ບົດ 112
ການຮ່ວມສະຫຼອງປັດສະຄາຄັ້ງສຸດທ້າຍຂອງພະເຍຊູໃກ້ເຂົ້າມາແລ້ວ
ເມື່ອວັນອັງຄານທີ 11 ເດືອນນີຊານໃກ້ຈະຈົບລົງ ພະເຍຊູກໍສິ້ນສຸດການສັ່ງສອນອັກຄະສາວົກເທິງພູເຂົາກົກໝາກກອກ. ຖືວ່າເປັນມື້ທີ່ເຕັມໄປດ້ວຍວຽກງານແລະຄວາມຫຍຸ້ງຍາກແທ້ໆ! ຕອນນີ້ ບາງທີແມ່ນຕອນທີ່ກັບໄປຄ້າງຄືນຢູ່ບ້ານເບທະນີ ພະອົງໄດ້ບອກອັກຄະສາວົກວ່າ “ທ່ານທັງຫຼາຍຮູ້ຈັກວ່າຍັງສອງວັນອີກແລະເປັນເທສະການປັດສະຄາ ແລະບຸດມະນຸດເປັນທີ່ມອບໄວ້ໃຫ້ຄຶງໄວ້ທີ່ໄມ້ກາງເຂນ [“ຕອກໄວ້ທີ່ເສົາທໍລະມານ,” ລ.ມ.].”
ເບິ່ງຄືວ່າພະເຍຊູໄດ້ໃຊ້ມື້ຕໍ່ມາເຊິ່ງເປັນວັນພຸດທີ 12 ເດືອນນີຊານ ເພື່ອພັກຜ່ອນຢ່າງສະຫງົບກັບອັກຄະສາວົກຂອງພະອົງ. ມື້ກ່ອນ ພະອົງໄດ້ປະນາມພວກຫົວໜ້າສາສະໜາຢ່າງເປີດເຜີຍ ແລະພະອົງຮູ້ດີວ່າພວກເຂົາຫາທາງຈະສັງຫານພະອົງ. ດັ່ງນັ້ນ ມື້ວັນພຸດພະອົງຈຶ່ງບໍ່ປາກົດຕົວຢ່າງເປີດເຜີຍ ເນື່ອງຈາກພະອົງບໍ່ປະສົງໃຫ້ສິ່ງໃດມາແຊກແຊງການສະຫຼອງປັດສະຄາຂອງພະອົງກັບອັກຄະສາວົກໃນຄ່ຳຂອງມື້ຖັດໄປ.
ໃນລະຫວ່າງນັ້ນ ພວກປະໂລຫິດໃຫຍ່ແລະພວກຜູ້ເຖົ້າແກ່ໄດ້ມາປະຊຸມກັນຢູ່ລານບ້ານຂອງມະຫາປະໂລຫິດຊື່ກາອີເຟ. ເພາະຮູ້ສຶກເຈັບແຄ້ນເນື່ອງຈາກການປະນາມຂອງພະເຍຊູມື້ກ່ອນນັ້ນ ພວກເຂົາຈຶ່ງຄິດວາງແຜນເພື່ອຈະຈັບພະເຍຊູໂດຍໃຊ້ກົນອຸບາຍແລະສັ່ງໃຫ້ຂ້າພະອົງ. ພວກເຂົາຍັງເວົ້າກັນວ່າ “ຢ່າກະທຳນັ້ນໃນເວລາເທສະການຢ້ານວ່າລາສະດອນຈະເກີດວຸ່ນວາຍ.” ພວກເຂົາຢ້ານປະຊາຊົນທີ່ນິຍົມຊົມຊອບພະເຍຊູ.
ເມື່ອຫົວໜ້າສາສະໜາຮ່ວມຫົວກັນຄົບຄິດຢ່າງຊົ່ວຮ້າຍເພື່ອຂ້າພະເຍຊູຢູ່ນັ້ນ ມີຜູ້ໜຶ່ງມາຫາພວກເຂົາ. ພວກເຂົາບໍ່ຄາດຄິດວ່າຈະເປັນຄົນໜຶ່ງໃນບັນດາອັກຄະສາວົກຂອງພະເຍຊູເອງ ແມ່ນຢູດາອີດສະກາລີໂອດ ຜູ້ທີ່ຊາຕານໄດ້ຝັງຄວາມຄິດອັນຊົ່ວຊ້າໃຫ້ທໍລະຍົດຕໍ່ຜູ້ເປັນນາຍຂອງຕົນເອງ! ພວກເຂົາຮູ້ສຶກດີໃຈສ່ຳໃດເມື່ອຢູດາຖາມວ່າ “ພວກທ່ານຈະຍອມໃຫ້ເທົ່າໃດແກ່ຂ້າພະເຈົ້າ ແລະຂ້າພະເຈົ້າຈະມອບພະອົງໄວ້ແກ່ພວກທ່ານ”? ຫົວໜ້າສາສະໜາຍິນດີຕົກລົງທີ່ຈະຈ່າຍເງິນໃຫ້ລາວ 30 ແຜ່ນ ທໍ່ກັບລາຄາຂອງທາດຜູ້ໜຶ່ງຕາມພະບັນຍັດຂອງໂມເຊ. ຕັ້ງແຕ່ນັ້ນມາ ຢູດາຈຶ່ງຫາໂອກາດເພື່ອຈະມອບພະເຍຊູໃຫ້ພວກຫົວໜ້າສາສະໜາຕອນທີ່ບໍ່ມີຝູງຊົນ.
ວັນທີ 13 ເດືອນນີຊານເລີ່ມຕົ້ນເມື່ອດວງອາທິດຕົກຂອງວັນພຸດ. ພະເຍຊູເດີນທາງຈາກເມືອງເຢລິໂກມາເຖິງບ້ານເບທະນີມື້ວັນສຸກ ດັ່ງນັ້ນ ມື້ນັ້ນເປັນຄືນທີຫົກແລະຄືນສຸດທ້າຍທີ່ພະອົງພັກຢູ່ບ້ານເບທະນີ. ມື້ຕໍ່ມາ ເປັນວັນພະຫັດ ເຊິ່ງຕ້ອງເຮັດການຈັດຕຽມຂັ້ນສຸດທ້າຍສຳລັບປັດສະຄາ ເຊິ່ງຈະເລີ່ມຕົ້ນຕອນດວງອາທິດຕົກ. ນັ້ນເປັນເວລາທີ່ຕ້ອງຂ້າລູກແກະປັດສະຄາແລ້ວປິ້ງເປັນໂຕ. ເຂົາເຈົ້າຈະສະຫຼອງການລ້ຽງນັ້ນຢູ່ໃສ ແລະໃຜຈະກະກຽມການນັ້ນ?
ພະເຍຊູຍັງບໍ່ໄດ້ໃຫ້ລາຍລະອຽດເຫຼົ່ານີ້ ບາງທີອາດຈະປ້ອງກັນບໍ່ໃຫ້ຢູດາໄປແຈ້ງປະໂລຫິດໃຫຍ່ເພື່ອບໍ່ໃຫ້ພວກເຂົາມາຈັບພະເຍຊູລະຫວ່າງການສະຫຼອງປັດສະຄາ. ບັດນີ້ ຄົງຈະເປັນຕອນເລີ່ມບ່າຍຂອງວັນພະຫັດ ພະເຍຊູໄດ້ສົ່ງເປໂຕແລະໂຍຮັນອອກຈາກບ້ານເບທະນີໂດຍກ່າວວ່າ “ຈົ່ງໄປຈັດແຈ່ງປັດສະຄາເພື່ອເຮົາທັງຫຼາຍຈະໄດ້ກິນ.”
ເຂົາເຈົ້າຖາມວ່າ “ພະອົງຢາກໄດ້ຫມູ່ຂ້າພະເຈົ້າຈັດແຈ່ງປັດສະຄາຢູ່ທີ່ໃດ”?
ພະເຍຊູຊີ້ແຈງວ່າ “ເວລາທ່ານທັງສອງຈະໄດ້ເຂົ້າໄປໃນເມືອງແລ້ວ ມີຄົນຜູ້ໜຶ່ງຖືໄຫນ້ຳຈະມາຕ້ອນຮັບທ່ານທັງສອງ ຈົ່ງຕາມເພິ່ນໄປໃນເຮືອນທີ່ເພິ່ນຈະເຂົ້າໄປເທີ້ນ. ແລະທ່ານທັງສອງຈະກ່າວແກ່ຜູ້ເຈົ້າເຮືອນນັ້ນວ່າ ພະອາຈານບອກທ່ານວ່າ ຫ້ອງສຳລັບແຂກທີ່ເຮົາຈະກິນປັດສະຄາກັບພວກລູກສິດຂອງເຮົາຢູ່ທີ່ໃດ. ແລະເຈົ້າເຮືອນເອງຈະຊີ້ໃຫ້ທ່ານທັງສອງເຫັນຫ້ອງໃຫຍ່ຊັ້ນເທິງຕົກແຕ່ງແລ້ວ ທີ່ນັ້ນຈົ່ງຈັດແຈ່ງປັດສະຄາໄວ້.”
ເຈົ້າຂອງເຮືອນຄົງຈະເປັນສາວົກຂອງພະເຍຊູເຊິ່ງອາດຄາດໝາຍວ່າພະເຍຊູຈະຂໍໃຊ້ເຮືອນຂອງລາວເພື່ອໂອກາດອັນພິເສດນີ້. ຢ່າງໃດກໍຕາມ ເມື່ອເປໂຕແລະໂຍຮັນຮອດເມືອງເຢຣຶຊາເລມ ເຂົາເຈົ້າພົບທຸກສິ່ງທຸກຢ່າງເປັນໄປຕາມທີ່ພະເຍຊູບອກໄວ້ລ່ວງໜ້າ. ດັ່ງນັ້ນ ເຂົາເຈົ້າສອງຄົນຈຶ່ງຈັດແຈ່ງລູກແກະໄວ້ ແລະກະກຽມສິ່ງຈຳເປັນທັງໝົດສຳລັບຜູ້ສະຫຼອງປັດສະຄາ 13 ຄົນ ມີພະເຍຊູແລະອັກຄະສາວົກ 12 ຄົນຂອງພະອົງ. ມັດທາຽ 26:1-5, 14-19; ມາລະໂກ 14:1, 2, 10-16; ລຶກາ 22:1-13; ອຸປະຍົກໜີ 21:32.
▪ ໃນວັນພຸດເບິ່ງຄືວ່າພະເຍຊູເຮັດຫຍັງ ແລະເພາະເຫດໃດ?
▪ ຢູ່ເຮືອນຂອງປະໂລຫິດໃຫຍ່ມີການຈັດການປະຊຸມຫຍັງຂຶ້ນ ແລະຢູດາໄປຫາພວກຫົວໜ້າສາສະໜາເພື່ອຈຸດປະສົງຫຍັງ?
▪ ພະເຍຊູໃຊ້ໃຜເຂົ້າໄປໃນເມືອງເຢຣຶຊາເລມໃນວັນພະຫັດ ແລະດ້ວຍຈຸດມຸ່ງໝາຍອັນໃດ?
▪ ຄົນເຫຼົ່ານັ້ນທີ່ຖືກໃຊ້ໄປ ໄດ້ພົບເຫັນສິ່ງໃດທີ່ເປີດເຜີຍເຖິງອຳນາດອັນມະຫັດສະຈັນຂອງພະເຍຊູ?