ບົດຄວາມສຶກສາທີ 12
ເພງທີ 119 ພວກເຮົາຕ້ອງມີຄວາມເຊື່ອ
ໃຊ້ຊີວິດຕາມຄວາມເຊື່ອຕໍ່ໆໄປ
“ພວກເຮົາຈຶ່ງໃຊ້ຊີວິດຕາມຄວາມເຊື່ອ ບໍ່ແມ່ນຕາມສິ່ງທີ່ເຫັນ.”—2ກຣ. 5:7
ຈຸດສຳຄັນ
ເຮົາຈະໃຊ້ຊີວິດຕາມຄວາມເຊື່ອຕໍ່ໆໄປໄດ້ແນວໃດເມື່ອຕ້ອງຕັດສິນໃຈເລື່ອງທີ່ສຳຄັນ.
1. ເປັນຫຍັງໂປໂລມີຄວາມສຸກເມື່ອຄິດຄືນຫຼັງກ່ຽວກັບຊີວິດທີ່ຜ່ານມາ?
ໂປໂລຮູ້ວ່າອີກບໍ່ດົນລາວຈະຕ້ອງຕາຍ ແຕ່ເມື່ອຄິດຄືນຫຼັງວ່າຜ່ານມາລາວໃຊ້ຊີວິດແນວໃດ ມັນກໍເຮັດໃຫ້ລາວມີຄວາມສຸກຫຼາຍ. ລາວເວົ້າວ່າ: “ຂ້ອຍແລ່ນແຂ່ງຈົນຮອດເສັ້ນໄຊແລ້ວ ແລະຂ້ອຍກໍຍັງຮັກສາຄວາມເຊື່ອໄວ້ໄດ້.” (2ຕມ. 4:6-8) ໂປໂລຕັດສິນໃຈຖືກຕ້ອງທີ່ໄດ້ໃຊ້ຊີວິດເພື່ອຮັບໃຊ້ພະເຢໂຫວາ ແລະລາວກໍໝັ້ນໃຈວ່າພະເຢໂຫວາພໍໃຈໃນໂຕລາວ. ເຮົາກໍຢາກເປັນຄືກັບໂປໂລ ເຮົາຢາກຕັດສິນໃຈຢ່າງຖືກຕ້ອງແລະເຮັດໃຫ້ພະເຢໂຫວາພໍໃຈ. ເຮົາຈະເຮັດແບບນັ້ນໄດ້ແນວໃດ?
2. ການໃຊ້ຊີວິດຕາມຄວາມເຊື່ອໝາຍຄວາມວ່າແນວໃດ?
2 ໂປໂລເວົ້າເຖິງໂຕເອງແລະຄລິດສະຕຽນທີ່ສັດຊື່ຄົນອື່ນໆວ່າ: “ພວກເຮົາຈຶ່ງໃຊ້ຊີວິດຕາມຄວາມເຊື່ອ ບໍ່ແມ່ນຕາມສິ່ງທີ່ເຫັນ.” (2ກຣ. 5:7) ໂປໂລໝາຍຄວາມວ່າແນວໃດ? ຄົນທີ່ໃຊ້ຊີວິດຕາມສິ່ງທີ່ເຫັນຈະຕັດສິນໃຈໂດຍອາໄສສິ່ງທີ່ເຫັນ ໄດ້ຍິນ ແລະຮູ້ສຶກ. ກົງກັນຂ້າມ ຄົນທີ່ໃຊ້ຊີວິດຕາມຄວາມເຊື່ອຈະຕັດສິນໃຈໂດຍເພິ່ງພະເຢໂຫວາ. ສິ່ງທີ່ລາວເຮັດສະແດງໃຫ້ເຫັນວ່າລາວໝັ້ນໃຈວ່າຈະໄດ້ປະໂຫຍດຈາກການເຮັດຕາມຄຳແນະນຳຂອງພະເຢໂຫວາທີ່ຢູ່ໃນຄຳພີໄບເບິນ ແລະລາວຍັງໝັ້ນໃຈວ່າພະເຢໂຫວາຈະໃຫ້ລາງວັນລາວແນ່ນອນ.—ພສ. 119:66; ຮຣ. 11:6
3. ການໃຊ້ຊີວິດຕາມຄວາມເຊື່ອເຮັດໃຫ້ໄດ້ຮັບປະໂຫຍດຫຍັງ? (2 ໂກຣິນໂທ 4:18)
3 ບາງເທື່ອເຮົາກໍຕັດສິນໃຈໂດຍອາໄສສິ່ງທີ່ເຮົາເຫັນພາຍນອກ. ແຕ່ຖ້າເຮົາຕັດສິນໃຈໃນເລື່ອງທີ່ສຳຄັນໂດຍອາໄສສິ່ງທີ່ເຮົາເຫັນຫຼືໄດ້ຍິນເທົ່ານັ້ນ ເຮົາອາດຕັດສິນໃຈຜິດພາດກໍໄດ້. ເປັນຫຍັງຈຶ່ງເປັນແນວນັ້ນ? ຍ້ອນວ່າສິ່ງທີ່ເຮົາເຫັນແລະໄດ້ຍິນອາດບໍ່ຖືກຕ້ອງສະເໝີໄປ. ຖ້າເຮົາຕັດສິນໃຈຕາມສິ່ງທີ່ເຫັນ ໄດ້ຍິນ ແລະຮູ້ສຶກ ເຮົາອາດບໍ່ໄດ້ເຮັດຕາມສິ່ງທີ່ພະເຢໂຫວາຕ້ອງການ. (ປຍຈ. 11:9; ມທ. 24:37-39) ແຕ່ຖ້າເຮົາຕັດສິນໃຈຕາມຄວາມເຊື່ອ ເຮົາຈະຕັດສິນໃຈໃນແບບທີ່ເຮັດໃຫ້ “ຜູ້ເປັນນາຍພໍໃຈ.” (ອຟຊ. 5:10) ການເຮັດຕາມຄຳແນະນຳຂອງພະເຢໂຫວາຈະເຮັດໃຫ້ເຮົາສະຫງົບໃຈແລະມີຄວາມສຸກແທ້. (ພສ. 16:8, 9; ອຊຢ. 48:17, 18) ຖ້າເຮົາໃຊ້ຊີວິດຕາມຄວາມເຊື່ອຕໍ່ໆໄປ ເຮົາກໍຈະມີຊີວິດຕະຫຼອດໄປໃນອະນາຄົດ.—ອ່ານ 2 ໂກຣິນໂທ 4:18
4. ເຮົາຈະຮູ້ໄດ້ແນວໃດວ່າເຮົາກຳລັງໃຊ້ຊີວິດຕາມຄວາມເຊື່ອບໍ່ແມ່ນຕາມສິ່ງທີ່ເຫັນ?
4 ເຮົາຈະຮູ້ໄດ້ແນວໃດວ່າເຮົາກຳລັງໃຊ້ຊີວິດຕາມຄວາມເຊື່ອບໍ່ແມ່ນຕາມສິ່ງທີ່ເຫັນ? ເຮົາຕ້ອງຖາມໂຕເອງວ່າ: ‘ຕອນທີ່ຂ້ອຍຕັດສິນໃຈບາງຢ່າງ ຂ້ອຍໃຫ້ສິ່ງໃດຊີ້ນຳ? ຂ້ອຍອາໄສແຕ່ສິ່ງທີ່ເຫັນເທົ່ານັ້ນບໍ ຫຼືຂ້ອຍເຮັດຕາມຄຳແນະນຳຂອງພະເຢໂຫວາ?’ ໃຫ້ເຮົາມາເບິ່ງວ່າເຮົາຈະໃຊ້ຊີວິດຕາມຄວາມເຊື່ອຕໍ່ໆໄປແນວໃດໃນ 3 ເລື່ອງທີ່ສຳຄັນຕໍ່ໄປນີ້: (1) ເມື່ອເລືອກວຽກອາຊີບ (2) ເມື່ອເລືອກຄົນທີ່ຈະແຕ່ງດອງນຳ ແລະ (3) ເມື່ອໄດ້ຮັບຄຳແນະນຳຈາກອົງການ. ໃນແຕ່ລະເລື່ອງເຮົາຈະເບິ່ງວ່າເຮົາຕ້ອງຄິດເຖິງຫຍັງແດ່ເພື່ອຈະຕັດສິນໃຈຢ່າງຖືກຕ້ອງ.
ເມື່ອເລືອກວຽກອາຊີບ
5. ເມື່ອເລືອກວຽກອາຊີບ ຕາມປົກກະຕິແລ້ວເຮົາຈະຄິດເຖິງຫຍັງ?
5 ເຮົາທຸກຄົນຢາກມີລາຍໄດ້ເພື່ອລ້ຽງໂຕເອງແລະຄອບຄົວ. (ປຍຈ. 7:12; 1ຕມ. 5:8) ວຽກບາງຢ່າງກໍໄດ້ເງິນຫຼາຍພໍທີ່ຈະເບິ່ງແຍງຄວາມຈຳເປັນໃນຄອບຄົວແລະມີເງິນທ້ອນໄວ້ນຳ. ແຕ່ວຽກບາງຢ່າງກໍໄດ້ເງິນພໍແຕ່ໃຊ້ຈ່າຍສຳລັບສິ່ງທີ່ຈຳເປັນໃນຄອບຄົວເທົ່ານັ້ນ ເຊັ່ນ: ຊື້ຢູ່ຊື້ກິນ ແລະຈ່າຍຄ່າເຊົ່າເຮືອນ. ເມື່ອເລືອກວ່າຈະເຮັດວຽກແບບໃດ ເປັນເລື່ອງປົກກະຕິທີ່ເຮົາຈະຄິດວ່າວຽກນັ້ນຈະໄດ້ເງິນຫຼາຍສ່ຳໃດ ແຕ່ຖ້າເລື່ອງນີ້ເປັນສິ່ງດຽວເທົ່ານັ້ນທີ່ເຮົາຄິດເຖິງ ນັ້ນກໍໝາຍຄວາມວ່າເຮົາກຳລັງໃຊ້ຊີວິດຕາມສິ່ງທີ່ເຫັນ ບໍ່ແມ່ນຕາມຄວາມເຊື່ອ.
6. ເມື່ອເລືອກວຽກອາຊີບ ເຮົາຈະໃຊ້ຊີວິດຕາມຄວາມເຊື່ອໄດ້ແນວໃດ? (ເຮັບເຣີ 13:5)
6 ຖ້າເຮົາໃຊ້ຊີວິດຕາມຄວາມເຊື່ອ ເຮົາຈະຄິດນຳວ່າວຽກນັ້ນຈະສົ່ງຜົນແນວໃດຕໍ່ສາຍສຳພັນຂອງເຮົາກັບພະເຢໂຫວາ. ເຮົາຄວນຖາມໂຕເອງວ່າ: ‘ພະເຢໂຫວາຍອມຮັບວຽກແບບນີ້ບໍ ຫຼືມັນກ່ຽວຂ້ອງກັບການເຮັດສິ່ງທີ່ເພິ່ນຊັງ?’ (ສພສ. 6:16-19) ‘ວຽກນັ້ນຈະເຮັດໃຫ້ຂ້ອຍຂາດການປະຊຸມ ບໍ່ມີເວລາໄປປະກາດ ຫຼືບໍ່ມີເວລາສຶກສາຄຳພີໄບເບິນ ຫຼືເຮັດໃຫ້ຂ້ອຍຕ້ອງຢູ່ໄກຈາກຄອບຄົວເປັນເວລາດົນໆບໍ?’ (ຟລປ. 1:10) ຖ້າຄຳຕອບຄືແມ່ນ ມັນກໍດີກວ່າທີ່ຈະບໍ່ເຮັດວຽກແບບນັ້ນເຖິງວ່າວຽກກຳລັງຫາຍາກ. ຖ້າເຮົາໃຊ້ຊີວິດຕາມຄວາມເຊື່ອ ເຮົາຈະຕັດສິນໃຈໃນແບບທີ່ສະແດງໃຫ້ເຫັນວ່າເຮົາໝັ້ນໃຈວ່າພະເຢໂຫວາຈະເບິ່ງແຍງຄວາມຈຳເປັນຂອງເຮົາແນ່ນອນ.—ມທ. 6:33; ອ່ານເຮັບເຣີ 13:5
7-8. ພີ່ນ້ອງຮາເວຍໃຊ້ຊີວິດຕາມຄວາມເຊື່ອແນວໃດ? (ເບິ່ງຮູບນຳ)
7 ພີ່ນ້ອງຊາຍຊື່ຮາເວຍaຈາກອາເມຣິກາໃຕ້ຮູ້ວ່າການໃຊ້ຊີວິດຕາມຄວາມເຊື່ອເປັນເລື່ອງທີ່ສຳຄັນຫຼາຍ. ລາວເວົ້າວ່າ: “ຂ້ອຍສະໝັກເຮັດວຽກໜຶ່ງເຊິ່ງເປັນວຽກທີ່ດີຫຼາຍ. ວຽກນີ້ໄດ້ເງິນເດືອນຫຼາຍກວ່າວຽກເກົ່າ 2 ທົບ ແລະເປັນວຽກທີ່ຂ້ອຍມັກນຳ.” ແຕ່ຮາເວຍກໍຢາກເປັນໄພໂອເນຍຄືກັນ. ລາວເລົ່າຕໍ່ວ່າ: “ຂ້ອຍຖືກເລືອກສຳພາດສຳລັບວຽກນັ້ນ ແຕ່ກ່ອນທີ່ຈະເຂົ້າສຳພາດຂ້ອຍອະທິດຖານຂໍໃຫ້ພະເຢໂຫວາຊ່ວຍ ຍ້ອນຂ້ອຍໝັ້ນໃຈວ່າພະເຢໂຫວາຮູ້ວ່າອັນໃດດີທີ່ສຸດສຳລັບຂ້ອຍ. ຂ້ອຍຢາກໄດ້ວຽກທີ່ດີແລະໄດ້ເງິນເດືອນຫຼາຍຂຶ້ນ ແຕ່ຂ້ອຍກໍບໍ່ຕ້ອງການວຽກນີ້ຖ້າມັນບໍ່ໄດ້ຊ່ວຍຂ້ອຍໃຫ້ຮັບໃຊ້ພະເຢໂຫວາໄດ້ຫຼາຍຂຶ້ນ.”
8 ຮາເວຍເລົ່າຕໍ່ວ່າ: “ຕອນທີ່ສຳພາດ ຜູ້ຈັດການບອກວ່າຂ້ອຍຕ້ອງເຮັດວຽກລ່ວງເວລາເລື້ອຍໆ.” ຂ້ອຍບອກລາວແບບສຸພາບວ່າ: “ຂ້ອຍເຮັດບໍ່ໄດ້ ຍ້ອນຂ້ອຍຕ້ອງໄປປະຊຸມແລະໄປປະກາດ.” ຮາເວຍປະຕິເສດວຽກນັ້ນ ແລະ 2 ອາທິດຕໍ່ມາລາວກໍເລີ່ມເປັນໄພໂອເນຍ. ສອງສາມເດືອນຕໍ່ມາ ລາວກໍໄດ້ວຽກບໍ່ເຕັມເວລາ. ຮາເວຍເວົ້າວ່າ: “ພະເຢໂຫວາໄດ້ຍິນຄຳອະທິດຖານຂອງຂ້ອຍ ແລະເພິ່ນຊ່ວຍຂ້ອຍໃຫ້ໄດ້ວຽກທີ່ຈະເປັນໄພໂອເນຍໄດ້. ຂ້ອຍດີໃຈຫຼາຍທີ່ໄດ້ວຽກທີ່ເຮັດໃຫ້ຂ້ອຍມີເວລາຫຼາຍຂຶ້ນເພື່ອຮັບໃຊ້ພະເຢໂຫວາແລະພີ່ນ້ອງ.”
ຖ້າເຈົ້າໄດ້ຮັບຂໍ້ສະເໜີໃຫ້ເລື່ອນຕຳແໜ່ງ ການຕັດສິນໃຈຂອງເຈົ້າສະແດງໃຫ້ເຫັນບໍວ່າເຈົ້າໝັ້ນໃຈວ່າພະເຢໂຫວາຮູ້ວ່າອັນໃດດີທີ່ສຸດສຳລັບເຈົ້າ? (ເບິ່ງຂໍ້ 7-8)
9. ເຈົ້າຮຽນຫຍັງຈາກເລື່ອງຂອງພີ່ນ້ອງເຕຣຊໍ້?
9 ເຮົາຄວນເຮັດແນວໃດຖ້າເຫັນວ່າວຽກທີ່ເຮັດຢູ່ເຮັດໃຫ້ເຮົາບໍ່ໄດ້ໃຊ້ຊີວິດຕາມຄວາມເຊື່ອ? ຂໍໃຫ້ເບິ່ງເລື່ອງຂອງພີ່ນ້ອງເຕຣຊໍ້ຈາກສາທາລະນະລັດກົງໂກ. ລາວເວົ້າວ່າ: “ວຽກໃໝ່ຂອງຂ້ອຍເປັນໂອກາດດຽວເທົ່ານັ້ນທີ່ຂ້ອຍຈະໄດ້ເຮັດໃນຊີວິດ. ຂ້ອຍໄດ້ເງິນເດືອນຫຼາຍກວ່າເກົ່າ 3 ທົບ ແລະເປັນວຽກທີ່ຄົນໃຫ້ຄວາມນັບຖື.” ແຕ່ວຽກນີ້ເຮັດໃຫ້ເຕຣຊໍ້ຂາດການປະຊຸມເລື້ອຍໆຍ້ອນລາວຕ້ອງເຮັດວຽກລ່ວງເວລາ ແລະລາວຍັງຖືກກົດດັນໃຫ້ປົກປິດການສໍ້ໂກງທີ່ເກີດຂຶ້ນໃນບໍລິສັດນຳ. ເຕຣຊໍ້ຢາກລາອອກຈາກວຽກນີ້ ແຕ່ລາວກໍອຸກໃຈຍ້ອນຢ້ານວ່າຈະບໍ່ມີວຽກເຮັດ. ສິ່ງໃດຊ່ວຍລາວ? ລາວເວົ້າວ່າ: “ຮາບາກຸກ 3:17-19 ຊ່ວຍຂ້ອຍໃຫ້ເຂົ້າໃຈວ່າເຖິງວ່າຂ້ອຍຈະຕົກວຽກ ແຕ່ພະເຢໂຫວາຈະເບິ່ງແຍງຂ້ອຍບໍ່ວິທີໃດກໍວິທີໜຶ່ງ.” ດັ່ງນັ້ນ ລາວຈຶ່ງລາອອກຈາກວຽກນັ້ນ. ລາວເວົ້າຕໍ່ວ່າ: “ນາຍຈ້າງຫຼາຍຄົນຄິດວ່າຖ້າໃຫ້ເງິນເດືອນຫຼາຍໆ ທຸກຄົນຈະຍອມສະລະທຸກສິ່ງແມ່ນແຕ່ເວລາທີ່ໃຊ້ກັບຄອບຄົວແລະການນະມັດສະການພະເຈົ້າ. ຂ້ອຍດີໃຈຫຼາຍທີ່ໄດ້ປົກປ້ອງສາຍສຳພັນຂອງຂ້ອຍກັບພະເຢໂຫວາແລະກັບຄອບຄົວ. ປີ 1 ຕໍ່ມາ ພະເຢໂຫວາຊ່ວຍຂ້ອຍໃຫ້ໄດ້ວຽກທີ່ດີທີ່ໄດ້ເງິນພຽງພໍທີ່ຈະເບິ່ງແຍງຄວາມຈຳເປັນຂອງຄອບຄົວແລະມີເວລາຫຼາຍຂຶ້ນທີ່ຈະຮັບໃຊ້ເພິ່ນ.” ເມື່ອເຮົາໃຫ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ ບາງເທື່ອເຮົາອາດຈະມີບັນຫາເລື່ອງເງິນ ແຕ່ພະເຢໂຫວາຈະເບິ່ງແຍງເຮົາສະເໝີ. ແມ່ນແລ້ວ ຖ້າເຮົາເພິ່ງຄຳແນະນຳຂອງພະເຢໂຫວາແລະເຊື່ອໝັ້ນໃນຄຳສັນຍາຂອງເພິ່ນ ເຮົາຈະໃຊ້ຊີວິດຕາມຄວາມເຊື່ອຕໍ່ໆໄປ ແລະພະເຢໂຫວາຈະອວຍພອນເຮົາ.
ເມື່ອເລືອກຄົນທີ່ຈະແຕ່ງດອງນຳ
10. ເມື່ອເລືອກຄົນທີ່ຈະແຕ່ງດອງນຳ ເຮົາອາດໃຊ້ຊີວິດຕາມສິ່ງທີ່ເຫັນແນວໃດ?
10 ການແຕ່ງດອງເປັນຂອງຂວັນຈາກພະເຢໂຫວາ ແລະເປັນເລື່ອງທຳມະຊາດທີ່ເຮົາຢາກແຕ່ງດອງ. ເມື່ອພີ່ນ້ອງຍິງຊອກຫາຄົນທີ່ຈະແຕ່ງດອງນຳ ລາວອາດສັງເກດເບິ່ງພີ່ນ້ອງຊາຍໃນເລື່ອງນິດໄສໃຈຄໍ ຮູບຮ່າງໜ້າຕາ ຊື່ສຽງ ຖານະທາງການເງິນ ໜ້າທີ່ຮັບຜິດຊອບໃນຄອບຄົວ ແລະເບິ່ງວ່າຢູ່ນຳແລ້ວຈະມີຄວາມສຸກບໍ?b ສິ່ງເຫຼົ່ານີ້ກໍເປັນເລື່ອງທີ່ສຳຄັນຫຼາຍ ແຕ່ຖ້າລາວຄິດເຖິງແຕ່ສິ່ງເຫຼົ່ານີ້ເທົ່ານັ້ນ ລາວອາດເປັນຄົນທີ່ໃຊ້ຊີວິດຕາມສິ່ງທີ່ເຫັນ.
11. ເມື່ອເລືອກຄົນທີ່ຈະແຕ່ງດອງນຳ ເຮົາຈະໃຊ້ຊີວິດຕາມຄວາມເຊື່ອຕໍ່ໆໄປໄດ້ແນວໃດ? (1 ໂກຣິນໂທ 7:39)
11 ພະເຢໂຫວາຕ້ອງພູມໃຈຫຼາຍແທ້ໆທີ່ພີ່ນ້ອງຊາຍຍິງເຮັດຕາມຄຳແນະນຳຂອງເພິ່ນຕອນເລືອກຄົນທີ່ຈະແຕ່ງດອງນຳ. ຕົວຢ່າງເຊັ່ນ: ເຂົາເຈົ້າເຮັດຕາມຄຳແນະນຳທີ່ໃຫ້ລໍຖ້າຈົນ “ກາຍໄວໜຸ່ມສາວ” ໄປກ່ອນ ແລ້ວຈຶ່ງຄິດເລື່ອງແຕ່ງດອງ. (1ກຣ. 7:36) ເມື່ອເລືອກຄົນທີ່ຈະແຕ່ງດອງນຳ ເຂົາເຈົ້າກໍຈະຄິດວ່າຜູ້ນັ້ນມີຄຸນລັກສະນະທີ່ດີທີ່ພະເຢໂຫວາບອກວ່າຜົວຫຼືເມຍຄວນຈະມີ. (ສພສ. 31:10-13, 26-28; ອຟຊ. 5:33; 1ຕມ. 5:8) ຖ້າມີຄົນທີ່ບໍ່ແມ່ນພະຍານພະເຢໂຫວາສົນໃຈເຂົາເຈົ້າ ເຂົາເຈົ້າກໍຈະເຮັດຕາມຄຳແນະນຳໃນ 1 ໂກຣິນໂທ 7:39 (ອ່ານ) ທີ່ບອກໃຫ້ແຕ່ງດອງກັບຄົນທີ່ “ເຊື່ອໃນຜູ້ເປັນນາຍ” ເທົ່ານັ້ນ. ເຂົາເຈົ້າໃຊ້ຊີວິດຕາມຄວາມເຊື່ອຕໍ່ໆໄປໂດຍໝັ້ນໃຈວ່າພະເຢໂຫວາສາມາດເບິ່ງແຍງເອົາໃຈໃສ່ອາລົມຄວາມຮູ້ສຶກຂອງເຂົາເຈົ້າໄດ້ດີທີ່ສຸດ.—ພສ. 55:22
12. ເຈົ້າຮຽນຫຍັງຈາກເລື່ອງຂອງພີ່ນ້ອງໂຣຊ້າ?
12 ໃຫ້ເຮົາມາເບິ່ງເລື່ອງຂອງພີ່ນ້ອງຍິງຊື່ໂຣຊ້າທີ່ເປັນໄພໂອເນຍຢູ່ປະເທດໂກລົມບີ. ວຽກຂອງລາວເຮັດໃຫ້ລາວຕ້ອງຕິດຕໍ່ພົວພັນກັບຜູ້ຊາຍຄົນໜຶ່ງເລື້ອຍໆທີ່ບໍ່ແມ່ນພະຍານພະເຢໂຫວາ. ຜູ້ຊາຍຄົນນີ້ເລີ່ມຈີບລາວ ແລະລາວກໍມັກຜູ້ຊາຍຄົນນີ້ຄືກັນ. ໂຣຊ້າເລົ່າວ່າ: “ລາວເບິ່ງເປັນຄົນດີຫຼາຍ. ມັກຊ່ວຍຄົນທີ່ຢູ່ແຖວບ້ານລາວ ບໍ່ກິນເຫຼົ້າ ບໍ່ສູບຢາ ເອົາໃຈໃສ່ເບິ່ງແຍງຂ້ອຍຢ່າງດີ. ສະຫຼຸບແລ້ວ ລາວເປັນຜູ້ຊາຍທີ່ຂ້ອຍຢາກແຕ່ງດອງນຳ ເສຍຢ່າງດຽວທີ່ລາວບໍ່ແມ່ນພະຍານ.” ໂຣຊ້າເລົ່າຕໍ່ວ່າ: “ມັນຍາກຫຼາຍທີ່ຈະປະຕິເສດລາວຍ້ອນຂ້ອຍກໍຢາກມີແຟນຄືກັນ. ຕອນນັ້ນ ຂ້ອຍຮູ້ສຶກເຫງົາຫຼາຍແລະຢາກແຕ່ງດອງ ແຕ່ກໍບໍ່ມີພີ່ນ້ອງຊາຍຄົນໃດທີ່ຖືກໃຈຂ້ອຍ.” ເຖິງຈະເປັນແນວນັ້ນ ໂຣຊ້າບໍ່ໄດ້ໃຊ້ຊີວິດຕາມສິ່ງທີ່ເຫັນເທົ່ານັ້ນ ແຕ່ລາວຄິດວ່າຖ້າລາວຕັດສິນໃຈເປັນແຟນກັບຜູ້ຊາຍຄົນນັ້ນມັນຈະມີຜົນແນວໃດຕໍ່ສາຍສຳພັນຂອງລາວກັບພະເຢໂຫວາ. ເມື່ອຄິດເຖິງເລື່ອງນີ້ລາວຈຶ່ງຕັດສິນໃຈວ່າຈະເຊົາຕິດຕໍ່ທຸກທາງກັບຜູ້ຊາຍຄົນນີ້ແລະຫຍຸ້ງຢູ່ກັບການຮັບໃຊ້ພະເຢໂຫວາ. ຫຼັງຈາກນັ້ນບໍ່ດົນ ລາວກໍຖືກເຊີນໃຫ້ເຂົ້າໂຮງຮຽນຜູ້ປະກາດລາຊະອານາຈັກ ແລະຕອນນີ້ລາວຮັບໃຊ້ເປັນໄພໂອເນຍພິເສດ. ໂຣຊ້າເວົ້າວ່າ: “ພະເຢໂຫວາເຮັດໃຫ້ຂ້ອຍມີຄວາມສຸກຫຼາຍທີ່ສຸດ.” ເຖິງວ່າບໍ່ງ່າຍທີ່ຈະໃຊ້ຊີວິດຕາມຄວາມເຊື່ອໂດຍສະເພາະໃນເລື່ອງຂອງຫົວໃຈ ແຕ່ມັນກໍຄຸ້ມຄ່າແນ່ນອນ.
ເມື່ອໄດ້ຮັບຄຳແນະນຳຈາກອົງການ
13. ເມື່ອໄດ້ຮັບຄຳແນະນຳຈາກອົງການ ເຮົາອາດຈະໃຊ້ຊີວິດຕາມສິ່ງທີ່ເຫັນແນວໃດ?
13 ເຮົາໄດ້ຮັບຄຳແນະນຳເລື້ອຍໆກ່ຽວກັບການນະມັດສະການໂດຍຜ່ານທາງອົງການ ຜູ້ເບິ່ງແຍງໃນປະຊາຄົມ ຜູ້ເບິ່ງແຍງໝວດ ສຳນັກງານສາຂາ ຫຼືຄະນະກຳມະການປົກຄອງ ແຕ່ບາງເທື່ອເຮົາອາດບໍ່ເຂົ້າໃຈເຫດຜົນວ່າເປັນຫຍັງຈຶ່ງມີຄຳແນະນຳແບບນັ້ນ. ເຮົາອາດຈະຄິດວ່າຖ້າເຮົາເຮັດຕາມຄຳແນະນຳນັ້ນມັນຈະອອກມາດີບໍ ແລະເຮົາອາດເລີ່ມເບິ່ງແຕ່ຄວາມບໍ່ສົມບູນແບບຂອງພີ່ນ້ອງທີ່ໃຫ້ຄຳແນະນຳນັ້ນ. ແຕ່ການເຮັດແບບນີ້ເປັນການໃຊ້ຊີວິດຕາມສິ່ງທີ່ເຫັນ.
14. ເມື່ອໄດ້ຮັບຄຳແນະນຳຈາກອົງການ ເຮົາຈະໃຊ້ຊີວິດຕາມຄວາມເຊື່ອໄດ້ແນວໃດ? (ເຮັບເຣີ 13:17)
14 ເມື່ອເຮົາໃຊ້ຊີວິດຕາມຄວາມເຊື່ອ ເຮົາກໍຈະໝັ້ນໃຈວ່າທຸກຢ່າງຢູ່ພາຍໃຕ້ການຄວບຄຸມຂອງພະເຢໂຫວາ ແລະເຮົາໝັ້ນໃຈວ່າເພິ່ນຮູ້ວ່າອັນໃດດີທີ່ສຸດສຳລັບເຮົາ. ເມື່ອເປັນແບບນັ້ນ ເຮົາກໍພ້ອມທີ່ຈະເຊື່ອຟັງແລະຄິດໃນແງ່ບວກສະເໝີ. (ອ່ານເຮັບເຣີ 13:17) ເຮົາຮູ້ວ່າເມື່ອເຮົາເຮັດຕາມຄຳແນະນຳຈະເຮັດໃຫ້ປະຊາຄົມເປັນນ້ຳໜຶ່ງໃຈດຽວກັນ. (ອຟຊ. 4:2, 3) ເຖິງວ່າພີ່ນ້ອງທີ່ນຳໜ້າເປັນຄົນບໍ່ສົມບູນແບບ ແຕ່ເຮົາກໍໝັ້ນໃຈວ່າຖ້າເຮົາເຊື່ອຟັງ ພະເຢໂຫວາຈະອວຍພອນເຮົາ. (1ຊມ. 15:22) ເຮົາຍັງໝັ້ນໃຈນຳວ່າຖ້າຕ້ອງມີການປັບປ່ຽນຄຳແນະນຳບາງຢ່າງ ເມື່ອຮອດເວລາພະເຢໂຫວາກໍຈະຈັດການເລື່ອງນັ້ນແນ່ນອນ.—ມກ. 7:7
15-16. ອັນໃດຊ່ວຍພີ່ນ້ອງຊາຍຄົນໜຶ່ງໃຫ້ໃຊ້ຊີວິດຕາມຄວາມເຊື່ອ ເຖິງວ່າຕອນທຳອິດລາວສົງໄສໃນຄຳແນະນຳຂອງອົງການ? (ເບິ່ງຮູບນຳ)
15 ໃຫ້ເຮົາມາເບິ່ງປະສົບການທີ່ເນັ້ນເຖິງປະໂຫຍດຂອງການໃຊ້ຊີວິດຕາມຄວາມເຊື່ອ. ຢູ່ປະເທດເປຣູພາສາຫຼັກທີ່ຄົນໃຊ້ແມ່ນພາສາສະເປນ ແຕ່ກໍມີຫຼາຍຄົນທີ່ເວົ້າພາສາທ້ອງຖິ່ນນຳເຊິ່ງໜຶ່ງໃນນັ້ນແມ່ນພາສາເກຊົວ. ເປັນເວລາຫຼາຍປີທີ່ພີ່ນ້ອງພະຍາຍາມຊອກຫາຄົນທີ່ເວົ້າພາສາເກຊົວໃນເຂດປະກາດ. ແຕ່ເພື່ອໃຫ້ເປັນຕາມຂໍ້ກຳນົດຂອງລັດຖະບານ ອົງການຂອງເຮົາຈຶ່ງໃຫ້ຄຳແນະນຳໃໝ່ເລື່ອງວິທີຊອກຫາຄົນທີ່ເວົ້າພາສານີ້. (ຣມ. 13:1) ດັ່ງນັ້ນ ພີ່ນ້ອງບາງຄົນຈຶ່ງຄິດວ່າວິທີໃໝ່ນີ້ຊິໄດ້ຜົນແທ້ໆບໍ? ຍ້ອນເຂົາເຈົ້າເຮັດຕາມການປັບປ່ຽນ ພະເຢໂຫວາກໍອວຍພອນເຂົາເຈົ້າໃຫ້ເຈິກັບຫຼາຍຄົນທີ່ເວົ້າພາສາເກຊົວ.
16 ເຄວິ້ນທີ່ເປັນຜູ້ເບິ່ງແຍງໃນປະຊາຄົມທີ່ໃຊ້ພາສາເກຊົວກໍເປັນຄົນໜຶ່ງທີ່ສົງໄສວ່າການປັບປ່ຽນຈະເກີດຜົນດີບໍ່? ລາວເລົ່າວ່າ: “ເມື່ອໄດ້ຍິນຄຳແນະນຳ ຂ້ອຍກໍຄິດວ່າ ‘ເຮົາຈະເຈິຄົນທີ່ເວົ້າພາສາເກຊົວໄດ້ແນວໃດ?’” ແຕ່ເຄວິ້ນປັບປ່ຽນຄວາມຄິດຂອງໂຕເອງແນວໃດ? ລາວເລົ່າວ່າ: “ຂ້ອຍຄິດເຖິງສຸພາສິດ 3:5 ແລະກໍຄິດເຖິງຕົວຢ່າງຂອງໂມເຊ. ຕອນນັ້ນ ໂມເຊຕ້ອງພາຊາດອິດສະຣາເອນອອກຈາກເອຢິບ. ແຕ່ເບິ່ງຄືວ່າລາວຈະພາເຂົາເຈົ້າໄປທາງທີ່ຕັນແລະເຮັດໃຫ້ເຂົາເຈົ້າຕົກເປັນເປົ້າຂອງການໂຈມຕີຈາກຄົນເອຢິບ. ແຕ່ເຖິງຈະເປັນແນວນັ້ນໂມເຊກໍຍັງເຊື່ອຟັງ ແລະພະເຢໂຫວາກໍອວຍພອນລາວໂດຍເຮັດການອັດສະຈັນໃນແບບທີ່ເປັນຕາງຶດຫຼາຍເພື່ອຊ່ວຍເຂົາເຈົ້າ.” (ອພຍ. 14:1, 2, 9-11, 21, 22) ເຄວິ້ນພ້ອມທີ່ຈະປັບປ່ຽນຕາມຄຳແນະນຳ. ຜົນເປັນແນວໃດ? ລາວເວົ້າວ່າ: “ຂ້ອຍຮູ້ສຶກປະທັບໃຈຫຼາຍໃນວິທີທີ່ພະເຢໂຫວາອວຍພອນເຮົາ. ກ່ອນໜ້ານີ້ເຮົາຕ້ອງຍ່າງບັກຫຼາຍໆໃນເຂດປະກາດ ແລະບາງເທື່ອກໍເຈິຄົນທີ່ເວົ້າພາສາເກຊົວພຽງແຕ່ 1 ຫຼື 2 ຄົນເທົ່ານັ້ນ ແຕ່ຕອນນີ້ເຮົາເນັ້ນປະກາດໃນເຂດທີ່ຈະໄດ້ເຈິຄົນທີ່ເວົ້າພາສາເກຊົວຫຼາຍກວ່າ. ຜົນກໍຄື ເຮົາໄດ້ລົມກັບຫຼາຍຄົນ ມີຄົນທີ່ກັບໄປຢາມໄດ້ ແລະນັກສຶກສາກໍເພີ່ມຂຶ້ນ. ຈຳນວນຄົນທີ່ເຂົ້າຮ່ວມປະຊຸມກັບເຮົາກໍຫຼາຍຂຶ້ນຄືກັນ.” ສະນັ້ນ ເຫັນໄດ້ແຈ້ງວ່າເມື່ອເຮົາໃຊ້ຊີວິດຕາມຄວາມເຊື່ອ ເຮົາຈະໄດ້ຮັບລາງວັນຈາກພະເຢໂຫວາແນ່ນອນ.
ມີຫຼາຍຄົນບອກພີ່ນ້ອງວ່າຈະເຈິຄົນທີ່ເວົ້າພາສາເກຊົວໄດ້ຢູ່ໃສ (ເບິ່ງຂໍ້ 15-16)
17. ເຈົ້າໄດ້ຮຽນຫຍັງໃນບົດນີ້?
17 ໃນບົດນີ້ເຮົາໄດ້ຮຽນແລ້ວວ່າເຮົາຈະໃຊ້ຊີວິດຕາມຄວາມເຊື່ອແນວໃດໃນ 3 ເລື່ອງທີ່ສຳຄັນ. ເຖິງຈະເປັນແນວນັ້ນ ເຮົາກໍຕ້ອງໃຊ້ຊີວິດຕາມຄວາມເຊື່ອຕໍ່ໆໄປໃນທຸກແງ່ມຸມຂອງຊີວິດ ເຊັ່ນ: ຕອນທີ່ເຮົາເລືອກຄວາມບັນເທີງ ຕອນທີ່ຕັດສິນໃຈວ່າຈະຮຽນສູງສ່ຳໃດ ຫຼືຈະລ້ຽງລູກແນວໃດ. ບໍ່ວ່າເຮົາຈະຕ້ອງຕັດສິນໃຈໃນເລື່ອງຫຍັງ ເຮົາບໍ່ຄວນຕັດສິນໃຈໂດຍອາໄສສິ່ງທີ່ເຮົາເຫັນເທົ່ານັ້ນ ແຕ່ເຮົາຕ້ອງຄິດເຖິງສາຍສຳພັນຂອງເຮົາກັບພະເຢໂຫວາ ຄິດເຖິງຄຳແນະນຳຂອງເພິ່ນ ແລະຄຳສັນຍາຂອງເພິ່ນທີ່ບອກວ່າຈະເບິ່ງແຍງເຮົາສະເໝີ. ຖ້າເຮົາເຮັດແບບນັ້ນ ເຮົາກໍຈະ “ເຊື່ອຟັງພະເຢໂຫວາພະເຈົ້າຂອງເຮົາຕະຫຼອດໄປ.”—ມກ. 4:5.
ເພງທີ 156 ເພາະມີຄວາມເຊື່ອ
a ຊື່ສົມມຸດ.
b ເຖິງວ່າຂໍ້ນີ້ເວົ້າເຖິງພີ່ນ້ອງຍິງທີ່ກຳລັງຊອກຫາພີ່ນ້ອງຊາຍທີ່ຈະແຕ່ງດອງນຳ ແຕ່ຄຳແນະນຳນີ້ກໍໃຊ້ໄດ້ກັບພີ່ນ້ອງຊາຍທີ່ກຳລັງຊອກຫາພີ່ນ້ອງຍິງທີ່ຈະແຕ່ງດອງນຳຄືກັນ.