ້ນແລະຢາກລົມກັບເຮົາຕໍ່. ແຕ່ກໍເປັນໄປໄດ້ທີ່ເຮົາຈະເຈິຄົນທີ່ດູຖູກຄວາມເຊື່ອຂອງເຮົາຫຼືລົມກັບເຮົາຍ້ອນຢາກເອົາຊະນະຊື່ໆ. ຖ້າເປັນແບບນັ້ນ ເຮົາກໍບໍ່ຈຳເປັນຕ້ອງລົມກັບລາວຕໍ່. (ສພສ. 26:4) ແຕ່ກໍມີໜ້ອຍຄົນທີ່ເປັນແບບນັ້ນ ຄົນສ່ວນຫຼາຍອາດຢາກຟັງເຮົາຖ້າເຮົາເວົ້າແບບອ່ອນໂຍນ. ເຮົາເຫັນແລ້ວວ່າຖ້າເຮົາພະຍາຍາມເປັນຄົນອ່ອນໂຍນ ເຮົາຈະໄດ້ຮັບປະໂຫຍດຫຼາຍແທ້ໆ. ໃຫ້ເຈົ້າຂໍຄວາມເຂັ້ມແຂງຈາກພະເຢໂຫວາເພື່ອເຈົ້າຈະອ່ອນໂຍນໄດ້ຕອນທີ່ມີຄົນເວົ້າໃຫ້ເຈົ້າຫຼືມີຄົນຖາມເລື່ອງທີ່ອາດເຮັດໃຫ້ເກີດຄວາມຂັດແຍ່ງກັນ. ໃຫ້ຈື່ໄວ້ວ່າ ເຖິງວ່າຈະມີຄວາມຄິດທີ່ບໍ່ກົງກັນ ແຕ່ຖ້າເຈົ້າເປັນຄົນອ່ອນໂຍນເຈົ້າກໍຈະຊ່ວຍບໍ່ໃຫ້ເກີດການຜິດຖຽງກັນ. ນອກຈາກນັ້ນ ຖ້າເຈົ້າຕອບແບບອ່ອນໂຍນແລະດ້ວຍຄວາມນັບຖື ເຈົ້າກໍອາດຈະຊ່ວຍໃຫ້ຄົນທີ່ມາຖາມເຈົ້າເບິ່ງພະຍານພະເຢໂຫວາແລະຄວາມຈິງໃນຄຳພີໄບເບິນໃນແບບທີ່ດີຂຶ້ນ. ໃຫ້ “ພ້ອມຢູ່ສະເໝີທີ່ຈະອະທິບາຍ” ເລື່ອງຄວາມເຊື່ອຂອງເຈົ້າແລະໃຫ້ “ເຮັດຢ່າງສຸພາບແລະດ້ວຍຄວາມນັບຖືຈາກໃຈ.” (1ປຕ. 3:15) ຂໍໃຫ້ເຈົ້າພະຍາຍາມສະແດງໃຫ້ຄົນອື່ນເຫັນວ່າເຈົ້າເຂັ້ມແຂງໂດຍເປັນຄົນອ່ອນໂຍນ. ຫ23.09 ໜ້າ 19 ຂໍ້ 18-19
ວັນພຸດທີ 3 ທັນວາ
ໃຫ້ປູກຝັງ . . . ຄວາມອົດທົນ.—ກລຊ. 3:12
ໃຫ້ເຮົາມາເບິ່ງ 4 ຢ່າງທີ່ສະແດງວ່າເຮົາເປັນຄົນອົດທົນ. ຢ່າງທຳອິດ ຄົນທີ່ອົດທົນຈະບໍ່ໃຈຮ້າຍງ່າຍ. ລາວຈະພະຍາຍາມໃຈເຢັນແລະບໍ່ຕອບໂຕ້ເມື່ອມີຄົນເຮັດໃຫ້ລາວເຈັບໃຈ ແລະຕອນທີ່ລາວເຄັ່ງຕຶງລາວຈະບໍ່ເວົ້າຫຼືເຮັດສິ່ງທີ່ບໍ່ດີຕໍ່ຄົນອື່ນ. (ອພຍ. 34:6) ຢ່າງທີສອງ ຄົນທີ່ອົດທົນຈະລໍຖ້າແບບໃຈເຢັນໆ. ຖ້າລາວຕ້ອງລໍຖ້າດົນໆເກີນທີ່ລາວຄິດໄວ້ ລາວຈະພະຍາຍາມບໍ່ຫງຸດຫງິດຫຼືອາລົມເສຍ. (ມທ. 18:26, 27) ຢ່າງທີສາມ ຄົນທີ່ອົດທົນຈະບໍ່ເຮັດຫຍັງແບບຟ້າວຟັ່ງໂດຍທີ່ບໍ່ໄດ້ຄິດກ່ອນ. ຖ້າເປັນເລື່ອງສຳຄັນ ຄົນທີ່ອົດທົນຈະບໍ່ຟ້າວລົງມືເຮັດຫຍັງໂດຍທີ່ບໍ່ໄດ້ວາງແຜນກ່ອນ ແລະລາວຈະໃຊ້ເວລາໃຫ້ຫຼາຍພໍທີ່ຈະວາງແຜນວ່າຕ້ອງເຮັດຫຍັງແດ່ ແລະຕອນທີ່ລາວເຮັດສິ່ງນັ້ນ ລາວຈະບໍ່ຟ້າວເຮັດພໍແລ້ວມືແລ້ວຕີນເທົ່ານັ້ນ. ຢ່າງທີສີ່ ຄົນທີ່ອົດທົນຈະບໍ່ຈົ່ມຕອນທີ່ເຈິບັນຫາຫຼືຄວາມຍາກລຳບາກ. ລາວຈະພະຍາຍາມຄິດໃນແງ່ບວກແລະພະຍາຍາມຮັບໃຊ້ພະເຢໂຫວາຢ່າງມີຄວາມສຸກຕໍ່ໆໄປເຖິງວ່າຈະເຈິບັນຫາ. (ກລຊ. 1:11) ຄລິດສະຕຽນຕ້ອງສະແດງວ່າເປັນຄົນອົດທົນໂດຍເຮັດຕາມ 4 ຢ່າງທີ່ເວົ້າມານີ້. ຫ23.08 ໜ້າ 20-21 ຂໍ້ 3-6
ວັນພະຫັດທີ 4 ທັນວາ
ພະເຢໂຫວາເປັນຜູ້ກວດເບິ່ງຫົວໃຈ.—ສພສ. 17:3
ເຫດຜົນສຳຄັນຢ່າງໜຶ່ງທີ່ເຮົາຕ້ອງປົກປ້ອງຫົວໃຈກໍຄື ພະເຢໂຫວາເປັນຜູ້ກວດເບິ່ງຫົວໃຈຂອງເຮົາ. ນີ້ໝາຍຄວາມວ່າພະເຢໂຫວາເຫັນມຸມທີ່ຄົນອື່ນເບິ່ງບໍ່ເຫັນແລະຮູ້ວ່າເຮົາເປັນຄົນແນວໃດແທ້ໆ. ພະເຢໂຫວາຈະຮັກເຮົາຖ້າເຮົາມີຄຳແນະນຳຂອງເພິ່ນໃນຫົວໃຈແລະໃນຄວາມຄິດຂອງເຮົາສະເໝີ ເຊິ່ງຈະຊ່ວຍເຮົາໃຫ້ໄດ້ຊີວິດຕະຫຼອດໄປ. (ຢຮ. 4:14) ຖ້າເຮົາເຮັດແບບນັ້ນ ເຮົາກໍຈະບໍ່ຄິດເຖິງການເຮັດຜິດສິນລະທຳ ບໍ່ສົນໃຈຄຳຕົວະຂອງຊາຕານ ແລະບໍ່ຮຽນແບບຄົນໃນໂລກນີ້. (1ຢຮ. 5:18, 19) ເມື່ອເຮົາສະໜິດກັບພະເຢໂຫວາຫຼາຍຂຶ້ນ ເຮົາກໍຈະຮັກແລະນັບຖືເພິ່ນຫຼາຍຂຶ້ນ. ຍ້ອນເຮົາບໍ່ຢາກເຮັດໃຫ້ພະເຢໂຫວາເສຍໃຈ ເຮົາຈຶ່ງບໍ່ຄິດແມ່ນແຕ່ຈະເຮັດຜິດ. ມາທາພີ່ນ້ອງຍິງທີ່ຢູ່ໂກຣອາຊີເຄີຍຖືກລໍ້ໃຈໃຫ້ເຮັດຜິດສິນລະທຳທາງເພດ. ລາວຂຽນວ່າ: “ຕອນນັ້ນຂ້ອຍຮູ້ສຶກສັບສົນຫຼາຍແລະຮູ້ສຶກວ່າຍາກແທ້ໆທີ່ຈະຫັກຫ້າມໃຈໂຕເອງບໍ່ໃຫ້ເຮັດຜິດ. ແຕ່ຄວາມຢ້ານຢຳພະເຢໂຫວາປົກປ້ອງຂ້ອຍ.” ຄວາມຢ້ານຢຳພະເຢໂຫວາຊ່ວຍລາວແນວໃດ? ມາທາບອກວ່າລາວຄິດເຖິງຜົນເສຍທີ່ຈະຕາມມາຖ້າລາວຕັດສິນໃຈເຮັດຜິດ. ເຮົາເອງກໍຕ້ອງເຮັດແບບນັ້ນຄືກັນ. ຫ23.06 ໜ້າ 20-21 ຂໍ້ 3-4
ວັນສຸກທີ 5 ທັນວາ
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດເວົ້າວ່າ: “ທຸກຊາດຈະຮູ້ວ່າເຮົາແມ່ນເຢໂຫວາ ເມື່ອເຮົາເຮັດໃຫ້ເຂົາເຈົ້າເຫັນວ່າເຮົາເປັນພະເຈົ້າທີ່ບໍລິສຸດ.”—ອຊກ. 36:23
ພະເຢຊູຮູ້ວ່າຄວາມຕ້ອງການຂອງພະເຢໂຫວາແມ່ນ ພະເຢໂຫວາຢາກໃຫ້ຊື່ຂອງເພິ່ນໄດ້ຮັບຄວາມນັບຖືແລະພົ້ນຈາກຄຳຕຳໜິທຸກຢ່າງ. ຍ້ອນແນວນີ້ ພະເຢຊູຈຶ່ງສອນພວກລູກສິດໃຫ້ອະທິດຖານວ່າ: “ພະເຈົ້າ ພໍ່ຂອງພວກເຮົາທີ່ຢູ່ໃນສະຫວັນ ຂໍໃຫ້ຊື່ຂອງພະອົງໄດ້ຮັບຄວາມນັບຖືຫຼາຍທີ່ສຸດຕະຫຼອດໄປ.” (ມທ. 6:9) ພະເຢຊູຮູ້ວ່າເລື່ອງນີ້ເປັນເລື່ອງສຳຄັນທີ່ສຸດແລະມີຜົນກະທົບຕໍ່ທຸກສິ່ງທີ່ພະເຢໂຫວາສ້າງ. ທີ່ຈິງ ບໍ່ມີໃຜທີ່ຢູ່ໃນສະຫວັນຫຼືຢູ່ໃນໂລກນີ້ເຮັດໃຫ້ຊື່ຂອງພະເຢໂຫວາໄດ້ຮັບຄວາມນັບຖືຫຼາຍສ່ຳກັບພະເຢຊູໄດ້ເຮັດ. ຕອນທີ່ພະເຢຊູຖືກຈັບ ພວກສັດຕູກ່າວຫາເພິ່ນວ່າແນວໃດ? ເຂົາເຈົ້າກ່າວຫາເພິ່ນວ່າໝິ່ນປະໝາດພະເຈົ້າ! ພະເຢຊູຮູ້ຢູ່ແລ້ວວ່າການເຮັດໃຫ້ຊື່ທີ່ບໍລິສຸດຂອງພະເຢໂຫວາຖືກໃສ່ຮ້າຍຫຼືຖືກຕຳໜິເປັນຄວາມຜິດຮ້າຍແຮງທີ່ສຸດ. ເພິ່ນຈຶ່ງທຸກໃຈຫຼາຍທີ່ຖືກກ່າວຫາແບບນັ້ນ. ເລື່ອງນີ້ອາດເປັນເຫດຜົນສຳຄັນທີ່ເຮັດໃຫ້ພະເຢຊູ “ຮູ້ສຶກເຄັ່ງຕຶງຫຼາຍ” ໃນສອງສາມຊົ່ວໂມງກ່ອນທີ່ເພິ່ນຈະຖືກຈັບ.—ລກ. 22:41-44. ຫ24.02 ໜ້າ 11 ຂໍ້ 11
ວັນເສົາທີ 6 ທັນວາ
ສະຕິປັນຍາເຮັດໃຫ້ເຮືອນແຂງແຮງ.—ສພສ. 24:3
ໃນການແລ່ນແຂ່ງເພື່ອຊີວິດ ເຮົາຕ້ອງຮັກພະເຢໂຫວາກັບພະເຢຊູຫຼາຍກວ່າຍາດພີ່ນ້ອງຂອງເຮົາ. (ມທ. 10:37) ແຕ່ນີ້ບໍ່ໄດ້ໝາຍຄວາມວ່າເຮົາຈະປະຖິ້ມໜ້າທີ່ຮັບຜິດຊອບໃນຄອບຄົວ. ທີ່ຈິງ ເພື່ອຈະເຮັດໃຫ້ພະເຢໂຫວາກັບພະເຢຊູຍອມຮັບເຮົາ ເຮົາຕ້ອງເຮັດໜ້າທີ່ຂອງເຮົາໃນຄອບຄົວໃຫ້ດີທີ່ສຸດ. (1ຕມ. 5:4, 8) ເມື່ອເຮົາເຮັດແບບນັ້ນ ເຮົາກໍຈະມີຄວາມສຸກຫຼາຍຂຶ້ນ. ຖ້າຜົວກັບເມຍຮັກແລະນັບຖືກັນ ພໍ່ແມ່ຮັກແລະສັ່ງສອນລູກ ແລະລູກກໍເຊື່ອຟັງພໍ່ແມ່ ທຸກຄົນໃນຄອບຄົວກໍຈະມີຄວາມສຸກເພາະພະເຢໂຫວາສ້າງເຮົາໃຫ້ເປັນແບບນັ້ນ. (ອຟຊ. 5:33; 6:1, 4) ບໍ່ວ່າເຈົ້າຈະເປັນຜົວ ເມຍ ຫຼືລູກ ຂໍໃຫ້ເຈົ້າເຮັດຕາມຄຳແນະນຳໃນຄຳພີໄບເບິນ. ຢ່າເຮັດຕາມຄວາມຮູ້ສຶກຫຼືຕາມທຳນຽມຫຼືວັດທະນະທຳທີ່ຄົນທົ່ວໄປພາກັນເຮັດ ຫຼືເຮັດຕາມທີ່ຜູ້ຊ່ຽວຊານບອກ. ນອກຈາກນັ້ນ ໃຫ້ເຈົ້າໃຊ້ປຶ້ມຕ່າງໆຂອງອົງການເພື່ອຊ່ວຍເຈົ້າໃຫ້ເຂົ້າໃຈວ່າຈະເອົາຫຼັກການໃນຄຳພີໄບເບິນໄປໃຊ້ແນວໃດ. ຫ23.08 ໜ້າ 28 ຂໍ້ 6-7
ວັນອາທິດທີ 7 ທັນວາ
ເຈົ້າຕ້ອງອ່ານກົດໝາຍນີ້ແລະຄິດຕຶກຕອງທັງກາງເວັນແລະກາງຄືນເພື່ອຈະໄດ້ເຮັດຕາມກົດໝາຍທີ່ຂຽນໄວ້ໃນປຶ້ມນີ້ຢ່າງເຄັ່ງຄັດ. ເມື່ອເຈົ້າເຮັດແນວນີ້ ເຈົ້າກໍຈະປະສົບຜົນສຳເລັດແລະເຮັດທຸກສິ່ງໄດ້ຢ່າງສະຫຼາດ.—ຢຊ. 1:8
ພີ່ນ້ອງຍິງຈຳເປັນຕ້ອງຮຽນທັກສະທີ່ເປັນປະໂຫຍດແລະໃຊ້ໄດ້ແທ້ ເຊິ່ງທັກສະບາງຢ່າງຖ້າຮຽນຕັ້ງແຕ່ຍັງນ້ອຍກໍຈະເປັນປະໂຫຍດກັບລາວຕະຫຼອດຊີວິດ. ຕົວຢ່າງເຊັ່ນ: ຮຽນອ່ານແລະຂຽນໄດ້ດີ. ບາງວັດທະນະທຳຫຼາຍຄົນຄິດວ່າຜູ້ຍິງບໍ່ຈຳເປັນຕ້ອງອ່ານຫຼືຂຽນໄດ້. ແຕ່ນີ້ເປັນທັກສະສຳຄັນຫຼາຍສຳລັບຄລິດສະຕຽນທຸກຄົນ. (1ຕມ. 4:13) ດັ່ງນັ້ນ ໃຫ້ພະຍາຍາມຮຽນອ່ານແລະຂຽນຕໍ່ໆໄປເຖິງຈະຮູ້ສຶກວ່າຍາກ. ຖ້າເຈົ້າອ່ານແລະຂຽນໄດ້ດີ ເຈົ້າຈະໄດ້ຮັບປະໂຫຍດຫຍັງ? ມັນຈະຊ່ວຍເຈົ້າໃຫ້ຊອກວຽກໄດ້ງ່າຍຂຶ້ນແລະມີລາຍໄດ້ ເປັນນັກຮຽນແລະຜູ້ສອນຄຳພີໄບເບິນໄດ້ດີຂຶ້ນ ແລະສິ່ງທີ່ສຳຄັນເຈົ້າຈະໃກ້ຊິດກັບພະເຢໂຫວາຫຼາຍຂຶ້ນຍ້ອນເຈົ້າໄດ້ອ່ານແລະໄດ້ຄິດຕຶກຕອງຄຳສອນຂອງເພິ່ນທີ່ຢູ່ໃນຄຳພີໄບເບິນ.—1ຕມ. 4:15. ຫ23.12 ໜ້າ 20 ຂໍ້ 10-11
ວັນຈັນທີ 8 ທັນວາ
ພະເຢໂຫວາຮູ້ວິທີຊ່ວຍຄົນທີ່ຢ້ານຢຳເພິ່ນໃຫ້ຜ່ານການທົດສອບ.—2ປຕ. 2:9
ອະທິດຖານຂໍພະເຢໂຫວາຊ່ວຍເຮົາໃຫ້ເອົາຊະນະການລໍ້ໃຈ. ເຮົາເປັນມະນຸດທີ່ບໍ່ສົມບູນແບບ ເຮົາຈຶ່ງຕ້ອງຕໍ່ສູ້ຢູ່ເລື້ອຍໆເພື່ອຈະບໍ່ເຮັດຜິດ. ແຕ່ບໍ່ພຽງເທົ່ານັ້ນ ຊາຕານມັນພະຍາຍາມເຮັດທຸກວິທີເພື່ອຈະເຮັດໃຫ້ເຮົາສູ້ກັບການລໍ້ໃຈໄດ້ຍາກຂຶ້ນ. ວິທີໜຶ່ງທີ່ຊາຕານໃຊ້ກໍຄື ມັນພະຍາຍາມເຮັດໃຫ້ເຮົາຄິດເຖິງການພັກຜ່ອນຢ່ອນໃຈທີ່ບໍ່ດີເຊິ່ງອາດເຮັດໃຫ້ເຮົາເກີດມີຄວາມຄິດທີ່ບໍ່ສະອາດ. ຄວາມຄິດແບບນີ້ເຮັດໃຫ້ເຮົາບໍ່ສະອາດໃນສາຍຕາຂອງພະເຈົ້າ ແລະໃນທີ່ສຸດອາດເຮັດໃຫ້ເຮົາເຮັດຜິດຮ້າຍແຮງ. (ມຣກ. 7:21-23; ຢກບ. 1:14, 15) ເພື່ອເຮົາຈະເອົາຊະນະການລໍ້ໃຈໄດ້ ເຮົາຕ້ອງໃຫ້ພະເຢໂຫວາຊ່ວຍ. ໃນຕົວຢ່າງຄຳອະທິດຖານຂອງພະເຢຊູ ເພິ່ນບອກພວກລູກສິດໃຫ້ເວົ້າເຖິງເລື່ອງນີ້ນຳ. ເພິ່ນບອກວ່າ: “ຂໍພະອົງຊ່ວຍພວກເຮົາຢ່າໃຫ້ຍອມແພ້ຕໍ່ການລໍ້ໃຈ ແລະຂໍຊ່ວຍພວກເຮົາໃຫ້ພົ້ນຈາກຕົວຊົ່ວຮ້າຍ.” (ມທ. 6:13) ພະເຢໂຫວາຢາກຊ່ວຍເຮົາ ແຕ່ເຮົາຕ້ອງຂໍໃຫ້ເພິ່ນຊ່ວຍ. ໂຕເຮົາເອງກໍຕ້ອງເຮັດໃຫ້ສອດຄ່ອງກັບຄຳອະທິດຖານນຳ. ຫ23.05 ໜ້າ 6 ຂໍ້ 15-17
ວັນອັງຄານທີ 9 ທັນວາ
ເຊືອກ 3 ກຽວຈະບໍ່ຂາດງ່າຍ.—ປຍຈ. 4:12
ຖ້າຜົວກັບເມຍເຫັນຄ່າສາຍສຳພັນທີ່ເຂົາເຈົ້າມີຕໍ່ພະເຢໂຫວາ ເຂົາເຈົ້າກໍພ້ອມທີ່ຈະເຮັດຕາມຄຳແນະນຳຂອງເພິ່ນ ເຊິ່ງຈະຊ່ວຍເຂົາເຈົ້າໃຫ້ຫຼີກລ່ຽງແລະແກ້ໄຂບັນຫາທີ່ອາດຈະເຮັດໃຫ້ຄວາມຮັກຂອງເຂົາເຈົ້າຈືດຈາງລົງ. ນອກຈາກນັ້ນ ຜູ້ທີ່ຮັກພະເຢໂຫວາຍັງຈະພະຍາຍາມຮຽນແບບພະເຢໂຫວາແລະສະແດງຄຸນລັກສະນະຕ່າງໆທີ່ເພິ່ນມີ ເຊັ່ນ: ຄວາມກະລຸນາ ຄວາມອົດທົນ ແລະການໃຫ້ອະໄພ. (ອຟຊ. 4:32–5:1) ເມື່ອຜົວກັບເມຍສະແດງຄຸນລັກສະນະເຫຼົ່ານີ້ ມັນກໍງ່າຍທີ່ເຂົາເຈົ້າຈະຮັກກັນຫຼາຍຂຶ້ນ. ພີ່ນ້ອງຍິງຊື່ລີນາເຊິ່ງແຕ່ງດອງມາດົນກວ່າ 25 ປີໄດ້ບອກວ່າ: “ມັນງ່າຍທີ່ຈະຮັກແລະນັບຖືຄົນທີ່ມີຄວາມເຊື່ອເຂັ້ມແຂງ.” ໃຫ້ເຮົາມາເບິ່ງຕົວຢ່າງໜຶ່ງໃນຄຳພີໄບເບິນນຳກັນ. ເມື່ອພະເຢໂຫວາເລືອກຜູ້ທີ່ຈະມາເປັນພໍ່ແມ່ຂອງເມຊີອາທີ່ຈະມາໃນອະນາຄົດ ເພິ່ນໄດ້ເລືອກໂຢເຊັບແລະມາຣີຈາກລູກຫຼານຂອງດາວິດ. ຍ້ອນຫຍັງ? ຍ້ອນທັງສອງມີສາຍສຳພັນທີ່ແໜ້ນແຟ້ນກັບພະເຢໂຫວາ ແລະພະເຢໂຫວາກໍຮູ້ວ່າເຂົາເຈົ້າໃຫ້ເພິ່ນສຳຄັນທີ່ສຸດໃນຊີວິດຄູ່ຂອງເຂົາເຈົ້າ. ຫ23.05 ໜ້າ 21 ຂໍ້ 3-4
ວັນພຸດທີ 10 ທັນວາ
ໃຫ້ເຊື່ອຟັງແລະຍອມຮັບອຳນາດຂອງຜູ້ທີ່ນຳໜ້າພວກເຈົ້າ.—ຮຣ. 13:17
ເຖິງວ່າພະເຢຊູເປັນຜູ້ນຳທີ່ສົມບູນແບບ ແຕ່ຜູ້ທີ່ພະເຢຊູໃຊ້ໃຫ້ນຳໜ້າຢູ່ໃນໂລກນີ້ບໍ່ສົມບູນແບບ. ເຮົາອາດຮູ້ສຶກວ່າຍາກທີ່ຈະເຊື່ອຟັງເຂົາເຈົ້າ ໂດຍສະເພາະຖ້າເຂົາເຈົ້າຂໍໃຫ້ເຮົາເຮັດບາງສິ່ງທີ່ເຮົາບໍ່ຢາກເຮັດ. ມີເທື່ອໜຶ່ງອັກຄະສາວົກເປໂຕຮູ້ສຶກວ່າຍາກທີ່ຈະເຮັດຕາມຄຳແນະນຳທັນທີ. ຕອນທີ່ທູດສະຫວັນບອກໃຫ້ລາວກິນສັດທີ່ບໍ່ສະອາດຕາມກົດໝາຍຂອງໂມເຊ ລາວປະຕິເສດບໍ່ກິນສັດເຫຼົ່ານັ້ນບໍ່ແມ່ນແຕ່ເທື່ອດຽວ ແຕ່ຮອດ 3 ເທື່ອ! (ກຈກ. 10:9-16) ຍ້ອນຫຍັງ? ຍ້ອນການຊີ້ນຳໃໝ່ນີ້ມັນແປກສຳລັບລາວ. ກົງກັນຂ້າມ ໂປໂລເຊື່ອຟັງເມື່ອພວກຜູ້ດູແລໃນເມືອງເຢຣູຊາເລັມແນະນຳໂປໂລໃຫ້ພາຜູ້ຊາຍ 4 ຄົນໄປວິຫານນຳແລະເຮັດໃຫ້ໂຕເອງສະອາດຕາມພິທີກຳພ້ອມກັບເຂົາເຈົ້າເພື່ອສະແດງໃຫ້ເຫັນວ່າລາວຍັງເຊື່ອຟັງກົດໝາຍຂອງໂມເຊຢູ່. ໂປໂລຮູ້ວ່າຄລິດສະຕຽນບໍ່ໄດ້ຢູ່ພາຍໃຕ້ກົດໝາຍຂອງໂມເຊແລ້ວ ແລະລາວກໍບໍ່ໄດ້ເຮັດຫຍັງຜິດ. ແຕ່ລາວ “ພາ 4 ຄົນນັ້ນໄປນຳແລະຊຳລະຕົວຕາມພິທີກຳພ້ອມກັບພວກເຂົາ.” (ກຈກ. 21:23, 24, 26) ຍ້ອນໂປໂລເຊື່ອຟັງຄຳແນະນຳ ລາວຈຶ່ງຊ່ວຍຮັກສາຄວາມເປັນນ້ຳໜຶ່ງໃຈດຽວກັນໃນພວກພີ່ນ້ອງ.—ຣມ. 14:19, 21. ຫ23.10 ໜ້າ 10 ຂໍ້ 15-16
ວັນພະຫັດທີ 11 ທັນວາ
ພວກເຈົ້າຕ້ອງຢ້ານຢຳພະເຢໂຫວາພະເຈົ້າຂອງພວກເຈົ້າ.—ພບຍ. 10:20
ເຈົ້າອາດຈະບໍ່ຄິດວ່າຄວາມຢ້ານຢຳຈະເຮັດໃຫ້ຄົນເຮົາເປັນໝູ່ສະໜິດກັນໄດ້. ແຕ່ຄົນທີ່ຢາກສະໜິດກັບພະເຢໂຫວາຕ້ອງ “ຢ້ານຢຳ” ເພິ່ນ. ບໍ່ວ່າເຮົາຈະຮັບໃຊ້ພະເຢໂຫວາມາດົນສ່ຳໃດແລ້ວ ເຮົາທຸກຄົນກໍຕ້ອງຢ້ານຢຳເພິ່ນສະເໝີ. ແຕ່ການຢ້ານຢຳພະເຢໂຫວາໝາຍຄວາມວ່າແນວໃດ? ຄົນທີ່ຢ້ານຢຳພະເຢໂຫວາຈະຮັກເພິ່ນແລະບໍ່ຢາກເຮັດສິ່ງໃດທີ່ຈະທຳລາຍສາຍສຳພັນທີ່ລາວມີກັບພະເຢໂຫວາ. ພະເຢຊູກໍ “ຢຳເກງ” ພະເຢໂຫວາ. (ຮຣ. 5:7) ເພິ່ນບໍ່ໄດ້ຮູ້ສຶກຢ້ານພະເຢໂຫວາ ແຕ່ເພິ່ນຮັກແລະເຕັມໃຈເຊື່ອຟັງພະເຢໂຫວາ. (ອຊຢ. 11:2, 3; ຢຮ. 14:21, 31) ເຮົາກໍສາມາດເຮັດຄືກັບພະເຢຊູໄດ້ໂດຍສະແດງຄວາມນັບຖືແລະຢ້ານຢຳພະເຢໂຫວາຍ້ອນເພິ່ນສະແດງຄວາມຮັກໃນທຸກສິ່ງທີ່ເພິ່ນເຮັດ. ເພິ່ນເປັນພະເຈົ້າທີ່ສະຫຼາດ ຍຸຕິທຳ ແລະມີລິດເດດ. ນອກຈາກນັ້ນ ເຮົາຍັງຮູ້ວ່າພະເຢໂຫວາຮັກເຮົາແລະສົນໃຈວ່າເຮົາເຮັດຕາມທີ່ເພິ່ນສອນຫຼືບໍ່. ສິ່ງທີ່ເຮົາເຮັດມີຜົນຕໍ່ເພິ່ນນຳ ເຊັ່ນ: ຖ້າເຮົາບໍ່ເຊື່ອຟັງ ພະເຢໂຫວາກໍເສຍໃຈ ແລະຖ້າເຮົາເຊື່ອຟັງ ເພິ່ນກໍດີໃຈແລະມີຄວາມສຸກ.—ພສ. 78:41; ສພສ. 27:11. ຫ23.06 ໜ້າ 14 ຂໍ້ 1-2; ໜ້າ 15 ຂໍ້ 5
ວັນສຸກທີ 12 ທັນວາ
ເມື່ອມີອຳນາດແລ້ວ ລາວກໍກາຍເປັນຄົນຈອງຫອງຈົນເຮັດໃຫ້ໂຕເອງຈິບຫາຍ. ລາວເຮັດຜິດຕໍ່ພະເຢໂຫວາ.—2ຂຄ. 26:16
ຕອນທີ່ອຸດຊີຢາມີອຳນາດຫຼາຍ ລາວບໍ່ໄດ້ເຫັນຄຸນຄ່າສິ່ງຕ່າງໆທີ່ພະເຢໂຫວາເຄີຍເຮັດເພື່ອລາວ. ບົດຮຽນແມ່ນຫຍັງ? ເຮົາຕ້ອງຈື່ໄວ້ສະເໝີວ່າສິ່ງດີໆແລະວຽກຮັບໃຊ້ທີ່ເຮົາເຮັດທັງໝົດມາຈາກພະເຢໂຫວາ. ແທນທີ່ເຮົາຈະອວດເລື່ອງຄວາມສາມາດຂອງໂຕເອງ ເຮົາຄວນຍົກຍ້ອງພະເຢໂຫວາທີ່ຊ່ວຍເຮົາໃຫ້ເຮັດແບບນັ້ນໄດ້. (1ກຣ. 4:7) ເຮົາຕ້ອງຍອມຮັບວ່າເຮົາເປັນມະນຸດທີ່ບໍ່ສົມບູນແບບແລະຕ້ອງໄດ້ຮັບຄຳແນະນຳຕະຫຼອດ. ພີ່ນ້ອງຊາຍຄົນໜຶ່ງທີ່ອາຍຸປະມານ 60 ປີບອກວ່າ: “ຂ້ອຍຕ້ອງຮຽນຮູ້ທີ່ຈະບໍ່ໃຈຮ້າຍແລະບໍ່ທໍ້ໃຈເມື່ອຄົນອື່ນໃຫ້ຄຳແນະນຳຕອນທີ່ຂ້ອຍເຮັດຜິດ. ແຕ່ຂ້ອຍຈະພະຍາຍາມແກ້ໄຂໂຕເອງແລະພະຍາຍາມກ້າວໜ້າຕໍ່ໆໄປ.” ຖ້າເຮົາຢ້ານຢຳພະເຢໂຫວາແລະເປັນຄົນຖ່ອມສະເໝີ ເຮົາກໍຈະມີຊີວິດທີ່ມີຄວາມສຸກ.—ສພສ. 22:4. ຫ23.09 ໜ້າ 10 ຂໍ້ 10-11
ວັນເສົາທີ 13 ທັນວາ
ພວກເຈົ້າຕ້ອງອົດທົນ ເພື່ອວ່າເມື່ອພວກເຈົ້າເຮັດຕາມຄວາມຕ້ອງການຂອງພະເຈົ້າແລ້ວ ພວກເຈົ້າຈະໄດ້ຮັບສິ່ງທີ່ເພິ່ນສັນຍາ.—ຮຣ. 10:36
ຄລິດສະຕຽນໃນສະຕະວັດທຳອິດຈຳເປັນຕ້ອງມີຄວາມອົດທົນ. ນອກຈາກເຂົາເຈົ້າຈະຕ້ອງອົດທົນກັບບັນຫາທົ່ວໄປທີ່ຄົນສ່ວນຫຼາຍເຈິແລ້ວ ເຂົາເຈົ້າກໍຍັງຕ້ອງເຈິກັບບັນຫາອື່ນໆອີກຍ້ອນເຂົ້າມາເປັນຄລິດສະຕຽນ. ເຂົາເຈົ້າຫຼາຍຄົນຖືກຂົ່ມເຫງບໍ່ແມ່ນແຕ່ຈາກພວກຫົວໜ້າສາສະໜາຄົນຢິວແລະອຳນາດການປົກຄອງໂຣມເທົ່ານັ້ນ ແຕ່ເຂົາເຈົ້າຍັງຖືກຂົ່ມເຫງຈາກຄອບຄົວຂອງໂຕເອງນຳ. (ມທ. 10:21) ບາງເທື່ອເຂົາເຈົ້າກໍຕ້ອງຕໍ່ສູ້ກັບອິດທິພົນຂອງພວກທໍລະຍົດພະເຈົ້າທີ່ສ້າງຄວາມແຕກແຍກໃນປະຊາຄົມແລະຄຳສອນປອມຂອງຄົນພວກນັ້ນ. (ກຈກ. 20:29, 30) ເຖິງວ່າຈະເຈິຄວາມລຳບາກແບບນີ້ ແຕ່ຄລິດສະຕຽນໃນສະຕະວັດທຳອິດກໍຍັງອົດທົນໄດ້ແລະສັດຊື່ຢູ່ສະເໝີ. (ພນມ. 2:3) ເຂົາເຈົ້າອົດທົນໄດ້ແນວໃດ? ເຂົາເຈົ້າຄິດເຖິງຕົວຢ່າງໃນຄຳພີໄບເບິນ ເຊັ່ນ ຕົວຢ່າງຂອງໂຢບ. (ຢກບ. 5:10, 11) ເຂົາເຈົ້າໄດ້ອະທິດຖານຂໍກຳລັງຈາກພະເຢໂຫວາ. (ກຈກ. 4:29-31) ນອກຈາກນັ້ນ ເຂົາເຈົ້າຄິດເຖິງຜົນດີທີ່ຈະໄດ້ຮັບຖ້າເຂົາເຈົ້າສະແດງຄວາມອົດທົນ. (ກຈກ. 5:41) ເຮົາກໍອົດທົນໄດ້ຄືກັນຖ້າເຮົາເບິ່ງຕົວຢ່າງຄວາມອົດທົນຂອງຄົນໃນຄຳພີໄບເບິນແລະໃນປຶ້ມຕ່າງໆຂອງອົງການແລະຄິດຕຶກຕອງເປັນປະຈຳກ່ຽວກັບເລື່ອງນີ້. ຫ23.07 ໜ້າ 3 ຂໍ້ 5-6
ວັນອາທິດທີ 14 ທັນວາ
ພວກເຈົ້າຕ້ອງໃຫ້ການປົກຄອງຂອງພະເຈົ້າແລະການເຊື່ອຟັງເພິ່ນເປັນສິ່ງສຳຄັນທີ່ສຸດໃນຊີວິດສະເໝີ ແລ້ວເພິ່ນຈະໃຫ້ພວກເຈົ້າມີທຸກສິ່ງທີ່ຈຳເປັນ.—ມທ. 6:33
ພະເຢໂຫວາກັບພະເຢຊູຈະບໍ່ໝົດຫວັງໃນໂຕເຮົາ. ຫຼັງຈາກທີ່ເປໂຕປະຕິເສດວ່າບໍ່ຮູ້ຈັກພະເຢຊູ ລາວກໍຕ້ອງຕັດສິນໃຈໃນເລື່ອງທີ່ສຳຄັນ ນັ້ນຄືລາວຈະພະຍາຍາມເປັນລູກສິດຂອງພະເຢຊູຕໍ່ໄປຫຼືຈະເຊົາເປັນ. ພະເຢຊູໄດ້ອ້ອນວອນພະເຢໂຫວາວ່າ ຂໍຢ່າໃຫ້ຄວາມເຊື່ອຂອງເປໂຕໝົດໄປ. ພະເຢຊູບອກເປໂຕກ່ຽວກັບຄຳອະທິດຖານນັ້ນແລະສະແດງຄວາມໝັ້ນໃຈວ່າ ຕໍ່ໄປເປໂຕຈະຊ່ວຍພີ່ນ້ອງໃຫ້ມີຄວາມເຊື່ອເຂັ້ມແຂງໄດ້. (ລກ. 22:31, 32) ເປໂຕຕ້ອງໝັ້ນໃຈຫຼາຍແທ້ໆເມື່ອຄິດເຖິງຄຳເວົ້າຂອງພະເຢຊູ. ເມື່ອເຮົາຕ້ອງຕັດສິນໃຈໃນເລື່ອງທີ່ສຳຄັນ ພະເຢໂຫວາອາດໃຊ້ຜູ້ດູແລໃຫ້ຊ່ວຍເຮົາໝັ້ນໃຈວ່າເຮົາສາມາດຮັກສາຄວາມເຊື່ອຕໍ່ໆໄປໄດ້. (ອຟຊ. 4:8, 11) ຄືກັບທີ່ພະເຢໂຫວາໃຫ້ເປໂຕແລະອັກຄະສາວົກຄົນອື່ນໆມີສິ່ງຈຳເປັນໃນຊີວິດ ເພິ່ນກໍຈະເບິ່ງແຍງເຮົາໃຫ້ມີສິ່ງຈຳເປັນຄືກັນຖ້າເຮົາໃຫ້ວຽກຮັບໃຊ້ເປັນສິ່ງສຳຄັນທີ່ສຸດໃນຊີວິດ. ຫ23.09 ໜ້າ 24-25 ຂໍ້ 14-15
ວັນຈັນທີ 15 ທັນວາ
ຄົນທີ່ໃຈດີກັບຄົນຕ່ຳຕ້ອຍກໍສ່ຳກັບໃຫ້ພະເຢໂຫວາຢືມ ແລະເພິ່ນຈະຕອບແທນຄົນນັ້ນສຳລັບສິ່ງທີ່ລາວເຮັດ.—ສພສ. 19:17
ພະເຢໂຫວາສັງເກດເຫັນສິ່ງດີໆທຸກຢ່າງທີ່ເຮົາເຮັດເພື່ອຄົນອື່ນ. ແມ່ນແຕ່ສິ່ງເລັກໆນ້ອຍໆເພິ່ນກໍຖືວ່າເປັນເຄື່ອງບູຊາທີ່ມີຄ່າຫຼາຍ ແລະເພິ່ນຍັງຖືວ່າເພິ່ນເປັນໜີ້ທີ່ຈະຕ້ອງຕອບແທນເຮົາ. ຖ້າເຈົ້າເຄີຍເປັນຜູ້ຊ່ວຍວຽກຮັບໃຊ້ຫຼືເຄີຍເປັນຜູ້ດູແລມາກ່ອນ ແຕ່ຕອນນີ້ບໍ່ໄດ້ເປັນແລ້ວ ພະເຢໂຫວາກໍຍັງບໍ່ລືມຄວາມຮັກທີ່ເຈົ້າມີແລະວຽກທີ່ເຈົ້າເຄີຍເຮັດ. (1ກຣ. 15:58) ນອກຈາກນັ້ນ ພະເຢໂຫວາຍັງສັງເກດເຫັນວ່າເຈົ້າຍັງສະແດງຄວາມຮັກຕໍ່ໆໄປ. ພະເຢໂຫວາຢາກໃຫ້ເຮົາທຸກຄົນຮັກເພິ່ນແລະຮັກຄົນອື່ນຫຼາຍຂຶ້ນ. ເຮົາຈະຮັກພະເຢໂຫວາຫຼາຍຂຶ້ນໂດຍອ່ານຄຳພີໄບເບິນ ຄິດຕຶກຕອງ ແລະອະທິດຖານຫາເພິ່ນເປັນປະຈຳ. ເຮົາຈະຮັກພີ່ນ້ອງຫຼາຍຂຶ້ນໂດຍຊອກຫາວິທີຊ່ວຍເຫຼືອເຂົາເຈົ້າ. ຖ້າເຮົາພະຍາຍາມສະແດງຄວາມຮັກຫຼາຍຂຶ້ນ ເຮົາກໍຈະສະໜິດກັບພະເຢໂຫວາແລະພີ່ນ້ອງຫຼາຍຂຶ້ນ ແລະຈະເຮັດໃຫ້ເຮົາເປັນໝູ່ກັບພະເຢໂຫວາແລະກັບພີ່ນ້ອງຕະຫຼອດໄປ! ຫ23.07 ໜ້າ 10 ຂໍ້ 11; ໜ້າ 11 ຂໍ້ 13; ໜ້າ 13 ຂໍ້ 18
ວັນອັງຄານທີ 16 ທັນວາ
ແຕ່ລະຄົນຕ້ອງແບກຄວາມຮັບຜິດຊອບຂອງໂຕເອງ.—ຄລຕ. 6:5
ຄລິດສະຕຽນແຕ່ລະຄົນຕ້ອງຕັດສິນໃຈເອົາເອງວ່າຈະເບິ່ງແຍງສຸຂະພາບຂອງໂຕເອງແນວໃດ. ໃນຄຳພີໄບເບິນມີກົດບໍ່ເທົ່າໃດຂໍ້ກ່ຽວກັບເລື່ອງນີ້ ນັ້ນຄື: ຄຳສັ່ງຫ້າມໃສ່ເລືອດແລະຫ້າມກ່ຽວຂ້ອງກັບໄສຍະສາດ. (ກຈກ. 15:20; ຄລຕ. 5:19, 20) ນອກຈາກເລື່ອງເຫຼົ່ານີ້ແລ້ວ ເຮົາກໍຕ້ອງຕັດສິນໃຈເອົາເອງວ່າຈະເບິ່ງແຍງສຸຂະພາບຂອງເຮົາແນວໃດ. ບໍ່ວ່າເຮົາຈະມັກການປິ່ນປົວແລະການຮັກສາສຸຂະພາບແບບໃດແບບໜຶ່ງເປັນພິເສດ ແຕ່ເຮົາຕ້ອງນັບຖືສິດໃນການຕັດສິນໃຈຂອງຄົນອື່ນທີ່ຈະເລືອກເອງວ່າຈະປິ່ນປົວແບບໃດ. ເຮົາຕ້ອງຈື່ໄວ້ວ່າ: (1) ມີແຕ່ການປົກຄອງຂອງພະເຈົ້າເທົ່ານັ້ນທີ່ຈະແກ້ໄຂແລະປິ່ນປົວພະຍາດທຸກຢ່າງໄດ້ຢ່າງຖາວອນ. (ອຊຢ. 33:24) (2) ຄລິດສະຕຽນແຕ່ລະຄົນຕ້ອງ “ໝັ້ນໃຈ” ໃນສິ່ງທີ່ໂຕເອງເລືອກ. (ຣມ. 14:5) (3) ເຮົາຈະບໍ່ຕັດສິນຄົນອື່ນ ຫຼືເຮັດໃຫ້ຄົນອື່ນຫຼົງເຮັດຜິດແລ້ວຖິ້ມຄວາມເຊື່ອ. (ຣມ. 14:13) (4) ຄລິດສະຕຽນສະແດງຄວາມຮັກຕໍ່ພີ່ນ້ອງ ແລະເຖິງວ່າເຮົາຈະມີສິດທີ່ຈະເລືອກການເບິ່ງແຍງສຸຂະພາບຂອງເຮົາເອງ ແຕ່ເຮົາຈະບໍ່ໃຫ້ເລື່ອງນີ້ສຳຄັນກວ່າຄວາມເປັນນ້ຳໜຶ່ງໃຈດຽວກັນໃນປະຊາຄົມ.—ຣມ. 14:15, 19, 20. ຫ23.07 ໜ້າ 24 ຂໍ້ 15
ວັນພຸດທີ 17 ທັນວາ
ຕະຫຼອດໄລຍະທີ່ລາວເປັນນາຊີຣີ ພະເຢໂຫວາຈະຖືວ່າລາວບໍລິສຸດ.—ຈຊບ. 6:8
ເຈົ້າຮັກພະເຢໂຫວາບໍ? ແນ່ນອນວ່າເຈົ້າຮັກເພິ່ນ! ຕັ້ງແຕ່ສະໄໝແຕ່ກີ້ຫຼາຍຄົນກໍຮູ້ສຶກຄືກັນກັບເຈົ້າ. (ພສ. 104:33, 34) ຫຼາຍຄົນໄດ້ເສຍສະລະເພື່ອຈະນະມັດສະການພະເຢໂຫວາ. ໜຶ່ງໃນນັ້ນແມ່ນພວກນາຊີຣີ ຫຼື “ຄົນທີ່ອຸທິດໂຕໄວ້.” ມີການໃຊ້ຄຳວ່ານາຊີຣີເມື່ອເວົ້າເຖິງຄົນອິດສະຣາເອນທີ່ກະຕືລືລົ້ນເຊິ່ງເຕັມໃຈເສຍສະລະຫຼາຍຢ່າງເພື່ອຮັບໃຊ້ພະເຢໂຫວາໃນແບບພິເສດ. ກົດໝາຍຂອງໂມເຊບອກວ່າຜູ້ຊາຍຫຼືຜູ້ຍິງກໍສາບານເປັນນາຊີຣີໄດ້ໄລຍະໜຶ່ງເພື່ອພະເຢໂຫວາ. (ຈຊບ. 6:1, 2) ການສາບານແລະການປະຕິຍານແບບນັ້ນກ່ຽວຂ້ອງກັບການເຮັດຕາມຂໍ້ກຳນົດບາງຢ່າງ ເຊິ່ງບໍ່ແມ່ນສິ່ງທີ່ຄົນອິດສະຣາເອນທຸກຄົນຕ້ອງເຮັດ. ຄັນຊັ້ນເປັນຫຍັງຄົນອິດສະຣາເອນບາງຄົນຈຶ່ງເລືອກທີ່ຈະສາບານເປັນນາຊີຣີ? ຍ້ອນເຂົາເຈົ້າຮັກພະເຢໂຫວາຫຼາຍແລະເຫັນຄ່າສິ່ງດີໆທີ່ເພິ່ນເຮັດເພື່ອເຂົາເຈົ້າ.—ພບຍ. 6:5; 16:17. ຫ24.02 ໜ້າ 14 ຂໍ້ 1-2
ວັນພະຫັດທີ 18 ທັນວາ
ພະເຢໂຫວາ . . . ມີຄວາມຮັກທີ່ໝັ້ນຄົງຕໍ່ຄົນທີ່ຮັກພະອົງແລະເຮັດຕາມຄຳສັ່ງຂອງພະອົງ.—ດນອ. 9:4
ໃນຄຳພີໄບເບິນພາກພາສາເຮັບເຣີ ຄຳທີ່ແປວ່າ “ຄວາມພັກດີ” ຫຼື “ຄວາມຮັກທີ່ໝັ້ນຄົງ” ໝາຍເຖິງຄວາມຮັກທີ່ເກີດຈາກຄວາມຜູກພັນທີ່ເລິກເຊິ່ງ ແລະຄຳນີ້ມັກໃຊ້ເມື່ອເວົ້າເຖິງຄວາມຮັກທີ່ພະເຈົ້າມີຕໍ່ຜູ້ຮັບໃຊ້ຂອງເພິ່ນ. ຄຳນີ້ຍັງໃຊ້ກັບຄວາມຮັກທີ່ຜູ້ຮັບໃຊ້ຂອງພະເຈົ້າມີຕໍ່ກັນນຳ. (2ຊມ. 9:6, 7) ຄວາມພັກດີສາມາດເພີ່ມຂຶ້ນໄດ້ເມື່ອເວລາຜ່ານໄປ. ໃຫ້ເຮົາເບິ່ງວ່າຕົວຢ່າງຂອງດານີເອນເຮັດໃຫ້ເຫັນເລື່ອງນີ້ແນວໃດ. ຕະຫຼອດຊີວິດຂອງດານີເອນ ລາວເຈິເຫດການຫຼາຍຢ່າງທີ່ທົດສອບຄວາມພັກດີຕໍ່ພະເຢໂຫວາ. ແຕ່ມີເຫດການໜຶ່ງທີ່ໜັກທີ່ສຸດເຊິ່ງເກີດຂຶ້ນຕອນລາວອາຍຸ 90 ກວ່າປີແລ້ວ. ພວກຂ້າລາຊະການຫຼາຍຄົນບໍ່ມັກດານີເອນແລະບໍ່ນັບຖືພະເຢໂຫວາ. ເຂົາເຈົ້າຈຶ່ງວາງແຜນເພື່ອໃຫ້ດານີເອນຖືກຂ້າ. ເຂົາເຈົ້າໄດ້ໄປຂໍໃຫ້ກະສັດອອກຄຳສັ່ງຢ່າງໜຶ່ງເພື່ອຈະທົດສອບວ່າດານີເອນພັກດີຕໍ່ກະສັດຫຼືພັກດີຕໍ່ພະເຢໂຫວາ. ສິ່ງທີ່ດານີເອນຕ້ອງເຮັດເພື່ອພິສູດວ່າລາວພັກດີຕໍ່ກະສັດຄືກັບຄົນອື່ນໆກໍຄື ລາວຕ້ອງບໍ່ອະທິດຖານຫາພະເຢໂຫວາເປັນເວລາ 30 ມື້. ແຕ່ດານີເອນຕັ້ງໃຈທີ່ຈະພັກດີຕໍ່ພະເຢໂຫວາສະເໝີ.—ດນອ. 6:12-15, 20-22. ຫ23.08 ໜ້າ 5 ຂໍ້ 10-12
ວັນສຸກທີ 19 ທັນວາ
ໃຫ້ພວກເຮົາຮັກກັນຕໍ່ໆໄປ.—1ຢຮ. 4:7
ພະເຢໂຫວາຢາກໃຫ້ເຮົາສະແດງຄວາມຮັກຕໍ່ພີ່ນ້ອງຕໍ່ໆໄປ. ຖ້າພີ່ນ້ອງບາງຄົນເຮັດໃຫ້ເຮົາເສຍໃຈ ເຮົາຄວນຄິດວ່າລາວອາດບໍ່ໄດ້ຕັ້ງໃຈເຮັດໃຫ້ເຮົາເຈັບ ແລະລາວເອງກໍກຳລັງພະຍາຍາມເຮັດສິ່ງທີ່ພະເຢໂຫວາເບິ່ງວ່າຖືກຕ້ອງ. (ສພສ. 12:18) ພະເຢໂຫວາຮັກຜູ້ຮັບໃຊ້ຂອງເພິ່ນທຸກຄົນເຖິງວ່າເຂົາເຈົ້າມີຂໍ້ບົກພ່ອງ. ເມື່ອເຮົາເຮັດຜິດ ພະເຢໂຫວາບໍ່ໄດ້ຖິ້ມເຮົາຫຼືບໍ່ໄດ້ຄຽດໃຫ້ເຮົາຕະຫຼອດໄປ. (ພສ. 103:9) ເປັນເລື່ອງສຳຄັນແທ້ໆທີ່ເຮົາຈະຮຽນແບບພະເຢໂຫວາພະເຈົ້າທີ່ໃຫ້ອະໄພ! (ອຟຊ. 4:32–5:1) ໃຫ້ຈື່ໄວ້ວ່າແຮ່ງຈຸດຈົບຂອງໂລກນີ້ໃກ້ເຂົ້າມາ ເຮົາກໍແຮ່ງຕ້ອງສະໜິດກັບພີ່ນ້ອງໃຫ້ຫຼາຍຂຶ້ນ. ເຮົາຄາດໝາຍໄດ້ເລີຍວ່າການຂົ່ມເຫງຈະຮຸນແຮງຂຶ້ນເລື້ອຍໆ. ເຮົາອາດເຖິງຂັ້ນຕ້ອງຕິດຄຸກຍ້ອນຄວາມເຊື່ອ. ຖ້າເປັນແບບນັ້ນ ເຮົາຈະຕ້ອງການພີ່ນ້ອງຫຼາຍກວ່າທີ່ຜ່ານມາ.—ສພສ. 17:17. ຫ24.03 ໜ້າ 15-16 ຂໍ້ 6-7
ວັນເສົາທີ 20 ທັນວາ
ພະເຢໂຫວາຊີ້ນຳບາດກ້າວຂອງມະນຸດ.—ສພສ. 20:24
ຄຳພີໄບເບິນມີເລື່ອງຂອງໄວລຸ້ນທີ່ໃກ້ຊິດກັບພະເຢໂຫວາເຊິ່ງເພິ່ນພໍໃຈເຂົາເຈົ້າແລະຊີວິດຂອງເຂົາເຈົ້າກໍມີຄວາມສຸກ. ດາວິດເປັນຜູ້ໜຶ່ງໃນນັ້ນ. ລາວເລືອກຮັບໃຊ້ພະເຢໂຫວາຕັ້ງແຕ່ອາຍຸຍັງນ້ອຍ ແລະຕໍ່ມາລາວກໍເປັນກະສັດທີ່ພັກດີ. (1ກສ. 3:6; 9:4, 5; 14:8) ຖ້າເຈົ້າຮຽນເລື່ອງຂອງດາວິດ ຕົວຢ່າງຂອງລາວຈະຊ່ວຍເຈົ້າໃຫ້ຮັບໃຊ້ພະເຢໂຫວາຢ່າງສັດຊື່ໄດ້. ເຈົ້າອາດຈະຮຽນເລື່ອງຂອງມາຣະໂກຫຼືຕີໂມທຽວກໍໄດ້. ເຈົ້າຈະເຫັນວ່າເຂົາເຈົ້າຮັບໃຊ້ພະເຢໂຫວາຕັ້ງແຕ່ອາຍຸຍັງນ້ອຍແລະຮັບໃຊ້ເພິ່ນຢ່າງສັດຊື່ຕໍ່ໆໄປ. ການຕັດສິນໃຈຂອງເຂົາເຈົ້າເຮັດໃຫ້ພະເຢໂຫວາມີຄວາມສຸກ. ຊີວິດຂອງເຈົ້າຈະເປັນແບບໃດກໍຂຶ້ນຢູ່ກັບວ່າຕອນນີ້ເຈົ້າໃຊ້ຊີວິດແນວໃດ. ຖ້າເຈົ້າໄວ້ວາງໃຈພະເຢໂຫວາແລະບໍ່ເພິ່ງຄວາມເຂົ້າໃຈຂອງໂຕເອງ ເພິ່ນກໍຈະຊ່ວຍເຈົ້າໃຫ້ຕັດສິນໃຈແບບທີ່ສະຫຼາດ. ເຈົ້າເອງກໍຈະມີຊີວິດທີ່ດີແລະມີຄວາມສຸກ. ຂໍໃຫ້ຈື່ໄວ້ວ່າພະເຢໂຫວາເຫັນຄ່າສິ່ງທີ່ເຈົ້າເຮັດເພື່ອເພິ່ນ. ບໍ່ມີຫຍັງຈະດີໄປກວ່າການໃຊ້ຊີວິດເພື່ອຮັບໃຊ້ພະເຢໂຫວາພໍ່ທີ່ຮັກຂອງເຮົາທີ່ຢູ່ໃນສະຫວັນ. ຫ23.09 ໜ້າ 13 ຂໍ້ 18-19
ວັນອາທິດທີ 21 ທັນວາ
ໃຫ້ອະໄພກັນຢ່າງໃຈກວ້າງຕໍ່ໆໄປ.—ກລຊ. 3:13
ໂປໂລຮູ້ວ່າພີ່ນ້ອງເປັນຄົນບໍ່ສົມບູນແບບ. ຕົວຢ່າງເຊັ່ນ: ຕອນທີ່ລາວໄປປະຊາຄົມຢູ່ເມືອງເຢຣູຊາເລັມ ພີ່ນ້ອງບາງຄົນບໍ່ເຊື່ອວ່າລາວເຂົ້າມາເປັນລູກສິດແທ້ໆ. (ກຈກ. 9:26) ຕໍ່ມາ ມີບາງຄົນເວົ້າບໍ່ດີລັບຫຼັງໂປໂລແລະເຮັດໃຫ້ລາວເສຍຊື່ສຽງ. (2ກຣ. 10:10) ໂປໂລຍັງເຫັນຜູ້ເບິ່ງແຍງເຮັດສິ່ງທີ່ບໍ່ຖືກຕ້ອງ ເຊິ່ງອາດເຮັດໃຫ້ພີ່ນ້ອງບາງຄົນບໍ່ສະບາຍໃຈ. (ຄລຕ. 2:11, 12) ມາຣະໂກທີ່ເປັນໝູ່ສະໜິດຂອງໂປໂລເຮັດໃຫ້ລາວເສຍໃຈແລະຜິດຫວັງຫຼາຍ. (ກຈກ. 15:37, 38) ເລື່ອງທັງໝົດນີ້ອາດເຮັດໃຫ້ໂປໂລບໍ່ຢາກຄົບຫາກັບພີ່ນ້ອງເຫຼົ່ານີ້ ແຕ່ລາວບໍ່ໄດ້ເຮັດແບບນັ້ນ. ລາວເບິ່ງພີ່ນ້ອງໃນແງ່ດີແລະຍັງຮັບໃຊ້ພະເຢໂຫວາຢ່າງກະຕືລືລົ້ນຕໍ່ໆໄປ. ອັນໃດຊ່ວຍໂປໂລໃຫ້ເຮັດແບບນັ້ນ? ໂປໂລຮັກພີ່ນ້ອງຫຼາຍ ລາວຈຶ່ງສົນໃຈແຕ່ຈຸດດີຂອງເຂົາເຈົ້າແລະເບິ່ງຂ້າມຄວາມບໍ່ສົມບູນແບບຂອງເຂົາເຈົ້າ. ນອກຈາກນັ້ນ ຄວາມຮັກຍັງຊ່ວຍໂປໂລໃຫ້ເຮັດຕາມຂໍ້ພະຄຳພີປະຈຳວັນມື້ນີ້. ຫ24.03 ໜ້າ 15 ຂໍ້ 4-5
ວັນຈັນທີ 22 ທັນວາ
ທາດຂອງຜູ້ເປັນນາຍບໍ່ຄວນຜິດຖຽງກັບຜູ້ໃດ ແຕ່ຄວນສຸພາບອ່ອນໂຍນຕໍ່ທຸກຄົນ.—2ຕມ. 2:24
ໃນຄຳພີໄບເບິນມີຫຼາຍເລື່ອງທີ່ສະແດງໃຫ້ເຫັນວ່າຄວາມອ່ອນໂຍນເປັນຄຸນລັກສະນະທີ່ສຳຄັນ. ໃຫ້ເຮົາມາເບິ່ງເລື່ອງຂອງອີຊາກ. ຕອນທີ່ລາວຕັ້ງຖິ່ນຖານຢູ່ເກລາໃນເຂດຂອງພວກຟີລິດສະຕີນ ເຂົາເຈົ້າໄດ້ອິດສາລາວແລະຖົມນ້ຳສ້າງທີ່ຄົນຮັບໃຊ້ຂອງພໍ່ລາວໄດ້ຂຸດໄວ້. ແທນທີ່ອີຊາກຈະຕໍ່ສູ້ເພື່ອຮັກສານ້ຳສ້າງໄວ້ ລາວໄດ້ຍ້າຍໄປຢູ່ບ່ອນອື່ນແລະຂຸດນ້ຳສ້າງໃໝ່. (ປຖກ. 26:12-18) ແຕ່ພວກຟີລິດສະຕີນກໍຍັງມາບອກວ່ານ້ຳສ້າງນັ້ນເປັນຂອງເຂົາເຈົ້າ. ເຖິງຈະເປັນແນວນັ້ນ ແຕ່ອີຊາກກໍຍັງໃຈເຢັນ. (ປຖກ. 26:19-25) ສິ່ງໃດຊ່ວຍອີຊາກໃຫ້ໃຈເຢັນເຖິງວ່າມີຄົນຕັ້ງໃຈເຮັດໃຫ້ລາວໃຈຮ້າຍ? ລາວຄືຊິເຮັດຕາມຕົວຢ່າງຂອງອັບຣາຮາມພໍ່ຂອງລາວທີ່ແກ້ໄຂບັນຫາແບບໃຈເຢັນ ແລະເຮັດຕາມຕົວຢ່າງຂອງຊາຣາແມ່ຂອງລາວທີ່ມີ “ໃຈທີ່ສະຫງົບແລະອ່ອນໂຍນ.”—1ປຕ. 3:4-6; ປຖກ. 21:22-34. ຫ23.09 ໜ້າ 15 ຂໍ້ 4
ວັນອັງຄານທີ 23 ທັນວາ
ເຮົາຕັ້ງໃຈໄວ້ແນວໃດ ເຮົາກໍຈະເຮັດໃຫ້ສຳເລັດ.—ອຊຢ. 46:11
ພະເຢໂຫວາໄດ້ສົ່ງລູກຊາຍຄົນດຽວຂອງເພິ່ນມາໂລກນີ້ເພື່ອສອນເລື່ອງການປົກຄອງຂອງເພິ່ນ ແລະເພື່ອຕາຍເປັນຄ່າໄຖ່ເພື່ອຊ່ວຍເຮົາໃຫ້ພົ້ນຈາກບາບແລະຄວາມຕາຍ. ຕໍ່ມາ ພະເຢໂຫວາໄດ້ປຸກພະເຢຊູໃຫ້ຄືນມາຈາກຕາຍແລະໃຫ້ເພິ່ນກັບໄປສະຫວັນເພື່ອປົກຄອງເປັນກະສັດໃນການປົກຄອງຂອງພະເຈົ້າ. ເລື່ອງຫຼັກໃນຄຳພີໄບເບິນແມ່ນພະເຢໂຫວາຈະເຮັດໃຫ້ຊື່ຂອງເພິ່ນພົ້ນຈາກຄຳຕຳໜິເມື່ອເພິ່ນເຮັດໃຫ້ຄວາມຕ້ອງການຂອງເພິ່ນທີ່ມີຕໍ່ໂລກນີ້ສຳເລັດໂດຍທາງການປົກຄອງຂອງເພິ່ນທີ່ມີພະເຢຊູເປັນກະສັດ. ຄວາມຕ້ອງການຂອງພະເຢໂຫວາບໍ່ເຄີຍປ່ຽນ. ເພິ່ນສັນຍາວ່າທຸກສິ່ງຈະເກີດຂຶ້ນແທ້ຕາມທີ່ເພິ່ນໄດ້ບອກໄວ້. (ອຊຢ. 46:10; ຮຣ. 6:17, 18) ໃນຕອນນັ້ນ ໂລກຈະກາຍເປັນບ່ອນທີ່ງາມໆເຊິ່ງລູກຫຼານຂອງອາດາມແລະເອວາທີ່ສົມບູນແບບແລະເຮັດສິ່ງທີ່ຖືກຕ້ອງຈະ “ມີຄວາມສຸກກັບຊີວິດຕະຫຼອດໄປ.” (ພສ. 22:26) ພະເຢໂຫວາບໍ່ພຽງແຕ່ຈະເຮັດໃຫ້ເລື່ອງນີ້ເທົ່ານັ້ນສຳເລັດ. ຄວາມຕ້ອງການທີ່ສຳຄັນທີ່ສຸດຂອງເພິ່ນແມ່ນເຮັດໃຫ້ຜູ້ຮັບໃຊ້ຂອງເພິ່ນທີ່ຢູ່ໃນສະຫວັນແລະຢູ່ໃນໂລກເປັນອັນໜຶ່ງອັນດຽວກັນໃນການເຊື່ອຟັງເພິ່ນ. ແລ້ວທຸກຄົນໃນໂລກຈະເຊື່ອຟັງພະເຢໂຫວາໃນຖານະຜູ້ປົກຄອງຂອງເຂົາເຈົ້າ. (ອຟຊ. 1:8-11) ເຈົ້າຮູ້ສຶກງຶດບໍໃນວິທີທີ່ພະເຢໂຫວາຈະເຮັດໃຫ້ຄວາມຕ້ອງການຂອງເພິ່ນສຳເລັດ? ຫ23.10 ໜ້າ 20 ຂໍ້ 7-8
ວັນພຸດທີ 24 ທັນວາ
ພະເຢໂຫວາເວົ້າວ່າ: “ຂໍໃຫ້ . . . ເຂັ້ມແຂງເດີ້ . . . ເຮົາຢູ່ກັບພວກເຈົ້າ.”—ຮກ. 2:4
ເມື່ອຄົນຢິວທີ່ອອກຈາກບາບີໂລນໄປຮອດເມືອງເຢຣູຊາເລັມໄດ້ບໍ່ດົນ ເຂົາເຈົ້າກໍເຈິຄວາມຫຍຸ້ງຍາກໃນການຫາລ້ຽງຄອບຄົວ ມີຄວາມວຸ່ນວາຍທາງດ້ານການເມືອງ ແລະຖືກຊາດຕ່າງໆທີ່ຢູ່ອ້ອມຂ້າງຕໍ່ຕ້ານ. ບາງຄົນຈຶ່ງຮູ້ສຶກວ່າມັນຍາກທີ່ຈະພະຍາຍາມສ້າງວິຫານຂອງພະເຢໂຫວາຄືນໃໝ່. ດັ່ງນັ້ນ ພະເຢໂຫວາຈຶ່ງສັ່ງຜູ້ພະຍາກອນຮັກກາຍແລະເຊຄາຣີຢາໄປໃຫ້ກຳລັງໃຈປະຊາຊົນ ເຊິ່ງເກີດຜົນດີແທ້ໆ. (ຮກ. 1:1; ຊຄຢ. 1:1) ປະມານ 50 ປີຕໍ່ມາຄົນຢິວກໍຕ້ອງການກຳລັງໃຈອີກ. ເອັດຊະຣາທີ່ຊຳນານໃນການຄັດລອກກົດໝາຍຂອງໂມເຊໄດ້ເດີນທາງຈາກບາບີໂລນໄປເມືອງເຢຣູຊາເລັມເພື່ອໃຫ້ກຳລັງໃຈຄົນຢິວແລະກະຕຸ້ນເຂົາເຈົ້າໃຫ້ຈັດການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ. (ອຊຣ. 7:1, 6) ຄຳພະຍາກອນຂອງຮັກກາຍແລະເຊຄາຣີຢາໄດ້ຊ່ວຍປະຊາຊົນຂອງພະເຢໂຫວາໃນສະໄໝແຕ່ກີ້ໃຫ້ໄວ້ວາງໃຈພະເຢໂຫວາຕໍ່ໆໄປຕອນທີ່ເຈິການຕໍ່ຕ້ານ. ໃນທຸກມື້ນີ້ ຄຳພະຍາກອນເຫຼົ່ານັ້ນກໍຊ່ວຍເຮົາໃຫ້ໝັ້ນໃຈວ່າພະເຢໂຫວາຈະຊ່ວຍເຮົາ ບໍ່ວ່າເຮົາຈະເຈິບັນຫາແບບໃດກໍຕາມໃນຊີວິດ.—ສພສ. 22:19. ຫ23.11 ໜ້າ 14-15 ຂໍ້ 2-3
ວັນພະຫັດທີ 25 ທັນວາ
ໃຫ້ປູກຝັງຄວາມຮັກ ຍ້ອນຄວາມຮັກຜູກພັນຄົນເຮົາໃຫ້ເປັນນ້ຳໜຶ່ງໃຈດຽວກັນ.—ກລຊ. 3:14
ເຮົາຈະສະແດງຄວາມຮັກຕໍ່ພີ່ນ້ອງໄດ້ແນວໃດ? ວິທີໜຶ່ງແມ່ນໃຫ້ກຳລັງໃຈກັນ. ເຮົາສາມາດໃຫ້ “ກຳລັງໃຈກັນສະເໝີ” ຖ້າເຮົາເຫັນອົກເຫັນໃຈກັນ. (1ທຊ. 4:18) ເຮົາຈະຮັກສາຄວາມຮັກທີ່ມີຕໍ່ກັນໃຫ້ເຂັ້ມແຂງຢູ່ສະເໝີໄດ້ແນວໃດ? ເຮົາຈະເຮັດແບບນັ້ນໄດ້ໂດຍພະຍາຍາມເຕັມທີທີ່ຈະຍົກໂທດໃຫ້ກັນ. ເປັນຫຍັງຕອນນີ້ການສະແດງຄວາມຮັກຕໍ່ກັນຈຶ່ງເປັນເລື່ອງທີ່ສຳຄັນ? ເປໂຕໃຫ້ເຫດຜົນວ່າ “ຈຸດຈົບຂອງທຸກສິ່ງມາໃກ້ແລ້ວ ດັ່ງນັ້ນ . . . ໃຫ້ຮັກກັນຫຼາຍໆ.” (1ປຕ. 4:7, 8) ແຮ່ງຈຸດຈົບຂອງໂລກຊົ່ວໃກ້ເຂົ້າມາ ເຮົາກໍແຮ່ງຄາດໝາຍໄດ້ວ່າສິ່ງທີ່ພະເຢຊູເວົ້າໄວ້ຈະເກີດຂຶ້ນແນ່ນອນທີ່ວ່າ: “ທຸກປະເທດຈະກຽດຊັງພວກເຈົ້າຍ້ອນພວກເຈົ້າເປັນລູກສິດຂອງຂ້ອຍ.” (ມທ. 24:9) ເພື່ອຈະຮັບມືໄດ້ ເຮົາຕ້ອງເປັນນ້ຳໜຶ່ງໃຈດຽວກັນ. ຖ້າເຮົາເຮັດແບບນັ້ນ ຊາຕານກໍບໍ່ສາມາດເຮັດໃຫ້ເຮົາແຕກແຍກກັນໄດ້ຍ້ອນເຮົາຮັກກັນ.—ຟລປ. 2:1, 2. ຫ23.11 ໜ້າ 13 ຂໍ້ 18-19
ວັນສຸກທີ 26 ທັນວາ
ພວກເຮົາເປັນໝູ່ທີ່ເຮັດວຽກຮ່ວມກັບພະເຈົ້າ.—1ກຣ. 3:9
ຄວາມຈິງໃນຄຳພີໄບເບິນມີພະລັງຫຼາຍແທ້ໆ. ເມື່ອເຮົາສອນຄົນໃຫ້ຮູ້ຈັກພະເຢໂຫວາແລະສອນວ່າເພິ່ນເປັນພະເຈົ້າແບບໃດ ເຮົາກໍໄດ້ເຫັນສິ່ງທີ່ເປັນຕາປະທັບໃຈຫຼາຍຢ່າງ. ຄົນຈະບໍ່ຖືກຊາຕານຕົວະອີກຕໍ່ໄປ ແລະເຂົາເຈົ້າຈະໄດ້ເຫັນຄຸນລັກສະນະທີ່ດີຂອງພະເຢໂຫວາ. ເຂົາເຈົ້າຮູ້ສຶກງຶດໃນລິດເດດທີ່ບໍ່ມີຂີດຈຳກັດຂອງເພິ່ນ. (ອຊຢ. 40:26) ເຂົາເຈົ້າໄວ້ໃຈເພິ່ນໄດ້ຍ້ອນເພິ່ນມີຄວາມຍຸຕິທຳແທ້ໆ. (ພບຍ. 32:4) ເຂົາເຈົ້າຮູ້ສຶກປະທັບໃຈໃນສະຕິປັນຍາທີ່ຍິ່ງໃຫຍ່ຂອງເພິ່ນ. (ອຊຢ. 55:9; ຣມ. 11:33) ນອກຈາກນັ້ນ ເຂົາເຈົ້າໄດ້ກຳລັງໃຈທີ່ຮູ້ວ່າເພິ່ນເປັນຄວາມຮັກ. (1ຢຮ. 4:8) ເມື່ອເຂົາເຈົ້າໃກ້ຊິດກັບພະເຢໂຫວາຫຼາຍຂຶ້ນ ຄວາມຫວັງຂອງເຂົາເຈົ້າທີ່ຈະເປັນລູກຂອງເພິ່ນແລະມີຊີວິດຕະຫຼອດໄປກໍຊັດເຈນຫຼາຍຂຶ້ນ. ເປັນກຽດຫຼາຍແທ້ໆທີ່ເຮົາໄດ້ຊ່ວຍຄົນອື່ນໃຫ້ໃກ້ຊິດກັບພະເຢໂຫວາພໍ່ຂອງເຂົາເຈົ້າ! ເມື່ອເຮັດແບບນັ້ນ ພະເຢໂຫວາກໍຖືວ່າເຮົາ “ເປັນໝູ່ທີ່ເຮັດວຽກຮ່ວມ” ກັບເພິ່ນ.—1ກຣ. 3:5. ຫ24.02 ໜ້າ 12 ຂໍ້ 15
ວັນເສົາທີ 27 ທັນວາ
ຖ້າເຈົ້າບໍ່ສັນຍາຫຍັງເລີຍກໍດີກວ່າສັນຍາໄວ້ແລ້ວບໍ່ເຮັດຕາມ.—ປຍຈ. 5:5
ຖ້າເຈົ້າກຳລັງຮຽນຄຳພີໄບເບິນຫຼືໃຫຍ່ມາໃນຄອບຄົວທີ່ເປັນພະຍານພະເຢໂຫວາ ເຈົ້າກຳລັງຄິດທີ່ຈະຮັບບັບເຕມາບໍ? ຖ້າແມ່ນ ນັ້ນເປັນເປົ້າໝາຍທີ່ດີຫຼາຍ. ແຕ່ກ່ອນຈະຮັບບັບເຕມາ ເຈົ້າຕ້ອງອຸທິດໂຕໃຫ້ພະເຢໂຫວາກ່ອນ. ເຈົ້າຈະອຸທິດໂຕໃຫ້ພະເຢໂຫວາແນວໃດ? ເຈົ້າອຸທິດໂຕໂດຍອະທິດຖານສັນຍາວ່າຈະນະມັດສະການພະເຢໂຫວາຜູ້ດຽວແລະສັນຍາວ່າຈະໃຫ້ຄວາມຕ້ອງການຂອງເພິ່ນເປັນສິ່ງສຳຄັນທີ່ສຸດໃນຊີວິດຂອງເຈົ້າ. ເຈົ້າສັນຍາກັບພະເຢໂຫວາວ່າຈະຮັກເພິ່ນ “ສຸດຫົວໃຈ ສຸດຊີວິດ ສຸດຄວາມຄິດ ແລະສຸດກຳລັງຂອງເຈົ້າ.” (ມຣກ. 12:30) ການອຸທິດໂຕແມ່ນການອະທິດຖານເປັນສ່ວນໂຕລະຫວ່າງເຈົ້າກັບພະເຢໂຫວາ. ແຕ່ການຮັບບັບເຕມາແມ່ນການບອກໃຫ້ຄົນອື່ນຮູ້ວ່າເຈົ້າໄດ້ອຸທິດໂຕໃຫ້ພະເຢໂຫວາແລ້ວ. ຕອນທີ່ອຸທິດໂຕ ເຈົ້າໄດ້ເຮັດສັນຍາທີ່ສຳຄັນຫຼາຍກັບພະເຢໂຫວາ. ດັ່ງນັ້ນ ເຈົ້າຕ້ອງຮັກສາສັນຍາ ແລະເພິ່ນກໍຄາດໝາຍໃຫ້ເຈົ້າຮັກສາສັນຍານັ້ນ.—ປຍຈ. 5:4. ຫ24.03 ໜ້າ 2 ຂໍ້ 2; ໜ້າ 4 ຂໍ້ 5
ວັນອາທິດທີ 28 ທັນວາ
ໃຫ້ຜົວທຸກຄົນຮັກເມຍຄືກັບຮັກໂຕເອງ ສ່ວນເມຍກໍຄວນນັບຖືຜົວຈາກໃຈ.—ອຟຊ. 5:33
ຄົນທີ່ແຕ່ງດອງແລ້ວຈະເຈິບັນຫາ ຍ້ອນຄຳພີໄບເບິນບອກວ່າຄົນທີ່ແຕ່ງດອງແລ້ວຈະມີ “ຄວາມຫຍຸ້ງຍາກໃນຊີວິດ.” (1ກຣ. 7:28) ເປັນຫຍັງຈຶ່ງເວົ້າແນວນັ້ນ? ຍ້ອນທັງຜົວແລະເມຍເປັນຄົນບໍ່ສົມບູນແບບ ມີນິດໄສຕ່າງກັນ ແລະມັກບໍ່ຄືກັນ. ບາງຄູ່ອາດມີເຊື້ອຊາດ ວັດທະນະທຳ ແລະພູມຫຼັງທີ່ແຕກຕ່າງກັນ. ເມື່ອເວລາຜ່ານໄປ ແຕ່ລະຄົນອາດສະແດງນິດໄສບາງຢ່າງອອກມາເຊິ່ງກ່ອນແຕ່ງດອງບໍ່ເຄີຍເຫັນ ແລະນິດໄສບາງຢ່າງກໍອາດເຮັດໃຫ້ເຂົາເຈົ້າເຖິງຂັ້ນຜິດກັນ. ແທນທີ່ແຕ່ລະຄົນຈະພະຍາຍາມຊ່ວຍກັນແກ້ໄຂບັນຫາ ເຂົາເຈົ້າພັດໂທດກັນໄປໂທດກັນມາທັງໆທີ່ທັງສອງກໍຜິດຄືກັນ. ບາງຄູ່ອາດເຖິງຂັ້ນຄິດວ່າການແຍກກັນຢູ່ຫຼືປະກັນເປັນທາງອອກທີ່ດີ. ແຕ່ການເຮັດແບບນີ້ຊ່ວຍເຂົາເຈົ້າໃຫ້ແກ້ບັນຫາໄດ້ແທ້ໆບໍ? ບໍ່. ພະເຢໂຫວາຢາກໃຫ້ຜົວກັບເມຍນັບຖືການຈັດກຽມເລື່ອງຊີວິດຄູ່ ເຖິງວ່າຄູ່ຂອງເຂົາເຈົ້າຈະເປັນຄົນທີ່ຢູ່ນຳຍາກ. ຫ24.03 ໜ້າ 16 ຂໍ້ 8; ໜ້າ 17 ຂໍ້ 11
ວັນຈັນທີ 29 ທັນວາ
ພວກເຮົາໝັ້ນໃຈວ່າຄວາມຫວັງນັ້ນຈະເປັນຈິງແນ່ນອນ.—ຣມ. 5:5
ຫຼັງຈາກທີ່ເຈົ້າຮັບບັບເຕມາແລ້ວ ຖ້າເຈົ້າຕັ້ງໃຈສະໜິດກັບພະເຢໂຫວາແລະຮັກເພິ່ນຫຼາຍຂຶ້ນ ເຈົ້າກໍໝັ້ນໃຈໃນຄວາມຫວັງຂອງເຈົ້າຫຼາຍຂຶ້ນຄືກັນ. (ຮຣ. 5:13–6:1) ເຈົ້າອາດຮູ້ສຶກວ່າໂຣມ 5:2-4 ເປັນຈິງກັບຊີວິດຂອງເຈົ້າ. ເຈົ້າເຈິກັບຄວາມທຸກລຳບາກຫຼາຍຢ່າງ ແຕ່ກໍຍັງອົດທົນໄດ້ແລະຮູ້ສຶກໄດ້ວ່າພະເຢໂຫວາພໍໃຈໃນໂຕເຈົ້າ. ແຮ່ງເຈົ້າຮູ້ວ່າພະເຢໂຫວາຮັກເຈົ້າ ເຈົ້າກໍແຮ່ງໝັ້ນໃຈຫຼາຍຂຶ້ນວ່າເພິ່ນຢາກຈະເຮັດຕາມທີ່ເພິ່ນສັນຍາໄວ້. ເຈົ້າໝັ້ນໃຈໃນຄວາມຫວັງຂອງເຈົ້າຫຼາຍກວ່າຕອນທີ່ເຈົ້າຮຽນຄຳພີໄບເບິນໃໝ່ໆ. ຄວາມຫວັງຂອງເຈົ້າຊັດເຈນຫຼາຍຂຶ້ນ ເຈົ້າເຫັນຄ່າມັນຫຼາຍຂຶ້ນ ແລະຮູ້ສຶກວ່າພະເຈົ້າຢາກໃຫ້ສິ່ງດີໆເກີດຂຶ້ນກັບເຈົ້າ. ເມື່ອເປັນແບບນີ້ ຄວາມຫວັງກໍຈະມີຜົນກັບທຸກແງ່ມຸມໃນຊີວິດຂອງເຈົ້າ ບໍ່ວ່າຈະເປັນວິທີທີ່ເຈົ້າປະຕິບັດກັບຄົນໃນຄອບຄົວ ການຕັດສິນໃຈເລື່ອງຕ່າງໆໃນຊີວິດ ຫຼືແມ່ນແຕ່ການໃຊ້ເວລາຂອງເຈົ້າ. ຫຼັງຈາກທີ່ໂປໂລບອກວ່າເມື່ອພະເຈົ້າພໍໃຈກໍເຮັດໃຫ້ພວກເຮົາມີຄວາມຫວັງ ໂປໂລຍັງເວົ້າເຖິງຈຸດສຳຄັນອີກຢ່າງໜຶ່ງກ່ຽວກັບຄວາມຫວັງຄືກັນ. ລາວບອກວ່າຄວາມຫວັງຂອງເຈົ້າຈະເປັນຈິງ.—ຣມ. 15:13. ຫ23.12 ໜ້າ 12-13 ຂໍ້ 16-19
ວັນອັງຄານທີ 30 ທັນວາ
ພະເຢໂຫວາເຮັດໃຫ້ຊີວິດຂອງພວກເຈົ້າໝັ້ນຄົງ.—ອຊຢ. 33:6
ເມື່ອເຮົາເຈິບັນຫາທີ່ໜັກໆເຮົາອາດມີຄວາມຄິດທີ່ບໍ່ສົມດຸນ ຮູ້ສຶກບໍ່ໝັ້ນຄົງ ແລະອາດເຮັດບາງຢ່າງທີ່ບໍ່ເຄີຍເຮັດ. ເຮົາອາດມີຄວາມຮູ້ສຶກຫຼາຍຢ່າງທີ່ເປັນຄືກັບເຮືອທີ່ຖືກຄື້ນຫຼາຍຄື້ນຊັດໃສ່. ຖ້າເຮົາຮູ້ສຶກແບບນີ້ ພະເຢໂຫວາຈະຊ່ວຍເຮົາແນວໃດ? ພະເຢໂຫວາຮັບຮອງກັບເຮົາວ່າເພິ່ນຈະເຮັດໃຫ້ເຮົາໝັ້ນຄົງ. ຄືກັບຕອນທີ່ເຮືອເຈິພາຍຸ ມັນອາດໂຍກໄປໂຍກມາຈົນເກືອບຫຼົ້ມ. ເພື່ອຈະບໍ່ເປັນແບບນີ້ ເຮືອຫຼາຍລຳຈະມີຄີຢູ່ກ້ອງເຮືອທັງສອງຂ້າງ. ຄີເຫຼົ່ານີ້ຈະຊ່ວຍເຮືອບໍ່ໃຫ້ໂຍກໄປໂຍກມາເມື່ອຖືກຄື້ນຊັດໃສ່ ແລະຈະເຮັດໃຫ້ຜູ້ໂດຍສານທີ່ຢູ່ໃນເຮືອຮູ້ສຶກປອດໄພຫຼາຍຂຶ້ນແລະບໍ່ເມົາເຮືອ. ແຕ່ເພື່ອຄີເຫຼົ່ານີ້ຈະເຮັດວຽກໄດ້ດີ ເຮືອກໍຕ້ອງແລ່ນໄປທາງໜ້າເລື້ອຍໆ. ຄ້າຍຄືກັນ ພະເຢໂຫວາຈະເຮັດໃຫ້ເຮົາໝັ້ນຄົງຖ້າເຮົາຮັບໃຊ້ເພິ່ນຢ່າງສັດຊື່ຕໍ່ໆໄປເຖິງວ່າຈະເຈິບັນຫາ. ຫ24.01 ໜ້າ 22 ຂໍ້ 7-8
ວັນພຸດທີ 31 ທັນວາ
ລູກໄວ້ໃຈພະອົງ . . . ລູກບໍ່ຮູ້ສຶກຢ້ານ.—ພສ. 56:4
ຕອນທີ່ເຈົ້າຮູ້ສຶກຢ້ານ ໃຫ້ຖາມໂຕເອງວ່າ: ‘ພະເຢໂຫວາເຄີຍເຮັດຫຍັງມາແລ້ວ?’ ໃຫ້ເຈົ້າຄິດກ່ຽວກັບສິ່ງທີ່ເພິ່ນສ້າງ. ຕົວຢ່າງເຊັ່ນ: ໃຫ້ເບິ່ງວ່າພະເຢໂຫວາເບິ່ງແຍງນົກແລະດອກໄມ້ແນວໃດ. ເຖິງວ່າສິ່ງເຫຼົ່ານີ້ບໍ່ໄດ້ຖືກສ້າງໃຫ້ຄ້າຍຄືກັບເພິ່ນແລະບໍ່ສາມາດນະມັດສະການເພິ່ນໄດ້ ແຕ່ພະເຢໂຫວາຍັງເບິ່ງແຍງພວກມັນຢ່າງດີ. ດັ່ງນັ້ນ ເພິ່ນກໍແຮ່ງສົນໃຈແລະຢາກເບິ່ງແຍງເຮົາຫຼາຍກວ່ານັ້ນອີກບໍ່ແມ່ນບໍ? (ມທ. 6:25-32) ການຄິດຕຶກຕອງກ່ຽວກັບເລື່ອງນີ້ຈະເຮັດໃຫ້ເຮົາໄວ້ໃຈພະເຢໂຫວາຫຼາຍຂຶ້ນ. ນອກຈາກນັ້ນ ໃຫ້ຄິດເຖິງສິ່ງທີ່ພະເຢໂຫວາເຮັດເພື່ອຜູ້ຮັບໃຊ້ຂອງເພິ່ນນຳ. ເຈົ້າອາດສຶກສາຄົ້ນຄວ້າເລື່ອງຂອງຄົນທີ່ຢູ່ໃນຄຳພີໄບເບິນທີ່ມີຄວາມເຊື່ອເຂັ້ມແຂງ ຫຼືເຈົ້າອາດລອງອ່ານປະສົບການຂອງຜູ້ຮັບໃຊ້ພະເຢໂຫວາໃນປັດຈຸບັນ. ອີກສິ່ງໜຶ່ງທີ່ເຈົ້າເຮັດໄດ້ແມ່ນໃຫ້ຄິດເບິ່ງວ່າພະເຢໂຫວາໄດ້ເບິ່ງແຍງເຈົ້າແນວໃດແລະເພິ່ນຊ່ວຍເຈົ້າຈັ່ງໃດໃຫ້ມາຮູ້ຈັກຄວາມຈິງ. (ຢຮ. 6:44) ເພິ່ນຕອບຄຳອະທິດຖານຂອງເຈົ້າແນວໃດແດ່? (1ຢຮ. 5:14) ໃນແຕ່ລະມື້ ເຈົ້າໄດ້ຮັບປະໂຫຍດຫຍັງຈາກການທີ່ພະເຢໂຫວາໃຫ້ລູກຊາຍທີ່ເພິ່ນຮັກມາຕາຍເປັນຄ່າໄຖ່?—ອຟຊ. 1:7; ຮຣ. 4:14-16. ຫ24.01 ໜ້າ 4 ຂໍ້ 6; ໜ້າ 7 ຂໍ້ 17