ບົດຄວາມສຶກສາທີ 35
ເພງທີ 123 ເຊື່ອຟັງກົດລະບຽບຂອງອົງການພະເຈົ້າຢ່າງພັກດີ
ຜູ້ເບິ່ງແຍງຈະຊ່ວຍຄົນທີ່ຖືກຕັດອອກຈາກປະຊາຄົມແນວໃດ?
“ເມື່ອມີຄົນທີ່ເຮັດຜິດຄົນໜຶ່ງກັບໃຈ ຈະເຮັດໃຫ້ມີຄວາມສຸກຢູ່ໃນສະຫວັນຫຼາຍກວ່າທີ່ມີຄົນດີ 99 ຄົນທີ່ບໍ່ຕ້ອງກັບໃຈ.”—ລກ. 15:7
ຈຸດສຳຄັນ
ເປັນຫຍັງຈຶ່ງຕ້ອງຕັດບາງຄົນອອກຈາກປະຊາຄົມ ແລະຜູ້ເບິ່ງແຍງຈະຊ່ວຍເຂົາເຈົ້າແນວໃດໃຫ້ກັບໃຈແລະກັບມາໃກ້ຊິດກັບພະເຢໂຫວາອີກ.
1-2. (ກ) ພະເຢໂຫວາຮູ້ສຶກແນວໃດກັບຄົນທີ່ເຮັດຜິດຮ້າຍແຮງແລະບໍ່ກັບໃຈ? (ຂ) ພະເຢໂຫວາຢາກໃຫ້ຄົນທີ່ເຮັດຜິດເຮັດຫຍັງ?
ພະເຢໂຫວາບໍ່ໄດ້ຍອມຮັບການກະທຳທຸກຮູບແບບ. ເພິ່ນຊັງການເຮັດຜິດ. (ພສ. 5:4-6) ພະເຢໂຫວາຄາດໝາຍໃຫ້ເຮົາເຮັດຕາມມາດຕະຖານທີ່ຖືກຕ້ອງຂອງເພິ່ນທີ່ຢູ່ໃນຄຳພີໄບເບິນ. ເຖິງຈະເປັນແນວນັ້ນ ເພິ່ນກໍຮູ້ວ່າເຮົາບໍ່ສົມບູນແບບແລະບໍ່ສາມາດເຊື່ອຟັງເພິ່ນໄດ້ຮ້ອຍເປີເຊັນ. (ພສ. 130:3, 4) ໃນເວລາດຽວກັນ ເພິ່ນກໍຈະບໍ່ຍອມທົນກັບ ‘ຄົນ [ທີ່] ໝິ່ນປະໝາດພະເຈົ້າເຊິ່ງພິກປີ້ນຄວາມກະລຸນາທີ່ຍິ່ງໃຫຍ່ຂອງ [ເພິ່ນ] ເພື່ອໃຊ້ເປັນຂໍ້ແກ້ໂຕສຳລັບການເຮັດຊົ່ວແບບບໍ່ອາຍ.’ (ຢດ. 4) ທີ່ຈິງ ຄຳພີໄບເບິນບອກວ່າ “ຄົນທີ່ໝິ່ນປະໝາດພະເຈົ້າຈະຕ້ອງຖືກທຳລາຍ” ໃນສົງຄາມອາມາເຄໂດນ.—2ປຕ. 3:7; ພນມ. 16:16
2 ແຕ່ພະເຢໂຫວາບໍ່ຢາກໃຫ້ໃຜຕ້ອງຖືກທຳລາຍ. ຄືກັບທີ່ເຮົາໄດ້ຮຽນໃນບົດຜ່ານມາ ຄຳພີໄບເບິນບອກຢ່າງຈະແຈ້ງວ່າພະເຢໂຫວາ “ຢາກໃຫ້ທຸກຄົນກັບໃຈ.” (2ປຕ. 3:9) ຜູ້ເບິ່ງແຍງຮຽນແບບພະເຢໂຫວາຕອນທີ່ເຂົາເຈົ້າພະຍາຍາມຊ່ວຍຄົນທີ່ເຮັດຜິດໃຫ້ກັບໃຈແລະກັບມາໃກ້ຊິດກັບເພິ່ນອີກ. ແຕ່ບາງເທື່ອຄົນທີ່ເຮັດຜິດກໍບໍ່ໄດ້ກັບໃຈ. (ອຊຢ. 6:9) ບາງຄົນກໍຍັງເຮັດຜິດຕໍ່ໄປເຖິງວ່າຜູ້ເບິ່ງແຍງຈະພະຍາຍາມຊ່ວຍເຂົາເຈົ້າຫຼາຍເທື່ອແລ້ວ. ຖ້າເປັນແບບນີ້ຜູ້ເບິ່ງແຍງຈະເຮັດແນວໃດ?
‘ກຳຈັດຄົນທີ່ເຮັດຊົ່ວອອກໄປ’
3. (ກ) ຄຳພີໄບເບິນບອກວ່າຄວນເຮັດແນວໃດກັບຄົນເຮັດຜິດທີ່ບໍ່ກັບໃຈ? (ຂ) ເປັນຫຍັງເຮົາຈຶ່ງເວົ້າໄດ້ວ່າຄົນເຮັດຜິດທີ່ບໍ່ກັບໃຈເລືອກທີ່ຈະເຮັດໃຫ້ໂຕເອງຖືກຕັດອອກຈາກປະຊາຄົມ?
3 ເມື່ອຄົນທີ່ເຮັດຜິດບໍ່ກັບໃຈ ຜູ້ເບິ່ງແຍງກໍບໍ່ມີທາງເລືອກອື່ນນອກຈາກເຮັດຕາມຄຳແນະນຳໃນ 1 ໂກຣິນໂທ 5:13 ທີ່ບອກວ່າ: “ພວກເຈົ້າຕ້ອງກຳຈັດຄົນທີ່ເຮັດຊົ່ວໃຫ້ອອກໄປຈາກພວກເຈົ້າ.” ຄົນທີ່ເຮັດຜິດຮູ້ວ່າຖ້າລາວບໍ່ກັບໃຈ ລາວຈະຖືກຕັດອອກຈາກປະຊາຄົມ. ມັນເປັນຄືກັບວ່າລາວເລືອກທີ່ຈະເຮັດໃຫ້ໂຕເອງຖືກຕັດອອກຈາກປະຊາຄົມ. ສະນັ້ນ ລາວຕ້ອງເກັບກ່ຽວຜົນຈາກສິ່ງທີ່ລາວຫວ່ານ. (ຄລຕ. 6:7) ເປັນຫຍັງເຮົາຈຶ່ງເວົ້າແບບນັ້ນ? ຍ້ອນຄົນທີ່ເຮັດຜິດບໍ່ຍອມປ່ຽນແປງໂຕເອງເຖິງວ່າຜູ້ເບິ່ງແຍງໄດ້ພະຍາຍາມຊ່ວຍລາວຫຼາຍເທື່ອແລ້ວ. (2ກສ. 17:12-15) ການກະທຳຂອງລາວເຮັດໃຫ້ເຫັນວ່າລາວເລືອກທີ່ຈະບໍ່ເຮັດຕາມມາດຕະຖານຂອງພະເຢໂຫວາ.—ພບຍ. 30:19, 20
4. ເປັນຫຍັງຕ້ອງມີຄຳປະກາດເມື່ອຄົນເຮັດຜິດທີ່ບໍ່ກັບໃຈຖືກຕັດອອກຈາກປະຊາຄົມ?
4 ເມື່ອຄົນເຮັດຜິດທີ່ບໍ່ກັບໃຈຖືກຕັດອອກຈາກປະຊາຄົມ ຈະມີຄຳປະກາດຢູ່ປະຊາຄົມວ່າລາວບໍ່ໄດ້ເປັນພະຍານພະເຢໂຫວາອີກຕໍ່ໄປ.a ຈຸດປະສົງທີ່ມີຄຳປະກາດແບບນີ້ບໍ່ແມ່ນເພື່ອຢາກໃຫ້ຄົນທີ່ເຮັດຜິດອັບອາຍ ແຕ່ເພື່ອຢາກໃຫ້ພີ່ນ້ອງໃນປະຊາຄົມເຮັດຕາມຄຳສັ່ງທີ່ຢູ່ໃນຄຳພີໄບເບິນທີ່ບອກວ່າ “ໃຫ້ເຊົາຄົບຫາ” ກັບຜູ້ນັ້ນ ‘ແມ່ນແຕ່ຈະກິນຫຍັງກັບຄົນແບບນີ້ກໍບໍ່ໃຫ້ເຮັດ.’ (1ກຣ. 5:9-11) ພະເຢໂຫວາມີເຫດຜົນທີ່ດີທີ່ສັ່ງເຮົາແນວນີ້. ໂປໂລບອກວ່າ: “ເຊື້ອເຂົ້າຈີ່ແຕ່ໜ້ອຍດຽວກໍເຮັດໃຫ້ແປ້ງຟູຂຶ້ນໝົດກ້ອນ.” (1ກຣ. 5:6) ຖ້າຄົນເຮັດຜິດທີ່ບໍ່ກັບໃຈຍັງຢູ່ໃນປະຊາຄົມຕໍ່ໄປ ຄົນອື່ນອາດຄິດວ່າເຂົາເຈົ້າບໍ່ຈຳເປັນຕ້ອງເຊື່ອຟັງຄຳສັ່ງຂອງພະເຢໂຫວາກະໄດ້.—ສພສ. 13:20; 1ກຣ. 15:33
5. ເຮົາຄວນເບິ່ງຜູ້ທີ່ຖືກຕັດອອກຈາກປະຊາຄົມແນວໃດ ແລະເປັນຫຍັງເຮົາຈຶ່ງເບິ່ງແບບນັ້ນ?
5 ເຮົາຄວນເບິ່ງຜູ້ທີ່ຖືກຕັດອອກຈາກປະຊາຄົມແນວໃດ? ເຖິງວ່າເຮົາບໍ່ໄດ້ຄົບຫາກັບລາວ ແຕ່ເຮົາຄວນເບິ່ງວ່າລາວເປັນຄືກັບແກະທີ່ຫຼົງທາງເຊິ່ງມີໂອກາດທີ່ຈະກັບມາໄດ້. ເມື່ອແກະຫຼົງອອກໄປຈາກຝູງ ມັນສາມາດກັບຄືນມາຫາຝູງໄດ້. ຂໍໃຫ້ຈື່ໄວ້ວ່າຄົນທີ່ເຮັດຜິດໄດ້ອຸທິດໂຕໃຫ້ພະເຢໂຫວາແລ້ວ. ແຕ່ໜ້າເສຍດາຍທີ່ຕອນນີ້ລາວບໍ່ໄດ້ໃຊ້ຊີວິດຕາມທີ່ໄດ້ອຸທິດໂຕແລະເຮັດໃຫ້ໂຕເອງຕົກຢູ່ໃນອັນຕະລາຍ. (ອຊກ. 18:31) ເຖິງຈະເປັນແນວນັ້ນ ຕາບໃດທີ່ພະເຢໂຫວາຍັງສະແດງຄວາມເມດຕາ ກໍຍັງມີຄວາມຫວັງທີ່ລາວຈະປ່ຽນແປງໂຕເອງແລະກັບເຂົ້າມາໃນປະຊາຄົມອີກ. ຜູ້ເບິ່ງແຍງຈະສະແດງໃຫ້ເຫັນແນວໃດວ່າເຂົາເຈົ້າບໍ່ໝົດຫວັງເຖິງວ່າຄົນທີ່ເຮັດຜິດຖືກຕັດອອກຈາກປະຊາຄົມ?
ຜູ້ເບິ່ງແຍງຈະຊ່ວຍຄົນທີ່ຖືກຕັດອອກຈາກປະຊາຄົມແນວໃດ?
6. ຜູ້ເບິ່ງແຍງຈະເຮັດຫຍັງແດ່ເພື່ອຊ່ວຍຄົນທີ່ຖືກຕັດອອກຈາກປະຊາຄົມ?
6 ເມື່ອຄົນເຮັດຜິດທີ່ບໍ່ກັບໃຈຖືກຕັດອອກຈາກປະຊາຄົມແລ້ວ ຜູ້ເບິ່ງແຍງຈະເຊົາຊ່ວຍລາວໃຫ້ກັບມາຫາພະເຢໂຫວາບໍ? ບໍ່ເຊົາ! ຕອນທີ່ຄະນະກຳມະການທີ່ເປັນຜູ້ເບິ່ງແຍງບອກຄົນທີ່ເຮັດຜິດວ່າລາວຈະຖືກຕັດອອກຈາກປະຊາຄົມ ເຂົາເຈົ້າຈະອະທິບາຍນຳວ່າມີຂັ້ນຕອນຫຍັງແດ່ທີ່ລາວຕ້ອງເຮັດເພື່ອຈະກັບເຂົ້າມາໃນປະຊາຄົມໄດ້ອີກ. ຜູ້ເບິ່ງແຍງຍັງເຮັດຫຼາຍກວ່ານັ້ນອີກ ໃນກໍລະນີສ່ວນຫຼາຍແລ້ວເຂົາເຈົ້າຍັງຈະບອກລາວວ່າເຂົາເຈົ້າຢາກເຈິກັບລາວອີກຫຼັງຈາກຜ່ານໄປບໍ່ເທົ່າໃດເດືອນເພື່ອເບິ່ງວ່າລາວໄດ້ປ່ຽນຄວາມຄິດຈິດໃຈແລ້ວບໍ. ຖ້າລາວຕົກລົງທີ່ຈະເຈິກັບຜູ້ເບິ່ງແຍງອີກ ຕອນທີ່ເຈິກັນເຂົາເຈົ້າກໍຈະກະຕຸ້ນລາວຢ່າງອົບອຸ່ນໃຫ້ກັບໃຈແລະກັບມາຫາພະເຢໂຫວາ. ເຖິງວ່າຕອນນັ້ນລາວຍັງບໍ່ກັບໃຈ ຜູ້ເບິ່ງແຍງກໍຍັງຈະພະຍາຍາມເຈິກັບລາວຕໍ່ໆໄປອີກແລະກະຕຸ້ນລາວໃຫ້ກັບໃຈ.
7. ຜູ້ເບິ່ງແຍງສະແດງຄວາມເມດຕາຄືກັບພະເຢໂຫວາແນວໃດເມື່ອເຂົາເຈົ້າປະຕິບັດກັບຄົນທີ່ຖືກຕັດອອກຈາກປະຊາຄົມ? (ເຢເຣມີຢາ 3:12)
7 ຜູ້ເບິ່ງແຍງພະຍາຍາມສະແດງຄວາມເມດຕາຄືກັບພະເຢໂຫວາເມື່ອເຂົາເຈົ້າປະຕິບັດກັບຄົນທີ່ຖືກຕັດອອກຈາກປະຊາຄົມ. ຕົວຢ່າງເຊັ່ນ: ໃນສະໄໝຂອງຊາດອິດສະຣາເອນບູຮານ ພະເຢໂຫວາບໍ່ໄດ້ລໍຖ້າໃຫ້ເຂົາເຈົ້າກັບໃຈກ່ອນ ແລ້ວເພິ່ນຈຶ່ງຊ່ວຍເຂົາເຈົ້າ ແຕ່ເພິ່ນເປັນຝ່າຍເລີ່ມຊ່ວຍເຂົາເຈົ້າກ່ອນທີ່ເຂົາເຈົ້າຈະກັບໃຈຊ້ຳໂດຍສົ່ງຜູ້ພະຍາກອນຂອງເພິ່ນໄປຫາເຂົາເຈົ້າ. ຄືກັບທີ່ເຮົາໄດ້ຮຽນໃນບົດທີ 2 ຂອງບົດຄວາມຊຸດນີ້ ພະເຢໂຫວາສະແດງໃຫ້ເຫັນຄວາມເມດຕາຂອງເພິ່ນໂດຍໃຊ້ຕົວຢ່າງຂອງຜູ້ພະຍາກອນໂຮເຊອາ ເພິ່ນບອກລາວໃຫ້ຍົກໂທດໃຫ້ເມຍແລະເອົາເມຍກັບຄືນມາຢູ່ນຳເຖິງວ່າລາວຍັງເຮັດຜິດຮ້າຍແຮງຢູ່. (ຮຊອ. 3:1; ມລກ. 3:7) ຜູ້ເບິ່ງແຍງຈະຮຽນແບບພະເຢໂຫວາໂດຍສະແດງອອກຈາກໃຈແທ້ໆວ່າເຂົາເຈົ້າຢາກໃຫ້ຄົນທີ່ເຮັດຜິດກັບໃຈແລະກັບມາຫາພະເຢໂຫວາ. ເຂົາເຈົ້າຈະບໍ່ເຮັດໃຫ້ລາວຮູ້ສຶກວ່າຍາກເກີນໄປທີ່ຈະກັບມາ.—ອ່ານເຢເຣມີຢາ 3:12
8. ຕົວຢ່າງປຽບທຽບຂອງພະເຢຊູເລື່ອງລູກທີ່ຫຼົງທາງເຮັດໃຫ້ເຮົາເຂົ້າໃຈວ່າພະເຢໂຫວາຮູ້ສຶກແນວໃດຕໍ່ຄົນທີ່ເຮັດຜິດ? (ລູກາ 15:7)
8 ໃຫ້ຄິດເຖິງຕົວຢ່າງປຽບທຽບຂອງພະເຢຊູເລື່ອງລູກທີ່ຫຼົງທາງທີ່ເວົ້າເຖິງໃນບົດທີ 2 ຂອງບົດຄວາມຊຸດນີ້. ຕອນທີ່ລູກຊາຍກຳລັງກັບມາເຮືອນແລະພໍ່ແນມເຫັນລາວແຕ່ໄກໆ ພໍ່ໄດ້ “ແລ່ນໄປຫາ ທັງກອດແລະຈູບລາວ.” (ລກ. 15:20) ຂໍໃຫ້ສັງເກດວ່າພໍ່ບໍ່ໄດ້ລໍຖ້າໃຫ້ລູກຊາຍມາຂໍໂທດກ່ອນ ແຕ່ພໍ່ເປັນຝ່າຍແລ່ນໄປຫາລູກຍ້ອນຮັກລາວຫຼາຍ. ພະເຢໂຫວາຮູ້ສຶກແບບນີ້ແຫຼະຕໍ່ຄົນທີ່ອອກໄປຈາກປະຊາຄົມ ສະນັ້ນຜູ້ເບິ່ງແຍງຈະພະຍາຍາມຮຽນແບບພະເຢໂຫວາໃນການສະແດງຄວາມເມດຕາ. ເຂົາເຈົ້າຢາກໃຫ້ລາວກັບມາຫາພະເຢໂຫວາ. (ລກ. 15:22-24, 32) ເມື່ອມີຄົນທີ່ເຮັດຜິດຄົນໜຶ່ງກັບໃຈ ພະເຢໂຫວາ ພະເຢຊູ ທູດສະຫວັນ ແລະທຸກຄົນໃນປະຊາຄົມກໍດີໃຈຫຼາຍ!—ອ່ານລູກາ 15:7
9. ພະເຢໂຫວາຢາກໃຫ້ຄົນທີ່ເຮັດຜິດເຮັດຫຍັງ?
9 ມາຮອດຕອນນີ້ເຮົາໄດ້ຮຽນວ່າພະເຢໂຫວາບໍ່ຍອມໃຫ້ຄົນເຮັດຜິດທີ່ບໍ່ກັບໃຈຢູ່ໃນປະຊາຄົມ ແຕ່ເພິ່ນກໍບໍ່ໄດ້ປະຖິ້ມເຂົາເຈົ້າ. ເພິ່ນຢາກໃຫ້ເຂົາເຈົ້າກັບມາຫາເພິ່ນ. ໂຮເຊອາ 14:4 ຊ່ວຍເຮົາໃຫ້ເຂົ້າໃຈຄວາມຮູ້ສຶກຂອງພະເຢໂຫວາທີ່ມີຕໍ່ຄົນເຮັດຜິດທີ່ກັບໃຈ ຂໍ້ນັ້ນບອກວ່າ: “ເຮົາຈະປົວເຂົາເຈົ້າ ແລະເຂົາເຈົ້າຈະສັດຊື່ຕໍ່ເຮົາຕະຫຼອດໄປ. ເຮົາຈະຮັກເຂົາເຈົ້າຈາກໃຈ ຍ້ອນເຮົາເຊົາໃຈຮ້າຍໃຫ້ເຂົາເຈົ້າແລ້ວ.” ພະຄຳພີຂໍ້ນີ້ກະຕຸ້ນຜູ້ເບິ່ງແຍງໃຫ້ພະຍາຍາມຊອກຫາສັນຍານເຖິງວ່າຈະເປັນສິ່ງນ້ອຍໆທີ່ສະແດງໃຫ້ເຫັນວ່າຄົນເຮັດຜິດເລີ່ມກັບໃຈແລ້ວ. ຄຳເວົ້ານີ້ຂອງພະເຢໂຫວາຄວນເຮັດໃຫ້ຄົນທີ່ອອກໄປຈາກປະຊາຄົມໝັ້ນໃຈວ່າພະເຢໂຫວາຮັກເຂົາເຈົ້າແລະຢາກໃຫ້ເຂົາເຈົ້າກັບມາຫາເພິ່ນ.
10-11. ຜູ້ເບິ່ງແຍງຈະຊ່ວຍຄົນທີ່ຖືກຕັດອອກຈາກປະຊາຄົມດົນແລ້ວໄດ້ແນວໃດ?
10 ສຳລັບຄົນທີ່ຖືກຕັດອອກຈາກປະຊາຄົມຫຼາຍປີແລ້ວເດ ຜູ້ເບິ່ງແຍງຈະຊ່ວຍເຂົາເຈົ້າແນວໃດ? ຄົນເຫຼົ່ານີ້ອາດເຊົາເຮັດຜິດມາຫຼາຍປີແລ້ວ ແລະໃນບາງກໍລະນີຄົນເຫຼົ່ານີ້ອາດຈື່ບໍ່ໄດ້ຊ້ຳວ່າຍ້ອນຫຍັງເຂົາເຈົ້າຈຶ່ງຖືກຕັດອອກຈາກປະຊາຄົມ. ບໍ່ວ່າຈະກໍລະນີໃດ ຜູ້ເບິ່ງແຍງຈະພະຍາຍາມຊອກຫາແລະໄປຢາມລາວ. ຜູ້ເບິ່ງແຍງຈະອະທິດຖານກັບລາວແລະກະຕຸ້ນລາວຢ່າງອົບອຸ່ນໃຫ້ກັບເຂົ້າມາໃນປະຊາຄົມ. ຖ້າຄົນໜຶ່ງອອກໄປຈາກປະຊາຄົມດົນແລ້ວ ຄວາມເຊື່ອຂອງລາວຕ້ອງອ່ອນແອຫຼາຍແທ້ໆ. ສະນັ້ນ ຖ້າລາວສະແດງໃຫ້ເຫັນວ່າລາວຢາກກັບມາ ຜູ້ເບິ່ງແຍງກໍຈະເລືອກບາງຄົນໃຫ້ໄປສຶກສາກັບລາວເຖິງວ່າລາວຍັງບໍ່ໄດ້ຖືກຮັບກັບເຂົ້າມາໃນປະຊາຄົມເທື່ອ. ບໍ່ວ່າຈະໃນກໍລະນີໃດ ມີແຕ່ຜູ້ເບິ່ງແຍງເທົ່ານັ້ນທີ່ຈະຈັດໃຫ້ມີການສຶກສາແບບນີ້.
11 ຜູ້ເບິ່ງແຍງຈະພະຍາຍາມຮຽນແບບພະເຢໂຫວາໃນການສະແດງຄວາມເມດຕາ. ສະນັ້ນ ເຂົາເຈົ້າຈະຊອກຫາຄົນທີ່ອອກໄປຈາກປະຊາຄົມແລະຊ່ວຍຄົນເຫຼົ່ານັ້ນໃຫ້ຫຼາຍທີ່ສຸດເທົ່າທີ່ເປັນໄປໄດ້ໃຫ້ກັບມາຫາພະເຢໂຫວາ. ເມື່ອຄົນທີ່ເຮັດຜິດສະແດງໃຫ້ເຫັນວ່າລາວກັບໃຈແລະເຊົາເຮັດຜິດ ລາວກໍຈະສາມາດຖືກຮັບກັບເຂົ້າມາໃນປະຊາຄົມໄດ້ທັນທີ.—2ກຣ. 2:6-8
12. (ກ) ໃນກໍລະນີໃດທີ່ຜູ້ເບິ່ງແຍງຕ້ອງລະວັງເປັນພິເສດ? (ຂ) ເປັນຫຍັງເຮົາບໍ່ຄວນຄິດວ່າຄົນທີ່ເຮັດຜິດຮ້າຍແຮງບາງຢ່າງບໍ່ມີທາງທີ່ຈະໄດ້ຮັບຄວາມເມດຕາຈາກພະເຢໂຫວາ? (ເບິ່ງໄຂເງື່ອນນຳ)
12 ມີບາງກໍລະນີທີ່ຜູ້ເບິ່ງແຍງຕ້ອງລະວັງເປັນພິເສດກ່ອນທີ່ຈະຮັບຜູ້ໃດຜູ້ໜຶ່ງກັບເຂົ້າມາໃນປະຊາຄົມ. ຕົວຢ່າງເຊັ່ນ: ຄົນທີ່ທຳຮ້າຍເດັກ ຄົນທີ່ທໍລະຍົດພະເຈົ້າ ຫຼືຄົນທີ່ວາງແຜນປະກັບຄູ່ຂອງໂຕເອງ. ຄົນທີ່ເຮັດແບບນີ້ ຜູ້ເບິ່ງແຍງຕ້ອງແນ່ໃຈວ່າລາວກັບໃຈແທ້ໆ. (ມລກ. 2:14; 2ຕມ. 3:6) ຜູ້ເບິ່ງແຍງຕ້ອງປົກປ້ອງພີ່ນ້ອງໃນປະຊາຄົມ. ໃນເວລາດຽວກັນ ເຮົາຕ້ອງຈື່ໄວ້ວ່າພະເຢໂຫວາຍອມຮັບແຕ່ຄົນເຮັດຜິດທີ່ກັບໃຈແທ້ໆແລະເຊົາເຮັດຜິດແລ້ວ. ສະນັ້ນ ເຖິງວ່າຜູ້ເບິ່ງແຍງຕ້ອງລະວັງເປັນພິເສດໃນກໍລະນີທີ່ມີການທໍລະຍົດຄົນອື່ນ ແຕ່ເຂົາເຈົ້າກໍບໍ່ຄວນຄິດວ່າຄົນແບບນັ້ນບໍ່ມີທາງທີ່ຈະໄດ້ຮັບຄວາມເມດຕາຈາກພະເຢໂຫວາ.b—1ປຕ. 2:10
ຄົນໃນປະຊາຄົມຄວນເຮັດແນວໃດ?
13. ວິທີທີ່ເຮົາປະຕິບັດກັບຄົນທີ່ຖືກຕັກເຕືອນຕ່າງກັນແນວໃດກັບວິທີທີ່ເຮົາປະຕິບັດກັບຄົນທີ່ຖືກຕັດອອກຈາກປະຊາຄົມ?
13 ຄືກັບທີ່ໄດ້ເວົ້າມາແລ້ວໃນບົດກ່ອນ ເມື່ອມີຄຳປະກາດວ່າພີ່ນ້ອງຄົນໜຶ່ງຖືກຕັກເຕືອນ ເຮົາຍັງສາມາດຄົບຫາກັບລາວຕໍ່ໄປໄດ້ຍ້ອນລາວໄດ້ກັບໃຈແລະເຊົາເຮັດຜິດແລ້ວ. (1ຕມ. 5:20) ລາວຍັງເປັນສ່ວນໜຶ່ງຂອງປະຊາຄົມແລະຕ້ອງການກຳລັງໃຈຈາກການຄົບຫາກັບພີ່ນ້ອງ. (ຮຣ. 10:24, 25) ແຕ່ໃນກໍລະນີຂອງຄົນທີ່ຖືກຕັດອອກຈາກປະຊາຄົມ ເຮົາຈະ “ເຊົາຄົບຫາ” ກັບລາວ ‘ແມ່ນແຕ່ຈະກິນຫຍັງກັບຄົນແບບນີ້ກໍບໍ່ໃຫ້ເຮັດ.’—1ກຣ. 5:11
14. ເຮົາຈະໃຊ້ໃຈຮູ້ຜິດຮູ້ຖືກຂອງເຮົາແນວໃດເມື່ອປະຕິບັດກັບຄົນທີ່ຖືກຕັດອອກຈາກປະຊາຄົມ? (ເບິ່ງຮູບນຳ)
14 ຄຳແນະນຳທີ່ຢູ່ໃນ 1 ໂກຣິນໂທ 5:11 ໝາຍຄວາມວ່າເຮົາບໍ່ສາມາດຊວນຄົນທີ່ຖືກຕັດອອກຈາກປະຊາຄົມໃຫ້ເຂົ້າຮ່ວມການປະຊຸມບໍ ຫຼືຖ້າລາວເຂົ້າຮ່ວມປະຊຸມເຮົາທັກທາຍລາວບໍ່ໄດ້ບໍ? ບໍ່ແມ່ນ. ແມ່ນຢູ່ວ່າເຮົາບໍ່ຄົບຫາກັບຄົນທີ່ຖືກຕັດອອກຈາກປະຊາຄົມ ແຕ່ຖ້າລາວເປັນຍາດຕິພີ່ນ້ອງຫຼືເປັນໝູ່ສະໜິດຂອງເຮົາກ່ອນທີ່ຈະຖືກຕັດອອກຈາກປະຊາຄົມ ເຮົາສາມາດໃຊ້ໃຈຮູ້ຜິດຮູ້ຖືກຂອງເຮົາທີ່ໄດ້ຮັບການຝຶກຈາກຄຳພີໄບເບິນເພື່ອຕັດສິນໃຈວ່າຈະຊວນລາວມາປະຊຸມຫຼືບໍ່. ຖ້າລາວມາປະຊຸມເດ ເຮົາຄວນປະຕິບັດກັບລາວແນວໃດ? ຜ່ານມາ ເຮົາຈະບໍ່ທັກທາຍຄົນທີ່ຖືກຕັດອອກຈາກປະຊາຄົມ ແຕ່ຕອນນີ້ເຮົາທຸກຄົນກໍສາມາດໃຊ້ໃຈຮູ້ຜິດຮູ້ຖືກທີ່ໄດ້ຮັບການຝຶກຈາກຄຳພີໄບເບິນເພື່ອຕັດສິນໃຈວ່າຈະທັກທາຍຫຼືບໍ່. ບາງຄົນອາດຮູ້ສຶກວ່າທັກທາຍສັ້ນໆແລະຕ້ອນຮັບຜູ້ນັ້ນໄດ້ ແຕ່ເຮົາຈະບໍ່ລົມກັບລາວດົນຫຼືຄົບຫາກັບລາວ.
ເຮົາແຕ່ລະຄົນສາມາດໃຊ້ໃຈຮູ້ຜິດຮູ້ຖືກທີ່ໄດ້ຮັບການຝຶກຈາກຄຳພີໄບເບິນເພື່ອຕັດສິນໃຈວ່າຈະຊວນຄົນທີ່ຖືກຕັດອອກຈາກປະຊາຄົມມາຮ່ວມການປະຊຸມຫຼືທັກທາຍລາວສັ້ນໆຫຼືບໍ່ (ເບິ່ງຂໍ້ 14)
15. ໃນ 2 ໂຢຮັນ 9-11 ເວົ້າເຖິງຄົນທີ່ເຮັດຜິດແບບໃດ? (ເບິ່ງຂອບ “ໂຢຮັນກັບໂປໂລເວົ້າເຖິງຄວາມຜິດແບບດຽວກັນບໍ?” ນຳ)
15 ບາງຄົນອາດສົງໄສວ່າ: ‘ຄຳພີໄບເບິນບອກບໍ່ແມ່ນບໍວ່າຄົນທີ່ທັກທາຍຄົນທີ່ເຮັດຜິດຮ້າຍແຮງກໍຖືວ່າມີສ່ວນຮ່ວມໃນການເຮັດຊົ່ວຂອງລາວ?’ (ອ່ານ 2 ໂຢຮັນ 9-11) ແຕ່ແວດບົດຂອງພະຄຳພີຂໍ້ນີ້ບອກໃຫ້ຮູ້ວ່າຄຳແນະນຳນີ້ໃຊ້ກັບຄົນທີ່ທໍລະຍົດພະເຈົ້າແລະຄົນທີ່ພະຍາຍາມຊັກຊວນຄົນອື່ນໃຫ້ເຮັດຜິດ. (ພນມ. 2:20) ສະນັ້ນ ຖ້າມີຄົນສະໜັບສະໜູນຄຳສອນຂອງຄົນທີ່ທໍລະຍົດພະເຈົ້າຫຼືການເຮັດຜິດແນວອື່ນ ຜູ້ເບິ່ງແຍງຈະບໍ່ຈັດໃຫ້ມີການໄປຢາມລາວ. ແນວໃດກໍຕາມ ອາດເປັນໄປໄດ້ທີ່ລາວຈະກັບໃຈ ແຕ່ຈົນກວ່າຈະຮອດຕອນນັ້ນ ເຮົາຈະບໍ່ທັກທາຍຫຼືຊວນລາວມາປະຊຸມ.
ຮຽນແບບພະເຢໂຫວາໃນການສະແດງຄວາມເມດຕາແລະຄວາມເຫັນອົກເຫັນໃຈ
16-17. (ກ) ພະເຢໂຫວາຢາກໃຫ້ຄົນທີ່ເຮັດຜິດເຮັດຫຍັງ? (ເອເຊກຽນ 18:32) (ຂ) ຜູ້ເບິ່ງແຍງມີສິດທິພິເສດຫຍັງ?
16 ເຮົາໄດ້ຮຽນຫຍັງຈາກ 5 ບົດໃນບົດຄວາມຊຸດນີ້? ເຮົາໄດ້ຮຽນວ່າພະເຢໂຫວາບໍ່ຢາກໃຫ້ໃຜຕ້ອງຖືກທຳລາຍ. (ອ່ານເອເຊກຽນ 18:32) ເພິ່ນຢາກໃຫ້ຄົນທີ່ເຮັດຜິດກັບມາຄືນດີກັບເພິ່ນ. (2ກຣ. 5:20) ຍ້ອນແນວນີ້ພະເຢໂຫວາຈຶ່ງກະຕຸ້ນຜູ້ຮັບໃຊ້ຂອງເພິ່ນເລື້ອຍໆໃຫ້ກັບໃຈແລະກັບມາຫາເພິ່ນ. ຜູ້ເບິ່ງແຍງມີສິດທິພິເສດທີ່ໄດ້ເຮັດວຽກຮ່ວມກັບພະເຢໂຫວາໃນການຊ່ວຍຄົນທີ່ເຮັດຜິດຮ້າຍແຮງໃຫ້ກັບໃຈ.—ຣມ. 2:4; 1ກຣ. 3:9
17 ພະເຢໂຫວາ ພະເຢຊູ ແລະທູດສະຫວັນຕ້ອງມີຄວາມສຸກຫຼາຍແທ້ໆເມື່ອຄົນທີ່ເຮັດຜິດກັບໃຈ! ພະເຢໂຫວາພໍ່ຂອງເຮົາມີຄວາມສຸກທຸກເທື່ອທີ່ເຫັນຜູ້ຮັບໃຊ້ຂອງເພິ່ນທີ່ຫຼົງທາງກັບເຂົ້າມາໃນປະຊາຄົມ. ເມື່ອເຮົາຄິດຕຶກຕອງກ່ຽວກັບຄວາມເມດຕາ ຄວາມເຫັນອົກເຫັນໃຈ ແລະຄວາມກະລຸນາທີ່ຍິ່ງໃຫຍ່ຂອງພະເຢໂຫວາ ເຮົາກໍແຮ່ງຮູ້ສຶກຮັກເພິ່ນຫຼາຍຂຶ້ນເລື້ອຍໆ.—ລກ. 1:78
ເພງທີ 111 ສິ່ງທີ່ເຮັດໃຫ້ພວກເຮົາມີຄວາມຍິນດີ
a ຕາມຄຳແນະນຳຂອງໂປໂລໃນ 1 ໂກຣິນໂທ 5:13 ເຮົາຈະບໍ່ໃຊ້ຄຳວ່າຕັດສຳພັນອີກຕໍ່ໄປ ແຕ່ເຮົາຈະໃຊ້ຄຳວ່າຕັດອອກຈາກປະຊາຄົມແທນ.
b ຄຳພີໄບເບິນເວົ້າເຖິງບາງຄົນທີ່ບໍ່ສາມາດຍົກໂທດໃຫ້ໄດ້. ຄົນແບບນີ້ຕັ້ງໃຈບໍ່ເຊົາຕໍ່ຕ້ານພະເຢໂຫວາ. ມີແຕ່ພະເຢໂຫວາກັບພະເຢຊູເທົ່ານັ້ນທີ່ຕັດສິນໄດ້ວ່າລາວຈະໄດ້ຮັບການຍົກໂທດຫຼືບໍ່.—ມຣກ. 3:29; ຮຣ. 10:26, 27