ບົດທີ 46

ນ້ຳຖ້ວມໃຫຍ່ທຳລາຍໂລກ—ມັນຈະເກີດຂຶ້ນອີກບໍ?

ລູກເຄີຍໄດ້ຍິນຜູ້ໃດຜູ້ໜຶ່ງເວົ້າເຖິງອະວະສານຂອງໂລກບໍ?— ສະໄໝນີ້ຜູ້ຄົນເວົ້າເຖິງເລື່ອງນີ້. ບາງຄົນຄິດວ່າໂລກຈະຖືກທຳລາຍໃນສົງຄາມທີ່ມະນຸດໃຊ້ລູກລະເບີດນິວເຄລຍ. ລູກຄິດວ່າພະເຈົ້າຈະທຳລາຍແຜ່ນດິນໂລກທີ່ສວຍງາມຂອງເຮົາ ລວມທັງຟ້າສະຫວັນທີ່ງົດງາມແລະດວງດາວທີ່ເຫຼື້ອມຍິບຍັບບໍ?—

ດັ່ງທີ່ເຮົາໄດ້ຮຽນແລ້ວ ຄຳພີໄບເບິນເວົ້າເຖິງອະວະສານຂອງໂລກ. ຄຳພີໄບເບິນກ່າວວ່າ “ໂລກນີ້ກັບຄວາມຄຶດຢາກໄດ້ຂອງໂລກພວມໄປເສຍ.” (1 ໂຢຮັນ 2:17) ລູກຄິດວ່າອະວະສານຂອງໂລກຈະໝາຍເຖິງອະວະສານຂອງແຜ່ນດິນໂລກບໍ?— ບໍ່ແມ່ນ ຄຳພີໄບເບິນບອກວ່າ ພະເຈົ້າສ້າງໂລກເພື່ອ “ໃຫ້ມີຊາວຊົນ” ແມ່ນແລ້ວ ເພື່ອໃຫ້ຜູ້ຄົນອາໄສຢູ່ເທິງແຜ່ນດິນໂລກຢ່າງມີຄວາມສຸກ. (ເອຊາອີ 45:18) ຄຳເພງ 37:29 ກ່າວວ່າ “ຄົນຊອບທຳທັງຫຼາຍຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.” ດ້ວຍເຫດນີ້ຄຳພີໄບເບິນຍັງກ່າວອີກວ່າແຜ່ນດິນໂລກຈະຕັ້ງຢູ່ຕະຫຼອດໄປເປັນນິດ.—ຄຳເພງ 104:5; ຜູ້ເທສະໜາປ່າວປະກາດ 1:4.

ດັ່ງນັ້ນ ຖ້າອະວະສານຂອງໂລກບໍ່ໄດ້ໝາຍເຖິງອະວະສານຂອງແຜ່ນດິນໂລກ ນັ້ນຈະໝາຍຄວາມວ່າແນວໃດ?— ເຮົາຈະພົບຄຳຕອບຖ້າເຮົາພິຈາລະນາໃຫ້ດີເຖິງສິ່ງທີ່ເກີດຂຶ້ນໃນສະໄໝຂອງທ່ານໂນເອ. ຄຳພີໄບເບິນອະທິບາຍວ່າ “ໂລກທີ່ຢູ່ໃນເວລານັ້ນໄດ້ຈິບຫາຍດ້ວຍນ້ຳຖ້ວມ.”—2 ເປໂຕ 3:6.

ມີໃຜບໍທີ່ລອດຊີວິດຜ່ານອະວະສານຂອງໂລກໃນລະຫວ່າງນ້ຳຖ້ວມໃຫຍ່ໃນສະໄໝຂອງທ່ານໂນເອ?— ຄຳພີໄບເບິນບອກວ່າພະເຈົ້າ “ໄດ້ຮັກສາທ່ານໂນເອຜູ້ທີ 8 ຜູ້ເປັນຄົນປ່າວປະກາດຄວາມຊອບທຳ ເມື່ອພະອົງໄດ້ໃຫ້ນ້ຳຖ້ວມ . . . ໂລກແຫ່ງຄົນຊົ່ວຮ້າຍທັງປວງ.”—2 ເປໂຕ 2:5.

After Noah, his family, and the animals come out of the ark, a rainbow appears in the sky — ໂລກແບບໃດທີ່ຖືກທຳລາຍໃນສະໄໝຂອງທ່ານໂນເອ?

ເມື່ອເປັນດັ່ງນັ້ນ ໂລກອັນໃດທີ່ເຖິງແກ່ອະວະສານ? ແມ່ນແຜ່ນດິນໂລກບໍ ຫຼືຄົນຊົ່ວ?— ຄຳພີໄບເບິນບອກວ່າມັນແມ່ນ “ໂລກແຫ່ງຄົນຊົ່ວຮ້າຍທັງປວງ.” ແລະຂໍໃຫ້ສັງເກດວ່າທ່ານໂນເອຖືກເອີ້ນວ່າເປັນ “ຜູ້ . . . ປ່າວປະກາດ.” ລູກຄິດວ່າລາວປະກາດກ່ຽວກັບເລື່ອງຫຍັງ?— ທ່ານໂນເອເຕືອນຜູ້ຄົນກ່ຽວກັບອະວະສານຂອງ “ໂລກທີ່ຢູ່ໃນເວລານັ້ນ.”

ເມື່ອພະເຍຊູເວົ້າເຖິງເລື່ອງນ້ຳຖ້ວມໃຫຍ່ ພະອົງບອກພວກສາວົກກ່ຽວກັບສິ່ງທີ່ຄົນເຮົາພວມພາກັນເຮັດກ່ອນທີ່ອະວະສານມາເຖິງ. ນີ້ແມ່ນສິ່ງທີ່ພະອົງບອກເຂົາເຈົ້າ “ໃນຄາວວັນກ່ອນນ້ຳຖ້ວມໂລກທັງສິ້ນນັ້ນ ເຂົາໄດ້ກິນແລະດື່ມ ແລະເອົາຜົວເອົາເມຍແລະມອບໃຫ້ເປັນຜົວເປັນເມຍຈົນເຖິງວັນນັ້ນທີ່ທ່ານໂນເອໄດ້ເຂົ້າໄປໃນນາວາ ແລະເຂົາບໍ່ທັນຮູ້ຈັກອີ່ສັງ [“ສົນໃຈ,” ລ.ມ.] ຈົນເຖິງນ້ຳມາຖ້ວມແລະກວາດເຂົາໄປເສຍທັງໝົດ.” ຈາກນັ້ນພະເຍຊູກ່າວວ່າຜູ້ຄົນຈະເຮັດແບບດຽວກັນນັ້ນກ່ອນທີ່ໂລກຈະເຖິງການອະວະສານ.—ມັດທາຍ 24:37-39.

ຖ້ອຍຄຳຂອງພະເຍຊູສະແດງໃຫ້ເຫັນວ່າເຮົາສາມາດໄດ້ບົດຮຽນຈາກສິ່ງທີ່ຄົນທົ່ວໄປເຮັດກ່ອນນ້ຳຖ້ວມໃຫຍ່. ຈາກການອ່ານບົດທີ 10 ຂອງປຶ້ມຫົວນີ້ ລູກຈື່ໄດ້ບໍວ່າຄົນເຫຼົ່ານັ້ນໄດ້ເຮັດຫຍັງ?— ບາງຄົນໄດ້ທຳຮ້າຍຜູ້ທີ່ອ່ອນແອກວ່າແລະເຮັດສິ່ງທີ່ຮຸນແຮງ. ພະເຍຊູບອກວ່າ ມີຄົນອື່ນໆອີກຫຼາຍຄົນຊ້ຳພັດບໍ່ຍອມຮັບຟັງເມື່ອພະເຈົ້າສົ່ງທ່ານໂນເອໃຫ້ປະກາດກັບເຂົາເຈົ້າ.

ແລ້ວກໍມາຮອດມື້ທີ່ພະເຢໂຫວາໄດ້ກ່າວແກ່ທ່ານໂນເອວ່າພະອົງຈະທຳລາຍຄົນຊົ່ວໂດຍໃຫ້ນ້ຳຖ້ວມ. ນ້ຳຈະຖ້ວມທົ່ວແຜ່ນດິນໂລກຈົນກະທັ່ງຖ້ວມພູເຂົາ. ພະເຢໂຫວາບອກທ່ານໂນເອໃຫ້ສ້າງນາວາໃຫຍ່. ນາວານີ້ເປັນຄືຫີບທີ່ໃຫຍ່ແລະຍາວ ດັ່ງທີ່ລູກຈະເຫັນຖ້າເປີດກັບໄປເບິ່ງຮູບພາບຢູ່ໜ້າ 238.

ພະເຈົ້າບອກໃຫ້ທ່ານໂນເອສ້າງນາວາໃຫ້ໃຫຍ່ພໍທີ່ລາວກັບຄອບຄົວກັບສັດຈຳນວນຫຼາຍຈະຢູ່ໃນນັ້ນໄດ້ຢ່າງປອດໄພ. ທ່ານໂນເອແລະຄອບຄົວຂອງລາວເຮັດວຽກໜັກຫຼາຍ. ເຂົາເຈົ້າຕັດຕົ້ນໄມ້ໃຫຍ່ ແລະໃຊ້ໄມ້ນັ້ນສ້າງນາວາ. ວຽກນີ້ໃຊ້ເວລາຫຼາຍປີເພາະນາວາມີຂະໜາດໃຫຍ່ຫຼາຍ.

ລູກຈື່ໄດ້ບໍວ່າທ່ານໂນເອເຮັດຫຍັງອີກຕະຫຼອດໄລຍະເວລາທີ່ລາວສ້າງນາວາ?— ລາວໄດ້ປະກາດ ເຕືອນຜູ້ຄົນເຖິງເລື່ອງນ້ຳຖ້ວມໃຫຍ່ທີ່ກຳລັງຈະເກີດຂຶ້ນ. ມີໃຜສົນໃຈຟັງລາວບໍ? ບໍ່ມີໃຜຟັງເລີຍນອກຈາກຄອບຄົວຂອງທ່ານໂນເອ. ຄົນອື່ນໆຫຍຸ້ງກັບການເຮັດສິ່ງອື່ນຫຼາຍເກີນໄປ. ລູກຈື່ໄດ້ບໍພະເຍຊູເວົ້າວ່າເຂົາເຈົ້າພວມເຮັດຫຍັງ?— ເຂົາເຈົ້າຫຍຸ້ງກັບການກິນດື່ມແລະການເອົາຜົວເອົາເມຍ. ເຂົາເຈົ້າຄິດວ່າຕົນບໍ່ແມ່ນຄົນຊົ່ວຮ້າຍຂະໜາດນັ້ນ ແລະເຂົາເຈົ້າບໍ່ໄດ້ຈັດເວລາຟັງທ່ານໂນເອ. ດັ່ງນັ້ນຂໍໃຫ້ມາເບິ່ງວ່າເກີດຫຍັງຂຶ້ນກັບເຂົາເຈົ້າ.

ພາຍຫຼັງທີ່ທ່ານໂນເອແລະຄອບຄົວເຂົ້າໄປໃນນາວາແລ້ວ ພະເຢໂຫວາກໍປິດປະຕູ. ຄົນເຫຼົ່ານັ້ນທີ່ຢູ່ຂ້າງນອກຍັງບໍ່ໄດ້ເຊື່ອວ່າຈະເກີດນ້ຳຖ້ວມໃຫຍ່. ແຕ່ໃນທັນທີທັນໃດນັ້ນ ນ້ຳກໍເລີ່ມຕົກລົງມາຈາກຟ້າ! ມັນບໍ່ແມ່ນຝົນຕົກທຳມະດາ. ມັນແມ່ນຝົນຕົກຫ່າໃຫຍ່ທີ່ເທລົງມາຢ່າງໜັກ! ບໍ່ດົນນ້ຳນັ້ນກໍກາຍເປັນແມ່ນ້ຳສາຍໃຫຍ່ທີ່ເຮັດໃຫ້ເກີດສຽງດັງຫຼາຍ. ນ້ຳຊັດໃສ່ຕົ້ນໄມ້ໃຫຍ່ຈົນຫັກລົ້ມລົງແລະດັນກ້ອນຫີນໃຫຍ່ໃຫ້ກິ້ງໄປຄືກັບຫີນແຮ່. ແລະຄົນທີ່ຢູ່ນອກນາວາເດ?— ພະເຍຊູກ່າວວ່າ “ນ້ຳມາຖ້ວມແລະກວາດເຂົາໄປເສຍທັງໝົດ.” ຜູ້ຄົນທັງໝົດທີ່ຢູ່ນອກນາວາໄດ້ເສຍຊີວິດ. ເພາະເຫດໃດ?— ດັ່ງທີ່ພະເຍຊູກ່າວ “ພວກເຂົາບໍ່ສົນໃຈ.” ພວກເຂົາເຈົ້າບໍ່ຟັງ!—ມັດທາຍ 24:39, ລ.ມ.; ຕົ້ນເດີມ 6:5-7.

[ຮູບພາບໜ້າ 241] — ເປັນຫຍັງເຮົາບໍ່ຄວນຄິດເຖິງແຕ່ເລື່ອງຄວາມສະຫນຸກສະໜານ?

ບັດນີ້ ຂໍໃຫ້ຈື່ໄວ້ວ່າ ພະເຍຊູບອກວ່າສິ່ງທີ່ເກີດຂຶ້ນກັບຄົນເຫຼົ່ານັ້ນເປັນບົດຮຽນສຳລັບພວກເຮົາໃນທຸກມື້ນີ້. ເຮົາໄດ້ບົດຮຽນຫຍັງ?— ຄົນຖືກທຳລາຍບໍ່ແມ່ນຍ້ອນເຂົາເຈົ້າເປັນຄົນບໍ່ດີເທົ່ານັ້ນ ແຕ່ຍ້ອນຫຼາຍຄົນມີວຽກຫຍຸ້ງໂພດຈົນບໍ່ໄດ້ໃຫ້ເວລາທີ່ຈະຮຽນຮູ້ເລື່ອງພະເຈົ້າແລະສິ່ງທີ່ພະອົງພວມຈະເຮັດ. ເຮົາຕ້ອງລະມັດລະວັງທີ່ຈະບໍ່ເປັນຄືກັບເຂົາເຈົ້າແມ່ນບໍ?—

ລູກຄິດວ່າພະເຈົ້າຈະທຳລາຍໂລກໂດຍໃຊ້ນ້ຳຖ້ວມອີກບໍ?— ບໍ່ ພະເຈົ້າສັນຍາວ່າພະອົງຈະບໍ່ເຮັດແບບນັ້ນອີກ. ພະອົງກ່າວວ່າ “ເຮົາຈະຕັ້ງຮຸງກິນນ້ຳຂອງເຮົາໄວ້ທີ່ເມກ ແລະຮຸງນັ້ນຈະເປັນຂອງສຳຄັນແຫ່ງຄຳສັນຍາ.” ພະເຢໂຫວາກ່າວວ່າຮຸງກິນນ້ຳຈະເປັນຄຳສັນຍາວ່າ “ນ້ຳທັງຫຼາຍຈະບໍ່ຖ້ວມທຳລາຍເນື້ອໜັງທຸກຢ່າງອີກຕໍ່ໄປ.”—ຕົ້ນເດີມ 9:11-17.

ດັ່ງນັ້ນເຮົາຈຶ່ງໝັ້ນໃຈໄດ້ວ່າພະເຈົ້າຈະບໍ່ທຳລາຍໂລກໂດຍໃຫ້ນ້ຳຖ້ວມອີກ. ເຖິງຢ່າງນັ້ນກໍຕາມ ດັ່ງທີ່ເຮົາໄດ້ເຫັນແລ້ວ ຄຳພີໄບເບິນບອກເຮົາເຖິງເລື່ອງອະວະສານຂອງໂລກ. ເມື່ອພະເຈົ້າມາທຳລາຍລ້າງໂລກນີ້ ພະອົງຈະປົກປ້ອງໃຜໃຫ້ລອດຊີວິດ?— ຈະແມ່ນຄົນທີ່ສົນໃຈສິ່ງອື່ນໆຈົນບໍ່ຕ້ອງການທີ່ຈະຮຽນຮູ້ເລື່ອງພະເຈົ້າບໍ? ຈະແມ່ນຄົນທີ່ມີວຽກຫຍຸ້ງໂພດຈົນບໍ່ມີເວລາສຶກສາຄຳພີໄບເບິນບໍ? ລູກຄິດແນວໃດ?—

ເຮົາຢາກຢູ່ໃນທ່າມກາງຄົນເຫຼົ່ານັ້ນທີ່ພະເຈົ້າຈະປົກປ້ອງໃຫ້ລອດຊີວິດແມ່ນບໍ?— ຄົງຈະດີເລີດແມ່ນບໍຖ້າຄອບຄົວຂອງເຮົາຈະເປັນຄືກັບຄອບຄົວຂອງທ່ານໂນເອເພື່ອພະເຈົ້າຈະປົກປ້ອງຊີວິດຂອງພວກເຮົາທຸກຄົນ?— ຖ້າເຮົາຈະລອດຊີວິດຜ່ານອະວະສານຂອງໂລກນີ້ ເຮົາຕ້ອງເຂົ້າໃຈວ່າພະເຈົ້າຈະທຳລາຍໂລກແລະເຮັດໃຫ້ເກີດໂລກໃໝ່ອັນຊອບທຳໂດຍວິທີໃດ. ຂໍໃຫ້ມາເບິ່ງວ່າພະອົງຈະເຮັດແນວໃດໃນເລື່ອງນີ້.

ຄຳພີໄບເບິນໃຫ້ຄຳຕອບໃນພະທຳດານຽນບົດທີ 2 ຂໍ້ 44. ພະຄຳພີຂໍ້ນີ້ເວົ້າເຖິງສະໄໝຂອງເຮົາເມື່ອກ່າວວ່າ “ໃນຄາວກະສັດທັງຫຼາຍນັ້ນພະເຈົ້າແຫ່ງຟ້າສະຫວັນຈະຕັ້ງພະລາຊະອານາຈັກ [ຫຼື ລັດຖະບານ]ອັນໜຶ່ງໄວ້ທີ່ຈະບໍ່ຈິບຫາຍສັກເທື່ອ. ແລະພະລາຊະອານາຈັກນີ້ຈະບໍ່ກາຍເປັນຂອງຊາວປະເທດອື່ນ. ມັນຈະໃຫ້ລາຊະອານາຈັກທັງປວງນີ້ຫັກແຕກຈິບຫາຍ ແຕ່ວ່າຕົວເອງຈະຕັ້ງຢູ່ສືບໆໄປເປັນນິດ.”

ລູກເຂົ້າໃຈພະຄຳພີຂໍ້ນີ້ບໍ?— ຄຳພີໄບເບິນບອກວ່າລັດຖະບານຂອງພະເຈົ້າຈະທຳລາຍລັດຖະບານທັງໝົດຂອງໂລກນີ້. ເພາະເຫດໃດ?— ເພາະເຂົາເຈົ້າບໍ່ເຊື່ອຟັງຜູ້ທີ່ພະເຈົ້າແຕ່ງຕັ້ງໃຫ້ເປັນກະສັດ. ຜູ້ນັ້ນແມ່ນໃຜ?— ແມ່ນແລ້ວ ພະເຍຊູຄລິດ!

Jesus Christ and his heavenly armies destroy the wicked world at Armageddon — ພະເຍຊູຄລິດກະສັດທີ່ພະເຈົ້າເລືອກໄວ້ຈະທຳລາຍໂລກນີ້ໃນອະລະມະເຄໂດນ

ພະເຢໂຫວາພະເຈົ້າມີສິດທີ່ຈະຕັດສິນໃຈວ່າລັດຖະບານແບບໃດທີ່ຄວນປົກຄອງ ແລະພະອົງໄດ້ເລືອກພະເຍຊູຜູ້ເປັນລູກຊາຍໃຫ້ເປັນກະສັດ. ໃນອີກບໍ່ດົນ ພະເຍຊູຄລິດຜູ້ປົກຄອງຂອງພະເຈົ້າຈະນຳໜ້າໃນການທຳລາຍລັດຖະບານທັງໝົດຂອງໂລກນີ້. ໃນພະທຳຄຳປາກົດບົດທີ 19 ຂໍ້ 11 ເຖິງ 16 ໃນຄຳພີໄບເບິນພັນລະນາເຖິງພະເຍຊູວ່າພະອົງເຮັດເຊັ່ນນັ້ນ ດັ່ງທີ່ຮູບພາບນີ້ສະແດງໃຫ້ເຫັນ. ໃນຄຳພີໄບເບິນ ສົງຄາມຂອງພະເຈົ້າທີ່ຈະທຳລາຍລັດຖະບານທັງໝົດຂອງໂລກເອີ້ນວ່າ ຮາ-ມາເກດໂອນ ຫຼືອະລະມະເຄໂດນ.

ພະເຈົ້າກ່າວວ່າລັດຖະບານຂອງພະອົງຈະທຳລາຍລັດຖະບານຂອງມະນຸດ. ແຕ່ພະອົງບອກໃຫ້ເຮົາເປັນຜູ້ທຳລາຍບໍ?—ບໍ່ແມ່ນ ໃນຄຳພີໄບເບິນ ອະລະມະເຄໂດນຖືກເອີ້ນວ່າເປັນ “ການເສິກໃນວັນອັນໃຫຍ່ຂອງພະເຈົ້າຜູ້ມີລິດເດດອັນໃຫຍ່ທີ່ສຸດ.” (ຄຳປາກົດ 16:14, 16) ແມ່ນແລ້ວ ອະລະມະເຄໂດນເປັນສົງຄາມຂອງພະເຈົ້າ ແລະພະອົງໃຊ້ພະເຍຊູຄລິດໃຫ້ນຳພາກອງທັບທາງພາກສະຫວັນໃນການສູ້ຮົບ. ສົງຄາມອະລະມະເຄໂດນໃກ້ເຂົ້າມາແລ້ວບໍ? ໃຫ້ມາເບິ່ງວ່າເຮົາຈະໄດ້ຄຳຕອບແນວໃດ.

ໃຫ້ເຮົາມາອ່ານນຳກັນກ່ຽວກັບເວລາທີ່ພະເຈົ້າຈະກຳຈັດຄວາມຊົ່ວທັງໝົດໃຫ້ໝົດສິ້ນໄປແລະປົກປ້ອງຄົນທີ່ຮັບໃຊ້ພະອົງ ຢູ່ສຸພາສິດ 2:21, 22; ເອຊາອີ 26:20, 21; ເຢເຣມີ 25:31-33; ແລະມັດທາຍ 24:21, 22.