ບົດຄວາມສຶກສາທີ 35
ເພງທີ 121 ເຮົາຕ້ອງຄວບຄຸມຕົວເອງ
ເຈົ້າສາມາດຕໍ່ສູ້ກັບຄວາມຕ້ອງການທີ່ຜິດໆໄດ້
“ຢ່າໃຫ້ບາບມີອຳນາດຄວບຄຸມຊີວິດຂອງພວກເຈົ້າ ແລະຢ່າເຮັດຕາມຄວາມຕ້ອງການຂອງຮ່າງກາຍທີ່ຕາຍໄດ້ຂອງພວກເຈົ້າ.”—ຣມ. 6:12
ຈຸດສຳຄັນ
ເພື່ອຊ່ວຍເຮົາບໍ່ໃຫ້ທໍ້ໃຈເມື່ອມີຄວາມຕ້ອງການທີ່ຜິດໆແລະເພື່ອຊ່ວຍເຮົາໃຫ້ຮູ້ວິທີຕ້ານທານການລໍ້ໃຈ.
1. ເຮົາທຸກຄົນຕ້ອງຕໍ່ສູ້ກັບຫຍັງ?
ເຈົ້າເຄີຍຢາກເຮັດຫຍັງບາງຢ່າງເອົາແທ້ເອົາວ່າບໍທັງໆທີ່ຮູ້ວ່າພະເຢໂຫວາບໍ່ມັກສິ່ງນັ້ນ? ຖ້າແມ່ນກໍຢ່າຟ້າວຄິດວ່າເຈົ້າກຳລັງເຈິການທົດສອບທີ່ໜັກກວ່າຄົນອື່ນ. ຄຳພີໄບເບິນບອກວ່າ: “ການລໍ້ໃຈອັນໃດກໍຕາມທີ່ເກີດຂຶ້ນກັບເຈົ້າກໍເຄີຍເກີດຂຶ້ນກັບຄົນອື່ນມາແລ້ວ.” (1ກຣ. 10:13) ນີ້ໝາຍຄວາມວ່າບໍ່ວ່າເຈົ້າກຳລັງຕໍ່ສູ້ກັບຄວາມຕ້ອງການທີ່ຜິດໆແບບໃດກໍຕາມ ຄົນອື່ນກໍກຳລັງຕໍ່ສູ້ຄືກັນ. ເຈົ້າບໍ່ໄດ້ຕໍ່ສູ້ຄົນດຽວ ພະເຢໂຫວາຈະຊ່ວຍເຈົ້າ ແລະເຈົ້າຈະເອົາຊະນະມັນໄດ້.
2. ການລໍ້ໃຈແບບໃດແດ່ທີ່ພີ່ນ້ອງແລະນັກສຶກສາຄຳພີໄບເບິນບາງຄົນກຳລັງຕໍ່ສູ້ຢູ່? (ເບິ່ງຮູບນຳ)
2 ຄຳພີໄບເບິນຍັງບອກວ່າ: “ທຸກຄົນຖືກທົດສອບເມື່ອຄວາມຕ້ອງການຂອງໂຕເອງຊັກຈູງແລະລໍ້ລວງລາວ.” (ຢກບ. 1:14) ຂໍ້ຄຳພີນີ້ຊ່ວຍເຮົາໃຫ້ເຂົ້າໃຈວ່າແຕ່ລະຄົນອາດເຈິການລໍ້ໃຈໃນແບບທີ່ແຕກຕ່າງກັນ. ຕົວຢ່າງເຊັ່ນ: ພີ່ນ້ອງບາງຄົນອາດຖືກລໍ້ໃຈໃຫ້ເຮັດຜິດສິນລະທຳທາງເພດກັບເພດກົງກັນຂ້າມ. ສ່ວນບາງຄົນອາດຖືກລໍ້ໃຈໃຫ້ເຮັດຜິດສິນລະທຳທາງເພດກັບເພດດຽວກັນ. ຄົນທີ່ເຊົາເບິ່ງສື່ລາມົກອາດມີຄວາມຕ້ອງການຢາກກັບໄປເບິ່ງອີກ. ຄົນທີ່ເຄີຍໃຊ້ຢາເສບຕິດຫຼືຕິດເຫຼົ້າອາດຖືກລໍ້ໃຈໃຫ້ກັບໄປເຮັດແບບເກົ່າອີກ. ຄວາມຕ້ອງການເຫຼົ່ານີ້ເປັນສິ່ງທີ່ພີ່ນ້ອງແລະນັກສຶກສາຄຳພີໄບເບິນບາງຄົນກຳລັງຕໍ່ສູ້ຢູ່. ບາງເທື່ອພວກເຮົາທຸກຄົນອາດຮູ້ສຶກຄືກັບໂປໂລ. ລາວຂຽນວ່າ: “ເມື່ອຂ້ອຍຢາກເຮັດແນວທີ່ຖືກຕ້ອງ ຂ້ອຍພັດຢາກເຮັດແນວທີ່ຊົ່ວນຳ.”—ຣມ. 7:21
ເຮົາອາດຈະຖືກລໍ້ໃຈໄດ້ທຸກບ່ອນແລະທຸກເວລາ (ເບິ່ງຂໍ້ 2)c
3. ເຈົ້າອາດຮູ້ສຶກແນວໃດຖ້າຕ້ອງຕໍ່ສູ້ກັບຄວາມຕ້ອງການທີ່ຜິດໆແບບເກົ່າຢູ່ເລື້ອຍໆ?
3 ຖ້າເຈົ້າກຳລັງຕໍ່ສູ້ກັບຄວາມຕ້ອງການທີ່ຜິດໆແບບເກົ່າຢູ່ເລື້ອຍໆ ເຈົ້າອາດຮູ້ສຶກບໍ່ມີກຳລັງທີ່ຈະຕ້ານທານການລໍ້ໃຈໄດ້. ນອກຈາກນັ້ນ ເຈົ້າອາດຮູ້ສຶກບໍ່ມີຫວັງທີ່ພະເຢໂຫວາຈະໃຫ້ເຂົ້າໄປຢູ່ໃນໂລກໃໝ່ຍ້ອນເຈົ້າມີຄວາມຕ້ອງການທີ່ຜິດໆ. ແຕ່ສິ່ງທີ່ເຈົ້າຮູ້ສຶກນັ້ນບໍ່ແມ່ນຄວາມຈິງ. ຍ້ອນຫຍັງ? ເພື່ອຈະເຂົ້າໃຈເຫດຜົນ ໃນບົດນີ້ຈະຕອບຄຳຖາມ 2 ຂໍ້ຕໍ່ໄປນີ້: (1) ໃຜຢາກໃຫ້ເຈົ້າຮູ້ສຶກບໍ່ມີກຳລັງແລະບໍ່ມີຫວັງ? (2) ເຈົ້າຈະຕໍ່ສູ້ກັບຄວາມຕ້ອງການທີ່ຜິດໆໄດ້ແນວໃດ?
“ຊາຕານ” ຢາກໃຫ້ເຮົາຮູ້ສຶກແນວໃດ?
4. (ກ) ຊາຕານຢາກໃຫ້ເຮົາເຮັດຫຍັງເມື່ອຖືກລໍ້ໃຈ? (ຂ) ເປັນຫຍັງເຮົາໝັ້ນໃຈໄດ້ວ່າເຮົາສາມາດຕ້ານທານການລໍ້ໃຈໄດ້?
4 ຊາຕານຢາກໃຫ້ເຮົາຮູ້ສຶກວ່າເຮົາບໍ່ມີກຳລັງທີ່ຈະຕ້ານທານການລໍ້ໃຈໄດ້. ພະເຢຊູກໍຮູ້ເລື່ອງນີ້ ເພິ່ນຈຶ່ງສອນພວກລູກສິດໃຫ້ອະທິດຖານວ່າ: “ຂໍພະອົງຊ່ວຍພວກເຮົາບໍ່ໃຫ້ຍອມແພ້ຕໍ່ການລໍ້ໃຈ ແລະຂໍພະອົງປົກປ້ອງພວກເຮົາຈາກຊາຕານ.” (ມທ. 6:13) ຊາຕານເວົ້າວ່າມະນຸດຈະບໍ່ເຊື່ອຟັງພະເຢໂຫວາເມື່ອເຈິການລໍ້ໃຈ. (ໂຢບ 2:4, 5) ເປັນຫຍັງຊາຕານຈຶ່ງຄິດແບບນັ້ນ? ຍ້ອນຊາຕານເປັນຜູ້ທຳອິດທີ່ຖືກລໍ້ໃຈໃຫ້ເຮັດຕາມຄວາມຕ້ອງການຂອງໂຕເອງແລະມັນຕັ້ງໃຈທີ່ຈະບໍ່ສັດຊື່ຕໍ່ພະເຢໂຫວາ. ມັນເຊື່ອວ່າເຮົາຈະເປັນຄືກັບມັນ ນັ້ນຄືເຮົາຈະປະຖິ້ມພະເຢໂຫວາທັນທີເມື່ອຖືກລໍ້ໃຈ. ຊາຕານເຖິງຂັ້ນຄິດວ່າມັນສາມາດລໍ້ລວງພະເຢຊູທີ່ເປັນມະນຸດສົມບູນແບບໃຫ້ເຮັດຜິດໄດ້. (ມທ. 4:8, 9) ແຕ່ເຮົາບໍ່ມີກຳລັງແທ້ໆບໍທີ່ຈະຕໍ່ສູ້ກັບຄວາມຕ້ອງການທີ່ຜິດໆ? ບໍ່ແມ່ນແບບນັ້ນ. ເຮົາເຫັນດີກັບຄຳເວົ້າຂອງໂປໂລທີ່ວ່າ: “ຂ້ອຍມີກຳລັງອົດທົນໄດ້ທຸກສິ່ງຍ້ອນພະເຈົ້າໃຫ້ກຳລັງຂ້ອຍ.”—ຟລປ. 4:13
5. ເຮົາຮູ້ໄດ້ແນວໃດວ່າພະເຢໂຫວາໝັ້ນໃຈວ່າເຮົາສາມາດຕ້ານທານຄວາມຕ້ອງການທີ່ຜິດໆໄດ້?
5 ພະເຢໂຫວາຄິດບໍ່ຄືກັບຊາຕານ ເພິ່ນໝັ້ນໃຈວ່າເຮົາສາມາດຕ້ານທານຄວາມຕ້ອງການທີ່ຜິດໆໄດ້. ເຮົາຮູ້ໄດ້ແນວໃດ? ຍ້ອນພະເຢໂຫວາບອກລ່ວງໜ້າວ່າຄົນກຸ່ມໃຫຍ່ຈະຮັກສາຄວາມສັດຊື່ຕໍ່ເພິ່ນແລະຈະລອດຜ່ານຄວາມທຸກລຳບາກຄັ້ງໃຫຍ່. ເລື່ອງນີ້ໝາຍຄວາມວ່າແນວໃດ? ພະເຢໂຫວາຜູ້ທີ່ເວົ້າຕົວະບໍ່ໄດ້ເວົ້າວ່າຄົນຈຳນວນຫຼາຍຈະເຂົ້າໄປໃນໂລກໃໝ່. ຄົນເຫຼົ່ານີ້ “ໄດ້ຊັກເສື້ອຄຸມຂອງໂຕເອງແລະເຮັດໃຫ້ຂາວດ້ວຍເລືອດຂອງແກະນ້ອຍຂອງພະເຈົ້າ” ເຊິ່ງໝາຍຄວາມວ່າພະເຢໂຫວາເບິ່ງວ່າຄົນເຫຼົ່ານີ້ສະອາດໃນສາຍຕາຂອງເພິ່ນ. (ພນມ. 7:9, 13, 14) ເຫັນໄດ້ແຈ້ງວ່າພະເຢໂຫວາຮູ້ວ່າເຮົາສາມາດຕໍ່ສູ້ກັບຄວາມຕ້ອງການທີ່ຜິດໆໄດ້.
6-7. ຊາຕານຢາກໃຫ້ເຮົາຮູ້ສຶກແນວໃດອີກ?
6 ຊາຕານບໍ່ພຽງແຕ່ຢາກໃຫ້ເຮົາຮູ້ສຶກວ່າບໍ່ມີກຳລັງທີ່ຈະຕໍ່ສູ້ກັບຄວາມຕ້ອງການທີ່ຜິດໆເທົ່ານັ້ນ ແຕ່ມັນຍັງຢາກໃຫ້ເຮົາຮູ້ສຶກວ່າບໍ່ມີຫວັງນຳ. ມັນຢາກໃຫ້ເຮົາຄິດວ່າພະເຢໂຫວາຈະບໍ່ໃຫ້ເຮົາເຂົ້າໄປຢູ່ໃນໂລກໃໝ່ຍ້ອນເຮົາມີຄວາມຕ້ອງການທີ່ຜິດໆ. ເປັນຫຍັງຊາຕານຈຶ່ງຢາກໃຫ້ເຮົາຮູ້ສຶກແບບນັ້ນ? ຍ້ອນມັນບໍ່ມີຄວາມຫວັງແລະມັນຖືກພະເຢໂຫວາຕັດສິນແລ້ວວ່າບໍ່ສົມຄວນທີ່ຈະມີຊີວິດຕະຫຼອດໄປ. (ປຖກ. 3:15; ພນມ. 20:10) ຊາຕານໃຈຮ້າຍຫຼາຍທີ່ເຮົາມີຄວາມຫວັງທີ່ຈະມີຊີວິດຕະຫຼອດໄປ. ມັນຈຶ່ງພະຍາຍາມຫຼາຍແທ້ໆທີ່ຈະເຮັດໃຫ້ເຮົາຄິດຄືກັບມັນແລະບໍ່ມີຄວາມຫວັງສຳລັບອະນາຄົດ ແຕ່ເຮົາບໍ່ຄືກັບມັນ. ຄຳພີໄບເບິນຮັບຮອງກັບເຮົາວ່າພະເຢໂຫວາຢາກຊ່ວຍເຮົາໃຫ້ມີຊີວິດຕະຫຼອດໄປ. ເພິ່ນ “ບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.”—2ປຕ. 3:9
7 ຖ້າເຮົາເຊື່ອວ່າເຮົາບໍ່ມີກຳລັງແລະບໍ່ມີຫວັງທີ່ຈະຕໍ່ສູ້ກັບຄວາມຕ້ອງການທີ່ຜິດໆ ເຮົາກໍກຳລັງຄິດໃນແບບທີ່ຊາຕານຢາກໃຫ້ເຮົາຄິດ. ການຮູ້ເລື່ອງນີ້ຊ່ວຍເຮົາໃຫ້ຕັ້ງໃຈທີ່ຈະຢືນຢັດຕໍ່ສູ້ກັບມັນ.—1ປຕ. 5:8, 9
ຄວາມບໍ່ສົມບູນແບບອາດເຮັດໃຫ້ເຮົາຮູ້ສຶກແນວໃດ?
8. ນອກຈາກຊາຕານແລ້ວຍັງມີສິ່ງໃດອີກທີ່ເຮັດໃຫ້ເຮົາຮູ້ສຶກວ່າບໍ່ມີກຳລັງແລະບໍ່ມີຫວັງທີ່ຈະຕໍ່ສູ້ກັບຄວາມຕ້ອງການທີ່ຜິດໆໄດ້? (ເພງສັນລະເສີນ 51:5) (ເບິ່ງ “ການອະທິບາຍຄຳສັບ” ນຳ)
8 ນອກຈາກຊາຕານແລ້ວຍັງມີສິ່ງອື່ນອີກທີ່ເຮັດໃຫ້ເຮົາຮູ້ສຶກວ່າບໍ່ມີກຳລັງແລະບໍ່ມີຫວັງທີ່ຈະຕໍ່ສູ້ກັບຄວາມຕ້ອງການທີ່ຜິດໆໄດ້. ສິ່ງນັ້ນແມ່ນຫຍັງ? ສິ່ງນັ້ນກໍຄືບາບທີ່ເຮົາທຸກຄົນໄດ້ຮັບຈາກພໍ່ແມ່ຜູ້ທຳອິດຂອງເຮົາ.a—ໂຢບ 14:4; ອ່ານເພງສັນລະເສີນ 51:5
9-10. (ກ) ບາບມີຜົນຕໍ່ອາດາມກັບເອວາແນວໃດ? (ເບິ່ງຮູບນຳ) (ຂ) ບາບມີຜົນຕໍ່ເຮົາແນວໃດ?
9 ໃຫ້ເຮົາມາເບິ່ງວ່າບາບມີຜົນແນວໃດຕໍ່ອາດາມກັບເອວາ. ຫຼັງຈາກທີ່ບໍ່ເຊື່ອຟັງພະເຢໂຫວາ ອາດາມກັບເອວາກໍໄດ້ໄປລີ້ແລະພະຍາຍາມເອົາບາງຢ່າງປົກປິດຮ່າງກາຍຂອງໂຕເອງ. ປຶ້ມການເຂົ້າໃຈພະຄຳພີຢ່າງເລິກເຊິ່ງ (Insight on the Scriptures) ໄດ້ເວົ້າເຖິງເລື່ອງນີ້ວ່າ: “ບາບເຮັດໃຫ້ເຂົາເຈົ້າຮູ້ສຶກຜິດ ຢ້ານ ບໍ່ໝັ້ນຄົງ ແລະອາຍ.” ມັນເປັນຄືກັບວ່າອາດາມແລະເອວາຖືກຂັງຢູ່ໃນເຮືອນທີ່ມີແຕ່ 4 ຫ້ອງເທົ່ານັ້ນ. ເຂົາເຈົ້າສາມາດຍ້າຍຈາກຫ້ອງໜຶ່ງໄປອີກຫ້ອງໜຶ່ງໄດ້ ແຕ່ບໍ່ສາມາດອອກຈາກເຮືອນຫຼັງນັ້ນໄດ້. ເຂົາເຈົ້າບໍ່ສາມາດຫຼຸດພົ້ນອອກຈາກບາບໄດ້.
10 ເຮົາບໍ່ຄືກັບອາດາມແລະເອວາ ເຮົາມີຄ່າໄຖ່ທີ່ສາມາດຊ່ວຍເຮົາໃຫ້ໄດ້ຮັບການຍົກໂທດແລະຊ່ວຍເຮົາໃຫ້ໃກ້ຊິດກັບພະເຢໂຫວາ. (1ກຣ. 6:11) ເຖິງເຮົາຈະມີຄ່າໄຖ່ຊ່ວຍ ແຕ່ເຮົາກໍຍັງມີບາບຢູ່. ສະນັ້ນຈຶ່ງບໍ່ແປກທີ່ເຮົາຈະຮູ້ສຶກຜິດ ຢ້ານ ບໍ່ໝັ້ນຄົງ ແລະອາຍ. ທີ່ຈິງ ຄຳພີໄບເບິນບອກວ່າບາບຍັງຄວບຄຸມມະນຸດທຸກຄົນຢູ່ “ເຖິງວ່າເຂົາເຈົ້າບໍ່ໄດ້ເຮັດຜິດຄືອາດາມ.” (ຣມ. 5:14) ເຖິງວ່າຄວາມຈິງນີ້ຈະເຮັດໃຫ້ເຮົາທໍ້ໃຈ ແຕ່ເຮົາກໍບໍ່ຄວນໃຫ້ມັນມາເຮັດໃຫ້ເຮົາຮູ້ສຶກບໍ່ມີກຳລັງແລະບໍ່ມີຫວັງທີ່ຈະຕໍ່ສູ້ກັບຄວາມຕ້ອງການທີ່ຜິດໆ. ເຮົາສາມາດຕໍ່ສູ້ກັບຄວາມຮູ້ສຶກເຫຼົ່ານີ້ໄດ້. ເຮົາຈະເຮັດແບບນັ້ນໄດ້ແນວໃດ?
ຫຼັງຈາກທີ່ອາດາມກັບເອວາເຮັດບາບ ເຂົາເຈົ້າກໍຮູ້ສຶກຜິດ ຢ້ານ ບໍ່ໝັ້ນຄົງ ແລະອາຍ (ເບິ່ງຂໍ້ 9)
11. ຖ້າເຮົາຮູ້ສຶກວ່າບໍ່ມີກຳລັງທີ່ຈະຕໍ່ສູ້ກັບຄວາມຕ້ອງການທີ່ຜິດໆ ໂຣມ 6:12 ສອນຫຍັງເຮົາ?
11 ຍ້ອນເຮົາເປັນຄົນບາບ ບາງເທື່ອເຮົາອາດຮູ້ສຶກວ່າບໍ່ມີກຳລັງທີ່ຈະຕໍ່ສູ້ກັບຄວາມຕ້ອງການທີ່ຜິດໆໄດ້. ມັນເປັນຄືກັບວ່າມີສຽງທີ່ຢູ່ໃນໂຕເຮົາບອກເຮົາວ່າ ເຮົາບໍ່ມີທາງຕໍ່ສູ້ກັບຄວາມຕ້ອງການທີ່ຜິດໆໄດ້. ແຕ່ເຮົາຕ້ອງບໍ່ຟັງສຽງນັ້ນ. ຍ້ອນຫຍັງ? ຍ້ອນຄຳພີໄບເບິນສອນວ່າເຮົາບໍ່ຕ້ອງໃຫ້ບາບ “ມີອຳນາດຄວບຄຸມ” ຊີວິດເຮົາ. (ອ່ານໂຣມ 6:12) ນີ້ໝາຍຄວາມວ່າເຮົາສາມາດເລືອກທີ່ຈະບໍ່ເຮັດຕາມຄວາມຕ້ອງການທີ່ຜິດໆໄດ້. (ຄລຕ. 5:16) ພະເຢໂຫວາໝັ້ນໃຈວ່າເຮົາສາມາດຕ້ານທານການລໍ້ໃຈໄດ້ ຄັນບໍ່ຊັ້ນເພິ່ນກໍບໍ່ບອກໃຫ້ເຮົາເຮັດແບບນັ້ນ. (ພບຍ. 30:11-14; ຣມ. 6:6; 1ທຊ. 4:3) ເຫັນໄດ້ແຈ້ງວ່າ ເຮົາມີກຳລັງທີ່ຈະຕໍ່ສູ້ກັບຄວາມຕ້ອງການທີ່ຜິດໆໄດ້.
12. ເຮົາຄວນເຮັດແນວໃດຕອນທີ່ຮູ້ສຶກບໍ່ມີຫວັງ ແລະຍ້ອນຫຍັງ?
12 ຄ້າຍຄືກັນ ຕອນທີ່ເຮົາຮູ້ສຶກບໍ່ມີຫວັງ ມັນເປັນຄືກັບວ່າມີສຽງທີ່ຢູ່ໃນໂຕເຮົາບອກເຮົາວ່າພະເຢໂຫວາຈະບໍ່ໃຫ້ເຮົາເຂົ້າໄປໃນໂລກໃໝ່ຍ້ອນເຮົາມີຄວາມຕ້ອງການທີ່ຜິດໆ. ແຕ່ເຮົາຕ້ອງບໍ່ຟັງສຽງນັ້ນ. ຍ້ອນຫຍັງ? ຍ້ອນຄຳພີໄບເບິນສອນວ່າພະເຢໂຫວາເຂົ້າໃຈວ່າເຮົາເປັນຄົນບາບ. (ພສ. 103:13, 14) ເພິ່ນ “ຮູ້ທຸກສິ່ງ” ກ່ຽວກັບເຮົາລວມທັງຮູ້ວ່າບາບທີ່ເຮົາໄດ້ຮັບມາເຮັດໃຫ້ເຮົາມີແນວໂນ້ມທີ່ຈະເຮັດຜິດ. (1ຢຮ. 3:19, 20) ຖ້າເຮົາຕໍ່ສູ້ກັບຄວາມຕ້ອງການທີ່ຢາກຈະເຮັດຜິດແລະບໍ່ເຮັດຕາມຄວາມຕ້ອງການນັ້ນ ພະເຢໂຫວາກໍຈະເບິ່ງວ່າເຮົາເປັນຄົນສະອາດ. ເປັນຫຍັງເຮົາຈຶ່ງໝັ້ນໃຈແບບນັ້ນ?
13-14. ພຽງແຕ່ມີຄວາມຕ້ອງການທີ່ຜິດໆກໍເຮັດໃຫ້ພະເຢໂຫວາບໍ່ພໍໃຈແລ້ວບໍ? ຂໍໃຫ້ອະທິບາຍ.
13 ຄຳພີໄບເບິນເຮັດໃຫ້ເຮົາເຫັນຄວາມແຕກຕ່າງລະຫວ່າງການມີຄວາມຕ້ອງທີ່ຜິດໆກັບການລົງມືເຮັດຕາມຄວາມຕ້ອງການນັ້ນ. ບາງທີຄວາມຕ້ອງການທີ່ຜິດໆອາດເກີດຂຶ້ນໄດ້ໂດຍທີ່ເຮົາບໍ່ຕັ້ງໃຈ ແຕ່ເຮົາສາມາດຄວບຄຸມໂຕເອງບໍ່ໃຫ້ລົງມືເຮັດຜິດໄດ້. ຕົວຢ່າງເຊັ່ນ: ຄລິດສະຕຽນບາງຄົນໃນສະຕະວັດທຳອິດທີ່ຢູ່ເມືອງໂກຣິນໂທເຄີຍເປັນຄົນຮັກເພດດຽວກັນ. ໂປໂລຂຽນວ່າ: “ພວກເຈົ້າບາງຄົນເຄີຍເປັນແບບນັ້ນ.” ນີ້ໝາຍຄວາມວ່າເຂົາເຈົ້າຈະບໍ່ມີຄວາມຮູ້ສຶກຮັກເພດດຽວກັນອີກເລີຍບໍ? ຄືຊິເປັນໄປບໍ່ໄດ້ທີ່ຈະບໍ່ມີເລີຍ. ຍ້ອນວ່າບາງເທື່ອຄວາມຮູ້ສຶກແບບນີ້ມັນຝັງຮາກເລິກແລະຍາກຫຼາຍທີ່ຈະກຳຈັດໃຫ້ໝົດໄປ. ແຕ່ພີ່ນ້ອງຢູ່ເມືອງໂກຣິນໂທທີ່ຝຶກການຄວບຄຸມໂຕເອງແລະບໍ່ລົງມືເຮັດຕາມຄວາມຕ້ອງການທີ່ຜິດໆກໍເຮັດໃຫ້ພະເຢໂຫວາພໍໃຈ. ເພິ່ນເບິ່ງວ່າເຂົາເຈົ້າເປັນຄົນ “ສະອາດແລ້ວ.” (1ກຣ. 6:9-11) ໃນທຸກມື້ນີ້ກໍເປັນແບບນັ້ນຄືກັນ.
14 ບໍ່ວ່າເຈົ້າກຳລັງຕໍ່ສູ້ກັບຄວາມຕ້ອງການທີ່ຜິດໆແບບໃດ ເຈົ້າສາມາດເອົາຊະນະມັນໄດ້. ເຖິງວ່າເຈົ້າບໍ່ສາມາດກຳຈັດຄວາມຕ້ອງການທີ່ຜິດໆໄດ້ ແຕ່ເຈົ້າສາມາດຄວບຄຸມແລະຫຼີກລ່ຽງທີ່ຈະບໍ່ເຮັດ “ສິ່ງທີ່ຮ່າງກາຍແລະຈິດໃຈຕ້ອງການ.” (ອຟຊ. 2:3) ຄັນຊັ້ນ ເຈົ້າຕ້ອງເຮັດຫຍັງເພື່ອຈະຕໍ່ສູ້ກັບຄວາມຕ້ອງການທີ່ຜິດໆແລະເອົາຊະນະມັນໄດ້?
ເຈົ້າຕ້ອງເຮັດຫຍັງເພື່ອຈະເອົາຊະນະຄວາມຕ້ອງການທີ່ຜິດໆ?
15. ຖ້າເຮົາຢາກເອົາຊະນະຄວາມຕ້ອງການທີ່ຜິດໆ ເປັນຫຍັງເຮົາຕ້ອງສັດຊື່ຕໍ່ໂຕເອງ?
15 ເພື່ອຈະເອົາຊະນະຄວາມຕ້ອງການທີ່ຜິດໆໄດ້ ເຈົ້າຕ້ອງສັດຊື່ຕໍ່ໂຕເອງແລະຍອມຮັບວ່າໂຕເອງມີຈຸດອ່ອນ. ຢ່າຕົວະໂຕເອງໂດຍ “ຄິດຫາເຫດຜົນແບບຜິດໆ.” (ຢກບ. 1:22) ຢ່າເຮັດຄືກັບວ່າຈຸດອ່ອນຂອງເຈົ້າບໍ່ແມ່ນເລື່ອງໃຫຍ່. ຕົວຢ່າງເຊັ່ນ: ບາງຄົນທີ່ມີບັນຫາກ່ຽວກັບການກິນເຫຼົ້າອາດເວົ້າວ່າ: ‘ຄົນອື່ນແຮ່ງກິນຫຼາຍກວ່າຂ້ອຍ.’ ຫຼືບາງຄົນທີ່ມີບັນຫາເລື່ອງການເບິ່ງສື່ລາມົກອາດຈະໂທດຄົນອື່ນໂດຍເວົ້າວ່າ: ‘ຂ້ອຍຈະບໍ່ເບິ່ງສື່ລາມົກ ຖ້າເມຍສະແດງຄວາມຮັກຕໍ່ຂ້ອຍຫຼາຍກວ່ານີ້.’ ຖ້າເຈົ້າເລີ່ມຫາເຫດຜົນຄ້າຍໆກັນນີ້ ເຈົ້າຈະຖືກລໍ້ໃຈໃຫ້ເຮັດຜິດໄດ້ງ່າຍ. ສະນັ້ນ ຢ່າຫາຂໍ້ອ້າງທີ່ຈະເຮັດຜິດ. ເຈົ້າຕ້ອງຮັບຜິດຊອບໃນສິ່ງທີ່ເຈົ້າເຮັດ.—ຄລຕ. 6:7
16. ເຈົ້າຈະມີຄວາມຕັ້ງໃຈຫຼາຍຂຶ້ນໄດ້ແນວໃດເພື່ອຈະເຮັດສິ່ງທີ່ຖືກຕ້ອງ?
16 ນອກຈາກສັດຊື່ຕໍ່ໂຕເອງແລະຍອມຮັບວ່າໂຕເອງມີຈຸດອ່ອນແລ້ວ ເຈົ້າຕ້ອງມີຄວາມຕັ້ງໃຈຫຼາຍຂຶ້ນທີ່ຈະບໍ່ຍອມແພ້ຕໍ່ຈຸດອ່ອນເຫຼົ່ານັ້ນ. (1ກຣ. 9:26, 27; 1ທຊ. 4:4; 1ປຕ. 1:15, 16) ໃຫ້ຄິດເບິ່ງວ່າຈຸດອ່ອນຂອງເຈົ້າແມ່ນຫຍັງ ແລະເວລາໃດທີ່ເຈົ້າຕ້ານທານການລໍ້ໃຈໄດ້ຍາກທີ່ສຸດ. ຕົວຢ່າງເຊັ່ນ: ເຈົ້າຮູ້ສຶກວ່າຕ້ານທານການລໍ້ໃຈໄດ້ຍາກກວ່າບໍຖ້າເປັນຕອນເດິກຫຼືຕອນທີ່ເຈົ້າຮູ້ສຶກເມື່ອຍ? ໃຫ້ເຈົ້າກຽມໂຕໃຫ້ພ້ອມແລະຄິດລ່ວງໜ້າວ່າຈະເຮັດແນວໃດຖ້າເຈິການລໍ້ໃຈ. ເວລາທີ່ດີທີ່ສຸດທີ່ຈະເຮັດແບບນີ້ແມ່ນກ່ອນທີ່ຈະເຈິການລໍ້ໃຈ.—ສພສ. 22:3
17. ເຮົາຮຽນຫຍັງຈາກຕົວຢ່າງຂອງໂຢເຊັບ? (ປະຖົມມະການ 39:7-9) (ເບິ່ງຮູບນຳ)
17 ໃຫ້ເຮົາມາເບິ່ງວ່າໂຢເຊັບໄດ້ເຮັດແນວໃດຕອນທີ່ເມຍໂປຕີຟາຊວນລາວໃຫ້ໄປນອນນຳ. ລາວໄດ້ປະຕິເສດທັນທີແລະຢ່າງໜັກແໜ້ນ. (ອ່ານປະຖົມມະການ 39:7-9) ເຮົາຮຽນຫຍັງຈາກເລື່ອງນີ້? ໂຢເຊັບຮູ້ວ່າການຫຼິ້ນຊູ້ກັບເມຍຂອງຄົນອື່ນເປັນເລື່ອງທີ່ຜິດ ແລະລາວຕັ້ງໃຈໄວ້ແລ້ວວ່າຈະເຮັດສິ່ງທີ່ຖືກຕ້ອງກ່ອນທີ່ເມຍຂອງໂປຕີຟາຈະຊວນລາວໃຫ້ໄປນອນນຳ. ຄ້າຍຄືກັນ ເຈົ້າກໍຄວນຕັ້ງໃຈທີ່ຈະເຮັດສິ່ງທີ່ຖືກຕ້ອງກ່ອນທີ່ຈະເຈິການລໍ້ໃຈແທ້ໆ. ເມື່ອເຮັດແບບນັ້ນ ຕອນທີ່ເຈິການລໍ້ໃຈເຈົ້າກໍຈະປະຕິເສດມັນໄດ້ງ່າຍຂຶ້ນຍ້ອນເຈົ້າຕັ້ງໃຈໄວ້ແລ້ວວ່າຈະເຮັດສິ່ງທີ່ຖືກຕ້ອງ.
ໃຫ້ປະຕິເສດການລໍ້ໃຈທັນທີຄືກັບທີ່ໂຢເຊັບເຮັດ (ເບິ່ງຂໍ້ 17)
“ໃຫ້ກວດເບິ່ງໂຕເອງຢູ່ສະເໝີ”
18. ເຈົ້າຕ້ອງເຮັດຫຍັງອີກເພື່ອຈະເອົາຊະນະຄວາມຕ້ອງການທີ່ຜິດໆ? (2 ໂກຣິນໂທ 13:5)
18 ເພື່ອຈະເອົາຊະນະຄວາມຕ້ອງການທີ່ຜິດໆ ເຈົ້າຕ້ອງ “ກວດເບິ່ງໂຕເອງຢູ່ສະເໝີ” ວ່າຕອນນີ້ເຈົ້າເປັນແນວໃດ. (ອ່ານ 2 ໂກຣິນໂທ 13:5) ໃຫ້ກວດເບິ່ງຄວາມຄິດແລະການກະທຳຂອງໂຕເອງເປັນໄລຍະໆ ແລະໃຫ້ປັບປ່ຽນຖ້າເຫັນວ່າຈຳເປັນ. ຕົວຢ່າງເຊັ່ນ: ສົມມຸດວ່າເຈົ້າກຳລັງຕໍ່ສູ້ກັບຄວາມຕ້ອງການທີ່ຜິດໆ. ເຖິງວ່າເຈົ້າປະຕິເສດການລໍ້ໃຈໄດ້ແລ້ວ ເຈົ້າອາດຖາມໂຕເອງວ່າ: ‘ຂ້ອຍໃຊ້ເວລາດົນປານໃດຈຶ່ງປະຕິເສດໄດ້?’ ຖ້າເຈົ້າຮູ້ສຶກວ່າໂຕເອງບໍ່ໄດ້ປະຕິເສດທັນທີ ກໍບໍ່ຕ້ອງໂທດໂຕເອງ. ແຕ່ໃຫ້ຄິດວ່າເຈົ້າຈະເຮັດໃຫ້ດີຂຶ້ນໄດ້ແນວໃດໃນເທື່ອຕໍ່ໄປ. ເຈົ້າອາດຖາມໂຕເອງດ້ວຍຄຳຖາມຕໍ່ໄປນີ້: ‘ເມື່ອຂ້ອຍມີຄວາມຄິດທີ່ບໍ່ຖືກຕ້ອງ ຂ້ອຍຢຸດຄິດກ່ຽວກັບເລື່ອງນັ້ນທັນທີບໍ? ສິ່ງທີ່ຂ້ອຍເບິ່ງ ອ່ານ ແລະຟັງເຮັດໃຫ້ຍາກສຳລັບຂ້ອຍບໍທີ່ຈະຕ້ານທານການລໍ້ໃຈ? ຕອນທີ່ເຫັນສາກຜິດສິນລະທຳ ຂ້ອຍປິ່ນໜ້າໜີທັນທີບໍ? ເຖິງວ່າຕ້ອງໄດ້ຄວບຄຸມໂຕເອງເພື່ອຈະເຮັດຕາມມາດຕະຖານຂອງພະເຢໂຫວາ ແຕ່ຂ້ອຍເຊື່ອບໍວ່າການເຮັດແບບນັ້ນດີທີ່ສຸດສຳລັບຂ້ອຍ?’—ພສ. 101:3
19. ເປັນຫຍັງເລື່ອງເລັກນ້ອຍບາງຢ່າງອາດເຮັດໃຫ້ເຮົາຕໍ່ສູ້ກັບຄວາມຕ້ອງການທີ່ຜິດໆໄດ້ຍາກ?
19 ເຈົ້າຍັງຕ້ອງຫຼີກລ່ຽງການຫາເຫດຜົນເຂົ້າຂ້າງໂຕເອງ. ຄຳພີໄບເບິນບອກວ່າ: “ຫົວໃຈທໍລະຍົດຫຼາຍກວ່າທຸກສິ່ງແລະລໍ້ໃຫ້ເຮັດຊົ່ວໄດ້ທຸກຢ່າງ.” (ຢຣມ. 17:9) ພະເຢຊູເວົ້າວ່າ “ຄວາມຄິດຊົ່ວ” ມາຈາກໃຈ. (ມທ. 15:19) ຕົວຢ່າງເຊັ່ນ: ຄົນທີ່ເຊົາເບິ່ງສື່ລາມົກອາດຄິດວ່າ “ບໍ່ອັນຕະລາຍ” ທີ່ຈະເບິ່ງຮູບທີ່ກະຕຸ້ນອາລົມທາງເພດຍ້ອນມັນບໍ່ແມ່ນຮູບໂປ້ ຫຼືລາວອາດຄິດວ່າ ‘ມັນບໍ່ແມ່ນເລື່ອງຜິດທີ່ຈະຈິນຕະນາການກ່ຽວກັບຄວາມຕ້ອງການທີ່ບໍ່ຖືກຕ້ອງຖ້າຂ້ອຍບໍ່ໄດ້ເຮັດແບບນັ້ນແທ້ໆ.’ ຄົນທີ່ຄິດແບບນີ້ເປັນຄືກັບລາວກຳລັງ “ວາງແຜນເພື່ອເຮັດຕາມຄວາມຕ້ອງການຂອງຮ່າງກາຍທີ່ມີບາບ.” (ຣມ. 13:14) ເຈົ້າຈະຫຼີກລ່ຽງທີ່ຈະບໍ່ເຮັດແບບນັ້ນໄດ້ແນວໃດ? ເຈົ້າຕ້ອງບໍ່ຄິດວ່າເລື່ອງເລັກນ້ອຍແບບນີ້ເປັນສິ່ງທີ່ເຮັດໄດ້ ຍ້ອນມັນອາດນຳໄປສູ່ການເຮັດສິ່ງທີ່ບໍ່ສະຫຼາດໃນເລື່ອງໃຫຍ່ໆເຊິ່ງຈະເຮັດໃຫ້ເຈົ້າລົງມືເຮັດຜິດໄດ້.b ໃຫ້ຫຼີກລ່ຽງ “ຄວາມຄິດຊົ່ວ” ແບບໃດກໍຕາມທີ່ເຮັດໃຫ້ເຈົ້າຫາຂໍ້ອ້າງທີ່ຈະເຮັດຜິດ.
20. ເຮົາມີຄວາມຫວັງຫຍັງໃນອະນາຄົດ ແລະເຮົາໄດ້ຮັບຄວາມຊ່ວຍເຫຼືອແນວໃດໃນຕອນນີ້?
20 ຄືກັບທີ່ເຮົາໄດ້ຮຽນໃນບົດນີ້ ພະເຢໂຫວາໃຫ້ເຮົາມີກຳລັງທີ່ຈະຕ້ານທານການລໍ້ໃຈໄດ້. ນອກຈາກນັ້ນ ພະເຢໂຫວາຍັງໄດ້ສະແດງຄວາມເມດຕາຕໍ່ເຮົາໂດຍໃຫ້ມີຄ່າໄຖ່ເຊິ່ງເຮັດໃຫ້ເຮົາມີຄວາມຫວັງທີ່ຈະມີຊີວິດຕະຫຼອດໄປໃນໂລກໃໝ່. ໃນຕອນນັ້ນ ເຮົາຈະມີຄວາມສຸກຫຼາຍແທ້ໆທີ່ຈະໄດ້ຮັບໃຊ້ພະເຢໂຫວາໂດຍທີ່ບໍ່ຕ້ອງຕໍ່ສູ້ກັບຄວາມຕ້ອງການທີ່ຜິດໆອີກຕໍ່ໄປ. ແຕ່ກ່ອນຈະຮອດຕອນນັ້ນ ເຮົາໝັ້ນໃຈໄດ້ວ່າເຮົາຈະມີກຳລັງແລະມີຫວັງທີ່ຈະຕໍ່ສູ້ກັບຄວາມຕ້ອງການທີ່ຜິດໆໄດ້. ເມື່ອພະເຢໂຫວາຊ່ວຍ ແລະເຮົາອອກຄວາມພະຍາຍາມໄປນຳ ເຮົາກໍຈະເອົາຊະນະມັນໄດ້!
ເພງທີ 122 ຂໍໃຫ້ຢືນຢັດໝັ້ນຄົງ!
a ການອະທິບາຍຄຳສັບ: ໃນຄຳພີໄບເບິນ ຄຳວ່າ “ບາບ” ມັກໝາຍເຖິງການເຮັດຜິດ ເຊັ່ນ: ການລັກ ການຫຼິ້ນຊູ້ ຫຼືການຂ້າຄົນ. (ອພຍ. 20:13-15; 1ກຣ. 6:18) ແຕ່ພະຄຳພີບາງຂໍ້ອະທິບາຍຄຳວ່າ “ບາບ” ໝາຍເຖິງຄວາມບໍ່ສົມບູນແບບທີ່ເຮົາໄດ້ຮັບມາຕັ້ງແຕ່ເກີດເຖິງວ່າເຮົາບໍ່ໄດ້ເຮັດຫຍັງຜິດ.
b ຂໍໃຫ້ສັງເກດວ່າຊາຍໜຸ່ມທີ່ເວົ້າເຖິງໃນສຸພາສິດ 7:7-23 ໄດ້ຕັດສິນໃຈແບບບໍ່ສະຫຼາດໃນເລື່ອງເລັກນ້ອຍກ່ອນທີ່ລາວຈະຕັດສິນໃຈແບບບໍ່ສະຫຼາດໃນເລື່ອງໃຫຍ່ໆ ນັ້ນກໍຄືລາວຍອມແພ້ຕໍ່ການລໍ້ໃຈທີ່ຈະເຮັດຜິດສິນລະທຳທາງເພດ.
c ຄຳອະທິບາຍຮູບ: ຮູບເບື້ອງຊ້າຍ: ຕອນທີ່ພີ່ນ້ອງຊາຍຄົນໜຶ່ງນັ່ງຢູ່ຮ້ານກາເຟ ລາວເຫັນຜູ້ຊາຍ 2 ຄົນສະແດງຄວາມຮັກຕໍ່ກັນ. ຮູບເບື້ອງຂວາ: ພີ່ນ້ອງຍິງຄົນໜຶ່ງເຫັນ 2 ຄົນກຳລັງສູບຢາ.