ຕອນທີ 1
ຄອບຄົວຈະມີຄວາມສຸກເມື່ອໝາຍເພິ່ງພະເຈົ້າ
“ຜູ້ໄດ້ສ້າງມະນຸດແຕ່ຕົ້ນເດີມໄດ້ສ້າງເຂົາເປັນຊາຍເປັນຍິງ.”—ມັດທາຍ 19:4
ພະເຢໂຫວາa ພະເຈົ້າເປັນຜູ້ທຳອິດທີ່ກໍ່ຕັ້ງໃຫ້ມີຄອບຄົວ. ຄຳພີໄບເບິນບອກວ່າພະເຈົ້າໄດ້ສ້າງຜູ້ຍິງຄົນທຳອິດແລະໄດ້ “ຍົກໃຫ້ຜູ້ຊາຍນັ້ນ.” ລາວແມ່ນອາດາມ ລາວມີຄວາມສຸກຫຼາຍແລະເວົ້າວ່າ: “ຜູ້ນີ້ແມ່ນກະດູກມາແຕ່ກະດູກຂອງເຮົາແລະເນື້ອໜັງມາແຕ່ເນື້ອໜັງຂອງເຮົາ.” (ຕົ້ນເດີມ 2:22, 23) ພະເຢໂຫວາຢາກໃຫ້ຄົນທີ່ແຕ່ງດອງກັນຢ່າງຖືກຕ້ອງຕາມກົດໝາຍມີຄວາມສຸກ.
ເມື່ອທ່ານແຕ່ງດອງແລ້ວ ທ່ານອາດຈະຄິດວ່າຊີວິດຈະພຽບພ້ອມທຸກຢ່າງ. ແຕ່ໃນຄວາມເປັນຈິງແລ້ວບໍ່ວ່າຜົວແລະເມຍຈະຮັກກັນຫຼາຍປານໃດ ກໍຍັງຈະມີບັນຫາເກີດຂຶ້ນ. (1 ໂກລິນໂທ 7:28) ສະນັ້ນ ປຶ້ມນີ້ຈຶ່ງໄດ້ຊີ້ໃຫ້ເຫັນຫຼັກການຕ່າງໆໃນຄຳພີໄບເບິນ ຖ້າເຮັດຕາມນັ້ນ ທ່ານກໍຈະມີຊີວິດຄູ່ແລະມີຄອບຄົວທີ່ມີຄວາມສຸກໄດ້.—ຄຳເພງ 19:8-11
1 ຍອມຮັບບົດບາດທີ່ພະເຢໂຫວາມອບໝາຍໃຫ້
ຄຳພີໄບເບິນແນະນຳວ່າ: ຜົວເປັນຫົວໜ້າຂອງຄອບຄົວ.—ເອເຟດ 5:23
ພະເຢໂຫວາຄາດໝາຍໃຫ້ຜູ້ທີ່ເປັນຜົວປະຕິບັດຕໍ່ເມຍຢ່າງນຸ່ມນວນ. (1 ເປໂຕ 3:7) ພະອົງປະທານເມຍໃຫ້ເປັນຜູ້ຊ່ວຍເສີມທ່ານ ແລະພະອົງຕ້ອງການໃຫ້ທ່ານປະຕິບັດຕໍ່ເມຍຢ່າງໃຫ້ກຽດແລະດ້ວຍຄວາມຮັກ. (ຕົ້ນເດີມ 2:18) ທ່ານຕ້ອງຮັກເມຍໃຫ້ຫຼາຍຈົນເຖິງຂັ້ນວ່າເຕັມໃຈໃຫ້ສິ່ງທີ່ເມຍມັກມາກ່ອນສິ່ງທີ່ຕົນມັກ.—ເອເຟດ 5:25-29
ພະເຢໂຫວາຄາດໝາຍໃຫ້ເມຍນັບຖືຜົວຢ່າງສຸດຊຶ້ງ ແລະເປັນຜູ້ຊ່ວຍເສີມຜົວໃຫ້ເຮັດໜ້າທີ່ຂອງຕົນໃຫ້ສຳເລັດ. (1 ໂກລິນໂທ 11:3; ເອເຟດ 5:33) ເມຍຕ້ອງເຕັມໃຈຮ່ວມມືກັບຜົວແລະສະໜັບສະໜູນການຕັດສິນໃຈຂອງຜົວ. (ໂກໂລດ 3:18) ຖ້າເມຍເຮັດໄດ້ແບບນັ້ນ ເມຍກໍຈະມີຄຸນຄ່າຫຼາຍໃນສາຍຕາຂອງຜົວແລະພະເຢໂຫວາ.—1 ເປໂຕ 3:1-6
ຄຳແນະນຳ:
ໃຫ້ຖາມຄູ່ຂອງທ່ານເບິ່ງວ່າ ທ່ານຄວນຈະເຮັດແນວໃດເພື່ອຈະເປັນຜົວຫຼືເມຍທີ່ດີຂຶ້ນ. ໃຫ້ຕັ້ງໃຈຟັງດີໆເມື່ອລາວເວົ້າ ແລ້ວລົງມືເຮັດໃນສິ່ງທີ່ຈະປັບປຸງຕົວທ່ານເອງ
ໃຫ້ອົດທົນ ຕ້ອງໄດ້ໃຊ້ເວລາເພື່ອທ່ານທັງສອງຈະຮຽນຮູ້ວິທີທີ່ຈະເຮັດໃຫ້ອີກຝ່າຍໜຶ່ງມີຄວາມສຸກ
2 ໃສ່ໃຈດ້ານອາລົມຄວາມຮູ້ສຶກຂອງຄູ່ຂອງທ່ານ
ຄຳພີໄບເບິນແນະນຳວ່າ: ທ່ານຕ້ອງຈັດໃຫ້ຜົນປະໂຫຍດຂອງຜົວຫຼືເມຍຂອງທ່ານມາກ່ອນ. (ຟີລິບ 2:3, 4) ຕາມຄຳແນະນຳນັ້ນ ທ່ານຄວນປະຕິບັດຕໍ່ຜົວຫຼືເມຍຢ່າງໃຫ້ກຽດ ຢ່າລືມວ່າພະເຢໂຫວາຄາດໝາຍໃຫ້ຜູ້ທີ່ຮັກພະອົງເປັນຄົນ “ມີໃຈອ່ອນໃຈຫວານກັບຄົນທັງປວງ.” (2 ຕີໂມເຕ 2:24) “ມີຄົນທີ່ມັກເວົ້າຖ້ອຍຄຳທີ່ແທງຄືດາບ ແຕ່ວ່າລີ້ນຂອງຄົນປັນຍາທັງຫຼາຍກໍເປັນຄວາມສຳບາຍຢູ່.” ດັ່ງນັ້ນ ຕ້ອງໄດ້ເລືອກເຟັ້ນຄຳເວົ້າເປັນຢ່າງດີ. (ສຸພາສິດ 12:18) ໂດຍການກະຕຸ້ນຈາກພະລັງຂອງພະເຢໂຫວາ ທ່ານສາມາດເວົ້າດ້ວຍຄວາມຮັກແລະກະລຸນາ.—ຄາລາຊີ 5:22, 23; ໂກໂລດ 4:6
ຄຳແນະນຳ:
ໃຫ້ອະທິດຖານຂໍຄວາມສະຫງົບໃຈ ແລະໃຫ້ເປີດໃຈກ່ອນທີ່ຈະປຶກສາເລື່ອງທີ່ສຳຄັນກັບຄູ່ຂອງທ່ານ
ໃຫ້ຄິດຄັກໆວ່າຈະເວົ້າຄຳໃດແລະຈະເວົ້າແນວໃດ
3 ເຮັດວຽກນຳກັນເປັນຄູ່
ຄຳພີໄບເບິນແນະນຳວ່າ: ເມື່ອແຕ່ງດອງກັນແລ້ວ ທ່ານກໍເປັນ “ເນື້ອໜັງອັນດຽວກັນ” ກັບຄູ່ຂອງທ່ານ. (ມັດທາຍ 19:5) ແຕ່ທ່ານຍັງເປັນຄົນລະຄົນກັນແລະອາດມີຄວາມຄິດທີ່ແຕກຕ່າງກັນ. ດັ່ງນັ້ນທ່ານຈະຕ້ອງປັບຄວາມຄິດແລະອາລົມຄວາມຮູ້ສຶກໃຫ້ເປັນນ້ຳໜຶ່ງໃຈດຽວກັນ. (ຟີລິບ 2:2) ສິ່ງທີ່ສຳຄັນແມ່ນທ່ານທັງສອງຕ້ອງເປັນນ້ຳໜຶ່ງໃຈດຽວກັນເມື່ອຕັດສິນໃຈ. ຄຳພີໄບເບິນແນະນຳວ່າ “ການທັງຫຼາຍກໍຕັ້ງໝັ້ນຄົງຢູ່ [ສຳເລັດ] ດ້ວຍການປຶກສາກັນ.” (ສຸພາສິດ 20:18) ເມື່ອຕ້ອງຕັດສິນໃຈໃນເລື່ອງທີ່ສຳຄັນນຳກັນ ທັງຜົວແລະເມຍຕ້ອງໝາຍເພິ່ງຫຼັກການທີ່ມີໃນຄຳພີໄບເບິນ.—ສຸພາສິດ 8:32, 33
ຄຳແນະນຳ:
ບໍ່ພຽງແຕ່ຖ່າຍທອດຂໍ້ມູນຫຼືຄວາມຄິດເຫັນເທົ່ານັ້ນ ແຕ່ທ່ານຕ້ອງສະແດງຄວາມຮູ້ສຶກຂອງທ່ານອອກມາພ້ອມ
ກ່ອນຈະເຮັດສັນຍາຫຼືຂໍ້ຜູກມັດໃດໆໃຫ້ປຶກສາກັບຄູ່ຂອງທ່ານກ່ອນ
a ເຢໂຫວາແມ່ນຊື່ຂອງພະເຈົ້າ ຊື່ນີ້ປາກົດໃນຄຳພີໄບເບິນ.