ບົດ 98
ພວກສາວົກໂຕ້ຖຽງກັນຂະນະທີ່ຈວນເຖິງເວລາທີ່ພະເຍຊູຈະສິ້ນຊີວິດ
ພະເຍຊູແລະສາວົກຂອງພະອົງຢູ່ໃກ້ແມ່ນ້ຳຢູລະເດນ ບ່ອນທີ່ເຂົາເຈົ້າຂ້າມຈາກແຂວງພິເຣຍເຂົ້າສູ່ແຂວງຢູເດ. ມີຄົນອື່ນຈຳນວນຫຼາຍເດີນທາງໄປນຳເຂົາເຈົ້າເພື່ອສະຫຼອງປັດສະຄາໃນປີສາກົນສັກກະຫຼາດ 33 ເຊິ່ງຢູ່ຫ່າງປະມານໜຶ່ງອາທິດເທົ່ານັ້ນ.
ພະເຍຊູຍ່າງຢູ່ທາງໜ້າບັນດາສາວົກ ແລະເຂົາເຈົ້າຮູ້ສຶກແປກໃຈໃນຄວາມຕັ້ງໃຈແນ່ວແນ່ຂອງພະອົງ. ຂໍຫວນຈື່ວ່າສອງສາມອາທິດກ່ອນໜ້ານັ້ນເມື່ອຕອນທີ່ລາຊະໂລຕາຍແລະພະເຍຊູພວມອອກຈາກພິເຣຍໄປຢູເດ ໂທມາສະໜັບສະຫນູນຄົນອື່ນໆ ວ່າ “ຫມູ່ເຮົາຈົ່ງໄປທັງມວນເພື່ອຫມູ່ເຮົາຈະຕາຍນຳພະອົງດ້ວຍ.” ນອກຈາກນັ້ນ ຈົ່ງລະລຶກເຖິງອີກວ່າຫຼັງຈາກພະເຍຊູປຸກລາຊະໂລຟື້ນຈາກຕາຍແລ້ວ ສານຊັນເຮດຣິນໄດ້ວາງແຜນຈະປະຫານພະອົງ. ບໍ່ແປກທີ່ຄວາມຢ້ານໄດ້ຄອບງຳເຫຼົ່າສາວົກເມື່ອເຂົາເຈົ້າເຂົ້າໄປໃນແຂວງຢູເດອີກ.
ເພື່ອກຽມເຂົາເຈົ້າໄວ້ພ້ອມສຳລັບສິ່ງທີ່ຈະເກີດຂຶ້ນ ພະເຍຊູພາສາວົກ 12 ຄົນອອກໄປຢູ່ຕ່າງຫາກແລະກ່າວນຳເຂົາເຈົ້າວ່າ “ຈົ່ງເບິ່ງເຮົາທັງຫຼາຍຂຶ້ນໄປເມືອງເຢຣຶຊາເລມ ແລະບຸດມະນຸດຈະເປັນທີ່ມອບໄວ້ແກ່ພວກປະໂລຫິດຜູ້ໃຫຍ່ແລະພວກສະໝຽນ ແລະເຂົາຈະລົງໂທດພະອົງເຖິງຕາຍແລະຈະມອບພະອົງໄວ້ແກ່ຄົນຕ່າງປະເທດ. ແລະເຂົາຈະຫົວຂວັນໃສ່ພະອົງ ແລະຈະຂ້ຽນແລະຖົ່ມນ້ຳລາຍໃສ່ພະອົງແລະຈະໃຫ້ພະອົງຕາຍ ແລ້ວໃນວັນທີສາມພະອົງຈະຄືນມາຈາກຕາຍ.”
ນີ້ເປັນເທື່ອທີສາມໃນບໍ່ເທົ່າໃດເດືອນມານີ້ທີ່ພະເຍຊູໄດ້ບອກພວກສາວົກໃຫ້ຮູ້ເລື່ອງຄວາມຕາຍ ແລະການຟື້ນຄືນຊີວິດຂອງພະອົງ. ເຖິງວ່າໄດ້ຟັງຈາກພະອົງ ເຂົາເຈົ້າກໍຍັງບໍ່ເຂົ້າໃຈ. ບາງທີອາດເປັນເພາະເຂົາເຈົ້າເຊື່ອໃນການຟື້ນຟູອານາຈັກຍິດສະລາເອນເທິງແຜ່ນດິນໂລກຂຶ້ນໃໝ່ ແລະຫວັງຈະໄດ້ສະຫງ່າລາສີແລະກຽດຕິຍົດໃນລາຊະອານາຈັກທາງແຜ່ນດິນໂລກຮ່ວມກັບພະຄລິດ.
ໃນບັນດາຄົນທີ່ມຸ່ງເດີນທາງໄປສະຫຼອງປັດສະຄາມີນາງຊະໂລເມແມ່ຂອງອັກຄະສາວົກຍາໂກໂບກັບໂຍຮັນ. ພະເຍຊູເອີ້ນສອງຄົນນີ້ວ່າ “ລູກຟ້າຮ້ອງ.” ຄົງຈະເປັນຍ້ອນນິດໄສໃຈຮ້ອນຂອງເຂົາ. ຊົ່ວໄລຍະໜຶ່ງຫົວໃຈຂອງສອງຄົນນີ້ເກັບງຳຄວາມຝັກໃຝ່ຢາກຈະເປັນບຸກຄົນສຳຄັນໃນລາຊະອານາຈັກຂອງພະຄລິດ ແລະເຂົາໄດ້ໃຫ້ແມ່ຂອງເຂົາຮູ້ຄວາມປາຖະໜານັ້ນ. ບັດນີ້ນາງເຂົ້າຫາພະເຍຊູຕາງເຂົາສອງຄົນ ກົ້ມລົງຕໍ່ໜ້າພະອົງ ແລ້ວຂໍຄວາມກະລຸນາ.
ພະເຍຊູຖາມວ່າ “ນາງຢາກໄດ້ສິ່ງໃດ”? ນາງຕອບວ່າ “ຂໍເຊີນພະອົງສັ່ງວ່າໃຫ້ລູກຊາຍຂອງຂ້າພະເຈົ້າທັງສອງຄົນນີ້ນັ່ງເບື້ອງຂວາມືຂອງພະອົງຜູ້ໜຶ່ງ ເບື້ອງຊ້າຍຜູ້ໜຶ່ງ ໃນແຜ່ນດິນຂອງພະອົງ.”
ຍ້ອນຮູ້ແຫຼ່ງທີ່ມາຂອງຄຳຂໍຮ້ອງນັ້ນ ພະເຍຊູຈຶ່ງກ່າວກັບຍາໂກໂບແລະໂຍຮັນວ່າ “ອັນນັ້ນທີ່ທ່ານທັງຫຼາຍຂໍ ທ່ານກໍບໍ່ຮູ້ຈັກເປັນປະການໃດ. ຈອກນັ້ນທີ່ເຮົາຈະກິນ ທ່ານທັງສອງອາດກິນໄດ້ຫຼື”?
ເຂົາທັງສອງທູນຕອບວ່າ “ໄດ້ເຈົ້າຂ້າ.” ເຖິງແມ່ນວ່າພະເຍຊູຫາກໍ່ກ່າວວ່າພະອົງຕ້ອງປະເຊີນການຂົ່ມເຫງຢ່າງແສນສາຫັດແລະໃນທີ່ສຸດຖືກປະຫານຊີວິດກໍຕາມ ເບິ່ງຄືເຂົາເຈົ້າບໍ່ເຂົ້າໃຈວ່າ “ຈອກ” ທີ່ພະອົງກຳລັງຈະດື່ມນັ້ນໝາຍເຖິງສິ່ງນີ້ແຫຼະ.
ຢ່າງໃດກໍຕາມ ພະເຍຊູບອກເຂົາເຈົ້າວ່າ “ທ່ານທັງສອງຈະກິນກໍຈິງ ແຕ່ວ່າທີ່ຈະນັ່ງເບື້ອງຂວາແລະເບື້ອງຊ້າຍມືຂອງເຮົານັ້ນບໍ່ເປັນການຂອງເຮົາຈະປະທານ ແຕ່ວ່າພະບິດາຂອງເຮົາໄດ້ຈັດແຈ່ງໄວ້ສຳລັບຜູ້ໃດຈະໃຫ້ແກ່ຜູ້ນັ້ນ.”
ເມື່ອອັກຄະສາວົກອີກສິບຄົນຮູ້ເລື່ອງທີ່ຍາໂກໂບແລະໂຍຮັນໄດ້ຂໍ ເຂົາເຈົ້າຈຶ່ງຄຽດ. ບາງທີຍາໂກໂບແລະໂຍຮັນເປັນຕົວເດັ່ນໃນການໂຕ້ຖຽງກັນກ່ອນໜ້ານີ້ລະຫວ່າງພວກອັກຄະສາວົກໃນເລື່ອງທີ່ວ່າໃຜຈະເປັນຜູ້ໃຫຍ່ທີ່ສຸດ. ຄຳຂໍຮ້ອງໃນຕອນນີ້ເຜີຍໃຫ້ເຫັນວ່າເຂົາເຈົ້າບໍ່ໄດ້ນຳເອົາຄຳແນະນຳທີ່ພະເຍຊູໃຫ້ໄວ້ໄປໃຊ້. ໜ້າເສຍດາຍທີ່ຄວາມປາຖະໜາຈະເປັນຄົນເດັ່ນດັງນັ້ນຍັງຄົງແຮງກ້າຢູ່.
ດັ່ງນັ້ນ ເພື່ອຈັດການກັບການຂັດແຍ່ງຖ້ຽວຫຼັງນີ້ ແລະຄວາມໝາງໃຈທີ່ເກີດຈາກການຂັດແຍ່ງນັ້ນ ພະເຍຊູເອີ້ນອັກຄະສາວົກ 12 ຄົນເຂົ້າມາພ້ອມກັນ. ພະອົງແນະນຳດ້ວຍຄວາມຮັກແພງວ່າ “ທ່ານທັງຫຼາຍຮູ້ຈັກວ່າອາດຍາເຈົ້ານາຍທັງຫຼາຍຂອງພວກຕ່າງປະເທດກໍຄຸມຄອງເຂົາແລະຜູ້ໃຫຍ່ທັງຫຼາຍກໍບັງຄັບເຂົາ. ໃນທ່າມກາງພວກທ່ານ ກໍຈະບໍ່ເປັນຢ່າງນັ້ນ ແຕ່ວ່າຄົນທຸກຄົນທີ່ຢາກກາຍເປັນຜູ້ໃຫຍ່ໃນທ່າມກາງພວກທ່ານ ຜູ້ນັ້ນຈະເປັນຂ້າໃຊ້ແຫ່ງທ່ານທັງຫຼາຍ. ແລະຄົນທຸກຄົນທີ່ຢາກເປັນຕົ້ນໃນທ່າມກາງພວກທ່ານ ໃຫ້ຜູ້ນັ້ນເປັນຂ້າໃຊ້ຂອງທ່ານທັງຫຼາຍເທີ້ນ.”
ພະເຍຊູໄດ້ວາງຕົວຢ່າງທີ່ເຂົາຄວນຮຽນແບບ ດັ່ງທີ່ພະອົງອະທິບາຍວ່າ “ບຸດມະນຸດເພິ່ນບໍ່ໄດ້ມາເພື່ອໃຫ້ຄົນຮັບໃຊ້ເພິ່ນ ແຕ່ມາເພື່ອຮັບໃຊ້ແລະຍອມສະລະຊີວິດເປັນຄ່າໄຖ່ຄົນຈຳນວນຫຼວງຫຼາຍ.” (ທ.ປ.) ພະເຍຊູບໍ່ພຽງແຕ່ໄດ້ປະຕິບັດຮັບໃຊ້ຜູ້ອື່ນທໍ່ນັ້ນ ແຕ່ກະທຳເຖິງຂັ້ນສະລະຊີວິດເພື່ອມະນຸດຊາດ! ພວກສາວົກຈຳເປັນຕ້ອງມີນ້ຳໃຈແບບດຽວກັບພະຄລິດໃນການປາຖະໜາຈະຮັບໃຊ້ຄົນອື່ນ ແທນທີ່ຈະໃຫ້ຄົນອື່ນມາຮັບໃຊ້ຕົນ ແລະຢາກຈະເປັນຜູ້ນ້ອຍແທນທີ່ຈະເປັນຜູ້ມີຕຳແໜ່ງສູງເດັ່ນ. ມັດທາຽ 20:17-28; ມາລະໂກ 3:17; 9:33-37; 10:32-45; ລຶກາ 18:31-34; ໂຍຮັນ 11:16.
▪ ຕອນນີ້ເປັນຫຍັງຄວາມຢ້ານຄອບງຳເຫຼົ່າສາວົກ?
▪ ພະເຍຊູກຽມເຫຼົ່າສາວົກໄວ້ສຳລັບສິ່ງທີ່ຈະເກີດຂຶ້ນຂ້າງໜ້າຢ່າງໃດ?
▪ ມີການຂໍສິ່ງໃດຈາກພະເຍຊູ ແລະອັກຄະສາວົກຄົນອື່ນໆ ຕອບສະໜອງຢ່າງໃດ?
▪ ພະເຍຊູຈັດການກັບບັນຫາໃນລະຫວ່າງບັນດາອັກຄະສາວົກຂອງພະອົງຢ່າງໃດ?