ບົດທີ 57
ພະເຢໂຫວາສົ່ງເຢເຣມີຢາໄປປະກາດ
ພະເຢໂຫວາເລືອກເຢເຣມີຢາໃຫ້ເປັນຜູ້ພະຍາກອນສຳລັບຄົນຢູດາ. ເພິ່ນບອກລາວໃຫ້ໄປປະກາດກັບປະຊາຊົນແລະເຕືອນເຂົາເຈົ້າໃຫ້ເຊົາເຮັດຊົ່ວ. ແຕ່ເຢເຣມີຢາບອກວ່າ: ‘ພະເຢໂຫວາເອີ້ຍ ລູກເປັນພຽງແຕ່ເດັກນ້ອຍ ລູກບໍ່ຮູ້ວ່າຊິເວົ້າກັບປະຊາຊົນແນວໃດ.’ ແລ້ວພະເຢໂຫວາກໍບອກລາວວ່າ: ‘ບໍ່ຕ້ອງຢ້ານ. ເຮົາຈະບອກໃຫ້ເຈົ້າຮູ້ວ່າຕ້ອງເວົ້າຫຍັງ. ເຮົາຈະຊ່ວຍເຈົ້າ.’
ພະເຢໂຫວາບອກເຢເຣມີຢາເອີ້ນພວກຜູ້ນຳປະຊາຊົນໃຫ້ມາລວມກັນ ຈາກນັ້ນກໍໃຫ້ທຸບໂຖດິນໃຫ້ແຕກຕໍ່ໜ້າເຂົາເຈົ້າແລະບອກເຂົາເຈົ້າວ່າ: ‘ເມືອງເຢຣູຊາເລັມຈະຖືກທຸບຈົນແຕກຄືກັບໂຖດິນນີ້.’ ເຢເຣມີຢາເຮັດຕາມທີ່ພະເຢໂຫວາບອກ ແຕ່ພວກຜູ້ນຳພັດໃຈຮ້າຍຫຼາຍ. ປະໂລຫິດຄົນໜຶ່ງຊື່ປັດຊູກໍຕີເຢເຣມີຢາແລະຈັບລາວໃສ່ຂື່ ເຢເຣມີຢາເໜັງບໍ່ໄດ້ໝົດຄືນ. ເຊົ້າມື້ຕໍ່ມາປັດຊູກໍປ່ອຍລາວ. ເຢເຣມີຢາເວົ້າວ່າ: ‘ລູກທົນບໍ່ໄຫວແລ້ວ ລູກຈະບໍ່ປະກາດອີກແລ້ວ.’ ແຕ່ລາວເຊົາປະກາດແທ້ໆບໍ? ບໍ່. ເມື່ອລາວຄິດຕຶກຕອງກ່ຽວກັບເລື່ອງນີ້ຫຼາຍຂຶ້ນ ລາວເວົ້າວ່າ: ‘ຄຳເວົ້າຂອງພະອົງເປັນຄືກັບໄຟທີ່ເຜົາໄໝ້ຢູ່ໃນໃຈຂອງລູກ ລູກຢຸດປະກາດບໍ່ໄດ້.’ ເຢເຣມີຢາຈຶ່ງເຕືອນປະຊາຊົນຕໍ່ໄປ.
ຜ່ານໄປຫຼາຍປີ ຢູດາກໍມີກະສັດອົງໃໝ່ປົກຄອງ. ພວກປະໂລຫິດແລະພວກຜູ້ພະຍາກອນປອມຊັງເລື່ອງທີ່ເຢເຣມີຢາປະກາດ. ເຂົາເຈົ້າຈຶ່ງໄປເວົ້າກັບພວກເຈົ້ານາຍວ່າ: “ຜູ້ຊາຍຄົນນີ້ສົມຄວນຕາຍ.” ແຕ່ເຢເຣມີຢາເວົ້າວ່າ: ‘ຖ້າພວກເຈົ້າຂ້າຂ້ອຍ ກໍສ່ຳກັບວ່າພວກເຈົ້າຂ້າຄົນທີ່ບໍ່ມີຄວາມຜິດ. ເພາະຂ້ອຍເວົ້າຕາມທີ່ພະເຢໂຫວາບອກ ຂ້ອຍບໍ່ໄດ້ເວົ້າເອົາເອງ.’ ເມື່ອພວກເຈົ້ານາຍໄດ້ຍິນແບບນັ້ນ ເຂົາເຈົ້າຈຶ່ງເວົ້າວ່າ: “ຜູ້ຊາຍຄົນນີ້ບໍ່ສົມຄວນຕາຍ.”
ຫຼັງຈາກນັ້ນ ເຢເຣມີຢາກໍປະກາດຕໍ່ໄປ. ຕອນນີ້ພວກເຈົ້ານາຍໃຈຮ້າຍແຮງຫຼາຍ ເຂົາເຈົ້າຈຶ່ງໄປຂໍໃຫ້ກະສັດສັ່ງຂ້າເຢເຣມີຢາ. ກະສັດບອກເຂົາເຈົ້າວ່າພວກເຈົ້າຢາກເຮັດຫຍັງກັບລາວກໍເຮັດໂລດ. ເຂົາເຈົ້າກໍເລີຍຈັບເຢເຣມີຢາຖິ້ມລົງນ້ຳສ້າງເລິກທີ່ມີແຕ່ຂີ້ຕົມເພື່ອຈະໃຫ້ລາວຕາຍຢູ່ຫັ້ນ. ແລ້ວເຢເຣມີຢາກໍເລີ່ມຈົມລົງຂີ້ຕົມ.
ມີຜູ້ຊາຍຄົນໜຶ່ງທີ່ເຮັດວຽກຢູ່ໃນວັງຊື່ເອເບັດເມເລັກໄປບອກກະສັດວ່າ: ‘ພວກເຈົ້ານາຍເອົາເຢເຣມີຢາໄປຖິ້ມລົງນ້ຳສ້າງ! ຖ້າປ່ອຍລາວໄວ້ແບບນັ້ນ ລາວຈະຕ້ອງຕາຍແທ້ແຫຼະ!’ ກະສັດຈຶ່ງສັ່ງໃຫ້ເອເບັດເມເລັກພາຜູ້ຊາຍ 30 ຄົນໄປຊ່ວຍກັນດຶງເຢເຣມີຢາຂຶ້ນມາຈາກນ້ຳສ້າງ. ຖ້າເຮົາຖືກຕໍ່ຕ້ານຄືກັບເຢເຣມີຢາ ເຮົາຈະປະກາດຕໍ່ໄປບໍ?
“ທຸກຄົນຈະຊັງພວກເຈົ້າຍ້ອນພວກເຈົ້າເປັນລູກສິດຂອງຂ້ອຍ. ແຕ່ຜູ້ໃດທີ່ອົດທົນຈົນເຖິງທີ່ສຸດຜູ້ນັ້ນຈະລອດ.”—ມັດທາຍ 10:22