ບົດຮຽນ 9
ໃຜແມ່ນເພື່ອນຂອງພະເຈົ້າ?
ພະເຍຊູຄລິດແມ່ນພະບຸດຂອງພະເຢໂຫວາແລະແມ່ນເພື່ອນທີ່ໃກ້ຊິດທີ່ສຸດແລະຜູ້ທີ່ພະອົງຮັກທີ່ສຸດ. ກ່ອນທີ່ພະເຍຊູມີຊີວິດໃນຖານະເປັນມະນຸດຢູ່ເທິງແຜ່ນດິນໂລກ ພະເຍຊູມີຊີວິດຢູ່ເທິງສະຫວັນໃນຖານະບຸກຄົນກາຍວິນຍານທີ່ມີອຳນາດ. (ໂຍຮັນ 17:5) ຈາກນັ້ນພະອົງສະເດັດມາແຜ່ນດິນໂລກເພື່ອສອນປະຊາຊົນກ່ຽວກັບພະເຈົ້າ. (ໂຍຮັນ 18:37) ພະອົງຍັງໄດ້ປະທານຊີວິດມະນຸດຂອງພະອົງເພື່ອຊ່ວຍມະນຸດທີ່ເຊື່ອຟັງໃຫ້ພົ້ນຈາກຄວາມບາບແລະຄວາມຕາຍ. (ໂລມ 6:23) ປັດຈຸບັນນີ້ພະເຍຊູເປັນພະມະຫາກະສັດແຫ່ງລາຊະອານາຈັກຂອງພະເຈົ້າ ຊຶ່ງເປັນລັດຖະບານທາງພາກສະຫວັນທີ່ຈະນຳເອົາອຸທິຍານມາສູ່ແຜ່ນດິນໂລກ.—ຄຳປາກົດ 19:16.
ເຫຼົ່າທູດສະຫວັນແມ່ນເພື່ອນຂອງພະເຈົ້າດ້ວຍ. ເຫຼົ່າທູດສະຫວັນບໍ່ໄດ້ເລີ່ມຕົ້ນຊີວິດຂອງພວກເຂົາໃນຖານະມະນຸດຢູ່ເທິງແຜ່ນດິນໂລກ. ພວກເຂົາຖືກສ້າງຂຶ້ນຢູ່ເທິງສະຫວັນກ່ອນທີ່ພະເຈົ້າໄດ້ສ້າງແຜ່ນດິນໂລກ. (ໂຢບ 38:4-7) ມີທູດສະຫວັນຈຳນວນລ້ານໆອົງ. (ດານຽນ 7:10) ເພື່ອນຂອງພະເຈົ້າທາງພາກສະຫວັນເຫຼົ່ານີ້ຕ້ອງການໃຫ້ຜູ້ຄົນຮຽນຮູ້ຄວາມຈິງກ່ຽວກັບພະເຢໂຫວາ.—ຄຳປາກົດ 14:6, 7.
ພະເຈົ້າມີເພື່ອນຢູ່ເທິງແຜ່ນດິນໂລກດ້ວຍ. ພະອົງເອີ້ນພວກເຂົາວ່າເຫຼົ່າພະຍານຂອງພະອົງ. ພະຍານຢູ່ໃນສານບອກສິ່ງທີ່ເຂົາຮູ້ກ່ຽວກັບບາງຄົນຫຼືບາງສິ່ງ. ພະຍານພະເຢໂຫວາບອກຄົນອື່ນໃນສິ່ງທີ່ພວກເຂົາຮູ້ກ່ຽວກັບພະເຢໂຫວາແລະພະປະສົງຂອງພະອົງ. (ເອຊາອີ 43:10) ຄືກັນກັບເຫຼົ່າທູດສະຫວັນ ເຫຼົ່າພະຍານຕ້ອງການຊ່ວຍທ່ານຮຽນຮູ້ຄວາມຈິງກ່ຽວກັບພະເຢໂຫວາ. ພວກເຂົາຢາກໃຫ້ທ່ານເປັນເພື່ອນຂອງພະເຈົ້າເຊັ່ນກັນ.