ບົດທີ 80
ພະເຢຊູເລືອກອັກຄະສາວົກ 12 ຄົນ
ຫຼັງຈາກທີ່ພະເຢຊູເຮັດວຽກປະກາດມາໄດ້ປະມານ 1 ປີເຄິ່ງ ເພິ່ນກໍຕ້ອງຕັດສິນໃຈເລື່ອງທີ່ສຳຄັນ. ເພິ່ນຈະເລືອກໃຜມາເຮັດວຽກໃກ້ຊິດກັບເພິ່ນແລະຈະຝຶກໃຜໃຫ້ເບິ່ງແຍງປະຊາຄົມຄລິດສະຕຽນ? ພະເຢຊູຢາກໃຫ້ພະເຢໂຫວາຊ່ວຍຕັດສິນໃຈ ເພິ່ນຈຶ່ງໄປເທິງພູເພື່ອຈະຢູ່ຄົນດຽວແລະອະທິດຖານໝົດຄືນ. ເມື່ອຮອດຕອນເຊົ້າ ພະເຢຊູໄດ້ເອີ້ນພວກລູກສິດບາງຄົນໃຫ້ມາຫາແລະເລືອກເອົາ 12 ຄົນໃຫ້ເປັນອັກຄະສາວົກ. ເຈົ້າຈື່ຊື່ອັກຄະສາວົກຄົນໃດໄດ້ແດ່? ເຂົາເຈົ້າຊື່ວ່າ ເປໂຕ ອັນເດອາ ຢາໂກໂບ ໂຢຮັນ ຟີລິບ ບາຣະໂທໂລມາຍ ໂທມາ ມັດທາຍ ຢາໂກໂບລູກຊາຍຂອງອາລະຟາຍ ທາດາຍ ຊີໂມນ ແລະຢູດາອິສະກາຣີອົດ.
ອັນເດອາ ເປໂຕ ຟີລິບ ຢາໂກໂບ
ພວກອັກຄະສາວົກ 12 ຄົນເດີນທາງໄປນຳພະເຢຊູທຸກບ່ອນ. ຫຼັງຈາກພະເຢຊູຝຶກເຂົາເຈົ້າແລ້ວໆ ເພິ່ນກໍສົ່ງເຂົາເຈົ້າອອກໄປປະກາດ. ພະເຢໂຫວາໃຫ້ລິດເດດເຂົາເຈົ້າໄລ່ພວກປີສາດແລະປົວຄົນເຈັບປ່ວຍໄດ້.
ໂຢຮັນ ມັດທາຍ ບາຣະໂທໂລມາຍ ໂທມາ
ພະເຢຊູເອີ້ນພວກອັກຄະສາວົກວ່າໝູ່ແລະເພິ່ນກໍໄວ້ໃຈເຂົາເຈົ້າ. ພວກຟາຣີຊາຍເບິ່ງວ່າພວກອັກຄະສາວົກຂອງພະເຢຊູເປັນຄົນທຳມະດາແລະບໍ່ມີການສຶກສາ ແຕ່ພະເຢຊູຝຶກເຂົາເຈົ້າໃຫ້ເຮັດວຽກປະກາດ. ເຂົາເຈົ້າຈະຢູ່ກັບພະເຢຊູໃນຊ່ວງເວລາທີ່ສຳຄັນທີ່ສຸດ ເຊັ່ນ ກ່ອນພະເຢຊູຕາຍແລະຫຼັງຈາກເພິ່ນຄືນມາຈາກຕາຍ. ອັກຄະສາວົກສ່ວນຫຼາຍເປັນຄົນຄາລີເລຄືກັບພະເຢຊູ ແລະບາງຄົນກໍແຕ່ງດອງແລ້ວ.
ຢາໂກໂບລູກຊາຍຂອງອາລະຟາຍ ຢູດາອິສະກາຣີອົດ ທາດາຍ ຊີໂມນ
ພວກອັກຄະສາວົກເປັນຄົນບໍ່ສົມບູນແບບແລະເຮັດຜິດພາດ. ບາງເທື່ອເຂົາເຈົ້າກໍເວົ້າກ່ອນຄິດແລະຕັດສິນໃຈຜິດ ແລະບາງເທື່ອກໍບໍ່ມີຄວາມອົດທົນ. ເຂົາເຈົ້າເຖິງກັບຜິດກັນເລື່ອງທີ່ວ່າແມ່ນໃຜສຳຄັນກວ່າ. ເຖິງວ່າຈະເປັນແນວນັ້ນ ແຕ່ເຂົາເຈົ້າກໍເປັນຄົນດີແລະຮັກພະເຢໂຫວາ. ເຂົາເຈົ້າຈະເປັນຄົນກຸ່ມທຳອິດທີ່ເບິ່ງແຍງປະຊາຄົມຄລິດສະຕຽນຫຼັງຈາກພະເຢຊູຕາຍ.
“ຂ້ອຍເອີ້ນພວກເຈົ້າວ່າໝູ່ ຍ້ອນຂ້ອຍບອກພວກເຈົ້າໃຫ້ຮູ້ທຸກເລື່ອງທີ່ຂ້ອຍໄດ້ຍິນຈາກພໍ່ຂອງຂ້ອຍ.”—ໂຢຮັນ 15:15