ບົດທີ 39
ກະສັດອົງທຳອິດຂອງອິດສະຣາເອນ
ພະເຢໂຫວາໄດ້ຕັ້ງຜູ້ຕັດສິນຫຼາຍຄົນໃຫ້ເປັນຜູ້ນຳຄົນອິດສະຣາເອນປະຊາຊົນຂອງເພິ່ນ ແຕ່ຄົນອິດສະຣາເອນພັດຢາກມີກະສັດ. ເຂົາເຈົ້າບອກຊາມູເອນວ່າ: ‘ທຸກຊາດທີ່ຢູ່ອ້ອມຂ້າງພວກເຮົາກໍພາກັນມີກະສັດໝົດ ພວກເຮົາກໍຢາກມີຄືກັນ.’ ຊາມູເອນຄິດວ່າເລື່ອງນີ້ບໍ່ຖືກຕ້ອງ ລາວຈຶ່ງອະທິດຖານຫາພະເຢໂຫວາ. ພະເຢໂຫວາບອກຊາມູເອນວ່າ: ‘ເຂົາເຈົ້າບໍ່ໄດ້ຖິ້ມເຈົ້າ ແຕ່ຖິ້ມເຮົາ. ໄປບອກເຂົາເຈົ້າວ່າເຂົາເຈົ້າສາມາດມີກະສັດໄດ້ ແຕ່ກະສັດຈະຮຽກຮ້ອງເອົາຫຼາຍຢ່າງຈາກເຂົາເຈົ້າ.’ ເຖິງຈະຮູ້ແນວນັ້ນ ປະຊາຊົນກໍຍັງຕອບວ່າ: ‘ບໍ່ເປັນຫຍັງ ຈັ່ງໃດພວກເຮົາກໍຢາກມີກະສັດ!’
ພະເຢໂຫວາບອກຊາມູເອນວ່າຜູ້ຊາຍທີ່ຊື່ຊາອູນຈະເປັນກະສັດອົງທຳອິດຂອງອິດສະຣາເອນ. ເມື່ອຊາອູນໄປຫາຊາມູເອນຢູ່ເມືອງຣາມາ ຊາມູເອນກໍເທນ້ຳມັນໃສ່ຫົວຂອງຊາອູນແລະແຕ່ງຕັ້ງລາວໃຫ້ເປັນກະສັດ.
ຈາກນັ້ນ ຊາມູເອນກໍເອີ້ນພວກອິດສະຣາເອນມາລວມໂຕກັນເພື່ອໃຫ້ເຂົາເຈົ້າເຫັນກະສັດອົງທຳອິດ. ແຕ່ເຂົາເຈົ້າຊອກຫາຊາອູນບໍ່ເຈິ. ເຈົ້າຮູ້ບໍວ່າຍ້ອນຫຍັງ? ຍ້ອນຊາອູນໄປລີ້ຢູ່ກອງເຄື່ອງ. ເມື່ອຊອກຫາຊາອູນເຈິແລ້ວ ເຂົາເຈົ້າກໍໃຫ້ຊາອູນມາຢືນຢູ່ກາງປະຊາຊົນ. ຊາອູນສູງກວ່າທຸກຄົນແລະເປັນຄົນຫຼໍ່ຫຼາຍ. ຊາມູເອນເວົ້າວ່າ: ‘ຜູ້ນີ້ແມ່ນຄົນທີ່ພະເຢໂຫວາເລືອກ.’ ແລ້ວປະຊາຊົນທຸກຄົນກໍຮ້ອງວ່າ: “ຂໍໃຫ້ກະສັດມີອາຍຸຍືນຍາວ!”
ທຳອິດ ກະສັດຊາອູນເຮັດຕາມທີ່ຊາມູເອນບອກທຸກຢ່າງແລະເຊື່ອຟັງພະເຢໂຫວາ. ຕໍ່ມາ ລາວກໍປ່ຽນໄປ. ມີເທື່ອໜຶ່ງ ຊາມູເອນບອກຊາອູນໃຫ້ລໍຖ້າລາວມາກ່ອນ. ແຕ່ຊາມູເອນພັດມາຊ້າ ຊາອູນກໍເລີຍເຜົາເຄື່ອງບູຊາເອງທັງໆທີ່ກະສັດບໍ່ມີສິດເຜົາເຄື່ອງບູຊາ. ຊາມູເອນຮູ້ສຶກແນວໃດ? ລາວບອກຊາອູນວ່າ: ‘ເຈົ້າຄວນເຊື່ອຟັງພະເຢໂຫວາ.’ ແຕ່ຊາອູນກໍຍັງບໍ່ສຳນຶກຜິດ.
ຕໍ່ມາ ຕອນທີ່ຊາອູນໄປສູ້ຮົບກັບພວກອາມາເລັກ ຊາມູເອນໄດ້ບອກລາວໃຫ້ຂ້າພວກອາມາເລັກທັງໝົດ. ແຕ່ຊາອູນພັດບໍ່ຂ້າກະສັດອາກັກ. ພະເຢໂຫວາຈຶ່ງບອກຊາມູເອນວ່າ: ‘ຊາອູນຖິ້ມເຮົາແລ້ວ ລາວບໍ່ເຮັດຕາມທີ່ເຮົາບອກເລີຍ.’ ຊາມູເອນເສຍໃຈຫຼາຍແລະບອກຊາອູນວ່າ: ‘ຍ້ອນເຈົ້າບໍ່ເຊື່ອຟັງພະເຢໂຫວາ ເພິ່ນຈະເລືອກຄົນອື່ນໃຫ້ເປັນກະສັດແທນເຈົ້າ.’ ເມື່ອຊາມູເອນກຳລັງປິ່ນໜ້າຊິຍ່າງໄປ ຊາອູນກໍດຶງຍອຍເສື້ອແຂນກິ້ນຂອງຊາມູເອນຈົນຂາດ. ຊາມູເອນບອກຊາອູນວ່າ: ‘ພະເຢໂຫວາບໍ່ໃຫ້ເຈົ້າເປັນກະສັດແລ້ວ.’ ພະເຢໂຫວາກຳລັງຈະແຕ່ງຕັ້ງຄົນໜຶ່ງທີ່ຮັກແລະເຊື່ອຟັງເພິ່ນໃຫ້ເປັນກະສັດ.
“ການເຊື່ອຟັງດີກວ່າເຄື່ອງບູຊາ.”—1 ຊາມູເອນ 15:22