ເຈົ້າຈະປັບໂຕເຂົ້າກັບປະຊາຄົມໃໝ່ໄດ້ແນວໃດ?
ເຈົ້າເຄີຍຍ້າຍໄປປະຊາຄົມໃໝ່ບໍ? ຖ້າເຄີຍ ເຈົ້າຄືຊິເຫັນດີກັບຄຳເວົ້າຂອງຊ໋ອງຊາລທີ່ວ່າ: “ບໍ່ແມ່ນເລື່ອງງ່າຍທີ່ຈະປັບໂຕໃຫ້ເຂົ້າກັບປະຊາຄົມໃໝ່ແລະໃນເວລາດຽວກັນກໍຕ້ອງເບິ່ງແຍງຄວາມເຊື່ອຂອງຄົນໃນຄອບຄົວນຳ.” ນອກຈາກຕ້ອງຊອກວຽກໃໝ່ ບ່ອນຢູ່ໃໝ່ ແລະໂຮງຮຽນໃໝ່ແລ້ວ ຄົນທີ່ຍ້າຍໄປປະຊາຄົມໃໝ່ອາດຕ້ອງຮັບມືກັບສະພາບອາກາດທີ່ບໍ່ເຄີຍເຈິມາກ່ອນ ລວມທັງວັດທະນະທຳທີ່ແຕກຕ່າງແລະເຂດປະກາດໃໝ່ນຳ.
ນິໂຄລັດສ໌ກັບເຊລີນຕ້ອງຮັບມືກັບຂໍ້ທ້າທາຍອີກແບບໜຶ່ງ. ສາຂາຝຣັ່ງມອບໝາຍໃຫ້ເຂົາເຈົ້າໄປຮັບໃຊ້ຢູ່ປະຊາຄົມໃໝ່. ເຂົາເຈົ້າເວົ້າວ່າ: “ຕອນທຳອິດ ເຮົາຕື່ນເຕັ້ນຫຼາຍ ແຕ່ຫຼັງຈາກນັ້ນເຮົາກໍເລີ່ມຄິດຮອດໝູ່. ເຮົາຍັງບໍ່ສະໜິດກັບພີ່ນ້ອງໃນປະຊາຄົມໃໝ່ຊ້ຳ.”a ເມື່ອເຈິຂໍ້ທ້າທາຍແບບນີ້ ເຈົ້າຈະມີຄວາມສຸກແລະຊ່ວຍປະຊາຄົມໃໝ່ທີ່ເຈົ້າຍ້າຍໄປໄດ້ແນວໃດ? ພີ່ນ້ອງຄົນອື່ນຈະຊ່ວຍພີ່ນ້ອງທີ່ຫາກໍຍ້າຍມາປະຊາຄົມໄດ້ແນວໃດ? ເມື່ອເຈົ້າຍ້າຍໄປປະຊາຄົມໃໝ່ ເຈົ້າຈະໄດ້ກຳລັງໃຈຈາກພີ່ນ້ອງທີ່ຢູ່ຫັ້ນແລະໃຫ້ກຳລັງໃຈເຂົາເຈົ້າໄດ້ແນວໃດ?
ຫຼັກການ 4 ຢ່າງທີ່ຊ່ວຍເຈົ້າໃຫ້ປັບໂຕໄດ້
ວາງໃຈພະເຢໂຫວາ
1. ວາງໃຈພະເຢໂຫວາ. (ພສ. 37:5) ຄາຊູມິທີ່ຢູ່ປະເທດຍີ່ປຸ່ນຕ້ອງຍ້າຍຈາກປະຊາຄົມທີ່ລາວເຄີຍຢູ່ມາ 20 ປີຍ້ອນຜົວຂອງລາວຖືກບໍລິສັດສົ່ງໄປເຮັດວຽກຢູ່ບ່ອນໃໝ່. ຄາຊູມິ “ໃຫ້ພະເຢໂຫວາຊີ້ທາງໃຫ້ [ລາວ]” ແນວໃດ? ລາວເວົ້າວ່າ: “ຂ້ອຍອະທິດຖານລະບາຍຄວາມໃນໃຈທຸກຢ່າງກັບພະເຢໂຫວາ ບໍ່ວ່າຈະເປັນຕອນທີ່ຂ້ອຍຢ້ານ ເຫງົາ ຫຼືກັງວົນ. ທຸກເທື່ອທີ່ເຮັດແບບນີ້ ພະເຢໂຫວາກໍຊ່ວຍຂ້ອຍໃຫ້ເຂັ້ມແຂງສະເໝີ.”
ເຈົ້າຈະວາງໃຈພະເຢໂຫວາຫຼາຍຂຶ້ນໄດ້ແນວໃດ? ຄືກັບຕົ້ນໄມ້ທີ່ຕ້ອງການນ້ຳແລະສານອາຫານຈາກດິນເພື່ອຫຼໍ່ລ້ຽງຕົ້ນຂອງມັນໃຫ້ໃຫຍ່ ເພື່ອເຮົາຈະມີຄວາມເຊື່ອທີ່ເຂັ້ມແຂງເຮົາກໍຕ້ອງໄດ້ຮັບການຫຼໍ່ລ້ຽງຄືກັນ. ນິໂຄລັດສ໌ທີ່ເວົ້າເຖິງກ່ອນໜ້ານີ້ເວົ້າວ່າ ການຄິດຕຶກຕອງກ່ຽວກັບຕົວຢ່າງຂອງຄົນທີ່ໄດ້ເສຍສະຫຼະຫຼາຍຢ່າງເພື່ອຈະເຮັດຕາມຄວາມຕ້ອງການຂອງພະເຢໂຫວາ ເຊັ່ນ: ອັບຣາຮາມ ພະເຢຊູ ແລະໂປໂລຊ່ວຍລາວໄດ້ຫຼາຍແທ້ໆ. ຕົວຢ່າງເຫຼົ່ານີ້ຊ່ວຍລາວໃຫ້ໝັ້ນໃຈວ່າພະເຢໂຫວາຈະຊ່ວຍລາວແນ່ນອນ. ການສຶກສາສ່ວນໂຕເປັນປະຈຳຈະຊ່ວຍເຈົ້າໃຫ້ຮັບມືກັບການປ່ຽນແປງໃນຊີວິດ ແລະເຮັດໃຫ້ເຈົ້າມີສິ່ງດີໆທີ່ຈະແບ່ງປັນກັບພີ່ນ້ອງໃນປະຊາຄົມໃໝ່.
ຢ່າປຽບທຽບ
2. ຢ່າປຽບທຽບ. (ປຍຈ. 7:10) ຈູລຕ້ອງປັບໂຕຫຼາຍແທ້ໆກັບວັດທະນະທຳໃໝ່ຕອນທີ່ລາວຍ້າຍຈາກເບນິນໄປອາເມຣິກາ. ລາວເວົ້າວ່າ: “ຕອນທີ່ແນະນຳໂຕເອງ ຂ້ອຍຕ້ອງເລົ່າເລື່ອງຂອງຂ້ອຍໃຫ້ແຕ່ລະຄົນຟັງທຸກເທື່ອ.” ມັນຕ່າງກັນຫຼາຍແທ້ໆກັບວັດທະນະທຳທີ່ລາວເຄີຍຢູ່ ສິ່ງນີ້ເຮັດໃຫ້ລາວບໍ່ຢາກລົມກັບພີ່ນ້ອງໃນປະຊາຄົມໃໝ່. ແຕ່ຫຼັງຈາກທີ່ໄດ້ຮູ້ຈັກພີ່ນ້ອງຫຼາຍຂຶ້ນ ຄວາມຄິດຂອງລາວກໍປ່ຽນໄປ. ລາວເວົ້າວ່າ: “ຕອນນີ້ຂ້ອຍຮູ້ແລ້ວວ່າບໍ່ວ່າເຮົາຈະຢູ່ບ່ອນໃດ ເຮົາກະເປັນຄົນຄືກັນ ພຽງແຕ່ວິທີສະແດງອອກບໍ່ຄືກັນ. ໃຫ້ເຮົາແຕ່ລະຄົນຍອມຮັບຄວາມແຕກຕ່າງຂອງກັນແລະກັນ.” ຢ່າປຽບທຽບພີ່ນ້ອງຢູ່ປະຊາຄົມໃໝ່ກັບພີ່ນ້ອງຢູ່ປະຊາຄົມເກົ່າທີ່ເຈົ້າເຄີຍຢູ່. ພີ່ນ້ອງຍິງໄພໂອເນຍຄົນໜຶ່ງຊື່ແອນລີສ໌ເວົ້າວ່າ: “ຂ້ອຍບໍ່ໄດ້ຍ້າຍມາເພື່ອຈະເຈິແນວເກົ່າໆ ຂ້ອຍຍ້າຍມາເພື່ອຈະໄດ້ເຈິແນວໃໝ່ໆ.”
ຜູ້ເບິ່ງແຍງບໍ່ຄວນປຽບທຽບປະຊາຄົມໃໝ່ກັບປະຊາຄົມເກົ່າ. ການທີ່ພີ່ນ້ອງໃນປະຊາຄົມໃໝ່ເຮັດສິ່ງຕ່າງໆບໍ່ຄືກັບປະຊາຄົມເກົ່າບໍ່ໄດ້ໝາຍຄວາມວ່າເຂົາເຈົ້າເຮັດຜິດ. ດັ່ງນັ້ນ ເປັນເລື່ອງທີ່ດີທີ່ຈະຮຽນຮູ້ສະພາບການໃນທ້ອງຖິ່ນກ່ອນຈະສະເໜີປັບປ່ຽນບາງຢ່າງ. (ປຍຈ. 3:1, 7ຂ) ແທນທີ່ຈະໃຫ້ພີ່ນ້ອງເຮັດຕາມຄວາມຄິດຂອງເຈົ້າ ມັນຈະດີກວ່າຖ້າເຈົ້າເຮັດເປັນແບບຢ່າງໃຫ້ເຂົາເຈົ້າ.—2ກຣ. 1:24
ໃຊ້ເວລາກັບພີ່ນ້ອງແລະມີສ່ວນຮ່ວມກັບປະຊາຄົມໃໝ່
3. ໃຊ້ເວລາກັບພີ່ນ້ອງແລະມີສ່ວນຮ່ວມກັບປະຊາຄົມໃໝ່. (ຟລປ. 1:27) ການຍ້າຍໄປຢູ່ບ່ອນໃໝ່ອາດຕ້ອງໃຊ້ເວລາແລະເຮັດໃຫ້ເມື່ອຍ ແຕ່ກໍເປັນເລື່ອງສຳຄັນທີ່ຈະເຂົ້າຮ່ວມປະຊຸມກັບປະຊາຄົມໃໝ່ໃຫ້ໄວທີ່ສຸດ ແລະຖ້າເຮັດໄດ້ກໍໃຫ້ໄປປະຊຸມແບບເຈິໂຕກັນ. ຖ້າເຈົ້າບໍ່ໄປປະຊຸມພີ່ນ້ອງກໍຈະບໍ່ຮູ້ຈັກເຈົ້າແລະຊ່ວຍເຫຼືອເຈົ້າບໍ່ໄດ້. ລູຊິນດ້າກັບລູກສາວ 2 ຄົນຍ້າຍໄປຢູ່ເມືອງໃຫຍ່ເມືອງໜຶ່ງໃນອາຟຣິກາໃຕ້. ລາວເວົ້າວ່າ: “ໝູ່ແນະນຳຂ້ອຍໃຫ້ພະຍາຍາມຮູ້ຈັກພີ່ນ້ອງໃນປະຊາຄົມໃໝ່ແລະສະໜິດກັບເຂົາເຈົ້າ. ໃຫ້ອອກໄປປະກາດກັບເຂົາເຈົ້າ ແລະອອກຄຳຄິດເຫັນຢູ່ການປະຊຸມນຳ. ເຮົາຍັງບອກພີ່ນ້ອງວ່າສາມາດໃຊ້ເຮືອນຂອງເຮົາເປັນບ່ອນປະຊຸມເພື່ອການປະກາດໄດ້.”
ການເຮັດກິດຈະກຳ “ຄຽງບ່າຄຽງໄຫຼ່” ກັບພີ່ນ້ອງໃນປະຊາຄົມໃໝ່ຈະຊ່ວຍເຈົ້າໃຫ້ເຂັ້ມແຂງແລະພີ່ນ້ອງກໍຈະໄດ້ກຳລັງໃຈຄືກັນ. ແອນລີສ໌ທີ່ເວົ້າເຖິງກ່ອນໜ້ານີ້ໄດ້ຮັບຄຳແນະນຳຈາກຜູ້ເບິ່ງແຍງໃຫ້ພະຍາຍາມໄປປະກາດກັບພີ່ນ້ອງຫຼາຍຄົນ. ຜົນເປັນແນວໃດ? ລາວເວົ້າວ່າ: “ຂ້ອຍເຫັນວ່າການເຮັດແບບນີ້ຊ່ວຍຂ້ອຍໃຫ້ຮູ້ສຶກວ່າເປັນສ່ວນໜຶ່ງຂອງປະຊາຄົມ.” ນອກຈາກນັ້ນ ຖ້າເຈົ້າສະເໜີໂຕທີ່ຈະຊ່ວຍວຽກຕ່າງໆ ເຊັ່ນ: ເຮັດອານາໄມຫຼືເບິ່ງແຍງຮັກສາຫໍປະຊຸມ ເຈົ້າກໍກຳລັງເຮັດໃຫ້ພີ່ນ້ອງເຫັນວ່າເຈົ້າຖືວ່ານີ້ແມ່ນປະຊາຄົມຂອງເຈົ້າຄືກັນ. ແຮ່ງເຈົ້າມີສ່ວນຮ່ວມໃນວຽກຕ່າງໆ ເຈົ້າກໍແຮ່ງຈະມີຄວາມສຸກແລະຮູ້ສຶກວ່າພີ່ນ້ອງໃນປະຊາຄົມໃໝ່ເປັນຄືກັບຄອບຄົວຂອງເຈົ້າ.
ຊອກໝູ່ໃໝ່
4. ຊອກໝູ່ໃໝ່. (2ກຣ. 6:11-13) ການສະແດງຄວາມສົນໃຈພີ່ນ້ອງເປັນສ່ວນໂຕເປັນວິທີທີ່ດີທີ່ສຸດທີ່ຈະເປັນໝູ່ກັບເຂົາເຈົ້າ. ດັ່ງນັ້ນ ໃຫ້ໃຊ້ເວລາກ່ອນປະຊຸມແລະຫຼັງປະຊຸມເພື່ອລົມກັບພີ່ນ້ອງແລະຮູ້ຈັກເຂົາເຈົ້າໃຫ້ຫຼາຍຂຶ້ນ. ພະຍາຍາມຮູ້ຈັກຊື່ຂອງພີ່ນ້ອງແຕ່ລະຄົນ. ເມື່ອເຈົ້າຈື່ຊື່ພີ່ນ້ອງໄດ້ ເຂົາເຈົ້າກໍຈະຮູ້ສຶກວ່າເຈົ້າຢາກເປັນໝູ່ກັບເຂົາເຈົ້າ ແລະເມື່ອເຈົ້າເປັນຄົນທີ່ເຂົ້າຫາໄດ້ງ່າຍ ເຂົາເຈົ້າກໍຢາກຈະຮູ້ຈັກເຈົ້າແລະຢາກເປັນໝູ່ກັບເຈົ້າ.
ແທນທີ່ຈະເປັນຫ່ວງຫຼາຍໂພດວ່າເຈົ້າຈະເຂົ້າກັບພີ່ນ້ອງໄດ້ບໍ່ ໃຫ້ເຈົ້າພະຍາຍາມເຮັດໃຫ້ພີ່ນ້ອງໃນປະຊາຄົມໃໝ່ເຫັນວ່າເຈົ້າເປັນຄົນແນວໃດແທ້ໆ. ໃຫ້ເຈົ້າເຮັດຄືກັບລູຊິນດ້າ. ລາວເວົ້າວ່າ: “ເຮົາມີໝູ່ສະໜິດຫຼາຍຄົນຍ້ອນເຮົາເປັນຝ່າຍເລີ່ມຊວນພີ່ນ້ອງມາຫຼິ້ນເຮືອນເຮົາ.”
“ຕ້ອນຮັບກັນຢ່າງອົບອຸ່ນ”
ການໄປປະຊຸມຢູ່ບ່ອນທີ່ບໍ່ຮູ້ຈັກໃຜອາດບໍ່ງ່າຍສຳລັບບາງຄົນ. ເຈົ້າຈະເຮັດແນວໃດເພື່ອຊ່ວຍພີ່ນ້ອງທີ່ຍ້າຍມາປະຊາຄົມຂອງເຈົ້າ? ໂປໂລແນະນຳວ່າ ໃຫ້ “ຕ້ອນຮັບກັນຢ່າງອົບອຸ່ນຄືກັບທີ່ພະຄລິດຕ້ອນຮັບພວກເຈົ້າ.” (ຣມ. 15:7) ຜູ້ເບິ່ງແຍງຈະຮຽນແບບພະເຢຊູໂດຍຊ່ວຍພີ່ນ້ອງທີ່ຍ້າຍມາໃໝ່ໃຫ້ຮູ້ສຶກວ່າໄດ້ຮັບການຕ້ອນຮັບ. (ເບິ່ງຂອບ “ສິ່ງທີ່ຕ້ອງເຮັດເມື່ອຍ້າຍໄປປະຊາຄົມໃໝ່”) ທີ່ຈິງ ບໍ່ແມ່ນແຕ່ຜູ້ເບິ່ງແຍງເທົ່ານັ້ນທີ່ເຮັດໄດ້ ພີ່ນ້ອງທຸກຄົນໃນປະຊາຄົມລວມທັງເດັກນ້ອຍກໍສາມາດຊ່ວຍພີ່ນ້ອງທີ່ຍ້າຍມາໃໝ່ໃຫ້ຮູ້ສຶກວ່າໄດ້ຮັບການຕ້ອນຮັບ.
ນອກຈາກຊວນພີ່ນ້ອງມາຫຼິ້ນຢູ່ເຮືອນແລ້ວ ການຕ້ອນຮັບພີ່ນ້ອງຍັງໝາຍເຖິງການຊ່ວຍເຫຼືອໃນເລື່ອງອື່ນນຳ. ຕົວຢ່າງເຊັ່ນ: ພີ່ນ້ອງຍິງຄົນໜຶ່ງພາພີ່ນ້ອງຍິງທີ່ຍ້າຍມາໃໝ່ໄປເລາະຫຼິ້ນໃນເມືອງແລະບອກວິທີເດີນທາງດ້ວຍລົດໂດຍສານ. ການເຮັດແບບນີ້ເຮັດໃຫ້ພີ່ນ້ອງທີ່ຍ້າຍມາໃໝ່ປະທັບໃຈຫຼາຍແລະຊ່ວຍລາວໃຫ້ຮູ້ສຶກສະບາຍໃຈໃນການຢູ່ປະຊາຄົມໃໝ່ແລະປັບໂຕໄດ້ໄວຂຶ້ນ.
ໂອກາດທີ່ຈະກ້າວໜ້າຫຼາຍຂຶ້ນ
ນົກນ້ອຍອາດບໍ່ກ້າບິນອອກຈາກຮັງເປັນເທື່ອທຳອິດ ແຕ່ເມື່ອມັນໄດ້ລອງບິນອອກໄປ ໃນທີ່ສຸດມັນກໍຈະບິນໄດ້ສູງໆ. ຄ້າຍຄືກັນ ເມື່ອຍ້າຍໄປປະຊາຄົມໃໝ່ ເຈົ້າອາດຈະຮູ້ສຶກວ່າບໍ່ກ້າເຮັດບາງຢ່າງ ແຕ່ເມື່ອເຈົ້າເອົາຊະນະຄວາມຢ້ານໄດ້ເຈົ້າຈະສາມາດບິນໄດ້ສູງໆແລະພືປີກອອກໃນການຮັບໃຊ້ພະເຢໂຫວາ. ນິໂຄລັດສ໌ກັບເຊລີນເວົ້າວ່າ: “ເພື່ອຈະປັບໂຕໃຫ້ເຂົ້າກັບຄົນອື່ນແລະສະຖານທີ່ໃໝ່ໆໄດ້ ເຮົາຕ້ອງປູກຝັງຄຸນລັກສະນະໃໝ່ແບບຄລິດສະຕຽນ.” ຊ໋ອງຊາລທີ່ເວົ້າເຖິງກ່ອນໜ້ານີ້ໄດ້ເວົ້າເຖິງປະໂຫຍດທີ່ຄອບຄົວຂອງລາວໄດ້ຮັບ. ລາວເວົ້າວ່າ: “ການປ່ຽນແປງເຮັດໃຫ້ລູກຂອງເຮົາເປັນຜູ້ໃຫຍ່ແລະສະໜິດກັບພະເຢໂຫວາຫຼາຍຂຶ້ນ. ຫຼັງຈາກທີ່ເຮົາຍ້າຍມາໄດ້ສອງສາມເດືອນ ລູກສາວຂອງເຮົາກໍເລີ່ມເຮັດສ່ວນນັກຮຽນໃນການປະຊຸມກາງອາທິດ ແລະລູກຊາຍຂອງເຮົາກໍເປັນຜູ້ປະກາດທີ່ຍັງບໍ່ຮັບບັບເຕມາ.”
ເຈົ້າຢາກຍ້າຍໄປຊ່ວຍໃນເຂດທີ່ຕ້ອງການຜູ້ປະກາດຫຼາຍກວ່າແຕ່ສະພາບການຂອງເຈົ້າພັດເຮັດບໍ່ໄດ້ ເຈົ້າຈະເຮັດຫຍັງໄດ້ແດ່? ເຈົ້າອາດເລີ່ມເຮັດສິ່ງໃໝ່ໆໃນປະຊາຄົມທີ່ເຈົ້າຢູ່ແລະເອົາຄຳແນະນຳທີ່ເວົ້າເຖິງໃນບົດນີ້ໄປໃຊ້ ເຊັ່ນ: ໃຫ້ວາງໃຈພະເຢໂຫວາ ພະຍາຍາມມີສ່ວນຮ່ວມໃນປະຊາຄົມຫຼາຍຂຶ້ນໂດຍເຮັດວຽກກັບພີ່ນ້ອງຄົນອື່ນ ແລະຊອກໝູ່ໃໝ່ຫຼືເປັນໝູ່ທີ່ດີຂຶ້ນ. ນອກຈາກນັ້ນ ເຈົ້າຈະຊ່ວຍພີ່ນ້ອງທີ່ຫາກໍຮັບບັບເຕມາຫຼືພີ່ນ້ອງທີ່ມີຄວາມຈຳເປັນໄດ້ບໍ? ຍ້ອນຄວາມຮັກຊ່ວຍໃຫ້ຮູ້ວ່າໃຜເປັນຄລິດສະຕຽນແທ້ ເມື່ອເຈົ້າຊ່ວຍເຫຼືອພີ່ນ້ອງເຈົ້າກໍແຮ່ງຈະສະໜິດກັບພະເຢໂຫວາຫຼາຍຂຶ້ນ. (ຢຮ. 13:35) ຖ້າເຈົ້າເຮັດສິ່ງເຫຼົ່ານີ້ ເຈົ້າກໍໝັ້ນໃຈໄດ້ວ່າ “ພະເຈົ້າພໍໃຈເຄື່ອງບູຊາແບບນັ້ນ.”—ຮຣ. 13:16
ເຖິງຈະເຈິຂໍ້ທ້າທາຍຫຼາຍຢ່າງ ແຕ່ພີ່ນ້ອງຫຼາຍຄົນກໍມີຄວາມສຸກແລະເກີດຜົນດີໃນປະຊາຄົມໃໝ່. ເຈົ້າກໍເຮັດໄດ້ຄືກັນ. ແອນລີສ໌ເວົ້າວ່າ: “ການຍ້າຍໄປຢູ່ປະຊາຄົມໃໝ່ຊ່ວຍຂ້ອຍໃຫ້ເປີດໃຈໃຫ້ກວ້າງຫຼາຍຂຶ້ນ.” ຕອນນີ້ຄາຊູມິໝັ້ນໃຈວ່າ ການຍ້າຍປະຊາຄົມ “ເຮັດໃຫ້ເຫັນດ້ວຍໂຕເອງວ່າພະເຢໂຫວາໄດ້ຊ່ວຍຫຼາຍກວ່າທີ່ຜ່ານມາ.” ຈູລເວົ້າແນວໃດ? ລາວເວົ້າວ່າ: “ເມື່ອຂ້ອຍສະໜິດກັບພີ່ນ້ອງໃນປະຊາຄົມໃໝ່ຫຼາຍຂຶ້ນ ຂ້ອຍກໍຮູ້ສຶກຄືກັບວ່າໄດ້ຢູ່ເຮືອນຂອງໂຕເອງ. ຕອນນີ້ຂ້ອຍສະໜິດກັບພີ່ນ້ອງຫຼາຍຂຶ້ນຈົນຄິດວ່າຖ້າຕ້ອງຍ້າຍອີກຂ້ອຍຕ້ອງຮູ້ສຶກເສົ້າໃຈແທ້ໆ.”
a ເບິ່ງຄຳແນະນຳໃນບົດຄວາມ “ການຮັບມືກັບໂລກຄິດຮອດບ້ານໃນວຽກຮັບໃຊ້ພະເຈົ້າ” ໃນຫໍສັງເກດການ 15 ພຶດສະພາ 1994. (ພາສາໄທ)