ບົດ 27
ມັດທາຍຖືກຮຽກ
ພາຍຫຼັງພະເຍຊູປົວຄົນອຳມະພາດໄດ້ບໍ່ດົນ ພະອົງເດີນທາງອອກຈາກເມືອງກັບເອນາອູມໄປທີ່ທະເລຄາລິເລ. ອີກເທື່ອໜຶ່ງຝູງຊົນມາຫາພະອົງ ແລະພະອົງເລີ່ມສັ່ງສອນເຂົາ. ຂະນະພະອົງຍ່າງຜ່ານໄປ ໄດ້ເຫັນມັດທາຍເຊິ່ງມີອີກຊື່ໜຶ່ງວ່າເລວີ ນັ່ງຢູ່ທີ່ດ່ານເກັບພາສີ. ພະເຍຊູກ່າວເຊີນເຂົາວ່າ “ທ່ານຈົ່ງຕາມເຮົາໄປເທີ້ນ.”
ມັດທາຍຄົງຈະຄຸ້ນເຄີຍກັບຄຳສອນຂອງພະເຍຊູກ່ອນແລ້ວ ຄືກັບເປໂຕ, ອັນດະເລອາ, ຍາໂກໂບ, ແລະໂຍຮັນເມື່ອພວກເຂົາຖືກເອີ້ນ. ເຊັ່ນດຽວກັນກັບພວກເຂົາ ມັດທາຍຍອມຮັບຄຳເຊີນທັນທີ. ລາວລຸກຂຶ້ນ ແລ້ວປະລະໜ້າທີ່ນາຍພາສີຂອງຕົນແລະຕິດຕາມພະເຍຊູໄປ.
ຫຼັງຈາກນັ້ນ ມັດທາຍໄດ້ຈັດການລ້ຽງໃຫຍ່ຢູ່ບ້ານຂອງຕົນ ບາງທີລາວອາດຈະລ້ຽງສະຫຼອງການທີ່ລາວຖືກເອີ້ນ. ນອກຈາກພະເຍຊູແລະສາວົກຂອງພະອົງແລ້ວ ຍັງມີຜູ້ເຄີຍຄົບຫາກັບມັດທາຍຮ່ວມດ້ວຍ. ຕາມປົກກະຕິ ຄົນເຫຼົ່ານີ້ມັກຈະຖືກຄົນຢິວດ້ວຍກັນດູຖູກ ເນື່ອງຈາກເຂົາເກັບພາສີສົ່ງໃຫ້ເຈົ້າໜ້າທີ່ໂລມັນເຊິ່ງຊາວຢິວກຽດຊັງ. ຍິ່ງກວ່ານັ້ນ ຄົນເຫຼົ່ານີ້ມັກຮຽກເງິນຈາກປະຊາຊົນເກີນອັດຕາພາສີປົກກະຕິ.
ເມື່ອເຫັນພະເຍຊູກິນລ້ຽງກັບຄົນເຫຼົ່ານີ້ ພວກຟາລິຊຽນຖາມສາວົກຂອງພະອົງວ່າ “ເຫດສັນໃດເຈົ້ານາຍຂອງທ່ານທັງຫຼາຍກິນອາຫານດ້ວຍກັນກັບຄົນເກັບພາສີແລະຄົນບາບທັງຫຼາຍ.” ເມື່ອໄດ້ຍິນເຊັ່ນນັ້ນ ພະເຍຊູຕອບພວກຟາລິຊຽນວ່າ “ຄົນທັງຫຼາຍທີ່ສຳບາຍຢູ່ບໍ່ຕ້ອງຢາກໄດ້ຫາທ່ານໝໍຢາ ແຕ່ວ່າຄົນບໍ່ສຳບາຍກໍຕ້ອງຢາກໄດ້. ແຕ່ວ່າທ່ານທັງຫຼາຍ ຈົ່ງໄປຮຽນຮູ້ຈັກຂໍ້ນີ້ທີ່ວ່າ ເຮົາຢາກໄດ້ຄວາມອີດູແລະບໍ່ແມ່ນເຄື່ອງບູຊາ. ເພາະວ່າ ເຮົາໄດ້ມາເອີ້ນເອົາບໍ່ໃຊ່ຄົນຊອບທຳແຕ່ວ່າຄົນບາບທັງຫຼາຍ.”
ເບິ່ງຄືວ່າ ມັດທາຍເຊີນຄົນເກັບພາສີມາບ້ານຕົນກໍເພື່ອໃຫ້ພວກເຂົາຟັງພະເຍຊູສັ່ງສອນແລະຮັບການປິ່ນປົວທາງຝ່າຍວິນຍານ. ດັ່ງນັ້ນ ພະເຍຊູຄົບຫາກັບເຂົາກໍເພື່ອຊ່ອຍພວກເຂົາໃຫ້ເຂົ້າມາມີສຳພັນທະພາບທີ່ດີກັບພະເຈົ້າ. ພະເຍຊູບໍ່ລັງກຽດຄົນເຫຼົ່ານີ້ເໝືອນດັ່ງພວກຟາລິຊຽນທີ່ຖືວ່າຕົນຊອບທຳ. ແຕ່ທີ່ຈິງ ເນື່ອງຈາກຄວາມເມດຕາ ພະອົງຈຶ່ງເປັນແພດທາງຝ່າຍວິນຍານຂອງພວກເຂົາ.
ການທີ່ພະເຍຊູສະແດງຄວາມເມດຕາຕໍ່ຄົນບາບເຫຼົ່ານັ້ນ ບໍ່ແມ່ນພະອົງຍິນຍອມກັບຄວາມບາບຂອງເຂົາ ແຕ່ພະອົງສະແດງຄວາມອ່ອນໂຍນແບບດຽວກັບທີ່ເຄີຍສະແດງຕໍ່ຄົນປ່ວຍທາງກາຍ. ເຊັ່ນ ລະນຶກເຖິງຕອນທີ່ພະອົງຍື່ນມືແຕະຄົນຂີ້ທູດດ້ວຍຄວາມສົງສານ ແລະກ່າວວ່າ “ເຮົາມີນ້ຳໃຈ ໃຫ້ເຈົ້າດີສະອາດເທີ້ນ.” ໃຫ້ພວກເຮົາມີນ້ຳໃຈເຊັ່ນດຽວກັນ ຄືສະແດງຄວາມອີດູຕໍ່ຄົນທຸກຍາກ ໂດຍສະເພາະຊ່ອຍເຂົາທາງດ້ານຝ່າຍວິນຍານ. ມັດທາຽ 8:3; 9:9-13; ມາລະໂກ 2:13-17; ລຶກາ 5:27-32.
▪ ມັດທາຍຢູ່ບ່ອນໃດເມື່ອພະເຍຊູເຫັນລາວ?
▪ ມັດທາຍມີອາຊີບຫຍັງ ແລະເຫດໃດຄົນຢິວຈຶ່ງດູຖູກຜູ້ມີອາຊີບນີ້?
▪ ມີການຟ້ອງພະເຍຊູໃນເລື່ອງໃດ ແລະພະອົງຕອບສະໜອງຢ່າງໃດ?
▪ ເປັນຫຍັງພະເຍຊູຈຶ່ງຄົບຫາກັບຄົນບາບ?