ບົດຮຽນ 7
ການເຂົ້າໃກ້ພະຜູ້ສ້າງດ້ວຍການອະທິດຖານ
ເປັນຫຍັງຈຶ່ງສຳຄັນທີ່ຈະອະທິດຖານເປັນປະຈຳ? (1)
ເຮົາຄວນອະທິດຖານເຖິງຜູ້ໃດ? ແລະຢ່າງໃດ? (2, 3)
ເລື່ອງຫຍັງທີ່ນັບວ່າເໝາະສົມສຳລັບການອະທິດຖານ? (4)
ທ່ານຄວນອະທິດຖານເມື່ອໃດ? (5, 6)
ພະເຈົ້າສະດັບຄຳອະທິດຖານທຸກຢ່າງບໍ? (7)
1. ການອະທິດຖານຄືການທູນຕໍ່ພະເຈົ້າດ້ວຍຄວາມຖ່ອມໃຈ. ທ່ານຄວນອະທິດຖານເຖິງພະເຈົ້າເປັນປະຈຳ. ດ້ວຍວິທີນີ້ທ່ານສາມາດຮູ້ສຶກໃກ້ຊິດກັບພະອົງເໝືອນກັບເພື່ອນທີ່ຮັກແພງຄົນນຶ່ງ. ພະເຢໂຫວາເປັນພະເຈົ້າອົງຍິ່ງໃຫຍ່ແລະເຕັມໄປດ້ວຍພະລັງອຳນາດ ເຖິງຢ່າງນັ້ນກໍ່ດີພະອົງຍັງສະດັບຄຳອະທິດຖານຂອງເຮົາ! ທ່ານອະທິດຖານເຖິງພະເຈົ້າເປັນປະຈຳບໍ?—ຄຳເພງ 65:2; 1 ເທຊະໂລນີກ 5:17.
2. ການອະທິດຖານເປັນສ່ວນຂອງການນະມັດສະການຂອງເຮົາ. ດ້ວຍເຫດນີ້ ເຮົາຄວນອະທິດຖານເຖິງພະເຢໂຫວາພະເຈົ້າເທົ່ານັ້ນ. ເມື່ອພະເຍຊູຢູ່ເທິງແຜ່ນດິນໂລກ ພະອົງອະທິດຖານເຖິງພະບິດາຂອງພະອົງສະເໝີ ບໍ່ແມ່ນເຖິງພະອົງອື່ນ. ເຮົາຄວນເຮັດເຊັ່ນດຽວກັນ. (ມັດທາຍ 4:10; 6:9) ຢ່າງໃດກໍ່ດີ ການອະທິດຖານທັງໝົດຂອງເຮົາຄວນກ່າວໃນນາມຂອງພະເຍຊູ. ການເຮັດດັ່ງນີ້ສະແດງວ່າເຮົານັບຖືຕຳແໜ່ງຂອງພະເຍຊູແລະເຮົາມີຄວາມເຊື່ອໃນເຄື່ອງບູຊາໄຖ່ຂອງພະອົງ.—ໂຍຮັນ 14:6; 1 ໂຍຮັນ 2:1, 2.
3. ເມື່ອເຮົາອະທິດຖານເຮົາຄວນທູນກັບພະເຈົ້າຈາກຫົວໃຈເຮົາ. ເຮົາບໍ່ຄວນຈະທ່ອງຈົ່ມຫຼືອ່ານຄຳອະທິດຖານຈາກປຶ້ມທີ່ມີຄຳອະທິດຖານບັນທຶກໄວ້. (ມັດທາຍ 6:7, 8) ເຮົາສາມາດອະທິດຖານດ້ວຍທ່າທາງໃດກໍ່ໄດ້ທີ່ສະແດງຄວາມນັບຖື ໃນເວລາໃດກໍ່ໄດ້ ແລະໃນສະຖານທີ່ໃດກໍ່ໄດ້. ພະເຈົ້າສາມາດໄດ້ຍິນແມ່ນວ່າຄຳອະທິດຖານທີ່ກ່າວໄວ້ໃນໃຈຂອງເຮົາ. (1 ຊາເມິອນ 1:12, 13) ເປັນການດີທີ່ຈະຫາບ່ອນທີ່ສະຫງົບຫ່າງຈາກຄົນອື່ນໆ ເພື່ອກ່າວຄຳອະທິດຖານສ່ວນຕົວຂອງເຮົາ.—ມາລະໂກ 1:35.
4. ທ່ານອາດອະທິດຖານກ່ຽວກັບເລື່ອງໃດໄດ້? ເລື່ອງໃດກໍ່ໄດ້ທີ່ອາດສົ່ງຜົນກະທົບເຖິງສາຍສຳພັນຂອງທ່ານກັບພະອົງ. (ຟີລິບ 4:6, 7) ຄຳອະທິດຖານແບບຢ່າງນັ້ນສະແດງວ່າ ເຮົາຄວນອະທິດຖານກ່ຽວກັບພະນາມແລະພະປະສົງຂອງພະເຢໂຫວາ. ນອກຈາກນີ້ ເຮົາອາດຂໍໃຫ້ມີການຈັດຕຽມສິ່ງຈຳເປັນດ້ານວັດຖຸສຳລັບພວກເຮົາ, ການອະໄພບາບທີ່ເຮົາເຮັດ, ແລະຂໍຄວາມຊ່ວຍເຫຼືອເພື່ອຕ້ານທານການຍົວະຍວນ. (ມັດທາຍ 6:9-13) ຄຳອະທິດຖານຂອງເຮົາບໍ່ຄວນເປັນແບບເຫັນແກ່ຕົວ. ເຮົາຄວນອະທິດຖານຂໍສິ່ງທີ່ປະສານກັບພະໄທປະສົງຂອງພະເຈົ້າ.—1 ໂຍຮັນ 5:14.
5. ທ່ານອາດອະທິດຖານເມື່ອໃດກໍ່ໄດ້ທີ່ຫົວໃຈຂອງທ່ານກະຕຸ້ນທ່ານໃຫ້ຂອບຄຸນຫຼືສັນລະເສີນພະເຈົ້າ. (1 ຂ່າວຄາວ 29:10-13) ທ່ານຄວນອະທິດຖານເມື່ອທ່ານມີບັນຫາແລະຄວາມເຊື່ອຂອງທ່ານພວມຖືກທົດລອງ. (ຄຳເພງ 55:22; 120:1) ເປັນການເໝາະສົມທີ່ຈະອະທິດຖານກ່ອນທ່ານກິນອາຫານ. (ມັດທາຍ 14:19) ພະເຢໂຫວາເຊື້ອເຊີນເຮົາໃຫ້ອະທິດຖານ “ທຸກເວລາ.”—ເອເຟດ 6:18.
6. ເຮົາຈຳເປັນຕ້ອງອະທິດຖານໂດຍສະເພາະຫາກວ່າເຮົາໄດ້ເຮັດຄວາມບາບຮ້າຍແຮງ. ໃນເວລາຢ່າງນັ້ນເຮົາຄວນອ້ອນວອນຂໍຄວາມເມດຕາແລະການອະໄພຍະໂທດຈາກພະເຢໂຫວາ. ຫາກເຮົາສາລະພາບການບາບຂອງເຮົາຕໍ່ພະອົງແລະພະຍາຍາມສຸດກຳລັງເພື່ອບໍ່ເຮັດບາບນັ້ນຊ້ຳອີກ ພະເຈົ້າ “ມີໃຈພ້ອມຈະຍົກຜິດ.”—ຄຳເພງ 86:5; ສຸພາສິດ 28:13.
7. ພະເຢໂຫວາສະດັບຄຳອະທິດຖານອ້ອນວອນຂອງຄົນຊອບທຳເທົ່ານັ້ນ. ເພື່ອພະເຢໂຫວາຈະສະດັບຄຳອະທິດຖານຂອງທ່ານ ທ່ານຕ້ອງພະຍາຍາມເຕັມຄວາມສາມາດທີ່ຈະດຳເນີນຊີວິດຕາມກົດໝາຍຂອງພະອົງ. (ສຸພາສິດ 15:29; 28:9) ທ່ານຕ້ອງຖ່ອມຕົວເມື່ອທ່ານອະທິດຖານ. (ລຶກາ 18:9-14) ທ່ານຈຳເປັນຕ້ອງພະຍາຍາມເຮັດຕາມທີ່ປະສານກັບສິ່ງທີ່ທ່ານອະທິດຖານຂໍນັ້ນ. ດ້ວຍວິທີນີ້ທ່ານຈະພິສູດວ່າທ່ານມີຄວາມເຊື່ອແລະທ່ານໝາຍຄວາມຕາມທີ່ທ່ານໄດ້ກ່າວຂໍແທ້ໆ . ພະເຢໂຫວາຈະຕອບຄຳອະທິດຖານຂອງທ່ານ ສະເພາະແຕ່ເມື່ອເຮັດຢ່າງນີ້ເທົ່ານັ້ນ.—ເຫບເລິ 11:6.