ບົດຮຽນ 10
ກິດປະຕິບັດຕ່າງໆທີ່ພະຜູ້ສ້າງກຽດຊັງ
ທ່ານຄວນຮູ້ສຶກຢ່າງໃດກ່ຽວກັບສິ່ງທີ່ພະເຈົ້າຕັດວ່າບໍ່ດີ? (1)
ການປະພຶດທາງເພດແບບໃດທີ່ນັບວ່າຜິດ? (2)
ຄລິດສະຕຽນຄວນມີທັດສະນະຢ່າງໃດຕໍ່ການຕົວະ? (3) ການຫຼິ້ນການພະນັນ? (3) ການລັກຂະໂມຍ? (3) ຄວາມຮຸນແຮງ? (4) ລັດທິພູດຜີສາດ? (5) ການເມົາເຫຼົ້າ? (6)
ຄົນເຮົາຈະຫລຸດພົ້ນຈາກນິດໄສແລະການປະຕິບັດທີ່ບໍ່ດີໄດ້ຢ່າງໃດ? (7)
1. ຜູ້ຮັບໃຊ້ຂອງພະເຈົ້າຮັກສິ່ງທີ່ດີ. ແຕ່ພວກເຂົາຕ້ອງຮຽນຮູ້ທີ່ຈະກຽດຊັງສິ່ງທີ່ຊົ່ວດ້ວຍ. (ຄຳເພງ 97:10) ນັ້ນໝາຍເຖິງການຫຼີກລ້ຽງກິດປະຕິບັດບາງຢ່າງທີ່ພະເຈົ້າກຽດຊັງ. ກິດປະຕິບັດເຫຼົ່ານັ້ນມີຫຍັງແດ່?
2. ການລ່ວງປະເວນີ: ການຮ່ວມເພດກ່ອນການແຕ່ງດອງ ການຫຼິ້ນຊູ້ ການຮ່ວມເພດກັບສັດ ການຮ່ວມເພດກັບລູກໆ ຫຼືຍາດໃກ້ຊິດ ແລະການຮັກຮ່ວມເພດດຽວກັນ ທັງໝົດນີ້ເປັນການເຮັດບາບຮ້າຍແຮງຕໍ່ພະເຈົ້າ. (ລະບຽບການພວກເລວີ 18:6; ໂລມ 1:26, 27; 1 ໂກລິນໂທ 6:9, 10) ຖ້າຊາຍຍິງບໍ່ໄດ້ແຕ່ງດອງກັນແຕ່ຢູ່ກິນດ້ວຍກັນ ພວກເຂົາຄວນແຍກກັນຢູ່ຫຼືບໍ່ຢ່າງນັ້ນກໍ່ໃຫ້ແຕ່ງດອງຖືກຕ້ອງຕາມກົດໝາຍ.—ເຫບເລິ 13:4.
3. ການເວົ້າຕົວະ ການຫຼິ້ນການພະນັນ ການລັກຂະໂມຍ: ພະເຢໂຫວາພະເຈົ້າເວົ້າຄຳຕົວະບໍ່ໄດ້. (ຕິໂຕ 1:2) ຄົນໃດທີ່ຕ້ອງການຄວາມເຫັນຊອບຈາກພະອົງຕ້ອງຫຼີກລ້ຽງການເວົ້າຕົວະ. (ສຸພາສິດ 6:16-19; ໂກໂລດ 3:9, 10) ການຫຼິ້ນການພະນັນທຸກຮູບແບບກ່ຽວຂ້ອງກັບຄວາມໂລບ. ດັ່ງນັ້ນ ຄລິດສະຕຽນບໍ່ເຂົ້າໄປມີສ່ວນຮ່ວມໃນການຫຼິ້ນການພະນັນແມ່ນວ່າເປັນຊະນິດໃດ ເຊັ່ນການຫຼິ້ນຫວຍລອດເຕິລີ ການແຂ່ງມ້າ ແລະການຫຼິ້ນບິງໂກ. (ເອເຟດ 5:3-5) ແລະຄລິດສະຕຽນບໍ່ລັກຂະໂມຍ. ພວກເຂົາບໍ່ຊື້ເຄື່ອງຂອງທີ່ຮູ້ຢູ່ວ່າຖືກຂະໂມຍມາຫຼືບໍ່ເອົາເຄື່ອງຂອງໃດໆ ໄປໂດຍບໍ່ໄດ້ຮັບອະນຸຍາດ.—ອຸປະຍົກໜີ 20:15; ເອເຟດ 4:28.
4. ຄວາມໂມໂຫຮ້າຍ, ຄວາມຮຸນແຮງ: ຄວາມໂມໂຫຮ້າຍຢ່າງບໍ່ບັງຄັບຕົນສາມາດນຳໄປສູ່ການເຮັດຮຸນແຮງໄດ້. (ຕົ້ນເດິມ 4:5-8) ຄົນທີ່ມັກຄວາມຮຸນແຮງຈະເປັນເພື່ອນກັບພະເຈົ້າບໍ່ໄດ້. (ຄຳເພງ 11:5; ສຸພາສິດ 22:24, 25) ເປັນການຜິດທີ່ຈະແກ້ແຄ້ນຫຼືເຮັດຊົ່ວຕອບແທນຄວາມຊົ່ວທີ່ຄົນອື່ນອາດເຮັດຕໍ່ເຮົາ.—ສຸພາສິດ 24:29; ໂລມ 12:17-21.
5. ເວດມົນຄາຖາ ແລະລັດທິພູດຜີສາດ: ບາງຄົນຮ້ອງຂໍອຳນາດພູດຜີສາດເພື່ອພະຍາຍາມປິ່ນປົວຄວາມເຈັບປ່ວຍໃຫ້ຫາຍ. ຄົນອື່ນໃຊ້ເວດມົນຄາຖາສາບແຊ່ງສັດຕູຂອງຕົນເພື່ອເຮັດໃຫ້ເຂົາເຈັບປ່ວຍຫຼືເຖິງກັບຂ້າເຂົາ. ຜູ້ມີອຳນາດຊຶ່ງຢູ່ເບື້ອງຫຼັງກິດປະຕິບັດເຫຼົ່ານີ້ແມ່ນຊາຕານ. ດັ່ງນັ້ນ ຄລິດສະຕຽນຕ້ອງບໍ່ເຂົ້າໄປມີສ່ວນຮ່ວມໃນສິ່ງເຫຼົ່ານີ້ບໍ່ວ່າຊະນິດໃດ. (ພະບັນຍັດຕິທີ2 18:9-13) ການຢູ່ໃກ້ຊິດກັບພະເຢໂຫວາສະເໝີເປັນການປົກປ້ອງທີ່ດີທີ່ສຸດເພື່ອບໍ່ໃຫ້ຖືກເວດມົນຄາຖາທີ່ຄົນອື່ນອາດໃຊ້ທຳຮ້າຍເຮົາ.—ສຸພາສິດ 18:10.
6. ການເມົາເຫຼົ້າ: ບໍ່ຜິດທີ່ຈະດື່ມເຫຼົ້າອະງຸ່ນ, ເຫຼົ້າເບຍ, ຫຼືເຄື່ອງດື່ມອື່ນໆ ທີ່ມີເຫຼົ້ານ້ອຍນຶ່ງ. (ຄຳເພງ 104:15; 1 ຕີໂມເຕ 5:23) ແຕ່ການດື່ມຈັດ ແລະການເມົາເຫຼົ້າເປັນການຜິດໃນສາຍຕາພະເຈົ້າ. (1 ໂກລິນໂທ 5:11-13; 1 ຕີໂມເຕ 3:8) ການດື່ມຫຼາຍເກີນໄປສາມາດທຳລາຍສຸຂະພາບແລະເຮັດໃຫ້ຄອບຄົວຂອງທ່ານແຕກແຍກໄດ້. ມັນອາດເຮັດໃຫ້ທ່ານຍອມແພ້ຢ່າງງ່າຍເມື່ອມີການຍົວະຍວນອື່ນໆ ເກີດຂຶ້ນ.—ສຸພາສິດ 23:20, 21, 29-35.
7. ຜູ້ຄົນທີ່ເຮັດສິ່ງທີ່ພະເຈົ້າຕັດວ່າຊົ່ວຈະ “ບໍ່ຮັບລາຊະອານາຈັກຂອງພະເຈົ້າເປັນມໍລະດົກ.” (ຄາລາຊີ 5:19-21, ລ.ມ.) ຖ້າທ່ານຮັກພະເຈົ້າອີ່ຫຼີແລະຢາກເຮັດໃຫ້ພະອົງເຫັນຊອບ ທ່ານຈະຫລຸດພົ້ນຈາກກິດປະຕິບັດເຫຼົ່ານີ້ໄດ້. (1 ໂຍຮັນ 5:3) ຈົ່ງຮຽນຮູ້ທີ່ຈະກຽດຊັງສິ່ງທີ່ພະເຈົ້າກ່າວວ່າເປັນສິ່ງຊົ່ວ. (ໂລມ 12:9) ຈົ່ງຄົບຫາສະມາຄົມກັບຜູ້ຄົນທີ່ມີນິດໄສທີ່ພະເຈົ້າພໍພະໄທ. (ສຸພາສິດ 13:20) ເພື່ອນຄລິດສະຕຽນຜູ້ອາວຸໂສອາດເປັນແຫຼ່ງໃຫ້ຄວາມຊ່ວຍເຫຼືອໄດ້. (ຍາໂກໂບ 5:14) ສຳຄັນທີ່ສຸດຄື ຈົ່ງໝາຍເພິ່ງຄວາມຊ່ວຍເຫຼືອຈາກພະເຢໂຫວາໂດຍການອະທິດຖານ.—ຟີລິບ 4:6, 7, 13.
[ຮູບພາບໜ້າ 20, 21]
ພະເຈົ້າກຽດຊັງ ການເມົາເຫຼົ້າ ການລັກຂະໂມຍ ການຫຼິ້ນການພະນັນ ແລະການກະທຳທີ່ຮຸນແຮງ