ບົດຄວາມສຶກສາທີ 30
ເພງທີ 36 ປົກປ້ອງຫົວໃຈຂອງເຮົາ
ບົດຮຽນສຳຄັນຈາກກະສັດຂອງອິດສະຣາເອນ
“ພວກເຈົ້າຈະເຫັນຄວາມແຕກຕ່າງລະຫວ່າງຄົນດີກັບຄົນຊົ່ວ ແລະຄົນທີ່ຮັບໃຊ້ພະເຈົ້າກັບຄົນທີ່ບໍ່ໄດ້ຮັບໃຊ້ເພິ່ນ.”—ມລກ. 3:18
ຈຸດສຳຄັນ
ການຮຽນຮູ້ວ່າພະເຢໂຫວາເບິ່ງກະສັດຂອງອິດສະຣາເອນແນວໃດຈະຊ່ວຍເຮົາໃຫ້ເຂົ້າໃຈວ່າເຮົາຕ້ອງເຮັດຫຍັງເພື່ອເຮັດໃຫ້ພະເຢໂຫວາພໍໃຈ.
1-2. ຄຳພີໄບເບິນບອກເຮົາໃຫ້ຮູ້ຫຍັງກ່ຽວກັບກະສັດຂອງອິດສະຣາເອນບາງຄົນ?
ຄຳພີໄບເບິນເວົ້າເຖິງກະສັດຂອງອິດສະຣາເອນຫຼາຍກວ່າ 40 ຄົນ.a ຄຳພີໄບເບິນບອກເຮົາແຈ້ງໆກ່ຽວກັບບາງສິ່ງທີ່ກະສັດເຫຼົ່ານີ້ເຮັດແລະຍັງບອກເຮົາໃຫ້ຮູ້ວ່າກະສັດທີ່ດີກໍເຄີຍເຮັດສິ່ງທີ່ບໍ່ດີ. ຕົວຢ່າງເຊັ່ນ: ໃຫ້ເຮົາມາເບິ່ງເລື່ອງຂອງດາວິດທີ່ເປັນກະສັດທີ່ດີ. ພະເຢໂຫວາເວົ້າວ່າ: “ດາວິດຜູ້ຮັບໃຊ້ຂອງເຮົາ . . . ເຊື່ອຟັງເຮົາສຸດຫົວໃຈ ແລະເຮັດສິ່ງທີ່ເຮົາເບິ່ງວ່າຖືກຕ້ອງ.” (1ກສ. 14:8) ເຖິງຈະເປັນແນວນັ້ນ ດາວິດກໍເຄີຍເຮັດຜິດສິນລະທຳທາງເພດກັບເມຍຂອງຄົນອື່ນ ແລະລາວຍັງໄດ້ວາງແຜນໃຫ້ຜົວຂອງຜູ້ຍິງຄົນນັ້ນຖືກຂ້າຢູ່ສະໜາມຮົບ.—2ຊມ. 11:4, 14, 15
2 ຄຳພີໄບເບິນຍັງບອກໃຫ້ຮູ້ວ່າກະສັດທີ່ບໍ່ດີກໍເຄີຍເຮັດສິ່ງທີ່ດີ. ໃຫ້ເຮົາມາເບິ່ງເລື່ອງຂອງເຣໂຮໂບອາມ. ພະເຢໂຫວາຖືວ່າລາວເປັນຄົນທີ່ “ເຮັດຊົ່ວ.” (2ຂຄ. 12:14) ແຕ່ເຣໂຮໂບອາມກໍເຊື່ອຟັງພະເຢໂຫວາຕອນທີ່ເພິ່ນບອກລາວວ່າບໍ່ຕ້ອງໄປຕໍ່ສູ້ກັບອິດສະຣາເອນ 10 ຕະກູນທີ່ແຍກອອກຈາກການປົກຄອງຂອງລາວ. ນອກຈາກນັ້ນ ລາວຍັງໄດ້ເຮັດໃຫ້ເມືອງຕ່າງໆເຂັ້ມແຂງຂຶ້ນເພື່ອປົກປ້ອງປະຊາຊົນຂອງພະເຈົ້າຈາກພວກສັດຕູ.—1ກສ. 12:21-24; 2ຂຄ. 11:5-12
3. ມີຄຳຖາມສຳຄັນຫຍັງເກີດຂຶ້ນ ແລະເຮົາຈະຮຽນຫຍັງໃນບົດນີ້?
3 ຖ້າກະສັດອິດສະຣາເອນເຄີຍເຮັດສິ່ງທີ່ດີແລະບໍ່ດີ ພະເຢໂຫວາໃຊ້ຫຍັງເພື່ອຕັດສິນວ່າກະສັດຜູ້ນັ້ນເປັນຄົນສັດຊື່ຫຼືບໍ່? ຄຳຕອບສຳລັບຄຳຖາມນີ້ຈະຊ່ວຍເຮົາໃຫ້ເຂົ້າໃຈວ່າເຮົາຕ້ອງເຮັດຫຍັງເພື່ອຈະເຮັດໃຫ້ພະເຢໂຫວາພໍໃຈ. ໃນບົດນີ້ ເຮົາຈະເບິ່ງ 3 ສິ່ງທີ່ພະເຢໂຫວາຄິດເຖິງເຊິ່ງຊ່ວຍເພິ່ນໃນການຕັດສິນກະສັດຂອງອິດສະຣາເອນ. ສາມສິ່ງນັ້ນແມ່ນ (1) ສະພາບຫົວໃຈຂອງເຂົາເຈົ້າ (2) ເຂົາເຈົ້າກັບໃຈແທ້ໆບໍ ແລະ (3) ເຂົາເຈົ້ານະມັດສະການພະເຢໂຫວາໃນແບບທີ່ຖືກຕ້ອງບໍ.
ເຂົາເຈົ້າຮັບໃຊ້ພະເຢໂຫວາສຸດຫົວໃຈ
4. ກະສັດທີ່ດີກັບກະສັດທີ່ບໍ່ດີຕ່າງກັນແນວໃດ?
4 ກະສັດອິດສະຣາເອນທີ່ດີຈະຮັບໃຊ້ພະເຢໂຫວາສຸດຫົວໃຈ.b ກະສັດເຢໂຮຊາຟັດ “ຮັບໃຊ້ພະເຢໂຫວາສຸດຫົວໃຈ.” (2ຂຄ. 22:9) ຄຳພີໄບເບິນເວົ້າເຖິງໂຢສີຢາວ່າ: “ບໍ່ມີກະສັດອົງໃດເປັນຄືກັບລາວ ບໍ່ວ່າຈະກ່ອນຫຼືຫຼັງລາວ ເພາະວ່າລາວກັບມາຫາພະເຢໂຫວາແລະຮັບໃຊ້ເພິ່ນດ້ວຍສຸດຫົວໃຈ.” (2ກສ. 23:25) ແລ້ວໂຊໂລໂມນເດທີ່ຕໍ່ມາເຮັດສິ່ງທີ່ບໍ່ດີ? ຄຳພີໄບເບິນບອກວ່າ: “ລາວບໍ່ໄດ້ນະມັດສະການພະເຢໂຫວາພະເຈົ້າຂອງລາວດ້ວຍສຸດຫົວໃຈ.” (1ກສ. 11:4) ນອກຈາກນັ້ນ ຄຳພີໄບເບິນຍັງເວົ້າເຖິງອາບີຢຳກະສັດທີ່ບໍ່ດີວ່າ ລາວ “ບໍ່ໄດ້ຮັບໃຊ້ພະເຢໂຫວາພະເຈົ້າຂອງລາວສຸດຫົວໃຈ.”—1ກສ. 15:3
5. ການຮັບໃຊ້ພະເຢໂຫວາສຸດຫົວໃຈໝາຍຄວາມວ່າແນວໃດ?
5 ການຮັບໃຊ້ພະເຢໂຫວາສຸດຫົວໃຈໝາຍຄວາມວ່າແນວໃດ? ຄົນທີ່ຮັບໃຊ້ພະເຢໂຫວາສຸດຫົວໃຈຈະບໍ່ຮັບໃຊ້ເພິ່ນແບບພໍເປັນພິທີເທົ່ານັ້ນ ແຕ່ລາວຈະຮັບໃຊ້ຍ້ອນຮັກແລະນັບຖືພະເຢໂຫວາຫຼາຍ ແລະລາວຈະເຮັດແບບນັ້ນຕໍ່ໆໄປຕະຫຼອດຊີວິດຂອງລາວ.
6. ເຮົາຈະຮັກພະເຢໂຫວາສຸດຫົວໃຈສະເໝີໄດ້ແນວໃດ? (ສຸພາສິດ 4:23; ມັດທາຍ 5:29, 30)
6 ເຮົາຈະຮຽນແບບກະສັດທີ່ດີທີ່ຮັກພະເຢໂຫວາສຸດຫົວໃຈສະເໝີໄດ້ແນວໃດ? ເຮົາເຮັດໄດ້ໂດຍຫຼີກລ່ຽງອິດທິພົນຕ່າງໆທີ່ບໍ່ດີ. ຕົວຢ່າງເຊັ່ນ: ຄວາມບັນເທີງທີ່ບໍ່ດີອາດເຮັດໃຫ້ເຮົາບໍ່ໄດ້ຮັກພະເຢໂຫວາສຸດຫົວໃຈ. ການຫຼິ້ນນຳໝູ່ທີ່ບໍ່ດີແລະການຮັກເງິນກໍອາດເຮັດໃຫ້ເຮົາເປັນແບບນັ້ນຄືກັນ. ຖ້າເຮົາເຫັນວ່າເລີ່ມມີບາງຢ່າງທີ່ເຮັດໃຫ້ຄວາມຮັກທີ່ເຮົາມີຕໍ່ພະເຢໂຫວາຫຼຸດລົງ ເຮົາຕ້ອງຟ້າວຈັດການກັບມັນທັນທີ.—ອ່ານສຸພາສິດ 4:23; ມັດທາຍ 5:29, 30
7. ເປັນຫຍັງຈຶ່ງເປັນເລື່ອງສຳຄັນທີ່ເຮົາຕ້ອງຫຼີກລ່ຽງອິດທິພົນທີ່ບໍ່ດີ?
7 ເຮົາຕ້ອງຮັກພະເຢໂຫວາສຸດຫົວໃຈແລະບໍ່ຍອມໃຫ້ອັນໃດມາແບ່ງແຍກຫົວໃຈຂອງເຮົາ. ຖ້າເຮົາບໍ່ລະວັງ ເຮົາອາດຕົວະໂຕເອງໂດຍຄິດວ່າຖ້າເຮົາຫຍຸ້ງຢູ່ກັບການຮັບໃຊ້ພະເຢໂຫວາ ເຮົາບໍ່ຕ້ອງລະວັງອິດທິພົນທີ່ບໍ່ດີກໍໄດ້. ໃຫ້ເບິ່ງຕົວຢ່າງປຽບທຽບຕໍ່ໄປນີ້. ສົມມຸດວ່າມື້ໜຶ່ງອາກາດຮ້ອນຫຼາຍ. ເມື່ອເຈົ້າກັບມາຮອດເຮືອນເຈົ້າກໍເປີດແອ ຖ້າເຈົ້າເປີດແອແຕ່ບໍ່ໄດ້ປິດປະຕູ ເຈົ້າຄິດວ່າເຮືອນຊິເຢັນບໍຖ້າມີອາຍຮ້ອນເຂົ້າມາ? ຈຸດສຳຄັນແມ່ນຫຍັງ? ເຮົາຕ້ອງບໍ່ພຽງແຕ່ຮັບອາຫານທີ່ເສີມຄວາມເຊື່ອທີ່ຊ່ວຍເຮົາໃຫ້ສະໜິດກັບພະເຢໂຫວາເທົ່ານັ້ນ ແຕ່ເຮົາຕ້ອງປິດປະຕູບໍ່ຍອມໃຫ້ອາຍຮ້ອນທີ່ເປັນຄືກັບອິດທິພົນທີ່ບໍ່ດີເຂົ້າມາໃນຫົວໃຈແລະເຮັດໃຫ້ຫົວໃຈຂອງເຮົາຖືກແບ່ງແຍກ.—ອຟຊ. 2:2
ເຂົາເຈົ້າກັບໃຈແທ້ໆຈາກການເຮັດຜິດ
8-9. ເມື່ອກະສັດດາວິດແລະກະສັດເຮເຊກີຢາຖືກຕັກເຕືອນ ເຂົາເຈົ້າເຮັດແນວໃດ? (ເບິ່ງຮູບໜ້າປົກ)
8 ຄືກັບທີ່ເຮົາໄດ້ອ່ານໃນຂໍ້ທີ 1 ກະສັດດາວິດເຮັດຜິດຮ້າຍແຮງ ແຕ່ເມື່ອຜູ້ພະຍາກອນນາທານບອກດາວິດວ່າພະເຢໂຫວາຮູ້ສຶກແນວໃດຕໍ່ກັບຄວາມຜິດທີ່ລາວເຮັດ ດາວິດກໍຖ່ອມໂຕແລະກັບໃຈ. (2ຊມ. 12:13) ຄຳເວົ້າຂອງດາວິດທີ່ຢູ່ໃນເພງສັນລະເສີນບົດ 51 ເຮັດໃຫ້ເຮົາເຫັນວ່າລາວເສຍໃຈແທ້ໆໃນສິ່ງທີ່ລາວເຮັດ. ດາວິດບໍ່ໄດ້ເຮັດທຳທ່າເສຍໃຈເພື່ອຕົວະນາທານຫຼືເພື່ອຈະບໍ່ຖືກລົງໂທດ.—ພສ. 51:3, 4, 17, ຫົວບົດ
9 ກະສັດເຮເຊກີຢາກໍເຮັດຜິດຕໍ່ພະເຢໂຫວາຄືກັນ. ຄຳພີໄບເບິນບອກວ່າ: “ລາວກາຍເປັນຄົນຍິ່ງຈອງຫອງ ພະເຈົ້າຈຶ່ງໃຈຮ້າຍໃຫ້ເຮເຊກີຢາ ຄົນຢູດາ ແລະຄົນໃນເມືອງເຢຣູຊາເລັມ.” (2ຂຄ. 32:25) ເປັນຫຍັງເຮເຊກີຢາຈຶ່ງກາຍເປັນຄົນຍິ່ງ? ອາດເປັນຍ້ອນລາວຄິດວ່າລາວຮັ່ງ ເອົາຊະນະພວກອັດຊີເຣຍໄດ້ ແລະເຊົາເຈັບປ່ວຍແບບອັດສະຈັນ. ເປັນໄປໄດ້ທີ່ຄວາມຍິ່ງອາດເຮັດໃຫ້ລາວຢາກອວດຄວາມຮັ່ງມີໃຫ້ຄົນບາບີໂລນເຫັນ. ຜູ້ພະຍາກອນເອຊາຢາຈຶ່ງບອກລາວວ່າ ພະເຢໂຫວາໃຈຮ້າຍໃຫ້ລາວຫຼາຍ. (2ກສ. 20:12-18) ແຕ່ຄືກັບດາວິດ ເຮເຊກີຢາຖ່ອມໂຕແລະກັບໃຈ. (2ຂຄ. 32:26) ຍ້ອນແນວນີ້ ພະເຢໂຫວາຈຶ່ງຖືວ່າເຮເຊກີຢາເປັນກະສັດທີ່ສັດຊື່ແລະລາວ “ເຮັດສິ່ງທີ່ພະເຢໂຫວາເບິ່ງວ່າຖືກຕ້ອງສະເໝີ.”—2ກສ. 18:3
ກະສັດດາວິດແລະກະສັດເຮເຊກີຢາຖ່ອມໂຕແລະກັບໃຈຕອນທີ່ຜູ້ພະຍາກອນຕັກເຕືອນເຂົາເຈົ້າ (ເບິ່ງຂໍ້ 8-9)
10. ເມື່ອກະສັດອາມາຊີຢາຖືກຕັກເຕືອນ ລາວເຮັດແນວໃດ?
10 ອາມາຊີຢາກະສັດຂອງຢູດາບໍ່ຄືກັບດາວິດແລະເຮເຊກີຢາ. ລາວເຮັດສິ່ງທີ່ຖືກຕ້ອງ “ແຕ່ບໍ່ໄດ້ເຮັດສຸດຫົວໃຈ.” (2ຂຄ. 25:2) ອາມາຊີຢາເຮັດຫຍັງຜິດ? ຫຼັງຈາກທີ່ພະເຢໂຫວາຊ່ວຍລາວໃຫ້ຕໍ່ສູ້ຊະນະພວກເອໂດມ ລາວກໍເລີ່ມຂາບໄຫວ້ຮູບພະຂອງພວກເອໂດມ.c ເມື່ອຜູ້ພະຍາກອນຂອງພະເຢໂຫວາໄປເຕືອນລາວໃນເລື່ອງນີ້ ລາວກໍບໍ່ຟັງແລະໄດ້ໄລ່ຜູ້ພະຍາກອນໜີ.—2ຂຄ. 25:14-16
11. ຕາມ 2 ໂກຣິນໂທ 7:9, 11 ເຮົາຕ້ອງເຮັດຫຍັງເພື່ອພະເຢໂຫວາຈະຍົກໂທດໃຫ້ເຮົາ? (ເບິ່ງຮູບນຳ)
11 ເຮົາໄດ້ຮຽນຫຍັງຈາກຕົວຢ່າງເຫຼົ່ານີ້? ເຮົາຕ້ອງກັບໃຈຈາກຄວາມຜິດທີ່ເຮົາເຮັດ ແລະເຮັດທຸກສິ່ງທີ່ເຮົາເຮັດໄດ້ເພື່ອຈະບໍ່ເຮັດຜິດຊ້ຳອີກ. ຖ້າເຮົາໄດ້ຮັບຄຳແນະນຳຈາກຜູ້ເບິ່ງແຍງໃນປະຊາຄົມແມ່ນແຕ່ໃນເລື່ອງທີ່ເຮົາຄິດວ່າເປັນເລື່ອງນ້ອຍໆ ເຮົາຈະເຮັດແນວໃດ? ເຮົາບໍ່ຄວນຮູ້ສຶກວ່າພະເຢໂຫວາບໍ່ຮັກເຮົາຫຼືຜູ້ເບິ່ງແຍງບໍ່ມັກເຮົາ. ຂໍໃຫ້ຈື່ໄວ້ວ່າແມ່ນແຕ່ກະສັດທີ່ດີຂອງອິດສະຣາເອນກໍຍັງຕ້ອງໄດ້ຮັບຄຳແນະນຳແລະການຕັກເຕືອນ. (ຮຣ. 12:6) ເມື່ອເຮົາຖືກຕັກເຕືອນ ເຮົາຄວນ (1) ຖ່ອມໂຕແລະຍອມຮັບຄຳຕັກເຕືອນ (2) ປ່ຽນແປງໂຕເອງ ແລະ (3) ຕັ້ງໃຈຮັບໃຊ້ພະເຢໂຫວາສຸດຫົວໃຈຕໍ່ໆໄປ. ຖ້າເຮົາກັບໃຈຈາກການເຮັດຜິດ ພະເຢໂຫວາກໍຈະຍົກໂທດໃຫ້ເຮົາ.—ອ່ານ 2 ໂກຣິນໂທ 7:9, 11
ເມື່ອເຮົາຖືກຕັກເຕືອນ ເຮົາຄວນ (1) ຖ່ອມໂຕແລະຍອມຮັບຄຳຕັກເຕືອນ (2) ປ່ຽນແປງໂຕເອງ ແລະ (3) ຕັ້ງໃຈຮັບໃຊ້ພະເຢໂຫວາສຸດຫົວໃຈຕໍ່ໆໄປ (ເບິ່ງຂໍ້ 11)f
ເຂົາເຈົ້ານະມັດສະການພະເຢໂຫວາໃນແບບທີ່ຖືກຕ້ອງ
12. ອັນໃດເຮັດໃຫ້ກະສັດທີ່ດີຕ່າງຈາກກະສັດທີ່ບໍ່ດີ?
12 ກະສັດທີ່ພະເຢໂຫວາຖືວ່າເປັນຄົນດີຕ້ອງນະມັດສະການເພິ່ນໃນແບບທີ່ຖືກຕ້ອງແລະຊ່ວຍປະຊາຊົນໃຫ້ເຮັດແບບນັ້ນຄືກັນ. ແມ່ນຢູ່ວ່າກະສັດທີ່ດີເຫຼົ່ານັ້ນໄດ້ເຮັດຜິດພາດຄືກັບທີ່ເຮົາໄດ້ຮຽນມາແລ້ວ ແຕ່ເຂົາເຈົ້າກໍນະມັດສະການພະເຢໂຫວາຜູ້ດຽວແລະພະຍາຍາມທຳລາຍຮູບບູຊາໃຫ້ໝົດໄປຈາກແຜ່ນດິນອິດສະຣາເອນ.d
13. ເປັນຫຍັງພະເຢໂຫວາຕັດສິນວ່າອາຮາບເປັນກະສັດທີ່ບໍ່ດີ?
13 ເປັນຫຍັງພະເຢໂຫວາຕັດສິນກະສັດບາງຄົນວ່າເປັນຄົນບໍ່ດີ? ແນ່ນອນວ່າບໍ່ແມ່ນທຸກສິ່ງທີ່ເຂົາເຈົ້າເຮັດມັນບໍ່ດີ. ແມ່ນແຕ່ອາຮາບກະສັດທີ່ຊົ່ວກໍສະແດງຄວາມຖ່ອມແລະຮູ້ສຶກເສຍໃຈເມື່ອຮູ້ວ່າລາວມີສ່ວນທີ່ເຮັດໃຫ້ນາໂບດຕາຍ. (1ກສ. 21:27-29) ນອກຈາກນັ້ນ ລາວຍັງໄດ້ສ້າງເມືອງຕ່າງໆແລະຕໍ່ສູ້ຊະນະສັດຕູຂອງອິດສະຣາເອນນຳ. (1ກສ. 20:21, 29; 22:39) ແຕ່ອາຮາບກໍເຮັດຊົ່ວຫຼາຍໂດຍສະໜັບສະໜູນການນະມັດສະການປອມຍ້ອນໄດ້ຮັບອິດທິພົນທີ່ບໍ່ດີຈາກເມຍ. ລາວບໍ່ເຄີຍກັບໃຈໃນເລື່ອງນີ້ເລີຍ.—1ກສ. 21:25, 26
14. (ກ) ເປັນຫຍັງພະເຢໂຫວາຈຶ່ງຖືວ່າເຣໂຮໂບອາມເປັນກະສັດທີ່ບໍ່ດີ? (ຂ) ກະສັດສ່ວນຫຼາຍຂອງອິດສະຣາເອນໄດ້ເຮັດຫຍັງຜິດ?
14 ໃຫ້ເຮົາມາເບິ່ງຕົວຢ່າງຂອງກະສັດທີ່ບໍ່ດີອີກຜູ້ໜຶ່ງ ນັ້ນແມ່ນເຣໂຮໂບອາມ. ຄືກັບທີ່ເວົ້າໄປແລ້ວໃນຂໍ້ 2 ເຣໂຮໂບອາມເຮັດສິ່ງທີ່ດີຫຼາຍຢ່າງ ແຕ່ເມື່ອການປົກຄອງຂອງລາວໝັ້ນຄົງແລ້ວ ລາວກໍເຊົາເຮັດຕາມກົດໝາຍຂອງພະເຢໂຫວາແລະໄປນະມັດສະການພະເຈົ້າປອມ. (2ຂຄ. 12:1) ຕໍ່ມາ ບາງເທື່ອລາວກໍນະມັດສະການພະເຢໂຫວາແລະບາງເທື່ອລາວກໍນະມັດສະການພະເຈົ້າປອມ. (1ກສ. 14:21-24) ບໍ່ແມ່ນແຕ່ເຣໂຮໂບອາມກັບອາຮາບເທົ່ານັ້ນທີ່ນະມັດສະການພະເຈົ້າປອມ. ທີ່ຈິງ ກະສັດສ່ວນຫຼາຍທີ່ເຄີຍປົກຄອງອິດສະຣາເອນບໍ່ສັດຊື່ຍ້ອນເຂົາເຈົ້ານະມັດສະການພະເຈົ້າປອມ ແລະສົ່ງເສີມປະຊາຊົນໃຫ້ເຮັດແບບນັ້ນຄືກັນ. ເຫັນໄດ້ແຈ້ງວ່າ ສຳລັບພະເຢໂຫວາການນະມັດສະການທີ່ຖືກຕ້ອງເປັນສິ່ງທີ່ເພິ່ນໃຊ້ເພື່ອຕັດສິນວ່າໃຜເປັນກະສັດທີ່ດີຫຼືບໍ່ດີ.
15. ເປັນຫຍັງການນະມັດສະການໃນແບບທີ່ຖືກຕ້ອງຈຶ່ງເປັນເລື່ອງທີ່ສຳຄັນຫຼາຍສຳລັບພະເຢໂຫວາ?
15 ເປັນຫຍັງການນະມັດສະການຈຶ່ງເປັນເລື່ອງທີ່ສຳຄັນຫຼາຍສຳລັບພະເຢໂຫວາ? ເຫດຜົນໜຶ່ງແມ່ນ ກະສັດມີໜ້າທີ່ນຳໜ້າປະຊາຊົນໃນການນະມັດສະການໃນແບບທີ່ຖືກຕ້ອງ. ນອກຈາກນັ້ນ ການນະມັດສະການພະເຈົ້າປອມເຮັດໃຫ້ກະສັດແລະຄົນອິດສະຣາເອນເຮັດຜິດຮ້າຍແຮງແລະເຮັດໃຫ້ເຂົາເຈົ້າເຮັດສິ່ງທີ່ບໍ່ດີ. (ຮຊອ. 4:1, 2) ຍ້ອນກະສັດແລະຄົນອິດສະຣາເອນໝົດຊາດເປັນຂອງພະເຢໂຫວາ ເມື່ອເຂົາເຈົ້າບໍ່ສັດຊື່ຕໍ່ເພິ່ນໂດຍໄປນະມັດສະການພະເຈົ້າປອມຈຶ່ງເປັນຄືກັບການຫຼິ້ນຊູ້. (ຢຣມ. 3:8, 9) ຄົນທີ່ຫຼິ້ນຊູ້ບໍ່ສັດຊື່ຕໍ່ຄູ່ຂອງໂຕເອງແລະເຮັດໃຫ້ຄູ່ຂອງລາວເຈັບປວດໃຈຫຼາຍ. ຄ້າຍຄືກັນ ຜູ້ຮັບໃຊ້ຂອງພະເຢໂຫວາທີ່ອຸທິດໂຕໃຫ້ເພິ່ນ ແລ້ວໄປນະມັດສະການພະເຈົ້າປອມກໍບໍ່ສັດຊື່ຕໍ່ເພິ່ນແລະເຮັດໃຫ້ເພິ່ນເຈັບປວດໃຈຫຼາຍ.e—ພບຍ. 4:23, 24
16. ຖ້າເຮົາຢາກໃຫ້ພະເຢໂຫວາເບິ່ງວ່າເຮົາເປັນຄົນດີ ເຮົາຕ້ອງເຮັດຫຍັງ?
16 ເຮົາຮຽນຫຍັງຈາກເລື່ອງນີ້? ເຮົາຕ້ອງບໍ່ຫຍຸ້ງກ່ຽວກັບທຸກສິ່ງທີ່ກ່ຽວຂ້ອງກັບການນະມັດສະການປອມ. ແຕ່ເຮົາຕ້ອງນະມັດສະການພະເຢໂຫວາໃນແບບທີ່ຖືກຕ້ອງແລະໝັ່ນເຮັດວຽກປະກາດນຳ. ຜູ້ພະຍາກອນມາລາກີເວົ້າຢ່າງຈະແຈ້ງວ່າ ສຳລັບພະເຢໂຫວາເພິ່ນເບິ່ງຄົນດີຕ່າງຈາກຄົນຊົ່ວ. ລາວເວົ້າວ່າ: “ພວກເຈົ້າຈະເຫັນຄວາມແຕກຕ່າງລະຫວ່າງຄົນດີກັບຄົນຊົ່ວ ແລະຄົນທີ່ຮັບໃຊ້ພະເຈົ້າກັບຄົນທີ່ບໍ່ໄດ້ຮັບໃຊ້ເພິ່ນ.” (ມລກ. 3:18) ດັ່ງນັ້ນ ຖ້າເຮົາຢາກໃຫ້ພະເຢໂຫວາເບິ່ງວ່າເຮົາເປັນຄົນດີ ເຮົາຕ້ອງບໍ່ຍອມໃຫ້ສິ່ງໃດກໍຕາມແມ່ນແຕ່ຄວາມບໍ່ສົມບູນແບບຫຼືຄວາມຜິດພາດຂອງເຮົາ ເຮັດໃຫ້ເຮົາເຊົາຮັບໃຊ້ພະເຢໂຫວາ. ການເຊົາຮັບໃຊ້ພະເຢໂຫວາເປັນຄວາມຜິດທີ່ຮ້າຍແຮງຫຼາຍ.
17. ເປັນຫຍັງຕ້ອງລະວັງຕອນທີ່ເຮົາເລືອກຄົນທີ່ຈະແຕ່ງດອງນຳ?
17 ຖ້າເຈົ້າເປັນຄົນໂສດແລະກຳລັງຄິດຈະແຕ່ງດອງ ຄຳເວົ້າຂອງມາລາກີຊ່ວຍເຈົ້າແນວໃດໃຫ້ເລືອກຄົນທີ່ຈະມາເປັນຄູ່ຂອງເຈົ້າ? ເຈົ້າອາດເຈິຜູ້ໃດຜູ້ໜຶ່ງທີ່ເປັນຄົນນິດໄສດີ ແຕ່ຖ້າລາວບໍ່ໄດ້ຮັບໃຊ້ພະເຢໂຫວາ ເພິ່ນຈະຖືວ່າລາວເປັນຄົນດີບໍ? (2ກຣ. 6:14) ຖ້າເຈົ້າແຕ່ງດອງກັບຜູ້ນີ້ ລາວຈະຊ່ວຍເຈົ້າໃຫ້ຮັບໃຊ້ພະເຢໂຫວາຢ່າງສັດຊື່ບໍ? ໃຫ້ຄິດເຖິງຕົວຢ່າງຂອງກະສັດໂຊໂລໂມນ. ເມຍຂອງລາວທີ່ເປັນຄົນຕ່າງຊາດອາດມີນິດໄສບາງຢ່າງທີ່ດີ ແຕ່ເຂົາເຈົ້າກໍບໍ່ໄດ້ນະມັດສະການພະເຢໂຫວາ. ຍ້ອນແນວນີ້ ເຂົາເຈົ້າຈຶ່ງຄ່ອຍໆຊັກຈູງໂຊໂລໂມນໃຫ້ໄປນະມັດສະການພະເຈົ້າປອມ.—1ກສ. 11:1, 4
18. ພໍ່ແມ່ຄວນສອນລູກເລື່ອງຫຍັງ?
18 ຜູ້ທີ່ເປັນພໍ່ແມ່ສາມາດໃຊ້ເລື່ອງຂອງກະສັດອິດສະຣາເອນທີ່ຢູ່ໃນຄຳພີໄບເບິນສອນລູກໃຫ້ກະຕືລືລົ້ນໃນການຮັບໃຊ້ພະເຢໂຫວາ. ຊ່ວຍລູກໃຫ້ເຫັນວ່າເພື່ອພະເຢໂຫວາຈະຖືວ່າເປັນກະສັດທີ່ດີຫຼືບໍ່ດີມັນຂຶ້ນກັບວ່າລາວສະໜັບສະໜູນການນະມັດສະການແທ້ຫຼືບໍ່. ໃຫ້ສອນລູກໂດຍທາງຄຳເວົ້າແລະການກະທຳຂອງເຈົ້າວ່າກິດຈະກຳຂອງຄລິດສະຕຽນ ເຊັ່ນ: ການອ່ານແລະການສຶກສາຄຳພີໄບເບິນ ການເຂົ້າຮ່ວມປະຊຸມ ແລະການປະກາດ ເປັນສິ່ງທີ່ສຳຄັນກວ່າແນວອື່ນ. (ມທ. 6:33) ຖ້າເຈົ້າບໍ່ເຮັດແບບນັ້ນ ລູກອາດຈະຄິດວ່າການເປັນພະຍານພະເຢໂຫວາເປັນສາສະໜາຂອງຄອບຄົວຊື່ໆ. ຜົນກໍຄື ລູກອາດຄິດວ່າການນະມັດສະການພະເຢໂຫວາບໍ່ໄດ້ເປັນສິ່ງທີ່ສຳຄັນທີ່ສຸດໃນຊີວິດ ຫຼືອາດເຖິງຂັ້ນເຊົາຮັບໃຊ້ພະເຢໂຫວາກໍໄດ້.
19. ຄົນທີ່ເຊົາຮັບໃຊ້ພະເຢໂຫວາສາມາດກັບມາເປັນໝູ່ກັບເພິ່ນໄດ້ອີກບໍ? (ເບິ່ງຂອບ “ເຈົ້າກັບມາຫາພະເຢໂຫວາໄດ້” ນຳ)
19 ຖ້າບາງຄົນເຊົາຮັບໃຊ້ພະເຢໂຫວາ ນັ້ນໝາຍຄວາມວ່າລາວບໍ່ສາມາດກັບມາເປັນໝູ່ຂອງເພິ່ນໄດ້ອີກບໍ? ກັບມາໄດ້ ຖ້າລາວກັບໃຈແລະກັບມານະມັດສະການພະເຢໂຫວາອີກ. ລາວຕ້ອງສະແດງຄວາມຖ່ອມແລະຍອມຮັບຄວາມຊ່ວຍເຫຼືອຈາກຜູ້ເບິ່ງແຍງໃນປະຊາຄົມ. (ຢກບ. 5:14) ການໄດ້ກັບມາເປັນຜູ້ຮັບໃຊ້ຂອງພະເຢໂຫວາແລະເປັນໝູ່ກັບເພິ່ນອີກເທື່ອໜຶ່ງເປັນສິ່ງທີ່ຄຸ້ມຄ່າກັບຄວາມພະຍາຍາມຫຼາຍແທ້ໆ!
20. ຖ້າເຮົາຮຽນແບບກະສັດທີ່ດີ ພະເຢໂຫວາຈະຖືວ່າເຮົາເປັນຄົນແບບໃດ?
20 ເຮົາຮຽນຫຍັງຈາກກະສັດຂອງອິດສະຣາເອນ? ເຮົາຈະເປັນຄືກັບກະສັດທີ່ດີຖ້າເຮົາຮັບໃຊ້ພະເຢໂຫວາສຸດຫົວໃຈ. ຖ້າເຮົາເຮັດຜິດພາດ ໃຫ້ເຮົາຮຽນຈາກຄວາມຜິດພາດນັ້ນ ກັບໃຈ ແລະຍອມຮັບການຕັກເຕືອນ. ຂໍໃຫ້ເຮົາຈື່ໄວ້ວ່າການນະມັດສະການພະເຈົ້າທ່ຽງແທ້ອົງດຽວໃນແບບທີ່ຖືກຕ້ອງເປັນເລື່ອງສຳຄັນຫຼາຍ. ຖ້າເຈົ້າສັດຊື່ຕໍ່ພະເຢໂຫວາຕໍ່ໆໄປ ເພິ່ນຈະຖືວ່າເຈົ້າເຮັດສິ່ງທີ່ຖືກຕ້ອງ.
ເພງທີ 45 ສິ່ງທີ່ຄິດຕຶກຕອງໃນໃຈ
a ໃນບົດນີ້ ຄຳວ່າ “ກະສັດອິດສະຣາເອນ” ໝາຍເຖິງກະສັດທຸກຄົນທີ່ເຄີຍປົກຄອງປະຊາຊົນຂອງພະເຢໂຫວາ ບໍ່ວ່າຈະເປັນກະສັດທີ່ປົກຄອງອານາຈັກຢູດາທີ່ມີ 2 ຕະກູນ ຫຼືອານາຈັກອິດສະຣາເອນທີ່ມີ 10 ຕະກູນ ຫຼືປົກຄອງທັງ 12 ຕະກູນ.
b ການອະທິບາຍຄຳສັບ: ຄຳພີໄບເບິນມັກໃຊ້ຄຳວ່າ “ຫົວໃຈ” ເພື່ອອະທິບາຍກ່ຽວກັບຕົວຕົນຂອງເຮົາທີ່ຢູ່ທາງໃນ ເຊິ່ງລວມເຖິງຄວາມຕ້ອງການ ຄວາມຄິດ ຄວາມຮູ້ສຶກ ແຮງກະຕຸ້ນ ແລະເປົ້າໝາຍຂອງເຮົາ.
c ໃນສະໄໝນັ້ນ ເມື່ອກະສັດທີ່ບໍ່ແມ່ນຄົນອິດສະຣາເອນຕໍ່ສູ້ຊະນະຊາດໃດ ເຂົາເຈົ້າກໍຈະນະມັດສະການພະເຈົ້າຂອງຊາດນັ້ນ.
d ກະສັດອາຊາເຄີຍເຮັດຜິດຮ້າຍແຮງ. (2ຂຄ. 16:7, 10) ແຕ່ຄຳພີໄບເບິນບອກວ່າລາວເປັນກະສັດທີ່ດີ. ຕອນທີ່ຜູ້ພະຍາກອນຂອງພະເຢໂຫວາມາຕັກເຕືອນອາຊາ ຕອນທຳອິດລາວບໍ່ຍອມຟັງ ແຕ່ເປັນໄປໄດ້ທີ່ຕໍ່ມາລາວໄດ້ກັບໃຈ. ພະເຢໂຫວາເຫັນຈຸດດີຫຼາຍກວ່າຈຸດເສຍຂອງລາວ. ສິ່ງສຳຄັນແມ່ນອາຊານະມັດສະການພະເຢໂຫວາແຕ່ຜູ້ດຽວແລະຕັ້ງໃຈທຳລາຍຮູບບູຊາທັງໝົດທົ່ວແຜ່ນດິນທີ່ລາວປົກຄອງ.—1ກສ. 15:11-13; 2ຂຄ. 14:2-5
e ກົດໝາຍ 2 ຂໍ້ທຳອິດໃນກົດໝາຍຂອງໂມເຊບອກວ່າ ໃຫ້ນະມັດສະການພະເຢໂຫວາຜູ້ດຽວເທົ່ານັ້ນ ແລະຫ້າມນະມັດສະການພະເຈົ້າອື່ນຫຼືສິ່ງອື່ນ.—ອພຍ. 20:1-6
f ຄຳອະທິບາຍຮູບ: ຜູ້ເບິ່ງແຍງທີ່ອາຍຸນ້ອຍເປັນຫ່ວງພີ່ນ້ອງຊາຍຄົນໜຶ່ງເລື່ອງການກິນເຫຼົ້າ. ພີ່ນ້ອງຊາຍຄົນນີ້ຖ່ອມໂຕແລະຟັງຄຳແນະນຳ ປ່ຽນແປງໂຕເອງ ແລະຮັບໃຊ້ພະເຢໂຫວາຢ່າງສັດຊື່ຕໍ່ໆໄປ.