ເລື່ອງຊີວິດຈິງ
“ການຕໍ່ສູ້ນີ້ເປັນຂອງພະເຢໂຫວາ”
ໃນວັນທີ 28 ມັງກອນ 2010 ເຊິ່ງເປັນມື້ທີ່ໜາວເຢັນໃນລະດູໜາວ ຂ້ອຍຢູ່ເມືອງສະຕຣາບູກທີ່ສວຍງາມໃນປະເທດຝຣັ່ງ. ແຕ່ຂ້ອຍບໍ່ໄດ້ໄປຫັ້ນເພື່ອໄປທ່ຽວ. ຂ້ອຍຢູ່ຫັ້ນໃນຖານະເປັນສ່ວນໜຶ່ງຂອງທີມກົດໝາຍທີ່ຖືກມອບໝາຍໃຫ້ໄປປົກປ້ອງສິດຂອງພະຍານພະເຢໂຫວາຕໍ່ໜ້າສານສິດທິມະນຸດຂອງເອີຣົບ (ECHR). ເລື່ອງທີ່ເຮົາຕ້ອງເວົ້າແມ່ນເປັນສິ່ງຖືກຕ້ອງບໍທີ່ລັດຖະບານຝຣັ່ງຮຽກຮ້ອງໃຫ້ພີ່ນ້ອງຂອງເຮົາຕ້ອງເສຍພາສີເປັນເງິນຈຳນວນມະຫາສານເກືອບປະມານ 64 ລ້ານຢູໂຣ (89.000.000 ໂດລາ). ເຫດຜົນທີ່ສຳຄັນກວ່ານັ້ນແມ່ນຊື່ຂອງພະເຢໂຫວາ ຊື່ສຽງຂອງປະຊາຊົນຂອງເພິ່ນ ແລະເຮົາຈະສາມາດນະມັດສະການພະເຢໂຫວາຢ່າງເສລີຕໍ່ໆໄປໄດ້ໃນປະເທດຝຣັ່ງ. ສິ່ງທີ່ເກີດຂຶ້ນໃນການພິຈາລະນາຄະດີຢືນຢັນວ່າ “ການຕໍ່ສູ້ນີ້ເປັນຂອງພະເຢໂຫວາ.” (1ຊມ. 17:47) ຂ້ອຍຈະເລົ່າໃຫ້ຟັງ.
ໃນປີ 1999 ລັດຖະບານຝຣັ່ງບອກວ່າສຳນັກງານສາຂາຂອງເຮົາທີ່ຢູ່ປະເທດຝຣັ່ງຕ້ອງເສຍພາສີສຳລັບເງິນບໍລິຈາກທີ່ເຂົາເຈົ້າໄດ້ຮັບໃນໄລຍະປີ 1993 ຫາ 1996. ເຮົາຂໍຄວາມຍຸຕິທຳກັບສານຕ່າງໆຢູ່ປະເທດຝຣັ່ງ ແຕ່ກໍບໍ່ໄດ້ຮັບຄວາມຍຸຕິທຳ. ຫຼັງຈາກທີ່ເຮົາແພ້ການຍື່ນອຸທອນຕໍ່ສານ ລັດຖະບານໄດ້ຍຶດເງິນທີ່ຢູ່ໃນບັນຊີທະນາຄານຂອງສາຂາເຊິ່ງມີຈຳນວນຫຼາຍກວ່າ 4,5 ລ້ານຢູໂຣ (6.300.000 ໂດລາ). ຄວາມຫວັງສຸດທ້າຍຂອງເຮົາທີ່ຈະໄດ້ເງິນຄືນແມ່ນຍື່ນເລື່ອງນີ້ກັບສານສິດທິມະນຸດຂອງເອີຣົບ. ແຕ່ກ່ອນຈະເລີ່ມພິຈາລະນາຄະດີຂອງເຮົາ ສານສິດທິມະນຸດຂອງເອີຣົບໄດ້ໃຫ້ພວກເຮົາພົບກັບທີມທະນາຍຄວາມຈາກລັດຖະບານຝຣັ່ງແລະພົບກັບຕົວແທນຈາກສານສິດທິມະນຸດຂອງເອີຣົບເພື່ອເບິ່ງວ່າພວກເຮົາຈະຕົກລົງກັນໄດ້ບໍ່ກ່ອນທີ່ເລື່ອງນີ້ຈະຖືກພິຈາລະນາ.
ພວກເຮົາພາກັນເດົາວ່າຕົວແທນຈາກສານສິດທິມະນຸດຂອງເອີຣົບຈະກົດດັນເຮົາໃຫ້ແກ້ໄຂບັນຫາໂດຍຕົກລົງຈ່າຍເງິນຈຳນວນໜຶ່ງໃຫ້ລັດຖະບານຝຣັ່ງ. ແຕ່ເຮົາເຂົ້າໃຈແຈ້ງວ່າການຈ່າຍເງິນແມ່ນແຕ່ຢູໂຣດຽວກໍຂັດກັບຫຼັກການໃນຄຳພີໄບເບິນ. ພີ່ນ້ອງໄດ້ບໍລິຈາກເງິນເພື່ອສະໜັບສະໜູນການປົກຄອງຂອງພະເຢໂຫວາ ສະນັ້ນເງິນທີ່ເຂົາເຈົ້າບໍລິຈາກຈຶ່ງບໍ່ໄດ້ເປັນຂອງລັດຖະບານຝຣັ່ງ. (ມທ. 22:21) ແຕ່ພວກເຮົາກໍໄປຮ່ວມການປະຊຸມນັ້ນເພື່ອສະແດງໃຫ້ເຫັນວ່າເຮົານັບຖືກົດລະບຽບຂອງສານ.
ທີມກົດໝາຍຂອງພວກເຮົາຖ່າຍຮູບຢູ່ຕໍ່ໜ້າສານສິດທິມະນຸດຂອງເອີຣົບ ປີ 2010
ພວກເຮົາພົບກັນຢູ່ຫ້ອງປະຊຸມໜຶ່ງທີ່ງາມໆຂອງສານສິດທິມະນຸດຂອງເອີຣົບ. ການປະຊຸມເລີ່ມຕົ້ນບໍ່ດີແທ້ໆ. ຕັ້ງແຕ່ຕອນເລີ່ມຕົ້ນເລີຍ ຕົວແທນຈາກສານບອກວ່າພະຍານພະເຢໂຫວາຕ້ອງເສຍພາສີຈຳນວນໜຶ່ງທີ່ລັດຖະບານຝຣັ່ງຮຽກຮ້ອງ. ເຮົາຖາມລາວທັນທີວ່າ: “ເຈົ້າຮູ້ບໍວ່າລັດຖະບານຝຣັ່ງໄດ້ຍຶດເອົາເງິນຫຼາຍກວ່າ 4,5 ລ້ານຢູໂຣຈາກບັນຊີທະນາຄານຂອງພວກເຮົາ?”
ລາວເຮັດໜ້າຕົກໃຈຫຼາຍ. ເມື່ອທີມທະນາຍຄວາມຈາກລັດຖະບານຢືນຢັນວ່າເຂົາເຈົ້າໄດ້ເຮັດແບບນັ້ນແທ້ ຄວາມຄິດຂອງລາວຕໍ່ກັບຄະດີນີ້ໄດ້ປ່ຽນໄປ. ລາວຮ້າຍເຂົາເຈົ້າແລະຈົບການປະຊຸມທັນທີເລີຍ. ໂດຍທີ່ເຮົາບໍ່ໄດ້ຄາດຄິດ ຂ້ອຍເຫັນວ່າພະເຢໂຫວາໄດ້ປ່ຽນແປງທຸກຢ່າງເພື່ອໃຫ້ເຮົາຊະນະຄະດີ. ພວກເຮົາຕື່ນເຕັ້ນຫຼາຍເມື່ອອອກຈາກການປະຊຸມນັ້ນ ແລະພວກເຮົາກໍຕົກໃຈຫຼາຍກ່ຽວກັບສິ່ງທີ່ໄດ້ເກີດຂຶ້ນ.
ໃນວັນທີ 30 ມິຖຸນາ 2011 ສານສິດທິມະນຸດຂອງເອີຣົບໄດ້ຕັດສິນເປັນເອກະພາບກັນໃຫ້ເຮົາຊະນະຄະດີ. ຄຳຕັດສິນນັ້ນແຈ້ງວ່າການຮຽກຮ້ອງໃຫ້ເສຍພາສີຖືວ່າເປັນໂມຄະ ແລະສັ່ງໃຫ້ລັດຖະບານຝຣັ່ງສົ່ງເງິນທີ່ໄດ້ຍຶດໄປໃຫ້ພວກເຮົາຄືນລວມທັງໃຫ້ຈ່າຍດອກເບ້ຍພ້ອມ. ຄຳຕັດສິນທີ່ສຳຄັນນີ້ຍັງປົກປ້ອງການນະມັດສະການແທ້ຢູ່ຝຣັ່ງ. ຄຳຖາມດຽວທີ່ພວກເຮົາຖາມຕົວແທນຈາກສານສິດທິມະນຸດເຊິ່ງພວກເຮົາບໍ່ໄດ້ຄິດໄວ້ກ່ອນວ່າຈະຖາມເປັນຄືກັບກ້ອນຫີນທີ່ແກວ່ງໃສ່ໜ້າຜາກໂກລີອາດ. ມັນປ່ຽນແປງຜົນຂອງຄະດີ. ເປັນຫຍັງເຮົາຈຶ່ງຊະນະ? ຄືກັບທີ່ດາວິດບອກໂກລີອາດ ຍ້ອນ “ການຕໍ່ສູ້ນີ້ເປັນຂອງພະເຢໂຫວາ.”—1ຊມ. 17:45-47
ນີ້ບໍ່ແມ່ນເທື່ອທຳອິດທີ່ເຮົາຊະນະຄະດີທາງກົດໝາຍ. ຈົນຮອດທຸກມື້ນີ້ ເຖິງວ່າລັດຖະບານທີ່ມີອຳນາດແລະກຸ່ມສາສະໜາຕ່າງໆຕໍ່ຕ້ານເຮົາ ແຕ່ສານສູງໃນ 70 ປະເທດແລະສານຍຸຕິທຳລະຫວ່າງປະເທດຫຼາຍສານໄດ້ຕັດສິນໃຫ້ພະຍານພະເຢໂຫວາຊະນະ 1.225 ຄະດີ. ການຊະນະທາງດ້ານກົດໝາຍແບບນີ້ປົກປ້ອງສິດພື້ນຖານຂອງເຮົາ ເຊັ່ນ: ສິດທີ່ຖືກຕ້ອງຕາມກົດໝາຍໃນຖານະເປັນກຸ່ມສາສະໜາ ສາມາດປະກາດໄດ້ ການປະຕິເສດທີ່ຈະບໍ່ເຂົ້າຮ່ວມພິທີສະຫຼອງທີ່ສະແດງເຖິງຄວາມຮັກຊາດ ແລະການບໍ່ໃສ່ເລືອດ.
ຂ້ອຍມາກ່ຽວຂ້ອງກັບຄະດີຢູ່ເອີຣົບໄດ້ແນວໃດທັງໆທີ່ຂ້ອຍຮັບໃຊ້ຢູ່ສຳນັກງານໃຫຍ່ຂອງພະຍານພະເຢໂຫວາຢູ່ນິວຢອກ ປະເທດອາເມຣິກາ?
ຖືກລ້ຽງໂດຍພໍ່ແມ່ທີ່ເປັນມິດຊັນນາຣີທີ່ກະຕືລືລົ້ນ
ພໍ່ແມ່ຂອງຂ້ອຍຊື່ຈອດແລະລູຊີ. ພວກເພິ່ນຈົບຈາກໂຮງຮຽນກິລຽດລຸ້ນທີ 12. ພວກເພິ່ນຮັບໃຊ້ຢູ່ເອທິໂອເປຍຕອນທີ່ຂ້ອຍເກີດໃນປີ 1956. ພວກເພິ່ນຕັ້ງຊື່ໃຫ້ຂ້ອຍວ່າຟີລິບຕາມຊື່ຂອງຟີລິບຜູ້ປະກາດຂ່າວດີໃນສະຕະວັດທຳອິດ. (ກຈກ. 21:8) ໃນປີຕໍ່ມາ ລັດຖະບານໄດ້ສັ່ງຫ້າມວຽກຂອງພະຍານພະເຢໂຫວາ. ເຖິງວ່າຕອນນັ້ນຂ້ອຍຍັງນ້ອຍຫຼາຍ ແຕ່ຂ້ອຍຈື່ໄດ້ວ່າຄອບຄົວຂອງເຮົາຕ້ອງລັກໄປປະຊຸມແລະລັກໄປປະກາດເຊິ່ງພີ່ນ້ອງຈັດແບບລັບໆ. ຍ້ອນຍັງນ້ອຍ ຂ້ອຍຈຶ່ງຄິດວ່າມັນໜ້າຕື່ນເຕັ້ນ! ໜ້າເສົ້າໃຈ ພວກເຈົ້າໜ້າທີ່ລັດຖະບານບັງຄັບພວກເຮົາໃຫ້ອອກຈາກປະເທດໃນປີ 1960.
ພີ່ນ້ອງນາທານ ນໍ (ຢູ່ເບື້ອງຊ້າຍ) ໄປຢາມຄອບຄົວຂອງຂ້ອຍຢູ່ເມືອງອັດດິດສ໌ ອາເບບາ ປະເທດເອທິໂອເປຍ ປີ 1959
ຄອບຄົວຂອງເຮົາຍ້າຍໄປຢູ່ເມືອງວິຊິຕາ ລັດຄານຊັດສ໌ ປະເທດອາເມຣິກາ. ພໍ່ກັບແມ່ເອົາສິ່ງໜຶ່ງທີ່ພິເສດຫຼາຍກັບມານຳ ນັ້ນຄືການເປັນມິດຊັນນາຣີທີ່ກະຕືລືລົ້ນ. ພວກເພິ່ນສອນຂ້ອຍ ເອື້ອຍຈູດີ້ ແລະນ້ອງຊາຍຂອງຂ້ອຍຊື່ເລຊະລີ້ໃຫ້ຮັກພະເຢໂຫວາແລະຮັບໃຊ້ເພິ່ນສຸດຫົວໃຈຂອງເຮົາ. ເອື້ອຍຈູດີ້ກັບເລຊະລີ້ກໍເກີດຢູ່ເອທິໂອເປຍຄືກັນ. ຂ້ອຍຮັບບັບເຕມາຕອນອາຍຸ 13 ປີ. ສາມປີຕໍ່ມາ ຄອບຄົວຂອງເຮົາຍ້າຍໄປຮັບໃຊ້ຢູ່ເມືອງອາເຣຄິວພາໃນປະເທດເປຣູ ເຊິ່ງເປັນບ່ອນທີ່ຕ້ອງການຜູ້ປະກາດຫຼາຍກວ່າ.
ໃນປີ 1974 ຕອນນັ້ນຂ້ອຍອາຍຸ 18 ປີ ສຳນັກງານສາຂາເປຣູໄດ້ມອບໝາຍຂ້ອຍກັບພີ່ນ້ອງຊາຍອີກ 4 ຄົນໃຫ້ຮັບໃຊ້ເປັນໄພໂອເນຍພິເສດ. ເຮົາຕ້ອງໄປປະກາດໃນເຂດທີ່ບໍ່ເຄີຍປະກາດມາກ່ອນຢູ່ເຂດພູແອນດີ້. ວຽກມອບໝາຍນີ້ລວມເຖິງການປະກາດກັບຄົນພື້ນເມືອງທີ່ເວົ້າພາສາເກຊົວແລະພາສາອາຍມາຣານຳ. ເຮົາເດີນທາງດ້ວຍລົດທີ່ເປັນເຮືອນເຊິ່ງເຮົາເອີ້ນວ່າເຮືອໂນອາຍ້ອນມັນມີຮູບຊົງຄືກັບກ່ອງໃຫຍ່ໆ. ຂ້ອຍມັກຄິດເຖິງຕອນທີ່ເຮົາໃຊ້ຄຳພີໄບເບິນເພື່ອຊ່ວຍຄົນພື້ນເມືອງໃຫ້ເຫັນວ່າອີກຈັກໜ້ອຍພະເຢໂຫວາຈະກຳຈັດຄວາມທຸກຍາກ ຄວາມເຈັບປ່ວຍ ແລະຄວາມຕາຍໃຫ້ໝົດໄປ. (ພນມ. 21:3, 4) ຫຼາຍຄົນເຂົ້າມາເປັນຜູ້ນະມັດສະການພະເຢໂຫວາ.
ລົດທີ່ເປັນເຮືອນ ປີ 1974
ຖືກມອບໝາຍໃຫ້ໄປຮັບໃຊ້ຢູ່ສຳນັກງານໃຫຍ່
ປີ 1977 ຕອນທີ່ພີ່ນ້ອງອໍເບີດ ສະໂຣເດີ້ທີ່ເປັນສະມາຊິກຂອງຄະນະກຳມະການປົກຄອງຂອງພະຍານພະເຢໂຫວາໄປຢາມເປຣູ ລາວບອກຂ້ອຍໃຫ້ຍື່ນໃບສະໝັກເຂົ້າເບເທນເພື່ອຮັບໃຊ້ຢູ່ສຳນັກງານໃຫຍ່. ຂ້ອຍໄດ້ເຮັດຕາມທີ່ລາວບອກ. ຕໍ່ມາບໍ່ດົນ ໃນວັນທີ 17 ມິຖຸນາ 1977 ຂ້ອຍເລີ່ມຮັບໃຊ້ຢູ່ເບເທນບຣຸກລິນ. ໃນ 4 ປີທຳອິດ ຂ້ອຍເຮັດວຽກຢູ່ພະແນກອະນາໄມແລະພະແນກສ້ອມແປງ.
ມື້ທີ່ເຮົາແຕ່ງດອງ ປີ 1979
ໃນເດືອນມິຖຸນາ ປີ 1978 ຂ້ອຍເຈິກັບເອລີຊາເບັດ ເອວາໂລນຢູ່ການປະຊຸມນາໆຊາດຢູ່ເມືອງນິວອໍລີນ ລັດລຸຍຊີອານາ. ຄືກັບຂ້ອຍ ລາວຖືກລ້ຽງໂດຍພໍ່ແມ່ທີ່ຮັບໃຊ້ພະເຢໂຫວາສຸດຫົວໃຈຂອງເຂົາເຈົ້າ. ຕອນທີ່ຂ້ອຍເຈິກັບເອລີຊາເບັດ ລາວເປັນໄພໂອເນຍປະຈຳໄດ້ 4 ປີແລ້ວ ແລະລາວຢາກຮັບໃຊ້ພະເຢໂຫວາເຕັມເວລາຕໍ່ໆໄປຕະຫຼອດຊີວິດຂອງລາວ. ເຮົາຕິດຕໍ່ກັນ ແລະເມື່ອຮູ້ຈັກກັນຫຼາຍຂຶ້ນ ເຮົາກໍຮັກກັນຫຼາຍ. ເຮົາແຕ່ງດອງວັນທີ 20 ຕຸລາ 1979 ແລ້ວເອລີຊາເບັດກໍເຂົ້າມາຮັບໃຊ້ຢູ່ເບເທນນຳກັນກັບຂ້ອຍ.
ປະຊາຄົມທຳອິດຂອງເຮົາແມ່ນປະຊາຄົມບຣຸກລິນສະເປນນິດ. ພີ່ນ້ອງໃນປະຊາຄົມນັ້ນມີຄວາມຮັກຫຼາຍ. ຕະຫຼອດຫຼາຍປີ ເຮົາໄດ້ຮັບໃຊ້ຢູ່ອີກ 3 ປະຊາຄົມທີ່ມີຄວາມຮັກເຊິ່ງສະໜັບສະໜູນເຮົາໃຫ້ຮັບໃຊ້ຢູ່ເບເທນຕໍ່ໄປ. ເຮົາຂອບໃຈແທ້ໆທີ່ເຂົາເຈົ້າຊ່ວຍເຫຼືອເຮົາສະເໝີ ແລະເຮົາກໍຂອບໃຈຄືກັນທີ່ໝູ່ແລະຄອບຄົວໄດ້ຊ່ວຍເບິ່ງແຍງພໍ່ແມ່ຂອງເຮົາທັງສອງຄົນທີ່ເຖົ້າແລ້ວ.
ພີ່ນ້ອງເບເທນທີ່ຢູ່ປະຊາຄົມບຣຸກລິນສະເປນນິດ ປີ 1986
ເຮັດວຽກຢູ່ພະແນກກົດໝາຍ
ໃນເດືອນມັງກອນ ປີ 1982 ຂ້ອຍຕົກໃຈຫຼາຍຍ້ອນຖືກມອບໝາຍໃຫ້ໄປເຮັດວຽກຢູ່ພະແນກກົດໝາຍຂອງເບເທນ. ສາມປີຕໍ່ມາ ຜູ້ເບິ່ງແຍງພະແນກໄດ້ຂໍໃຫ້ຂ້ອຍໄປຮຽນກົດໝາຍຢູ່ມະຫາວິທະຍາໄລເພື່ອຈະໄດ້ເປັນທະນາຍຄວາມທີ່ມີໃບອະນຸຍາດ ເຊິ່ງເປັນສ່ວນໜຶ່ງຂອງວຽກມອບໝາຍຂອງຂ້ອຍ. ຂ້ອຍຕົກໃຈຫຼາຍທີ່ໄດ້ຮູ້ຕອນທີ່ຮຽນໜັງສືວ່າປະຊາຊົນຢູ່ອາເມຣິກາແລະຢູ່ປະເທດອື່ນໆມີອິດສະຫຼະເຮັດຫຼາຍຢ່າງໄດ້ແມ່ນຍ້ອນໄຊຊະນະທາງດ້ານກົດໝາຍຂອງພະຍານພະເຢໂຫວາ. ມີການເວົ້າເຖິງຄະດີທີ່ສຳຄັນເຫຼົ່ານີ້ໃນຫ້ອງຮຽນ.
ໃນປີ 1986 ຕອນນັ້ນຂ້ອຍອາຍຸ 30 ປີ ຂ້ອຍຖືກມອບໝາຍໃຫ້ເປັນຜູ້ເບິ່ງແຍງພະແນກກົດໝາຍ. ຍ້ອນວ່າອາຍຸຍັງນ້ອຍແລະຂ້ອຍກໍເຂົ້າໃຈວ່າວຽກມອບໝາຍນີ້ບໍ່ງ່າຍເລີຍ ຂ້ອຍຈຶ່ງຮູ້ສຶກວ່າເປັນສິດທິພິເສດແລະທັງຮູ້ສຶກກັງວົນໄປນຳ.
ຂ້ອຍໄດ້ເປັນທະນາຍຄວາມໃນປີ 1988 ແຕ່ຂ້ອຍບໍ່ໄດ້ສຳນຶກເລີຍວ່າການຮຽນແບບນັ້ນສົ່ງຜົນເສຍຫາຍຫຼາຍສ່ຳໃດຕໍ່ສາຍສຳພັນຂອງຂ້ອຍກັບພະເຢໂຫວາ. ການຮຽນສູງໆເຮັດໃຫ້ຄົນເຮົາເປັນຄົນທະເຍີທະຍານແລະຮູ້ສຶກວ່າເຂົາເຈົ້າດີກວ່າຄົນອື່ນທີ່ບໍ່ໄດ້ຮຽນສູງແບບນັ້ນ. ເອລີຊາເບັດໄດ້ຊ່ວຍຂ້ອຍຫຼາຍແທ້ໆ. ລາວຊ່ວຍຂ້ອຍໃຫ້ກັບມາຈົດຈໍ່ໃນສິ່ງທີ່ຂ້ອຍເຄີຍເຮັດເພື່ອຈະມີສາຍສຳພັນທີ່ແໜ້ນແຟ້ນກັບພະເຢໂຫວາຄືກັບຕອນກ່ອນທີ່ຂ້ອຍຈະເຂົ້າໂຮງຮຽນກົດໝາຍ. ມັນຕ້ອງໃຊ້ເວລາ ແຕ່ຂ້ອຍຄ່ອຍໆຟື້ນໂຕທາງດ້ານຄວາມເຊື່ອ. ຂ້ອຍຮຽນຮູ້ຈາກປະສົບການຂອງໂຕເອງວ່າການມີຄວາມຮູ້ພິເສດບາງຢ່າງບໍ່ແມ່ນສິ່ງທີ່ສຳຄັນທີ່ສຸດໃນຊີວິດ. ສິ່ງທີ່ເຮັດໃຫ້ຊີວິດມີຄວາມໝາຍແທ້ໆແມ່ນການມີສາຍສຳພັນທີ່ໃກ້ຊິດກັບພະເຢໂຫວາແລະມີຄວາມຮັກທີ່ເລິກເຊິ່ງຕໍ່ເພິ່ນແລະຕໍ່ພີ່ນ້ອງ.
ເຮັດໃຫ້ການປະກາດຂ່າວດີເປັນທີ່ຍອມຮັບຕາມກົດໝາຍ
ຫຼັງຈາກຮຽນຈົບກົດໝາຍ ຂ້ອຍສຸມໃສ່ການຊ່ວຍພະແນກຂອງເຮົາເພື່ອເບິ່ງແຍງເລື່ອງກົດໝາຍຢູ່ເບເທນແລະການປົກປ້ອງສິດຂອງເຮົາໃນການປະກາດຂ່າວດີຢູ່ສານ. ວຽກຂອງຂ້ອຍຕື່ນເຕັ້ນຫຼາຍ ແຕ່ກໍທ້າທາຍນຳຍ້ອນສິ່ງຕ່າງໆປ່ຽນແປງໄວຫຼາຍໃນອົງການ. ຕົວຢ່າງເຊັ່ນ: ເຮົາເຄີຍຂໍໃຫ້ຄົນບໍລິຈາກເງິນເມື່ອເອົາປຶ້ມຂອງເຮົາ ແຕ່ເລີ່ມຕັ້ງແຕ່ປີ 1991 ພະແນກກົດໝາຍຖືກຂໍໃຫ້ຊ່ວຍແນະນຳເພື່ອຈະເຊົາເຮັດແບບນີ້. ຫຼັງຈາກນັ້ນ ພະຍານພະເຢໂຫວາໄດ້ແຈກຢາຍປຶ້ມໂດຍທີ່ບໍ່ໃຫ້ເສຍຄ່າຫຍັງ. ການເຮັດແບບນີ້ເຮັດໃຫ້ວຽກຢູ່ເບເທນແລະວຽກໃນເຂດງ່າຍຂຶ້ນ ແລະທັງຊ່ວຍຫຼີກລ່ຽງບັນຫາເລື່ອງເສຍພາສີ. ບາງຄົນຄິດວ່າການປ່ຽນແປງນີ້ຈະເຮັດໃຫ້ເຮົາສູນເສຍເງິນຈຳນວນຫຼາຍຈົນບໍ່ມີປຶ້ມພຽງພໍທີ່ຈະເອົາໄປໃຫ້ຄົນສົນໃຈ ແລະຜົນກໍຄືຈະມີໜ້ອຍຄົນທີ່ຈະຮຽນຮູ້ກ່ຽວກັບພະເຢໂຫວາ. ມັນພັດກົງກັນຂ້າມ. ຈຳນວນຄົນທີ່ຮັບໃຊ້ພະເຢໂຫວາຕັ້ງແຕ່ປີ 1990 ມີຫຼາຍກວ່າສອງເທົ່າ ແລະຕອນນີ້ທຸກຄົນສາມາດອ່ານຄວາມຮູ້ທີ່ປົກປ້ອງຊີວິດໂດຍບໍ່ຕ້ອງຈ່າຍຄ່າຫຍັງເລີຍ. ຂ້ອຍໄດ້ເຫັນດ້ວຍຕາໂຕເອງວ່າການປ່ຽນແປງໃຫຍ່ໆໃນອົງການຂອງເຮົາປະສົບຜົນສຳເລັດໄດ້ແມ່ນຍ້ອນການຊ່ວຍເຫຼືອຈາກພະເຢໂຫວາເທົ່ານັ້ນ ແລະຍ້ອນການຊີ້ນຳທີ່ເຮົາໄດ້ຮັບຈາກທາດທີ່ສັດຊື່ແລະສຸຂຸມ.—ອພຍ. 15:2; ມທ. 24:45
ເຮົາຊະນະຄະດີຕ່າງໆໃນສານບໍ່ແມ່ນຍ້ອນເຮົາມີທະນາຍຄວາມທີ່ເກັ່ງ ແຕ່ຫຼາຍເທື່ອສິ່ງທີ່ເຮັດໃຫ້ຜູ້ພິພາກສາແລະເຈົ້າໜ້າທີ່ລັດຖະບານຊ່ວຍເຮົາແມ່ນຍ້ອນການປະພຶດທີ່ດີຂອງພະຍານພະເຢໂຫວາ. ຂ້ອຍເຫັນຕົວຢ່າງເລື່ອງນີ້ໃນປີ 1998 ຕອນທີ່ຄະນະກຳມະການປົກຄອງ 3 ຄົນກັບເມຍຂອງເຂົາເຈົ້າໄປຮ່ວມການປະຊຸມພິເສດຢູ່ກູບາ. ຄວາມອ່ອນໂຍນແລະການປະພຶດທີ່ສະແດງຄວາມນັບຖືຂອງເຂົາເຈົ້າເຮັດໃຫ້ເຈົ້າໜ້າທີ່ລັດຖະບານໝັ້ນໃຈວ່າພວກເຮົາບໍ່ກ່ຽວຂ້ອງກັບເລື່ອງການເມືອງ. ການປະພຶດແບບນີ້ສຳຄັນກວ່າທຸກສິ່ງທີ່ເຮົາເວົ້າກັບເຈົ້າໜ້າທີ່ລັດຖະບານໃນການປະຊຸມທີ່ເປັນທາງການກັບເຂົາເຈົ້າ.
ແຕ່ເມື່ອເລື່ອງທາງດ້ານກົດໝາຍບໍ່ສາມາດແກ້ໄຂໄດ້ໃນວິທີສັນຕິ ເຮົາກໍ “ພະຍາຍາມເຮັດໃຫ້ການປະກາດຂ່າວດີເປັນທີ່ຍອມຮັບຕາມກົດໝາຍ” ໃນສານ. (ຟລປ. 1:7) ຕົວຢ່າງເຊັ່ນ: ເປັນເວລາຫຼາຍສິບປີທີ່ອຳນາດການປົກຄອງຢູ່ເອີຣົບແລະຢູ່ເກົາຫຼີໃຕ້ປະຕິເສດບໍ່ຍອມຮັບສິດຂອງເຮົາທີ່ຈະບໍ່ເປັນທະຫານ. ຜົນກໍຄື ພີ່ນ້ອງຊາຍຢູ່ເອີຣົບປະມານ 18.000 ຄົນ ແລະພີ່ນ້ອງຊາຍຫຼາຍກວ່າ 19.000 ຄົນຢູ່ເກົາຫຼີໃຕ້ຕ້ອງຕິດຄຸກຫຼາຍປີຍ້ອນການເປັນທະຫານຂັດກັບໃຈຮູ້ຜິດຮູ້ຖືກຂອງເຂົາເຈົ້າ.
ໃນທີ່ສຸດ ໃນວັນທີ 7 ກໍລະກົດ 2011 ສານສິດທິມະນຸດຂອງເອີຣົບໄດ້ອອກຄຳຕັດສິນທີ່ສຳຄັນໃນຄະດີລະຫວ່າງພີ່ນ້ອງບາຍັດຍັນກັບປະເທດອາກເມນີວ່າໃຫ້ທຸກປະເທດໃນເອີຣົບອະນຸຍາດໃຫ້ມີການເລືອກເຮັດວຽກຮັບໃຊ້ສັງຄົມແທນທີ່ຈະໄປເປັນທະຫານຍ້ອນຄວາມເຊື່ອທາງສາສະໜາ. ໃນວັນທີ 28 ມິຖຸນາ 2018 ສານລັດຖະທຳມະນູນເກົາຫຼີໃຕ້ກໍໄດ້ຕັດສິນຄ້າຍໆກັນນີ້. ຖ້າພີ່ນ້ອງຊາຍໜຸ່ມຈຳນວນໜຶ່ງບໍ່ໄດ້ຮັກສາຄວາມເປັນກາງ ເຮົາຈະບໍ່ມີທາງໄດ້ຮັບໄຊຊະນະແບບນີ້.
ພະແນກກົດໝາຍຢູ່ສຳນັກງານໃຫຍ່ແລະຢູ່ສາຂາຕ່າງໆທົ່ວໂລກກຳລັງເຮັດວຽກໜັກເພື່ອປົກປ້ອງສິດຂອງເຮົາໃນການນະມັດສະການພະເຢໂຫວາແລະເພື່ອປະກາດເລື່ອງການປົກຄອງຂອງເພິ່ນ. ເຮົາຖືວ່າເປັນກຽດແທ້ໆທີ່ໄດ້ເປັນຕົວແທນຂອງພີ່ນ້ອງທີ່ເຈິກັບການຕໍ່ຕ້ານຈາກລັດຖະບານ. ເຖິງວ່າບາງເທື່ອເຮົາບໍ່ຊະນະຄະດີໃນສານ ແຕ່ເຮົາກໍໄດ້ບອກໃຫ້ເຈົ້າແຂວງ ກະສັດ ແລະຊາດຕ່າງໆຮູ້ກ່ຽວກັບຄວາມເຊື່ອຂອງເຮົາ. (ມທ. 10:18) ຜູ້ພິພາກສາ ຕົວແທນຈາກລັດຖະບານ ສື່ມວນຊົນ ແລະຄົນທົ່ວໄປຕ້ອງໄດ້ພິຈາລະນາຂໍ້ຄຳພີຕ່າງໆທີ່ເຮົາຂຽນໄວ້ໃນເອກະສານທຸກຢ່າງທີ່ເຮົາຍື່ນແລະຂໍ້ຄຳພີທີ່ເຮົາຍົກຂຶ້ນມາເວົ້າໃນສານເພື່ອສະໜັບສະໜູນຄະດີຂອງເຮົາ. ຄົນທີ່ມີຫົວໃຈທີ່ດີໄດ້ຮຽນຮູ້ວ່າພະຍານພະເຢໂຫວາແມ່ນໃຜແລະຄວາມເຊື່ອຂອງເຮົາອາໄສຄຳພີໄບເບິນເປັນຫຼັກ. ບາງຄົນໃນກຸ່ມຄົນເຫຼົ່ານີ້ໄດ້ເຂົ້າມາເປັນພີ່ນ້ອງ.
ຂອບໃຈພະເຢໂຫວາ
ຕະຫຼອດ 40 ປີທີ່ຜ່ານມາ ຂ້ອຍມີສິດທິພິເສດໄດ້ເຮັດວຽກເລື່ອງກົດໝາຍກັບສຳນັກງານສາຂາຢູ່ທົ່ວໂລກ ໄດ້ໄປຂຶ້ນສານສູງຫຼາຍບ່ອນ ແລະໄດ້ເຈິກັບເຈົ້າໜ້າທີ່ລັດຖະບານທີ່ເປັນຄົນສຳຄັນ. ຂ້ອຍຮັກແລະຊົມເຊີຍພີ່ນ້ອງທີ່ເຮັດວຽກນຳກັນກັບຂ້ອຍໃນພະແນກກົດໝາຍຢູ່ສຳນັກງານໃຫຍ່ແລະຢູ່ສາຂາຕ່າງໆທົ່ວໂລກ. ຊີວິດຂອງຂ້ອຍໄດ້ຮັບສິ່ງດີໆຫຼາຍຢ່າງແລະມີຄວາມສຸກຫຼາຍ.
ເອລີຊາເບັດສະໜັບສະໜູນຂ້ອຍດ້ວຍຄວາມຮັກແລະດ້ວຍຄວາມພັກດີທັງໃນຍາມທີ່ສະດວກແລະໃນຍາມທີ່ຍາກລຳບາກຕະຫຼອດ 45 ປີທີ່ຜ່ານມາ. ຂ້ອຍຊົມເຊີຍລາວທີ່ໄດ້ເຮັດແບບນັ້ນທັງໆທີ່ຕ້ອງຕໍ່ສູ້ກັບຄວາມເຈັບປ່ວຍກ່ຽວກັບລະບົບພູມຕ້ານທານເຊິ່ງເຮັດໃຫ້ລາວບໍ່ມີແຮງ.
ເຮົາໄດ້ເຫັນດ້ວຍຕາໂຕເອງວ່າກຳລັງແລະໄຊຊະນະບໍ່ໄດ້ມາຈາກຄວາມສາມາດຂອງເຮົາເອງ. ຄືກັບທີ່ດາວິດເວົ້າ “ພະເຢໂຫວາເປັນກຳລັງສຳລັບຄົນຂອງເພິ່ນ.” (ພສ. 28:8) ທີ່ຈິງ “ການຕໍ່ສູ້ນີ້ເປັນຂອງພະເຢໂຫວາ.”