ຄຳຖາມທີ 2
ເປັນຫຍັງຂ້ອຍຈຶ່ງກັງວົນກ່ຽວກັບຮູບຮ່າງໜ້າຕາ?
ເຈົ້າ ຈະເຮັດແນວໃດ?
ໃຫ້ນຶກພາບເຫດການນີ້: ເມື່ອຈູເລຍແຍງແວ່ນ ລາວກໍເຫັນແຕ່ຄວາມຕຸ້ຍຂອງຕົວເອງແລະເວົ້າວ່າ: “ຂ້ອຍຕ້ອງລົດນ້ຳໜັກ” ແຕ່ພໍ່ແມ່ແລະໝູ່ບອກຈູເລຍວ່າ ລາວຈ່ອຍຄື “ໄມ້ຈີ້ມແຂ້ວ.”
ເມື່ອບໍ່ດົນມານີ້ ຈູເລຍຄິດວ່າຈະລົດນ້ຳໜັກໃຫ້ໄດ້ “2-3 ກິໂລ.” ສິ່ງທີ່ລາວຈະເຮັດກໍຄືອົດເຂົ້າຈັກ 2-3 ມື້ . . .
ຖ້າເຈົ້າຮູ້ສຶກຄືກັບຈູເລຍ ເຈົ້າຈະເຮັດແນວໃດ?
ຢຸດແລະຄິດ!
ເມື່ອແຍງແວ່ນທີ່ລວງຕາ ພາບທີ່ເຫັນຈະບິດບ້ຽວໄປ
ບໍ່ຜິດທີ່ຈະກັງວົນກ່ຽວກັບຮູບຮ່າງໜ້າຕາຕົວເອງ. ຄຳພີໄບເບິນເວົ້າເຖິງຊາຍຍິງຫຼາຍຄົນທີ່ມີຮູບຮ່າງໜ້າຕາດີ ເຊັ່ນ: ຊາລາ ລາເຊນ ອາບີຄາລີ ໂຢເຊບ ແລະດາວິດ. ຄຳພີໄບເບິນຍັງເວົ້າອີກວ່າອາບີຊາກເປັນຜູ້ຍິງທີ່ “ງາມເຫຼືອເກີນ.”—1 ກະສັດ 1:4
ແຕ່ໄວໜຸ່ມຫຼາຍຄົນເປັນຫ່ວງເລື່ອງຮູບຮ່າງໜ້າຕາຕົວເອງ. ເລື່ອງນີ້ສາມາດກາຍເປັນບັນຫາທີ່ຮ້າຍແຮງໄດ້. ຂໍໃຫ້ພິຈາລະນາເບິ່ງ:
ຈາກການສຳຫຼວດຢູ່ປະເທດອາເມລິກາ ຍິງສາວ 58% ຄິດວ່າຕົວເອງຕຸ້ຍຫຼາຍ ແຕ່ທີ່ຈິງມີພຽງ 17% ທີ່ເປັນແບບນັ້ນ.
ຈາກການສຳຫຼວດໜຶ່ງອີກຢູ່ປະເທດອາເມລິກາ ຜູ້ຍິງ 45% ທີ່ຄິດວ່າຕົວເອງຕຸ້ຍຫຼາຍ ແຕ່ທີ່ຈິງເຂົາເຈົ້າມີນ້ຳໜັກຕ່ຳກວ່າມາດຕະຖານ!
ເມື່ອພະຍາຍາມລົດນ້ຳໜັກ ໄວໜຸ່ມບາງຄົນກາຍເປັນພະຍາດອະໂນເຣກເຊຍ (Anorexia) ຫຼືມີອາການຜິດປົກກະຕິດ້ານການກິນ ເຊິ່ງຈະກິນເຂົ້າໜ້ອຍຈົນເຮັດໃຫ້ເຖິງຕາຍໄດ້.
ຖ້າເຈົ້າມີອາການແບບນີ້ຫຼືມີຄວາມຜິດປົກກະຕິຢ່າງອື່ນໃນດ້ານການກິນ ເຈົ້າຕ້ອງຂໍຄວາມຊ່ວຍເຫຼືອ. ໃຫ້ບອກພໍ່ແມ່ຫຼືຜູ້ໃຫຍ່ຄົນອື່ນໆທີ່ເຈົ້າໄວ້ໃຈໄດ້. ຄຳພີໄບເບິນບອກວ່າ: ‘ສ່ຽວຮັກຢູ່ທຸກເວລາແລະເປັນເໝືອນອ້າຍນ້ອງໄດ້ເກີດມາເພື່ອຈະຊ່ອຍໃນເວລາຂັດສົນຫຼາຍ.’—ສຸພາສິດ 17:17
ວິທີປ່ຽນຮູບຮ່າງໜ້າຕາທີ່ດີທີ່ສຸດ!
ຄວາມຈິງແລ້ວຄົນເຮົາຈະງາມຫຼືບໍ່ກໍຂຶ້ນຢູ່ກັບນິດໄສໃຈຄໍ. ໃຫ້ເບິ່ງຕົວຢ່າງຂອງອາບຊາໂລມລູກຊາຍຂອງກະສັດດາວິດ. ຄຳພີໄບເບິນບອກວ່າ:
‘ບໍ່ມີຄົນໃດທີ່ມີຊື່ສຽງເປັນຄົນຮູບງາມທໍ່ກັບທ້າວອາບຊາໂລມ . . . ບໍ່ມີບ່ອນຕິຕຽນໄດ້.’—2 ຊາເມືອນ 14:25
ແຕ່ລາວເປັນຄົນຍິ່ງຈອງຫອງ ມັກໃຫຍ່ໃຝ່ສູງ ແລະທໍລະຍົດ. ດັ່ງນັ້ນ ຄຳພີໄບເບິນຈຶ່ງເວົ້າເຖິງລາວວ່າເປັນຄົນຊົ່ວ ບໍ່ສັດຊື່ ແລະກຽດຊັງຄົນອື່ນຈົນລົງມືຂ້າ.
ດ້ວຍເຫດນີ້ ຄຳພີໄບເບິນຈຶ່ງໃຫ້ຄຳແນະນຳນີ້ກັບເຮົາ:
“ປູກຝັງລັກສະນະນິດໄສໃໝ່.”—ໂກໂລດ 3:10, ລ.ມ.
“ການຕົກແຕ່ງຕົວນັ້ນ ຢ່າໃຫ້ສວຍງາມແຕ່ພາຍນອກ . . . ແຕ່ໃຫ້ຄວາມງາມຂອງເຈົ້າປະກອບດ້ວຍການປະດັບທີ່ມີຢູ່ພາຍໃນ.”—1 ເປໂຕ 3:3, 4, ທ.ປ.
ການຢາກມີຮູບຮ່າງໜ້າຕາດີບໍ່ແມ່ນເລື່ອງຜິດ ແຕ່ສິ່ງທີ່ສຳຄັນກວ່າແມ່ນນິດໄສໃຈຄໍ. ໃນຄວາມເປັນຈິງ ການມີຄຸນລັກສະນະທີ່ໜ້າຍົກຍ່ອງຈະເຮັດໃຫ້ຄົນອື່ນມັກເຈົ້າຫຼາຍກວ່າການມີຮ່າງກາຍທີ່ແຂງແຮງຫຼືຮູບຮ່າງທີ່ງາມ! ຟິລີເຊຍເວົ້າວ່າ: “ຜູ້ຄົນມັກສັງເກດເຫັນຄວາມງາມໄດ້ທັນທີ ແຕ່ສິ່ງທີ່ເຂົາເຈົ້າຈະຈື່ຈຳກໍຄືນິດໄສໃຈຄໍແລະຄຸນລັກສະນະທີ່ດີຂອງຄົນນັ້ນ.”
ການພິຈາລະນາເບິ່ງຮູບຮ່າງໜ້າຕາ
ເຈົ້າບໍ່ມັກຮູບຮ່າງໜ້າຕາຂອງຕົວເອງບໍ?
ເຈົ້າເຄີຍຄິດຈະແກ້ໄຂຂໍ້ບົກພ່ອງເຫຼົ່ານັ້ນດ້ວຍການອົດເຂົ້າຫຼືເຮັດສັນຍະກຳບໍ?
ຖ້າເຮັດໄດ້ ເຈົ້າຢາກແກ້ໄຂສ່ວນໃດຂອງຮ່າງກາຍ? (ໃຫ້ໝາຍວົງມົນໃສ່ຂໍ້ນັ້ນ)
ຄວາມສູງ
ນ້ຳໜັກ
ຜົມ
ຮູບຮ່າງ
ໃບໜ້າ
ສີຜິວ
ຖ້າເຈົ້າຕອບວ່າແມ່ນສຳລັບຄຳຖາມສອງຂໍ້ທຳອິດແລະໃນຂໍ້ສາມເຈົ້າໝາຍວົງມົນຫຼາຍກວ່າສາມຢ່າງ ເຈົ້າອາດຄິດວ່າຕົວເອງຂີ້ຮ້າຍ ແຕ່ຄົນອື່ນບໍ່ໄດ້ຄິດແບບນັ້ນ. ເຈົ້າອາດຄິດຫຼາຍເກີນໄປກ່ຽວກັບຮູບຮ່າງໜ້າຕາຂອງຕົວເອງ.—1 ຊາເມືອນ 16:7