ບົດຄວາມສຶກສາທີ 44
ເພງທີ 138 ຄວາມງາມຂອງຄົນຜົມຫງອກ
ໃຫ້ມີຄວາມສຸກສະເໝີເຖິງວ່າເຖົ້າແລ້ວ
“ເຖິງວ່າເຖົ້າແລ້ວ ເຂົາເຈົ້າກໍຍັງຈະເກີດໝາກ.”—ພສ. 92:14
ຈຸດສຳຄັນ
ເປັນຫຍັງຈຶ່ງສຳຄັນທີ່ພີ່ນ້ອງສູງອາຍຸຈະພະຍາຍາມມີຄວາມສຸກຢູ່ສະເໝີ ແລະເຂົາເຈົ້າຈະເຮັດແບບນັ້ນໄດ້ແນວໃດ.
1-2. ພະເຢໂຫວາເບິ່ງພີ່ນ້ອງສູງອາຍຸທີ່ສັດຊື່ແນວໃດ? (ເພງສັນລະເສີນ 92:12-14; ເບິ່ງຮູບໜ້າປົກນຳ)
ຄົນໃນໂລກຄິດບໍ່ຄືກັນໃນເລື່ອງຄວາມເຖົ້າແກ່. ບາງຄົນຄິດວ່າເຖົ້າແລ້ວດີຍ້ອນຊິມີຄົນນັບຖື. ແຕ່ບາງຄົນກໍບໍ່ຢາກເຖົ້າແລະພະຍາຍາມເຮັດທຸກສິ່ງເພື່ອຈະບໍ່ໃຫ້ໂຕເອງເບິ່ງຄືເຖົ້າ. ຕົວຢ່າງເຊັ່ນ: ຖ້າເຫັນຜົມຫງອກເສັ້ນໜຶ່ງ ເຂົາເຈົ້າກໍຈະຫຼົກອອກທັນທີ. ແຕ່ເຖິງວ່າເຂົາເຈົ້າຈະພະຍາຍາມຫຼົກອອກ ມັນກໍຍັງຈະປົ່ງຂຶ້ນມາຢູ່. ຕົວຢ່າງນີ້ສະແດງໃຫ້ເຫັນວ່າບໍ່ວ່າເຮົາຈະພະຍາຍາມຫຼາຍສ່ຳໃດ ເຮົາກໍບໍ່ສາມາດຢຸດຄວາມເຖົ້າແກ່ໄດ້.
2 ແຕ່ພະເຢໂຫວາພໍ່ຂອງເຮົາທີ່ຢູ່ໃນສະຫວັນບໍ່ໄດ້ຄິດແບບນັ້ນກັບຜູ້ຮັບໃຊ້ຂອງເພິ່ນທີ່ສັດຊື່ເຊິ່ງເຖົ້າແລ້ວ. (ສພສ. 16:31) ເພິ່ນເບິ່ງເຂົາເຈົ້າວ່າເປັນຄືກັບຕົ້ນໄມ້ທີ່ເກີດໝາກ. (ອ່ານເພງສັນລະເສີນ 92:12-14) ເປັນຫຍັງການປຽບທຽບນີ້ຈຶ່ງເໝາະສົມ? ຕົ້ນໄມ້ທີ່ງາມໆມັກຈະມີອາຍຸຫຼາຍສິບປີຍ້ອນມັນມີລຳຕົ້ນທີ່ໃຫຍ່ແລະມີງ່າຫຼາຍ ມີດອກ ແລະມີໃບດົກເຕັມຕົ້ນ. ຕົ້ນໄມ້ຊະນິດໜຶ່ງທີ່ງາມຫຼາຍແມ່ນຕົ້ນຊາກຸລະທີ່ຢູ່ຍີ່ປຸ່ນແລະຢູ່ບ່ອນອື່ນໆໃນໂລກ. ຕົ້ນທີ່ງາມທີ່ສຸດມີອາຍຸຫຼາຍກວ່າ 1.000 ປີ. ຄ້າຍຄືກັນ ພີ່ນ້ອງສູງອາຍຸທີ່ຮັບໃຊ້ພະເຢໂຫວາຢ່າງສັດຊື່ມາຫຼາຍປີມີຄ່າຫຼາຍສຳລັບເພິ່ນ. ພະເຢໂຫວາບໍ່ໄດ້ເບິ່ງວ່າເຂົາເຈົ້າເປັນແຕ່ຜູ້ເຖົ້າທີ່ຜົມຫງອກ ແຕ່ເພິ່ນເບິ່ງວ່າເຂົາເຈົ້າມີຄຸນລັກສະນະທີ່ດີຫຼາຍຢ່າງລວມທັງມີຄວາມອົດທົນແລະສັດຊື່ພັກດີ ແລະເພິ່ນບໍ່ເຄີຍລືມວຽກຮັບໃຊ້ທີ່ເຂົາເຈົ້າເຮັດເພື່ອເພິ່ນມາຫຼາຍປີ.
ຄືກັບຕົ້ນໄມ້ງາມໆທີ່ມີອາຍຸຫຼາຍສິບປີແລະຍັງເກີດໝາກ ພີ່ນ້ອງສູງອາຍຸທີ່ສັດຊື່ກໍຍັງມີຄ່າແລະເກີດໝາກຕໍ່ໆໄປ (ເບິ່ງຂໍ້ 2)
3. ພະເຢໂຫວາໃຊ້ຄົນສູງອາຍຸແນວໃດເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ? ຂໍໃຫ້ຍົກຕົວຢ່າງ
3 ເຖິງຈະອາຍຸຫຼາຍຂຶ້ນ ແຕ່ເຮົາກໍບໍ່ໄດ້ມີຄ່າໜ້ອຍລົງສຳລັບພະເຢໂຫວາ.a ທີ່ຈິງ ເຮົາເຫັນວ່າພະເຢໂຫວາມັກໃຊ້ຄົນສູງອາຍຸເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ. ຕົວຢ່າງເຊັ່ນ: ຕອນທີ່ພະເຢໂຫວາບອກວ່າຊາຣາຈະເປັນແມ່ຂອງຊາດໜຶ່ງແລະເມຊີອາຈະເປັນລູກຫຼານຂອງລາວ ຕອນນັ້ນຊາຣາກໍອາຍຸຫຼາຍແລ້ວ. (ປຖກ. 17:15-19) ຕອນທີ່ພະເຢໂຫວາມອບໝາຍໃຫ້ໂມເຊພາຊາດອິດສະຣາເອນອອກຈາກເອຢິບ ຕອນນັ້ນລາວກໍເຖົ້າຫຼາຍແລ້ວ. (ອພຍ. 7:6, 7) ຕອນທີ່ພະເຢໂຫວາດົນໃຈໃຫ້ອັກຄະສາວົກໂຢຮັນຂຽນປຶ້ມ 5 ຫົວໃນພະຄຳພີ ລາວກໍເຖົ້າຫຼາຍຄືກັນ.
4. ຕາມສຸພາສິດ 15:15 ອັນໃດຈະຊ່ວຍພີ່ນ້ອງທີ່ສູງອາຍຸໃຫ້ຮັບມືກັບບັນຫາໄດ້? (ເບິ່ງຮູບນຳ)
4 ເມື່ອເຖົ້າລົງ ເຮົາກໍຈະເຈິບັນຫາຫຼາຍຢ່າງ. ພີ່ນ້ອງຍິງສູງອາຍຸຄົນໜຶ່ງເວົ້າແບບຕະຫຼົກວ່າ: “ການໃຊ້ຊີວິດຕອນເຖົ້າບໍ່ແມ່ນໝົດທຸກຄົນຊິເຮັດໄດ້ໄດ໋.” ແຕ່ພະເຢໂຫວາສາມາດຊ່ວຍເຈົ້າໃຫ້ມີຄວາມສຸກຄວາມຍິນດີbຢູ່ສະເໝີເມື່ອຕ້ອງຮັບມືກັບບັນຫາຕ່າງໆຕອນທີ່ອາຍຸຫຼາຍຂຶ້ນ. (ອ່ານສຸພາສິດ 15:15) ໃນບົດນີ້ ເຮົາຈະເບິ່ງຄຳແນະນຳທີ່ຊ່ວຍພີ່ນ້ອງສູງອາຍຸໃຫ້ມີຄວາມສຸກຢູ່ສະເໝີ ແລະເຮົາຈະເບິ່ງວ່າເຮົາຈະຊ່ວຍພີ່ນ້ອງສູງອາຍຸໃນປະຊາຄົມໄດ້ແນວໃດ. ແຕ່ທຳອິດເຮົາຈະເບິ່ງວ່າອັນໃດອາດເຮັດໃຫ້ຍາກທີ່ເຮົາຈະມີຄວາມສຸກຢູ່ສະເໝີເມື່ອອາຍຸຫຼາຍຂຶ້ນ.
ການພະຍາຍາມມີຄວາມສຸກຢູ່ສະເໝີຈະຊ່ວຍພີ່ນ້ອງສູງອາຍຸໃຫ້ອົດທົນກັບບັນຫາຕ່າງໆໄດ້ເມື່ອອາຍຸຫຼາຍຂຶ້ນ (ເບິ່ງຂໍ້ 4)
ອັນໃດອາດເຮັດໃຫ້ຍາກທີ່ຈະມີຄວາມສຸກຢູ່ສະເໝີເມື່ອອາຍຸຫຼາຍຂຶ້ນ?
5. ມີຫຍັງແດ່ທີ່ອາດເຮັດໃຫ້ພີ່ນ້ອງສູງອາຍຸບາງຄົນທໍ້ໃຈ?
5 ມີຫຍັງແດ່ທີ່ອາດເຮັດໃຫ້ເຈົ້າທໍ້ໃຈ? ເຈົ້າອາດເຮັດບາງຢ່າງບໍ່ໄດ້ຄືກັບທີ່ເຄີຍເຮັດ. ເຈົ້າອາດຄິດເຖິງຕອນທີ່ຍັງໜຸ່ມແລະຍັງແຂງແຮງ. (ປຍຈ. 7:10) ຕົວຢ່າງເຊັ່ນ: ພີ່ນ້ອງຍິງຊື່ຣູບີ້ເວົ້າວ່າ: “ພຽງແຕ່ນຸ່ງເຄື່ອງກໍຍາກແລ້ວ ຍ້ອນຍົກແຂນຍົກຂາບໍ່ໄດ້ຄືແຕ່ກີ້ແລະຂ້ອຍປວດຕົນປວດໂຕ. ເຮັດຫຍັງກໍບໍ່ຄ່ອງແຄ່ວ ເລື່ອງງ່າຍໆເຊັ່ນ: ຍົກຂາຂຶ້ນມາໃສ່ຖົງຕີນກໍຍັງຍາກແລ້ວ. ມືກໍຊາແລະປວດຕາມຂໍ້ຕາມກະດູກ ແນວງ່າຍໆກໍເກືອບເຮັດບໍ່ໄດ້.” ພີ່ນ້ອງແຮໂຣທີ່ເຄີຍຮັບໃຊ້ຢູ່ເບເທນເວົ້າວ່າ: “ລຸງບໍ່ຄິດວ່າໂຕເອງຈະກາຍມາເປັນແບບນີ້. ບາງເທື່ອກໍຮູ້ສຶກຫງຸດຫງິດຍ້ອນເຮັດສິ່ງທີ່ໂຕເອງມັກບໍ່ໄດ້ແລ້ວ. ແຕ່ກີ້ລຸງແຂງແຮງແລະມັກຫຼິ້ນກິລາຫຼາຍໂດຍສະເພາະແມ່ນເບສບອນ. ໝູ່ມັກຈະເວົ້າວ່າ: ‘ໂຍນບານໃຫ້ແຮໂຣເລີຍ ລາວບໍ່ພາດແນ່ນອນ.’ ແຕ່ຕອນນີ້ຫວາ ພຽງແຕ່ໂຍນບານກໍຍັງບໍ່ໄຫວແລ້ວ.”
6. (ກ) ມີຫຍັງອີກທີ່ເຮັດໃຫ້ພີ່ນ້ອງສູງອາຍຸບາງຄົນຮູ້ສຶກທໍ້ໃຈ? (ຂ) ອັນໃດຈະຊ່ວຍພີ່ນ້ອງສູງອາຍຸຕັດສິນໃຈໄດ້ວ່າຈະເຊົາຂັບລົດຕອນໃດ? (ເບິ່ງບົດຄວາມ “ຂ້ອຍຄວນເຊົາຂັບລົດບໍ?”)
6 ເຈົ້າອາດຮູ້ສຶກທໍ້ໃຈຍ້ອນຕອນນີ້ບໍ່ສາມາດເຮັດທຸກຢ່າງດ້ວຍໂຕເອງໄດ້ ອາດເປັນຍ້ອນຕ້ອງມີຄົນມາເບິ່ງແຍງເຈົ້າຕະຫຼອດເວລາຫຼືຕ້ອງຍ້າຍໄປຢູ່ນຳລູກ. ຫຼືເຈົ້າອາດທໍ້ໃຈຍ້ອນຕອນນີ້ສຸຂະພາບຊຸດໂຊມລົງ ຫຼືສາຍຕາບໍ່ດີຈົນໄປຫັ້ນມານີ້ດ້ວຍໂຕເອງບໍ່ໄດ້ ຫຼືຂັບລົດເອງບໍ່ໄດ້ແລ້ວ. ເມື່ອເປັນແບບນີ້ອາດເຮັດໃຫ້ເຈົ້າຮູ້ສຶກເສົ້າໃຈຫຼາຍ. ແຕ່ຂໍໃຫ້ຈື່ໄວ້ວ່າການທີ່ພະເຢໂຫວາແລະພີ່ນ້ອງຈະເບິ່ງວ່າເຈົ້າມີຄ່າຫຼືບໍ່ ບໍ່ໄດ້ຂຶ້ນກັບວ່າເຈົ້າເບິ່ງແຍງໂຕເອງໄດ້ບໍ່ ຢູ່ຄົນດຽວໄດ້ບໍ່ ຫຼືຂັບລົດເອງໄດ້ບໍ່. ຂໍໃຫ້ໝັ້ນໃຈວ່າພະເຢໂຫວາເຂົ້າໃຈຄວາມຮູ້ສຶກຂອງເຈົ້າ. ສິ່ງທີ່ສຳຄັນສຳລັບເພິ່ນແມ່ນເຈົ້າເປັນຄົນແບບໃດ. ພະເຢໂຫວາຮູ້ວ່າເຈົ້າຮັກເພິ່ນແລະຮັກພີ່ນ້ອງຫຼາຍ. ສິ່ງນີ້ແຫຼະທີ່ເຮັດໃຫ້ເຈົ້າມີຄ່າສຳລັບເພິ່ນ.—1ຊມ. 16:7
7. ຖ້າເຈົ້າຮູ້ສຶກເສົ້າໃຈຍ້ອນຄິດວ່າເຈົ້າອາດຈະຕາຍກ່ອນຈະໄດ້ເຫັນຈຸດຈົບຂອງໂລກຊົ່ວນີ້ ອັນໃດຈະຊ່ວຍເຈົ້າໄດ້?
7 ເຈົ້າອາດຮູ້ສຶກເສົ້າໃຈຍ້ອນຄິດວ່າເຈົ້າອາດຈະຕາຍກ່ອນທີ່ຈະໄດ້ເຫັນຈຸດຈົບຂອງໂລກຊົ່ວນີ້. ຖ້າເຈົ້າຮູ້ສຶກແບບນັ້ນ ອັນໃດຈະຊ່ວຍເຈົ້າໄດ້? ຂໍໃຫ້ຈື່ໄວ້ວ່າພະເຢໂຫວາກຳລັງອົດທົນລໍຖ້າທີ່ຈະທຳລາຍໂລກຊົ່ວນີ້. (ອຊຢ. 30:18) ເພິ່ນບໍ່ໄດ້ອົດທົນລໍຖ້າແບບບໍ່ມີຈຸດມຸ່ງໝາຍ. ຄວາມອົດທົນຂອງພະເຢໂຫວາເປັນການໃຫ້ເວລາແລະໃຫ້ໂອກາດຫຼາຍລ້ານຄົນໄດ້ມາຮູ້ຈັກແລະຮັບໃຊ້ເພິ່ນ. (2ປຕ. 3:9) ສະນັ້ນ ເມື່ອເຈົ້າຮູ້ສຶກທໍ້ໃຈ ຂໍໃຫ້ຄິດວ່າຈະມີອີກຫຼາຍຄົນທີ່ຈະໄດ້ຮັບປະໂຫຍດຈາກຄວາມອົດທົນຂອງພະເຢໂຫວາເຊິ່ງໃນນັ້ນອາດລວມເຖິງຄົນໃນຄອບຄົວຂອງເຈົ້ານຳ.
8. ເມື່ອພີ່ນ້ອງທີ່ສູງອາຍຸບໍ່ສະບາຍ ເຂົາເຈົ້າອາດເຮັດຫຍັງ?
8 ບໍ່ວ່າເຮົາຈະອາຍຸໜ້ອຍຫຼືຫຼາຍ ຕອນທີ່ເຮົາບໍ່ສະບາຍບາງເທື່ອເຮົາອາດເວົ້າແລະເຮັດບາງຢ່າງທີ່ເຮັດໃຫ້ເຮົາເສຍໃຈພາຍຫຼັງ. (ປຍຈ. 7:7; ຢກບ. 3:2) ຕົວຢ່າງເຊັ່ນ: ຕອນທີ່ໂຢບເຊິ່ງເປັນຜູ້ຮັບໃຊ້ທີ່ສັດຊື່ຂອງພະເຢໂຫວາເຈິຄວາມຍາກລຳບາກ ລາວກໍ “ເວົ້າອອກມາແບບບໍ່ຄິດ.” (ໂຢບ 6:1-3) ນອກຈາກນັ້ນ ພະຍາດທີ່ຜູ້ສູງອາຍຸເປັນຫຼືຢາທີ່ເຂົາເຈົ້າກິນອາດເຮັດໃຫ້ເຂົາເຈົ້າເວົ້າຫຼືເຮັດບາງຢ່າງເຊິ່ງຕາມປົກກະຕິແລ້ວເຂົາເຈົ້າຈະບໍ່ເຮັດແບບນັ້ນ. ເຖິງຈະເປັນແນວນັ້ນ ບໍ່ວ່າເຮົາຈະອາຍຸຫຼາຍຫຼືເຈັບປ່ວຍເຮົາກໍບໍ່ຄວນໃຊ້ເລື່ອງນີ້ເປັນຂໍ້ອ້າງທີ່ຈະເຮັດບໍ່ດີກັບຄົນອື່ນ. ຖ້າເຮົາຮູ້ໂຕວ່າໄດ້ເວົ້າບາງຢ່າງທີ່ບໍ່ຄວນເວົ້າ ເຮົາຄວນຂໍໂທດທັນທີ.—ມທ. 5:23, 24
ຈະມີຄວາມສຸກຢູ່ສະເໝີໄດ້ແນວໃດ?
ເຈົ້າຈະມີຄວາມສຸກຢູ່ສະເໝີໄດ້ແນວໃດເຖິງວ່າຈະອາຍຸຫຼາຍຂຶ້ນ? (ເບິ່ງຂໍ້ 9-13)
9. ເປັນຫຍັງເຈົ້າຄວນຍອມຮັບຄວາມຊ່ວຍເຫຼືອຈາກຄົນອື່ນ? (ເບິ່ງຮູບນຳ)
9 ໃຫ້ຍອມຮັບຄວາມຊ່ວຍເຫຼືອຈາກຄົນອື່ນ. (ຄລຕ. 6:2) ການເຮັດແບບນີ້ອາດຈະບໍ່ງ່າຍໃນຕອນທຳອິດ. ພີ່ນ້ອງຍິງຊື່ເກຣໂທເວົ້າວ່າ: “ບາງເທື່ອປ້າບໍ່ກ້າຂໍຄວາມຊ່ວຍເຫຼືອຈາກໃຜຍ້ອນຢ້ານວ່າຈະເປັນພາລະໃຫ້ເຂົາເຈົ້າ. ຕ້ອງໃຊ້ເວລາໄລຍະໜຶ່ງເພື່ອປ້າຈະເຊົາຄິດແບບນັ້ນແລະຖ່ອມໃຈຍອມຮັບຄວາມຊ່ວຍເຫຼືອຈາກຄົນອື່ນ.” ເມື່ອເຈົ້າຍອມໃຫ້ຄົນອື່ນຊ່ວຍ ເຈົ້າກໍເຮັດໃຫ້ເຂົາເຈົ້າມີຄວາມສຸກທີ່ໄດ້ເປັນຜູ້ໃຫ້. (ກຈກ. 20:35) ນອກຈາກນັ້ນ ເຈົ້າຍັງຈະມີຄວາມສຸກທີ່ໄດ້ເຫັນວ່າຄົນອື່ນຮັກແລະເປັນຫ່ວງເຈົ້າຫຼາຍແທ້ໆ.
(ເບິ່ງຂໍ້ 9)
10. ເປັນຫຍັງເຈົ້າບໍ່ຄວນລືມທີ່ຈະສະແດງຄວາມຂອບໃຈ? (ເບິ່ງຮູບນຳ)
10 ສະແດງຄວາມຂອບໃຈ. (ກລຊ. 3:15; 1ທຊ. 5:18) ເມື່ອມີຄົນເຮັດສິ່ງດີໆໃຫ້ເຮົາ ເຮົາກໍຮູ້ສຶກຂອບໃຈ ແຕ່ບາງເທື່ອເຮົາອາດລືມສະແດງອອກມາ. ເຖິງຈະເປັນແນວນັ້ນ ຖ້າເຮົາຍິ້ມແລະເວົ້າຂອບໃຈ ເຮົາກໍຈະເຮັດໃຫ້ພີ່ນ້ອງຮູ້ສຶກວ່າລາວມີຄ່າແລະເຮົາເຫັນຄ່າສິ່ງທີ່ລາວເຮັດ. ເລອາທີ່ເບິ່ງແຍງພີ່ນ້ອງສູງອາຍຸໃນເບເທນເວົ້າວ່າ: “ພີ່ນ້ອງຍິງຄົນໜຶ່ງທີ່ຂ້ອຍເບິ່ງແຍງຂຽນຂໍ້ຄວາມໃສ່ເຈ້ຍນ້ອຍໆເພື່ອຂອບໃຈຂ້ອຍ. ເຖິງວ່າຂໍ້ຄວາມທີ່ລາວຂຽນຈະບໍ່ຍາວ ແຕ່ມັນກໍເຮັດໃຫ້ຂ້ອຍໄດ້ກຳລັງໃຈ. ຂ້ອຍດີໃຈທີ່ໄດ້ຮັບຂໍ້ຄວາມແບບນີ້ ມັນເຮັດໃຫ້ຂ້ອຍມີຄວາມສຸກທີ່ຮູ້ວ່າພີ່ນ້ອງເຫັນຄ່າທີ່ຂ້ອຍເບິ່ງແຍງລາວ.”
(ເບິ່ງຂໍ້ 10)
11. ເຈົ້າຈະຊ່ວຍຄົນອື່ນໄດ້ແນວໃດ? (ເບິ່ງຮູບນຳ)
11 ພະຍາຍາມຊ່ວຍຄົນອື່ນ. ເມື່ອເຈົ້າໃຊ້ເວລາແລະກຳລັງເພື່ອຊ່ວຍຄົນອື່ນ ເຈົ້າກໍຈະສົນໃຈບັນຫາຂອງໂຕເອງໜ້ອຍລົງ. ເຮົາສາມາດສົມທຽບຜູ້ສູງອາຍຸວ່າເປັນຄືກັບປຶ້ມທີ່ມີຄວາມຮູ້ຫຼາຍ. ແຕ່ຖ້າບໍ່ມີໃຜອ່ານປຶ້ມເຫຼົ່ານັ້ນ ມັນກໍບໍ່ມີປະໂຫຍດຫຍັງ. ຄ້າຍຄືກັນ ຄົນທີ່ຍັງໜຸ່ມກໍຈະບໍ່ໄດ້ບົດຮຽນທີ່ສຳຄັນຈາກເຈົ້າຖ້າເຈົ້າບໍ່ເວົ້າແລະບໍ່ບອກເຂົາເຈົ້າໃນສິ່ງທີ່ເຈົ້າຮູ້. ໃຫ້ຖາມເຂົາເຈົ້າແລະຕັ້ງໃຈຟັງເຂົາເຈົ້າເວົ້າ. ໃຫ້ສອນເຂົາເຈົ້າວ່າເປັນຫຍັງການໃຊ້ຊີວິດຕາມມາດຕະຖານຂອງພະເຢໂຫວາຈຶ່ງດີທີ່ສຸດແລະເຮັດໃຫ້ມີຄວາມສຸກແທ້. ເມື່ອເຮັດແບບນັ້ນ ເຈົ້າກໍຈະມີຄວາມສຸກທີ່ໄດ້ຊ່ວຍເຫຼືອແລະໃຫ້ກຳລັງໃຈພີ່ນ້ອງທີ່ອາຍຸນ້ອຍກວ່າ.—ພສ. 71:18
(ເບິ່ງຂໍ້ 11)
12. ຕາມເອຊາຢາ 46:4 ພະເຢໂຫວາສັນຍາວ່າຈະເຮັດຫຍັງເພື່ອພີ່ນ້ອງທີ່ສູງອາຍຸ? (ເບິ່ງຮູບນຳ)
12 ອະທິດຖານຂໍກຳລັງຈາກພະເຢໂຫວາ. ບາງເທື່ອເຈົ້າອາດຈະຮູ້ສຶກເມື່ອຍຫຼືທໍ້ໃຈ ແຕ່ຂໍໃຫ້ຈື່ໄວ້ວ່າພະເຢໂຫວາ “ບໍ່ເຄີຍເມື່ອຍຫຼືໝົດແຮງ.” (ອຊຢ. 40:28) ພະເຢໂຫວາໃຊ້ພະລັງທີ່ບໍ່ມີຂີດຈຳກັດຂອງເພິ່ນແນວໃດ? ວິທີໜຶ່ງທີ່ເພິ່ນໃຊ້ແມ່ນ ເພິ່ນໃຫ້ກຳລັງກັບຄົນສູງອາຍຸທີ່ສັດຊື່ຕໍ່ເພິ່ນ. (ອຊຢ. 40:29-31) ທີ່ຈິງ ພະເຢໂຫວາສັນຍາວ່າຈະຊ່ວຍເຂົາເຈົ້າ. (ອ່ານເອຊາຢາ 46:4) ເພິ່ນຮັກສາສັນຍາສະເໝີ. (ຢຊ. 23:14; ອຊຢ. 55:10, 11) ເມື່ອເຈົ້າອະທິດຖານແລະໄດ້ເຫັນດ້ວຍໂຕເອງວ່າພະເຢໂຫວາຮັກແລະກຳລັງຊ່ວຍເຈົ້າຢູ່ ເຈົ້າກໍຈະມີຄວາມສຸກແທ້ໆ.
(ເບິ່ງຂໍ້ 12)
13. ຕາມ 2 ໂກຣິນໂທ 4:16-18 ເຮົາຄວນຈື່ຫຍັງໄວ້? (ເບິ່ງຮູບນຳ)
13 ໃຫ້ຈື່ໄວ້ວ່າສະພາບການຂອງເຈົ້າຈະຢູ່ພຽງຊົ່ວຄາວ. ຕອນທີ່ເຈິກັບເລື່ອງທີ່ຮັບມືໄດ້ຍາກ ຖ້າເຮົາຈື່ໄວ້ວ່າສິ່ງທີ່ກຳລັງເຈິຢູ່ຕອນນີ້ຈະຢູ່ແຕ່ໄລຍະສັ້ນໆເຮົາກໍຈະອົດທົນໄດ້ງ່າຍຂຶ້ນ. ຄຳພີໄບເບິນຮັບຮອງກັບເຮົາວ່າຄວາມເຖົ້າແກ່ແລະບັນຫາສຸຂະພາບຈະຢູ່ແຕ່ຊົ່ວຄາວ. (ໂຢບ 33:25; ອຊຢ. 33:24) ສະນັ້ນ ເຈົ້າສາມາດມີຄວາມສຸກໄດ້ຍ້ອນຮູ້ວ່າໃນອະນາຄົດເຈົ້າຈະມີສຸຂະພາບດີ ແຂງແຮງ ຫຼໍ່ແລະງາມກວ່າເກົ່າ. (ອ່ານ 2 ໂກຣິນໂທ 4:16-18) ແຕ່ຕອນນີ້ເຮົາຈະເບິ່ງວ່າຄົນອື່ນສາມາດເຮັດຫຍັງໄດ້ແດ່ເພື່ອຊ່ວຍເຈົ້າ?
(ເບິ່ງຂໍ້ 13)
ສິ່ງທີ່ຄົນອື່ນຊ່ວຍໄດ້
14. ເປັນຫຍັງຈຶ່ງສຳຄັນທີ່ເຮົາຈະໄປຢາມຫຼືໂທຫາພີ່ນ້ອງທີ່ສູງອາຍຸ?
14 ໄປຢາມແລະໂທຫາພີ່ນ້ອງທີ່ສູງອາຍຸເປັນປະຈຳ. (ຮຣ. 13:16) ພີ່ນ້ອງທີ່ສູງອາຍຸອາດຮູ້ສຶກເຫງົາ. ພີ່ນ້ອງຊາຍຊື່ຄາມິວທີ່ຕ້ອງຢູ່ແຕ່ໃນເຮືອນເວົ້າວ່າ: “ລຸງຕ້ອງຢູ່ແຕ່ໃນເຮືອນຕັ້ງແຕ່ເຊົ້າຈົນຮອດຄ່ຳ. ລຸງຈຶ່ງຮູ້ສຶກເບື່ອຫຼາຍ. ບາງເທື່ອລຸງກໍຮູ້ສຶກວ່າໂຕເອງເປັນຄືກັບສັດໂຕໜຶ່ງທີ່ເຖົ້າແລ້ວທີ່ຖືກຂັງໄວ້ຢູ່ໃນຄອກ. ມັນຮູ້ສຶກອຶດອັດແລະຫງຸດຫງິດຫຼາຍແທ້ໆ.” ເມື່ອເຮົາໄປຢາມພີ່ນ້ອງທີ່ສູງອາຍຸ ເຮົາກໍເຮັດໃຫ້ເຂົາເຈົ້າໝັ້ນໃຈວ່າເຂົາເຈົ້າສຳຄັນຕໍ່ເຮົາແລະເຮົາກໍຮັກເຂົາເຈົ້າ. ບາງເທື່ອເຮົາຕັ້ງໃຈຈະໄປຢາມຫຼືໂທຫາພີ່ນ້ອງທີ່ສູງອາຍຸໃນປະຊາຄົມ ແຕ່ເຮົາກໍບໍ່ໄດ້ເຮັດຍ້ອນເຮົາຫຍຸ້ງຫຼາຍ. ຄັນຊັ້ນ ອັນໃດຈະຊ່ວຍເຮົາໃຫ້ “ເບິ່ງອອກວ່າສິ່ງໃດສຳຄັນກວ່າ” ເຊິ່ງລວມເຖິງການໄປຢາມພີ່ນ້ອງທີ່ສູງອາຍຸ. (ຟລປ. 1:10) ເຮົາອາດຈະຂຽນໄວ້ໃນປະຕິທິນເພື່ອເຕືອນເຮົາໃຫ້ສົ່ງຂໍ້ຄວາມຫຼືໂທຫາພີ່ນ້ອງເຫຼົ່ານັ້ນ. ນອກຈາກນັ້ນ ແທນທີ່ຈະຖ້າໃຫ້ວ່າງກ່ອນແລ້ວຈຶ່ງໄປ ເຮົາຄວນກຳນົດເວລາໄວ້ເລີຍວ່າຈະໄປຢາມເຂົາເຈົ້າຕອນໃດ.
15. ພີ່ນ້ອງທີ່ອາຍຸນ້ອຍແລະພີ່ນ້ອງທີ່ສູງອາຍຸສາມາດເຮັດຫຍັງນຳກັນໄດ້ແດ່?
15 ຄົນທີ່ອາຍຸນ້ອຍກວ່າອາດບໍ່ຮູ້ວ່າຈະລົມຫຼືເຮັດຫຍັງກັບພີ່ນ້ອງສູງອາຍຸ. ແຕ່ເຈົ້າບໍ່ຕ້ອງຄິດຫຼາຍເກີນໄປ ພຽງແຕ່ເປັນໝູ່ທີ່ດີກັບເຂົາເຈົ້າກໍພໍແລ້ວ. (ສພສ. 17:17) ໃຫ້ລົມກັບພີ່ນ້ອງທີ່ສູງອາຍຸກ່ອນແລະຫຼັງການປະຊຸມ. ໃຫ້ເຂົາເຈົ້າເລົ່າໃຫ້ຟັງວ່າເຂົາເຈົ້າມັກພະຄຳພີຂໍ້ໃດ ຫຼືໃຫ້ເຂົາເຈົ້າເລົ່າເລື່ອງຕະຫຼົກຕອນທີ່ເປັນເດັກນ້ອຍໃຫ້ຟັງ. ເຈົ້າອາດຈະຊວນພີ່ນ້ອງສູງອາຍຸໃຫ້ມາເບິ່ງລາຍການໂທລະທັດ JW ນຳກັນ. ເຈົ້າສາມາດຊ່ວຍພີ່ນ້ອງສູງອາຍຸໃນສິ່ງທີ່ເຂົາເຈົ້າເຮັດດ້ວຍໂຕເອງບໍ່ໄດ້ ເຊັ່ນ: ເຈົ້າອາດຊ່ວຍເຂົາເຈົ້າອັບເດດອຸປະກອນເອເລັກໂຕຣນິກຫຼືດາວໂຫຼດປຶ້ມລ່າສຸດທີ່ໃຊ້ສຳລັບສຶກສາ. ພີ່ນ້ອງຍິງທີ່ຊື່ແຄຣໍເວົ້າວ່າ: “ໃຫ້ຊວນພີ່ນ້ອງສູງອາຍຸເຮັດສິ່ງທີ່ເຈົ້າມັກ. ເຖິງວ່າປ້າຈະເຖົ້າແລ້ວ ແຕ່ປ້າກໍຍັງມັກເຮັດສິ່ງທີ່ມ່ວນໆ. ປ້າມັກໄປຊື້ເຄື່ອງ ມັກໄປກິນເຂົ້າຢູ່ນອກບ້ານ ແລະມັກໄປທ່ຽວເບິ່ງທຳມະຊາດ.” ພີ່ນ້ອງຍິງອີກຄົນໜຶ່ງຊື່ມິຣາເວົ້າວ່າ: “ຂ້ອຍມີໝູ່ຄົນໜຶ່ງອາຍຸ 90 ປີ. ເຖິງວ່າລາວອາຍຸຫຼາຍກວ່າຂ້ອຍ 57 ປີ ແຕ່ຫຼາຍເທື່ອຂ້ອຍກໍບໍ່ໄດ້ຄິດເຖິງເລື່ອງນີ້ເລີຍຍ້ອນເຮົາເຮັດແນວມ່ວນໆນຳກັນແລະເບິ່ງໜັງນຳກັນ. ຕອນທີ່ເຈິບັນຫາ ເຮົາກໍຂໍຄຳແນະນຳຈາກກັນແລະກັນ.”
16. ເປັນຫຍັງຈຶ່ງດີທີ່ຈະໄປເປັນໝູ່ພີ່ນ້ອງສູງອາຍຸຕອນທີ່ເຂົາເຈົ້າໄປຫາໝໍ?
16 ໄປເປັນໝູ່ຕອນທີ່ໝໍນັດ. ນອກຈາກໄປຮັບໄປສົ່ງພີ່ນ້ອງສູງອາຍຸຢູ່ໂຮງໝໍແລ້ວ ເຈົ້າອາດຢູ່ກັບເຂົາເຈົ້າຕອນທີ່ພົບທ່ານໝໍແລະເບິ່ງວ່າເຂົາເຈົ້າໄດ້ຮັບການເບິ່ງແຍງເອົາໃຈໃສ່ຢ່າງດີບໍ່. (ອຊຢ. 1:17) ຕອນທີ່ໝໍອະທິບາຍກັບພີ່ນ້ອງສູງອາຍຸ ເຈົ້າອາດຈະຊ່ວຍຈົດຂໍ້ມູນ. ພີ່ນ້ອງຍິງສູງອາຍຸທີ່ຊື່ຣູດເວົ້າວ່າ: “ຫຼາຍເທື່ອຕອນທີ່ປ້າໄປຫາໝໍຄົນດຽວ ໝໍບໍ່ຄ່ອຍເອົາໃຈໃສ່ປ້າປານໃດ. ບາງເທື່ອໝໍບອກປ້າວ່າ ‘ປ້າບໍ່ໄດ້ເປັນຫຍັງດອກ! ປ້າຄິດເອົາເອງຊື່ໆ.’ ແຕ່ຕອນທີ່ມີຄົນໄປນຳ ໝໍພັດປະຕິບັດກັບປ້າອີກແບບໜຶ່ງ. ປ້າຮູ້ສຶກຂອບໃຈຫຼາຍແທ້ໆທີ່ພີ່ນ້ອງສະລະເວລາໄປກັບປ້າ.”
17. ມີວຽກຮັບໃຊ້ແບບໃດແດ່ທີ່ເຮົາສາມາດເຮັດກັບພີ່ນ້ອງສູງອາຍຸ?
17 ເຮັດວຽກຮັບໃຊ້ກັບພີ່ນ້ອງສູງອາຍຸ. ພີ່ນ້ອງສູງອາຍຸບາງຄົນອາດບໍ່ມີແຮງທີ່ຈະໄປປະກາດຕາມບ້ານ. ຖ້າເປັນແນວນັ້ນ ເຈົ້າຈະຮັບໃຊ້ກັບເຂົາເຈົ້າໄດ້ແນວໃດ? ເຈົ້າອາດຊວນພີ່ນ້ອງຍິງສູງອາຍຸໄປປະກາດສາທາລະນະນຳກັນ. ເຈົ້າອາດເອົາຕັ່ງໄປນຳເພື່ອໃຫ້ລາວນັ່ງຢູ່ໃກ້ລໍ້ວາງສະແດງປຶ້ມ ຫຼືເຈົ້າອາດພາພີ່ນ້ອງຊາຍສູງອາຍຸໄປສຶກສານຳຫຼືພານັກສຶກສາມາສຶກສາຢູ່ເຮືອນຂອງລາວ. ຖ້າເຮັດໄດ້ ຜູ້ເບິ່ງແຍງສາມາດໃຊ້ເຮືອນຂອງພີ່ນ້ອງສູງອາຍຸຈັດການປະຊຸມເພື່ອການປະກາດເພື່ອໃຫ້ເຂົາເຈົ້າເຂົ້າຮ່ວມໄດ້. ພະເຢໂຫວາຈະມີຄວາມສຸກຫຼາຍເມື່ອເຫັນວ່າເຮົາພະຍາຍາມເຮັດທຸກຢ່າງທີ່ເຮັດໄດ້ເພື່ອສະແດງຄວາມຮັກແລະຄວາມນັບຖືຕໍ່ພີ່ນ້ອງສູງອາຍຸ.—ສພສ. 3:27; ຣມ. 12:10
18. ເຮົາຈະຮຽນຫຍັງໃນບົດຕໍ່ໄປ?
18 ໃນບົດນີ້ເຮົາໄດ້ເຫັນວ່າພະເຢໂຫວາຮັກແລະເຫັນຄ່າພີ່ນ້ອງສູງອາຍຸຫຼາຍແທ້ໆ. ເຮົາທຸກຄົນໃນປະຊາຄົມກໍຮູ້ສຶກແບບນັ້ນຄືກັນ. ການໃຊ້ຊີວິດຕອນເຖົ້າບໍ່ແມ່ນເລື່ອງງ່າຍ ແຕ່ພະເຢໂຫວາຈະຊ່ວຍເຈົ້າໃຫ້ມີຄວາມສຸກຢູ່ສະເໝີ. (ພສ. 37:25) ເຈົ້າຄືຊິໄດ້ກຳລັງໃຈແທ້ໆທີ່ຮູ້ວ່າຊີວິດທີ່ດີທີ່ສຸດບໍ່ແມ່ນຕອນທີ່ເປັນໜຸ່ມເປັນສາວທີ່ຜ່ານມາແລ້ວ ແຕ່ເປັນຊີວິດທີ່ລໍຖ້າຢູ່ຂ້າງໜ້າ. ສຳລັບຄົນທີ່ກຳລັງເບິ່ງແຍງຄົນສູງອາຍຸໃນຄອບຄົວ ເບິ່ງແຍງລູກ ແລະເບິ່ງແຍງໝູ່ທີ່ເຈັບປ່ວຍເດ ເຈົ້າຈະມີຄວາມສຸກຢູ່ສະເໝີໄດ້ແນວໃດ? ເຮົາຈະຕອບຄຳຖາມນີ້ໃນບົດຕໍ່ໄປ.
ເພງທີ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ
a ເບິ່ງວິດີໂອຜູ້ສູງອາຍຸ—ເຈົ້າມີບົດບາດສຳຄັນ ໃນເວັບໄຊ jw.org ແລະໃນແອັບ JW Library®. (ພາສາໄທ)