ສົງຄາມອາມາເຄໂດນແມ່ນຫຍັງ?
ຄຳຕອບຈາກຄຳພີໄບເບິນ
ສົງຄາມອາມາເຄໂດນແມ່ນການຕໍ່ສູ້ຄັ້ງສຸດທ້າຍລະຫວ່າງການປົກຄອງຂອງມະນຸດກັບພະເຈົ້າ. ແມ່ນແຕ່ໃນຕອນນີ້ການປົກຄອງຂອງມະນຸດແລະຄົນທີ່ສະໜັບສະໜູນການປົກຄອງເຫຼົ່ານັ້ນກໍຕໍ່ຕ້ານພະເຈົ້າໂດຍບໍ່ຍອມຢູ່ໃຕ້ອຳນາດຂອງເພິ່ນ. (ຄຳເພງ 2:2) ສົງຄາມອາມາເຄໂດນຈະທຳລາຍການປົກຄອງຂອງມະນຸດໃຫ້ໝົດໄປ.—ດານີເອນ 2:44
ມີການໃຊ້ຄຳວ່າ: “ອາມາເຄໂດນ” ພຽງເທື່ອດຽວໃນຄຳພີໄບເບິນ. ໃນປຶ້ມພະນິມິດ 16:16 ເຊິ່ງເປັນຄຳພະຍາກອນບອກວ່າ: “ບ່ອນທີ່ມີຊື່ໃນພາສາເຮັບເຣີວ່າອາມາເຄໂດນ” ຫຼືອາມາເຄໂດນຈະມີ “ກະສັດທົ່ວໂລກ” ມາ “ມາເຕົ້າໂຮມກັນສຳລັບສົງຄາມໃນວັນໃຫຍ່ຂອງພະເຈົ້າຜູ້ມີລິດເດດສູງສຸດ.”—ພະນິມິດ 16:14
ມີໃຜແນ່ຈະຕໍ່ສູ້ໃນສົງຄາມອາມາເຄໂດນ? ພະເຢຊູຄລິດຈະເປັນຜູ້ນຳກອງທັບໃນສະຫວັນມາປາບສັດຕູຂອງພະເຈົ້າ (ພນມ 19:11-16, 19-21) ສັດຕູເຫຼົ່ານັ້ນລວມເຖິງຄົນທີ່ຕໍ່ຕ້ານພະເຈົ້າແລະຄົນທີ່ດູຖູກຊື່ຂອງເພິ່ນ.—ເອເຊກຽນ 39:7
ສົງຄາມອາມາເຄໂດນຈະເກີດຂຶ້ນຢູ່ຕາເວັນອອກກາງບໍ? ບໍ່. ສົງຄາມອາມາເຄໂດນຈະບໍ່ເກີດຂຶ້ນໃນສະຖານທີ່ໃດໜຶ່ງ ແຕ່ຈະກວມເອົາທົ່ວໂລກ.—ເຢເຣມີຢາ 25:32-34; ເອເຊກຽນ 39:17-20
ບາງເທື່ອມີການເອີ້ນອາມາເຄໂດນວ່າ: “ຮາມາເຄໂດນ” (ພາສາເຮັບເຣີ Har Meghiddohn) ເຊິ່ງໝາຍເຖິງ “ພູເຂົາແຫ່ງເມກິດໂດ.” ເມກິດໂດເປັນເມືອງໜຶ່ງໃນອິດສະຣາເອນບູຮານ. ບັນທຶກໃນທາງປະຫວັດສາດບອກວ່າມີສົງຄາມສຳຄັນຫຼາຍຄັ້ງເກີດຂຶ້ນໃນບໍລິເວນນີ້ລວມເຖິງສົງຄາມທີ່ມີບັນທຶກໄວ້ໃນຄຳພີໄບເບິນນຳ. (ພວກຜູ້ຕັດສິນ 5:19, 20; 2 ກະສັດ 9:27; 23:29) ອາມາເຄໂດນບໍ່ໄດ້ໝາຍເຖິງຫຸບເຂົາເມກິດໂດໃນສະໄໝບູຮານເພາະບ່ອນນັ້ນບໍ່ມີພູເຂົາໃຫຍ່ ແລະເຖິງວ່າຈະລວມເຂົ້າກັບຮ່ອມພູເຢດຊະເຣເອນທີ່ຢູ່ຕິດກັນ ກໍບໍ່ມີພື້ນທີ່ພໍໃຫ້ຄົນທີ່ຕໍ່ຕ້ານພະເຢໂຫວາມາລວມກັນ. ທີ່ຈິງ ອາມາເຄໂດນເປັນເຫດການທີ່ຊາດຕ່າງໆທົ່ວໂລກຈະລວມຕົວກັນເພື່ອຕໍ່ຕ້ານການປົກຄອງຂອງພະເຈົ້າເປັນເທື່ອສຸດທ້າຍ.
ເຫດການໃນສົງຄາມອາມາເຄໂດນຈະເປັນແນວໃດ? ເຮົາບໍ່ຮູ້ວ່າພະເຈົ້າຈະໃຊ້ອຳນາດແບບໃດໃນສົງຄາມນີ້. ແຕ່ອາດເປັນວິທີທີ່ເພິ່ນເຄີຍໃຊ້ໃນອະດີດເຊັ່ນ: ໝາກເຫັບ ແຜ່ນດິນໄຫວ ນ້ຳຖ້ວມ ພາຍຸຝົນ ໄຟແລະກຳມະຖັນ ຟ້າຜ່າແລະໂລກໄພໄຂ້ເຈັບຕ່າງໆ. (ໂຢບ 38:22, 23; ເອເຊກຽນ 38:19, 22; ຮາບາກຸກ 3:10, 11; ຊາກາລີ 14:12) ໃນຊ່ວງເວລາທີ່ສັບສົນວຸ່ນວາຍ ສັດຕູຂອງພະເຈົ້າສ່ວນໜຶ່ງຈະຕໍ່ສູ້ກັນເອງ ແຕ່ໃນທີ່ສຸດເຂົາເຈົ້າກໍຈະຮູ້ວ່າກຳລັງຕໍ່ສູ້ກັບພະເຈົ້າ.—ເອເຊກຽນ 38:21, 23; ເຊຄາຣີຢາ 14:13
ສົງຄາມອາມາເຄໂດນຈະເປັນຈຸດຈົບຂອງໂລກບໍ? ອາມາເຄໂດນບໍ່ແມ່ນຈຸດຈົບຂອງແຜ່ນດິນໂລກ. ເພາະໂລກນີ້ຈະເປັນບ່ອນຢູ່ອາໄສຂອງມະນຸດຕະຫຼອດໄປ. (ຄຳເພງ 37:29; 96:10; ຜູ້ເທສະໜາປ່າວປະກາດ 1:4) ແທນທີ່ຈະທຳລາຍລ້າງມະນຸດ ອາມາເຄໂດນຈະເປັນການຊ່ວຍໃຫ້ລອດເພາະ “ຊົນຝູງໃຫຍ່” ທີ່ເປັນຜູ້ຮັບໃຊ້ຂອງພະເຈົ້າຈະລອດຊີວິດ.—ພະນິມິດ 7:9, 14; ຄຳເພງ 37:34
ແຕ່ຄຳພີໄບເບິນເວົ້າເຖິງໂລກໃນອີກຄວາມໝາຍໜຶ່ງນຳ. ບາງເທື່ອຄຳວ່າ: “ໂລກ” ໝາຍເຖິງສັງຄົມມະນຸດທີ່ຊົ່ວຊ້າແລະຕໍ່ຕ້ານພະເຈົ້າ. (1 ໂຢຮັນ 2:15-17) ໃນບົດຄວາມນີ້ອາມາເຄໂດນຈະເປັນ “ວາລະສຸດທ້າຍຂອງໂລກ.”—ມັດທາຍ 24:3, ສະບັບຄິງເຈມ
ສົງຄາມອາມາເຄໂດນຈະເກີດຂຶ້ນເມື່ອໃດ? ເມື່ອເວົ້າເຖິງ “ຄວາມທຸກລຳບາກຄັ້ງໃຫຍ່” ທີ່ຈະມາຮອດໃນສົງຄາມອາມາເຄໂດນ ພະເຢຊູບອກວ່າ: “ວັນແລະເວລານັ້ນບໍ່ມີຜູ້ໃດຮູ້ຈັກ ແມ່ນແຕ່ທູດສະຫວັນຫຼືລູກຂອງພະເຈົ້າກໍບໍ່ຮູ້ຈັກ ມີແຕ່ພະເຈົ້າຜູ້ເປັນພໍ່ເທົ່ານັ້ນທີ່ຮູ້ຈັກ.” (ມັດທາຍ 24:21, 36) ແຕ່ຄຳພີໄບເບິນບອກວ່າ ອາມາເຄໂດນຈະເກີດຂຶ້ນໃນຊ່ວງການປະທັບຂອງພະເຢຊູເຊິ່ງເລີ່ມມາຕັ້ງແຕ່ປີ 1914.—ມັດທາຍ 24:37-39