ບົດທີ 10

ພະເຍຊູມີລິດເດດເໜືອຜີປີສາດ

ລູກຈື່ໄດ້ບໍວ່າເປັນຫຍັງທູດສະຫວັນອົງໜຶ່ງຂອງພະເຈົ້າຈຶ່ງກາຍເປັນຊາຕານພະຍາມານ?— ຄວາມປາຖະໜາທີ່ເຫັນແກ່ຕົວເຊິ່ງຢາກໄດ້ການນະມັດສະການເປັນເຫດໃຫ້ມັນຕໍ່ຕ້ານພະເຈົ້າ. ທູດສະຫວັນອົງອື່ນໆໄດ້ຕິດຕາມຊາຕານບໍ?— ແມ່ນແລ້ວ ພວກທູດສະຫວັນໄດ້ເຮັດເຊັ່ນນັ້ນ. ຄຳພີໄບເບິນເອີ້ນພວກມັນວ່າ ‘ເຫຼົ່າທູດສະຫວັນຂອງຊາຕານ’ ຫຼືຜີປີສາດ.—ຄຳປາກົດ 12:9.

ທູດສະຫວັນຫຼືຜີປີສາດເຫຼົ່ານີ້ເຊື່ອວ່າມີພະເຈົ້າບໍ?— ຄຳພີໄບເບິນບອກວ່າ ‘ພວກຜີປີສາດເຊື່ອວ່າພະເຈົ້າມີແທ້.’ (ຢາໂກໂບ 2:19) ແຕ່ເວລານີ້ພວກມັນຢ້ານ. ເພາະພວກມັນຮູ້ວ່າພະເຈົ້າຈະລົງໂທດພວກມັນສຳລັບສິ່ງຊົ່ວຮ້າຍຕ່າງໆທີ່ພວກມັນໄດ້ເຮັດ. ພວກມັນໄດ້ເຮັດຜິດຫຍັງແດ່?—

ຄຳພີໄບເບິນບອກວ່າ ທູດສະຫວັນເຫຼົ່ານັ້ນໄດ້ຖິ້ມທີ່ຢູ່ທີ່ເໝາະສົມຂອງຕົນໃນສະຫວັນ ແລ້ວລົງມາທີ່ແຜ່ນດິນໂລກເພື່ອໃຊ້ຊີວິດແບບມະນຸດ. ພວກທູດສະຫວັນເຮັດແບບນີ້ກໍເພາະຕ້ອງການມີເພດສຳພັນກັບຜູ້ຍິງງາມເທິງໂລກນີ້. (ຕົ້ນເດີມ 6:1, 2; ຢູເດ 6) ລູກຮູ້ຫຍັງແດ່ກ່ຽວກັບເພດສຳພັນ?—

ເມື່ອຊາຍແລະຍິງມາຢູ່ໃກ້ຊິດກັນໃນວິທີພິເສດນັ້ນແມ່ນເພດສຳພັນ. ຫຼັງຈາກນັ້ນ ລູກອ່ອນກໍເຕີບໂຕຂຶ້ນໃນທ້ອງແມ່. ແຕ່ວ່າບໍ່ຖືກຕ້ອງທີ່ທູດສະຫວັນຈະມີເພດສຳພັນ. ພະເຈົ້າຕ້ອງການໃຫ້ມະນຸດຊາຍຍິງທີ່ໄດ້ແຕ່ງດອງກັນເທົ່ານັ້ນມີເພດສຳພັນກັນ. ໂດຍວິທີນັ້ນ ເມື່ອລູກເກີດມາຜົວແລະເມຍກໍຈະເອົາໃຈໃສ່ເບິ່ງແຍງ.

Bad angels look down from heaven at pretty women — ທູດສະຫວັນເຫຼົ່ານີ້ໄດ້ເຮັດສິ່ງທີ່ຊົ່ວຮ້າຍແນວໃດ?

ເມື່ອທູດສະຫວັນແປງກາຍເປັນມະນຸດແລະມີເພດສຳພັນກັບຍິງທີ່ຢູ່ເທິງແຜ່ນດິນໂລກ ລູກຂອງເຂົາເຈົ້າເຕີບໂຕຂຶ້ນກາຍເປັນຄົນຮ່າງຍັກ. ເຂົາເຈົ້າເປັນຄົນໂຫດຮ້າຍຫຼາຍ ແລະທຳຮ້າຍຄົນອື່ນ. ດັ່ງນັ້ນ ພະເຈົ້າຈຶ່ງໃຫ້ນ້ຳຖ້ວມໃຫຍ່ມາທຳລາຍຄົນຮ່າງຍັກແລະຄົນຊົ່ວທັງໝົດ. ແຕ່ພະອົງສັ່ງໂນເອໃຫ້ສ້າງນາວາຫຼືເຮືອໃຫຍ່ລຳໜຶ່ງເພື່ອຈະຊ່ອຍຊີວິດບາງຄົນທີ່ເຮັດສິ່ງທີ່ຖືກຕ້ອງ. ຄູຜູ້ຍິ່ງໃຫຍ່ບອກວ່າສິ່ງທີ່ເກີດຂຶ້ນຕອນທີ່ນ້ຳຖ້ວມໃຫຍ່ນັ້ນເປັນສິ່ງສຳຄັນເຊິ່ງຄວນຈະຈົດຈຳເອົາໄວ້.—ຕົ້ນເດີມ 6:3, 4, 13, 14; ລືກາ 17:26, 27.

ເມື່ອເກີດນ້ຳຖ້ວມໃຫຍ່ ລູກຮູ້ບໍວ່າທູດສະຫວັນຊົ່ວເຫຼົ່ານັ້ນເປັນແນວໃດ?— ພວກມັນຖິ້ມຮ່າງກາຍມະນຸດທີ່ມັນເຮັດຂຶ້ນມາແລະກັບໄປໃນສະຫວັນ. ແຕ່ພວກມັນບໍ່ໄດ້ເປັນທູດສະຫວັນຂອງພະເຈົ້າອີກ ດັ່ງນັ້ນພວກມັນໄດ້ກາຍເປັນທູດສະຫວັນຂອງຊາຕານຫຼືຜີປີສາດ. ແລະຄົນຮ່າງຍັກທີ່ເປັນລູກຂອງທູດສະຫວັນຊົ່ວເປັນແນວໃດ?— ພວກມັນຕາຍໃນນ້ຳຖ້ວມໃຫຍ່. ແລະຄົນອື່ນໆທີ່ບໍ່ເຊື່ອຟັງພະເຈົ້າກໍຕາຍໝົດຄືກັນ.

[ຮູບພາບໜ້າ 58] — ເປັນຫຍັງທຸກມື້ນີ້ຈຶ່ງມີຄວາມເດືອດຮ້ອນຫຼາຍກວ່າແຕ່ກ່ອນ?

ຕັ້ງແຕ່ສະໄໝນ້ຳຖ້ວມໃຫຍ່ມາ ພະເຈົ້າບໍ່ໃຫ້ພວກຜີປີສາດແປງກາຍເປັນມະນຸດອີກ. ເຖິງວ່າເຮົາຈະບໍ່ເຫັນພວກມັນ ຜີປີສາດກໍຍັງພະຍາຍາມເຮັດໃຫ້ຄົນເຮັດສິ່ງທີ່ຊົ່ວຮ້າຍຫຼາຍ. ພວກມັນກໍ່ໃຫ້ເກີດຄວາມເດືອດຮ້ອນຫຼາຍກວ່າແຕ່ກ່ອນ ຍ້ອນວ່າພວກມັນຖືກຖິ້ມຈາກສະຫວັນມາຢູ່ເທິງແຜ່ນດິນໂລກ.

ລູກຮູ້ບໍວ່າເປັນຫຍັງເຮົາຈຶ່ງເບິ່ງບໍ່ເຫັນຜີປີສາດ?— ເພາະວ່າຮ່າງກາຍຂອງພວກມັນບໍ່ຄືຮ່າງກາຍມະນຸດ. ແຕ່ເຮົາແນ່ໃຈວ່າພວກມັນມີຊີວິດຢູ່. ຄຳພີໄບເບິນບອກວ່າຊາຕານກຳລັງ ‘ຊັກນຳຄົນທົ່ວໂລກໃຫ້ຫຼົງຜິດ’ ພວກຜີປີສາດທີ່ເປັນພັກພວກຂອງມັນກໍຊ່ອຍເຫຼືອມັນຢູ່.—ຄຳປາກົດ 12:9, 12.

ພະຍາມານແລະພວກຜີປີສາດຂອງມັນຊັກນຳເຮົາໃຫ້ໄປໃນທາງຜິດຫຼືຫຼອກລວງເຮົານຳບໍ?— ແມ່ນແລ້ວ ພວກມັນເຮັດໄດ້ຖ້າເຮົາບໍ່ລະວັງຕົວ. ແຕ່ເຮົາບໍ່ຕ້ອງຢ້ານມັນ. ຄູຜູ້ຍິ່ງໃຫຍ່ບອກວ່າ: ‘ພະຍາມານບໍ່ມີອຳນາດເໜືອເຮົາ’ ຖ້າເຮົາໃກ້ຊິດກັບພະເຈົ້າ ພະອົງຈະປົກປ້ອງເຮົາຈາກພະຍາມານແລະຜີປີສາດຂອງມັນ.—ໂຢຮັນ 14:30.

ເປັນສິ່ງສຳຄັນທີ່ພວກເຮົາຮູ້ວ່າຜີປີສາດພະຍາຍາມໃຫ້ເຮົາເຮັດສິ່ງຊົ່ວຮ້າຍແນວໃດແດ່. ດັ່ງນັ້ນ ລອງຄິດເຖິງເລື່ອງນັ້ນ. ພວກຜີປີສາດໄດ້ເຮັດສິ່ງຊົ່ວຮ້າຍແບບໃດແດ່ເມື່ອພວກມັນມາທີ່ແຜ່ນດິນໂລກ?— ກ່ອນນ້ຳຖ້ວມໃຫຍ່ ພວກມັນມີເພດສຳພັນກັບຜູ້ຍິງ ເຊິ່ງເປັນສິ່ງທີ່ທູດສະຫວັນບໍ່ຄວນເຮັດ. ທຸກມື້ນີ້ພວກຜີປີສາດມັກເມື່ອຄົນເຮົາບໍ່ເຊື່ອຟັງກົດໝາຍຂອງພະເຈົ້າໃນເລື່ອງເພດສຳພັນ. ພໍ່ (ແມ່) ຢາກຖາມລູກວ່າ ໃຜເທົ່ານັ້ນທີ່ມີເພດສຳພັນໄດ້?— ລູກຕອບຖືກແລ້ວ ສະເພາະຄົນທີ່ໄດ້ແຕ່ງດອງກັນແລ້ວເທົ່ານັ້ນ.

ທຸກມື້ນີ້ ຄົນຫນຸ່ມສາວບາງຄົນມີເພດສຳພັນກັນ ການເຮັດແບບນັ້ນຜິດ. ຄຳພີໄບເບິນເວົ້າເຖິງ “ອະໄວຍະວະລັບ” ຂອງຜູ້ຊາຍ. (ພວກເລວີ 15:1-3, ທ.ປ.) ອະໄວຍະວະສືບພັນຂອງຜູ້ຍິງເອີ້ນວ່າຊ່ອງຄອດ. ພະເຢໂຫວາສ້າງອະໄວຍະວະເຫຼົ່ານີ້ເພື່ອຈຸດປະສົງພິເສດສຳລັບຄົນທີ່ແຕ່ງດອງກັນແລ້ວເທົ່ານັ້ນ. ຜີປີສາດຈະຍິນດີເມື່ອຄົນເຮົາເຮັດສິ່ງທີ່ພະເຢໂຫວາຫ້າມ. ຕົວຢ່າງເຊັ່ນ ຜີປີສາດມັກເມື່ອເດັກຍິງແລະເດັກຊາຍຫຼິ້ນອະໄວຍະວະເພດຂອງກັນ. ເຮົາບໍ່ຢາກເຮັດໃຫ້ຜີປີສາດດີໃຈແມ່ນບໍ?—

ຍັງມີອີກສິ່ງໜຶ່ງທີ່ຜີປີສາດມັກແຕ່ພະເຢໂຫວາກຽດຊັງ. ລູກຮູ້ບໍວ່າສິ່ງນັ້ນແມ່ນຫຍັງ?— ນັ້ນແມ່ນຄວາມຮຸນແຮງ. (ຄຳເພງ 11:5) ຄວາມຮຸນແຮງແມ່ນການທີ່ຄົນເຮົາເຮັດສິ່ງທີ່ໂຫດຮ້າຍແລະເຮັດໃຫ້ຄົນອື່ນບາດເຈັບ. ຢ່າລືມ ນັ້ນແມ່ນສິ່ງທີ່ຄົນຮ່າງຍັກລູກຂອງຜີປີສາດເຄີຍເຮັດ.

ນອກຈາກນັ້ນ ຜີປີສາດມັກຫຼອກຄົນໃຫ້ຢ້ານ. ລາງເທື່ອມັນອ້າງວ່າເປັນຜູ້ທີ່ຕາຍໄປແລ້ວ. ພວກມັນຍັງເຮັດຄືສຽງຂອງຜູ້ທີ່ຕາຍໄປ. ໂດຍວິທີນີ້ ຜີປີສາດລໍ້ລວງຫຼາຍຄົນໃຫ້ເຊື່ອວ່າຄົນຕາຍແລ້ວຍັງມີຊີວິດຢູ່ແລະເວົ້າກັບຄົນເປັນໄດ້. ແມ່ນແລ້ວ ຜີປີສາດເຮັດໃຫ້ຫຼາຍຄົນເຊື່ອວ່າຄົນຕາຍແລ້ວກາຍເປັນຜີ.

ດັ່ງນັ້ນ ເຮົາຕ້ອງລະວັງຕົວເພື່ອຈະບໍ່ຖືກຊາຕານແລະຜີປີສາດຂອງມັນລໍ້ລວງ. ຄຳພີໄບເບິນເຕືອນວ່າ ‘ຊາຕານພະຍາຍາມປອມຕົວເປັນທູດສະຫວັນດີແລະຜູ້ຮັບໃຊ້ຂອງມັນກໍເຮັດແບບດຽວຄືກັນ.’ (2 ໂກລິນໂທ 11:14, 15) ແຕ່ທີ່ຈິງແລ້ວ ຜີປີສາດຊົ່ວຫຼາຍ. ໃຫ້ເຮົາເບິ່ງວ່າພວກມັນພະຍາຍາມເຮັດໃຫ້ເຮົາເປັນຄືພວກມັນແນວໃດ.

ຄົນເຮົາຮຽນຮູ້ຫຼາຍຢ່າງກ່ຽວກັບຄວາມຮຸນແຮງ ເພດສຳພັນທີ່ບໍ່ຖືກຕ້ອງທັງເລື່ອງກາຍວິນຍານແລະຜີຈາກບ່ອນໃດ?— ຈາກການເບິ່ງລາຍການໂທລະພາບແລະຮູບເງົາ ໃນຄອມພິວເຕີແລະເກມວິດີໂອ ໃນອິນເຕີເນັດ ແລະການອ່ານປຶ້ມກາຕູນຕ່າງໆແມ່ນບໍ? ການເຮັດສິ່ງເຫຼົ່ານີ້ໃຫ້ເຮົາໃກ້ຊິດກັບພະເຈົ້າຫຼືໃກ້ຊິດກັບພະຍາມານແລະຜີປີສາດຂອງມັນ? ລູກຄິດແນວໃດ?—

Two boys watch a violent television show and then reenact it — ການເບິ່ງເລື່ອງຮຸນແຮງອາດຈະເກີດອັນໃດຂຶ້ນ?

ລູກຄິດວ່າໃຜຢາກໃຫ້ເຮົາຟັງແລະເບິ່ງສິ່ງທີ່ບໍ່ດີ?— ແມ່ນແລ້ວ ຊາຕານແລະຜີປີສາດຂອງມັນ. ດັ່ງນັ້ນ ລູກແລະພໍ່ (ແມ່) ຕ້ອງເຮັດແນວໃດ?— ເຮົາຕ້ອງອ່ານ ຟັງແລະເບິ່ງສິ່ງທີ່ດີເຊິ່ງຈະຊ່ອຍເຮົາໃຫ້ຮັບໃຊ້ພະເຢໂຫວາ. ລູກຄິດອອກບໍວ່າສິ່ງດີຕ່າງໆທີ່ເຮົາເຮັດໄດ້ນັ້ນມີຫຍັງແດ່?—

Two girls read a book together — ສິ່ງດີທີ່ເຮົາຄວນເຮັດແມ່ນຫຍັງ?

ຖ້າເຮົາເຮັດສິ່ງທີ່ດີກໍບໍ່ມີເຫດຜົນທີ່ຈະຢ້ານຜີປີສາດ. ພະເຍຊູມີລິດເດດຫຼາຍກວ່າພວກມັນ ແລະພວກຜີປີສາດຢ້ານພະອົງ. ມື້ໜຶ່ງຜີປີສາດຮ້ອງໃສ່ພະເຍຊູວ່າ “ພະອົງໄດ້ມາເພື່ອຈະໃຫ້ຂ້າພະເຈົ້າທັງຫຼາຍຈິບຫາຍຫຼື?” (ມາລະໂກ 1:24) ເຮົາຄົງຈະມີຄວາມສຸກແມ່ນບໍເມື່ອຕອນທີ່ພະເຍຊູທຳລາຍຊາຕານແລະຜີປີສາດຂອງມັນ?— ໃນຂະນະທີ່ລໍຖ້າເວລານັ້ນ ເຮົາໝັ້ນໃຈໄດ້ວ່າພະເຍຊູຈະປົກປ້ອງເຮົາຈາກຜີປີສາດຖ້າເຮົາໃກ້ຊິດກັບພະອົງແລະພໍ່ຝ່າຍສະຫວັນຂອງພະອົງສະເໝີ.

ໃຫ້ເຮົາອ່ານສິ່ງທີ່ເຮົາຕ້ອງເຮັດ ຢູ່ທີ່ພະທຳ 1 ເປໂຕ 5:8, 9 ແລະຢາໂກໂບ 4:7, 8.