ບົດຄວາມສຶກສາທີ 26
ເພງທີ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
ໃຫ້ຖ່ອມໃຈຍອມຮັບວ່າມີບາງຢ່າງທີ່ເຮົາບໍ່ຮູ້
“ເຮົາບໍ່ສາມາດເຂົ້າໃຈກ່ຽວກັບຜູ້ມີລິດເດດສູງສຸດ.”—ໂຢບ 37:23
ຈຸດສຳຄັນ
ເຮົາສາມາດອົດທົນກັບຄວາມຍາກລຳບາກໄດ້ເມື່ອເຮົາຖ່ອມໃຈຍອມຮັບວ່າມີບາງຢ່າງທີ່ເຮົາບໍ່ຮູ້ ແຕ່ໃຫ້ເຮົາສົນໃຈໃນສິ່ງທີ່ເຮົາຮູ້ແລະໄວ້ວາງໃຈພະເຢໂຫວາ.
1. ພະເຢໂຫວາສ້າງເຮົາໃຫ້ເປັນແນວໃດ ແລະຍ້ອນຫຍັງເພິ່ນຈຶ່ງສ້າງເຮົາແບບນີ້?
ພະເຢໂຫວາສ້າງເຮົາໃນວິທີທີ່ອັດສະຈັນ. ເພິ່ນສ້າງເຮົາໃຫ້ຮູ້ຈັກຄິດ ໃຫ້ຮຽນຮູ້ສິ່ງໃໝ່ໆ ໃຫ້ມີຄວາມເຂົ້າໃຈ ແລະໃຫ້ມີສະຕິປັນຍາ. ເປັນຫຍັງພະເຢໂຫວາຈຶ່ງສ້າງເຮົາແບບນີ້? ຍ້ອນເພິ່ນຢາກໃຫ້ເຮົາ “ພົບຄວາມຮູ້ຂອງພະເຈົ້າ” ແລະຢາກໃຫ້ເຮົາຕັດສິນໃຈຢ່າງສະຫຼາດໂດຍອາໄສຄວາມຮູ້ທີ່ຖືກຕ້ອງເມື່ອເຮົາຮັບໃຊ້ເພິ່ນ.—ສພສ. 2:1-5; ຣມ. 12:1
2. ເຮົາຄວນຍອມຮັບໃນເລື່ອງໃດ ແລະເປັນຫຍັງການຍອມຮັບແບບນັ້ນຈຶ່ງເປັນປະໂຫຍດຕໍ່ເຮົາ? (ໂຢບ 37:23, 24) (ເບິ່ງຮູບນຳ)
2 ເຖິງວ່າພະເຢໂຫວາສ້າງເຮົາໃຫ້ມີຄວາມສາມາດໃນການຮຽນຮູ້ ແຕ່ກໍມີຫຼາຍຢ່າງທີ່ເຮົາບໍ່ຮູ້. (ອ່ານໂຢບ 37:23, 24) ຂໍໃຫ້ເບິ່ງເລື່ອງຂອງໂຢບ. ພະເຢໂຫວາຖາມໂຢບຫຼາຍຄຳຖາມເພື່ອຊ່ວຍໂຢບໃຫ້ເຂົ້າໃຈວ່າມີຫຼາຍຢ່າງທີ່ລາວບໍ່ຮູ້. ການລົມກັນເທື່ອນັ້ນພະເຢໂຫວາຊ່ວຍໂຢບໃຫ້ເຫັນວ່າລາວຕ້ອງເປັນຄົນຖ່ອມແລະຕ້ອງປ່ຽນແປງຄວາມຄິດຂອງໂຕເອງ. (ໂຢບ 42:3-6) ເຮົາກໍໄດ້ຮັບປະໂຫຍດຄືກັນເມື່ອເຮົາຖ່ອມໃຈຍອມຮັບວ່າເຮົາກໍບໍ່ຮູ້ທຸກສິ່ງ. ການຖ່ອມໃຈແບບນັ້ນຊ່ວຍເຮົາໃຫ້ໝັ້ນໃຈວ່າພະເຢໂຫວາຈະບອກໃຫ້ເຮົາຮູ້ໃນສິ່ງທີ່ເຮົາຈຳເປັນຕ້ອງຮູ້ແທ້ໆເພື່ອເຮົາຈະຕັດສິນໃຈໄດ້ຢ່າງຖືກຕ້ອງ.—ສພສ. 2:6
ການຖ່ອມໃຈຍອມຮັບວ່າເຮົາບໍ່ຮູ້ທຸກສິ່ງເປັນປະໂຫຍດຕໍ່ເຮົາຄືກັບທີ່ເປັນປະໂຫຍດຕໍ່ໂຢບ (ເບິ່ງຂໍ້ 2)
3. ເຮົາຈະຮຽນຫຍັງໃນບົດນີ້?
3 ໃນບົດນີ້ ເຮົາຈະຮຽນກ່ຽວກັບບາງເລື່ອງທີ່ເຮົາບໍ່ຮູ້ ແລະເປັນຫຍັງການຮູ້ເລື່ອງເຫຼົ່ານີ້ອາດເຮັດໃຫ້ຍາກສຳລັບເຮົາ. ເຮົາຍັງຈະຮຽນນຳວ່າເປັນຫຍັງການບໍ່ຮູ້ບາງເລື່ອງຈຶ່ງເປັນສິ່ງທີ່ດີ. ສິ່ງທີ່ເຮົາຈະຮຽນນີ້ຈະຊ່ວຍໃຫ້ໝັ້ນໃຈວ່າພະເຢໂຫວາ “ຜູ້ທີ່ຮູ້ໝົດທຸກຢ່າງ” ຈະບອກເຮົາໃນສິ່ງທີ່ເຮົາຈຳເປັນຕ້ອງຮູ້ແທ້ໆ.—ໂຢບ 37:16
ເຮົາບໍ່ຮູ້ວ່າຈຸດຈົບຈະເກີດຂຶ້ນຕອນໃດ
4. ຕາມມັດທາຍ 24:36 ມີຫຍັງທີ່ເຮົາບໍ່ຮູ້?
4 ອ່ານມັດທາຍ 24:36. ເຮົາບໍ່ຮູ້ວ່າລະບົບທີ່ຊາຕານປົກຄອງຈະຖືກທຳລາຍຕອນໃດ. ແມ່ນແຕ່ຕອນທີ່ພະເຢຊູຢູ່ໂລກນີ້ເພິ່ນກໍບໍ່ຮູ້ “ວັນແລະເວລານັ້ນ.”a ຕໍ່ມາ ເພິ່ນບອກພວກອັກຄະສາວົກວ່າ ພະເຢໂຫວາທີ່ເປັນຜູ້ຮັກສາເວລາອົງຍິ່ງໃຫຍ່ “ເປັນຜູ້ກຳນົດວັນເວລາ” ສຳລັບເຫດການຕ່າງໆ ແລະເພິ່ນຜູ້ດຽວເທົ່ານັ້ນທີ່ມີສິດຕັດສິນໃຈວ່າມັນຈະເກີດຂຶ້ນຕອນໃດ. (ກຈກ. 1:6, 7) ພະເຢໂຫວາໄດ້ກຳນົດເວລາໄວ້ແລ້ວວ່າລະບົບນີ້ຈະຈົບລົງຕອນໃດ ແຕ່ເຮົາບໍ່ຮູ້ວ່າແມ່ນມື້ໃດແທ້ໆ.
5. ຍ້ອນເຮົາບໍ່ຮູ້ວ່າຈຸດຈົບຈະມາຕອນໃດ ເຮົາອາດຮູ້ສຶກແນວໃດ?
5 ຈາກສິ່ງທີ່ພະເຢຊູເວົ້າ ເຮົາບໍ່ຮູ້ວ່າເຮົາຕ້ອງຖ້າອີກດົນປານໃດຈຸດຈົບຂອງລະບົບນີ້ຈຶ່ງຈະມາຮອດ. ສະນັ້ນ ເຮົາອາດໝົດຄວາມອົດທົນຫຼືຮູ້ສຶກທໍ້ໃຈໂດຍສະເພາະຖ້າເຮົາໄດ້ລໍຖ້າວັນຂອງພະເຢໂຫວາມາດົນແລ້ວ. ນອກຈາກນັ້ນ ເຮົາອາດຮູ້ສຶກທໍ້ໃຈຄືກັນຖ້າຄົນອື່ນຫຼືຄົນໃນຄອບຄົວເຍາະເຍີ້ຍເຮົາຍ້ອນຈຸດຈົບບໍ່ມາຮອດຈັກເທື່ອ. (2ປຕ. 3:3, 4) ອາດເປັນໄປໄດ້ທີ່ເຮົາຈະຮູ້ສຶກວ່າຖ້າເຮົາຮູ້ວ່າຈຸດຈົບຈະມາມື້ໃດແທ້ໆ ມັນຈະງ່າຍຂຶ້ນທີ່ຈະລໍຖ້າແລະບໍ່ທໍ້ໃຈຫຼາຍເກີນໄປຖ້າມີຄົນເຍາະເຍີ້ຍເຮົາ.
6. ເປັນຫຍັງການທີ່ເຮົາບໍ່ຮູ້ວ່າຈຸດຈົບຈະມາມື້ໃດຈຶ່ງເປັນເລື່ອງທີ່ດີ?
6 ຍ້ອນພະເຢໂຫວາບໍ່ບອກເຮົາໃຫ້ຮູ້ວ່າຈຸດຈົບຈະມາມື້ໃດແທ້ໆ ເຮົາຈຶ່ງມີໂອກາດສະແດງໃຫ້ພະເຢໂຫວາເຫັນວ່າເຮົາຮັບໃຊ້ເພິ່ນຍ້ອນເຮົາຮັກແລະໄວ້ວາງໃຈເພິ່ນ. ເຮົາຢາກຮັບໃຊ້ພະເຢໂຫວາຕະຫຼອດໄປ ບໍ່ແມ່ນຮັບໃຊ້ຮອດແຕ່ມື້ທີ່ຈຸດຈົບຈະມາຮອດເທົ່ານັ້ນ. ແທນທີ່ຈະສົນໃຈແຕ່ວ່າ “ວັນຂອງພະເຢໂຫວາ” ຈະມາມື້ໃດ ມັນດີກວ່າທີ່ເຮົາຈະສົນໃຈໃນສິ່ງທີ່ຈະເກີດຂຶ້ນຫຼັງຈາກນັ້ນ. ການເຮັດແບບນີ້ຈະຊ່ວຍເຮົາໃຫ້ສະໜິດກັບພະເຢໂຫວາ ໄວ້ວາງໃຈເພິ່ນ ແລະເຮັດທຸກສິ່ງທີ່ເຮັດໄດ້ເພື່ອໃຫ້ເພິ່ນພໍໃຈ.—2ປຕ. 3:11, 12
7. ເຮົາຮູ້ຫຍັງ?
7 ເປັນເລື່ອງສຳຄັນທີ່ເຮົາຈະສົນໃຈໃນສິ່ງທີ່ເຮົາຮູ້ ນັ້ນຄືສະໄໝສຸດທ້າຍເລີ່ມຕົ້ນໃນປີ 1914. ໃນຄຳພີໄບເບິນ ພະເຢໂຫວາໃຫ້ເຮົາຮູ້ຈັກຄຳພະຍາກອນຕ່າງໆທີ່ພິສູດວ່າປີ 1914 ເປັນຈຸດເລີ່ມຕົ້ນຂອງສະໄໝສຸດທ້າຍ. ເພິ່ນຍັງບອກໃຫ້ເຮົາຮູ້ລາຍລະອຽດຫຼາຍຢ່າງກ່ຽວກັບສະພາບການໃນໂລກຫຼັງຈາກປີນັ້ນ. ຍ້ອນຄຳພະຍາກອນເຫຼົ່ານີ້ເກີດຂຶ້ນແທ້ ເຮົາຈຶ່ງໝັ້ນໃຈວ່າ “ວັນໃຫຍ່ຂອງພະເຢໂຫວາໃກ້ມາຮອດແລ້ວ.” (ຊຟຢ. 1:14) ນອກຈາກນັ້ນ ເຮົາຍັງຮູ້ວ່າພະເຢໂຫວາຢາກໃຫ້ເຮົາເຮັດວຽກຫຍັງ? ເພິ່ນຢາກໃຫ້ເຮົາບອກຫຼາຍຄົນເທົ່າທີ່ເປັນໄປໄດ້ກ່ຽວກັບ “ຂ່າວດີເລື່ອງການປົກຄອງຂອງພະເຈົ້າ.” (ມທ. 24:14) ເຮົາກຳລັງປະກາດຂ່າວດີນີ້ໃນປະມານ 240 ດິນແດນແລະໃນຫຼາຍກວ່າ 1.000 ພາສາ. ເຮົາບໍ່ຈຳເປັນຕ້ອງຮູ້ “ວັນແລະເວລານັ້ນ” ເພື່ອຈະປະກາດຢ່າງກະຕືລືລົ້ນໃນວຽກທີ່ສຳຄັນນີ້.
ເຮົາບໍ່ຮູ້ວ່າພະເຢໂຫວາຈະຊ່ວຍເຮົາແນວໃດ
8. ເຮົາຮຽນຫຍັງຈາກປັນຍາຈານ 11:5?
8 ອ່ານປັນຍາຈານ 11:5. ເຮົາຮຽນຈາກຂໍ້ຄຳພີນີ້ວ່າ ເຮົາບໍ່ຮູ້ແທ້ໆໃນ “ສິ່ງທີ່ພະເຈົ້າທ່ຽງແທ້ເຮັດ” ຫຼືເພິ່ນຈະຍອມໃຫ້ເກີດຫຍັງຂຶ້ນເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ. ສະນັ້ນ ເຮົາບໍ່ຮູ້ເຫດຜົນທັງໝົດວ່າເປັນຫຍັງພະເຢໂຫວາຍອມໃຫ້ບາງສິ່ງເກີດຂຶ້ນຫຼືເພິ່ນຈະຊ່ວຍເຮົາແນວໃດແທ້ໆ. (ພສ. 37:5) ຄຳພີໄບເບິນສົມທຽບການບໍ່ເຂົ້າໃຈສິ່ງທີ່ພະເຈົ້າທ່ຽງແທ້ເຮັດເປັນຄືກັບການບໍ່ເຂົ້າໃຈວ່າແອນ້ອຍທີ່ຢູ່ໃນທ້ອງແມ່ເຕີບໃຫຍ່ຂຶ້ນໄດ້ແນວໃດ. ແມ່ນແຕ່ນັກວິທະຍາສາດກໍຍັງບໍ່ເຂົ້າໃຈເຕັມທີກ່ຽວກັບເລື່ອງນີ້. ຄ້າຍຄືກັນ ເຮົາກໍບໍ່ເຂົ້າໃຈເຕັມທີວ່າພະເຢໂຫວາເຮັດສິ່ງຕ່າງໆແນວໃດ.
9. ຍ້ອນບໍ່ຮູ້ວ່າພະເຢໂຫວາຈະຊ່ວຍແນວໃດ ເຮົາອາດເລີ່ມຮູ້ສຶກຈັ່ງໃດ?
9 ເມື່ອເຮົາບໍ່ຮູ້ແທ້ໆວ່າພະເຢໂຫວາຈະຊ່ວຍເຮົາແນວໃດ ເຮົາອາດລັງເລທີ່ຈະຕັດສິນໃຈເຮັດບາງຢ່າງ. ເຮົາອາດບໍ່ກ້າທີ່ຈະເສຍສະລະບາງຢ່າງເພື່ອຈະເຮັດວຽກປະກາດໄດ້ຫຼາຍຂຶ້ນຫຼືຍ້າຍໄປໃນເຂດທີ່ຕ້ອງການຜູ້ປະກາດຫຼາຍກວ່າ. ຫຼືເຮົາອາດຄິດວ່າພະເຢໂຫວາຈະພໍໃຈເຮົາບໍຖ້າເຮົາຮັບໃຊ້ເພິ່ນບໍ່ໄດ້ຕາມເປົ້າໝາຍທີ່ຕັ້ງໄວ້ ຖ້າເຮົາບໍ່ເຫັນຜົນທີ່ດີຈາກວຽກໜັກທີ່ເຮົາເຮັດໃນການປະກາດ ຫຼືຖ້າເຮົາເຈິອຸປະສັກໃນໂຄງການບາງຢ່າງຂອງອົງການເຖິງວ່າເຮົາພະຍາຍາມເຮັດສຸດຄວາມສາມາດແລ້ວ.
10. ການທີ່ເຮົາບໍ່ຮູ້ແທ້ໆວ່າພະເຢໂຫວາຈະຊ່ວຍແນວໃດ ມັນຊ່ວຍເຮົາໃຫ້ປູກຝັງຄຸນລັກສະນະທີ່ສຳຄັນຫຍັງ?
10 ການທີ່ເຮົາບໍ່ຮູ້ແທ້ໆວ່າພະເຢໂຫວາຈະຊ່ວຍເຮົາແນວໃດ ທີ່ຈິງແລ້ວມັນຊ່ວຍເຮົາໃຫ້ປູກຝັງຄຸນລັກສະນະທີ່ສຳຄັນ ເຊັ່ນ: ຄວາມຖ່ອມ. ຄວາມຖ່ອມຊ່ວຍເຮົາໃຫ້ເຂົ້າໃຈວ່າຄວາມຄິດແລະແນວທາງຂອງພະເຢໂຫວາຢູ່ເໜືອເຮົາ. (ອຊຢ. 55:8, 9) ເຮົາຍັງຮຽນຮູ້ທີ່ຈະໄວ້ວາງໃຈພະເຢໂຫວາເຕັມທີແລະເຊື່ອວ່າເພິ່ນຈະຊ່ວຍເຮົາໃຫ້ເຮັດໄດ້ສຳເລັດ. ເມື່ອເຮົາເຫັນຜົນດີໃນວຽກປະກາດຫຼືໃນໂຄງການບາງຢ່າງຂອງອົງການ ເຮົາຈະຍ້ອງຍໍສັນລະເສີນພະເຢໂຫວາ. (ພສ. 127:1; 1ກຣ. 3:7) ຖ້າບາງຢ່າງບໍ່ໄດ້ເປັນໄປຕາມທີ່ເຮົາຄາດຫວັງໄວ້ ເຮົາຕ້ອງຈື່ໄວ້ວ່າພະເຢໂຫວາຮູ້ແລະເຫັນທຸກສິ່ງ. ການຈື່ເລື່ອງນີ້ໄວ້ຈະຊ່ວຍເຮົາໃຫ້ມີໃຈທີ່ສະຫງົບ. (ອຊຢ. 26:12) ເຮົາເຮັດໃນສິ່ງທີ່ເຮົາເຮັດໄດ້ແລະໝັ້ນໃຈວ່າພະເຢໂຫວາຈະຊ່ວຍເຮົາສະເໝີ. ເຮົາເຊື່ອໝັ້ນວ່າພະເຢໂຫວາຈະຊີ້ນຳເຮົາເຖິງວ່າເພິ່ນຈະບໍ່ໄດ້ເຮັດໃນແບບທີ່ອັດສະຈັນຄືກັບທີ່ເພິ່ນເຮັດໃນສະໄໝແຕ່ກີ້.—ກຈກ. 16:6-10
11. ມີຫຍັງແດ່ທີ່ເຮົາຮູ້?
11 ເຮົາຮູ້ວ່າພະເຢໂຫວາເປັນພະເຈົ້າທີ່ມີຄວາມຮັກ ຍຸຕິທຳ ແລະມີສະຕິປັນຍາ. ເຮົາຮູ້ວ່າເພິ່ນເຫັນຄ່າທຸກສິ່ງທີ່ເຮົາເຮັດເພື່ອເພິ່ນແລະເພື່ອພີ່ນ້ອງ. ເຮົາຍັງຮູ້ວ່າພະເຢໂຫວາຈະໃຫ້ລາງວັນຜູ້ທີ່ພັກດີຕໍ່ເພິ່ນ.—ຮຣ. 11:6
ເຮົາບໍ່ຮູ້ວ່າມື້ອື່ນຈະເກີດຫຍັງຂຶ້ນ
12. ຕາມຢາໂກໂບ 4:13, 14 ເຮົາບໍ່ຮູ້ໃນເລື່ອງໃດ?
12 ອ່ານຢາໂກໂບ 4:13, 14. ເຮົາບໍ່ຮູ້ວ່າມື້ອື່ນຊີວິດເຮົາຊິເປັນແນວໃດ? ຫຼາຍສິ່ງຫຼາຍຢ່າງສາມາດເກີດຂຶ້ນກັບເຮົາຍ້ອນ “ເວລາແລະເຫດການທີ່ບໍ່ຄາດຄິດ” ເກີດຂຶ້ນໄດ້ສະເໜີ. (ປຍຈ. 9:11) ຍ້ອນແນວນີ້ເຮົາຈຶ່ງບໍ່ຮູ້ວ່າແຜນການທີ່ເຮົາວາງໄວ້ຈະສຳເລັດຫຼືບໍ່ ຫຼືເຮົາຈະຍັງມີຊີວິດຢູ່ຈົນເຫັນແຜນການນັ້ນສຳເລັດບໍ.
13. ຄວາມບໍ່ແນ່ນອນໃນຊີວິດອາດສົ່ງຜົນຕໍ່ເຮົາແນວໃດ?
13 ຄວາມບໍ່ແນ່ນອນຂອງຊີວິດອາດເຮັດໃຫ້ມັນຍາກສຳລັບເຮົາທີ່ຈະອົດທົນ. ເປັນຫຍັງຈຶ່ງເວົ້າແນວນັ້ນ? ເຮົາອາດກັງວົນວ່າຈະມີຫຍັງເກີດຂຶ້ນ ແລະຄວາມກັງວົນນັ້ນອາດເຮັດໃຫ້ເຮົາບໍ່ມີຄວາມສຸກ. ຊີວິດຂອງເຮົາອາດປ່ຽນໄປແບບບໍ່ຄາດຄິດ ຫຼືອາດຈະມີສິ່ງທີ່ບໍ່ດີເກີດຂຶ້ນກັບເຮົາແບບກະທັນຫັນ. ເລື່ອງແບບນີ້ສາມາດເຮັດໃຫ້ເຮົາໂສກເສົ້າເສຍໃຈ. ເມື່ອຄວາມຄາດຫວັງຂອງເຮົາບໍ່ໄດ້ເປັນໄປຕາມທີ່ເຮົາຫວັງໄວ້ ເຮົາອາດຮູ້ສຶກຜິດຫວັງແລະທໍ້ໃຈ.—ສພສ. 13:12
14. ຄວາມສຸກຂອງເຮົາຂຶ້ນຢູ່ກັບຫຍັງ? (ເບິ່ງຮູບນຳ)
14 ຕອນທີ່ເຮົາອົດທົນກັບຄວາມຍາກລຳບາກບໍ່ວ່າຈະເລື່ອງໃດກໍຕາມ ເຮົາພິສູດໃຫ້ເຫັນວ່າເຮົາຮັບໃຊ້ພະເຢໂຫວາຍ້ອນຄວາມຮັກບໍ່ແມ່ນຍ້ອນຄວາມເຫັນແກ່ໂຕ. ເລື່ອງໃນຄຳພີໄບເບິນບອກໃຫ້ຮູ້ວ່າເຮົາບໍ່ຄວນຄາດໝາຍວ່າພະເຢໂຫວາຈະປົກປ້ອງເຮົາຈາກຄວາມຍາກລຳບາກຕ່າງໆ ແລະເພິ່ນບໍ່ໄດ້ກຳນົດສິ່ງທີ່ຈະເກີດຂຶ້ນໃນຊີວິດຂອງເຮົາ. ພະເຢໂຫວາຮູ້ວ່າຄວາມສຸກຂອງເຮົາບໍ່ໄດ້ຂຶ້ນກັບການຮູ້ວ່າອະນາຄົດຂອງເຮົາຈະເປັນແນວໃດ ແຕ່ມັນຂຶ້ນກັບການຊອກຫາການຊີ້ນຳຈາກເພິ່ນແລະເຊື່ອຟັງເພິ່ນ. (ຢຣມ. 10:23) ເມື່ອເຮົາຕ້ອງຕັດສິນໃຈໃນບາງເລື່ອງແລະຂໍການຊີ້ນຳຈາກພະເຢໂຫວາກໍເປັນຄືກັບເຮົາກຳລັງເວົ້າວ່າ: “ຖ້າພະເຢໂຫວາຕ້ອງການ ພວກເຮົາກໍຈະມີຊີວິດຢູ່ແລະເຮັດສິ່ງນັ້ນສິ່ງນີ້ໄດ້.”—ຢກບ. 4:15
ການຊອກຫາຄຳແນະນຳຈາກພະເຢໂຫວາແລະເຊື່ອຟັງເພິ່ນສາມາດປົກປ້ອງເຮົາໄດ້ (ເບິ່ງຂໍ້ 14-15)b
15. ເຮົາຮູ້ຫຍັງກ່ຽວກັບອະນາຄົດ?
15 ເຖິງເຮົາບໍ່ຮູ້ວ່າຊີວິດໃນແຕ່ລະມື້ຈະເປັນແນວໃດ ແຕ່ເຮົາຮູ້ວ່າພະເຢໂຫວາໄດ້ສັນຍາກັບເຮົາເລື່ອງຊີວິດຕະຫຼອດໄປ ບໍ່ວ່າຈະເປັນຊີວິດທີ່ຢູ່ໃນສະຫວັນຫຼືໃນໂລກນີ້. ເຮົາຮູ້ວ່າພະເຢໂຫວາບໍ່ເວົ້າຕົວະແລະບໍ່ມີຫຍັງສາມາດຂັດຂວາງເພິ່ນບໍ່ໃຫ້ເຮັດຕາມທຸກສິ່ງທີ່ເພິ່ນສັນຍາໄວ້. (ຕຕ. 1:2) ພະເຢໂຫວາຜູ້ດຽວເທົ່ານັ້ນທີ່ສາມາດ “ບອກລ່ວງໜ້າວ່າຜົນອອກມາຈະເປັນແນວໃດ ແລະຕັ້ງແຕ່ດົນແລ້ວ [ເພິ່ນ] ໄດ້ບອກລ່ວງໜ້າກ່ຽວກັບສິ່ງຕ່າງໆທີ່ຍັງບໍ່ທັນເກີດຂຶ້ນ.” ທຸກສິ່ງທີ່ເພິ່ນບອກໄວ້ລ່ວງໜ້າໃນສະໄໝທີ່ຂຽນຄຳພີໄບເບິນໄດ້ເກີດຂຶ້ນແທ້ ແລະທຸກສິ່ງທີ່ເພິ່ນບອກລ່ວງໜ້າກ່ຽວກັບອະນາຄົດກໍຈະເກີດຂຶ້ນແທ້ຄືກັນ. (ອຊຢ. 46:10) ເຮົາຮູ້ວ່າບໍ່ມີຫຍັງຈະສາມາດຂັດຂວາງຄວາມຮັກທີ່ພະເຢໂຫວາມີຕໍ່ເຮົາ. (ຣມ. 8:35-39) ພະເຢໂຫວາຈະໃຫ້ເຮົາມີສະຕິປັນຍາ ໄດ້ຮັບການປອບໂຍນ ແລະມີກຳລັງເພື່ອຈະອົດທົນກັບທຸກສິ່ງທີ່ເຮົາເຈິ. ເຮົາໝັ້ນໃຈໄດ້ວ່າພະເຢໂຫວາຈະຊ່ວຍເຮົາແລະອວຍພອນເຮົາ.—ຢຣມ. 17:7, 8
ເຮົາບໍ່ສາມາດເຂົ້າໃຈເຕັມທີວ່າພະເຢໂຫວາຮູ້ຈັກເຮົາດີສ່ຳໃດ
16. ພະເຢໂຫວາຮູ້ຫຍັງກ່ຽວກັບໂຕເຮົາ ແລະເລື່ອງນັ້ນເຮັດໃຫ້ເຮົາຮູ້ສຶກແນວໃດ? (ເພງສັນລະເສີນ 139:1-6)
16 ອ່ານເພງສັນລະເສີນ 139:1-6. ພະເຢໂຫວາຜູ້ທີ່ສ້າງເຮົາຮູ້ວ່າເຮົາຖືກສ້າງມາແນວໃດ. ເພິ່ນຮູ້ວ່າເປັນຫຍັງເຮົາຈຶ່ງຄິດແລະຮູ້ສຶກແບບນັ້ນ. ເພິ່ນຮູ້ສິ່ງທີ່ເຮົາເວົ້າແລະຮູ້ສິ່ງທີ່ຢູ່ໃນໃຈຂອງເຮົາ. ເພິ່ນຍັງຮູ້ທຸກສິ່ງທີ່ເຮົາເຮັດແລະເປັນຫຍັງເຮົາຈຶ່ງເຮັດແບບນັ້ນ. ພະເຢໂຫວາສົນໃຈເຮົາຕະຫຼອດເວລາ. ກະສັດດາວິດເວົ້າວ່າ ພະເຢໂຫວາພ້ອມສະເໝີທີ່ຈະຊ່ວຍເຮົາ ແລະເພິ່ນກໍສາມາດຊ່ວຍເຮົາໄດ້ແທ້ໆ. ເປັນຕາງຶດແທ້ໆທີ່ພະເຈົ້າຜູ້ຍິ່ງໃຫຍ່ສູງສຸດແລະເປັນຜູ້ສ້າງທຸກສິ່ງສົນໃຈເຮົາຫຼາຍປານນີ້. ດາວິດເວົ້າວ່າ: “ພະອົງຮູ້ຈັກລູກດີຫຼາຍ ແລະມັນເກີນກວ່າທີ່ລູກຈະຄິດອອກໄດ້.”—ພສ. 139:6, ໄຂເງື່ອນ
17. ເປັນຫຍັງອາດຍາກສຳລັບເຮົາທີ່ຈະເຊື່ອວ່າພະເຢໂຫວາສົນໃຈເຮົາແທ້ໆ?
17 ບາງເທື່ອຍ້ອນພູມຫຼັງທາງຄອບຄົວ ວັດທະນະທຳ ຫຼືຄວາມເຊື່ອເກົ່າຂອງເຮົາ ມັນອາດຍາກສຳລັບເຮົາທີ່ຈະເຫັນວ່າພະເຢໂຫວາເປັນຄືກັບພໍ່ທີ່ມີຄວາມຮັກທີ່ສົນໃຈເຮົາແທ້ໆ. ຫຼືເຮົາອາດຮູ້ສຶກວ່າສິ່ງທີ່ເຮົາເຄີຍເຮັດຜິດໃນອະດີດມັນບໍ່ດີແທ້ໆຈົນພະເຢໂຫວາບໍ່ຢາກຮູ້ຈັກເຮົາແລະຢູ່ໄກໆຈາກເຮົາ. ແມ່ນແຕ່ດາວິດບາງເທື່ອກໍເຄີຍຮູ້ສຶກແບບນັ້ນ. (ພສ. 38:18, 21) ຫຼືບາງຄົນທີ່ກຳລັງໃຊ້ຊີວິດແບບຜິດສິນລະທຳທາງເພດເຊິ່ງກຳລັງພະຍາຍາມແທ້ໆທີ່ຈະປ່ຽນແປງຮູບແບບຊີວິດຂອງໂຕເອງແລະໃຊ້ຊີວິດໃນແບບທີ່ເຮັດໃຫ້ພະເຢໂຫວາພໍໃຈອາດສົງໄສວ່າ ‘ຖ້າພະເຢໂຫວາຮູ້ຈັກຂ້ອຍແທ້ໆ ເປັນຫຍັງເພິ່ນຈຶ່ງຢາກໃຫ້ຂ້ອຍປ່ຽນແປງໂຕເອງແທນທີ່ຈະຍອມຮັບຂ້ອຍໃນແບບທີ່ຂ້ອຍເປັນລະກະແລ້ວ?’
18. ເຮົາໄດ້ຮັບປະໂຫຍດແນວໃດເມື່ອຍອມຮັບວ່າພະເຢໂຫວາຮູ້ຈັກເຮົາດີກວ່າທີ່ເຮົາຮູ້ຈັກໂຕເອງ? (ເບິ່ງຮູບນຳ)
18 ເຮົາຕ້ອງຍອມຮັບວ່າພະເຢໂຫວາຮູ້ຈັກເຮົາດີກວ່າທີ່ເຮົາຮູ້ຈັກໂຕເອງ ແລະເຮົາຕ້ອງຍອມຮັບວ່າເພິ່ນເຫັນຈຸດທີ່ດີໃນໂຕເຮົາເຊິ່ງເຮົາເບິ່ງບໍ່ເຫັນ. ເຖິງວ່າເພິ່ນຈະເຫັນຈຸດທີ່ບໍ່ດີໃນໂຕເຮົາແລະເຂົ້າໃຈວ່າເປັນຫຍັງເຮົາຈຶ່ງຮູ້ສຶກແບບນັ້ນແລະເຮັດຈັ່ງຊັ້ນ ແຕ່ເພິ່ນກໍຮັກເຮົາ. ເພິ່ນຮູ້ວ່າເຮົາປ່ຽນແປງໂຕເອງໄດ້ແລະຢາກຊ່ວຍເຮົາ. (ຣມ. 7:15) ເມື່ອເຮົາຮູ້ວ່າພະເຢໂຫວາເຫັນສິ່ງທີ່ດີໃນໂຕເຮົາ ເຮົາກໍໝັ້ນໃຈຫຼາຍຂຶ້ນທີ່ຈະຮັບໃຊ້ເພິ່ນຢ່າງສັດຊື່ແລະດ້ວຍຄວາມຍິນດີ.
ພະເຢໂຫວາຊ່ວຍເຮົາໃຫ້ຮັບມືກັບບັນຫາທີ່ເຮົາເຈິແບບບໍ່ຄາດຄິດໃນໂລກນີ້ໂດຍໃຫ້ເຮົາມີຄວາມເຊື່ອເຂັ້ມແຂງໃນຄຳສັນຍາຕ່າງໆຂອງເພິ່ນກ່ຽວກັບຊ່ວງເວລາທີ່ມີຄວາມສຸກເຊິ່ງລໍຖ້າເຮົາໃນໂລກໃໝ່ (ເບິ່ງຂໍ້ 18-19)c
19. ເຮົາຮູ້ຫຍັງແດ່ກ່ຽວກັບພະເຢໂຫວາ?
19 ເຮົາຮູ້ວ່າພະເຢໂຫວາເປັນຄວາມຮັກ ແລະເຮົາບໍ່ມີຂໍ້ສົງໄສກ່ຽວກັບເລື່ອງນີ້ເລີຍ. (1ຢຮ. 4:8) ເຮົາຮູ້ວ່າທຸກສິ່ງທີ່ພະເຢໂຫວາບອກໃຫ້ເຮົາເຮັດຫຼືຫ້າມບໍ່ໃຫ້ເຮັດກໍຍ້ອນເພິ່ນຮັກເຮົາແລະຢາກໃຫ້ເຮົາມີຊີວິດທີ່ດີທີ່ສຸດ. ເຮົາຮູ້ວ່າພະເຢໂຫວາຢາກໃຫ້ເຮົາມີຊີວິດຕະຫຼອດໄປ ເພິ່ນຈຶ່ງຈັດກຽມໃຫ້ມີຄ່າໄຖ່. ຄ່າໄຖ່ເປັນຂອງຂວັນຈາກພະເຢໂຫວາທີ່ຊ່ວຍເຮົາໃຫ້ໝັ້ນໃຈວ່າເຮົາສາມາດຮັບໃຊ້ເພິ່ນໃນແບບທີ່ເຮັດໃຫ້ເພິ່ນພໍໃຈໄດ້ເຖິງວ່າເຮົາເປັນຄົນບໍ່ສົມບູນແບບ. (ຣມ. 7:24, 25) ເຮົາຮູ້ວ່າ “[ພະເຢໂຫວາ] ໃຫຍ່ກວ່າໃຈຂອງພວກເຮົາແລະເພິ່ນຮູ້ທຸກສິ່ງ.” (1ຢຮ. 3:19, 20) ພະເຢໂຫວາເຫັນທຸກສິ່ງກ່ຽວກັບໂຕເຮົາ ແລະເພິ່ນໝັ້ນໃຈວ່າເຮົາສາມາດເຮັດຕາມຄວາມຕ້ອງການຂອງເພິ່ນໄດ້ສຳເລັດ.
20. ສິ່ງໃດຈະຊ່ວຍເຮົາບໍ່ໃຫ້ກັງວົນຫຼາຍເກີນໄປ?
20 ພະເຢໂຫວາບອກເຮົາໃຫ້ຮູ້ທຸກສິ່ງທີ່ເຮົາຈຳເປັນຕ້ອງຮູ້ແທ້ໆ. ເມື່ອເຮົາຖ່ອມໃຈຍອມຮັບຄວາມຈິງນີ້ ເຮົາກໍຈະບໍ່ກັງວົນຫຼາຍເກີນໄປໃນສິ່ງທີ່ເຮົາບໍ່ຮູ້ແລະສົນໃຈໃນສິ່ງທີ່ເຮົາຮູ້ເຊິ່ງເປັນສິ່ງທີ່ສຳຄັນແທ້ໆ. ເມື່ອເຮັດແບບນັ້ນ ເຮົາກໍສະແດງໃຫ້ເຫັນວ່າເຮົາເປັນຄົນຖ່ອມແລະໝັ້ນໃຈເຕັມທີໃນພະເຢໂຫວາ “ພະເຈົ້າຜູ້ທີ່ຮູ້ທຸກສິ່ງທຸກຢ່າງ.” (ໂຢບ 36:4) ເຖິງວ່າຕອນນີ້ເຮົາບໍ່ເຂົ້າໃຈບາງເລື່ອງ ແຕ່ເຮົາລໍຖ້າທີ່ຈະຮຽນຮູ້ສິ່ງໃໝ່ໆທີ່ພະເຢໂຫວາຈະສອນເຮົາຕະຫຼອດໄປແລະທັງລໍຖ້າທີ່ຈະຮຽນຮູ້ສິ່ງໃໝ່ໆກ່ຽວກັບພະເຈົ້າຜູ້ຍິ່ງໃຫຍ່ຂອງເຮົາຕະຫຼອດໄປຄືກັນ.—ປຍຈ. 3:11
ເພງທີ 104 ພະລັງບໍລິສຸດເປັນຂອງຂວັນຈາກພະເຈົ້າ
b ຄຳອະທິບາຍຮູບ: ພໍ່ກັບລູກຊາຍເອົາເຄື່ອງໃສ່ໃນກະເປົາສຸກເສີນເພື່ອຄອບຄົວຈະກຽມພ້ອມໃນກໍລະນີທີ່ມີເຫດການສຸກເສີນ.
c ຄຳອະທິບາຍຮູບ: ພີ່ນ້ອງຊາຍຄົນໜຶ່ງທີ່ກຳລັງເຈິກັບບັນຫາຄິດເຖິງຄວາມສຸກທີ່ລໍຖ້າລາວໃນໂລກໃໝ່.