ບົດຄວາມສຶກສາທີ 31
ເພງທີ 12 ພະເຢໂຫວາພະເຈົ້າອົງຍິ່ງໃຫຍ່
ພະເຢໂຫວາໄດ້ເຮັດຫຍັງເພື່ອຊ່ວຍມະນຸດໃຫ້ຫຼຸດພົ້ນຈາກບາບແລະຄວາມຕາຍ?
“ພະເຈົ້າຮັກຄົນໃນໂລກຫຼາຍ ຈົນເຖິງຂັ້ນຍອມສະລະລູກຄົນດຽວຂອງເພິ່ນ.”—ຢຮ. 3:16
ຈຸດສຳຄັນ
ພະເຢໂຫວາຊ່ວຍເຮົາແນວໃດໃຫ້ຕໍ່ສູ້ກັບບາບ ແລະເພິ່ນເຮັດແນວໃດເພື່ອຊ່ວຍເຮົາໃຫ້ຫຼຸດພົ້ນຈາກບາບແລະມີໂອກາດທີ່ຈະມີຊີວິດຕະຫຼອດໄປ.
1-2. (ກ) ບາບແມ່ນຫຍັງ ແລະເຮົາຈະເອົາຊະນະມັນໄດ້ແນວໃດ? (ເບິ່ງ “ການອະທິບາຍຄຳສັບ” ນຳ) (ຂ) ເຮົາຈະຮຽນຫຍັງໃນບົດນີ້ແລະໃນບົດອື່ນໆທີ່ຢູ່ໃນຫໍສັງເກດການສະບັບນີ້? (ເບິ່ງສ່ວນ “ເຖິງຜູ້ອ່ານ” ໃນໜ້າ 32 ນຳ)
ເຈົ້າຢາກຮູ້ບໍວ່າພະເຢໂຫວາຮັກເຈົ້າຫຼາຍສ່ຳໃດ? ເຈົ້າສາມາດຮູ້ໄດ້ໂດຍຮຽນກ່ຽວກັບສິ່ງທີ່ເພິ່ນໄດ້ເຮັດເພື່ອຊ່ວຍເຈົ້າໃຫ້ຫຼຸດພົ້ນຈາກບາບແລະຄວາມຕາຍ. ບາບaເປັນສັດຕູທີ່ໂຫດຮ້າຍຫຼາຍເຊິ່ງເຮົາບໍ່ສາມາດຕໍ່ສູ້ໄດ້ດ້ວຍໂຕເອງ. ເຮົາທຸກຄົນເປັນຄົນບາບແລະເຮັດຜິດທຸກໆມື້. ຍ້ອນເຮົາເປັນຄົນບາບ ເຮົາຈຶ່ງຕ້ອງຕາຍ. (ຣມ. 5:12) ເຖິງຈະເປັນແນວນັ້ນ ແຕ່ກໍມີຂ່າວດີ. ດ້ວຍຄວາມຊ່ວຍເຫຼືອຈາກພະເຢໂຫວາ ເຮົາສາມາດເອົາຊະນະບາບແລະຄວາມຕາຍໄດ້ແນ່ນອນ.
2 ປະມານ 6.000 ປີທີ່ຜ່ານມາ ພະເຢໂຫວາໄດ້ຊ່ວຍມະນຸດໃຫ້ຕໍ່ສູ້ກັບບາບ. ຍ້ອນຫຍັງເພິ່ນຈຶ່ງເຮັດແບບນັ້ນ? ຍ້ອນເພິ່ນຮັກເຮົາຫຼາຍ. ພະເຢໂຫວາຮັກເຮົາຕັ້ງແຕ່ຕອນທີ່ເພິ່ນສ້າງມະນຸດ. ຍ້ອນແນວນີ້ ເພິ່ນຈຶ່ງໄດ້ເຮັດຫຼາຍຢ່າງເພື່ອຊ່ວຍເຮົາໃຫ້ຕໍ່ສູ້ກັບບາບ. ພະເຢໂຫວາຮູ້ວ່າບາບເຮັດໃຫ້ເຮົາຕາຍ ແຕ່ເພິ່ນບໍ່ຢາກໃຫ້ເຮົາຕາຍ. ເພິ່ນຢາກໃຫ້ເຮົາມີຊີວິດຕະຫຼອດໄປ. (ຣມ. 6:23) ນີ້ແມ່ນສິ່ງທີ່ພະເຢໂຫວາຢາກໃຫ້ເຈົ້າ. ໃນບົດນີ້ເຮົາຈະເບິ່ງ 3 ຄຳຖາມນຳກັນ (1) ພະເຢໂຫວາໃຫ້ຄວາມຫວັງຫຍັງກັບມະນຸດທີ່ມີບາບ? (2) ມະນຸດທີ່ມີບາບໃນສະໄໝທີ່ຂຽນຄຳພີໄບເບິນໄດ້ເຮັດຫຍັງເພື່ອເຮັດໃຫ້ພະເຢໂຫວາພໍໃຈ? (3) ພະເຢຊູໄດ້ເຮັດຫຍັງເພື່ອຊ່ວຍມະນຸດໃຫ້ຫຼຸດພົ້ນຈາກບາບແລະຄວາມຕາຍ?
ພະເຢໂຫວາໃຫ້ຄວາມຫວັງຫຍັງກັບມະນຸດທີ່ມີບາບ?
3. ອາດາມກັບເອວາເຮັດຜິດໄດ້ແນວໃດ?
3 ຕອນທີ່ພະເຢໂຫວາສ້າງຜູ້ຊາຍແລະຜູ້ຍິງຄູ່ທຳອິດ ເພິ່ນຢາກໃຫ້ເຂົາເຈົ້າມີຊີວິດທີ່ມີຄວາມສຸກ. ເພິ່ນໃຫ້ເຂົາເຈົ້າມີບ່ອນຢູ່ທີ່ງາມໆ ມີຊີວິດຄູ່ທີ່ດີ ແລະມີວຽກທີ່ໜ້າຕື່ນເຕັ້ນເຮັດ. ເຂົາເຈົ້າຕ້ອງມີລູກມີຫຼານເຕັມໂລກນີ້ ແລະເຮັດໃຫ້ໂລກກາຍເປັນບ່ອນທີ່ງາມໆຄືກັບສວນເອເດັນ. ພະເຢໂຫວາໃຫ້ຄຳສັ່ງງ່າຍໆກັບເຂົາເຈົ້າພຽງຂໍ້ດຽວ ແລະເພິ່ນໄດ້ເຕືອນເຂົາເຈົ້າວ່າຖ້າບໍ່ເຊື່ອຟັງຄຳສັ່ງນັ້ນ ເຂົາເຈົ້າຈະຕາຍ. ເຮົາຮູ້ວ່າເກີດຫຍັງຂຶ້ນ. ມີທູດສະຫວັນຊົ່ວອົງໜຶ່ງທີ່ບໍ່ຮັກມະນຸດແລະບໍ່ຮັກພະເຢໂຫວາໄດ້ລໍ້ລວງອາດາມກັບເອວາບໍ່ໃຫ້ເຊື່ອຟັງພະເຢໂຫວາ. ອາດາມກັບເອວາໄດ້ເຮັດຕາມທີ່ທູດສະຫວັນຊົ່ວບອກ. ເຂົາເຈົ້າບໍ່ໄດ້ໄວ້ໃຈພະເຢໂຫວາພໍ່ທີ່ຮັກເຂົາເຈົ້າຫຼາຍ ຍ້ອນແນວນີ້ເຂົາເຈົ້າຈຶ່ງເຮັດຜິດ. ຄືກັບທີ່ເຮົາຮູ້ ສິ່ງທີ່ພະເຢໂຫວາເວົ້າເປັນຄວາມຈິງ. ນັບຕັ້ງແຕ່ນັ້ນເປັນຕົ້ນມາເຂົາເຈົ້າຕ້ອງຮັບຜົນຈາກການເຮັດຜິດ ເຂົາເຈົ້າເຖົ້າລົງ ແລ້ວໃນທີ່ສຸດກໍຕາຍ.—ປຖກ. 1:28, 29; 2:8, 9, 16-18; 3:1-6, 17-19, 24; 5:5
4. ເປັນຫຍັງພະເຢໂຫວາຈຶ່ງຊັງບາບແລະຢາກຊ່ວຍເຮົາໃຫ້ຕໍ່ສູ້ກັບບາບ? (ໂຣມ 8:20, 21)
4 ພະເຢໂຫວາໃຫ້ຂຽນເລື່ອງທີ່ໜ້າເສົ້ານີ້ໄວ້ໃນຄຳພີໄບເບິນເພື່ອເຮົາຈະໄດ້ຮັບປະໂຫຍດ. ມັນຊ່ວຍເຮົາໃຫ້ເຂົ້າໃຈວ່າເປັນຫຍັງເພິ່ນຈຶ່ງຊັງບາບຫຼາຍແທ້ໆ. ບາບເຮັດໃຫ້ເຮົາຫ່າງຈາກພະເຢໂຫວາແລະເຮັດໃຫ້ເຮົາຕ້ອງຕາຍ. (ອຊຢ. 59:2) ຍ້ອນແນວນີ້ຊາຕານຈຶ່ງລໍ້ລວງອາດາມກັບເອວາໃຫ້ເຮັດຜິດ ແລະໃນທຸກມື້ນີ້ມັນຍັງລໍ້ລວງເຮົາໃຫ້ເຮັດຜິດຄືກັນ. ຕອນທີ່ອາດາມກັບເອວາເຮັດຜິດ ຊາຕານອາດຄິດວ່າມັນຊະນະພະເຢໂຫວາແລ້ວແລະໄດ້ທຳລາຍຄວາມຕ້ອງການຂອງເພິ່ນທີ່ມີຕໍ່ມະນຸດໄດ້ສຳເລັດແລ້ວ. ແຕ່ມັນບໍ່ຮູ້ວ່າພະເຢໂຫວາຮັກມະນຸດຫຼາຍສ່ຳໃດ. ເພິ່ນບໍ່ເຄີຍລົ້ມເລີກຄວາມຕ້ອງການຂອງເພິ່ນທີ່ມີຕໍ່ລູກຫຼານຂອງອາດາມກັບເອວາ. ພະເຢໂຫວາຮັກມະນຸດຫຼາຍ ເພິ່ນຈຶ່ງໃຫ້ຄວາມຫວັງກັບພວກເຮົາທຸກຄົນ. (ອ່ານໂຣມ 8:20, 21) ພະເຢໂຫວາຮູ້ວ່າລູກຫຼານບາງຄົນຂອງອາດາມກັບເອວາຈະຮັກແລະເຊື່ອຟັງເພິ່ນ. ໃນຖານະທີ່ເປັນພໍ່ແລະເປັນຜູ້ສ້າງ ພະເຢໂຫວາມີວິທີທີ່ຈະຊ່ວຍເຮົາໃຫ້ຫຼຸດພົ້ນຈາກບາບແລະຄວາມຕາຍ ແລະຊ່ວຍເຮົາໃຫ້ໃກ້ຊິດກັບເພິ່ນ. ພະເຢໂຫວາຈະເຮັດຫຍັງເພື່ອໃຫ້ເລື່ອງທັງໝົດນີ້ເປັນໄປໄດ້?
5. ຕອນໃດທີ່ພະເຢໂຫວາເລີ່ມໃຫ້ຄວາມຫວັງກັບມະນຸດ ແລະຄຳພະຍາກອນໃນປະຖົມມະການ 3:15 ບອກລ່ວງໜ້າວ່າແນວໃດ?
5 ອ່ານປະຖົມມະການ 3:15. ພະເຢໂຫວາເລີ່ມໃຫ້ຄວາມຫວັງກັບມະນຸດທັນທີຫຼັງຈາກອາດາມກັບເອວາເຮັດຜິດ ເພິ່ນບອກວ່າຊາຕານຈະຖືກທຳລາຍ. ພະເຢໂຫວາບອກລ່ວງໜ້າວ່າຈະມີ “ເຊື້ອສາຍ” ມາຊ່ວຍມະນຸດໃຫ້ລອດ ແລະໃນທີ່ສຸດເຊື້ອສາຍນີ້ຈະທຳລາຍຊາຕານແລະແກ້ໄຂບັນຫາທຸກຢ່າງທີ່ມັນກໍ່ຂຶ້ນໃນສວນເອເດັນ. (1ຢຮ. 3:8) ແຕ່ວິທີນີ້ຈະເຮັດໃຫ້ເຊື້ອສາຍເຈັບປວດທໍລະມານ ແລະຊາຕານຈະເຮັດໃຫ້ເຊື້ອສາຍຜູ້ນີ້ຕາຍ. ເລື່ອງນີ້ຈະເຮັດໃຫ້ພະເຢໂຫວາເຈັບປວດຫຼາຍແທ້ໆ. ແຕ່ເພິ່ນຖືວ່າຄວາມເຈັບປວດນີ້ຄຸ້ມຄ່າຍ້ອນວ່າໃນທີ່ສຸດມະນຸດຈຳນວນນັບບໍ່ຖ້ວນຈະໄດ້ຮັບການຊ່ວຍໃຫ້ລອດຈາກບາບແລະຄວາມຕາຍ.
ມະນຸດທີ່ມີບາບໃນສະໄໝທີ່ຂຽນຄຳພີໄບເບິນໄດ້ເຮັດຫຍັງເພື່ອເຮັດໃຫ້ພະເຢໂຫວາພໍໃຈ?
6. ອາເບັນແລະໂນອາທີ່ເປັນຜູ້ຮັບໃຊ້ທີ່ສັດຊື່ໄດ້ເຮັດຫຍັງເພື່ອຈະໃກ້ຊິດກັບພະເຢໂຫວາ?
6 ຫຼາຍຮ້ອຍປີຜ່ານໄປ ພະເຢໂຫວາໄດ້ຄ່ອຍໆເຮັດໃຫ້ເຫັນແຈ້ງຂຶ້ນວ່າມະນຸດທີ່ມີບາບສາມາດໃກ້ຊິດກັບເພິ່ນໄດ້. ອາເບັນລູກຊາຍຜູ້ທີ 2 ຂອງອາດາມກັບເອວາເປັນຄົນທຳອິດທີ່ໄດ້ສະແດງຄວາມເຊື່ອໃນພະເຢໂຫວາຫຼັງຈາກທີ່ມີການກະບົດໃນສວນເອເດັນ. ຍ້ອນອາເບັນຮັກພະເຢໂຫວາ ຢາກເຮັດໃຫ້ເພິ່ນພໍໃຈ ແລະຢາກໃກ້ຊິດກັບເພິ່ນ ລາວຈຶ່ງເອົາເຄື່ອງບູຊາໃຫ້ເພິ່ນ. ອາເບັນເປັນຄົນລ້ຽງແກະ ລາວໄດ້ເອົາແກະນ້ອຍຈຳນວນໜຶ່ງມາຂ້າແລະເຜົາເປັນເຄື່ອງບູຊາໃຫ້ພະເຢໂຫວາ. ພະເຢໂຫວາຮູ້ສຶກແນວໃດ? ເພິ່ນ “ພໍໃຈອາເບັນແລະເຄື່ອງບູຊາຂອງລາວ.” (ປຖກ. 4:4) ພະເຢໂຫວາຍັງພໍໃຈເຄື່ອງບູຊາຂອງຜູ້ຮັບໃຊ້ທີ່ສັດຊື່ຄົນອື່ນໆທີ່ຮັກແລະໄວ້ໃຈເພິ່ນຄືກັນ ເຊັ່ນ ໂນອາ. (ປຖກ. 8:20, 21) ການທີ່ພະເຢໂຫວາຍອມຮັບເອົາເຄື່ອງບູຊາເຫຼົ່ານີ້ສະແດງໃຫ້ເຫັນວ່າມະນຸດທີ່ມີບາບສາມາດເຮັດໃຫ້ເພິ່ນພໍໃຈແລະໃກ້ຊິດກັບເພິ່ນໄດ້.b
7. ເຮົາຮຽນຫຍັງຈາກການທີ່ອັບຣາຮາມເຕັມໃຈເອົາລູກຊາຍຂອງໂຕເອງໄປເປັນເຄື່ອງບູຊາ?
7 ອັບຣາຮາມເປັນຄົນທີ່ມີຄວາມເຊື່ອເຂັ້ມແຂງຫຼາຍ. ພະເຢໂຫວາບອກລາວໃຫ້ເຮັດບາງຢ່າງທີ່ຍາກຫຼາຍ ນັ້ນກໍຄືໃຫ້ເອົາອີຊາກລູກຊາຍຄົນດຽວຂອງລາວໄປເປັນເຄື່ອງບູຊາ. ເລື່ອງນີ້ຕ້ອງເຮັດໃຫ້ອັບຣາຮາມເຈັບປວດໃຈຫຼາຍແທ້ໆ. ແຕ່ລາວກໍເຊື່ອຟັງພະເຢໂຫວາ. ຕອນທີ່ອັບຣາຮາມກຳລັງຈະຂ້າລູກຊາຍຂອງໂຕເອງ ພະເຢໂຫວາໄດ້ຫ້າມລາວໄວ້. ພະເຢໂຫວາຮູ້ວ່າອັບຣາຮາມຈະເຈັບປວດໃຈຫຼາຍແທ້ໆຖ້າລາວຕ້ອງຂ້າລູກຂອງໂຕເອງ. ຕົວຢ່າງນີ້ຊ່ວຍເຮົາໃຫ້ຮູ້ສິ່ງທີ່ພະເຢໂຫວາຈະເຮັດໃນອະນາຄົດ. ພະເຢໂຫວາເຕັມໃຈທີ່ຈະເສຍສະລະລູກຊາຍຄົນດຽວທີ່ເພິ່ນຮັກທີ່ສຸດໃຫ້ເປັນເຄື່ອງບູຊາຍ້ອນເພິ່ນຮັກມະນຸດຫຼາຍແທ້ໆ.—ປຖກ. 22:1-18
8. ການເຜົາສັດເປັນເຄື່ອງບູຊາຕາມກົດໝາຍຂອງໂມເຊສະແດງເຖິງຫຍັງ? (ລະບຽບພວກເລວີ 4:27-29; 17:11)
8 ຫຼາຍຮ້ອຍປີຕໍ່ມາ ພະເຢໂຫວາໄດ້ໃຫ້ກົດໝາຍກັບຊາດອິດສະຣາເອນ ໃນກົດໝາຍນັ້ນເພິ່ນບອກເຂົາເຈົ້າໃຫ້ເຜົາສັດເປັນເຄື່ອງບູຊາເພື່ອຄວາມຜິດຂອງເຂົາເຈົ້າຈະໄດ້ຮັບການຍົກໂທດ. (ອ່ານລະບຽບພວກເລວີ 4:27-29; 17:11) ເຄື່ອງບູຊາເຫຼົ່ານີ້ສະແດງເຖິງເຄື່ອງບູຊາທີ່ດີກວ່າເຊິ່ງຈະຊ່ວຍມະນຸດໃຫ້ຫຼຸດພົ້ນຈາກບາບໄດ້ແທ້ໆ. ພະເຢໂຫວາບອກຜູ້ພະຍາກອນຂອງເພິ່ນໃຫ້ບອກລ່ວງໜ້າກ່ຽວກັບເຊື້ອສາຍທີ່ສັນຍາໄວ້. ເຂົາເຈົ້າບອກວ່າລູກຊາຍຂອງພະເຈົ້າຈະທົນທຸກທໍລະມານແລະຕາຍ. ລາວຈະຖືກຂ້າຄືກັບແກະທີ່ເອົາໄປເປັນເຄື່ອງບູຊາ. (ອຊຢ. 53:1-12) ນີ້ໝາຍຄວາມວ່າພະເຢໂຫວາສັນຍາວ່າເພິ່ນຈະໃຫ້ລູກຊາຍທີ່ເພິ່ນຮັກຫຼາຍທີ່ສຸດມາຕາຍເປັນເຄື່ອງບູຊາເພື່ອຊ່ວຍມະນຸດເຊິ່ງລວມເຖິງເຈົ້ານຳໃຫ້ຫຼຸດພົ້ນຈາກບາບແລະຄວາມຕາຍ. ສິ່ງທີ່ພະເຢໂຫວາໄດ້ເຮັດຈັ່ງແມ່ນດີແທ້ໆ!
ພະເຢຊູໄດ້ເຮັດຫຍັງເພື່ອຊ່ວຍມະນຸດໃຫ້ຫຼຸດພົ້ນຈາກບາບແລະຄວາມຕາຍ?
9. ໂຢຮັນຜູ້ໃຫ້ບັບເຕມາເວົ້າເຖິງພະເຢຊູແນວໃດ? (ເຮັບເຣີ 9:22; 10:1-4, 12)
9 ໃນປີ 29 ໂຢຮັນຜູ້ໃຫ້ບັບເຕມາເຫັນພະເຢຊູຄົນນາຊາເຣັດແລະເວົ້າວ່າ: “ຜູ້ນີ້ເດ້ ແກະນ້ອຍຂອງພະເຈົ້າທີ່ຈະກຳຈັດບາບຂອງໂລກໃຫ້ໝົດໄປ!” (ຢຮ. 1:29) ຄຳເວົ້ານີ້ສະແດງໃຫ້ເຫັນວ່າພະເຢຊູແມ່ນເຊື້ອສາຍທີ່ພະເຈົ້າສັນຍາໄວ້ ແລະເພິ່ນຈະຕາຍເປັນຄ່າໄຖ່. ໃນທີ່ສຸດ ເຊື້ອສາຍທີ່ພະເຢໂຫວາສັນຍາໄວ້ກໍປາກົດໂຕເພື່ອຊ່ວຍມະນຸດໃຫ້ຫຼຸດພົ້ນຈາກບາບໄດ້ແທ້ໆ.—ອ່ານເຮັບເຣີ 9:22; 10:1-4, 12
10. ພະເຢຊູສະແດງໃຫ້ເຫັນແນວໃດວ່າເພິ່ນ “ມາເພື່ອຊ່ວຍຄົນທີ່ເຮັດຜິດ”?
10 ພະເຢຊູສະແດງຄວາມສົນໃຈເປັນພິເສດຕໍ່ຄົນທີ່ສຳນຶກຜິດຍ້ອນເຂົາເຈົ້າເປັນຄົນບາບ ແລະເພິ່ນໄດ້ຊວນເຂົາເຈົ້າໃຫ້ເຂົ້າມາເປັນລູກສິດຂອງເພິ່ນ. ເພິ່ນຮູ້ວ່າບາບເປັນສາເຫດຫຼັກທີ່ເຮັດໃຫ້ມະນຸດຕ້ອງເຈັບປ່ວຍ. ດັ່ງນັ້ນ ເພິ່ນຈຶ່ງພະຍາຍາມຊ່ວຍຄົນທີ່ທຸກໃຈຍ້ອນເຂົາເຈົ້າໄດ້ເຮັດຜິດ. ພະເຢຊູໃຊ້ຕົວຢ່າງປຽບທຽບໂດຍເວົ້າວ່າ: “ຄົນທີ່ແຂງແຮງດີບໍ່ຕ້ອງການໝໍ ແຕ່ຄົນທີ່ບໍ່ສະບາຍຕ້ອງໃຫ້ໝໍປົວ.” ເພິ່ນເວົ້າຕື່ມອີກວ່າ: “ຂ້ອຍບໍ່ໄດ້ມາເພື່ອຊ່ວຍຄົນດີ ແຕ່ມາເພື່ອຊ່ວຍຄົນທີ່ເຮັດຜິດ.” (ມທ. 9:12, 13) ພະເຢຊູໄດ້ເຮັດແບບນັ້ນແທ້ໆ. ເມື່ອຜູ້ຍິງຄົນໜຶ່ງໃຊ້ນ້ຳຕາຂອງລາວລ້າງຕີນໃຫ້ພະເຢຊູ ເພິ່ນເວົ້າກັບລາວແບບອ່ອນໂຍນແລະຍົກໂທດໃຫ້ລາວທີ່ເຄີຍເຮັດຜິດ. (ລກ. 7:37-50) ພະເຢຊູໄດ້ສອນຄວາມຈິງທີ່ສຳຄັນໃຫ້ຜູ້ຍິງຄົນຊາມາເຣຍຢູ່ນ້ຳສ້າງເຖິງວ່າເພິ່ນຮູ້ວ່າລາວໃຊ້ຊີວິດແບບຜິດສິນລະທຳ. (ຢຮ. 4:7, 17-19, 25, 26) ພະເຢໂຫວາເຖິງຂັ້ນໃຫ້ລິດເດດພະເຢຊູເພື່ອແກ້ໄຂຜົນກະທົບທີ່ເກີດຈາກບາບ ນັ້ນກໍຄືຄວາມຕາຍ. ພະເຢຊູແກ້ໄຂແນວໃດ? ເພິ່ນປຸກຜູ້ຊາຍ ຜູ້ຍິງ ແລະເດັກນ້ອຍໃຫ້ຄືນມາຈາກຕາຍ.—ມທ. 11:5
11. ເປັນຫຍັງຄົນທີ່ເຮັດຜິດຈຶ່ງຢາກຢູ່ໃກ້ພະເຢຊູ?
11 ເຮົາເຂົ້າໃຈໄດ້ວ່າເປັນຫຍັງຄົນທີ່ເຮັດຜິດຈຶ່ງຢາກຢູ່ໃກ້ພະເຢຊູ ຍ້ອນເພິ່ນມີຄວາມເຫັນອົກເຫັນໃຈແລະອີ່ຕົນເຂົາເຈົ້າ. ເຂົາເຈົ້າຮູ້ສຶກສະບາຍໃຈທີ່ຈະລົມກັບເພິ່ນ. (ລກ. 15:1, 2) ພະເຢຊູຊົມເຊີຍຄົນເຫຼົ່ານີ້ທີ່ສະແດງຄວາມເຊື່ອໃນເພິ່ນແລະປະຕິບັດກັບເຂົາເຈົ້າແບບກະລຸນາ. (ລກ. 19:1-10) ພະເຢຊູເຮັດໃຫ້ຄົນນຶກພາບອອກເລີຍວ່າພະເຢໂຫວາພໍ່ຂອງເພິ່ນມີຄວາມເມດຕາຫຼາຍແທ້ໆ. (ຢຮ. 14:9) ໂດຍທາງຄຳເວົ້າແລະການກະທຳຂອງພະເຢຊູ ເຮົາຮຽນຮູ້ວ່າພະເຢໂຫວາເປັນພະເຈົ້າທີ່ເມດຕາ ເພິ່ນຮັກຄົນທີ່ເຮັດຜິດແລະຢາກຊ່ວຍເຂົາເຈົ້າ. ພະເຢຊູຊ່ວຍຄົນທີ່ເຮັດຜິດໃຫ້ຢາກປ່ຽນແປງໂຕເອງແລະເຂົ້າມາເປັນລູກສິດຂອງເພິ່ນ.—ລກ. 5:27, 28
12. ພະເຢຊູບອກແນວໃດກ່ຽວກັບການຕາຍຂອງເພິ່ນ?
12 ພະເຢຊູຮູ້ວ່າອີກບໍ່ດົນຈະເກີດຫຍັງຂຶ້ນກັບເພິ່ນ. ເພິ່ນບອກພວກລູກສິດຂອງເພິ່ນຫຼາຍເທື່ອວ່າເພິ່ນຈະຖືກທໍລະຍົດແລະຖືກປະຫານຢູ່ເທິງເສົາທໍລະມານ. (ມທ. 17:22; 20:18, 19) ພະເຢຊູຮູ້ວ່າການຕາຍຂອງເພິ່ນຈະກຳຈັດບາບຂອງໂລກໃຫ້ໝົດໄປຄືກັບທີ່ໂຢຮັນຜູ້ໃຫ້ບັບເຕມາແລະພວກຜູ້ພະຍາກອນໄດ້ບອກໄວ້ລ່ວງໜ້າ. ພະເຢຊູຍັງບອກວ່າຫຼັງຈາກທີ່ເພິ່ນຕາຍ ເພິ່ນຈະ “ຊັກນຳຄົນທຸກປະເພດ” ໃຫ້ມາຫາເພິ່ນ. (ຢຮ. 12:32) ມະນຸດທີ່ມີບາບສາມາດເຮັດໃຫ້ພະເຢໂຫວາພໍໃຈໄດ້ຖ້າເຂົາເຈົ້າສະແດງຄວາມເຊື່ອໃນພະເຢຊູແລະເຊື່ອຟັງຄຳສັ່ງຂອງເພິ່ນ. ຖ້າເຂົາເຈົ້າເຮັດແບບນັ້ນ ໃນທີ່ສຸດເຂົາເຈົ້າຈະຖືກ “ປົດປ່ອຍຈາກການເປັນທາດຂອງບາບ.” (ຣມ. 6:14, 18, 22; ຢຮ. 8:32) ຍ້ອນແນວນີ້ ພະເຢຊູຈຶ່ງເຕັມໃຈແລະກ້າທີ່ຈະປະເຊີນກັບຄວາມຕາຍທີ່ເຈັບປວດທໍລະມານຫຼາຍເພື່ອຊ່ວຍເຮົາທຸກຄົນ.—ຢຮ. 10:17, 18
13. ພະເຢຊູຕາຍແນວໃດ ແລະການຕາຍຂອງເພິ່ນສອນຫຍັງເຮົາກ່ຽວກັບພະເຢໂຫວາ? (ເບິ່ງຮູບນຳ)
13 ພະເຢຊູຖືກທໍລະຍົດ ຖືກຈັບ ຖືກດ່າ ຖືກໃສ່ຮ້າຍ ຖືກຕັດສິນວ່າມີຄວາມຜິດທັງໆທີ່ບໍ່ໄດ້ເຮັດ ແລະເຖິງຂັ້ນຖືກທໍລະມານນຳ. ພວກທະຫານພາພະເຢຊູໄປບ່ອນປະຫານແລະຄຶງເພິ່ນໄວ້ເທິງເສົາທໍລະມານ. ຕອນທີ່ພະເຢຊູຕ້ອງອົດທົນກັບຄວາມເຈັບປວດແລະເຈິກັບເລື່ອງທີ່ບໍ່ດີທັງໝົດນີ້ ມີຜູ້ໜຶ່ງທີ່ເຈັບປວດຫຼາຍກວ່າເພິ່ນຫຼາຍເທົ່າ ຜູ້ນັ້ນແມ່ນພະເຢໂຫວາ. ເຖິງວ່າພະເຢໂຫວາມີລິດເດດແລະສາມາດຊ່ວຍພະເຢຊູບໍ່ໃຫ້ເຈິກັບຄວາມທຸກທໍລະມານແບບນັ້ນໄດ້ ແຕ່ເພິ່ນກໍບໍ່ໄດ້ເຂົ້າໄປແຊກແຊງ. ພະເຢໂຫວາຮັກພະເຢຊູລູກຊາຍຂອງເພິ່ນຫຼາຍ ແຕ່ເປັນຫຍັງເພິ່ນຈຶ່ງຍອມໃຫ້ພະເຢຊູທົນທຸກທໍລະມານແລະຕາຍ? ຄຳຕອບກໍຄື ຍ້ອນເພິ່ນຮັກເຮົາຫຼາຍແທ້ໆ. ພະເຢຊູເວົ້າວ່າ: “ພະເຈົ້າຮັກຄົນໃນໂລກຫຼາຍ ຈົນເຖິງຂັ້ນຍອມສະລະລູກຄົນດຽວຂອງເພິ່ນ ເພື່ອທຸກຄົນທີ່ສະແດງຄວາມເຊື່ອໃນຜູ້ນັ້ນຈະບໍ່ຖືກທຳລາຍ ແຕ່ຈະມີຊີວິດຕະຫຼອດໄປ.”—ຢຮ. 3:16
ພະເຢໂຫວາເຈັບປວດຫຼາຍແທ້ໆຕອນທີ່ເພິ່ນຍອມໃຫ້ພະເຢຊູຖືກຂ້າເພື່ອຈະຊ່ວຍເຮົາໃຫ້ຫຼຸດພົ້ນຈາກບາບແລະຄວາມຕາຍ (ເບິ່ງຂໍ້ 13)
14. ເຈົ້າຮຽນຫຍັງຈາກການເສຍສະລະຂອງພະເຢຊູ?
14 ການເສຍສະລະຂອງພະເຢຊູພິສູດໃຫ້ເຫັນຢ່າງຈະແຈ້ງວ່າພະເຢໂຫວາຮັກເຮົາທີ່ເປັນລູກຫຼານທີ່ມີບາບຂອງອາດາມກັບເອວາ. ນີ້ສະແດງໃຫ້ເຫັນວ່າພະເຢໂຫວາຮັກເຈົ້າຫຼາຍແທ້ໆ. ເພິ່ນຍອມສະລະລູກຊາຍທີ່ເພິ່ນຮັກຫຼາຍທີ່ສຸດແລະຍອມເຈັບປວດແບບທີ່ບໍ່ມີຫຍັງທຽບໄດ້ເພື່ອຊ່ວຍເຈົ້າໃຫ້ຫຼຸດພົ້ນຈາກບາບແລະຄວາມຕາຍ. (1ຢຮ. 4:9, 10) ແມ່ນແລ້ວ ພະເຢໂຫວາຢາກຊ່ວຍເຮົາທຸກຄົນໃຫ້ຕໍ່ສູ້ກັບບາບແລະເອົາຊະນະມັນໄດ້.
15. ເຮົາຕ້ອງເຮັດຫຍັງເພື່ອຈະໄດ້ຮັບປະໂຫຍດຈາກຄ່າໄຖ່ທີ່ເປັນຂອງຂວັນຈາກພະເຢໂຫວາ?
15 ຄ່າໄຖ່ຂອງພະເຢຊູເປັນຂອງຂວັນຈາກພະເຢໂຫວາທີ່ຊ່ວຍເປີດໂອກາດໃຫ້ຄວາມຜິດຂອງເຮົາໄດ້ຮັບການຍົກໂທດ. ແຕ່ເຮົາຕ້ອງເຮັດຫຍັງເພື່ອພະເຢໂຫວາຈະຍົກໂທດໃຫ້ເຮົາ? ໂຢຮັນຜູ້ໃຫ້ບັບເຕມາແລະພະເຢຊູໃຫ້ຄຳຕອບວ່າ: “ໃຫ້ກັບໃຈ ຍ້ອນການປົກຄອງຂອງພະເຈົ້າໃກ້ຈະມາແລ້ວ.” (ມທ. 3:1, 2; 4:17) ດັ່ງນັ້ນ ເຮົາຕ້ອງກັບໃຈຈາກການເຮັດຜິດຖ້າເຮົາຢາກໃຫ້ພະເຢໂຫວາຍົກໂທດໃຫ້ເຮົາແລະຢາກໃກ້ຊິດກັບເພິ່ນ. ການກັບໃຈໝາຍເຖິງຫຍັງ? ແລະການກັບໃຈຈະຊ່ວຍເຮົາແນວໃດໃຫ້ຕໍ່ສູ້ກັບບາບໄດ້? ບົດຕໍ່ໄປຈະຕອບຄຳຖາມເຫຼົ່ານີ້.
ເພງທີ 18 ຂອບໃຈສຳລັບຄ່າໄຖ່
a ການອະທິບາຍຄຳສັບ: ໃນຄຳພີໄບເບິນ ຄຳວ່າ “ບາບ” ອາດໝາຍເຖິງການເຮັດຜິດຍ້ອນບໍ່ໄດ້ໃຊ້ຊີວິດຕາມມາດຕະຖານຂອງພະເຢໂຫວາ ແລະຍັງໝາຍເຖິງຄວາມບໍ່ສົມບູນແບບຫຼືບາບທີ່ເຮົາໄດ້ຮັບຈາກອາດາມ. ບາບທີ່ເຮົາໄດ້ຮັບຈາກອາດາມນິແຫຼະທີ່ເຮັດໃຫ້ເຮົາຕ້ອງຕາຍ.