ຕອນທີ 3
ຈະຮັບມືກັບບັນຫາຕ່າງໆໄດ້ແນວໃດ?
“ຈົ່ງຮັກກັນແລະກັນເປັນອັນມາກ ເຫດວ່າຄວາມຮັກກໍປົກອັດການຜິດໄວ້ຫຼາຍປະການ.”—1 ເປໂຕ 4:8
ເມື່ອທ່ານແຕ່ງດອງແລ້ວແລະເລີ່ມໃຊ້ຊີວິດຮ່ວມກັນ ບັນຫາຫຼາຍຢ່າງອາດເກີດຂຶ້ນໄດ້. ຄວາມຫຍຸ້ງຍາກເຫຼົ່ານີ້ອາດເກີດຈາກຄວາມຄິດ ຄວາມຮູ້ສຶກແລະປະສົບການຊີວິດທີ່ແຕກຕ່າງກັນຂອງທັງສອງຄົນ ຫຼືອາດຈະມາຈາກແຫຼ່ງອື່ນໆທີ່ຢູ່ພາຍນອກແລະຈາກເຫດການທີ່ບໍ່ໄດ້ຄາດຄິດກໍເປັນໄດ້.
ເມື່ອຊີວິດຄູ່ມີຄວາມຫຍຸ້ງຍາກ ທ່ານອາດຈະບໍ່ຢາກປະເຊີນກັບສິ່ງເຫຼົ່ານັ້ນ ແຕ່ເຮົາມີຄຳແນະນຳຈາກຄຳພີໄບເບິນທີ່ຈະຊ່ວຍແກ້ໄຂບັນຫາຕ່າງໆນັ້ນໄດ້. (ມັດທາຍ 5:23, 24) ການນຳໃຊ້ຫຼັກການຕ່າງໆໃນຄຳພີໄບເບິນສາມາດຊ່ວຍທ່ານໃຫ້ມີວິທີຮັບມືກັບຄວາມຫຍຸ້ງຍາກເຫຼົ່ານັ້ນໄດ້.
1 ປຶກສາເລື່ອງບັນຫານຳກັນ
ຄຳພີໄບເບິນແນະນຳວ່າ: “ມີ . . . ເວລາເວົ້າ.” (ຜູ້ເທສະໜາປ່າວປະກາດ 3:1, 7) ດັ່ງນັ້ນ ທ່ານຕ້ອງໄດ້ຈັດເວລາໄວ້ຢ່າງພຽງພໍເພື່ອຈະລົມກ່ຽວກັບບັນຫານຳກັນ. ສິ່ງທີ່ສຳຄັນແມ່ນທ່ານຕ້ອງເປີດເຜີຍໃຫ້ຄູ່ຂອງທ່ານຮູ້ວ່າ ທ່ານຮູ້ສຶກແລະຄິດແນວໃດກ່ຽວກັບເລື່ອງນັ້ນ. ທ່ານຕ້ອງ “ປາກຄວາມຈິງ” ກັບຄູ່ຂອງທ່ານສະເໝີ. (ເອເຟດ 4:25) ເຖິງວ່າຈະຮູ້ສຶກໃຈຮ້າຍ ແຕ່ຕ້ອງບໍ່ຜິດຖຽງກັນ. ການເວົ້ານຳກັນຢ່າງໃຈເຢັນໆຈະຊ່ວຍພວກທ່ານໃຫ້ປຶກສາຫາລືກັນໄດ້ຕໍ່ໆໄປໂດຍບໍ່ຕ້ອງຂັດແຍ່ງກັນ.—ສຸພາສິດ 15:4; 26:20
ເຖິງວ່າທ່ານຈະບໍ່ເຫັນດີນຳ ແຕ່ກໍຄວນຈະສະແດງຄວາມກະລຸນາ ຄວາມຮັກແລະຄວາມນັບຖືຕໍ່ຄູ່ຂອງທ່ານ. (ໂກໂລດ 4:6) ໃຫ້ພະຍາຍາມແກ້ໄຂບັນຫາໃຫ້ໄວທີ່ສຸດເທົ່າທີ່ຈະໄວໄດ້ ແລະຢ່າປ່ອຍໄວ້ໂດຍທີ່ບໍ່ລົມກັນ.—ເອເຟດ 4:26
ຄຳແນະນຳ:
ໃຫ້ຈັດເວລາໄວ້ເພື່ອຈະປຶກສາຫາລືກັນກ່ຽວກັບບັນຫາ
ເມື່ອທ່ານເປັນຜູ້ຟັງ ໃຫ້ຫຼີກລ່ຽງການຂັດຈັງຫວະ. ເມື່ອຮອດຜຽນທ່ານເວົ້າແລ້ວຈຶ່ງເວົ້າ
2 ຕັ້ງໃຈຟັງແລະເຂົ້າໃຈ
ຄຳພີໄບເບິນແນະນຳວ່າ: “ຈົ່ງຮັກກັນດ້ວຍສຸດໃຈ. ຝ່າຍການທີ່ນັບຖືກັນແລະກັນນັ້ນຈົ່ງເປັນຕົ້ນ [ລິເລີ່ມ] ມີຄວາມນັບຖືແກ່ຜູ້ອື່ນ.” (ໂລມ 12:10) ສິ່ງທີ່ສຳຄັນແມ່ນທ່ານເປັນຜູ້ຟັງແບບໃດ. ທ່ານຕ້ອງພະຍາຍາມເຂົ້າໃຈຄວາມຄິດຂອງອີກຝ່າຍໜຶ່ງໂດຍ “ມີໃຈເລົ້າໂລມກັນ [ເຫັນໃຈ] . . . ແລະຖ່ອມໃຈລົງ.” (1 ເປໂຕ 3:8; ຢາໂກໂບ 1:19) ຢ່າທຳທ່າເຮັດຄືວ່າຕັ້ງໃຈຟັງ. ຖ້າເປັນໄປໄດ້ໃຫ້ປະສິ່ງທີ່ກຳລັງເຮັດຢູ່ນັ້ນ ແລ້ວໃຫ້ຕັ້ງໃຈຟັງຄູ່ຂອງທ່ານ ຫຼືຖ້າຍັງບໍ່ສະດວກອາດຈະຂໍໃຫ້ປຶກສາກັນໃນພາຍຫຼັງ. ຖ້າທ່ານຄິດວ່າຄູ່ຂອງທ່ານບໍ່ແມ່ນຄູ່ແຂ່ງ ແຕ່ເປັນຝ່າຍດຽວກັນ ທ່ານກໍຈະບໍ່ “ຟ້າວເຄືອງໃຈ.”—ຜູ້ເທສະໜາປ່າວປະກາດ 7:9
ຄຳແນະນຳ:
ໃຫ້ເປີດໃຈຮັບຟັງ ເຖິງວ່າສິ່ງທີ່ໄດ້ຍິນນັ້ນ ທ່ານຈະບໍ່ມັກກໍຕາມ
ໃຫ້ຕັ້ງໃຈຟັງແລະເຂົ້າໃຈຄວາມໝາຍຂອງຄຳເວົ້ານັ້ນແທ້ໆ ພ້ອມທັງໃຫ້ສັງເກດເບິ່ງທ່າທາງແລະນ້ຳສຽງທີ່ຄູ່ຂອງທ່ານສະແດງອອກມາ
3 ເຮັດຕາມການຕັດສິນໃຈ
ຄຳພີໄບເບິນແນະນຳວ່າ: “ໃນການງານ [ເຮັດວຽກ] ທຸກຢ່າງມີກຳໄລ ແຕ່ວ່າຖ້ອຍຄຳແຕ່ສົບປາກພາໄປໃນຄວາມອຶດຢາກເທົ່ານັ້ນ.” (ສຸພາສິດ 14:23) ພຽງແຕ່ເຫັນດີນຳກັນແມ່ນຍັງບໍ່ພໍ ພວກທ່ານຕ້ອງເຮັດຕາມສິ່ງທີ່ໄດ້ຕົກລົງກັນ. ດັ່ງນັ້ນ ເພື່ອຈະຮັບຜົນທີ່ດີ ທ່ານຕ້ອງໄດ້ທຸ່ມເທແລະອອກຄວາມພະຍາຍາມຫຼາຍ. (ສຸພາສິດ 10:4) ຖ້າທ່ານຮ່ວມມືກັນ ທ່ານກໍຈະ “ຮັບຄ່າຈ້າງດີ [ລາງວັນ]” ສຳລັບການອອກຄວາມພະຍາຍາມຂອງທ່ານ.—ຜູ້ເທສະໜາປ່າວປະກາດ 4:9
ຄຳແນະນຳ:
ໃຫ້ຕັດສິນໃຈເປັນເທື່ອລະຂັ້ນຕອນວ່າອັນໃດເປັນທາງອອກທີ່ດີທີ່ສຸດຂອງແຕ່ລະບັນຫາ
ໃຫ້ເບິ່ງຄືນເປັນແຕ່ລະໄລຍະວ່າໄດ້ແກ້ໄຂບັນຫາໃດໄປແດ່ແລ້ວ