ບົດ 10
ການເດີນທາງໄປເຢຣຶຊາເລມ
ລະດູໃບໄມ້ປົ່ງມາເຖິງແລ້ວ. ເປັນເວລາທີ່ຄອບຄົວຂອງໂຍເຊບພ້ອມດ້ວຍມິດສະຫາຍແລະຍາດພີ່ນ້ອງ ຈະອອກເດີນທາງໃນລະດູໃບໄມ້ປົ່ງໄປເມືອງເຢຣຶຊາເລມເພື່ອສະຫຼອງປັດສະຄາຕາມທີ່ພວກເຂົາເຮັດທຸກປີ. ໃນຂະນະອອກເດີນທາງປະມານ 100 ກິໂລແມັດ ຕາມປົກກະຕິແລ້ວຍ່ອມມີຄວາມຕື່ນເຕັ້ນ. ຕອນນີ້ພະເຍຊູອາຍຸ 12 ປີ ແລະພະອົງຕັ້ງໃຈຄອຍຖ້າເວລາມີການສະຫຼອງຢ່າງໃຈຈົດຈໍ່ເປັນພິເສດ.
ສຳລັບພະເຍຊູແລະຄອບຄົວຂອງພະອົງແລ້ວ ການສະຫຼອງປັດສະຄາບໍ່ແມ່ນກິດຈະກຳແຕ່ມື້ດຽວ. ພວກເຂົາຈະຄ້າງຢູ່ຕໍ່ອີກເຈັດມື້ເພື່ອຮ່ວມການສະຫຼອງເທສະການເຂົ້າຈີ່ບໍ່ມີເຊື້ອ ເຊິ່ງເຂົາຖືວ່າເປັນສ່ວນຂອງການສະຫຼອງປັດສະຄາ. ດັ່ງນັ້ນ ການເດີນທາງຈາກບ້ານທີ່ນາຊາເລດຮ່ວມທັງການພັກເຊົາຢູ່ໃນເມືອງເຢຣຶຊາເລມຄົງຈະໃຊ້ເວລາປະມານສອງອາທິດ. ແຕ່ປີນີ້ໃຊ້ເວລາດົນກວ່າ ເນື່ອງຈາກເກີດເຫດການບາງຢ່າງທີ່ກ່ຽວຂ້ອງກັບພະເຍຊູ.
ເລື່ອງເກີດຂຶ້ນຕອນເດີນທາງເມືອບ້ານຈາກເຢຣຶຊາເລມ. ໂຍເຊບແລະມາລີນຶກວ່າພະເຍຊູຢູ່ນຳກຸ່ມພີ່ນ້ອງຫຼືຫມູ່ທີ່ຮ່ວມເດີນທາງດ້ວຍກັນ. ແຕ່ເມື່ອຢຸດພັກຄ້າງຄືນ ປາກົດວ່າບໍ່ເຫັນພະອົງ ແລະພວກເຂົາຊອກຫາພະອົງໃນຫມູ່ຄົນເດີນທາງນຳກັນ. ຫາບໍ່ພົບ. ດັ່ງນັ້ນ ໂຍເຊບແລະມາລີຈຶ່ງກັບໄປຊອກຫາພະອົງທີ່ເມືອງເຢຣຶຊາເລມ.
ເຂົານຳຫາໝົດມື້ແຕ່ບໍ່ໄດ້ຜົນ. ມື້ທີສອງເຂົາກໍຕາມຫາບໍ່ພົບອີກ. ໃນທີ່ສຸດ ມື້ທີສາມ ເຂົາເຂົ້າໄປທີ່ພະວິຫານ. ໃນຫ້ອງໜຶ່ງຂອງພະວິຫານນັ້ນ ເຂົາເຫັນພະເຍຊູພວມນັ່ງຟັງແລະຊັກຖາມບັນຫາໃນທ່າມກາງອາຈານຊາວຢິວ.
ມາລີຖາມວ່າ “ລູກເອີຍ ເຫດສັນໃດທ່ານໄດ້ກະທຳຢ່າງນັ້ນແກ່ຫມູ່ເຮົາ ຈົ່ງເບິ່ງ ພໍ່ຂອງທ່ານກັບເຮົາໄດ້ຊອກຫາທ່ານດ້ວຍຄວາມອຸກໃຈຫຼາຍ.”
ພະເຍຊູແປກໃຈວ່າພໍ່ແມ່ບໍ່ຮູ້ຈະໄປຊອກຫາພະອົງໄດ້ຢູ່ບ່ອນໃດ. ພະອົງຖາມວ່າ “ເຫດສັນໃດທ່ານທັງສອງໄດ້ຊອກຫາເຮົາ ທ່ານທັງສອງບໍ່ໄດ້ຮູ້ຫຼືວ່າ ເຮົາຕ້ອງຢູ່ກະທຳກິດຈະການແຫ່ງພະບິດາຂອງເຮົາ.”
ພະເຍຊູບໍ່ເຂົ້າໃຈວ່າເປັນຫຍັງພໍ່ແມ່ຂອງພະອົງບໍ່ຮູ້ເລື່ອງນີ້. ແລ້ວພະເຍຊູຈຶ່ງເມືອບ້ານນຳພໍ່ແມ່ ແລະຍອມເຊື່ອຟັງເຂົາຕໍ່ໄປ. ພະອົງຈະເລີນຂຶ້ນທັງທາງປັນຍາແລະຮ່າງກາຍ ເປັນທີ່ມັກຊອບຂອງພະເຈົ້າແລະມະນຸດ. ແມ່ນແລ້ວ ຕັ້ງແຕ່ພະອົງຍັງເປັນເດັກຢູ່ ພະເຍຊູວາງຕົວຢ່າງທີ່ດີ ບໍ່ພຽງແຕ່ສະແຫວງຫາຜົນປະໂຫຍດຝ່າຍວິນຍານເທົ່ານັ້ນ ແຕ່ກໍຍັງສະແດງຄວາມນັບຖືຕໍ່ພໍ່ແມ່ໄປນຳ. ລຶກາ 2:40-52; 22:7.
▪ ເມື່ອເຖິງລະດູໃບໄມ້ປົ່ງ ພະເຍຊູຮ່ວມໄປກັບຄອບຄົວຂອງພະອົງເປັນປະຈຳໃນການເດີນທາງຫຍັງ ແລະຕ້ອງໃຊ້ເວລາດົນປານໃດ?
▪ ເກີດຫຍັງຂຶ້ນລະຫວ່າງການເດີນທາງຕອນທີ່ພະເຍຊູມີອາຍຸໄດ້ 12 ປີ?
▪ ພະເຍຊູວາງຕົວຢ່າງຫຍັງໄວ້ສຳລັບຫນຸ່ມສາວໃນສະໄໝນີ້?