ບົດທີ 45
ລາຊະອານາຈັກຂອງພະເຈົ້າແມ່ນຫຍັງ? ວິທີທີ່ສະແດງວ່າເຮົາຕ້ອງການລາຊະອານາຈັກນັ້ນ
ລູກຮູ້ຈັກຄຳອະທິດຖານທີ່ພະເຍຊູສອນພວກລູກສິດຂອງພະອົງບໍ?— ຖ້າບໍ່ຮູ້ ເຮົາສາມາດອ່ານຈາກພະຄຳພີນຳກັນໃນມັດທາຍ 6:9-13. ຄຳອະທິດຖານທີ່ຫຼາຍຄົນເອີ້ນວ່າຄຳອະທິດຖານຂອງພະອົງເຈົ້າ ເຊິ່ງລວມເອົາຂໍ້ຄວາມທີ່ວ່າ “ຂໍໃຫ້ແຜ່ນດິນ [“ລາຊະອານາຈັກ,” ລ.ມ.] ຂອງພະອົງມາຕັ້ງຢູ່.” ລູກຮູ້ບໍວ່າລາຊະອານາຈັກຂອງພະເຈົ້າແມ່ນຫຍັງ?—
ກະສັດແມ່ນຜູ້ປົກຄອງຂອງປະເທດໜຶ່ງຫຼືດິນແດນໜຶ່ງ. ລັດຖະບານຂອງກະສັດຖືກເອີ້ນວ່າລາຊະອານາຈັກ. ໃນບາງປະເທດມີການເອີ້ນຫົວໜ້າລັດຖະບານວ່າປະທານປະເທດ. ແຕ່ຈະເອີ້ນຜູ້ປົກຄອງໃນລັດຖະບານຂອງພະເຈົ້າວ່າແນວໃດ?— ເອີ້ນວ່າກະສັດ. ດ້ວຍເຫດນີ້ລັດຖະບານຂອງພະເຈົ້າຈຶ່ງຖືກເອີ້ນວ່າລາຊະອານາຈັກ.
ລູກຮູ້ບໍວ່າພະເຢໂຫວາພະເຈົ້າໄດ້ເລືອກໃຜໃຫ້ເປັນກະສັດໃນລັດຖະບານຂອງພະອົງ?— ໄດ້ເລືອກພະເຍຊູຄລິດ ລູກຊາຍຂອງພະອົງ. ເປັນຫຍັງພະເຍຊູຈຶ່ງດີກວ່າຜູ້ປົກຄອງຄົນໃດໆກໍຕາມທີ່ມະນຸດອາດເລືອກຂຶ້ນມາ?— ກໍຍ້ອນວ່າພະເຍຊູຮັກພະເຢໂຫວາພໍ່ຂອງຕົນຢ່າງແທ້ຈິງ. ດັ່ງນັ້ນພະອົງຈຶ່ງເຮັດໃນສິ່ງທີ່ຖືກຕ້ອງສະເໝີ.
ດົນນານກ່ອນທີ່ພະເຍຊູເກີດໃນເມືອງເບດເລເຫມ ພະຄຳພີບອກເຖິງເລື່ອງການເກີດຂອງພະອົງແລະບອກວ່າພະອົງຈະມາເປັນຜູ້ປົກຄອງທີ່ພະເຈົ້າເລືອກ. ໃຫ້ເຮົາອ່ານໃນເອຊາອີ 9:6, 7. ຂໍ້ນັ້ນອ່ານວ່າ “ເຫດວ່າເດັກນ້ອຍອົງໜຶ່ງໄດ້ເກີດມາສຳລັບພວກເຮົາ ລູກຊາຍອົງໜຶ່ງກໍປະທານໃຫ້ແກ່ພວກເຮົາ ແລະການສະເຫວີຍລາດ ຈະຕັ້ງຢູ່ບ່າຂອງພະອົງ. ແລະເຂົາຈະເອີ້ນຊື່ພະອົງວ່າ ‘ . . . ພະອົງເຈົ້າແຫ່ງຄວາມສຸກສຳລານ.’ ພະລາຊະອານາຈັກຂອງພະອົງ ກັບຄວາມສຸກສຳລານຈະບໍ່ມີສິ້ນສຸດ.”—ເຮົາເຮັດໃຫ້ເປັນໂຕເນີ້ງ.
ລູກຮູ້ບໍວ່າເປັນຫຍັງຂໍ້ນີ້ຈຶ່ງເອີ້ນຜູ້ປົກຄອງແຫ່ງລາຊະອານາຈັກຂອງພະເຈົ້າວ່າ “ພະອົງເຈົ້າ”?— ຟັງເດີ ພະເຍຊູເປັນລູກຊາຍຂອງພະເຢໂຫວາກະສັດອົງຍິ່ງໃຫຍ່. ແຕ່ພະເຢໂຫວາຍັງໄດ້ແຕ່ງຕັ້ງພະເຍຊູໃຫ້ເປັນກະສັດແຫ່ງລັດຖະບານຂອງພະອົງ ເຊິ່ງຈະປົກຄອງໂລກໜຶ່ງພັນປີ. (ຄຳປາກົດ 20:6) ພາຍຫຼັງທີ່ພະເຍຊູຮັບບັບເຕມາແລ້ວ ພະອົງເລີ່ມຕົ້ນ “ເທສະໜາປ່າວປະກາດແລະກ່າວວ່າ ‘ທ່ານທັງຫຼາຍຈົ່ງປະໃຈເກົ່າເອົາໃຈໃໝ່ເຖີ້ນ ເພາະວ່າແຜ່ນດິນສະຫວັນໄດ້ຫຍັບເຂົ້າມາໃກ້ແລ້ວ.’”—ມັດທາຍ 4:17.
ລູກຮູ້ບໍວ່າເປັນຫຍັງພະເຍຊູຈຶ່ງເວົ້າວ່າລາຊະອານາຈັກໃກ້ເຂົ້າມາແລ້ວ?— ພະອົງເວົ້າແນວນັ້ນກໍເພາະວ່າຜູ້ທີ່ຈະເປັນກະສັດປົກຄອງທາງພາກສະຫວັນໃນພາຍໜ້າໄດ້ຢູ່ກັບເຂົາເຈົ້າທີ່ນັ້ນແລ້ວ! ດ້ວຍເຫດນັ້ນພະເຍຊູຈຶ່ງບອກຄົນອື່ນວ່າ “ແຜ່ນດິນຂອງພະເຈົ້າຢູ່ໃນທ່າມກາງທ່ານທັງຫຼາຍ.” (ລືກາ 17:21) ລູກຄົງຈະມັກແມ່ນບໍທີ່ກະສັດເຊິ່ງພະເຢໂຫວາແຕ່ງຕັ້ງໄດ້ຢູ່ໃກ້ໆຈົນວ່າຈັບຕ້ອງໄດ້?—
ດັ່ງນັ້ນ ຂໍໃຫ້ບອກພໍ່ (ແມ່) ວ່າວຽກສຳຄັນອັນໃດທີ່ພະເຍຊູມາເຮັດຢູ່ເທິງແຜ່ນດິນໂລກ?— ພະເຍຊູໄດ້ຕອບຄຳຖາມນັ້ນໂດຍກ່າວວ່າ “ເຮົາຕ້ອງເທສະໜາປ່າວປະກາດແຜ່ນດິນ [“ລາຊະອານາຈັກ,” ລ.ມ.] ຂອງພະເຈົ້າໃນເມືອງອື່ນທັງຫຼາຍດ້ວຍ ເຫດວ່າເຮົາໄດ້ຮັບໃຊ້ສຳລັບການນັ້ນ.” (ລືກາ 4:43) ພະເຍຊູຮູ້ວ່າພະອົງບໍ່ສາມາດເຮັດວຽກປະກາດໄດ້ເອງຜູ້ດຽວ. ດັ່ງນັ້ນລູກຄິດວ່າພະອົງເຮັດຫຍັງ?—
ພະເຍຊູມາແຜ່ນດິນໂລກເພື່ອເຮັດວຽກຫຍັງ?
ພະເຍຊູພາຄົນອື່ນໄປກັບພະອົງແລະສາທິດໃຫ້ເຂົາເຈົ້າເຫັນວິທີທີ່ຈະເຮັດວຽກປະກາດ. ຄົນກຸ່ມທຳອິດທີ່ພະອົງສອນມີ 12 ຄົນ ເຊິ່ງພະອົງເລືອກມາເປັນອັກຄະສາວົກ. (ມັດທາຍ 10:5, 7) ແຕ່ພະເຍຊູສອນສະເພາະພວກອັກຄະສາວົກເທົ່ານັ້ນບໍໃຫ້ເຮັດວຽກນີ້? ບໍ່ແມ່ນ ຄຳພີໄບເບິນບອກວ່າພະເຍຊູຍັງສອນຄົນອື່ນໆອີກຫຼາຍຄົນໃຫ້ປະກາດ. ຕໍ່ມາພະອົງໄດ້ສົ່ງລູກສິດອີກ 70 ຄົນອອກໄປເປັນຄູ່ໆ. ແລະເຂົາເຈົ້າສອນຄົນອື່ນກ່ຽວກັບເລື່ອງຫຍັງ?— ພະເຍຊູບອກວ່າ “ຈົ່ງ . . . ກ່າວແກ່ເຂົາວ່າ ‘ແຜ່ນດິນຂອງພະເຈົ້າໄດ້ຫຍັບມາໃກ້ທ່ານທັງຫຼາຍແລ້ວ.’” (ລືກາ 10:9) ໂດຍວິທີນີ້ຜູ້ຄົນຈຶ່ງໄດ້ຮຽນຮູ້ເລື່ອງລັດຖະບານຂອງພະເຈົ້າ.
ດົນນານມາແລ້ວໃນປະເທດອິດສະລາແອນ ກະສັດອົງໃໝ່ມັກຈະຂີ່ຕົວລາເຂົ້າໄປໃນເມືອງເພື່ອປາກົດຕົວໃຫ້ປະຊາຊົນເຫັນ. ພະເຍຊູເຮັດແບບນັ້ນຂະນະທີ່ພະອົງເຂົ້າໄປເມືອງເຢຣຶຊາເລມເປັນຄັ້ງສຸດທ້າຍ. ລູກເຫັນບໍ ພະເຍຊູຈະເປັນຜູ້ປົກຄອງໃນລາຊະອານາຈັກຂອງພະເຈົ້າ. ປະຊາຊົນຕ້ອງການໃຫ້ພະອົງເປັນກະສັດບໍ?—
ເອົາລະ ຂະນະທີ່ພະອົງຂີ່ຕົວລາໄປຕາມຖະໜົນ ຝູງຊົນສ່ວນຫຼາຍເລີ່ມປູເສື້ອຊັ້ນນອກຂອງຕົນລົງທາງໜ້າພະອົງ. ຄົນອື່ນໆກໍຕັດງ່າໄມ້ຈາກຕົ້ນໄມ້ມາວາງເທິງຫົນທາງ. ໂດຍການເຮັດເຊັ່ນນີ້ເຂົາເຈົ້າສະແດງໃຫ້ເຫັນວ່າຕ້ອງການໃຫ້ພະເຍຊູເປັນກະສັດຂອງຕົນ. ເຂົາເຈົ້າຮ້ອງຂຶ້ນວ່າ “ຈົ່ງສັນລະເສີນກະສັດທີ່ມາໃນນາມຊື່ຂອງພະເຢໂຫວາເຖີ້ນ.” ແຕ່ບໍ່ແມ່ນໝົດທຸກຄົນຈະຍິນດີ. ທີ່ຈິງພວກຫົວໜ້າສາສະໜາບາງຄົນເຖິງຂັ້ນເວົ້າກັບພະເຍຊູວ່າ “ເຊີນຫ້າມພວກລູກສິດຂອງທ່ານເຖີ້ນ.”—ລືກາ 19:28-40.
ເປັນຫຍັງປະຊາຊົນປ່ຽນໃຈບໍ່ຢາກໃຫ້ພະເຍຊູເປັນກະສັດ?
ຫ້າມື້ຕໍ່ມາພະເຍຊູຖືກຈັບແລະຖືກພາຕົວໄປໃຫ້ການຢູ່ເຮືອນພັກຂອງເຈົ້າແຂວງທີ່ຊື່ປົນເຊພີລາດ. ພວກສັດຕູຂອງພະເຍຊູເວົ້າວ່າພະເຍຊູອ້າງຕົວເປັນກະສັດແລະພະອົງຕໍ່ຕ້ານລັດຖະບານຂອງປະເທດໂລມ. ດັ່ງນັ້ນທ່ານພີລາດຈຶ່ງຖາມພະເຍຊູກ່ຽວກັບຂໍ້ກ່າວຫານີ້. ພະເຍຊູສະແດງວ່າພະອົງບໍ່ໄດ້ພະຍາຍາມຈະຍຶດອຳນາດການປົກຄອງ. ພະອົງບອກທ່ານພີລາດວ່າ “ລາຊະອານາຈັກຂອງເຮົາບໍ່ເປັນແຕ່ໂລກນີ້.”—ໂຢຮັນ 18:36, ລ.ມ.
ທ່ານພີລາດຈຶ່ງອອກໄປທາງນອກເຮືອນພັກ ແລະບອກປະຊາຊົນວ່າລາວບໍ່ເຫັນພະເຍຊູມີຄວາມຜິດອັນໃດເລີຍ. ແຕ່ຕອນນີ້ປະຊາຊົນບໍ່ຕ້ອງການໃຫ້ພະເຍຊູເປັນກະສັດຂອງຕົນ. ເຂົາເຈົ້າບໍ່ຕ້ອງການປ່ອຍໃຫ້ພະອົງໄປ. (ໂຢຮັນ 18:37-40) ຫຼັງຈາກທີ່ເວົ້າກັບພະເຍຊູອີກຄັ້ງໜຶ່ງ ທ່ານພີລາດໝັ້ນໃຈວ່າພະອົງບໍ່ໄດ້ເຮັດຫຍັງຜິດຈັກຢ່າງ. ດັ່ງນັ້ນໃນທີ່ສຸດ ພາຍຫຼັງພາພະອົງອອກມາທາງນອກເຮືອນພັກເປັນເທື່ອສຸດທ້າຍ ທ່ານພີລາດເວົ້າວ່າ “ຈົ່ງເບິ່ງກະສັດຂອງທ່ານທັງຫຼາຍເຖີ້ນ.” ແຕ່ປະຊາຊົນຮ້ອງຂຶ້ນວ່າ “ຂ້າລາວ ຂ້າລາວ. ເອົາລາວໄປຄຶງໄວ້.” (ລ.ມ.)
ທ່ານພີລາດຖາມວ່າ “ເຮົາຈະຄຶງກະສັດຂອງທ່ານທັງຫຼາຍ . . . ຫຼື?” ປະໂລຫິດໃຫຍ່ຕອບວ່າ “ພວກຂ້າພະເຈົ້າບໍ່ມີກະສັດເວັ້ນໄວ້ແຕ່ກະສັດເຊຊາ.” ລູກຄິດເບິ່ງ! ພວກປະໂລຫິດທີ່ຊົ່ວຮ້າຍສາມາດຊັກຈູງປະຊາຊົນໃຫ້ຕໍ່ຕ້ານພະເຍຊູໄດ້!—ໂຢຮັນ 19:1-16.
ສະໄໝນີ້ກໍຄືກັນກັບສະໄໝນັ້ນ. ທີ່ຈິງຄົນສ່ວນຫຼາຍບໍ່ຕ້ອງການໃຫ້ພະເຍຊູເປັນກະສັດ. ເຂົາເຈົ້າອາດເວົ້າວ່າຕົນເຊື່ອໃນພະເຈົ້າ ແຕ່ພັດບໍ່ຕ້ອງການໃຫ້ພະເຈົ້າຫຼືພະຄລິດບອກເຂົາເຈົ້າວ່າຕ້ອງເຮັດຫຍັງ. ເຂົາເຈົ້າຕ້ອງການມີລັດຖະບານຂອງຕົນເອງຢູ່ເທິງໂລກນີ້.
ສຳລັບພວກເຮົາເດ? ເມື່ອເຮົາຮຽນຮູ້ກ່ຽວກັບລາຊະອານາຈັກຂອງພະເຈົ້າແລະສິ່ງດີວິເສດທຸກຢ່າງທີ່ລາຊະອານາຈັກຈະເຮັດ ເລື່ອງນັ້ນເຮັດໃຫ້ເຮົາຮູ້ສຶກແນວໃດຕໍ່ພະເຈົ້າ?— ເຮົາຮັກພະອົງແມ່ນບໍ?— ຖ້າເປັນແນວນັ້ນ ເຮົາຈະສະແດງໃຫ້ພະເຈົ້າເຫັນໄດ້ແນວໃດວ່າເຮົາຮັກພະອົງແລະຢາກຢູ່ພາຍໃຕ້ການປົກຄອງແຫ່ງລາຊະອານາຈັກຂອງພະອົງ?—
ເປັນຫຍັງພະເຍຊູຈຶ່ງຮັບບັບເຕມາ ແລະພະເຈົ້າສະແດງໃຫ້ເຫັນແນວໃດວ່າພະອົງພໍໃຈ?
ເຮົາສາມາດສະແດງໃຫ້ພະເຈົ້າເຫັນວ່າເຮົາຮູ້ສຶກແນວໃດໂດຍການເຮັດຕາມຕົວຢ່າງຂອງພະເຍຊູ. ແລະພະເຍຊູເຮັດຫຍັງເພື່ອສະແດງໃຫ້ເຫັນວ່າພະອົງຮັກພະເຢໂຫວາ?— ພະເຍຊູອະທິບາຍວ່າ “ເຮົາກະທຳການທີ່ເປັນຊອບໃຈແກ່ພະເຈົ້າຢູ່ເລື້ອຍ.” (ໂຢຮັນ 8:29) ແມ່ນແລ້ວ ພະເຍຊູມາທີ່ແຜ່ນດິນໂລກ “ເພື່ອຈະກະທຳນ້ຳໃຈຂອງພະເຈົ້າໃຫ້ສຳເລັດ” ແລະ “ໃຫ້ກິດຈະການຂອງພະເຈົ້າສຳເລັດ.” (ເຫບເລີ 10:7; ໂຢຮັນ 4:34) ຂໍໃຫ້ພິຈາລະນາສິ່ງທີ່ພະເຍຊູເຮັດກ່ອນພະອົງເລີ່ມຕົ້ນວຽກງານການປະກາດ.
ພະເຍຊູໄປຫາໂຢຮັນຜູ້ໃຫ້ຮັບບັບເຕມາຢູ່ແມ່ນ້ຳຢູລະເດນ. ຫຼັງຈາກທີ່ທັງສອງລຸຍນ້ຳລົງໄປ ໂຢຮັນກໍຈຸ່ມຕົວພະເຍຊູໃຫ້ແຈບລົງໃນນ້ຳ ແລ້ວເອົາພະອົງຂຶ້ນມາ. ລູກຮູ້ບໍວ່າເປັນຫຍັງໂຢຮັນຈຶ່ງບັບເຕມາໃຫ້ພະເຍຊູ?—
ເຮົາຈະເວົ້າລົມກັບຄົນອື່ນໆເລື່ອງລາຊະອານາຈັກໄດ້ຢູ່ໃສແດ່?
ພະເຍຊູຂໍໃຫ້ໂຢຮັນເຮັດເຊັ່ນນັ້ນ. ແຕ່ເຮົາຮູ້ໄດ້ແນວໃດວ່າພະເຈົ້າຕ້ອງການໃຫ້ພະເຍຊູຮັບບັບເຕມາ?— ເຮົາຮູ້ເຊັ່ນນັ້ນເພາະເມື່ອພະເຍຊູຂຶ້ນມາຈາກນ້ຳ ພະອົງໄດ້ຍິນສຽງຂອງພະເຈົ້າຈາກຟ້າສະຫວັນກ່າວວ່າ “ພະອົງເປັນພະບຸດທີ່ຮັກຂອງເຮົາ ເຮົາຊອບໃຈຫຼາຍໃນພະອົງ.” ພະເຈົ້າແມ່ນແຕ່ໄດ້ສົ່ງພະວິນຍານບໍລິສຸດຂອງພະອົງໃນຮູບຮ່າງຄືນົກເຂົາລົງມາເທິງພະເຍຊູ. ດັ່ງນັ້ນ ໂດຍການຮັບບັບເຕມາ ພະເຍຊູສະແດງໃຫ້ເຫັນວ່າພະອົງຕ້ອງການຈະຮັບໃຊ້ພະເຢໂຫວາຊົ່ວຊີວິດຂອງພະອົງແລະຕະຫຼອດໄປ.—ມາລະໂກ 1:9-11.
ໃນເວລານີ້ລູກຍັງເປັນເດັກນ້ອຍຢູ່. ແຕ່ລູກຈະເຮັດຫຍັງເມື່ອໃຫຍ່ຂຶ້ນ?— ລູກຈະເປັນຄືກັບພະເຍຊູແລະຮັບບັບເຕມາບໍ?— ລູກຄວນຮຽນແບບພະອົງ ເນື່ອງຈາກຄຳພີໄບເບິນບອກວ່າ ພະອົງ “ເປັນແບບຢ່າງແກ່ພວກທ່ານ ເພື່ອພວກທ່ານຈະໄດ້ຕິດຕາມຮອຍຕີນຂອງພະອົງ [“ຢ່າງໃກ້ຊິດ,” ລ.ມ.].” (1 ເປໂຕ 2:21) ເມື່ອລູກຮັບບັບເຕມາ ລູກກຳລັງສະແດງໃຫ້ເຫັນວ່າລູກຢາກຢູ່ພາຍໃຕ້ການປົກຄອງຂອງລາຊະອານາຈັກຂອງພະເຈົ້າແທ້ໆ. ແຕ່ການຮັບບັບເຕມາພຽງຢ່າງດຽວກໍບໍ່ພໍ.
ເຮົາຈຳເປັນຕ້ອງເຊື່ອຟັງທຸກສິ່ງທີ່ພະເຍຊູສອນ. ພະເຍຊູບອກວ່າ ເຮົາບໍ່ຄວນ “ເປັນຝ່າຍໂລກ.” ຖ້າເຮົາເຂົ້າໄປຫຍຸ້ງກ່ຽວກັບເລື່ອງຕ່າງໆຂອງໂລກ ເຮົາຈະເຊື່ອຟັງພະອົງບໍ? ພະເຍຊູແລະພວກອັກຄະສາວົກຢູ່ຕ່າງຫາກຈາກສິ່ງເຫຼົ່ານີ້. (ໂຢຮັນ 17:14) ແທນທີ່ຈະເຂົ້າໄປຫຍຸ້ງກ່ຽວກັບໂລກ ພວກເຂົາເຈົ້າພັດເຮັດຫຍັງ?— ເຂົາເຈົ້າເວົ້າລົມກັບຄົນອື່ນກ່ຽວກັບເລື່ອງລາຊະອານາຈັກຂອງພະເຈົ້າ. ນັ້ນແມ່ນວຽກທີ່ສຳຄັນທີ່ສຸດໃນຊີວິດຂອງເຂົາເຈົ້າ. ເຮົາສາມາດເຮັດແບບດຽວກັນນັ້ນໄດ້ບໍ?— ແມ່ນແລ້ວ ເຮົາຈະເຮັດວຽກແບບດຽວກັນນັ້ນ ຖ້າເຮົາອະທິດຖານຢ່າງຈິງຈັງຂໍໃຫ້ລາຊະອານາຈັກຂອງພະເຈົ້າມາປົກຄອງ.
ຂໍໃຫ້ເບິ່ງຂໍ້ພະຄຳພີອື່ນໆທີ່ບອກເຮົາເຖິງສິ່ງທີ່ເຮົາເຮັດໄດ້ເພື່ອສະແດງວ່າເຮົາຕ້ອງການລາຊະອານາຈັກຂອງພະເຈົ້າໃຫ້ມາປົກຄອງ: ມັດທາຍ 6:24-33; 24:14; 1 ໂຢຮັນ 2:15-17; 5:3.