ບົດທີ 83
ພະເຢຊູລ້ຽງອາຫານຫຼາຍພັນຄົນ
ບໍ່ດົນກ່ອນເທດສະການປັດສະຄາປີ 32 ພວກອັກຄະສາວົກຫາກໍກັບມາຈາກການໄປປະກາດຕາມເມືອງຕ່າງໆແລະຮູ້ສຶກເມື່ອຍຫຼາຍ ພະເຢຊູຈຶ່ງພາເຂົາເຈົ້າຂີ່ເຮືອໄປເມືອງເບັດຊາອີດາເພື່ອພັກຜ່ອນ. ແຕ່ຕອນທີ່ເຮືອໃກ້ຈະຮອດຝັ່ງ ພະເຢຊູກໍເຫັນປະຊາຊົນຫຼາຍພັນຄົນມາຖ້າເພິ່ນຢູ່ຫັ້ນແລ້ວ. ເຖິງວ່າພະເຢຊູຢາກພັກຜ່ອນກັບພວກອັກຄະສາວົກເປັນສ່ວນໂຕ ແຕ່ເພິ່ນກໍຍິນດີຕ້ອນຮັບເຂົາເຈົ້າດ້ວຍຄວາມເມດຕາ. ເພິ່ນປົວຄົນເຈັບປ່ວຍແລະເລີ່ມສອນເຂົາເຈົ້າ. ພະເຢຊູສອນເລື່ອງການປົກຄອງຂອງພະເຈົ້າໃຫ້ເຂົາເຈົ້າຟັງໝົດມື້. ເມື່ອຮອດຕອນແລງ ພວກອັກຄະສາວົກມາບອກພະເຢຊູວ່າ: ‘ປະຊາຊົນຫິວແລ້ວ. ໃຫ້ເຂົາເຈົ້າອອກໄປຊອກຊື້ອາຫານກິນເບາະ.’
ພະເຢຊູບອກວ່າ: ‘ບໍ່ຕ້ອງໃຫ້ເຂົາເຈົ້າໄປດອກ ໃຫ້ເຂົາເຈົ້າກິນຢູ່ນີ້ແຫຼະ.’ ພວກອັກຄະສາວົກຖາມວ່າ: ‘ຊິໃຫ້ພວກເຮົາໄປຊື້ຂອງກິນມາໃຫ້ເຂົາເຈົ້າກິນບໍ?’ ອັກຄະສາວົກທີ່ຊື່ຟີລິບບອກວ່າ: ‘ເຖິງພວກເຮົາຊິມີເງິນຫຼາຍ ແຕ່ພວກເຮົາກໍບໍ່ສາມາດຊື້ຂອງກິນໃຫ້ຄົນຫຼາຍປານນີ້ໄດ້ດອກ.’
ພະເຢຊູຖາມເຂົາເຈົ້າວ່າ: ‘ເຮົາມີຂອງກິນຫຼາຍສ່ຳໃດ?’ ອັນເດອາຕອບວ່າ: ‘ເຮົາມີເຂົ້າຈີ່ 5 ອັນກັບປາໂຕນ້ອຍໆ 2 ໂຕ. ຈັ່ງໃດກໍບໍ່ພໍກິນດອກ.’ ພະເຢຊູບອກວ່າ: ‘ເອົາເຂົ້າຈີ່ກັບປາມາໃຫ້ຂ້ອຍ.’ ແລ້ວເພິ່ນກໍບອກໃຫ້ປະຊາຊົນນັ່ງຢູ່ເທິງຫຍ້າເປັນກຸ່ມໆ. ບາງກຸ່ມມີ 50 ຄົນ ແລະບາງກຸ່ມກໍມີ 100 ຄົນ. ພະເຢຊູຈັບເອົາເຂົ້າຈີ່ກັບປາຂຶ້ນມາ ແລ້ວເງີຍໜ້າຂຶ້ນຟ້າແລະອະທິດຖານຂອບໃຈພະເຈົ້າ. ຈາກນັ້ນ ເພິ່ນກໍຢາຍເຂົ້າຈີ່ໃຫ້ພວກອັກຄະສາວົກ ແລ້ວເຂົາເຈົ້າກໍເອົາໄປຢາຍໃຫ້ປະຊາຊົນ. ມີຜູ້ຊາຍປະມານ 5.000 ຄົນແລະມີຜູ້ຍິງກັບເດັກນ້ອຍນຳ. ທຸກຄົນໄດ້ກິນຈົນອີ່ມ. ຫຼັງຈາກນັ້ນ ພວກອັກຄະສາວົກກໍຊ່ວຍກັນເກັບອາຫານທີ່ເຫຼືອເພື່ອບໍ່ໃຫ້ເສຍຖິ້ມໄປລ້າໆ. ເຂົາເຈົ້າເກັບໄດ້ເຕັມ 12 ກະຕ່າ! ການອັດສະຈັນນີ້ທີ່ພະເຢຊູເຮັດເປັນຕາງຶດຫຼາຍແທ້ໆແມ່ນບໍ?
ປະຊາຊົນຮູ້ສຶກປະທັບໃຈຫຼາຍຈົນຢາກໃຫ້ພະເຢຊູເປັນກະສັດ. ແຕ່ພະເຢຊູຮູ້ວ່າຍັງບໍ່ຮອດເວລາທີ່ພະເຢໂຫວາຈະໃຫ້ເພິ່ນເປັນກະສັດ. ເພິ່ນຈຶ່ງບອກປະຊາຊົນໃຫ້ກັບເມືອເຮືອນແລະບອກໃຫ້ພວກອັກຄະສາວົກຂ້າມທະເລຄາລີເລໄປອີກຟາກໜຶ່ງ. ພວກອັກຄະສາວົກກໍຂີ່ເຮືອໄປ ສ່ວນພະເຢຊູກໍຂຶ້ນໄປເທິງພູຄົນດຽວ. ຍ້ອນຫຍັງ? ຍ້ອນເພິ່ນຢາກອະທິດຖານຫາພໍ່ຂອງເພິ່ນ. ເຖິງວ່າພະເຢຊູຈະຫຍຸ້ງຫຼາຍສ່ຳໃດ ແຕ່ເພິ່ນກໍຫາເວລາທີ່ຈະອະທິດຖານສະເໝີ.
“ຢ່າເຮັດວຽກເພື່ອຈະໄດ້ອາຫານທີ່ເນົ່າເປື່ອຍໄດ້ ແຕ່ໃຫ້ເຮັດວຽກເພື່ອຈະໄດ້ອາຫານທີ່ບໍ່ເນົ່າເປື່ອຍເຊິ່ງຈະໃຫ້ຊີວິດຕະຫຼອດໄປ. ລູກມະນຸດຈະເອົາອາຫານນັ້ນໃຫ້ພວກເຈົ້າ.”—ໂຢຮັນ 6:27