ເຄັດລັບການຄົ້ນຄວ້າ
ຝຶກທີ່ຈະຈື່ເນື້ອເພງຂອງອົງການ
“ຕອນທີ່ຂ້ອຍຮູ້ສຶກເສົ້າ ພະເຢໂຫວາໃຫ້ກຳລັງໃຈຂ້ອຍໂດຍທາງເພງຕ່າງໆທີ່ຢູ່ໃນລາຍການໂທລະທັດ JW.”—ລໍເຣນຈາກອາເມຣິກາ
“ເພງນະມັດສະການພະເຈົ້າ” ເປັນສ່ວນໜຶ່ງຂອງການນະມັດສະການຂອງຄລິດສະຕຽນມາແຕ່ດົນແລ້ວ. (ກລຊ. 3:16) ຖ້າເຈົ້າຈື່ເພງເຫຼົ່ານີ້ຂຶ້ນໃຈ ມັນຈະຊ່ວຍເຈົ້າໄດ້ເຖິງວ່າເຈົ້າບໍ່ມີປຶ້ມເພງຫຼືເຄື່ອງເອເລັກໂຕຣນິກ. ໃຫ້ລອງເຮັດຕາມຄຳແນະນຳຕໍ່ໄປນີ້ເພື່ອຊ່ວຍເຈົ້າໃຫ້ຈື່ບາງເພງໄດ້.
ອ່ານເນື້ອເພງດີໆເພື່ອຈະເຂົ້າໃຈຄວາມໝາຍ. ຖ້າເຮົາເຂົ້າໃຈຄວາມໝາຍຂອງບາງເລື່ອງ ມັນກໍງ່າຍຂຶ້ນທີ່ເຮົາຈະຈື່. ເນື້ອເພງທັງໝົດຂອງເຮົາລວມທັງເພງຈາກມິວສິກວິດີໂອແລະເພງຂອງເດັກນ້ອຍມີຢູ່ໃນ jw.org ໃນປ່ອງ “ສື່ແລະສິ່ງພິມ” ໄປທີ່ “ດົນຕີ.”
ຈົດເນື້ອເພງໃສ່ເຈ້ຍ. ການເຮັດແບບນີ້ຈະຊ່ວຍເຈົ້າໃຫ້ຈື່ເນື້ອເພງຕື່ມອີກ.—ພບຍ. 17:18
ຝຶກຮ້ອງອອກສຽງ. ອ່ານຫຼືຝຶກຮ້ອງຫຼາຍໆເທື່ອ.
ທົດສອບຄວາມຈຳຂອງເຈົ້າ. ພະຍາຍາມຮ້ອງເພງໂດຍບໍ່ເບິ່ງເນື້ອເພງ ແລ້ວກວດເບິ່ງວ່າເຈົ້າຈື່ໄດ້ດີສ່ຳໃດ.