ໃນໄລຍະກ່ອນການປະຊຸມອະນຸສອນ ເຮົາຈະຮຽນແບບຄວາມກະຕືລືລົ້ນຂອງພະເຢໂຫວາແລະພະເຍຊູໄດ້ບໍ?
1. ກ່ອນການປະຊຸມອະນຸສອນ ພະຍານພະເຢໂຫວາອອກຄວາມພະຍາຍາມຫຍັງເປັນພິເສດ?
1 ພະເຢໂຫວາເຮັດໃຫ້ຈຸດປະສົງຂອງພະອົງສຳເລັດດ້ວຍຄວາມກະຕືລືລົ້ນ. ເມື່ອເວົ້າເຖິງສິ່ງດີຕ່າງໆທີ່ລາຊະອານາຈັກຂອງພະເຢໂຫວາຈະນຳມາໃຫ້ ເອຊາອີ 9:7 ກ່າວວ່າ: “ຄວາມຫວງແຫນ [ຄວາມກະຕືລືລົ້ນ] ຂອງພະເຢໂຫວາແຫ່ງກອງທັບທັງຫຼາຍຈະກະທຳການນັ້ນ.” ຄ້າຍຄືກັນ ຕອນທີ່ເຮັດວຽກຮັບໃຊ້ຢູ່ແຜ່ນດິນໂລກ ລູກຊາຍຂອງພະເຢໂຫວາໄດ້ສຳແດງຄວາມກະຕືລືລົ້ນອັນຍິ່ງໃຫຍ່ເພື່ອການນະມັດສະການແທ້. (ໂຢ. 2:13-17; 4:34) ໃນແຕ່ລະປີກ່ອນການປະຊຸມອະນຸສອນ ຜູ້ປະກາດຫຼາຍລ້ານຄົນໃນທົ່ວໂລກໄດ້ພະຍາຍາມເປັນພິເສດໃນການຮຽນແບບຄວາມກະຕືລືລົ້ນຂອງພະເຢໂຫວາແລະພະເຍຊູໂດຍເຮັດວຽກປະກາດຫຼາຍຂຶ້ນ. ເຮົາຈະເປັນຄືກັບເຂົາເຈົ້າໄດ້ບໍ?
2. ຄວາມກະຕືລືລົ້ນກະຕຸ້ນເຮົາໃຫ້ເຮັດຫຍັງເຊິ່ງເລີ່ມຕົ້ນໃນວັນທີ 7 ມີນາ?
2 ໂຄງການພິເສດເພື່ອການປະຊຸມອະນຸສອນ: ໃນປີນີ້ ໂຄງການພິເສດເພື່ອໂຄສະນາການປະຊຸມອະນຸສອນຈະເລີ່ມຕົ້ນໃນວັນເສົາ ທີ 7 ມີນາ. ຄວນວາງແຜນຕັ້ງແຕ່ດຽວນີ້ເພື່ອຈະມີສ່ວນຮ່ວມຢ່າງເຕັມທີໃນວຽກຮັບໃຊ້. ຜູ້ປະກາດໃນປະຊາຄົມຈະຮູ້ສຶກຕື່ນເຕັ້ນຍິນດີເມື່ອມີສ່ວນຮ່ວມຢ່າງຫ້າວຫັນໃນເຂດຂອງຕົນໃຫ້ຫຼາຍເທົ່າທີ່ຈະຫຼາຍໄດ້. ໃຫ້ພະຍາຍາມເປັນພິເສດທີ່ຈະເຊີນນັກສຶກສາ ຄົນທີ່ເຮົາໄປຢາມ ເພື່ອນຮ່ວມງານ ຍາດພີ່ນ້ອງ ແລະໝູ່ຢູ່ໂຮງຮຽນ ໂດຍເອົາໃບເຊີນໃຫ້ເຂົາເຈົ້າຫຼືໃຊ້ເວັບໄຊ jw.org/lo
3. ເຮົາຈະຂະຫຍາຍວຽກຮັບໃຊ້ແນວໃດໃນເດືອນມີນາແລະເມສາ?
3 ເປັນໄພໂອເນຍສົມທົບ: ຄວາມກະຕືລືລົ້ນຍັງກະຕຸ້ນເຮົາໃຫ້ຂະຫຍາຍວຽກຮັບໃຊ້ຂອງເຮົາ. ແນ່ນອນວ່າຫຼາຍຄົນຈະສາມາດເປັນໄພໂອເນຍສົມທົບໄດ້ໃນເດືອນມີນາແລະເມສາ ເພາະເຮົາສາມາດເລືອກເຮັດ 30 ຊົ່ວໂມງໄດ້. ໃນການນະມັດສະການປະຈຳຄອບຄົວຫຼືການສຶກສາສ່ວນຕົວ ໃຫ້ຄົ້ນຄິດພ້ອມດ້ວຍການອະທິດຖານວ່າເຮົາຄວນເຮັດແນວໃດຈຶ່ງຈະເປັນໄພໂອເນຍສົມທົບໄດ້. (ສຸພາ. 15:22) ຄວາມກະຕືລືລົ້ນຂອງເຮົາສຳລັບໂຄງການນີ້ສາມາດກະຕຸ້ນຄົນອື່ນໃຫ້ຫ້າວຫັນສຳລັບກິດຈະກຳທີ່ເຮັດດ້ວຍໃຈກະຕືລືລົ້ນ. ຖ້າເຮົາເຮັດການປັບປ່ຽນເພື່ອຈະຂະຫຍາຍວຽກຮັບໃຊ້ຫຼາຍຂຶ້ນ ເຮົາຈະຮຽນແບບຄວາມກະຕືລືລົ້ນຂອງພະເຍຊູ.—ມໂກ. 6:31-34
4. ມີພະພອນອັນໃດແດ່ທີ່ມາຈາກການຮຽນແບບຄວາມກະຕືລືລົ້ນຂອງພະເຢໂຫວາແລະພະເຍຊູ?
4 ການທີ່ເຮົາຮຽນແບບຄວາມກະຕືລືລົ້ນຂອງພະເຢໂຫວາແລະພະເຍຊູໃນໄລຍະກ່ອນການປະຊຸມອະນຸສອນຈະເຮັດໃຫ້ເຮົາໄດ້ຮັບພະພອນມາກມາຍ. ມີອີກຫຼາຍຄົນໃນເຂດທີ່ຈະໄດ້ຍິນຂ່າວດີ. ເຮົາຈະປະສົບກັບຄວາມຍິນດີແລະຄວາມອີ່ມໃຈພໍໃຈທີ່ມາຈາກການຮັບໃຊ້ພະເຢໂຫວາແລະຈາກການໃຫ້ຄົນອື່ນ. (ກິດ. 20:35) ສິ່ງສຳຄັນທີ່ສຸດ ເຮົາຈະເຮັດໃຫ້ພະເຢໂຫວາແລະລູກຊາຍຂອງພະອົງທີ່ກະຕືລືລົ້ນມີຄວາມພໍໃຈ.