ບົດຮຽນ 6
ລາຊະອານາຈັກຂອງພະເຈົ້າແມ່ນຫຍັງ?
ລາຊະອານາຈັກຂອງພະເຈົ້າຕັ້ງຢູ່ໃສ? (1)
ໃຜເປັນກະສັດ? (2)
ມີຄົນອື່ນຮ່ວມການປົກຄອງກັບກະສັດອົງນັ້ນບໍ? ຖ້າມີ ມີຈັກຄົນ? (3)
ມີຫຍັງແດ່ສະແດງວ່າເຮົາພວມມີຊີວິດຢູ່ໃນສະໄໝສຸດທ້າຍ? (4)
ລາຊະອານາຈັກຂອງພະເຈົ້າຈະກະທຳສິ່ງໃດສຳລັບມະນຸດຊາດໃນອະນາຄົດ? (5-7)
1. ເມື່ອພະອົງຢູ່ເທິງແຜ່ນດິນໂລກ ພະເຍຊູໄດ້ສອນເຫຼົ່າສາວົກຂອງພະອົງໃຫ້ອະທິດຖານຂໍລາຊະອານາຈັກຂອງພະເຈົ້າ. ລາຊະອານາຈັກຄືລັດຖະບານຊຶ່ງມີກະສັດເປັນປະມຸກ. ລາຊະອານາຈັກຂອງພະເຈົ້າເປັນລັດຖະບານພິເສດ. ລັດຖະບານນີ້ຖືກຕັ້ງໃນສະຫວັນແລະຈະປົກຄອງເໜືອແຜ່ນດິນໂລກນີ້. ລັດຖະບານນີ້ຈະກະທຳໃຫ້ນາມຊື່ຂອງພະເຈົ້າເປັນທີ່ນັບຖືອັນບໍລິສຸດຫຼືເຮັດໃຫ້ສັກສິດ. ລາຊະອານາຈັກນີ້ຈະກະທຳໃຫ້ນ້ຳພະໄທຂອງພະເຈົ້າເປັນທີ່ສຳເລັດເທິງແຜ່ນດິນໂລກເຊັ່ນດຽວກັນກັບທີ່ສຳເລັດໃນສະຫວັນ.—ມັດທາຍ 6:9, 10.
2. ພະເຈົ້າໄດ້ສັນຍາໄວ້ແລ້ວວ່າ ພະເຍຊູຈະເປັນກະສັດແຫ່ງລາຊະອານາຈັກຂອງພະອົງ. (ລຶກາ 1:30-33) ເມື່ອພະເຍຊູຢູ່ເທິງແຜ່ນດິນໂລກ ພະອົງພິສູດວ່າພະອົງຈະເປັນຜູ້ປົກຄອງທີ່ກະລຸນາ ຍຸຕິທຳ ແລະສົມບູນ. ເມື່ອພະອົງກັບຄືນສູ່ສະຫວັນ ພະອົງບໍ່ໄດ້ຖືກແຕ່ງຕັ້ງເປັນກະສັດແຫ່ງລາຊະອານາຈັກຂອງພະເຈົ້າທັນທີ. (ເຫບເລິ 10:12, 13) ໃນປີ 1914 ພະເຢໂຫວາໄດ້ປະທານລາຊະອຳນາດແກ່ພະເຍຊູຕາມທີ່ພະອົງໄດ້ປະຕິຍານໄວ້ຕໍ່ພະອົງ. ຕັ້ງແຕ່ເວລານັ້ນເປັນຕົ້ນມາ ພະເຍຊູດຳເນີນການປົກຄອງໃນສະຫວັນຖານະກະສັດທີ່ພະເຢໂຫວາໄດ້ແຕ່ງຕັ້ງ.—ດານຽນ 7:13, 14.
3. ພະເຢໂຫວາໄດ້ເລືອກມະນຸດຊາຍແລະຍິງທີ່ສັດຊື່ບາງຄົນຈາກແຜ່ນດິນໂລກນີ້ໃຫ້ໄປສະຫວັນດ້ວຍ. ພວກເຂົາຈະປົກຄອງກັບພະເຍຊູໃນຖານະເປັນກະສັດ ເປັນຜູ້ຕັດສິນ ແລະເປັນປະໂລຫິດເໜືອມະນຸດຊາດ. (ລຶກາ 22:28-30; ຄຳປາກົດ 5:9, 10) ພະເຍຊູເອີ້ນຜູ້ຮ່ວມການປົກຄອງເຫຼົ່ານີ້ໃນລາຊະອານາຈັກຂອງພະອົງວ່າ “ຝູງນ້ອຍ.” ພວກເຂົາມີຈຳນວນ 144,000 ຄົນ.—ລຶກາ 12:32; ຄຳປາກົດ 14:1-3.
4. ທັນທີຫຼັງຈາກພະເຍຊູຖືກແຕ່ງຕັ້ງເປັນກະສັດ ພະອົງໄດ້ຖິ້ມຊາຕານແລະພວກທູດສະຫວັນຊົ່ວຮ້າຍອອກຈາກສະຫວັນລົງມາບໍລິເວນຂອງແຜ່ນດິນໂລກ. ນີ້ຄືສາເຫດທີ່ສິ່ງຕ່າງໆ ເທິງແຜ່ນດິນໂລກນີ້ກາຍເປັນເລວຮ້າຍເຫຼືອເກີນຕັ້ງແຕ່ປີ 1914 ເປັນຕົ້ນມາ. (ຄຳປາກົດ 12:9, 12) ສົງຄາມ ຄວາມອຶດຢາກ ໂລກລະບາດ ການລະເລີຍກົດໝາຍທະວີຂຶ້ນ—ສິ່ງທັງໝົດເຫຼົ່ານີ້ເປັນສ່ວນຂອງ “ເຄື່ອງໝາຍ” ຫຼື “ສັນຍະລັກ” ທີ່ສະແດງວ່າ ພະເຍຊູພວມປົກຄອງຢູ່ແລະລະບົບນີ້ຕົກຢູ່ໃນສະໄໝສຸດທ້າຍຂອງມັນ.—ມັດທາຍ 24:3, 7, 8, 12; ລຶກາ 21:10, 11; 2 ຕີໂມເຕ 3:1-5.
5. ອີກບໍ່ດົນພະເຍຊູຈະພິພາກສາຜູ້ຄົນ ຄືກັບຜູ້ລ້ຽງແກະແຍກຝູງແກະອອກຈາກຝູງແບ້. “ຝູງແກະ” ແມ່ນຄົນເຫຼົ່ານັ້ນທີ່ໄດ້ພິສູດຕົນວ່າເປັນໄພ່ຟ້າປະຊາກອນທີ່ສັດຊື່ຂອງພະອົງ. ພວກເຂົາຈະໄດ້ຮັບຊີວິດນິລັນດອນເທິງແຜ່ນດິນໂລກ. ພວກ “ແບ້” ແມ່ນຄົນເຫຼົ່ານັ້ນຜູ້ທີ່ໄດ້ປະຕິເສດລາຊະອານາຈັກຂອງພະເຈົ້າ. (ມັດທາຍ 25:31-34, 46) ໃນອະນາຄົດອັນໃກ້ນີ້ ພະເຍຊູຈະທຳລາຍຄົນເໝືອນຢ່າງແບ້ທັງໝົດ. (2 ເທຊະໂລນີກ 1:6-9) ຫາກວ່າທ່ານຢາກເປັນຄົນນຶ່ງໃນ “ແກະ” ຂອງພະເຍຊູ ທ່ານຕ້ອງຮັບຟັງຂ່າວສານເລື່ອງລາຊະອານາຈັກແລະລົງມືປະຕິບັດຕາມສິ່ງທີ່ທ່ານຮຽນຮູ້.—ມັດທາຍ 24:14.
6. ປັດຈຸບັນນີ້ແຜ່ນດິນໂລກຖືກແບ່ງແຍກເປັນຫຼາຍປະເທດ. ແຕ່ລະປະເທດມີລັດຖະບານຂອງຕົນເອງ. ຫຼາຍເທື່ອປະຊາຊາດເຫຼົ່ານີ້ຕໍ່ສູ້ກັນ. ແຕ່ລາຊະອານາຈັກຂອງພະເຈົ້າຈະມາແທນທີ່ລັດຖະບານທັງປວງຂອງມະນຸດ. ລາຊະອານາຈັກນີ້ຈະປົກຄອງໃນຖານະລັດຖະບານດຽວເທົ່ານັ້ນເໜືອແຜ່ນດິນໂລກທັງສິ້ນ. (ດານຽນ 2:44) ໃນສະໄໝນັ້ນສົງຄາມ, ອາດຊະຍາກຳ, ແລະຄວາມຮຸນແຮງຈະບໍ່ມີອີກຕໍ່ໄປ. ໄພ່ຟ້າປະຊາກອນທັງປວງຈະຢູ່ຮ່ວມກັນດ້ວຍຄວາມສະຫງົບສຸກ ແລະເປັນເອກະພາບ.—ມີເກ 4:3, 4.
7. ລະຫວ່າງສະໄໝການປົກຄອງພັນປີຂອງພະເຍຊູ ມະນຸດທີ່ສັດຊື່ຈະກາຍເປັນຄົນສົມບູນ ແລະແຜ່ນດິນໂລກທັງໂລກຈະກາຍເປັນອຸດທະຍານ. ເມື່ອເຖິງສິ້ນພັນປີແລ້ວ ພະເຍຊູຈະເຮັດໃຫ້ສຳເລັດທຸກສິ່ງຕາມທີ່ພະເຈົ້າປະສົງໃຫ້ພະອົງກະທຳ. ຫຼັງຈາກນັ້ນພະອົງກໍ່ຈະມອບລາຊະອານາຈັກຄືນໃຫ້ແກ່ພະບິດາຂອງພະອົງ. (1 ໂກລິນໂທ 15:24) ເປັນຫຍັງຈຶ່ງບໍ່ບອກພວກຫມູ່ເພື່ອນແລະຜູ້ທີ່ທ່ານຮັກເຖິງສິ່ງທີ່ລາຊະອານາຈັກຂອງພະເຈົ້າຈະກະທຳ?
[ຮູບພາບໜ້າ 13]
ພາຍໃຕ້ການປົກຄອງຂອງພະເຍຊູ ຈະບໍ່ມີຄວາມກຽດຊັງຫຼືການລຳອຽງ