ບົດຄວາມສຶກສາທີ 19
ບໍ່ມີຫຍັງທີ່ຈະເຮັດໃຫ້ຄົນທີ່ຮັກພະເຈົ້າຫຼົງອອກໄປຈາກຄວາມເຊື່ອ
“ຄົນທີ່ຮັກກົດໝາຍຂອງພະອົງມີຄວາມສະຫງົບສຸກຫຼາຍ ບໍ່ມີຫຍັງເຮັດໃຫ້ພວກເຂົາລົ້ມພາດໄດ້.”—ເພງ. 119:165, ລ.ມ.
ເພງ 122 ຂໍໃຫ້ຢືນຢັດໝັ້ນຄົງ!
ໃຈຄວາມສຳຄັນa
1-2. ນັກຂຽນຄົນໜຶ່ງໄດ້ເວົ້າຫຍັງ ແລະເຮົາຈະຮຽນຫຍັງໃນບົດຄວາມນີ້?
ໃນທຸກມື້ນີ້ຫຼາຍລ້ານຄົນອ້າງວ່າເຊື່ອໃນພະເຢຊູ ແຕ່ວ່າເຂົາເຈົ້າບໍ່ຍອມຮັບສິ່ງທີ່ພະເຢຊູສອນ. (2 ຕມ. 4:3, 4) ມີນັກຂຽນຄົນໜຶ່ງເວົ້າວ່າ: “ສົມມຸດວ່າມີຄົນໜຶ່ງເວົ້າແລະເຮັດຄືກັບພະເຢຊູຢູ່ໃນສະໄໝຂອງເຮົາ ເຮົາຈະບໍ່ຍອມຮັບລາວຄືກັບຄົນໃນສະໄໝສອງພັນປີກ່ອນບໍ່ຍອມຮັບພະເຢຊູບໍ? . . . ຄຳຕອບກໍຄື ແມ່ນ ເຮົາຈະບໍ່ຍອມຮັບລາວ.”
2 ຕອນທີ່ພະເຢຊູມີຊີວິດຢູ່ໃນໂລກ ຫຼາຍຄົນໄດ້ຟັງເພິ່ນສອນແລະໄດ້ເຫັນເພິ່ນເຮັດການອັດສະຈັນ ແຕ່ເຂົາເຈົ້າກໍບໍ່ເຊື່ອເພິ່ນ. ຍ້ອນຫຍັງ? ໃນບົດຄວາມກ່ອນເຮົາໄດ້ຮຽນຮູ້ເຫດຜົນ 4 ຢ່າງທີ່ເຮັດໃຫ້ຫຼາຍຄົນໃນສະໄໝນັ້ນບໍ່ມັກສິ່ງທີ່ພະເຢຊູເວົ້າແລະເຮັດ. ໃນບົດຄວາມນີ້ເຮົາຈະມາເບິ່ງອີກ 4 ເຫດຜົນທີ່ເຮັດໃຫ້ຫຼາຍຄົນໃນສະໄໝນັ້ນບໍ່ຍອມຮັບພະເຢຊູ ແລະຫຼາຍຄົນໃນທຸກມື້ນີ້ບໍ່ມັກລູກສິດຂອງພະເຢຊູ. ນອກຈາກນັ້ນ ເຮົາຍັງຈະມາເບິ່ງວ່າສິ່ງໃດຈະຊ່ວຍເຮົາບໍ່ໃຫ້ຫຼົງອອກໄປຈາກຄວາມເຊື່ອ.
(1) ພະເຢຊູບໍ່ລຳອຽງ
ຫຼາຍຄົນບໍ່ຍອມຮັບພະເຢຊູຍ້ອນຜູ້ທີ່ເພິ່ນເລືອກຄົບຫານຳ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 3)b
3. ພະເຢຊູໄດ້ເຮັດຫຍັງທີ່ເຮັດໃຫ້ບາງຄົນຮັບບໍ່ໄດ້?
3 ຕອນທີ່ພະເຢຊູມີຊີວິດຢູ່ເທິງໂລກນີ້ ເພິ່ນໄດ້ໃຊ້ເວລາຢູ່ກັບຄົນທຸກຊົນຊັ້ນ. ເພິ່ນໄດ້ໄປກິນເຂົ້າກັບຄົນຮັ່ງມີແລະຄົນທີ່ມີຖານະຕຳແໜ່ງສູງ ແລະເພິ່ນກໍຍັງໃຊ້ເວລາຢູ່ກັບຄົນທຸກຍາກແລະຄົນຕ່ຳຕ້ອຍ. ນອກຈາກນັ້ນ ເພິ່ນຍັງເຫັນອົກເຫັນໃຈຕໍ່ຜູ້ທີ່ຖືກເອີ້ນວ່າເປັນ “ຄົນບາບ.” ຄົນທີ່ຄິດວ່າຕົວເອງຊອບທຳຮູ້ສຶກຮັບບໍ່ໄດ້ທີ່ພະເຢຊູເຮັດແບບນັ້ນ. ເຂົາເຈົ້າຈຶ່ງຖາມພວກລູກສິດຂອງພະເຢຊູວ່າ: “ເປັນຫຍັງພວກເຈົ້າຈຶ່ງກິນແລະດື່ມກັບພວກຄົນເກັບພາສີແລະຄົນບາບ?” ພະເຢຊູຕອບວ່າ: “ຄົນທີ່ສຸຂະພາບດີບໍ່ຕ້ອງການໝໍ ແຕ່ຄົນທີ່ເຈັບປ່ວຍຕ້ອງໃຫ້ໝໍປິ່ນປົວ. ຂ້ອຍມາ ບໍ່ແມ່ນເພື່ອຊ່ວຍຄົນດີ ແຕ່ມາຊ່ວຍຄົນບາບໃຫ້ກັບໃຈ.”—ລກ. 5:29-32
4. ຕາມຄຳພະຍາກອນຂອງເອຊາຢາ ຄົນຢິວຮູ້ຫຍັງຢູ່ແລ້ວກ່ຽວກັບເມຊີອາ?
4 ຄຳພີໄບເບິນເວົ້າແນວໃດ? ເປັນເວລາດົນກ່ອນທີ່ເມຊີອາຈະມາ ຜູ້ພະຍາກອນເອຊາຢາໄດ້ບອກໄວ້ວ່າ ຄົນໃນໂລກຈະບໍ່ຍອມຮັບເມຊີອາ. ຄຳພະຍາກອນນັ້ນບອກວ່າ: “ທ່ານຖືກປະໝາດ ຖືກປະຖິ້ມແຕ່ມະນຸດ . . . ແລະຄືຄົນທີ່ເຂົາບັງໜ້າຈາກທ່ານ. ທ່ານຖືກປະໝາດແລະເຮົາທັງຫຼາຍບໍ່ໄດ້ນັບຖືທ່ານສັກຂໍ້ດຽວ.” (ເອຊາ. 53:3) ຄຳພະຍາກອນນີ້ບອກວ່າເມຊີອາຈະຖືກມະນຸດ “ປະຖິ້ມ.” ດັ່ງນັ້ນ ຄົນຢິວໃນສະໄໝນັ້ນຕ້ອງຮູ້ຢູ່ແລ້ວວ່າຄົນທົ່ວໄປຈະບໍ່ຍອມຮັບເມຊີອາ.
5. ຫຼາຍຄົນໃນທຸກມື້ນີ້ເບິ່ງວ່າຜູ້ຮັບໃຊ້ຂອງພະເຢໂຫວາເປັນແນວໃດ?
5 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ບັນດາພວກຫົວໜ້າສາສະໜາຢາກໄດ້ສະມາຊິກທີ່ເປັນຄົນຮັ່ງມີ ສຳຄັນ ແລະມີໜ້າມີຕາໃນສັງຄົມ. ເຂົາເຈົ້າຮັບເອົາແມ່ນແຕ່ຄົນທີ່ເຮັດຜິດສິນລະທຳແລະຄົນທີ່ໃຊ້ຊີວິດທີ່ຂັດກັບຫຼັກການໃນຄຳພີໄບເບິນ. ແຕ່ເຂົາເຈົ້າພັດເບິ່ງວ່າ ຜູ້ຮັບໃຊ້ຂອງພະເຢໂຫວາທີ່ພະຍາຍາມເຮັດຕາມຫຼັກການດ້ານສິນລະທຳຂອງພະເຈົ້າເປັນຄົນທີ່ບໍ່ມີຄວາມສຳຄັນແລະບໍ່ມີຄ່າຫຍັງ. ໂປໂລບອກວ່າ ພະເຈົ້າເລືອກຄົນທີ່ຖືກ “ດູຖູກແລະຖືວ່າບໍ່ມີຄ່າ.” (1 ກຣ. 1:26-29) ເພາະສຳລັບພະເຢໂຫວາແລ້ວ ເພິ່ນຖືວ່າຜູ້ຮັບໃຊ້ທີ່ສັດຊື່ຂອງເພິ່ນທຸກຄົນມີຄ່າ.
6. ພະເຢຊູໄດ້ເວົ້າຫຍັງຢູ່ໃນມັດທາຍ 11:25, 26 ແລະເຮົາຈະຮຽນແບບເພິ່ນໄດ້ແນວໃດ?
6 ສິ່ງໃດຈະຊ່ວຍເຮົາບໍ່ໃຫ້ຫຼົງອອກໄປຈາກຄວາມເຊື່ອ? (ອ່ານມັດທາຍ 11:25, 26) ຢ່າໃຫ້ຄວາມຄິດຂອງຄົນໃນໂລກນີ້ກ່ຽວກັບຜູ້ຮັບໃຊ້ຂອງພະເຈົ້າມີຜົນຕໍ່ເຮົາ. (ເພງ. 138:6) ຂໍໃຫ້ຈື່ໄວ້ວ່າ ພະເຢໂຫວາໃຊ້ຄົນທີ່ຖ່ອມຕົວເຫຼົ່ານີ້ໃຫ້ເຮັດຕາມຄວາມຕ້ອງການຂອງເພິ່ນ ແລະຄິດເບິ່ງວ່າພະເຢໂຫວາໄດ້ໃຊ້ຄົນເຫຼົ່ານີ້ໃຫ້ເຮັດຫຍັງສຳເລັດໄປແດ່ແລ້ວ.
(2) ພະເຢຊູເປີດໂປງຄຳສອນຕົວະ
7. ເປັນຫຍັງພະເຢຊູຈຶ່ງເອີ້ນພວກຟາຣິຊາຍວ່າເປັນຄົນໜ້າຊື່ໃຈຄົດ ແລະເຂົາເຈົ້າຮູ້ສຶກແນວໃດ?
7 ພະເຢຊູກ້າຕຳໜິພວກຫົວໜ້າສາສະໜາໃນສະໄໝຂອງເພິ່ນທີ່ເປັນຄົນໜ້າຊື່ໃຈຄົດເຊັ່ນ: ພະເຢຊູຕຳໜິພວກຟາຣິຊາຍທີ່ໃຫ້ຄວາມສຳຄັນກັບການລ້າງມືຫຼາຍກວ່າການເບິ່ງແຍງພໍ່ແມ່. (ມທ. 15:1-11) ພວກລູກສິດຂອງພະເຢຊູອາດແປກໃຈທີ່ພະເຢຊູເວົ້າແບບນັ້ນ. ດັ່ງນັ້ນ ເຂົາເຈົ້າຈຶ່ງຖາມເພິ່ນວ່າ: “ອາຈານຮູ້ບໍວ່າ ພວກຟາຣິຊາຍໃຈຮ້າຍຫຼາຍທີ່ທ່ານເວົ້າແບບນັ້ນ?” ພະເຢຊູຕອບວ່າ: “ຕົ້ນໄມ້ທຸກຕົ້ນທີ່ພໍ່ຂອງຂ້ອຍທີ່ຢູ່ໃນສະຫວັນບໍ່ໄດ້ປູກ ມັນຈະຖືກຫຼົກຖິ້ມ. ປ່ອຍພວກເຂົາໄປໂລດ ພວກເຂົາເປັນຄົນນຳທາງທີ່ຕາບອດ ຖ້າຄົນຕາບອດນຳທາງຄົນຕາບອດ ທັງສອງຄົນຈະພາກັນຕົກຂຸມ.” (ມທ. 15:12-14) ເຖິງວ່າພວກຟາຣິຊາຍຈະຮູ້ສຶກໃຈຮ້າຍໃຫ້ພະເຢຊູທີ່ເພິ່ນເວົ້າແບບນັ້ນ ແຕ່ເພິ່ນຍັງເວົ້າຄວາມຈິງຕໍ່ໄປ.
8. ພະເຢຊູເວົ້າແນວໃດທີ່ສະແດງວ່າພະເຈົ້າບໍ່ໄດ້ຍອມຮັບຄຳສອນຂອງທຸກສາສະໜາ?
8 ພະເຢຊູເປີດໂປງຄຳສອນຕົວະ ແລະເພິ່ນກໍບໍ່ເຄີຍບອກວ່າ ພະເຈົ້າຍອມຮັບຄຳສອນຂອງທຸກສາສະໜາ. ທີ່ຈິງພະເຢຊູເວົ້າວ່າ ຫຼາຍຄົນຈະຢູ່ໃນທາງກວ້າງທີ່ພາໄປເຖິງຄວາມພິນາດ ແຕ່ຈະມີຄົນຈຳນວນໜ້ອຍທີ່ຢູ່ໃນທາງແຄບທີ່ພາໄປເຖິງຊີວິດ. (ມທ. 7:13, 14) ພະເຢຊູເວົ້າຢ່າງຈະແຈ້ງວ່າ ຫຼາຍຄົນເບິ່ງຄືວ່ານະມັດສະການພະເຈົ້າ ແຕ່ໃນຕົວຈິງແລ້ວບໍ່ແມ່ນແບບນັ້ນ. ເພິ່ນເຕືອນວ່າ: “ໃຫ້ລະວັງພວກຜູ້ພະຍາກອນປອມ ພວກນັ້ນປອມໂຕມາຫາພວກເຈົ້າໃນຮ່າງຂອງແກະ ແຕ່ແທ້ໆແລ້ວພວກເຂົາເປັນໝາປ່າທີ່ຫິວໂຫຍຫຼາຍ. ເຈົ້າຈະຮູ້ຈັກພວກເຂົາໄດ້ຈາກການກະທຳຂອງພວກເຂົາ.”—ມທ. 7:15-20
ຫຼາຍຄົນບໍ່ຍອມຮັບພະເຢຊູຍ້ອນເພິ່ນເປີດໂປງຄຳສອນຕົວະແລະພິທີກຳທາງສາສະໜາທີ່ບໍ່ຖືກຕ້ອງ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 9)c
9. ມີຄຳສອນຫຍັງແດ່ທີ່ພະເຢຊູເປີດໂປງວ່າບໍ່ຖືກຕ້ອງ?
9 ຄຳພີໄບເບິນເວົ້າແນວໃດ? ຄຳພີໄບເບິນພະຍາກອນວ່າ ເມຊີອາຈະມີຄວາມຮັກທີ່ແຮງກ້າຕໍ່ວິຫານຂອງພະເຢໂຫວາ. (ເພງ. 69:9; ຢຮ. 2:14-17) ຍ້ອນຄວາມຮັກແຮງກ້ານີ້ເຮັດໃຫ້ພະເຢຊູເປີດໂປງຄຳສອນຕົວະແລະພິທີກຳທາງສາສະໜາທີ່ບໍ່ຖືກຕ້ອງ. ຂໍໃຫ້ສົມທຽບເບິ່ງວ່າ ພວກຟາຣິຊາຍສອນວ່າຈິດວິນຍານເປັນອະມະຕະໝາຍຄວາມວ່າຄົນເຮົາຍັງມີຊີວິດຢູ່ຫຼັງຈາກຕາຍ. ແຕ່ພະເຢຊູສອນວ່າຄົນຕາຍຄືກັບຄົນທີ່ນອນຫຼັບຢູ່ ບໍ່ຮູ້ຈັກຫຍັງ ບໍ່ມີຊີວິດແລ້ວ. (ຢຮ. 11:11) ພວກຊາດູກາຍບໍ່ເຊື່ອເລື່ອງການຄືນມາຈາກຕາຍ ແຕ່ພະເຢຊູໄດ້ປຸກລາຊະໂຣໝູ່ຂອງເພິ່ນໃຫ້ຄືນມາຈາກຕາຍ. (ຢຮ. 11:43, 44; ກຈກ. 23:8) ພວກຟາຣິຊາຍສອນວ່າພະເຈົ້າໄດ້ລິຂິດຊີວິດເຮົາໄວ້ແລ້ວ ແຕ່ພະເຢຊູສອນວ່າມະນຸດເຮົາສາມາດເລືອກໄດ້ວ່າຈະນະມັດສະການພະເຈົ້າຫຼືບໍ່.—ມທ. 11:28
10. ເປັນຫຍັງຫຼາຍຄົນໃນທຸກມື້ນີ້ຈຶ່ງບໍ່ມັກຄຳສອນຂອງເຮົາ?
10 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ຫຼາຍຄົນບໍ່ມັກຄຳສອນຂອງເຮົາທີ່ມາຈາກຄຳພີໄບເບິນເຊິ່ງເປີດໂປງວ່າຄຳສອນຂອງສາສະໜາເຂົາເຈົ້າບໍ່ຖືກຕ້ອງເຊັ່ນ: ພະເຈົ້າລົງໂທດຄົນຊົ່ວໃນນະລົກ. ພວກຫົວໜ້າສາສະໜາໃຊ້ຄຳສອນຕົວະເພື່ອຄວບຄຸມສະມາຊິກຂອງເຂົາເຈົ້າ. ແຕ່ພະຍານພະເຢໂຫວາທີ່ນະມັດສະການພະເຈົ້າຜູ້ທີ່ມີຄວາມຮັກໄດ້ເປີດໂປງຄຳສອນເຫຼົ່ານັ້ນວ່າເປັນຄຳສອນຕົວະ. ພວກຫົວໜ້າສາສະໜາຍັງສອນວ່າຈິດວິນຍານເປັນອະມະຕະ. ແຕ່ພວກເຮົາເປີດໂປງວ່າຄຳສອນນີ້ບໍ່ໄດ້ມາຈາກຄຳພີໄບເບິນ. ທີ່ຈິງການຄືນມາຈາກຕາຍຈະບໍ່ມີເລີຍຖ້າຫາກວ່າຈິດວິນຍານເປັນອະມະຕະ. ເຖິງວ່າຫຼາຍສາສະໜາຈະສອນວ່າຊີວິດຂອງເຮົາຖືກລິຂິດໄວ້ແລ້ວ ແຕ່ເຮົາສອນວ່າຄົນເຮົາມີສິດທີ່ຈະເລືອກວ່າຈະນະມັດສະການພະເຈົ້າຫຼືບໍ່. ພວກຫົວໜ້າສາສະໜາຮູ້ສຶກແນວໃດເມື່ອເຮົາເປີດໂປງວ່າຄຳສອນຂອງເຂົາເຈົ້າເປັນຄຳສອນຕົວະ? ເຂົາເຈົ້າຮູ້ສຶກໃຈຮ້າຍຫຼາຍ.
11. ຕາມຄຳເວົ້າຂອງພະເຢຊູທີ່ຢູ່ໃນໂຢຮັນ 8:45-47 ພະເຢໂຫວາຕ້ອງການໃຫ້ປະຊາຊົນຂອງເພິ່ນເຮັດຫຍັງ?
11 ສິ່ງໃດຈະຊ່ວຍເຮົາບໍ່ໃຫ້ຫຼົງອອກໄປຈາກຄວາມເຊື່ອ? ຖ້າຫາກເຮົາມັກຄວາມຈິງ ເຮົາຈະຍອມຮັບສິ່ງທີ່ພະເຈົ້າສອນ. (ອ່ານໂຢຮັນ 8:45-47) ເຮົາບໍ່ຢາກເປັນຄືກັບຊາຕານທີ່ປະຖິ້ມຄວາມຈິງ. ແຕ່ເຮົາຈະຍຶດໝັ້ນກັບຄວາມຈິງແລະບໍ່ເຮັດສິ່ງທີ່ຂັດກັບຄວາມເຊື່ອແມ່ນແຕ່ສິ່ງເລັກໆນ້ອຍໆກໍຕາມ. (ຢຮ. 8:44) ພະເຢໂຫວາຕ້ອງການໃຫ້ປະຊາຊົນຂອງເພິ່ນ “ກຽດຊັງສິ່ງທີ່ຊົ່ວ” ແລະ “ໃຫ້ຍຶດໝັ້ນກັບສິ່ງທີ່ດີ” ຄືກັບພະເຢຊູໄດ້ເຮັດ.—ຣມ. 12:9; ຮຣ. 1:9
(3) ພະເຢຊູຖືກຂົ່ມເຫງ
ຫຼາຍຄົນບໍ່ຍອມຮັບພະເຢຊູຍ້ອນເພິ່ນຕາຍຢູ່ເທິງເສົາທໍລະມານ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 12)d
12. ເປັນຫຍັງວິທີທີ່ພະເຢຊູຕາຍຈຶ່ງເຮັດໃຫ້ຄົນຢິວບໍ່ຍອມຮັບເພິ່ນ?
12 ອີກສິ່ງໜຶ່ງທີ່ເຮັດໃຫ້ຄົນຢິວໃນສະໄໝພະເຢຊູບໍ່ຍອມຮັບເພິ່ນແມ່ນຫຍັງ? ໂປໂລເວົ້າວ່າ: “ພວກເຮົາພັດປະກາດເລື່ອງທີ່ພະຄລິດຖືກປະຫານເທິງເສົາ ເຊິ່ງເປັນເລື່ອງທີ່ຄົນຢິວຮັບບໍ່ໄດ້.” (1 ກຣ. 1:23) ເປັນຫຍັງຄົນຢິວຮັບບໍ່ໄດ້ທີ່ພະເຢຊູຕາຍຢູ່ເທິງເສົາ? ສຳລັບຄົນຢິວແລ້ວ ການທີ່ພະເຢຊູຕາຍຢູ່ເທິງເສົາທໍລະມານໝາຍຄວາມວ່າເພິ່ນເປັນຄົນບໍ່ດີ ບໍ່ສົມກັບຜູ້ທີ່ຈະມາເປັນເມຊີອາ.—ບັນຍັດ. 21:22, 23
13. ຄົນທີ່ບໍ່ເຊື່ອໃນພະເຢຊູເບິ່ງຂ້າມຫຍັງ?
13 ຄົນຢິວທີ່ບໍ່ຍອມຮັບພະເຢຊູບໍ່ຮູ້ວ່າພະເຢຊູເປັນຜູ້ບໍລິສຸດ ເພິ່ນຖືກກ່າວຫາຢ່າງຜິດໆ ແລະຖືກປະຕິບັດແບບບໍ່ຍຸຕິທຳ. ຜູ້ທີ່ດຳເນີນຄະດີຂອງພະເຢຊູບໍ່ສົນໃຈເລື່ອງຄວາມເປັນທຳເລີຍ. ສານສູງສຸດຂອງຊາວຢິວໄດ້ເອີ້ນສະມາຊິກມາປະຊຸມກັນແບບຟ້າວຟັ່ງ ແລະດຳເນີນຄະດີແບບບໍ່ຖືກຕ້ອງ. (ລກ. 22:54; ຢຮ. 18:24) ແທນທີ່ຜູ້ພິພາກສາຈະຟັງຂໍ້ກ່າວຫາແລະຫຼັກຖານແບບບໍ່ເຂົ້າຂ້າງຝ່າຍໃດຝ່າຍໜຶ່ງ ແຕ່ເຂົາເຈົ້າພັດຊອກ “ພະຍານຕົວະມາໃສ່ຮ້າຍພະເຢຊູເພື່ອຈະໄດ້ປະຫານເພິ່ນ.” ເມື່ອວິທີນີ້ໃຊ້ບໍ່ໄດ້ຜົນ ປະໂລຫິດໃຫຍ່ກໍເລີຍພະຍາຍາມເຮັດໃຫ້ພະເຢຊູເວົ້າຜິດເພື່ອຈະມັດຕົວເອງ ເຊິ່ງການເຮັດແບບນີ້ບໍ່ເປັນໄປຕາມລະບຽບການຂອງສານ. (ມທ. 26:59; ມຣກ. 14:55-64) ຫຼັງຈາກທີ່ພະເຢຊູຖືກປຸກໃຫ້ຄືນມາຈາກຕາຍແລ້ວ ພວກຜູ້ພິພາກສາເຫຼົ່ານັ້ນໄດ້ “ເອົາເງິນຈຳນວນຫຼາຍ” ໃຫ້ກັບທະຫານໂຣມຜູ້ທີ່ເຝົ້າຢູ່ອຸໂມງຝັງສົບເພື່ອໃຫ້ເຂົາເຈົ້າຕົວະວ່າ ພວກລູກສິດຂອງພະເຢຊູມາລັກເອົາສົບຂອງເພິ່ນໃນຕອນກາງຄືນ.—ມທ. 28:11-15
14. ຄຳພີໄບເບິນບອກລ່ວງໜ້າກ່ຽວກັບການຕາຍຂອງເມຊີອາແນວໃດ?
14 ຄຳພີໄບເບິນເວົ້າແນວໃດ? ເຖິງວ່າຄົນຢິວໃນສະໄໝພະເຢຊູບໍ່ໄດ້ຄິດວ່າເມຊີອາຈະຕ້ອງຕາຍ ແຕ່ຂໍໃຫ້ສັງເກດຄຳພະຍາກອນທີ່ຢູ່ໃນຄຳພີໄບເບິນທີ່ບອກວ່າ: “ເພິ່ນຍອມຕາຍ ແລະຍອມຖືກນັບລວມຢູ່ກັບຄົນຊົ່ວ ເພິ່ນແບກບາບຂອງຄົນຈຳນວນຫຼາຍ ແລະອ້ອນວອນເພື່ອຄົນຊົ່ວ.” (ເອຊາ. 53:12, ລ.ມ.) ດັ່ງນັ້ນ ຄົນຢິວບໍ່ມີເຫດຜົນທີ່ຈະບໍ່ເຊື່ອວ່າພະເຢຊູຕ້ອງຕາຍຄືກັບຄົນເຮັດຜິດ.
15. ມີຂໍ້ກ່າວຫາຫຍັງແດ່ທີ່ເຮັດໃຫ້ບາງຄົນບໍ່ມັກພະຍານພະເຢໂຫວາ?
15 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ພະເຢຊູຖືກກ່າວຫາແລະຖືກຕັດສິນຢ່າງບໍ່ຍຸຕິທຳ. ພະຍານພະເຢໂຫວາໃນທຸກມື້ນີ້ກໍຖືກປະຕິບັດແບບບໍ່ຍຸຕິທຳຄືກັນ. ຕົວຢ່າງເຊັ່ນ: ໃນລະຫວ່າງປີ 1930-1950 ພະຍານພະເຢໂຫວາຢູ່ສະຫະລັດອາເມຣິກາໄດ້ຂຶ້ນສານຫຼາຍເທື່ອເພື່ອປົກປ້ອງສິດເສລີພາບໃນການນະມັດສະການພະເຈົ້າ ແລະຜູ້ພິພາກສາບາງຄົນມີອະຄະຕິຕໍ່ພະຍານພະເຢໂຫວາ. ໃນເກເບັກປະເທດການາດາຄລິດສະຕຽນໂບດ ແລະລັດຖະບານໄດ້ຮ່ວມມືກັນເພື່ອຕໍ່ຕ້ານວຽກງານຂອງພະຍານພະເຢໂຫວາ. ພີ່ນ້ອງຫຼາຍຄົນຖືກຈັບເຂົ້າຄຸກຍ້ອນປະກາດເລື່ອງການປົກຄອງຂອງພະເຈົ້າໃຫ້ກັບເພື່ອນບ້ານ. ໃນປະເທດເຢຍລະມັນສະໄໝນາຊີປົກຄອງ ພີ່ນ້ອງຫຼາຍຄົນທີ່ສັດຊື່ໄດ້ຖືກຂ້າ. ແລະບໍ່ເທົ່າໃດປີມານີ້ພີ່ນ້ອງຢູ່ໃນປະເທດຣັດເຊຍຖືກຕັດສິນໃຫ້ເຂົ້າຄຸກຍ້ອນເວົ້າເລື່ອງຄຳພີໄບເບິນ ເຊິ່ງອຳນາດການປົກຄອງບອກວ່າ “ເປັນການກະທຳຂອງພວກຫົວຮຸນແຮງ.” ແມ່ນແຕ່ປຶ້ມຄຳພີໄບເບິນສະບັບແປໂລກໃໝ່ ໃນພາສາຣັດເຊຍກໍຍັງຖືກຫ້າມແລະບອກວ່າເປັນ “ປຶ້ມຂອງພວກຫົວຮຸນແຮງ” ເພາະໃສ່ຊື່ພະເຢໂຫວາ.
16. ຕາມ 1 ໂຢຮັນ 4:1 ເປັນຫຍັງເຮົາຈຶ່ງບໍ່ຄວນເຊື່ອເລື່ອງຕົວະກ່ຽວກັບພະຍານພະເຢໂຫວາ?
16 ສິ່ງໃດຈະຊ່ວຍເຮົາບໍ່ໃຫ້ຫຼົງອອກໄປຈາກຄວາມເຊື່ອ? ສຶກສາຄົ້ນຄວ້າໃຫ້ຮູ້ຄວາມຈິງ. ໃນຄຳບັນລະຍາຍເທິງພູເຂົາ ພະເຢຊູເຕືອນວ່າ ບາງຄົນຈະ “ໃສ່ຮ້າຍ” ພວກລູກສິດຂອງເພິ່ນ. (ມທ. 5:11) ຄຳຕົວະເຫຼົ່ານັ້ນມາຈາກຊາຕານ. ມັນໄດ້ເຮັດໃຫ້ພວກຜູ້ຕໍ່ຕ້ານໃສ່ຮ້າຍແລະກ່າວຫາພວກເຮົາແບບຜິດໆ. (ພນມ. 12:9, 10) ແຕ່ເຮົາຕ້ອງບໍ່ເຊື່ອຄຳຕົວະຂອງເຂົາເຈົ້າ ແລະບໍ່ໃຫ້ຄຳຕົວະເຫຼົ່ານັ້ນມາເຮັດໃຫ້ເຮົາຢ້ານແລະເຮັດໃຫ້ຄວາມເຊື່ອເຮົາອ່ອນລົງ.—ອ່ານ 1 ໂຢຮັນ 4:1
(4) ພະເຢຊູຖືກທໍລະຍົດແລະຖືກປະຖິ້ມ
ຫຼາຍຄົນບໍ່ຍອມຮັບພະເຢຊູຍ້ອນເພິ່ນຖືກຢູດາທໍລະຍົດ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 17-18)e
17. ເປັນຫຍັງບາງຄົນຈຶ່ງຮູ້ສຶກຮັບບໍ່ໄດ້ກັບເຫດການທີ່ເກີດຂຶ້ນກ່ອນທີ່ພະເຢຊູຈະຕາຍ?
17 ກ່ອນທີ່ພະເຢຊູຈະຕາຍ ອັກຄະສາວົກຄົນໜຶ່ງໄດ້ທໍລະຍົດເພິ່ນ ອີກຄົນໜຶ່ງໄດ້ປະຕິເສດເພິ່ນເຖິງ 3 ເທື່ອ ແລະອັກຄະສາວົກທັງໝົດກໍໄດ້ປະຖິ້ມເພິ່ນ. (ມທ. 26:14-16, 47, 56, 75) ພະເຢຊູບໍ່ຮູ້ສຶກແປກໃຈກ່ຽວກັບເລື່ອງນີ້ ເພາະເພິ່ນເອງກໍບອກລ່ວງໜ້າແລ້ວວ່າສິ່ງເຫຼົ່ານີ້ຈະເກີດຂຶ້ນ. (ຢຮ. 6:64; 13:21, 26, 38; 16:32) ເມື່ອເຫັນສິ່ງນີ້ເກີດຂຶ້ນ ບາງຄົນອາດຮູ້ສຶກຮັບບໍ່ໄດ້ແລະເວົ້າວ່າ: ‘ຖ້າອັກຄະສາວົກຂອງພະເຢຊູຍັງເຮັດແບບນັ້ນ ຂ້ອຍກໍບໍ່ຢາກເປັນລູກສິດຂອງພະເຢຊູດອກ!’
18. ມີຄຳພະຍາກອນຫຍັງແດ່ທີ່ເກີດຂຶ້ນແທ້ກ່ຽວກັບການຕາຍຂອງພະເຢຊູ?
18 ຄຳພີໄບເບິນເວົ້າແນວໃດ? ຫຼາຍຮ້ອຍປີກ່ອນທີ່ພະເຢຊູຈະມາແຜ່ນດິນໂລກ ພະເຢໂຫວາໄດ້ບອກໃຫ້ຮູ້ວ່າເມຊີອາຈະຖືກທໍລະຍົດດ້ວຍເງິນ 30 ຫຼຽນ. (ຊກາ. 11:12, 13) ຜູ້ທີ່ທໍລະຍົດກໍເປັນໝູ່ສະໜິດຂອງພະເຢຊູ. (ເພງ. 41:9) ຜູ້ພະຍາກອນຊາກາລີໄດ້ບອກວ່າ: “ຂ້າຄົນລ້ຽງແກະແລະເຮັດໃຫ້ຝູງແກະກະຈັດກະຈາຍໄປ.” (ຊກາ. 13:7, ລ.ມ.) ຄົນທີ່ຮັກພະເຢໂຫວາຈະບໍ່ປະຕິເສດພະເຢຊູຍ້ອນເຫດການທີ່ເກີດຂຶ້ນ ແຕ່ເຂົາເຈົ້າຈະມີຄວາມເຊື່ອເຂັ້ມແຂງຫຼາຍຂຶ້ນເມື່ອເຫັນວ່າຄຳພະຍາກອນຕ່າງໆກ່ຽວກັບພະເຢຊູເກີດຂຶ້ນແທ້.
19. ຄົນທີ່ຮັກພະເຈົ້າຮູ້ວ່າຈະເກີດຫຍັງຂຶ້ນ?
19 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ໃນທຸກມື້ນີ້ພະຍານພະເຢໂຫວາບາງຄົນໄດ້ຖິ້ມຄວາມເຊື່ອໄປ ແລ້ວກາຍເປັນຜູ້ທີ່ທໍລະຍົດພະເຈົ້າແລະຍັງພະຍາຍາມເຮັດໃຫ້ຄົນອື່ນຖິ້ມຄວາມເຊື່ອຄືກັນ. ເຂົາເຈົ້າແຜ່ຂ່າວລືທີ່ເປັນຄຳຕົວະເລື່ອງພະຍານພະເຢໂຫວາຜ່ານທາງອິນເຕີເນັດ ໂທລະທັດ ຫຼືປຶ້ມອື່ນໆ. ແຕ່ຄົນທີ່ຮັກພະເຢໂຫວາຈະບໍ່ຫຼົງເຊື່ອຂ່າວລືນີ້ຍ້ອນເຂົາເຈົ້າຮູ້ແລ້ວວ່າ ຄຳພີໄບເບິນບອກວ່າສິ່ງເຫຼົ່ານີ້ຈະເກີດຂຶ້ນ.—ມທ. 24:24; 2 ປຕ. 2:18-22
20. ເຮົາຕ້ອງເຮັດຫຍັງເພື່ອບໍ່ໃຫ້ຄົນທີ່ປະຖິ້ມຄວາມເຊື່ອມາເຮັດໃຫ້ເຮົາອອກຈາກຄວາມເຊື່ອ? (2 ຕີໂມທຽວ 4:4, 5)
20 ສິ່ງໃດຈະຊ່ວຍເຮົາບໍ່ໃຫ້ຫຼົງອອກໄປຈາກຄວາມເຊື່ອ? ເຮົາຕ້ອງເຮັດໃຫ້ຄວາມເຊື່ອຂອງເຮົາເຂັ້ມແຂງຢູ່ສະເໝີໂດຍສຶກສາຄຳພີໄບເບິນເປັນປະຈຳ ອະທິດຖານຢູ່ເລື້ອຍໆ ແລະເຮັດວຽກທີ່ພະເຢໂຫວາຕ້ອງການໃຫ້ເຮົາເຮັດ. (ອ່ານ 2 ຕີໂມທຽວ 4:4, 5) ຖ້າເຮົາມີຄວາມເຊື່ອເຂັ້ມແຂງ ເຮົາກໍຈະບໍ່ຫຼົງເຊື່ອຂ່າວຕົວະກ່ຽວກັບພະຍານພະເຢໂຫວາ. (ເອຊາ. 28:16) ຖ້າເຮົາຮັກພະເຢໂຫວາ ຮັກຄຳພີໄບເບິນ ແລະຮັກພີ່ນ້ອງ ເຮົາກໍຈະບໍ່ຍອມໃຫ້ຄົນທີ່ປະຖິ້ມຄວາມເຊື່ອເຮັດໃຫ້ເຮົາອອກຈາກຄວາມເຊື່ອ.
21. ເຖິງວ່າຫຼາຍຄົນໃນທຸກມື້ນີ້ບໍ່ມັກສິ່ງທີ່ເຮົາປະກາດ ແຕ່ເຮົາໝັ້ນໃຈໃນເລື່ອງຫຍັງ?
21 ໃນສະຕະວັດທຳອິດຫຼາຍຄົນບໍ່ຍອມຮັບພະເຢຊູຍ້ອນບໍ່ເຊື່ອເພິ່ນ. ແຕ່ກໍມີຄົນອີກຈຳນວນໜຶ່ງທີ່ຍອມຮັບເພິ່ນ. ແມ່ນແຕ່ສະມາຊິກຄົນໜຶ່ງໃນສານຊັນເຮດຣິນຂອງຊາວຢິວແລະ “ປະໂລຫິດກຸ່ມໃຫຍ່” ກໍໄດ້ເຊື່ອໃນພະເຢຊູ. (ກຈກ. 6:7; ມທ. 27:57-60; ມຣກ. 15:43) ໃນທຸກມື້ນີ້ກໍຄືກັນ ຫຼາຍລ້ານຄົນໄດ້ເຊື່ອໃນພະເຢຊູ. ຍ້ອນຫຍັງ? ຍ້ອນເຂົາເຈົ້າຮູ້ແລະມັກຄວາມຈິງໃນຄຳພີໄບເບິນ. ຄຳພີໄບເບິນບອກວ່າ: “ຄົນທີ່ຮັກກົດໝາຍຂອງພະອົງມີຄວາມສະຫງົບສຸກຫຼາຍ ບໍ່ມີຫຍັງເຮັດໃຫ້ພວກເຂົາລົ້ມພາດໄດ້.”—ເພງ. 119:165, ລ.ມ.
ເພງ 124 ສັດຊື່ຕະຫຼອດໄປ
a ໃນບົດຄວາມກ່ອນເຮົາໄດ້ເບິ່ງເຫດຜົນ 4 ຢ່າງທີ່ຫຼາຍຄົນໃນສະໄໝກ່ອນບໍ່ຍອມຮັບພະເຢຊູ ແລະຫຼາຍຄົນໃນທຸກມື້ນີ້ບໍ່ມັກສິ່ງທີ່ລູກສິດຂອງພະເຢຊູເວົ້າແລະເຮັດ. ໃນບົດຄວາມນີ້ເຮົາຈະມາເບິ່ງອີກ 4 ເຫດຜົນ ແລະເຮົາຍັງຈະມາເບິ່ງວ່າເປັນຫຍັງຄົນທີ່ຮັກພະເຢໂຫວາຈຶ່ງບໍ່ຍອມໃຫ້ສິ່ງໃດກໍຕາມມາເຮັດໃຫ້ເຂົາເຈົ້າຫຼົງອອກໄປຈາກຄວາມເຊື່ອ.
b ຄຳອະທິບາຍຮູບພາບ: ພະເຢຊູກິນເຂົ້າກັບມັດທາຍແລະພວກຄົນເກັບພາສີ.
c ຄຳອະທິບາຍຮູບພາບ: ພະເຢຊູໄລ່ພວກພໍ່ຄ້າອອກຈາກວິຫານ.
d ຄຳອະທິບາຍຮູບພາບ: ພະເຢຊູຖືກບັງຄັບໃຫ້ແບກເສົາທໍລະມານ.
e ຄຳອະທິບາຍຮູບພາບ: ຢູດາທໍລະຍົດພະເຢຊູໂດຍການຈູບແກ້ມເພິ່ນ.